Nɔ̍mbāā 18 - Yāu̍ Mɛ̄lɛ̄ka̍a̍

Wa̍lta̍ wānāā sōlīāā lāsa̍lāa̍ a̍ Līva̍īya̍ ā nɔ̄ le̍ tōsāa̍ la̍ŋ

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl E̍lɔ̄ŋ āā, “Nūm ni̍, pūa̍a̍ nu̍mnda̍ ni̍, ndu̍yɛ̍ a̍ wānāya᷅ŋ nyāa̍ŋ ŋ̄ pīlɔ̍ŋ kpo̍u̍, nda̍ yɔ̍nūŋ māā wānāa̍ fu̍la̍ o̍ pūlāle̍ Li̍va̍īle̍ŋ chōo̍ wa̍ ni̍, kpe̍ku̍ o̍ kpe̍ku̍ nɔ̍ le̍ tōsa᷄ŋndo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, tē dɛ̍nɛ̍ ta̍mbɛ̍i̍ o̍ fu̍la̍ lo̍ŋ pɛ̍, nya̍ ya̍ I̍ tu̍sī nyɛ᷅ pālāa̍ chōo̍ le̍ dɛ̍nɛ̍ ta̍mbɛ̍i̍ ko̍ŋ ni̍. Kɛ̍ nyɛ̄ o̍ nyɛ̍ cho̍ a̍ sa̍lā sōlīa̍a̍ o̍kɔ̄ɔ̄, tē dɛ̍nɛ̍ o̍ dɛ̍nɛ̍ o̍ ta̍mbu̍ lo̍ŋ pɛ̍, nūm E̍lɔ̄ŋ nya̍ pūa̍a̍ nu̍mnda̍, nya̍ ya̍ ha̍ndū nyɛ᷅ pālāa̍ chōo̍ ni̍.

² Nūm ni̍ pūa̍a̍ nu̍mnda̍ ni̍, te̍le̍ŋ o̍ te̍le̍ŋ nya̍ wa̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ pɛ̍, lā vēēlu̍ wa᷅nāya᷅ŋ nyāa̍ŋ ŋ̄pīlɔ̍ŋ, nda̍ yɔ̍nūŋ māā wānāa̍ fu̍la̍ o̍ pūlāle̍ Li̍va̍īle̍ŋ chōo̍ wa̍ ni̍, le̍ mā māla̍ nya̍.

³ Wāŋnda̍ ha̍ā ā nɔ̄ mā tōsa̍ wa̍lta̍ nda̍ nɔ̄ le̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ la̍ŋ nya̍ o̍ bā bɛ̄ŋgu̍. Kɛ̍ ndu̍yɛ̍ ā nɔ̍ mā pīla̍ŋ nyɛ᷅m cho̍ ŋ̄ kāsī ya̍ Mɛ̍lɛ̄ka̍ o̍ hɔ̄l mi̍ ŋ̄ wā o̍ tɛ̍ndīi̍ ko̍ŋ ni᷄ŋ ndo̍ŋ te̍, kɛ̄lɛ̄ŋgāāle̍ mā pīla̍ŋ ma̍āŋ nī so̍līāā lāsa̍lāa̍. Tē ā pīla̍ŋ nyɛ᷅m mu᷅ŋ pɛ̍, nda̍ ni̍, nya̍ ni̍ pīɔ̍mndo̍ nya̍ sɔ̄lā ni̍.

⁴ Wāŋnda̍ ha̍ā ā nɔ̄ mā tōsa̍ wa̍llo̍ a̍ nya̍ lātūlu̍ mā tōsa̍ wa̍li̍ o̍ wa̍li̍ nda̍ nɔ̄ le̍ tōsāa̍ o̍ tɛ̍ndīi̍ Mɛ̄lɛ̄ka̍a̍. Ō fūla̍ o̍ nda̍ kɔ̍ɔ̍lī, wānā o̍ wānā che᷅le̍ŋ ō nɔ̍ mbō sɔ̄ɔ̄ŋgu̍u̍ nya̍ īkɛ̄i̍ le̍.

⁵ Ndu̍yɛ̍ wa̍li̍ o̍ wa̍li̍ nɔ̍ le̍ tōsa᷄ŋndo̍ o̍ fo̍ndā kāsīo̍o̍ ndu̍yɛ̍ a̍ o̍ ma̍āŋndo̍, nūm ni̍, pūa̍a̍ nūmnda̍ ni̍, nya̍ nɔ̍ le̍ wa̍lta̍ la̍ŋ tōsāa̍ ni̍. Sāwāla̍ ya̍ I̍ cho̍ nya̍ la᷅ŋ kīo̍o̍ la̍ŋ, lā chūa̍ la̍ŋ, ko̍ŋ to̍sā ni̍ ya̍ Mɛ̍lɛ̄ka̍ Ya̍a̍wɛ̄ɛ̄ do̍o̍nūŋ ndɛ̍ tu̍mbe̍ a̍ nya̍ wāŋnda̍ I̍sɔ̄lūɛ̄ī le̍.

⁶ Ya̍ Mɛ̄lɛ̄ka̍ pīla̍ hɛ̍li̍ chāāŋāā nyāā Līva̍īya̍ I̍sɔ̄lūɛ̍i̍ya̍a̍ tu̍a̍a̍ tɛ̍ɛ̍ŋ ni̍, mi̍ yɔ̍ŋgū nda̍ o̍ nya̍lo̍ māā kē le̍ nya̍ wa̍lta̍ŋ mālāa̍. Wānāa̍ cho̍ ā yɔ̄ŋga᷄ŋ o̍ ya̍ Mɛ̍lɛ̄ka̍ lo̍ le̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ wa̍ nda̍ chō ni̍.

⁷ Kɛ̍ nūm ni̍, pūa̍a̍ nu̍mnda̍ ni̍, nya̍ ko̍ni̍ nɔ̍ ni̍ mī lā tōsa̍ wa̍lta̍ so̍līāā lāsa̍lā la̍ŋ. Wa̍li̍ o̍ wa̍li̍ so̍līāā lāsa̍la̍ nɔ̍ le̍ to̍sa᷄ŋndo̍ o̍ ma̍āŋndo̍, ndu̍yɛ̍ a̍ o̍ fo̍ndāŋ kāsi̍ hi̍o̍ū kpo̍u̍ wo̍, nya̍ nɔ̍ le̍ wa̍lta̍ la̍ŋ tōsāa̍ ni̍. Nya̍ ya̍ I̍ ke̍ wa̍li̍ so̍līāā lāsa̍lāa̍ ni̍ māā kē. Ō fūla̍ o̍ nya̍ kɔ̍ɔ̍lī, wānā o̍ wānā che᷅le̍ŋ tē ō sɔ̄ɔ̄ŋgu̍u̍ o̍ fo̍ndā ni̍ kāsīo̍o̍ īkɛ̄i̍ pɛ̍, pīɔ̍mndo̍ wānā ko̍ŋ ō sɔ̄lā ni̍.”

Nyɛ̄ wānāā sōlīāā lāsa̍lāa̍ ā nɔ̄ le̍ sɔ̄lāa̍ wo̍

⁸ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl E̍lɔ̄ŋ āā, “Nyɛ̄m wāŋnda̍ I̍sɔ̄lūɛ̄ī a̍ hu᷅ŋ o̍ ya̍ Mɛ̍lɛ̄ka̍ lo̍ mā yɔ̄ŋgū mu̍ŋ o̍ ya̍ lo̍, ā lu᷅m mu̍ŋ o̍ ma̍āŋndo̍ chōo̍ le̍ wo̍ŋ ki̍nɛ̍i̍, nya̍ wānāā sōlīāā lāsa̍lāa̍ nya̍ ya̍ I̍ ke̍ nyɛ̄m mu᷅ŋ ni̍. Nya̍ ni̍ a̍ chūāūwāā nyāā ma̍māa̍ lēpūlā kɛ᷅, nyɛ̄m mu᷅ŋ ŋ̄ chō le̍ nya̍ le̍ fɛ̍ɛ̍ŋ a̍ fɛ̍ɛ̍ŋ.

⁹ Nyɛ̄m lāsa̍la᷄ŋ cho̍ ŋ̄ kāsī mi̍ ŋ̄ hīāū kpo̍u̍ wo̍ŋ, ŋ̍ nɔ̍ mī ŋ̄ lōmnu᷄ŋ o̍ ma̍āŋndo̍ chōo̍ le̍ wo̍ŋ ki̍nɛ̍i̍, nya̍ nɔ̍ mu̍ŋ ni̍. Sa̍lā o̍ sa̍lā wāŋnda̍ I̍sɔ̄lūɛ̄ī a̍ hu̍ŋ so̍lī o̍ ya̍ Mɛ̍lɛ̄ka̍ lo̍ pɛ̍, o̍ cho̍ ō kāsīo̍o̍ ya̍ Mɛ̍lɛ̄ka̍ o̍ hɔ̄l mbo̍ hīāū kpo̍u̍ wo̍, sa̍lā tɔ̄lɔ̄ɔ̄ ku̍llo̍ ni̍, a̍ sa̍la̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍ wo̍, o̍ ko̍ŋ kɔ̍ɔ̍lī, a̍ sa̍lā wāŋndo̍ ō sōlī tē ō tōsa̍ bīōndɔ᷄ŋndo̍ wo̍ pɛ̍, nyɛ̄m lāsa̍lāŋ mu᷅ŋ ki̍nɛ̍i̍, nūm nya̍ pūa̍a̍ nu̍mnda̍ nya̍ nɔ̍ mu̍ŋ ni̍.

¹⁰ Nyɛ̄m lāsa̍lāŋ mu᷅ŋ o̍ fo̍ndā kāsi̍ hi̍o̍ū kpo̍u̍ wo̍, nya̍ nɔ̄ ni̍ mī lā dē mu̍ŋ. Ndu̍yɛ̍ wānā pɔ̍nɔ̍ o̍ wānā pɔ̍nɔ̍ o̍ yu̍ŋgu̍ nyāa̍ chōo̍ ō nɔ̄ di̍ mbō dē nyɛ̄m lāsa̍la᷄ŋ mu᷅ŋ. Lā nɔ̄ mī lā chūa̍ nyɔ̄ɔ̍ŋ mu᷅ŋ māā nyɛ᷄m cho̍ ŋ̄ kāsī ya̍ Mɛ̍lɛ̄ka̍ o̍ hɔ̄l lo̍ŋ ŋ̍ cho̍ ni̍.

¹¹ “Ndu̍yɛ̍, sa̍lāla̍ŋ lā pīlɛ̍la̍ŋ vɛ̄lɛ̄ ki̍nɛ̍i̍, la̍ŋ la̍ yɔ̍nūŋ māā sa̍lālā wāŋnda̍ I̍sɔ̄lūɛ̄ī a̍ hu᷅ŋ mā hēēlū la̍ŋ o̍ bāla̍ŋ chōo̍ ya̍ Mɛ̍lɛ̄ka̍ lāchī le̍ la̍ŋ sōlīo̍o̍ o̍ ya̍ lo̍ la̍ŋ, le̍ nya̍ la̍ cho̍ ni̍. Nya̍ ni̍, a̍ pūa̍a̍ nyāa̍ ndu̍yɛ̍, a̍ chūāūwāā nyāā wa᷅ŋ lāāndūa̍a̍ mbō kūɛ̄ le̍nde̍ a̍ lēpūlā kɛ᷅, nya̍ ya̍ I̍ ke̍ sa̍lālā lāŋ ni̍, ndu̍yɛ̍ lā chō le̍ nya̍ le̍ fɛ̍ɛ̍ŋ a̍ fɛ̍ɛ̍ŋ. Wānā o̍ wāna̍ fu̍la̍ o̍ yu̍ŋgu̍ nyāa̍ chōo̍, mbo̍ wā wāna̍ kāsī ya̍ Mɛ̍lɛ̍ka̍ o̍ hɔ̄l, ō nɔ̄ di̍ mbō dē sa̍lāla̍ŋ nda᷅ŋ.

¹² “O̍ ko̍ŋ kɔ̍ɔ̍lī, nyɛ̄m wāŋnda̍ I̍sɔ̄lūɛ̄ī a̍ hu᷅ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā sa̍lālā tɔ̄lɔ̄ɔ̄lā tāse̍la̍ la̍ŋ, ŋ̄ kɛ̄ndɛ̄ kɛ̍ndɔ᷄ŋ ki̍nɛ̍i̍, chūɛ̄īmā ɔ̄li̍fīi̍ ni̍, mūɛ̄īmā mākīle̍pīi̍ ni̍, o̍ ko̍ŋ kɔ̍ɔ̍lī, a̍ tɔ̄lɔ̄ɔ̄lā ku̍lta̍ŋ, nya̍ nɔ̍ ni̍.

¹³ Tɔ̄lɔ̄ɔ̄lā tāse̍la̍ wāŋnda̍ ā sōlī o̍ chīɔ̄ɔ̄ŋ ndāa̍ŋ ni᷄ŋ mā yɔ̄ŋgū la̍ŋ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ la̍ŋ ki̍nɛ̍i̍, le̍ nya̍ la̍ cho̍ ni̍. Ndu̍yɛ̍ wānā o̍ wāna̍ fu̍la̍ o̍ yu̍ŋgu̍ nyāa̍ chōo̍ mbo̍ wā wāna̍ kāsī ya̍ Mɛ̄lɛ̄ka̍ o̍ hɔ̄l, ō nɔ̄ di̍ mbō dē ndu̍.

¹⁴ “Nyɛ̄ o̍ nyɛ̄ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, ma̍ chūā ndu̍ ni᷅ŋ chɔ̍ ma̍ yɔ̄ŋgū ndu̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, le̍ fɛ̍ɛ̍ŋ a̍ fɛ̍ɛ̍ŋ, le̍ nya̍ nyɛ̄ kōŋ ō chō ni̍.

¹⁵ “Po̍ tāse̍ o̍ po̍ tāse̍ ve̍lu᷄ŋ pɛ̍, kɛ̄lɛ̄ŋgāā chɔ̄lū tāse̍ o̍ chɔ̄lu̍ tāse̍ pi̍a̍a̍ndū chɔ̄lōo̍ ō kōm pɛ̍, mbo̍ wā ā yɔ̄ŋga᷄ŋ nāa̍ ya̍ Mɛ̍lɛ̄ka̍ Ya̍a̍wɛ̄ɛ̄ chu̍a̍, nya̍ nɔ̍ ni̍. Kɛ̍ pūa̍a̍ tāsi̍a̍a̍ nda̍ yɔ̄ŋgū ka̍ŋ nāa̍ ya̍ chūā wa̍ ni̍, a̍ chɔ̄lūāā pīāāndūāā tāsi̍a̍a̍ nda̍ yɔ̄ŋgū nāa̍ ya̍ chu̍a̍ ā ve᷅ a̍ ka̍sī ya̍ o̍ hɔ̄l te̍ wa̍, wāŋnda̍ nɔ̄ mā bāŋa̍ nda̍ nya̍ o̍ bā.

¹⁶ Tē wāŋndo̍ ō wa̍ po̍ ndɔ̄ɔ̍ bāŋāa̍ pɛ̍, po̍ ndɔ̍ chi̍i̍ yɔ̍ pāŋge̍i̍ ī pīlɛ̍ chɔ̍ŋ a̍ vīōlɔ᷄ŋ ndɔ̄ɔ̍ wo̍, wāna̍ ko̍ŋ ō nɔ̄ mbō yɔ̄ŋgu̍ ka̍ni̍ŋ hu̍mbo᷄ŋ ŋ̄ ŋūɛ̍ɛ̍nu̍, nyɛ̄ sɔ̄lāa̍ cho̍ ō kīālāā ba̍ā le̍ chɛ̄lɛ̄kpɛ̍ wa̍ā le̍nde̍ bāŋāa̍ wo̍. Ndu̍yɛ̍ nyɛ̄ sɔ̄lāa̍ ho̍ō sēke̍lēi̍ wāŋ bɛ̄ndūa̍a̍ ā chɛ̄la᷅ŋ cho̍o̍ le̍ lūsu̍l nyɛ̄ sɔ̄lāa̍ sīnāa̍ wo̍, o̍ sēke̍lēi̍ ko̍ŋ chōo̍ nda̍ nɔ̄ ni̍ mā hāndu̍ ndu̍ le̍ lūsu̍l ndɔ̄ɔ̍ sīnāa̍.

¹⁷ Kɛ̍ ndu̍yɛ̍ chɔ̄lūāā tāsi̍a̍a̍ ā pīli̍a̍a̍ ki̍nɛ̍i̍, nāū ni̍, sāā ni̍, chūīŋ ni̍, ā nɔ̍ mā bāŋa̍ nda̍ le̍, fo̍ndōle̍, chɔ̄lūa̍a̍ cho̍ ā kāsī ya̍ Mɛ̍lɛ̄ka̍ o̍ hɔ̄l la̍ nda̍ chō ni̍. Lā nɔ̄ mī lā dīu̍ chɔ̄lūāā kāŋ, mī lā fāsa̍ŋi̍a̍a̍ kōo̍ma̍ ndāa̍ŋ o̍ ma̍āŋndo̍, o̍ ko̍ŋ kɔ̍ɔ̍lī, mī lā lōm chūɛ̄īmā ndāa̍ŋ māā sa̍lā lūāmāā o̍ ya̍ Mɛ̍lɛ̄ka̍ lo̍. Tē chūŋ sa̍lā kōŋ ō kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

¹⁸ Ndu̍yɛ̍ vīsīŋ chɔ̄lūāā kāŋ ki̍nɛ̍i̍ nya̍ nɔ̍ ni̍. Mɛ̄ɛ̍ nya̍ dīī nu̍a̍ā chɔ̄lōo̍, vīsīŋ chɔ̄lū kōŋ ŋ̄ ti᷄ŋ, mu̍ŋ yɔ̍nūŋ ni̍ māā mɛ̄ɛ̄ya̍ŋ a̍ lɔ̄lū bā kɛ̄ndɔ̄ɔ̍ mī lā hēēlu̍ mu̍ŋ o̍ bāla̍ŋ cho̍o̍ ya̍ Mɛ̍lɛ̄ka̍ lāchī le̍ mu̍ŋ sa̍lāa̍ sōlīo̍o̍ nāa̍ ya̍ chu̍a̍, mī vīsīŋ mu᷅ŋ ŋ̄ wa̍ le̍ nya̍ yɛ̍, le̍nde̍ vīsīŋ chɔ̄lūa̍a̍ ha̍ā ŋ̄ nɔ̄ ni̍ mī ŋ̄ wa̍ le̍ nya̍.

¹⁹ “Chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, sa̍lālā kāsī wāŋnda̍ I̍sɔ̄lūɛ̄ī a̍ hu᷅ŋ so̍līo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ la̍ŋ ki̍nɛ̍i̍, nūm ni̍, pūa̍a̍ nu̍mnda̍ ni̍, a̍ chūāūwāā nūm a̍ wa᷅ŋ lāāndūa̍a̍, mbō kūɛ̄ a̍ lāchī kɛ᷅, nya̍ ya̍ I̍ ke̍ nyɛ̄m sa̍lāŋ mu᷅ŋ ni̍. Nūm ni̍ a̍ wānāa̍ fu̍la̍ o̍ pūlālē nūmnde̍ŋ chōo̍ wa̍, kpe̍ma̍ ya̍ I̍ yi̍i̍ a̍ nya̍ wo̍ ndu̍ cho̍ ko̍ŋ ni̍. Ndu̍yɛ̍ kpe̍ma̍a̍ ho̍ō ō nɔ̄ mbō wa̍ le̍ fɛ̍ɛ̍ŋ a̍ fɛ̍ɛ̍ŋ, ō cho̍ kpe̍ma̍ ta̍mbu̍ le̍.”

²⁰ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl E̍lɔ̄ŋ āā, “Nya̍ wānāā sōlīāā lāsa̍lāa̍ ki̍nɛ̍i̍, lā nɔ̍ mī lā sɔ̄la̍ ībūŋgā o̍ ībūŋgā chāāŋāā nyāā I̍sɔ̄lūɛ̍i̍ya̍ tɛ̄ɛ̄ŋ te̍, kɛ̄lɛ̄ŋgāāle̍ mī lā nɔ̄ nyɛ̄m ŋ̄kɛ᷅ nda̍ tɛ̍ɛ̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ būŋgɛ̄i̍ i̍ nyɛ̍i̍ ni̍, ndu̍yɛ̍ a̍ nyɛ̄m nya̍ŋ ŋ̄ki̍ɔ̍ŋ.”

Nyɛ̄ Līva̍īya̍ ā nɔ̄ mā sɔ̄la̍ wo̍

²¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Līva̍īya̍ ki̍nɛ̍i̍, kēlā lēbōltā wāŋnda̍ I̍sɔ̄lūɛ̄ī a̍ hu᷅ŋ o̍ ya̍ Mɛ̍lɛ̄ka̍ lo̍ la̍ŋ ki̍nɛ̍i̍, nda̍ nda̍ nyɛ̄m ndāa̍ŋ ŋ̄ki̍ɔ̍ŋ mu̍ŋ cho̍ mu̍ŋ ni̍. Pāāwāa̍ o̍ nda̍a̍ ndu̍ cho̍ ko̍ŋ ni̍ le̍ wa̍li̍ o̍ wa̍li̍ nda̍ nɔ̄ le̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍.

²² Chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, ō fūla̍ o̍ wānāā sōlīāā lāsa̍lāa̍ ha̍ā kɔ̄ɔ̄lī, a̍ wānāā ndāā ma̍lāa̍, I̍sɔ̄lūɛ̍i̍nɔ̍ o̍ I̍sɔ̄lūɛ̍i̍nɔ̍ che᷅le̍ŋ o̍ nɔ̍ mbō sɔ̄ɔ̄ŋgu̍u̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ īkɛ̄i̍ le̍. Tē ō sɔ̄ɔ̄ŋgu̍u̍ pɛ̍ pīɔ̍mndo̍ o̍ sɔ̍lā ni̍.

²³ Līva̍īya̍ nda̍ nɔ̍ ni̍ mā tōsa̍ wa̍lta̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍. Ndu̍yɛ̍ tē dɛ̍nɛ̍ o̍ dɛ̍nɛ̍ o̍ tāmbu̍ lo̍ŋ pɛ̍, nda̍ sɔ̍lā dɛ̍nɛ̍ pa̍lāa̍ le̍ dɛ̍nɛ̍ ta̍mbɛ̍i̍ ko̍ŋ ni̍. Sāwa̍ ya̍ I̍ dɔ̍ū wo̍ ndu̍ cho̍ ko̍ŋ ni̍, ndu̍yɛ̍ sāwāa̍ ho̍ō ō chō le̍ yu̍ŋgu̍la̍ nyāla̍ŋ le̍ fɛ̍ɛ̍ŋ a̍ fɛ̍ɛ̍ŋ. Līva̍īya̍ ki̍nɛ̍i̍, ā nɔ̍ mā sɔ̄la̍ nyɛ̄m kɛ᷅ chāāŋāā ndāā I̍sɔ̄lūɛ̍i̍ya̍ tɛ̄ɛ̄ŋ te̍.

²⁴ Kēlā lēbōltā wāŋnda̍ I̍sɔ̄lūɛ̄ī a̍ hu᷅ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ la̍ŋ, nyɛ̄m nda̍ŋ ŋ̄ki̍ɔ̍ŋ mu̍ŋ cho̍ mu̍ŋ ni̍. Le̍ sa̍bū kōŋ ya̍ I̍ di̍mi̍ ni̍ māā, nda̍ nda̍ nɔ̍ mā sɔ̄la̍ nyɛ̄m kɛ᷅ chāāŋāā ndāā I̍sɔ̄lūɛ̍i̍ya̍ tɛ̄ɛ̄ŋ te̍.”

A̍ kēlā lēbōltā Līva̍īya̍ o̍kɔ̄ɔ̄

²⁵ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²⁶ “Di̍mu̍l Līva̍īya̍ māā nyɛ̄ ya̍ Mɛ̍lɛ̄ka̍ dīmi̍ a̍ nda̍ o̍kɔ̄ɔ̄ wo̍ cho̍ ho̍ō ni̍. Kēlā lēbōltā wāŋnda̍ I̍sɔ̄lūɛ̄ī a̍ wa᷅ ni̍ŋ nya̍ chūūwo̍, mi̍ di̍mī māā nyɛ̄m nya̍ŋ ki̍ɔ̍ɔ̍ŋ mu̍ŋ cho̍ mu̍ŋ ni̍ la̍ŋ, nya̍ bɛ̍ɛ̍ lā nɔ̄ mī lā sōli̍ ke̍lā lēbōlta̍ŋ o̍ kēlālāŋ chōo̍. Nyɛ̄ o̍ nyɛ̄ nda̍ chūu̍ nya̍ pɛ̍, o̍ tɔ̍ o̍ tɔ̍ cho̍o̍ lā nɔ̄ mī lā fāŋa̍ ō pīlɛ̍, mī lā yɔ̄ŋgu̍ ndu̍ kīo̍o̍ o̍ ya̍ Mɛ̍lɛ̄ka̍ lo̍.

²⁷ Mɛ̄ɛ̍ wāŋnda̍ I̍sɔ̄lūɛ̄ī a̍ lu̍a̍ā nu̍a̍ā tɔ̄lɔ̄ɔ̄ ndāa̍, mā hīŋ a̍ ō tāse̍ ko̍ŋ o̍ ya̍ Mɛ̍lɛ̄ka̍ lo̍, ɔ̄ɔ̄ mɛ̄ɛ̍ nda̍ tōōsīāā nu̍a̍ā mūɛ̄īmā mākīle̍pīi̍ya̍ŋ mā hīŋ a̍ mā tāse̍ma̍ ma̍ŋ o̍ ya̍ Mɛ̍lɛ̄ka̍ lo̍ yɛ̍, le̍nde̍ ya̍ I̍ chu̍ā ke̍lā nya̍ yɔ̄ŋgū la̍ŋ o̍ ya̍lo̍ la̍ŋ ni̍.

²⁸ Mɛ̄ɛ̍ o̍ nɛ̄īyo̍ ho̍ō ni᷄ŋ, nya̍ bɛ̍ɛ̍ kēlā lēbōlta̍ŋ la̍ nya̍la̍ŋ nya̍ wā la̍ŋ so̍līo̍o̍ o̍ kēlā lēbōltā wāŋnda̍ I̍sɔ̄lūɛ̄ī a̍ chu̍u̍ nya̍ la̍ŋ chōo̍ ni̍, mi̍ lā wā la̍ŋ yɔ̄ŋgōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Kēlā lēbōltā nya̍ chō la̍ŋ so̍lī le̍ ya̍ Mɛ̍lɛ̄ka̍ Ya̍a̍wɛ̄ɛ̄ la̍ŋ, E̍lɔ̄ŋ wāna̍ so̍līāā lāsa̍lāa̍ ndu̍ nɔ̍ la̍ŋ ni̍, lā nɔ̄ mī lā ke̍ ndu̍ la̍ŋ.

²⁹ Ndu̍yɛ̍ nyɛ̄ o̍ nyɛ̄ nda̍ chūu̍ nya̍ pɛ̍, ō kɛ̄ndɛ̄ kɛ̍ndɔ̄ɔ̍ lēchōo̍ ndu̍ nya̍ nɔ̄ ni̍ mī lā sōli̍ kē lēbōllo̍, mī lā yɔ̄ŋgu̍ ndu̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍.

³⁰ Tē ā chūu̍ nya̍ kēlā lēbōltā lāŋ pɛ̍, mī lā sōli̍ lā kɛ̄ndɛ̄ kɛ̍ndɛ̄ la̍ŋ mī lā yɔ̄ŋgu̍ la̍ŋ o̍ ya̍ Mɛ̍lɛ̄ka̍ lo̍ pɛ̍, ō kɛ᷅ o̍ kɛ᷅ lo̍ ni᷅ŋ pɛ̍, ō wā ma̍wa̍ā nya̍ ō kɛ̄sīāā o̍ bā mɛ̄ɛ̍ wāŋndo̍ ō tōsā nu̍a̍ā chīɛ̄ī ndūɛ̍i̍, mbō chūūŋgi̍a̍a̍ tɔ̄lɔ̄ɔ̄lā ndɔ̄la̍ŋ a̍ mūɛ̄īmā ndɔ̄ mākīle̍pīi̍ya̍ŋ yɛ̍.

³¹ Ndu̍yɛ̍ o̍ lo᷅ ni᷅ŋ ko̍ŋ nya̍ o̍ bā wo̍, nya̍ ni̍, yu̍ŋgu̍la̍ nyāla̍ŋ ni̍, bā o̍ bā nya̍ yēēma̍ pɛ̍ le̍ ndu̍ dīo̍o̍ lā nɔ̄ di̍ mī lā dē ndu̍. Kāni̍ fo̍ndōle̍, wa̍lta̍ nya̍ chō tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ la̍ŋ, pāāwā nya̍ nɔ̄ mī lā sɔ̄la̍ le̍ wa̍lta̍la̍ŋ ndo̍ ndu̍ cho̍ ko̍ŋ ni̍.

³² Kēlā lēbōlta̍ŋ nda᷅ŋ, ha̍a̍a̍ mi̍ lā sōlī lā kɛ̄ndɛ̄ kɛ̍ndɛ̄ la̍ŋ lēchōo̍, mi̍ lā yɔ̄ŋgū la̍ŋ o̍ ya̍ Mɛ̄lɛ̄ka̍ lo̍, lā dīo̍ ni᷅ŋ bɛ̍ɛ̍ o̍ tɔ̍ɔ̍ ō ve᷅ yɔ᷅ŋ wɔ̄ɔ̍ŋ te̍ nya̍ tōsā ko̍ŋ te̍. Kēlā lēbōltā wāŋnda̍ I̍sɔ̄lūɛ̄ī a̍ cho̍ nya̍ la᷅ŋ chūū la̍ŋ, kēla̍ cho̍ lā kāsī ya̍ Mɛ̍lɛ̄ka̍ o̍ hɔ̄l la̍ŋ la̍ cho̍ ni̍, lā mānda̍ŋ yɔ̄ŋi̍ nya̍ sōli̍ la̍ŋ o̍ ba̍a̍ ni᷄ŋ, yɔ̄ŋi̍ nya̍ sɔ̄la̍ pi̍ɔ̍mndo̍.”