Nɔ̍mbāā 16 - Yāu̍ Mɛ̄lɛ̄ka̍a̍

A̍ mɛ̄ɛ̍ Ko̍lūā, a̍ De̍tāŋ, a̍ Ābi̍lūām a̍ si̍mu̍l Mūu̍sē yɛ̍ o̍kɔ̄ɔ̄

¹ Ō wa̍ a̍ te̍le̍ŋ pi᷅lɛ̍, mi̍ Ko̍lūā, po̍ I̍si̍hāā Li̍va̍īnɔ̄ wo̍, fūlāa̍ o̍ būŋgɛ̄ī Ko̍ha̍tīi̍ye̍ ni᷄ŋ, a̍ pūa̍a̍ fu̍la̍ o̍ yu̍ŋgu̍ Lūbɛ᷅ŋ ndo̍ chōo̍ wa̍, nda̍ yɔ̍nūŋ ni̍ māā, De̍tāŋ nda̍ Ābi̍lūām, pūa̍a̍ Ɛ̄li̍a̍a̍bī wa̍, a̍ Ɔ᷅ŋ, po̍ Pɛ̍lɛ̍tī wo̍, ma̍ sīmūl Mūu̍sē.

² O̍ ko̍ŋ kɔ̍ɔ̍lī, ma̍ hīāū wāŋnda̍ kɔ̄ɔ̄lī, wāŋnda̍ kɛ̄mɔ̄ɔ̍ lēdīi̍ŋ a̍ ŋ̄wāŋ be̍le̍-ŋu̍ɛ̍ɛ̍nu̍ (250), le̍ mā sīmu̍l Mūu̍sē. Ndu̍yɛ̍ wānāā nda̍ hīōū ha̍ā kɔ̄ɔ̄lī wa̍, nda̍ kpo̍u̍ wāŋ bɛ̄ndūa̍a̍ wa̍ wāŋnda̍ chīla̍ŋ nda̍ nda̍ wa̍ ni̍, ndu̍yɛ̍ wānāā tɔ̍ɔ̍ wa̍ nda̍ wa̍ wānāā ndāa̍ tɛ̄ɛ̄ŋ ni̍.

³ Nda̍ kpo̍u̍ ma̍ chūūŋgi̍āŋ na̍a̍ pīlɛ̍ ma̍ kūā nāa̍ Mūu̍sē chu̍a̍ nda̍ E̍lɔ̄ŋ. Ma̍ dīmūl nda̍ āā, “Lā chūānu̍ŋ ni᷅ŋ bɔ̍ɔ̍ nya̍ pi̍la̍ ā bɛ̍ndū. Lā si̍nā nu̍a̍ā māā na̍a̍ wāŋnda̍ I̍sɔ̄lūɛ̄ī kpo̍u̍, ŋ̄ chō wānāā kāsī Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍? Na̍a̍ kpo̍u̍ Mɛ̄lɛ̄ka̍ Ya̍a̍wɛ̄ɛ̄ cho̍ lātūlu̍ a̍ na̍a̍. Chūānɔ᷄ŋ bɛ̍ndū yɛ̄ɛ̄nɛ̍ nya̍ chūānu̍ŋ yɛ̍ ni᷅ŋ ho̍ō, mi̍ lā sīīŋgūū nya̍ pi̍la̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ bōlle̍ŋ?”

⁴ Mɛ̄ɛ̍ Mūu̍sē o̍ tu̍e̍ī nyɛ̄ wāŋnda̍ ha̍ā dīmi̍ wo̍, mbo̍ hīnī lɛ̄ŋ, mbo̍ fūūlūū hɔ̄lla̍ lɛ̄ŋ mɛ̍ɛ̄.

⁵ O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl Ko̍lūā a̍ wānāa̍ wa̍ ndu̍ kɔ̄ɔ̄lī wa̍ āā, “Sīɔ̄ īdīi̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ na̍a̍ chɔ̄m wāna̍ cho̍ wāna̍ ndɔ̄ɔ̍ wo̍, ndu̍yɛ̍ mbo̍ wā wāna̍ kāsī Mɛ̄lɛ̄ka̍ o̍ hɔ̄l lo̍. Wāna̍ o̍ cho̍ tōsā mbō sɔ̄ɔ̄ŋgu̍u̍ ndu̍ īkɛ̄i̍ yo̍, mɛ̄ɛ̍ wānā ko̍ŋ cho̍ wāna̍ ndɔ̄ɔ̍ ni̍, mɛ̄ɛ̍ ndu̍ o̍ hɛ̍li̍ ni̍.

^6-7 Ko̍lūā, nūm ni̍ wānāa̍ cho̍ nu̍m kɔ̄ɔ̄lī wa̍ ni̍, sīɔ̄ īdīi̍, wānā o̍ wānā o̍ chu̍a̍ hɛ̄ŋgɛ̍i̍ nda̍ lūām nyɛ᷅m chūŋ kɛ̄ndɔ᷄ŋ lēni᷄ŋ ndo̍, mā dɔ̄ū yīŋnde̍ŋ lēni᷄ŋ a̍ nyɛ̄m chūŋ kɛ̄ndɔ᷄ŋ, mī wānā o̍ wānā ku̍ɛ̄ Mɛ̄lɛ̄ka̍ Ya̍a̍wɛ̄ɛ̍ lāchī o̍ ma̍āŋndo̍. O̍ ko̍ŋ, ŋ̄ chō chɔ̄ wāna̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ le̍ wāa̍ wāna̍ ndɔ̄ so̍līāā lāsa̍lāa̍ wo̍. Nya̍ Līva̍īya̍, nya̍ kpe̍e̍kpe̍i̍ chu̍a̍nu̍ŋ nya̍ pi̍la̍ ā bɛ̄ndū ni̍.”

⁸ Mi̍ Mūu̍sē o̍ hi̍a̍ū lāchī a̍ sūɛ̍i̍ nāa̍ Ko̍lūā chu̍a̍, mbo̍ dīmūl ndu̍ āā, “Lā ya᷄ŋ ya̍ nīla̍ŋ nya̍ Līva̍īya̍.

⁹ Hɛ̄lī Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ nya̍ ho̍ō te̍ŋge̍le̍ŋ I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ, le̍ mī lā wa̍ wa̍llo̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ, ndu̍yɛ̍ a̍ le̍ ku̍ndā I̍sɔ̄lūɛ̍i̍ya̍ si᷄mnda̍ŋ lāchī mī lā māla̍ nda̍ le̍ Mɛ̄lɛ̄ka̍ sōōlūūwo̍ o̍ nɛ̄ī kpe̍e̍kpe̍i̍yo̍ chōo̍ wo̍, bāā ō cho̍ le̍tu̍u̍ le̍ nya̍ le̍?

¹⁰ Mɛ̄lɛ̄ka̍ tōsa̍, mbo̍ nāŋ nūm nya̍ chāāŋāā nūm a̍ Li̍va̍īyāa̍ tu̍a̍a̍ ndu̍ pi̍la̍ īkɛ̄i̍ kpɛ̍ɛ̍la̍ŋ, le̍ mī lā wa̍ ndu̍ hūnɔ̄ɔ̍ lāchī le̍ te̍le̍ŋ o̍ te̍le̍ŋ, mɛ̄ɛ̍ a̍ ye̍e̍ma̍ vɛ̄lɛ̄ mā sīmnu᷄ŋ wa̍nā so̍līāā lāsa̍lāa̍?

¹¹ Nūm ni̍, wānāa̍ cho̍ nu̍m kɔ̄ɔ̄lī wa̍ ni̍, le̍ Mɛ̄lɛ̄ka̍ Ya̍a̍wɛ̄ɛ̍ sīmūllo̍ kpe̍e̍kpe̍i̍ nya̍ yīīna᷅ŋ ni̍. Wāna̍ māāvɛ̄ɛ̄ E̍lɔ̄ŋ o̍ cho̍ yɛ̄ mī lā ŋɔ̄ɔ̄chīa̍ŋ a̍ ndu̍?”

¹² O̍ ko̍ŋ kɔ̍ɔ̍lī, mi̍ Mūu̍sē o̍ ve̍e̍lū De̍tāŋ nda̍ Ābi̍lūām, pūa̍a̍ Ɛ̄li̍a̍a̍bī wa̍ le̍ mā kōma̍l ndu̍. Kɛ̍ ma̍ dīmūl Mūu̍sē āā, “Ŋ̄ cho̍ la̍kɔ̍ le̍.

¹³ A̍ lo̍ o̍ ko̍ŋ ma̍ sōlī na̍a̍ ō lɛ̄ŋndē I̍chi̍pīle̍ŋ ni᷄ŋ, o̍ lɛ̄ŋndē sūlāālē bɛ̄ŋnde̍ŋ ni᷄ŋ, lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ, ma̍ hūŋ a̍ na̍a̍ o̍ po̍llo̍ ho̍ō ni᷄ŋ, mɛ̄ɛ̍ ke̍ŋ i̍ cho̍ wɔ̍ le̍tu̍u̍ le̍? A̍ ye̍e̍ma̍ vɛ̄lɛ̄ mā bīī na̍a̍ mɛ̄ɛ̍ ŋ̄ yēēmā le̍ na̍a̍ bīyɔ̄ɔ̍ yɛ̍?

¹⁴ A̍ chu̍e̍l na̍a̍ būŋgɛ̄i̍ māā ā chō lākɔ̄ a̍ na̍a̍ o̍ lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ ni᷄ŋ, ndu̍yɛ̍ māā ā chō na̍a̍ lākɔ̄ chīɔ̍ɔ̍ŋ cho̍ o̍ lɛ̄ŋndē lēŋ ni᷄ŋ ndo̍ŋ kē nyɛ̄ nāā, a̍ kpe̍le̍la̍ īyɔ̄mnda̍ cho̍ lo̍ŋ nda̍ŋ, ɔ̍ɔ̄ ni̍ko̍ lɛ᷅ŋndē kālālē ŋ̄ chūe̍l na̍a̍ būŋgɛ̄i̍ le̍ŋ? Hūīyo̍ ko̍ni̍ ŋ̄ chō na̍a̍ ni̍. Le̍la̍ŋ ŋ̄ cho̍ la̍kɔ̍ le̍.”

¹⁵ Mɛ̄ɛ̍ Mūu̍sē o̍ tu̍e̍ī dīōmndā pūa̍a̍ ha̍ā ā dīmu̍l ndu̍ la̍ŋ, mbo̍ dūāūnu᷄ŋ tu̍mbe̍ o̍ ka̍lā ka̍lā. Mbo̍ dīmūl Mɛ̄lɛ̄ka̍ Ya̍a̍wɛ̄ɛ̄ āā, “Mɛ̄lɛ̄ka̍, sa̍lā o̍ sālā wāŋnda̍ ha̍ā ā sōli̍ nāa̍ nūm chu̍a̍ pɛ̍, bi̍ī sa̍lā ndāa̍ le̍. I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ a̍ wāŋnda̍ ha̍ā le̍. Sōfɛ̍lɛ̍ ndā pi᷅lɛ̍ bɛ̍ɛ̍ I̍ bi̍ī le̍.”

¹⁶ O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl Ko̍lūā āā, “Nūm ni̍, ku̍ndā nūmndo̍ ni̍, lā hu᷄ŋ si̍ɔ̍dīi̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ dīō. E̍lɔ̄ŋ bɛ̍ɛ̍ ndu̍ cho̍ wā lo̍ŋ.

¹⁷ Nūm ni̍, ŋ̄wāŋ kɛ̄mɛ̄ le̍ di̍i̍ŋ a̍ be̍le̍-ŋu̍ɛ̍ɛ̍nu̍a̍a̍ cho̍ nu̍m kɔ̄ɔ̄lī wa̍ ni̍, wānā o̍ wānā o̍ nɔ̍ mbō chūa̍ hɛ̄ŋgɛ̍i̍ nda̍ lūām nyɛ᷅m chūŋ kɛ̄ndɔ᷄ŋ lēni᷄ŋ ndo̍ mbō dɔ̄ū nyɛ̄m chūŋ kɛ̄ndɔ᷄ŋ lēni᷄ŋ, mbō hīŋ Mɛ̄lɛ̄ka̍ Ya̍a̍wɛ̄ɛ̍ lāchī o̍ ma̍āŋndo̍. E̍lɔ̄ŋ bɛ̍ɛ̍ o̍ cho̍ lākɔ̄ a̍ hɛ̄ŋgɛ̍i̍ ndɔ̄ lu̍a̍māā nyɛ̄m chūŋ kɛ̄ndɔ̄ɔ̍ Mɛ̄lɛ̄ka̍ lāchī o̍ ma̍āŋndo̍.”

¹⁸ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ wānā o̍ wānā o̍ chu̍ā hɛ̄ŋgɛ̍i̍ nda̍ lūām nyɛ᷅m chūŋ kɛ̄ndɔ᷄ŋ lēni᷄ŋ ndo̍, mbo̍ dūāū yīŋnde̍ŋ lēni᷄ŋ, o̍ ko̍ŋ kɔ̍ɔ̍lī, mbo̍ hāndū nyɛ̄m chūŋ kɛ̄ndɔ᷄ŋ lēchōo̍, mbo̍ kɔ̍ si᷅m o̍ tɛ̍ndīi̍ Mɛ̄lɛ̄ka̍a̍ sōndōo̍ nda̍ Mūu̍sē wa̍ā lātūlu̍ a̍ E̍lɔ̄ŋ.

¹⁹ Mi̍ Ko̍lūā o̍ chu̍u̍ŋgīāā I̍sɔ̄lūɛ̍i̍ya̍ kpo̍u̍ na̍a̍ pi᷅lɛ̍, le̍ Mūu̍sē nda̍ E̍lɔ̄ŋ sīmūllo̍, ma̍ sīm ma̍ mūlūl Mūu̍sē nda̍ E̍lɔ̄ŋ hɔ̄lla̍ o̍ tɛ̍ndīi̍ Mɛ̄lɛ̄ka̍a̍ sōndōo̍. O̍ lēpīlɛ̍ ni᷄ŋ kpe̍, mi̍ pa̍ŋgēle̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ I̍sɔ̄lūɛ̍i̍ya̍ lātūlu̍ wo̍ ō chɔ̄mnu᷄ŋ ku̍ndāa̍ kpo̍u̍.

²⁰ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē nda̍ E̍lɔ̄ŋ āā,

²¹ “Lā fūla̍ wa᷅ŋnda̍ ha̍ā tɛ̄ɛ̄ŋ I̍ tɛ̍ɛ̍mbūū nda̍ o̍ lēpīlɛ̍ ni᷄ŋ kpe̍ mī chi̍i̍ a̍ nda̍.”

²² Kɛ̍ mi̍ Mūu̍sē nda̍ E̍lɔ̄ŋ a̍ ba᷅ŋ wūla̍ŋ ma̍ fūūlūū hɔ̄lla̍ lɛ̄ŋ mɛ̍ɛ̄, ma̍ pīɛ̄ī Mɛ̄lɛ̄ka̍ ma̍ dīmī āā, “Ōo̍ Mɛ̄lɛ̄ka̍, Mɛ̄lɛ̄ka̍ yɔ̍ŋgu̍ wa᷅na̍ chi̍o̍o̍ yōōmōo̍ wo̍, bāā le̍ yɔ̄ŋ wɔ̄ɔ̍ŋ wānā pi̍lɔ̍ɔ̍ mā dɔ̄ɔ̄nu᷄ŋ tu̍mbe̍ a̍ ku̍ndāa̍ kpo̍u̍?”

²³ O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

²⁴ “Di̍mu̍l wa᷅ŋnda̍ kpo̍u̍ mā fāŋa̍ŋ o̍ tɛ̍ndīi̍la̍ wāŋnda̍ ha̍ā īkɛ̄i̍, nda̍ yɔ̍nūŋ ni̍ māā Ko̍lūā a̍ De̍tāŋ, a̍ Ābi̍lūām.”

²⁵ O̍ ko̍ŋ, mi̍ Mūu̍sē o̍ cha̍ŋ mbo̍ kūā o̍ tɛ̍ndīi̍ De̍tāŋ ndo̍, a̍ o̍ tɛ̍ndīi̍ Ābi̍lūām ndo̍. Mi̍ wāŋ bɛ̄ndūa̍a̍ I̍sɔ̄lūɛ̄ī a̍ tu̍āl ndu̍ kɔ̄ɔ̄lī.

²⁶ Mi̍ Mūu̍sē o̍ kɔ̍ di̍mūl wānāa̍ wa̍ o̍ tɛ̍ndīi̍ De̍tāŋ ndo̍ īkɛ̄i̍, a̍ o̍ tɛ̍ndīi̍ Ābi̍lūām ndo̍ īkɛ̄i̍ ya̍ āā, “Lā fāŋa̍ŋ o̍ tɛ̍ndīi̍la̍ wānāā yɔ̄ŋ wɔ̄ɔ̍ŋnda̍ ha̍ā īkɛ̄i̍. Ndu̍yɛ̍ lā pi̍la̍ŋ nyɛ᷅ o̍ nyɛ̄ ndā le̍, yɔ̄ŋi̍ nya̍ wa̍ a̍ tɛ̍ɛ̍mbāā a̍ nda̍ lātūlu̍, fo̍ndōle̍ le̍ yɔ̄ŋndā ndāla̍ wɔ̍ɔ̍ŋnda̍ŋ.”

²⁷ O̍ ko̍ŋ, mi̍ wāŋnda̍ ā fāŋa᷄ŋ o̍ tɛ̍ndīi̍ Ko̍lūā wo̍ īkɛ̄i̍, a̍ tɛ̍ndīi̍ De̍tāŋ ndo̍, a̍ tɛ̍ndīi̍ Ābi̍lūām ndo̍. De̍tāŋ ni̍, Ābi̍lūām ni̍, ā wa̍ īsīsi̍ o̍ tɛ̍ndīi̍la̍ ndāla̍ŋ sōndōla̍ŋ, a̍ lāāndāā ndāa̍ ndu̍yɛ̍ a̍ chūāūwāā ndāa̍ lātūlu̍.

²⁸ Mi̍ Mūu̍sē lo᷅ o̍ ko̍ŋ mbo̍ dīmūl wāŋnda̍ āā, “O̍ he̍ī nya̍ hīŋ sīnā ni̍ māā nyɛ̄ o̍ nyɛ̄ ya̍ I̍ cho̍ tōsāa̍ māā Mɛ̄lɛ̄ka̍ Ya̍a̍wɛ̄ɛ̍ ve᷅m ya̍ ni̍, māā ō cho̍ a̍ kpāāya̍ nī le̍ ya̍ I̍ cho̍ nyɛ̄ o̍ nyɛ̄ tōsāa̍ le̍.

²⁹ Tē pūa̍a̍ ha̍ā ā vī o̍ bā ndāa̍ chōo̍ pɛ̍, mbō ve̍ nyɛ᷅ o̍ nyɛ̄ le̍ yɔ̍nu̍ŋ a̍ nda̍ le̍, mbō wa̍ māā wu̍ yɔ̍ŋāa̍ ho̍ō ko̍ni̍ nda̍ vī ni̍ pɛ̍, mɛ̄ɛ̍ nyɛ̄ o̍ nyɛ̄ ya̍ I̍ cho̍ tōsāa̍ mɛ̄ɛ̍ ō cho̍ Mɛ̍lɛ̄ka̍ Ya̍a̍wɛ̄ɛ̄ le̍ ve᷅m ya̍ le̍.

³⁰ Kɛ̍ tē Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ sūɛ̍i̍ kɔ̄ndɔ̄fi̍li̍i̍ bɛ̄ndūe̍i̍ pāa̍le̍ hāūle̍ŋ nde᷅ŋ pɛ̍, sūɛ̍i̍ wānā o̍ wānā tu̍i̍i̍ yɔ̍ bɛ̍ɛ̍ le̍pi̍lɛ̍ bɛ̍ɛ̍ le̍ ve̍, mbō tōsa̍ mī lɛ̄ŋnde̍ŋ lē kūmbi̍ŋ, pūa̍a̍ ha̍ā ni̍, a̍ nyɛ̄ o̍ nyɛ̄ nda̍ nɔ̄ mī lɛ̄ŋnde̍ŋ lē kūmbū nda̍ kpo̍u̍, mā kūɛ̄ o̍ wāŋ vīlɛ̍i̍ya̍ lo̍ chi̍e̍e̍ pɛ̍, o̍ ko̍ŋ nya̍ chō sīnā ni̍ māā pūa̍a̍ ha̍ā ā kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̍.”

^31-32 Ndu̍yɛ̍ dīmīo̍o̍ nu̍a̍ā mi̍ Mūu̍sē o̍ chi̍ī dīōmndā lāŋ dīmī, nāa̍ pūa̍a̍ ha̍ā ā wa̍ īsīsi̍ wa̍, De̍tāŋ ni̍, a̍ Ābi̍lūām, a̍ Ko̍lūā, ndu̍yɛ̍ a̍ yu̍ŋgu̍la̍ ndāla̍ŋ, o̍ ko̍ŋ kɔ̍ɔ̍lī, a̍ wānāa̍ to᷅l Ko̍lūā kɔ̄ɔ̄lī wa̍ ā pīli̍a̍a̍, mi̍ lɛ̄ŋnde̍ŋ lē kūmbi᷄ŋ lo̍ŋ, nda̍ kpo̍u̍ ma̍ tūāl o̍ lɛ̄ŋnde̍ŋ bɛ̄ŋgu̍, mi̍ lɛ̄ŋnde̍ŋ lē kūmbū nda̍ lātūlu̍ a̍ nyɛ̄ o̍ nyɛ̍ nda̍ nɔ̍.

³³ Nda̍ kpo̍u̍ ā lo̍ yōōmū ma̍ tūāl o̍ lɛ̄ŋnde̍ŋ bɛ̄ŋgu̍ lātūlu̍ a̍ nyɛ̄ o̍ nyɛ̄ nda̍ nɔ̄ mā kūā chi̍e̍e̍ pīɔ̍m. Mi̍ lɛ̄ŋnde̍ŋ lē mīīŋgū nda̍ chōo̍ nda̍ kpo̍u̍ ma̍ lō, mi̍ nda̍ fāŋa᷄ŋ ku̍ndā I̍sɔ̄lūɛ̍i̍ya̍a̍ tu̍a̍a̍ chōo̍.

³⁴ Mɛ̄ɛ̍ I̍sɔ̄lūɛ̍i̍ya̍a̍ tu̍a̍a̍ wa̍ o̍ fo̍ndā kōŋ nda̍ ā tūēī wāŋnda̍ ha̍ā cha᷄ŋnda̍ŋ, nda̍ kpo̍u̍ ma̍ nyāānu᷄ŋ. Ma̍ dēŋī chōo̍ cho̍o̍ ma̍ dīmī āā, “Na̍a̍ bɛ̍ɛ̍ lɛ̄ŋnde̍ŋ lē hīŋ na̍a̍ mīōlɔ̄ɔ̄ fɔ̍!”

³⁵ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ yīŋndē bɛ̄ndūle̍ŋ mi̍ lē hu᷄ŋ lo᷅m pūa̍a̍ kɛ̍mɛ̄ le̍di̍i̍ŋ a̍ be̍le̍-ŋu̍ɛ̍ɛ̍nu̍a̍a̍ (250) wa̍ hi᷅ŋ nyɛ̄m chūŋ kɛ̄ndɔ᷄ŋ lōmɔ̄ɔ̍ o̍ ma̍āŋndo̍ wa̍ kpo̍u̍.

A̍ hɛ̄ŋgɛ̍i̍la̍ nda̍ lūām nyɛ᷅m chūŋ kɛ̄ndɔ᷄ŋ lēni᷄ŋ nda̍ŋ o̍kɔ̄ɔ̄.

³⁶ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

³⁷ “Di̍mu̍l Ɛ̄li̍a̍a̍sā, po̍ E̍lɔ̄ŋ ndo̍ mbō kūɛ̄ nāa̍ wānāā kāŋ ā ŋūɛ̄ ka̍ŋ nda̍, mbō kɔ̍ so̍o̍lūū hɛ̄ŋgɛ̍i̍la̍ lu̍a̍māālā nyɛ̄m chūŋ kɛ̄ndɛ̄lā lāŋ o̍ yīŋnde̍ŋ ni᷄ŋ. Tē ō sōōlu̍u̍ la̍ŋ pɛ̍, dɛ̄ŋgūlta̍ŋ cho̍ o̍ hɛ̄ŋgɛ̍i̍la̍ la̍ŋ ni᷄ŋ nda̍ŋ o̍ sa᷄ŋ nda̍ŋ la̍nda̍ŋ. Kāni̍ fo̍ndōle̍, hɛ̄ŋgɛ̍i̍la̍ la̍ŋ hɛ̄ŋgɛ̍i̍la̍ kāsīla̍ŋ la̍ cho̍ ya̍ Mɛ̍lɛ̄ka̍ o̍ hɔ̄l ni̍.

³⁸ Pūa̍a̍ sɔ̍la̍ ha̍ā pīɔ̍mndo̍ le̍ yɔ̄ŋ ndā wɔ̍ɔ̍ŋndo̍ wa̍, bōōndi̍i̍ nda̍ kūɛ̄ a̍ hɛ̄ŋgɛ̍i̍la̍ la̍ŋ ya̍ lāchī le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēni᷄ŋ nde̍, bōōndi̍i̍ ke̍ŋ hɛ̄ŋgɛ̍i̍la̍ la̍ŋ lā sīmnu᷄ŋ la̍ ka̍sī ya̍ Mɛ̄lɛ̄ka̍ o̍ hɔ̄l ni̍. Le̍la̍ŋ lā nɔ̄ mī lā chɔ̄ū hɛ̄ŋgɛ̍i̍la̍ la̍ŋ nyɔ̄ɔ̍ māā bōo̍ bɛ̍ndū le̍ ma̍āŋndo̍ kūmbɔ̄ɔ̍ a̍ ndu̍, lā lo̍ la̍ŋ lɔ̄ɔ̍ a̍ ha̍mɛ̄i̍yo̍ mī lā sīmnu᷄ŋ nyɔ̍ɔ̍ ō pīlɛ̍. Bōo̍ nya̍ chō ko̍ŋ chɔ̍u̍wɔ̄ɔ̄ le̍ ma̍āŋndo̍ kūmbɔ̄ɔ̍ a̍ ndu̍ wo̍, ndu̍ chō wā tāāmāsi̍o̍o̍ le̍ wāŋnda̍ I̍sɔ̄lūɛ̄ī ni̍.”

^39-40 O̍ ko̍ŋ, mi̍ Ɛ̄li̍a̍a̍sā, wānā so̍līāā lāsa̍lāa̍, ō tōsā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍. Mbo̍ kɔ̍ chɔ̍ɔ̍vīāā hɛ̄ŋgɛ̍i̍la̍ chīli̍ŋi̍i̍ būlɔ̍ŋsīi̍la̍ la̍ŋ, la̍ŋ la̍ yɔ̍nūŋ māā hɛ̄ŋgɛ̍i̍la̍ pūa̍a̍ ŋu̍ɛ̄ o̍ yīŋnde̍ŋ ni᷄ŋ nda̍ ā kūɛ̄ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēni᷄ŋ nda̍ŋ ni̍, mbō lō la̍ŋ lɔ̄ɔ̍ nāa̍ pi᷅lɛ̍ a̍ ha̍mɛ̄i̍yo̍ mbo̍ tōōsīāā nyɔ̄ɔ̍ māā bōo̍ bɛ̍ndū le̍ ma̍āŋndo̍ kūmbɔ̄ɔ̍ a̍ ndu̍. He̍ī wa̍ māwāā sīlāa̍ le̍ wāŋnda̍ I̍sɔ̄lūɛ̄ī māā wānā o̍ wāna̍ fu̍la̍ o̍ pūlāle̍ E̍lɔ̄ŋ nde̍ŋ chōo̍ le̍, ō nɔ̍ mbō kūɛ̄ Mɛ̄lɛ̄ka̍ Ya̍a̍wɛ̄ɛ̍ lāchī o̍ ma̍āŋndo̍ mbō lōm nyɛ̄m chūŋ kɛ̄ndɔ᷄ŋ o̍ Mɛ̄lɛ̄ka̍ lo̍ le̍. Wānā o̍ wāna̍ ndu̍ o̍o̍ fu̍la̍ kɔ̄ɔ̄lī pɛ̍, nyɛ̍ yɔ̍nu̍ŋ a̍ Ko̍lūā nda̍ wānāa̍ to᷅l ndu̍ kɔ̄ɔ̄lī wa̍ wo̍, ndu̍ ko̍ni̍ ndu̍ o̍o̍ yɔ̍nūŋ wa̍nā ko̍ŋ ni̍.

A̍ mɛ̄ɛ̍ E̍lɔ̄ŋ o̍ chi̍i̍ndi̍a̍a̍ yōōmūlā wāŋnda̍ yɛ̍ o̍kɔ̄ɔ̄

⁴¹ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, wāŋnda̍ I̍sɔ̄lūɛ̄ī kpo̍u̍ ma̍ kāndū ŋɔ̄ɔ̄chīa̍ŋndo̍ a̍ Mūu̍sē nda̍ E̍lɔ̄ŋ le̍ nyɛ̍ yɔ̍nu̍ŋ ndo̍. Ma̍ dīmūl Mūu̍sē nda̍ E̍lɔ̄ŋ āā, “Nya̍ di̍u̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ ha̍ā ni̍.”

⁴² Nda̍ kpo̍u̍ ma̍ chūūŋgi̍āŋ na̍a̍ pi᷅lɛ̍ le̍ Mūu̍sē nda̍ E̍lɔ̄ŋ sīmūllo̍. Kɛ̍ mɛ̄ɛ̍ nda̍ mūli̍ hɔ̄lla̍ kūmbū tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍, o̍ lēpīlɛ̍ ni᷄ŋ kpe̍ ma̍ chā mi̍ yu̍mbu̍ yu̍mbu̍ i̍kpu̍ŋgbāa̍ tūāl mbo̍ kūmbū tɛ̍ndīi̍yo̍ kpo̍u̍, o̍ ko̍ŋ kɔ̍ɔ̍lī, mi̍ pa̍ŋgēle̍ bɛ̄ndu̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nda̍ lātūlu̍ wo̍ ō chɔ̄mnu᷄ŋ nda̍.

⁴³ O̍ ko̍ŋ, mi̍ Mūu̍sē nda̍ E̍lɔ̄ŋ a̍ ku̍ā ma̍ kɔ᷄ si᷅m o̍ tɛ̍ndīi̍ Mɛ̄lɛ̄ka̍a̍ sōndōo̍.

⁴⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

⁴⁵ “Lā fūla̍ wa᷅ŋnda̍ ha̍ā tɛ̄ɛ̄ŋ I̍ tɛ̍ɛ̍mbūū nda̍ o̍ lēpīlɛ̍ ni᷄ŋ kpe̍.” O̍ ko̍ŋ kɔ̍ɔ̍lī, mi̍ Mūu̍sē nda̍ E̍lɔ̄ŋ a̍ ba᷅ŋ wūla̍ŋ ma̍ fūūlūū hɔ̄lla̍ lɛ̄ŋ di̍.

⁴⁶ Mi̍ Mūu̍sē o̍ di̍mūl E̍lɔ̄ŋ āā, “Chu̍a̍ hɛ̄ŋgɛ̍i̍ nūm ŋ̄ lūām nyɛ᷅m chūŋ kɛ̄ndɔ᷄ŋ lēni᷄ŋ ndo̍ chɔ̍chɔ̍, mā kɔ̄ndū dɛ̄ŋgūlta̍ŋ o̍ ma̍āŋndo̍ chōo̍ mā dɔ̄ū lēni᷄ŋ o̍ ko̍ŋ kɔ̍ɔ̍lī, mā ha̍ndu̍ nyɛ̄m chūŋ kɛ̄ndɔ᷄ŋ lēchōo̍. O̍ ko̍ŋ kɔ̍ɔ̍lī, mā kūɛ̄ a̍ ndu̍ chɔ̍chɔ̍ nāa̍ wāŋnda̍ ā chō ka̍ŋ īsīsi̍ ku̍ndāa̍ wa̍, mā kɔ̍ so̍lī sa̍lā nyɛ̄m chūŋ kɛ̄ndɔ̄ɔ̍ lo̍ŋ le̍ nda̍, le̍ mī Mɛ̄lɛ̄ka̍ ma᷄l nda̍ le̍ yɔ̄ŋ ndā wɔ̍ɔ̍ŋndo̍. Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ɔ̍nu᷄ŋ tu̍mbe̍ a̍ nda̍ o̍ ka̍lā ka̍lā, ndu̍yɛ̍ o̍ kāndu̍ ni᷅ŋ nda̍ bɛ̍ɛ̍ di̍ūwo̍ a̍ nāāla̍ŋ.”

⁴⁷ O̍ ko̍ŋ, mi̍ E̍lɔ̄ŋ o̍ to̍sā mɛ̄ɛ̍ Mūu̍sē o̍ di̍mu̍l ndu̍ yɛ̍. Mbo̍ chūā hɛ̄ŋgɛ̍i̍ ndɔ̍ o̍ lu̍ām nyɛ᷅m chūŋ kɛ̄ndɔ᷄ŋ lēni᷄ŋ ndo̍, mbo̍ kūā mbo̍ kɔ᷄ si᷅m wa᷅ŋnda̍ tɛ̄ɛ̄ŋ. Nāāla̍ŋ la̍a̍ de᷅l ni᷅ŋ wāŋnda̍ I̍sɔ̄lūɛ̍i̍ ma̍ wā pīɔ̍mnda̍ŋ kpe̍e̍kpe̍i̍. Mi̍ E̍lɔ̄ŋ o̍ hāndū nyɛ̄m chūŋ kɛ̄ndɔ᷄ŋ o̍ hɛ̄ŋgɔ̍ɔ̍ ni᷄ŋ o̍ dɛ̄ŋgūltā lāŋ chōo̍ mbo̍ sōlī sa̍lā nyɛ̄m chūŋ kɛ̄ndɔ̄ɔ̍ o̍ Mɛ̄lɛ̄ka̍ lo̍ le̍ mī Mɛ̄lɛ̄ka̍ ma᷄l wāŋnda̍ I̍sɔ̄lūɛ̄ī le̍ yɔ̄ŋ ndā wɔ̍ɔ̍ŋndo̍.

⁴⁸ Mi̍ E̍lɔ̄ŋ o̍ si᷅m wānāā nda̍ a̍a̍ vi᷅ ni᷅ŋ a̍ nāālā lāŋ nda̍ tɛ̄ɛ̄ŋ a̍ wānāa̍ wa̍ yōōmū wa̍. Ō lo̍ īsīsi̍ nda̍ tɛ̄ɛ̄ŋ le̍nde̍ mi̍ nāālā lāŋ lā pɛ̄ŋgī mi̍ wāŋnda̍ pɛ̄ŋgī pīɔ̍mnda̍ŋ.

⁴⁹ Kɛ̍ mi̍ wāŋnda̍ wū a̍ nāālā lāŋ wāa̍la̍ŋ tɔ̍ a̍ lā hīɔ̍ɔ̍lu̍ a̍ kɛ̄mɔ̄ɔ̍ lē ŋɔ᷄mmɛ̍ū (14,700), ō cho̍ wɔ̍ wa̍nāa̍ vi᷅ o̍ sūɛ̍i̍ Ko̍lūā ve̍ ni᷄ŋ nda̍ le̍.

⁵⁰ Mɛ̄ɛ̍ E̍lɔ̄ŋ che᷅ māā kpūndɛ̍ kōŋ ō hīo̍u̍, mbo̍ mīīŋgū nāa̍ Mūu̍sē chu̍a̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ sōndōo̍.