Nɔ̍mbāā 21 - Yāu̍ Mɛ̄lɛ̄ka̍a̍

A̍ mɛ̄ɛ̍ I̍sɔ̄lūɛ̍i̍ya̍ ā yēm Ke̍na̍na̍i̍tīi̍ya̍ yɛ̍ o̍kɔ̄ɔ̄

¹ Mɛ̄ɛ̍ A̍lu̍a̍dī, māsa̍ Ke̍na̍na̍i̍tīi̍ya̍, o̍ wa̍ Ke̍nāŋ ba᷅ tōūwo̍ wo̍ ō tūēī māā I̍sɔ̄lūɛ̍i̍ya̍ ā chō fūlāa̍ a̍ nɛ̄i̍ A̍ta̍lūīm chi̍e̍e̍ wo̍, ma̍ wā hūnɔ̄ɔ̍, mbo̍ kɔ̍ chi᷅ŋa᷅la᷅ŋ nda̍, ndu̍yɛ̍ mbo̍ yām nda̍, mbo̍ bīū I̍sɔ̄lūɛ̍i̍ya̍ ā ti᷄ŋ mbo̍ kūā a̍ nda̍ o̍ bīyɔ̄ɔ̍ ni᷄ŋ.

² O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā chūā būŋgɛ̄i̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, ma̍ dīmūl ndu̍ āā, “Tē a̍ ma̍la̍ na̍a̍ pɛ̍ Mɛ̄lɛ̄ka̍, mī ŋ̄ yēm wāŋnda̍ ha̍ā, ŋ̄ cho̍ chi̍e̍e̍ŋ ndāa̍ŋ kpo̍u̍ tɛ̍ɛ̍mbūū, mī ŋ̄ mīŋgi̍ mu̍ŋ lādɛ̍ŋgbɛ̍.”

³ Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī pīɛ̄īlē ndāle̍ŋ, mbo̍ tōsā ma̍ yām Ke̍na̍na̍i̍tīi̍ya̍. O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ di̍ū wāŋnda̍ ha̍ā kpo̍u̍, ndu̍yɛ̍ ma̍ tɛ̄ɛ̄mbūū chi̍e̍e̍ŋ ndāa̍ŋ kpo̍u̍, ma̍ mīŋgī mu̍ŋ lādɛ̍ŋgbɛ̍. O̍ ko̍ŋ, ma̍ kē fo̍ndā kōŋ dīōla̍ŋ āā Hɔ̍ɔ̍māā.

A̍ kɛ̄ū nda̍ tūūla̍ a̍ būlɔ᷄ŋsīi̍ye̍ wo̍ o̍kɔ̄ɔ̄

⁴ O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā māl nāa̍ nda̍ wa̍ o̍ Pēmbīī Hɔ̍ɔ̄ve̍ wa̍, ma̍ chūā nɛ̄i̍ ku̍ɛ̄ o̍ Pēē Si̍a̍ŋā Mɛ̄ŋmā Īhɛ᷄llo̍ wo̍, le̍ mī nda̍ a̍a̍ pi̍la̍ pi̍la᷄ŋ lɛ᷅ŋndē I̍dɔ̄mnde̍ŋ. Kɛ̍ o̍ kɔ̄lā ndāla̍ŋ ni᷄ŋ, ma̍ sāŋgā a̍ sɔ̄ɔ̍ŋ wa̍ nda̍ kōmāllo̍ wo̍ŋ bīūwɔ᷄ŋndo̍.

⁵ Ma̍ kāndū ŋɔ̄ɔ̄chīa̍ŋndo̍ a̍ Mɛ̄lɛ̄ka̍ nda̍ Mūu̍sē. Ma̍ dīmūl Mūu̍sē āā, “Le̍ yɛ̄ɛ̍nɛ̍ ŋ̄ sōli̍ yɛ̄ na̍a̍ o̍ lɛ̄ŋndē I̍chi̍pīle̍ŋ ni᷄ŋ, ma̍ hūŋ a̍ na̍a̍ o̍ po̍llo̍ ho̍ō ni᷄ŋ le̍ mī ŋ̄ hu᷄ŋ chu̍ū na̍nu᷄ŋ? Ŋ̄ sɔ̍lā nyɛ᷅ dīāā kɛ̄ndɛ̄ na̍a̍ ŋ̄ dē le̍, ŋ̄ sɔ̍la̍ mɛ̄ŋmā kōlāā le̍. Na̍a̍ ŋ̄ sāŋga̍ ni᷅ŋ a̍ nyɛ̄ dīāā wɔ̄ɔ̍ŋndo̍ ho̍ō.”

⁶ Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī ŋɔ̄ɔ̄chīa̍ŋnda̍ wāŋnda̍ ha̍ā ā wa̍ la̍ŋ, mbo̍ yɔ̄ŋ kɛ̄ūwāā wɔ̄ɔ̍ŋ wɔ̄ɔ̍ŋnda̍ nda̍ tɛ̄ɛ̄ŋ ma̍ hu᷄ŋ lɔ̍ɔ̍vīāā nda̍, mi̍ wānāā bɔ̄ɔ̍ bɔ̍ɔ̍ a̍ wu᷅.

⁷ O̍ ko̍ŋ, mi̍ wāŋnda̍ I̍sɔ̄lūɛ̄ī a̍ ku̍ā nāa̍ Mūu̍sē chu̍a̍, ma̍ kɔ̍ di̍mūl ndu̍ āā, “Ŋ̄ tōsa̍ yɔ̄ŋ wɔ̄ɔ̍ŋndo̍ Mūu̍sē, fo̍ndōle̍, le̍ ŋɔ̄ɔ̄chīa̍ŋ na̍a̍ ŋ̄ ŋɔ̄ɔ̄chīa̍ŋ a̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ a̍ nūmndo̍. Le̍la̍ŋ yāndi̍i̍, pi̍ɛ̍i̍ Mɛ̍lɛ̄ka̍ Ya̍a̍wɛ̄ɛ̄ le̍ na̍a̍ mbo̍ sōli̍ na̍a̍ kɛ̄ūwa̍ ha̍ā tɛ̄ɛ̄ŋ.” Ndu̍yɛ̍ mi̍ Mūu̍sē o̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ le̍ nda̍.

⁸ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Chu̍a̍ būlɔ̍ŋsīi̍ye̍ mā tu̍u̍la̍ kɛ̄ū wɔ̄ɔ̍ŋ wɔ̄ɔ̍ŋndo̍ a̍ ndi̍, mā he̍e̍lu̍ ndu̍ o̍ yɔ̄m vīlɛ̄īyo̍ chōo̍ cho̍o̍. O̍ ko̍ŋ, wānā o̍ wānā kɛ̄ūwo̍ ō lɔ̄wa̍ pɛ̍ mbō hēēlu̍ hɔ̄lla̍, mbō tōfa̍ kɛ̄ū tūūlāā kōŋ, ō nɔ̄lā mbō sēŋgū.”

⁹ O̍ ko̍ŋ, mi̍ Mūu̍sē o̍ būlɔ̍ŋsīi̍ye̍, mbo̍ tūūlā kɛ̄ūwo̍ a̍ ndi̍, o̍ ko̍ŋ kɔ̍ɔ̍lī, mbo̍ hēēlū kɛ̄ū kōŋ o̍ chōo̍ cho̍o̍ o̍ yɔ̄m vīlɛ̄īyo̍. Māā wānā o̍ wānā kɛ̄ūwo̍ ō lɔ̄wa̍ pɛ̍, tē ō tōfa̍ kɛ̄ū tūūlāā kōŋ o̍ yɔ̄mndo̍ chōo̍ pɛ̍, ō sēŋgū.

Nyɛ̍ yɔ̍nu̍ŋ I̍sɔ̄lūɛ̍i̍ya̍ o̍ ti᷅ŋndo̍ tɛ̄ɛ̄ŋ chɔ̍ŋ o̍ Pēmbīī Hɔ̍ɔ̄ve̍ kɔ̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Mo̍wa̍bī wo̍

¹⁰ O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā hīāū lāchī a̍ kɔ̄la̍ŋ, ma̍ fūūlūū Ōbo̍tī chi̍e̍e̍, ma̍ kīālū dɔ̍ɔ̍ŋgɔ̍ɔ̍ lo̍ŋ.

¹¹ Mɛ̄ɛ̍ nda̍ fāŋa̍ŋ Ōbo̍tī lo̍ŋ, ma̍ kūā o̍ pɔ̄mndo̍ A̍ba̍lūīm, o̍ po̍llo̍ ni᷄ŋ, o̍ būŋgɛ̄ī Mo̍wa̍bīve̍ bā pāa̍le̍ŋ lē chāŋndo̍.

¹² O̍ ko̍ŋ kɔ̍ɔ̍lī, ma̍ māl lo̍ŋ ma̍ kūā o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Sɛ̍lu̍ɛ̍dī, ma̍ kīālū dɔ̍ɔ̍ŋgɔ̍ɔ̍ lo̍ŋ, ma̍ chāl lo̍ŋ le̍ te̍le̍ŋ ti̍ŋ.

¹³ Ma̍ cha᷄ŋ ndo̍ŋ ma̍ kūā kūmbū Pēē Bɛ̍ndōo̍ A̍nɔ̄ŋ bā lūāŋndo̍, o̍ lɛ̄ŋndē po̍lte̍ ti̍mbu̍la᷅ŋ a̍ būŋgɛ̄ī A̍mɔ̍lu̍a̍i̍tīi̍ya̍ ve̍, ma̍ kīālū dɔ̍ɔ̍ŋgɔ̍ɔ̍ lo̍ŋ. (Pīo̍o̍ A̍nɔ̄ŋ ndu̍ wa̍ pɛ̄ŋgu̍la̍ŋ Mo̍wa̍bi̍tīi̍ya̍ tɛ̄ɛ̄ŋ nda̍ A̍mɔ̍lu̍a̍i̍tīi̍ya̍ ni̍.)

¹⁴ Le̍ sa̍bū kōŋ yāu̍ nɔ̍ dīōla̍ŋ āā Yāu̍ Chɔ̄u̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, ō sōō a̍ Wa̍hɛ̍bī chi̍e̍e̍ o̍kɔ̄ɔ̄ ni̍, chi̍o̍o̍ o̍ tāndā Su̍fāā wo̍ ni᷄ŋ, a̍ lɛ̄ŋīī dɛ̍ŋgbɛ̍i̍ o̍ pēmbo᷄ŋ tɛ̄ɛ̄ŋ, ndu̍yɛ̍ a̍ Pēē Bɛ̍ndōo̍ A̍nɔ̄ŋ,

¹⁵ o̍ ko̍ŋ kɔ̍ɔ̍lī, a̍ dɛ̍ŋgbɛ̍la̍ cho̍ o̍ pēmbo᷄ŋ tɛ̄ɛ̄ŋ nda̍ŋ lāndɔ᷄ŋndo̍, dɛ̍ŋgbɛ̍la̍ ti̍mbu̍la᷅ŋ a̍ A̍ā chi̍e̍e̍, ndu̍yɛ̍ mi̍ lā kūā kūmbū pɛ̄ŋgu̍ lɛ̄ŋndē Mo̍wa̍bīle̍ŋ nda̍ŋ.

¹⁶ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ ma᷅l nāa̍ nda̍ wa̍ o̍ dɔ̍ɔ̍ŋgɔ̍ɔ̍ o̍ lɛ̄ŋndē po̍lte̍ŋ ni᷄ŋ nda̍, ma̍ hīāū lāchī a̍ kɔ̄la̍ŋ, ma̍ fūūlūū o̍ fo̍ndāŋndo̍ dīōla̍ŋ āā So̍o̍ŋnda̍ Māmɛ̄ŋnda̍ŋ. Mɛ̄ɛ̍ nda̍ fūūlu̍u̍ lo̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Di̍mu̍l wa᷅ŋnda̍ mā dīīnu᷄ŋ ku̍ndāa̍ nāa̍ pi᷅lɛ̍, I̍ cho̍ nda̍ mɛ̄ŋnda̍ŋ kē le̍ mā ko᷄l.”

¹⁷ Mɛ̄ɛ̍ a̍ te̍le̍ŋ ko̍ŋ, wāŋnda̍ I̍sɔ̄lūɛ̄ī a̍ so̍li̍ chōnde̍i̍ he̍ī ni̍ āā, “So̍o̍ŋnda̍ māmɛ̄ŋnda̍ŋ, lā yɔ̄ŋgu̍ mɛ᷅ŋnda̍ŋ, ndu̍yɛ̍ ŋ̄ chō chōndi̍i̍ kɔ̄l kɛ̄ndɛ̄i̍ sōlī le̍ mɛ̄ŋnda̍ŋ ma᷅ŋ.

¹⁸ So̍o̍ŋnda̍ māmɛ̄ŋnda̍ŋ nda᷅ŋ wānāā bɛ̄ndūa̍a̍ ā tōū ni̍, la̍ŋ wānāa̍ cho̍ wāŋnda̍ chīla̍ŋnda̍ ā tōū ni̍, la̍ŋ nda̍ tōū a̍ tīnda̍la̍ ndāla̍ lēmāsāla̍ŋ ni̍, ndu̍yɛ̍ a̍ tīnda̍la̍ ndāla̍ yɔ̍ŋāā la̍ŋ.” Ma̍ cha᷄ŋ nāa̍ nda̍ wa̍ ka̍ŋ o̍ lɛ̄ŋndē po̍lte̍ŋ ni᷄ŋ nda̍ ma̍ kūā Māta̍nāā chīe̍e̍.

¹⁹ O̍ ko̍ŋ kɔ̍ɔ̍lī, ma̍ māl lo̍ŋ, ma̍ hīāū lāchī a̍ kɔ̄la̍ŋ, ma̍ fūūlūū Na̍ha̍līɛ̄l chi̍e̍e̍. Ma̍ cha᷄ŋ Na̍ha̍līɛ̄l chi̍e̍e̍ ma̍ kūā Ba̍mɔ̍tī.

²⁰ O̍ ko̍ŋ kɔ̍ɔ̍lī, ma̍ cha᷄ŋ Ba̍mɔ̍tī, ma̍ tūāl o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Mo̍wa̍bī, o̍ Pēmbīī Pi̍si̍kāve̍ bɛ̄ŋgu̍, pēmbīī wānā a̍a̍ lo᷅ le̍cho̍o̍ mā chē lɛ̄ŋndē po̍lte̍ŋ lēbɛ̄ŋgu̍ ve̍.

A̍ mɛ̄ɛ̍ I̍sɔ̄lūɛ̍i̍ya̍ ā yēm Māsā Bɛ̍ndōo̍ Si̍hɔ̄ŋ nda̍ Māsā Bɛ̍ndōo̍ Ɔ̍kū yɛ̍

²¹ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ so̍lī ki̍i̍la̍a̍ ma̍ vīām nda̍ nāa̍ Māsā Bɛ̍ndōo̍ Si̍hɔ̄ŋ chu̍a̍, māsa̍ A̍mɔ̍lu̍a̍i̍tīi̍ya̍, ma̍ dīmūl ndu̍ āā,

²² “Yāndi̍i̍, chɛ̍l na̍a̍ mī ŋ̄ kēēku̍ o̍ lɛ̄ŋndē nūmnde̍ŋ ni᷄ŋ mī ŋ̄ hīōū. Nɛ̄īyo̍ sa̍kpō na̍a̍ ŋ̄ chō chūā ni̍, ŋ̄ cho̍ se̍ī o̍ chīɔ̄ɔ̄ŋ nyāa̍ŋ ni᷄ŋ, kɛ̄lɛ̄ŋgāā o̍ kpe̍le̍la̍ nyāla̍ mākīle̍pīi̍la̍ŋ ni᷄ŋ te̍. Mɛ̄ŋnda̍ŋ o̍ so̍o̍ŋnda̍ nyāla̍ŋ bɛ̍ɛ̍ ŋ̄ cho̍ ma̍ŋ kōlɔ̄ɔ̄ le̍. Nɛ̄ī bɛ̍ndōo̍ sa̍kpō na̍a̍ ŋ̄ chō chūā ni̍, ha̍a̍a̍ mī ŋ̄ kēēku̍ o̍ lɛ̄ŋndē nūmnde̍ŋ ni᷄ŋ mī ŋ̄ hīōū.”

²³ Kɛ̍ mi̍ Māsāa̍ Si̍hɔ̄ŋ, o̍ ku̍u̍nā I̍sɔ̄lūɛ̍i̍ya̍ le̍ mā kēēlu̍ o̍ lɛ̄ŋndē ndɔ̄le̍ŋ ni᷄ŋ. Mbo̍ lō o̍ ko̍ŋ mbo̍ chūūŋgīāā so̍vɛ̄i̍ya̍a̍ ndūa̍a̍ kpo̍u̍ na̍a̍ pi᷅lɛ̍, ma̍ hūŋ Cha̍ha̍sī o̍ lɛ̄ŋndē po̍lte̍ŋ ni᷄ŋ ma̍ hu᷄ŋ sa̍ā I̍sɔ̄lūɛ̍i̍ya̍ sɔ̍ŋgɔ̄ɔ̍ lo̍ŋ.

²⁴ Kɛ̍ mi̍ I̍sɔ̄lūɛ̍i̍ya̍ ā yām ndu̍ nda̍ so̍vɛ̄i̍ya̍a̍ ndūa̍a̍, ndu̍yɛ̍ ma̍ dīū nda̍ dīūwo̍ pīla̍. O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā chūā lɛ̄ŋndē ndāle̍ŋ, chɔ̍ŋ o̍ Pīo̍o̍ A̍nɔ̄ŋ bā lūāŋndo̍ mbo̍ kūā a̍ Pīo̍o̍ Cha̍bɔ̍kī, mbo̍ kɔ̍ mɛ̍ɛ̍lū le̍nde̍ a̍ pɛ̄ŋgu̍la̍ lɛ̄ŋndē A̍mɔ᷅na̍i̍tīi̍ya̍. Kāni̍ fo̍ndōle̍, pɛ̄ŋgu̍la̍ lɛ̄ŋndē A̍mɔ᷅na̍i̍tīi̍ya̍ lā wa̍ lā bɛ̄ɛ̄ndīāā lā kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍.

²⁵ Mi̍ I̍sɔ̄lūɛ̍i̍ya̍ ā bīī chi̍e̍e̍ŋ A̍mɔ̍lu̍a̍i̍tīi̍yo̍ŋ kpo̍u̍, lātūlu̍ a̍ Hɛ̍si̍bɔ̄ŋ, ndu̍yɛ̍ a̍ sɔ̄ndɔ̄kɔ̍lta̍ ba̍lu̍ mu̍ŋ nda̍ŋ, ma̍ chūā mu̍ŋ māā chi̍e̍e̍ŋ ndā.

²⁶ Ndu̍yɛ̍ Hɛ̍si̍bɔ̄ŋ, ndu̍ wa̍ chi̍e̍e̍ lēmāsa̍ Māsāa̍ Si̍hɔ̄ŋndo̍ ni̍. Bōōndi̍i̍ Māsāa̍ Si̍hɔ̄ŋ o̍ wa̍ yōōmū ve̍, te̍le̍ŋ pi᷅lɛ̍, mbo̍ yām māsa̍ wa̍ o̍ lɛ̄ŋndē Mo̍wa̍bīle̍ŋ ni᷄ŋ ndo̍, ndu̍yɛ̍ mbo̍ bīī lɛ̄ŋndē ndɔ̄le̍ŋ kpo̍u̍, chɔ̍ŋ le̍nde̍ mbo̍ kūā a̍ Pēē Bɛ̍ndōo̍ A̍nɔ̄ŋ di̍.

²⁷ Nyɛ̄ kōŋ wānāā sōlīāā ŋ̄chōndu̍a̍a̍ ā sōli̍ chōnde̍i̍ he̍ī ni̍ āā, “Wāŋnda̍ lā hu᷄ŋ Hɛ̍si̍bɔ̄ŋ, o̍ Māsāa̍ Si̍hɔ̄ŋ ndo̍ chi̍e̍e̍! Ŋ̄ yēēma̍ mī chi̍e̍e̍ Māsāa̍ Si̍hɔ̄ŋndo̍ ō mīīŋgu̍ o̍ bā ndɔ̄ɔ̍ chōo̍ mɛ̄ɛ̍ o̍ wa̍ yɛ̍.

²⁸ Ō wa̍ a̍ te̍le̍ŋ pi᷅lɛ̍, mi̍ yīŋnde̍ŋ lē fūlā Hɛ̍si̍bɔ̄ŋ, mi̍ yīŋndē bɛ̄ndūle̍ŋ lē fūlā o̍ Māsāa̍ Si̍hɔ̄ŋ ndo̍ chi̍e̍e̍. Mi̍ yīŋnde̍ŋ nde᷅ŋ lē tɛ̄ɛ̄mbūū A̍ā chi̍e̍e̍ kpo̍u̍, o̍ lɛ̄ŋndē Mo̍wa̍bīle̍ŋ ni᷄ŋ. Mi̍ lē lūām pēmbo᷄ŋ o̍ Pīo̍o̍ A̍nɔ̄ŋ kɔ̍ŋgɔ̍.

²⁹ Dɛ̍nɛ̍ pa̍lāā bɛ̄ndōo̍ ō chō le̍ nya̍ wāŋnda̍ Mo̍wa̍bī. Nya̍ wānāa̍ so̍o̍lūū Chɛ̍mɔ̍sī wa̍, lā chūū. Mɛ̄lɛ̄ka̍ nyāa̍ ho̍ō, ndu̍ to̍sa̍ ni̍ mi̍ chūāūwāā ndūāā wa᷅ŋ pīāāndūa̍a̍ ā sīmnu᷄ŋ wa̍nāā nyāāna᷄ŋ nda̍, ndu̍ to̍sa̍ ni̍ mi̍ chūāūwāā ndūāā wa᷅ŋ lāāndūa̍a̍ ā wā hāū o̍ bīyɔ̄ɔ̍ ni᷄ŋ, wānāā māsa̍ A̍mɔ̍lu̍a̍i̍tīi̍ya̍ ō bīī mbo̍ kūā a̍ nda̍ o̍ bīyɔ̄ɔ̍ ni᷄ŋ nda̍.

³⁰ Kɛ̍ ŋ̄ chīi̍ nda̍ tɛ̄ɛ̄mbūū, chɔ̍ŋ Hɛ̍si̍bɔ̄ŋ chi̍e̍e̍, mbo̍ kūā Di̍bɔ̄ŋ di̍, ŋ̄ chīi̍ tɛ̄ɛ̄mbūū, ŋ̄ bāsu̍ nda̍ tɛ̍ɛ̍, chɔ̍ŋ le̍nde̍ mbo̍ kūā a̍ No̍fāā chi̍e̍e̍ ndu̍yɛ̍ a̍ Mɛ̍di̍bā chi̍e̍e̍ di̍.”

³¹ Ndu̍yɛ̍ mi̍ wāŋnda̍ I̍sɔ̄lūɛ̄ī a̍ cha᷅l o̍ lɛ̄ŋndē A̍mɔ̍lu̍a̍i̍tīi̍ya̍ ni᷄ŋ.

³² O̍ ko̍ŋ kɔ̍ɔ̍lī, mi̍ Mūu̍sē o̍ vi̍ām su̍a̍ŋsu̍a̍ŋnda̍, le̍ mā kɔ̍ mɛ̍ɛ̍nda᷄ŋ Cha̍sɛ̄ɛ̄ chi̍e̍e̍. Ndu̍yɛ̍ mi̍ I̍sɔ̄lūɛ̍i̍ya̍ ā bīī chīo̍o̍ ho̍ō a̍ sɔ̄ndɔ̄kɔ̍ltā ndɔ̄la̍ ba̍lu̍ ndu̍ la̍ŋ kpo̍u̍. A̍mɔ̍lu̍a̍i̍tīi̍ya̍a̍ wa̍ lo̍ŋ nda̍ ma̍ tūāū nda̍ kpo̍u̍.

³³ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ tu̍ndū, ma̍ hēēlū kūmbū būŋgɛ̄ī Ba̍a̍sīāŋ nde̍. O̍ ko̍ŋ, mi̍ Māsāa̍ Ɔ̍kū, māsāa̍ le̍ būŋgɛ̄ī Ba̍a̍sīāŋnde̍ ō chu̍ā so̍vɛ̄i̍ya̍a̍ ndūa̍a̍ ma̍ hu᷄ŋ chi᷅ŋa̍la᷅ŋ I̍sɔ̄lūɛ̍i̍ya̍ a̍ sɔ̍ŋgɔ̄ɔ̍ I̍du̍lūēī chi̍e̍e̍.

³⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Yɔ᷅ŋ īsīōōŋ te̍. I̍ ma̍l Māsāa̍ Ɔ̍kū nya̍ o̍ bā, nda̍ so̍vɛ̄i̍ya̍a̍ ndūa̍a̍ kpo̍u̍, ndu̍yɛ̍ a̍ lɛ̄ŋndē ndɔ̄le̍ŋ. Lā tōsa̍ a̍ Māsāa̍ Ɔ̍kū mɛ̄ɛ̍ nya̍ tōsa̍ a̍ Māsāa̍ Si̍hɔ̄ŋ yɛ̍, māsa̍ A̍mɔ̍lu̍a̍i̍tīi̍ya̍ o̍ wa̍ Hɛ̍si̍bɔ̄ŋ ndo̍.”

³⁵ Ndu̍yɛ̍ mi̍ I̍sɔ̄lūɛ̍i̍ya̍ ā yām Māsāa̍ Ɔ̍kū. Ndu̍ ni̍, pūa̍a̍ ndūa̍a̍ o̍ ve̍lū wa̍ ni̍, a̍ wānāā ndūa̍a̍ kpo̍u̍, mi̍ I̍sɔ̄lūɛ̍i̍ya̍ ā dīū nda̍ kpo̍u̍, wāŋndo̍ ō pīlɛ̍ ā mɛ̄i̍ yo̍o̍mū le̍. O̍ ko̍ŋ kɔ̍ɔ̍lī, ma̍ chūā lɛ̄ŋndē ndāle̍ŋ kpo̍u̍ mi̍ lē sīmnu᷄ŋ le̍ I̍sɔ̄lūɛ̍i̍ya̍.