Nɔ̍mbāā 20 - Yāu̍ Mɛ̄lɛ̄ka̍a̍

A̍ sɔ̄ɔ̍ŋ yɔ̍nu̍ŋ Ka̍dɛ̍sī wo̍ŋ o̍kɔ̄ɔ̄

¹ O̍ pāŋgi̍i̍ ta̍se̍i̍ ni᷄ŋ, o̍ wɔ̄sī kōŋ ni᷄ŋ, wāŋnda̍ I̍sɔ̄lūɛ̄ī kpo̍u̍ a̍ fu̍u̍lūū o̍ lɛ̄ŋndē po̍lte̍ŋ Si᷅ŋ ni̍, ma̍ kīālū dɔ̍ɔ̍ŋgɔ̍ɔ̍ Ka̍sɛ̍sī chi̍e̍e̍, ma̍ chāl lo̍ŋ. O̍ dɔ̍ɔ̍ŋgɔ̍ kōŋ Me̍e̍līām o̍ vi᷅ ni̍, ndu̍yɛ̍ ma̍ chɔ̄ ndu̍ lo̍ŋ.

² Bōōndi̍i̍ nda̍ wa̍ o̍ dɔ̍ɔ̍ŋgɔ̍ kōŋ nde̍, mi̍ ī yɔ̄nu᷄ŋ māmɛ̄ŋ o̍ māmɛ̄ŋ ve̍ o̍ fo̍ndāŋ kōŋ te̍. O̍ ko̍ŋ, I̍sɔ̄lūɛ̍i̍ya̍ kpo̍u̍, ma̍ chūūŋgi̍āŋ na̍a̍ pi᷅lɛ̍ le̍ Mūu̍sē nda̍ E̍lɔ̄ŋ sīmūllo̍.

³ Ma̍ kāndū ŋɔ̄ɔ̄chīa̍ŋndo̍ nāa̍ nda̍ chūā āā, “Ndu̍ o̍o̍ bɛ̍ndā bɛ̍ɛ̍ mī na̍a̍ ŋ̍ vi᷅ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l nāa̍ chāāŋāā nāa̍ ā vī wa̍.

⁴ Vɛ᷅ mi̍ lā hūŋ a̍ na̍a̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ o̍ po̍llo̍ ho̍ō ni᷄ŋ? Mɛ̄ɛ̍ le̍ mī ŋ̄ hu᷄ŋ chu̍ū o̍ po̍llo̍ ho̍ō ni᷄ŋ a̍ chɔ̄lūāā nāa̍ lātūlu̍ nya̍ hīŋ a̍ na̍a̍ na̍nu᷄ŋ ni̍?

⁵ Vɛ᷅ mi̍ lā sōlī na̍a̍ o̍ lɛ̄ŋndē I̍chi̍pīle̍ŋ ni᷄ŋ mi̍ lā hūŋ a̍ na̍a̍ o̍ fo̍ndāŋ wɔ̄ɔ̍ŋ bɛ̄ndōo̍ ho̍ō? Wānā chi᷅ ŋ̍wi̍tīi̍ kɛ̄lɛ̄ŋgāā ŋ̄ba̍a̍līi̍ na̍nu᷄ŋ te̍, wānā chi᷅ ma̍fi̍kīi̍ le̍, wānā chi᷅ ma̍kīle̍pīi̍ le̍, kɛ̄lɛ̄ŋgāā māpɔ̄mɛ̄ki̍la̍ne̍tīi̍. Mɛ̄ŋmā kōla᷄ŋ bɛ̍ɛ̍ wānā se̍e̍lūŋ ma̍ŋ o̍ fo̍ndāa̍ le̍.”

⁶ Mɛ̄ɛ̍ Mūu̍sē nda̍ E̍lɔ̄ŋ a̍ tu̍e̍ī ŋɔ̄ɔ̄chīa̍ŋnda̍ wāŋnda̍ ā wa̍ la̍ŋ, ma̍ fūlā wāŋnda̍ tɛ̄ɛ̄ŋ ma̍ kūā o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍, ma̍ kɔ̍ de᷅l lɛ̄ŋ Mɛ̄lɛ̄ka̍ lāchī ma̍ fūūlūū hɔ̄lla̍ lɛ̄ŋ di̍. O̍ ko̍ŋ kɔ̍ɔ̍lī, mi̍ pa̍ŋgēle̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nda̍ lātūlu̍ wo̍ ō chɔ̄mnu᷄ŋ nda̍.

⁷ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

⁸ “Chu̍a̍ ti̍nda̍ cho̍ kɔ̍fū kpe̍ma̍a̍ lāchī wo̍, nu̍m ni̍, E̍lɔ̄ŋ ni̍, mī lā kūɛ̄ mī lā kɔ̍ chu̍u̍ŋgīāā wāŋnda̍ I̍sɔ̄lūɛ̄ī kpo̍u̍ na̍a̍ pi᷅lɛ̍. O̍ ko̍ŋ nūm Mūu̍sē mā sōō nāa̍ pōūwo̍ chūā I̍sɔ̄lūɛ̍i̍ya̍ kpo̍u̍ o̍ hɔ̄l lo̍ŋ, le̍ mī pōūwo̍ ō yɔ̄ŋgu̍ mɛ̄ŋnda̍ŋ. Mɛ̄ɛ̍ le̍nde̍ ŋ̄ chō lōōkū tōsā ni̍ mī mɛ̄ŋnda̍ŋ mā fūla̍ o̍ pōūwo̍ ni᷄ŋ, le̍ mī wāŋnda̍ I̍sɔ̄lūɛ̄ī a̍ chɔ̄lūāā ndāa̍ ā ko᷄l.”

⁹ O̍ ko̍ŋ, mi̍ Mūu̍sē o̍ chu̍ā tīnda̍ wa̍ kɔ̍fū kpe̍ma̍a̍ lāchī wo̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

¹⁰ O̍ ko̍ŋ kɔ̍ɔ̍lī, ndu̍ ni̍, E̍lɔ̄ŋ ni̍, ma̍ kɔ̍ chu̍u̍ŋgīāā I̍sɔ̄lūɛ̍i̍ya̍ kpo̍u̍ o̍ pōū Mɛ̄lɛ̄ka̍ ō dīmu̍l ndu̍ wo̍. Mi̍ Mūu̍sē o̍ lo᷅ o̍ ko̍ŋ mbo̍ dīmūl nda̍ kpo̍u̍ āā, “Lā ya᷄ŋ ya̍ nīla̍ŋ nya̍ wānāa̍ si̍mu̍l ha̍ā wānā wa̍. I̍ che᷅ māā mɛ̄ɛ̍ mī ŋ̄ sōlu̍l nya̍ ni᷅ŋ mɛ̄ŋnda̍ŋ o̍ pōūwo̍ ni᷄ŋ ma̍lāŋ nya̍ hīnī kɔ᷅l.”

¹¹ O̍ ko̍ŋ, mi̍ Mūu̍sē o̍ he̍e̍lū tīnda̍a̍ mbo̍ lūāā pōūwo̍ lēdīi̍ŋ a̍ ndu̍. Ndu̍yɛ̍, mi̍ mɛ̄ŋnda̍ŋ mā pīɔ̄l o̍ pōūwo̍ ni᷄ŋ. Wāŋnda̍ I̍sɔ̄lūɛ̄ī kpo̍u̍, a̍ chɔ̄lūāā ndāa̍ ma̍ kōl.

¹² Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē nda̍ E̍lɔ̄ŋ āā, “Le̍ mɛ̄ɛ̍ nya̍ nɔ̍ ti̍i̍nda̍ŋ bɔ̍ɔ̍ o̍ ya̍ ni̍ŋ, mī lā ke᷄ ya̍ bɛ̄ɛ̄le̍ŋ wāŋnda̍ I̍sɔ̄lūɛ̄ī o̍ hɔ̄l te̍ yɛ̍, lā cho̍ fu̍u̍lūū a̍ wāŋnda̍ ha̍ā o̍ lɛ̄ŋndē ya̍ I̍ chu̍e̍l nda̍ būŋgɛ̄i̍ le̍ŋ ni᷄ŋ te̍.”

¹³ Le̍ he̍ī, ma̍ kē fo̍ndāŋ kōŋ dīōla̍ŋ āā, Mɛ̍lu̍i̍bā, ko̍ŋ cho̍ ni̍, āā, “Ŋɔ̄ɔ̄chīa̍ŋndo̍.” Kāni̍ fo̍ndōle̍, o̍ fo̍ndāŋ kōŋ wāŋnda̍ I̍sɔ̄lūɛ̄ī a̍ ŋɔ̍ɔ̍chi̍a̍ŋ a̍ Mɛ̄lɛ̄ka̍ Ya̍a̍wɛ̄ɛ̄ le̍ mɛ̄ŋnda̍ŋ ni̍, ndu̍yɛ̍ mi̍ Mɛ̄lɛ̄ka̍ chɔ̄m nda̍ mɛ̄ɛ̍ o̍ cho̍ wānā kāsī yɛ̍.

A̍ mɛ̄ɛ̍ māsā bɛ̍ndōo̍ le̍ I̍dɔ̄m o̍ kɛ̍ɛ̍lu̍ I̍sɔ̄lūɛ̍i̍ya̍ māā ā ke̍e̍kū o̍ lɛ̄ŋndē ndɔ̄le̍ŋ ni᷄ŋ te̍ yɛ̍ o̍kɔ̄ɔ̄

¹⁴ O̍ ko̍ŋ kɔ̍ɔ̍lī, mi̍ Mūu̍sē o̍ so̍lī ki̍i̍la̍a̍ mbo̍ vīām nda̍ nāa̍ māsāa̍ le̍ lɛ̄ŋndē I̍dɔ̄mnde̍ŋ chu̍a̍ a̍ yōōŋgōo̍, chɔ̄nɔ᷄ŋndo̍ nāa̍ nda̍ wa̍ ka̍ŋ Ka̍dɛ̍sī wa̍. Mi̍ Mūu̍sē o̍ di̍mūl māsāa̍ le̍ I̍dɔ̄m āā, “Wānāya᷅ŋ nūmndo̍ŋ, wāŋnda̍ I̍sɔ̄lūɛ̍i̍ nda̍ yɔ̍ŋ yōōŋgōo̍ ho̍ō ni̍. Nūm pi̍la̍ ā tūēī sɔ̄ɔ̍ŋ pa̍la᷄ŋ ke̍e̍ku̍ na̍a̍ chōo̍ kpɛ̍ wo̍ŋ.

¹⁵ Ā tūēī a̍ mɛ̄ɛ̍ fi̍nyāā nāā ma̍māa̍ ā mālnu̍ŋ si̍ndɛ̄ ma̍ kɔ̍ cha᷅l o̍ lɛ̄ŋndē I̍chi̍pīle̍ŋ ni᷄ŋ yɛ̍. Wɔ̄sīla̍ŋ ndāŋ kpo̍u̍, ŋ̄ wa᷄ o̍ lɛ̄ŋnde̍ŋ nde᷅ŋ ni᷄ŋ. Ndu̍yɛ̍ fi̍nyāā nāā ma̍māā kāŋ ni̍, na̍a̍ ni̍, mi̍ wāŋnda̍ I̍chi̍pī a̍ sa̍a̍ŋgīāā na̍a̍ sāāŋgīa̍a̍ pīla̍.

¹⁶ Mi̍ ŋ̄ lō o̍ ko̍ŋ mi̍ ŋ̄ kōŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, le̍ mbō māla̍ na̍a̍. Ndu̍yɛ̍ mi̍ Mɛ̄lɛ̄ka̍ tūɛ̄ī na̍a̍ dīōm, mbo̍ yɔ̄ŋ ki̍i̍la̍nɔ̍ ndɔ̄ɔ̍ mbo̍ sōlī na̍a̍ o̍ lɛ̄ŋndē I̍chi̍pīle̍ŋ ni᷄ŋ. Ŋ̄ chō ā dīīna᷄ŋ Ka̍dɛ̍sī, chi̍e̍e̍ cho̍ o̍ pɛ̄ŋgu̍la̍ lɛ̄ŋndē nūmnde̍ŋ ndo̍.

¹⁷ Le̍la̍ŋ yāndi̍i̍, chɛ̍l na̍a̍ mī ŋ̄ kēēku̍ o̍ lɛ̄ŋndē nūmnde̍ŋ ni᷄ŋ mī ŋ̄ hīōū. Nɛ̄īyo̍ sa̍kpō na̍a̍ ŋ̄ chō chūā ni̍, ŋ̄ cho̍ se̍ī o̍ chīɔ̄ɔ̄ŋ nyāa̍ŋ ni᷄ŋ, kɛ̄lɛ̄ŋgāā o̍ kpe̍le̍la̍ nyāla̍ mākīle̍pīi̍la̍ŋ ni᷄ŋ te̍. Mɛ̄ŋnda̍ŋ o̍ so̍o̍ŋnda̍ nyāla̍ŋ bɛ̍ɛ̍ ŋ̄ cho̍ ma̍ŋ kōlɔ̄ɔ̄ le̍. Nɛ̄ī bɛ̍ndōo̍ sa̍kpō na̍a̍ ŋ̄ chō chūā ni̍, ŋ̄ cho̍ se̍ī bā o̍ bā le̍, ha̍a̍a̍ mī ŋ̄ kēēku̍ o̍ lɛ̄ŋndē nūmnde̍ŋ ni᷄ŋ mī hīōū.”

¹⁸ Kɛ̍ mi̍ wāŋnda̍ I̍dɔ̄m a̍ lo᷅ o̍ ko̍ŋ ma̍ mūlī āā, “Ŋ̄ chɛ᷅l nya̍ mī lā kēēku̍ o̍ lɛ̄ŋndē nāāle̍ŋ ni᷄ŋ te̍. Tē lā pīla̍ pēlēi̍ o̍ lɛ̄ŋndē nāāle̍ŋ ni᷄ŋ pɛ̍, ŋ̄ chō nya̍ sāā a̍ sɔ̍ŋgɔ̍ɔ̍.”

¹⁹ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ mīŋgūl nda̍ dīōmnde̍ŋ āā, “Yāndi̍i̍ lā chɛ᷄l na̍a̍ mī kēēku̍, nɛ̄ī bɛ̍ndōo̍ sa̍kpō na̍a̍ ŋ̄ chō sāā ni̍ mī hīōū. Na̍a̍ ni̍, chɔ̄lūāā nāa̍ ni̍, mɛ̄ŋndē nyā bɛ̍ɛ̍ na̍a̍ ŋ̄ ko᷄l pɛ̍, ŋ̄ nɔ̄lā mī ŋ̄ dɔ̄ū wɔ̄ŋgū. Ŋ̄ yēēma̍ nya̍ nyɛ̄ o̍ nyɛ̄ chēle̍ŋ o̍ bā le̍, ŋ̄ yēēma̍ nya̍ tu̍ŋ mī lā chɛ᷄l na̍a̍ mī kēēku̍ o̍ lɛ̄ŋndē nyāle̍ŋ ni᷄ŋ mī ŋ̄ hīōū.”

²⁰ Kɛ̍ mi̍ wāŋnda̍ I̍dɔ̄m a̍ kɛ̍ɛ̄, ma̍ dīmūl nda̍ āā, “Ŋ̄ chɛ᷅l nya̍ mī lā kēēku̍ o̍ lɛ̄ŋndē nāāle̍ŋ ni᷄ŋ te̍.” O̍ ko̍ŋ kɔ̍ɔ̍lī, mi̍ wāŋnda̍ I̍dɔ̄m a̍ chu̍ā so̍vɛ̄i̍ya̍a̍ ndāa̍ kpāāyāā bɛ̍ndūa̍a̍, ma̍ fūlā le̍ wāŋnda̍ I̍sɔ̄lūɛ̍i̍ hūnɔ̄ɔ̍ chīŋa̍la᷅ŋndo̍ a̍ sɔ̍ŋgɔ̍ɔ̍.

²¹ O̍ ko̍ŋ, mi̍ wāŋnda̍ I̍sɔ̄lūɛ̄ī a̍ mu̍li᷄ŋ ma̍ chūā nɛ̄ī che᷅le̍ŋ, fo̍ndōle̍, wāŋnda̍ I̍dɔ̄m a̍ chɛ̍l nda̍ mā kēēku̍ o̍ lɛ̄ŋndē ndāle̍ŋ ni᷄ŋ te̍.

A̍ pīɔ̍m E̍lɔ̄ŋ ndo̍ o̍kɔ̄ɔ̄

²² O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī kpo̍u̍ a̍ ma᷅l nāa̍ nda̍ wa̍ Ka̍dɛ̍sī wa̍, ma̍ hīāū lāchī a̍ kɔ̄la̍ŋ, ma̍ fūūlūū o̍ Pēmbīī Hɔ̍ɔ̄ ve̍,

²³ o̍ pɛ̄ɛ̄ŋgu̍la̍ŋ a̍ lɛ̄ŋndē I̍dɔ̄mnde̍ŋ. Bōōndi̍i̍ nda̍ wa̍ o̍ Pēmbīī Hɔ̍ɔ̄ve̍ lo̍ŋ nde̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē nda̍ E̍lɔ̄ŋ āā,

²⁴ “E̍lɔ̄ŋ o̍ cho̍ fu̍u̍lūū o̍ lɛ̄ŋndē ya̍ I̍ chu̍e̍l I̍sɔ̄lūɛ̍i̍ya̍ būŋgɛ̄i̍ le̍ nda̍ kīo̍o̍ le̍ŋ ni᷄ŋ te̍. Na̍nu᷄ŋ o̍ cho̍ pīɔ̍mndo̍ sɔ̄la̍ ni̍ mbō kōma̍l fi̍nyāā ndūāā ma̍māa̍. Kāni̍ fo̍ndōle̍, le̍ mɛ̄ɛ̍ nūm Mūu̍sē nya̍ E̍lɔ̄ŋ a̍ so̍li̍ ya̍ dīōm, lā tōsa̍ nyɛ᷅ ya̍ I̍ di̍mu̍l nya̍ a̍ mɛ̄ŋnda̍ŋ Mɛ̍lu̍i̍bā o̍kɔ̄ɔ̄ wo̍ le̍ yɛ̍.

²⁵ Chu̍a̍ E̍lɔ̄ŋ nda̍ Ɛ̄li̍a̍a̍sā po̍ ndɔ̄ mī lā he᷄l o̍ Pēmbīī Hɔ̍ɔ̄ve̍ chōo̍.

²⁶ Tē lā he᷄l lo̍ŋ pɛ̍, a̍ lo̍ o̍ ko̍ŋ a̍ so̍li̍ nyɛ̄lā sōlīāā lāsa̍lāla̍ cho̍ E̍lɔ̄ŋ lēkɔ̄ɔ̍ la̍ŋ a̍ wo̍u̍ Ɛ̄li̍a̍a̍sā po̍ ndɔ̍, le̍ mbō mīīŋgu̍ o̍ fōōfo̍ E̍lɔ̄ŋ fi̍nyā ndɔ̄ wo̍. O̍ pēmbīī kēŋ chōo̍ E̍lɔ̄ŋ o̍ cho̍ pīɔ̍mndo̍ sɔ̄lā ni̍.”

²⁷ O̍ ko̍ŋ, mi̍ Mūu̍sē to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Wāŋnda̍ I̍sɔ̄lūɛ̄ī kpo̍u̍, ā lo̍ nda̍ tōfāa̍, ndu̍ ni̍, E̍lɔ̄ŋ ni̍, a̍ Ɛ̄li̍a̍a̍sā po̍ E̍lɔ̄ŋ ndo̍, ma̍ hēl o̍ Pēmbīī Hɔ̍ɔ̄ve̍ chōo̍.

²⁸ Mɛ̄ɛ̍ nda̍ he᷄l o̍ pēmbēi̍ chōo̍, mi̍ Mūu̍sē o̍ so̍lī nyɛ̄lā sōlīāā lāsa̍lā la̍ wa̍ E̍lɔ̄ŋ lēkɔ̄ɔ̍ la̍ŋ, mbo̍ wōū Ɛ̄li̍a̍a̍sā. Ndu̍yɛ̍, mi̍ E̍lɔ̄ŋ o̍ wu᷅ o̍ pēmbīī kēŋ chōo̍ lo̍ŋ. Mūu̍sē ni̍, Ɛ̄li̍a̍a̍sā ni̍, ma̍ tūāl pēmbēi̍ ma̍ mīīŋgū o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ā wa̍ wo̍.

²⁹ Mɛ̄ɛ̍ wāŋnda̍ I̍sɔ̄lūɛ̄ī a̍ tu̍e̍ī māā E̍lɔ̄ŋ o̍ vi᷅, nda̍ kpo̍u̍ ma̍ chāŋ. Le̍ pālɛ̍i̍ be̍le̍-ya̍a̍ ā chō E̍lɔ̄ŋ cha᷄ŋndo̍.