Nɔ̍mbāā 19 - Yāu̍ Mɛ̄lɛ̄ka̍a̍

A̍ pūltā nāū sīāŋāa̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

² “Sāwa̍ ya̍ Mɛ̍lɛ̄ka̍ Ya̍a̍wɛ̄ɛ̄ I̍ dɔ̍ū vɛ̄lɛ̄ wo̍ ndu̍ cho̍ ho̍ō ni̍. Di̍mu̍l wa᷅ŋnda̍ I̍sɔ̄lūɛ̄ī mā chūu̍ nu̍m nāū lāāndū sīāŋāa̍, o̍ nɔ̍ sɔ᷅ŋ o̍ sɔ̄ŋ te̍ wo̍, nāu̍ ve̍e̍ wɔ̍ bɛ̍ɛ̍ le̍pi᷅lɛ̍ le̍ wo̍.

³ Tē ā chūu̍ nya̍ nāū kōŋ pɛ̍, lā bīī ndu̍ lā ke̍ Ɛ̄li̍a̍a̍sā, wa̍nā so̍līāā lāsa̍lāa̍. Nāūwo̍ ho̍ō lā nɔ̄ mī lā fāŋa̍ŋ a̍ ndu̍ o̍ dɔ̍ɔ̍ŋgɔ̍ɔ̍ ni᷄ŋ mī lā kɔ̍ di̍ī ndu̍ o̍ dɔ̍ɔ̍ŋgɔ̍ɔ̍ da̍ŋga̍la̍ Ɛ̄li̍a̍a̍sā o̍ hɔ̄l.

⁴ Tē nāūwo̍ ho̍ō ō dīīnu᷄ŋ pɛ̍, Ɛ̄li̍a̍a̍sā, wa̍nā so̍līāā lāsa̍lāa̍ ō bīī kōo̍ma̍ ndūa̍ŋ mā ti᷄ŋ ō fāsa̍ŋa̍ ma̍ŋ lē ŋɔ᷄mmɛ̍ū a̍ īsū o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ lāchī.

⁵ O̍ ko̍ŋ kɔ̍ɔ̍lī, nāū kōŋ kpo̍u̍, yāu̍ ndɔ̄ ni̍, vīsīŋ ndɔ̄ ni̍, kōo̍ma̍ ndɔ̄ ni̍, a̍ pūlu̍ŋ ndɔ̄ɔ̍ŋ lā nɔ̄ mī lā lōm ndu̍ Ɛ̄li̍a̍a̍sā o̍ hɔ̄l lo̍ŋ.

⁶ O̍ ko̍ŋ kɔ̍ɔ̍lī, tē nāū kōŋ ō wa̍ ŋɔ̄ɔ̍ pɛ̍, Ɛ̄li̍a̍a̍sā o̍ ke̍lū yɔ̄m si̍dāā wo̍, a̍ bīl ha̍sɔ̍pī wo̍, ō wūu̍ o̍ yīŋndē lēŋ ni᷄ŋ lātūlu̍ a̍ kōlā i̍pɛ̍ŋgɛ̍ si̍a̍ŋāa̍.

⁷ Tē ō chīi̍ pɛ̍ kpo̍u̍, ndu̍ Ɛ̄li̍a̍a̍sā, ō tɔ̄ɔ̄ nyɛ̄la̍ cho̍ ndu̍ lēkɔ̄ɔ̍ la̍ŋ o̍ ko̍ŋ kɔ̍ɔ̍lī, ō pūlu᷄ŋ ō mīīŋgu̍ o̍ dɔ̍ɔ̍ŋgɔ̍ɔ̍ ni᷄ŋ. Kɛ̍ ndu̍yɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ wa᷅ ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ a̍ fīti̍līo̍o̍.

⁸ O̍ ko̍ŋ kɔ̍ɔ̍lī, wāna̍ cho̍ nāū kōŋ lōmɔ̄ɔ̄ wo̍ bɛ̍ɛ̍, ō nɔ̄ mbō tɔ̄ɔ̄ nyɛ̄la̍ cho̍ ndu̍ lēkɔ̄ɔ̍ la̍ŋ ndu̍yɛ̍ mbō pūlu᷄ŋ. Kɛ̍ ndu̍ bɛ̍ɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ wa᷅ ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ a̍ fīti̍līo̍o̍.

⁹ Tē nāū kōŋ ō chūū ŋɔ̄ pɛ̍ kpo̍u̍, wāna̍ cho̍ ō kāsī nya̍ tɛ̄ɛ̄ŋ ndo̍ ō kɔ̍ kɔ̍ndū pūltā lāŋ ō kɛ̄si̍ la̍ŋ o̍ dɔ̍ɔ̍ŋgɔ̍ɔ̍ da̍ŋga̍la̍, o̍ fo̍nda̍ cho̍ ō kāsī ya̍ Mɛ̍lɛ̄ka̍ o̍ hɔ̄l lo̍. Pūltā nāū kōŋ lā nɔ̄ mī lā wa̍ lā kɛ̄sīāā le̍ yu̍ŋgo̍o̍ I̍sɔ̄lūɛ̄ī kpo̍u̍. Tē wāŋndo̍ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l pɛ̍, pūltā nāū kōŋ, la̍ŋ nya̍ nɔ̄ ni̍ mī lā nyɔ̄la̍ mī lā dɔ̄ū o̍ mɛ̄ŋma̍ cho̍ le̍ dīndīo̍o̍ sɔ̄lāa̍ wa̍ŋ ni᷄ŋ, le̍ yɔ̄ŋ wɔ̄ɔ̍ŋ wānā ko̍ŋ fāŋāa̍.

¹⁰ Wāna̍ cho̍ pūltā nāū kōŋ kɔ̄ndɔ̄ɔ̄ wo̍, ndu̍ bɛ̍ɛ̍ ō nɔ̄ mbō tɔ̄ɔ̄ nyɛ̄la̍ cho̍ ndu̍ lēkɔ̄ɔ̍ la̍ŋ. Kɛ̍ ndu̍ bɛ̍ɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ wa᷅ ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ a̍ fīti̍līo̍o̍. Sāwāa̍ ho̍ō sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍, ndu̍yɛ̍ ō chō le̍ nya̍ kpo̍u̍, I̍sɔ̄lūɛ̍i̍nɔ̍ ni̍, wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍.”

A̍ wānā vi̍lɛ̍i̍yo̍ pīla᷄ŋndo̍ o̍kɔ̄ɔ̄

¹¹ Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Wānā o̍ wāna̍ pi̍la̍ŋ wa̍nā vi̍lɛ̍i̍yo̍ pɛ̍, wānā ko̍ŋ le̍ pālɛ̍i̍ ī ŋɔ᷄mmɛ̍ū ō wā o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

¹² Wānā ko̍ŋ ō nɔ̄ mbō sɔ̄la̍ dīndīo̍o̍ o̍ pāa̍le̍ ya̍a̍ ndɔ̄ le̍ŋ chōo̍ ndu̍yɛ̍ a̍ o̍ pāa̍le̍ ŋɔ̍mmɛ̍ū le̍ŋ chōo̍ a̍ mɛ̄ŋma̍ cho̍ le̍ wānāa̍ si̍mnūŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l la̍ dīndīo̍o̍ wa̍ŋ. O̍ ko̍ŋ, mī wānā ko̍ŋ ō sīmnu᷄ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l. Kɛ̍ tē wānā ko̍ŋ ō sɔ̄la̍ di̍ndīo̍o̍ o̍ pāa̍le̍ ya̍a̍ ndɔ̄le̍ŋ chōo̍ a̍ o̍ pāa̍le̍ ŋɔ̍mmɛ̍ūle̍ŋ chōo̍ le̍, ō ve᷅ o̍ di̍a̍ndāā ya̍ Mɛ̍lɛ̄ka̍ o̍ hɔ̄l te̍.

¹³ Wānā o̍ wāna̍ pi̍la̍ŋ wa̍nā vi̍lɛ̍i̍yo̍ pɛ̍, mbō sɔ̄la̍ di̍ndīo̍o̍ o̍ nɛ̄ī wa̍ā nu̍a̍ā chōo̍ le̍, mɛ̄ɛ̍ wānā ko̍ŋ ō tōsa̍ mi̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ wānā wa̍ā le̍nde̍ wāa̍ o̍ wa᷅ o̍ so̍līāā I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ po̍ ni̍. Kāni̍ fo̍ndōle̍, le̍ mɛ̄ɛ̍ nda̍ fāsa̍ŋa̍ ndu̍ mɛ̄ŋma̍ cho̍ le̍ dīndīo̍o̍ sɔ̄lāa̍ wa̍ŋ te̍ yɛ̍. Wānā wa̍ā le̍nde̍ hīōūwɔ̄ɔ̍ o̍ hi̍a̍ū la̍chi̍ a̍ wāa̍ o̍ nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l ni̍, ndu̍yɛ̍ mbō wa̍ o̍ nɔ̄ɔ̄lɛ̍i̍ le̍nde̍.

¹⁴ “Tē wāŋndo̍ ō vī o̍ tɛ̍ndīi̍ ndɔ̍ mālɔ̄ɔ̍ ni᷄ŋ pɛ̍, sāwa̍ cho̍ a̍ ke̍ŋ o̍kɔ̄ɔ̄ wo̍ ndu̍ cho̍ ho̍ō ni̍. Wānā o̍ wāna̍ wa̍ o̍ tɛ̍ndīi̍ ko̍ŋ ni᷄ŋ bōōndi̍i̍ o̍ vi᷅ ve̍, ndu̍yɛ̍ a̍ wānā o̍ wāna̍ lu̍ɛ̍ī o̍ tɛ̍ndīi̍ ko̍ŋ ni᷄ŋ a̍ bōōndi̍i̍ ke̍ŋ, nda̍ kpo̍u̍ ā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l le̍ pālɛ̍i̍ ī ŋɔ᷄mmɛ̍ū.

¹⁵ Ndu̍yɛ̍ nyɛ̄m lāāndu᷄ŋ cho̍ o̍ tɛ̍ndīi̍ ko̍ŋ ni᷄ŋ ndo̍ŋ, ī kɛ᷅ o̍ kɛ᷅ ve̍ i̍ ku̍mbāā a̍ bōōndi̍i̍ wānā ko̍ŋ ō vī ve̍ le̍, nyɛ̄ īlāāndūīī kēŋ bɛ̍ɛ̍ ī sīmnu᷄ŋ i̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

¹⁶ Wānā o̍ wāna̍ pi̍la̍ŋ wa̍nā vi̍lɛ̍i̍yo̍ o̍ bɛ̍ɛ̄ pɛ̍, ō wa̍ dīyɔ̄ɔ̍ nda̍ dīī wāna̍ o̍ pi̍la̍ŋ ko̍ŋ ndo̍ ni̍, ō wa̍ wu̍o̍o̍ wānā ko̍ŋ ō vī a̍ bā ndɔ̄ ni̍, kɛ̄lɛ̄ŋgāā wānā o̍ wāna̍ pi̍la̍ŋ pa̍ālā wānā vi̍lɛ̍i̍yo̍ pɛ̍, ɔ̄ɔ̄ sɛ̄īyo̍, wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l le̍ pālɛ̍i̍ ī ŋɔ᷄mmɛ̍ū.

¹⁷ “Le̍ wāŋndo̍, kɛ̄lɛ̄ŋgāā nyɔ̄ɔ̍ dīndīo̍o̍ ya̍ Mɛ̍lɛ̄ka̍ o̍ hɔ̄l, nyɛ̄ nya̍ nɔ̄ mī lā tōsa̍ wo̍ cho̍ ho̍ō ni̍. Nāū sīāŋā nda̍ chō ko̍ŋ lo̍mɔ̄ɔ̄ mbo̍ wā le̍ yɔ̄ŋndā wɔ̄ɔ̍ŋnda̍ŋ fāŋāa̍ wo̍, lā nɔ̄ mī lā nyɔ̄la̍ pūltā nāū kōŋ lā ti᷄ŋ mī lā dɔ̄ū o̍ kpɛ̍ɛ̍nɛ̍i̍ ni᷄ŋ, o̍ ko̍ŋ kɔ̍ɔ̍lī, mī lā kɔ̄ndū mɛ̄ŋmā sɛ̄nɛ̄īya̍ŋ mī lā dɔ̄ū o̍ kpɛ̍ɛ̍nɛ̍i̍ ke̍ŋ ni᷄ŋ o̍ pūltā lāŋ chōo̍.

¹⁸ Le̍ wāna̍ vi᷅ o̍ tɛ̍ndīi̍ ndɔ̍ mālɔ̄ɔ̍ ni᷄ŋ ndo̍ sūɛ̍i̍ ndūɛ̍i̍, wāna̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l lo̍, ō nɔ̄ mbō kēlū lɛ̄vīī yɔ̄m ha̍sɔ̄ɔ̄ wo̍, mbō yīŋ ndi̍ o̍ mɛ̄ŋmā māŋ ni᷄ŋ, mbō fāsa̍ŋa̍ ma̍ŋ o̍ tɛ̍ndīi̍ wānā ko̍ŋ ō vī ko̍ŋ ni̍ŋ ndo̍, ndu̍yɛ̍ o̍ ko̍ŋ kɔ̍ɔ̍lī, mbō fāsa̍ŋi̍a̍a̍ vɛ̄lɛ̄ ma̍ŋ o̍ nyɛ̄ o̍ nyɛ̍ cho̍ o̍ tɛ̍ndīi̍ ko̍ŋ ni᷄ŋ, ndu̍yɛ̍ a̍ wānāa̍ wa̍ o̍ tɛ̍ndīi̍ ko̍ŋ ni᷄ŋ a̍ bōōndi̍i̍ wānā ko̍ŋ ō vī ve̍ wa̍ kpo̍u̍. O̍ ko̍ŋ kɔ̍ɔ̍lī, le̍ wāna̍ pi̍la̍ŋ pa̍ālā wānā vi̍lɛ̍i̍yo̍, kɛ̄lɛ̄ŋgāā wānā vi̍lɛ̍i̍yo̍, ɔ̄ɔ̄ sɛ̄īyo̍ mbo̍ sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lo̍ dīndīo̍o̍, wāna̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l lo̍, ō nɔ̄ mbō fāsa̍ŋa̍ wāna̍ si̍mnu᷄ŋ ko̍ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lo̍ mɛ̄ŋma̍ cho̍ ma̍ŋ ma̍ mu̍ūli̍āŋ a̍ pūltā nāū kōŋ nda̍ŋ.

¹⁹ Ō nɔ̄ mbō fāsa̍ŋa̍ wāna̍ cho̍ ko̍ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lo̍ mɛ̄ŋmā māŋ o̍ pāa̍le̍ ya̍a̍ ndɔ̄le̍ŋ, ndu̍yɛ̍ a̍ o̍ pāa̍le̍ ŋɔ̍mmɛ̍ūle̍ŋ. Ndu̍yɛ̍, o̍ pāa̍le̍ ŋɔ̍mmɛ̍ū le̍ŋ chōo̍, mī wāna̍ wa̍ ko̍ŋ o̍ nɔ̍ɔ̍lɛ̍i̍yo̍ ō pūlu᷄ŋ, ndu̍yɛ̍ mbō tɔ̄ɔ̄ nyɛ̄la̍ cho̍ ndu̍ lēkɔ̄ɔ̍ la̍ŋ. O̍ ko̍ŋ, wānā ko̍ŋ ō sīmnu᷄ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l a̍ fīti̍līo̍o̍.

²⁰ “Kɛ̍ wānā o̍ wāna̍ si̍mnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l pɛ̍, mbō sɔ̄la̍ di̍ndīo̍o̍ o̍ nɛ̄ī wa̍ā nu̍a̍ā chōo̍ le̍, wānā ko̍ŋ ō nɔ̄ mbō wa̍ ō sōlīāā ku̍ndā I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ po̍, fo̍ndōle̍, le̍ mɛ̄ɛ̍ o̍ to̍sa̍ mi̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l lɛ̍. Kāni̍ fo̍ndōle̍, le̍ mɛ̄ɛ̍ nda̍ fāsa̍ŋa̍ ndu̍ mɛ̄ŋma̍ cho̍ le̍ dīndīo̍o̍ sɔ̄lāa̍ wa̍ŋ te̍ yɛ̍. Wānā wa̍ā le̍nde̍ hīōūwɔ̄ɔ̍ o̍ hi̍a̍ū la̍chi̍ a̍ wāa̍ o̍ nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l ni̍.

²¹ Sāwa̍ ya̍ I̍ dɔ̍ū ho̍ō wo̍, sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Ndu̍yɛ̍ wāna̍ fa̍sāŋā mɛ̄ŋmā māŋ le̍ wāŋndo̍ kɛ̄lɛ̄ŋgāā nyɔ̄ɔ̍ dīndīo̍o̍ ya̍ Mɛ̍lɛ̄ka̍ o̍ hɔ̄l lo̍, wānā ko̍ŋ tē ō chīi̍ pɛ̍ kpo̍u̍, ndu̍ bɛ̍ɛ̍ ō nɔ̄ mbō tɔ̄ɔ̄ nyɛ̄la̍ cho̍ ndu̍ lēkɔ̄ɔ̍ la̍ŋ. Ndu̍yɛ̍ mɛ̄ŋma̍ cho̍ ma̍ŋ le̍ dīndīo̍o̍ sɔ̄lāa̍ wa̍ŋ, wānā o̍ wa᷅na̍ pi̍la̍ŋ mɛ̍ŋmā māŋ pɛ̍, wānā ko̍ŋ pāa̍le̍ le̍ŋ kpɛ᷅ŋ o̍ nɔ̄ɔ̄lɛ̍i̍ o̍ wa᷅ ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ a̍ fīti̍līo̍o̍.

²² Ndu̍yɛ̍ wānā o̍ wāna̍ wa̍ o̍ nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l pɛ̍, nyɛ̄ o̍ nyɛ̄ wānā ko̍ŋ ō pīla̍ŋ pɛ̍, nyɛ̄ kōŋ bɛ̍ɛ̍ o̍ si̍mnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ wānā o̍ wāna̍ pi̍la̍ŋ vɛ̍lɛ̄ nyɛ̄ kōŋ pɛ̍, wānā ko̍ŋ bɛ̍ɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ wa᷅ ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ a̍ fīti̍līo̍o̍.”