Nɔ̍mbāā 13 - Yāu̍ Mɛ̄lɛ̄ka̍a̍

A̍ su̍a̍ŋsu̍a̍ŋa̍a̍ nda̍ vēm lɛ̄ŋndē Ke̍nāŋnde̍ŋ mɛ̄ɛ̄nda᷄ŋndo̍ wa̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Hɛ̍li̍ wānāa̍ cho̍ yu̍ŋgu̍la̍ŋ bōlle̍ wa̍, yu̍ŋgu̍ o̍ yu̍ŋgu̍ wāŋndo̍ ō pīlɛ̍, mā vēm nda̍ mā kɔ̍ mɛ̍ɛ̍nda᷄ŋ lɛ̍ŋndē Ke̍nāŋnde̍ŋ, lɛ̄ŋndē ya̍ I̍ cho̍ wāŋnda̍ I̍sɔ̄lūɛ̍i̍ kīo̍o̍ le̍ŋ.”

³ O̍ ko̍ŋ, mi̍ Mūu̍sē to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍, mbo̍ hɛ̄lī wānāa̍ wa̍ yu̍ŋgu̍la̍ŋ I̍sɔ̄lūɛ̄ī bōlle̍ wa̍, mbo̍ vīām nda̍ le̍ mā kɔ̍ mɛ̍ɛ̍nda᷄ŋ lɛ᷅ŋndē Ke̍nāŋ nde̍ŋ, chɔ̄nɔ᷄ŋndo̍ nāa̍ nda̍ wa̍ o̍ lɛ̄ŋndē po̍lte̍ŋ Pa̍lūāŋ nda̍.

⁴ Wānāā o̍ hɛ̍li̍ mbo̍ vīām nda̍, nda̍ wa̍ ha̍ā ni̍, a̍ yu̍ŋgu̍la̍ nda̍ wa̍ bōlle̍ la̍ŋ. Si̍a̍mūāā, po̍ Sa̍kɔ̄ɔ̄ wo̍, ndu̍ wa̍ yu̍ŋgu̍ Lūbɛ᷅ŋ ndo̍ bōlle̍ŋ ni̍,

⁵ a̍ Si̍a̍fa̍tī, po̍ Hɔ̍lūī wo̍, ndu̍ wa̍ yu̍ŋgu̍ Si̍mīɔ̄ŋ ndo̍ bōlle̍ŋ ni̍,

⁶ a̍ Ke̍lɛ̍bī, po̍ Chɛ̍fu̍nɛ̄ɛ̄ wo̍, ndu̍ wa̍ yu̍ŋgu̍ Chu̍dā wo̍ bōlle̍ŋ ni̍,

⁷ a̍ I̍kāl, po̍ Chōo̍si̍ɔ̍ɔ̍, ndu̍ wa̍ yu̍ŋgu̍ I̍sa̍a̍kā wo̍ bōlle̍ŋ ni̍,

⁸ a̍ Hōōsi̍a̍ā, po̍ Nu᷅ŋ ndo̍, ndu̍ wa̍ yu̍ŋgu̍ E̍fi̍lūēmndo̍ bōlle̍ŋ ni̍,

⁹ a̍ Pa̍a̍tī, po̍ Lu̍a̍fū wo̍, ndu̍ wa̍ yu̍ŋgu̍ Bɛ̍ŋnja̍mīŋ ndo̍ bōlle̍ŋ ni̍,

¹⁰ a̍ Ka̍dīɛ̄l, po̍ So̍dī wo̍, ndu̍ wa̍ yu̍ŋgu̍ Sɛ̍bu̍lɔ̄ŋ ndo̍ bōlle̍ŋ ni̍,

¹¹ a̍ Ka̍a̍dī, po̍ Su̍sī wo̍, ndu̍ wa̍ yu̍ŋgu̍ Chōo̍sɛ̍ wo̍ bōlle̍ŋ ni̍ (ndu̍ yɔ̍nūŋ māā yu̍ŋgu̍ Mānāa̍sē wo̍ ni̍),

¹² a̍ A̍mi̍ɛ̍l, po̍ Kɛ̍ma̍lī wo̍, ndu̍ wa̍ yu̍ŋgu̍ Da᷅ŋ ndo̍ bōlle̍ŋ ni̍,

¹³ a̍ Sɛ̍tɔ̄, po̍ Ma̍i̍kɛ̄l wo̍, ndu̍ wa̍ yu̍ŋgu̍ A̍sīɛ̄ɛ̄ wo̍ bōlle̍ŋ ni̍,

¹⁴ a̍ Na̍a̍bī, po̍ Vo̍fi̍sī wo̍, ndu̍ wa̍ yu̍ŋgu̍ Nāfi̍ta̍lī wo̍ bōlle̍ŋ ni̍,

¹⁵ a̍ Kɛ̍wɛ̄l, po̍ Ma̍chī wo̍, ndu̍ wa̍ yu̍ŋgu̍ Ka̍a̍dī wo̍ bōlle̍ŋ ni̍.

¹⁶ Mɛ̄ɛ̍ su̍a̍ŋsu̍a̍ŋa̍a̍ Mūu̍sē o̍ ve᷅m le̍ lɛ̄ŋndē Ke̍nāŋnde̍ŋ mɛ̄ɛ̄nda᷄ŋndo̍ wa̍, nda̍ wa̍ ka̍ŋ ni̍. Hōōsi̍a̍ā, po̍ Nu᷅ŋ ndo̍, mi̍ Mūu̍sē ke᷅ ndu̍ dīōlā chēle̍ŋ, āā Chɔ̄ɔ̍sūāā.

¹⁷ Mɛ̄ɛ̍ su̍a̍ŋsu̍a̍ŋnda̍ ha̍ā ā wa̍ kɔ̄la̍ŋ, mi̍ Mūu̍sē o̍ cho̍ŋgu᷄ŋ nda̍ āā, “Lā hēēlu̍ kɛ᷅ mī lā kūɛ̄ o̍ lɛ̄ŋndē Ke̍nāŋnde̍ŋ bā tōūwo̍, ndu̍yɛ̍ mī lā bālu̍ a̍ mɛ̄ɛ̄ndīa̍ŋndo̍ o̍ lɛ̄ŋndē īpēmbūle̍ŋ ni᷄ŋ kpo̍u̍.

¹⁸ Lā kɔ̍ mɛ̍ɛ̍ndīa̍ŋ mī lā chē mɛ̄ɛ̍ lɛ̄ŋndē lēŋ lē chō yɛ̍, ndu̍yɛ̍ mī lā sīna̍ tē wānāa̍ cho̍ o̍ lɛ̄ŋndē lēŋ ni᷄ŋ nda̍, tē ā chō wānāā dīāllūŋ kālā, ɔ̄ɔ̄ tē ā cho̍ wa̍nāā dīāllūŋ kālā le̍, o̍ ko̍ŋ kɔ̍ɔ̍lī mī lā sīna̍ vɛ̄lɛ̄ tē ā chō fāŋā, ɔ̄ɔ̄ tē ā cho̍ fa̍ŋā le̍.

¹⁹ Lā kɔ̍ mɛ̍ɛ̍nda᷄ŋ mī lā chē lɛ̄ŋndē su̍u̍le̍ nda̍ chō ni᷄ŋ nde̍ŋ, tē lē chō lɛ̄ŋndē kɛ̄ndɛ̄, ɔ̄ɔ̄ tē lē cho̍ lɛ᷅ŋndē kɛ̄ndɛ̄ le̍, tē chi̍e̍e̍ŋ ndāāŋ bɛ̍ndo᷄ŋ ŋ̄ nɔ̄ sāāsāla̍ŋ lā bālāā, ɔ̄ɔ̄ tē ŋ̄ nɔ̍ la̍sa̍a̍sā le̍.

²⁰ O̍ ko̍ŋ kɔ̍ɔ̍lī, mī lā mɛ̄ɛ̄ndi̍a̍ŋ vɛ̍lɛ̄ yōndōlā ndāla̍ŋ, tē lā chō yōndōlā nāŋāā nyɛ̄, ɔ̄ɔ̄ tē lā cho̍ yōndōlā nāŋāā nyɛ̄ le̍, tē yōndōlā īyɔ̄m ni̍, ɔ̄ɔ̄ tē lā nɔ̍ i̍yɔ̍m le̍ni᷄ŋ te̍. Ndu̍yɛ̍ tē lā wa̍ hūnɔ̄ɔ̍ pɛ̍, lā kīndi̍ŋ o̍ nɛ̄ī o̍ nɛ̄ī ni̍ŋ, mī lā hīŋ a̍ kōmɔ̄ɔ̄lā cho̍ o̍ lɛ̄ŋndē lēŋ ni᷄ŋ nda̍ŋ, lā ti᷄ŋ.” (Ndu̍yɛ̍ a̍ te̍le̍ŋ kīle̍pīi̍ya̍ŋ mā kāndū di̍u̍wɔ̄ɔ̍ o̍ chīɔ̍ɔ̍ŋ ni᷄ŋ ndo̍ ki̍nɛ̍i̍ nda̍ kūɛ̄ kɔ̄lā lāŋ ni̍.)

²¹ Mi̍ pūa̍a̍ ha̍ā ā mālnu᷄ŋ ma̍ hēēlū bā lūāŋndo̍, ma̍ kɔ̍ mɛ̍ɛ̍ndīa̍ŋ lɛ᷅ŋndē Ke̍nāŋnde̍ŋ, chɔ̄nɔ᷄ŋndo̍ o̍ lɛ̄ŋndē po̍lte̍ŋ Si᷅ŋ, bā tōūwo̍, ma̍ fūūlūū Lu̍i̍ho̍bī chi̍e̍e̍ di̍, le̍ kɔ̄la̍ŋ Lēbō Ha̍ma̍tī chi̍e̍e̍ i̍kɛ̍i̍ ba᷅ŋ lūāŋndo̍.

²² Mɛ̄ɛ̍ nda̍ mālnu̍ŋ, ma̍ hēēlū ma̍ kɔ̍ ka̍ndū lɛ̄ŋndē Ke̍nāŋnde̍ŋ mɛ̄ɛ̄nda᷄ŋndo̍ bā tōūwo̍, ma̍ hūŋ a̍ Hi̍būlɔ̄ŋ chi̍e̍e̍, nāa̍ yu̍ŋgu̍la̍ fu̍la̍ o̍ pūlāle̍ A̍na̍kīle̍ŋ chōo̍ wa̍ ā wa̍ īchāli̍ wa̍. Nda̍ yɔ̍nūŋ ni̍ māā yu̍ŋgu̍ A̍hi̍māŋ ndo̍, a̍ yu̍ŋgu̍ Si̍ɛ̍sīāī wo̍, ndu̍yɛ̍ a̍ yu̍ŋgu̍ Ta̍li̍māī yo̍. Ndu̍yɛ̍ yu̍ŋgu̍la̍ŋ nda᷅ŋ, pūlālē nda̍ fūla̍ chōo̍ le̍ŋ, pūlālē dīāllūŋ kālālē bɛ̄ŋnde̍ŋ pīla̍ le̍ wa̍ ni̍, ā vīlɛ̄ī kpo̍lōsīōkōŋ. (Ndu̍yɛ̍ Hi̍būlɔ̄ŋ ko̍ŋ tāŋgūllo̍ ndu̍, wɔ̄sīla̍ŋ lā ŋɔ᷄mmɛ̍ū la̍ hi̍o̍ū ni̍, ma̍lāŋ nda̍ tāŋgūl So̍wāŋ, o̍ lɛ̄ŋndē I̍chi̍pīle̍ŋ ni᷄ŋ.)

²³ O̍ ko̍ŋ kɔ̍ɔ̍lī, mi̍ su̍a̍ŋsu̍a̍ŋnda̍ ha̍ā ā fūūlūū o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Ɛ̍si̍kɔ̄ɔ̄. Mɛ̄ɛ̍ nda̍ fūūlu̍u̍ lo̍ŋ, ma̍ kīālū lɛ̄vīī kpɔ̄ŋnjɔ̍ mākīle̍pīi̍yo̍. Kīle̍pīi̍ya̍ŋ mā wa̍ mā kūāmāā o̍ lɛ̄vīī kēŋ lɔ̍pī lɔ̍pī, mɛ̄ɛ̍ wānāā ŋīɔ̍ɔ̍ŋ ma̍ chūā ndi̍ o̍ yɔ̄mndo̍, a̍ lūsu̍l ndi̍ i̍i̍ lu̍su̍l lo̍. O̍ ko̍ŋ kɔ̍ɔ̍lī, ma̍ kūā vɛ̄lɛ̄ a̍ pɔ̄mɛ̄ki̍la̍ne̍tīi̍ya̍ŋ, ndu̍yɛ̍ a̍ fi̍kīi̍ya̍ŋ mā ti᷄ŋ.

²⁴ Nyɛ̄ kōŋ nda̍ ke̍ fo̍ndā kōŋ dīōla̍ŋ ni̍ āā, Dɛ̍ŋgbɔ̍ɔ̍ Ɛ̍si̍kɔ̄ɔ̄, kāni̍ fo̍ndōle̍, le̍ kpɔ̄ŋnjɔ̍ mākīle̍pīi̍ I̍sɔ̄lūɛ̍i̍ya̍ ā kēlū lo̍ŋ ndo̍.

²⁵ Su̍a̍ŋsu̍a̍ŋnda̍ ha̍ā, ā chīi̍ pālɛ̍i̍ be̍le̍-hi̍ɔ̍ɔ̍lu̍ o̍ lɛ̄ŋnde̍ŋ mɛ̄ɛ̄ndīa̍ŋndo̍ ni᷄ŋ. O̍ ko̍ŋ, ma̍ mīīŋgū

²⁶ Ka̍dɛ̍sī o̍ lɛ̄ŋndē po̍lte̍ŋ Pa̍lūāŋ, Mūu̍sē, o̍ ībūŋ, nda̍ I̍sɔ̄lūɛ̍i̍ya̍a̍ tu̍a̍a̍ nāa̍ nda̍ wa̍ o̍ dɔ̍ɔ̍ŋgɔ̍ɔ̍ wa̍. Mɛ̄ɛ̍ nda̍ mīīŋgu̍ o̍ dɔ̍ɔ̍ŋgɔ̍ɔ̍, ma̍ kɔ̍ do̍o̍nu᷄ŋ nda̍ ko̍na̍ nyɛ̄ o̍ nyɛ̄ nda̍ chē, ndu̍yɛ̍ ma̍ chɔ̄m nda̍ kōmɔ̄ɔ̄lā nda̍ chɛ᷄ŋ o̍ lɛ̄ŋndē lēŋ ni᷄ŋ ma̍ hūŋ a̍ la̍ŋ nda̍ŋ.

²⁷ Ma̍ dīmūl Mūu̍sē āā, “Ŋ̄ kūɛ̄ o̍ lɛ̄ŋndē Ke̍nāŋnde̍ŋ ni᷄ŋ, mi̍ ŋ̄ kɔ̍ mɛ̍ɛ̍ndīa̍ŋ nde̍ŋ kpo̍u̍ mɛ̄ɛ̍ ŋ̄ dīmu̍l na̍a̍ yɛ̍. Lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ le̍ cho̍ ni̍. Tɔ̄lɔ̄ɔ̄la̍ cho̍ o̍ lɛ̄ŋndē lēŋ ni᷄ŋ nda̍ŋ lā ti᷄ŋ la̍ cho̍ la᷅ŋ ni̍.

²⁸ Kɛ̍ wānāa̍ cho̍ o̍ lɛ̄ŋndē lēŋ ni᷄ŋ nda̍, wānāā dīāllūŋ kālāa̍ pīla̍ nda̍ cho̍ ni̍, ā vīlɛ̄ī kpo̍lōsīōkōŋ. Ndu̍yɛ̍ chi̍e̍e̍ŋ ndāa̍ŋ chi̍e̍e̍ŋ bɛ̍ndo᷄ŋ pīla̍ ŋ̍ cho̍ ni̍, ŋ̄ bālāā a̍ sāāsāla̍ŋ kpɔ̍kɔ̍su̍. Ndu̍yɛ̍, o̍ fūla̍ wɔ̍ bɛ̍ɛ̍ o̍ ko̍ŋ kɔ̍ɔ̍lī, mi̍ ŋ̄ chā vɛ̄lɛ̄ wānāā fu̍la̍ o̍ pūlāle̍ A̍na̍kīle̍ŋ chōo̍ wa̍ lo̍ŋ, wānāā dīāllūŋ kālāā bɛ̄ndūa̍a̍, ā vīlɛ̄ī kpo̍lōsīōkōŋ.

²⁹ Ndu̍yɛ̍, Āma̍la̍kāi̍tīi̍ya̍ nda̍ chō o̍ lɛ̄ŋnde̍ŋ bā tōūwo̍, mi̍ Hi̍ta̍i̍tīi̍ya̍, a̍ Chɛ̄bu̍sa̍i̍tīi̍ya̍, a̍ A̍mɔ̍lu̍a̍i̍tīi̍ya̍ nda̍ wa̍ o̍ lɛ̄ŋnde̍ ŋ̄pēmbūle̍ŋ, mi̍ Ke̍na̍na̍i̍tīi̍ya̍ pīla̍ nda̍ wa̍ o̍ pēē mɛ̄ŋmā īhɛ᷄llo̍ Mɛ̄dītālu̍e̍e̍nīāā hɔ̄lnɔ᷄ŋndo̍, ndu̍yɛ̍ a̍ Chɔ̍ɔ̍dāŋ kɔ̍ŋgɔ̍.”

³⁰ Kɛ̍ mi̍ Ke̍lɛ̍bī, su̍a̍ŋsu̍a̍ŋnɔ̍ɔ̍ ō pīlɔ̍ɔ̍ ō kīndī le̍ mbō dɛ̄ɛ̄ni̍a̍a̍ wāŋnda̍ kɔ̄lta̍ŋ, nda̍ kpo̍u̍ ā wa̍ īsīsi̍ Mūu̍sē lāchī. Mbo̍ dīmī āā, “Ŋ̄ nɔ̄lā mī ŋ̄ kɔ̍ bi̍ī lɛ̄ŋndē lēŋ. Le̍la̍ŋ ŋ̄ kɔ̄ŋnu᷅ŋ lēpīlɛ̍ kpe̍, mī ŋ̄ kɔ̍ bi̍i̍nūŋ nde᷅ŋ.”

³¹ Kɛ̍ mi̍ pūa̍a̍ su̍a̍ŋsu̍a̍ŋnda̍ ā pīli̍a̍a̍, ā nda̍ kūɛ̄ nda̍ nda̍ā wa̍ ā dīmī āā, “Ŋ̄ nɔ̍lā mī ŋ̄ sīmu̍l wānāā kāŋ te̍. Wānāā kāŋ ā nɔ̄ kpāāyāa̍ ā hīōū na̍a̍.”

³² O̍ ko̍ŋ, mi̍ su̍a̍ŋsu̍a̍ŋnda̍ ha̍ā ā tīū ko̍na̍ lāchōōwā kōŋ, I̍sɔ̄lūɛ̍i̍ya̍ tɛ̄ɛ̄ŋ kpo̍u̍, a̍ lɛ̄ŋndē nda̍ kɔ̍ mɛ̍ɛ̍ndīa̍ŋ nde̍ŋ o̍kɔ̄ɔ̄. Ma̍ dīmūl wāŋnda̍ āā, “Mɛ̄ɛ̍ na̍a̍ ŋ̄ mɛ̄ɛ̄ndi̍a̍ŋ lɛ᷅ŋndē lēŋ yɛ̍, lɛ̄ŋndē lēŋ lē nɔ̍lā mī lē sɔ̄la̍ nyɛ̄ dīa̍a̍ tūu̍le̍ŋ le̍ wānāa̍ cho̍ lo̍ŋ nda̍ le̍. Ndu̍yɛ̍ pūa̍a̍ na̍a̍ ŋ̄ chē o̍ lɛ̄ŋndē lēŋ ni᷄ŋ nda̍, nda̍ kpo̍u̍ ā vīlɛ̄ī kpo̍lōŋ nda̍ chō ni̍.

³³ Ndu̍yɛ̍ mi̍ ŋ̄ chā bɛ̍ɛ̍ wa̍nāa̍ fu̍la̍ o̍ pūlāle̍ A̍na̍kīle̍ŋ chōo̍ wa̍ lo̍ŋ, wānāā dīāllūŋ kālāā bɛ̄ndūa̍a̍, a̍ fu̍la̍ Nɛ̍fi̍līm nda̍. Mɛ̄ɛ̍ na̍a̍ ŋ̄ mɛ̄ɛ̄ndi̍a̍ŋ pu̍a̍a̍ ha̍ā, mi̍ ŋ̄ mɛ̄ɛ̄nda᷄ŋ na̍a̍ pīla̍, mi̍ ŋ̄ chānu᷄ŋ na̍a̍ pi̍la̍ nyɛ̄ɛ̄mbu̍i̍i̍ni̍i̍ māā lākāmbāl nda̍ o̍ hɔ̄l. Ndu̍yɛ̍ le̍nde̍ kpe̍e̍kpe̍i̍ na̍a̍ ŋ̄ wa̍ nda̍ o̍ hɔ̄l ni̍.”