Nɔ̍mbāā 12 - Yāu̍ Mɛ̄lɛ̄ka̍a̍

A̍ mɛ̄ɛ̍ Mɛ̄lɛ̄ka̍ tūsi̍ Me̍e̍līa̍m nyɛ̄ pālāa̍ chōo̍ yɛ̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Me̍e̍līām nda̍ E̍lɔ̄ŋ a̍ ka̍ndū sūɛ̍i̍ a̍ Mūu̍sē o̍kɔ̄ɔ̄ mā pɛ̄ɛ̄sā ndu̍, fo̍ndōle̍ le̍ mɛ̄ɛ̍ o̍ chu̍a̍ wānā la̍nɔ̍ Ku̍si̍ɛ̍tīi̍nɔ̍ o̍ nɔ̄ɔ̍ ni᷄ŋ yɛ̍.

² Ma̍ wa̍ dīmīo̍o̍ āā, “Bāā nāa̍ Mūu̍sē chu̍a̍ ko̍ni̍ Mɛ̄lɛ̄ka̍ Ya̍a̍wɛ̄ɛ̄ o̍ so̍ō wɔ̄ ni̍? Bāā na̍a̍ bɛ̍ɛ̍ ō sūu̍ wɔ̍ o̍ na̍a̍ lo̍ le̍? O̍ sōō ni᷅ŋ o̍ na̍a̍ lo̍.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī dīōmndā Me̍e̍līām nda̍ E̍lɔ̄ŋ a̍ wa̍ la᷅ŋ dīmīo̍o̍ a̍ Mūu̍sē la̍ŋ.

³ (Ndu̍yɛ̍ Mūu̍sē yɛ̍, wānā tu̍sīa̍ŋndo̍ pīla̍ o̍ wa̍ ni̍. O̍ chi̍e̍ēŋndo̍ chōo̍ kpo̍u̍, wānā o̍ wānā ve̍ mī ndu̍ o̍o̍ tu̍si̍ŋ māā ndu̍ le̍.)

⁴ Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī dīōmndā E̍lɔ̄ŋ nda̍ Me̍e̍līām a̍ wa̍ dīmīo̍o̍ a̍ Mūu̍sē la̍ŋ, mbo̍ dīmūl Mūu̍sē nda̍ E̍lɔ̄ŋ a̍ Me̍e̍līām o̍ lēpīlɛ̍ ni᷄ŋ kpe̍ āā, “I̍ ye̍e̍ma̍ nya̍ mī lā hīŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍, nya̍ ya̍a̍ kpo̍u̍.” O̍ ko̍ŋ, Mūu̍sē ni̍, E̍lɔ̄ŋ ni̍, a̍ Me̍e̍līām, mā kūā o̍ tɛ̍ndīi̍ Mɛ̄lɛ̄ka̍a̍.

⁵ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍āl o̍ yu̍mbu̍ yu̍mbu̍ i̍kpu̍ŋgbāa̍ ni᷄ŋ, mbo̍ sīm o̍ tɛ̍ndīi̍yo̍ sōndōo̍. Mbo̍ dīmūl E̍lɔ̄ŋ nda̍ Me̍e̍līām le̍ mā hīŋ lāchī. Mɛ̄ɛ̍ nda̍ hīŋ lāchī,

⁶ mbo̍ dīmūl nda̍ āā, “Lā ya᷄ŋ ya̍ nīla̍ŋ. Tē wānāa̍ su̍a̍ā le̍ Mɛ̍lɛ̄ka̍ wa̍ ā wa̍ nya̍ tɛ̄ɛ̄ŋ pɛ̍, o̍ yi̍lāŋnda̍ŋ ni᷄ŋ ya̍ I̍ chɔ̍mnūŋ nda̍ ni̍, ndu̍yɛ̍ mī so̍ō vɛ̄lɛ̄ nāa̍ nda̍ chu̍a̍ o̍ lɔ̄mā sɔ̄la̍ŋ ni᷄ŋ.

⁷ Kɛ̍ bu̍ɛ̍ī nūu̍ Mūu̍sē ndu̍ ndu̍, ō cho̍ le̍nde̍ le̍ ya̍ I̍ su̍a̍ā nāa̍ ndu̍ chu̍a̍ le̍. Ndu̍ ndu̍, I̍ chu̍a̍ māchūāā wānāā nīa̍a̍ I̍sɔ̄lūɛ̄ī kpo̍u̍, mi̍ ke᷅ ndu̍ le̍ mbō wa̍ nda̍ chīla̍ŋ.

⁸ Le̍la̍ŋ ndu̍ ndu̍, tē I̍ wa̍ sūɛ̍i̍ nāa̍ ndu̍ chu̍a̍ pɛ̍, ŋ̄ wā chāna᷅ŋndo̍ hɔ̄lla̍ a̍ hɔ̄lla̍ na̍a̍ ndu̍. I̍ su̍ū nāa̍ ndu̍ chu̍a̍ o̍ lātāle̍ ni᷄ŋ te̍, kpe̍nde̍ke̍le̍ ya̍ I̍ su̍a̍ā nāa̍ ndu̍ chu̍a̍ ni̍. Ndu̍yɛ̍ ō chē ni᷅ŋ kpe̍nde̍ke̍le̍ mɛ̄ɛ̍ ya̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ yɛ̍. Vɛ᷅ sīōōŋīi̍ bīi̍ nya̍ le̍ sūɛ̍i̍ a̍ bu̍ɛ̍ī nūu̍ Mūu̍sē le̍?”

⁹ O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ E̍lɔ̄ŋ nda̍ Me̍e̍līām. Ndu̍yɛ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍l mbo̍ kūānu᷄ŋ,

¹⁰ ndu̍yɛ̍ mi̍ yu̍mbu̍ yu̍mbu̍ i̍kpu̍ŋgba̍ wa̍ o̍ tɛ̍ndīi̍yo̍ sōndōo̍ wo̍ ō fāŋa᷄ŋ, o̍ lēpīlɛ̍ ni᷄ŋ kpe̍, mi̍ nāā wɔ̄ɔ̍ŋ pūm o̍ fūlā Me̍e̍līa̍m lēkɔ̄ɔ̍, mi̍ kɔ̄ɔ̍le̍ŋ lē dīāndū ndu̍ fo̍ fo̍ māā fe̍ŋgbɛ̍. Mɛ̄ɛ̍ E̍lɔ̄ŋ o̍ mu̍li̍ŋ mbo̍ chā mɛ̄ɛ̍ kɔ̄ɔ̍le̍ŋ lē māŋga̍la̍ŋ Me̍e̍līām yɛ̍,

¹¹ mbo̍ dīmūl Mūu̍sē āā, “Yāndi̍i̍ fāllo̍, to̍sā mī ŋ̄ sɔ̄la̍ dɛ̍nɛ̍ pa̍lāa̍ le̍ yɔ̄ŋ wɔ̄ɔ̍ŋ īdīɔ̄m na̍a̍ ŋ̄ tōsa̍ ho̍ō wo̍ le̍.

¹² To̍sā mī dīāllu᷄ŋ Me̍e̍līām ndo̍ŋ ŋ̄ yɔ̄nu᷄ŋ mɛ̄ɛ̍ chɛ̄lɛ̄kpɛ̍ nda̍ vīīkūū ho̍ō wo̍ ō wā nu̍a̍ā, kūmbōo̍ pīlɔ̍ɔ̍ ki̍nɛ̍i̍ mī nyɔ̄ɔ̍ chīi̍ ndu̍ dīo̍ yɛ̍ le̍.”

¹³ Mɛ̄ɛ̍ Mūu̍sē o̍ tu̍e̍ī nyɛ̄ E̍lɔ̄ŋ o̍ di̍mi̍ wo̍, mbo̍ kōŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chūa̍, mbo̍ dīmī āā, “O̍o̍ Mɛ̄lɛ̄ka̍, yāndi̍i̍ si̍ŋgi̍ Me̍e̍līām.”

¹⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl Mūu̍sē āā, “Tē ndu̍ o̍o̍ wa̍ pɛ̍ māā Me̍e̍līām, lɔ̄lūa̍ŋ fi̍nyā ndɔ̍ tu̍fū ndu̍ nu̍a̍ā o̍ hɔ̄l ni̍, Me̍e̍līām o̍ wa̍ wā a̍ si̍ɔ̍mbu̍la̍ la̍ŋ le̍ pālɛ̍i̍ ī ŋɔ᷄mmɛ̍ū. Le̍la̍ŋ fa̍ŋa̍ Me̍e̍līa̍m o̍ dɔ̍ɔ̍ŋgɔ̍ɔ̍ ni᷄ŋ mā kūɛ̄ a̍ ndu̍ īnɛ̍, mā kɔ̍ ki̍ndā ndu̍ dīo̍o̍ kɔ̄ɔ̄lī le̍ pālɛ̍i̍ ī ŋɔ᷄mmɛ̍ū, le̍ mbō sēŋgū. Tē pālɛ̍i̍ ŋɔ̍mmɛ̍ū kēŋ ī hīōū pɛ̍, o̍ mīīŋgu̍ o̍ dɔ̍ɔ̍ŋgɔ̍ɔ̍ ni᷄ŋ.”

¹⁵ O̍ ko̍ŋ, ma̍ fāŋā Me̍e̍līām o̍ dɔ̍ɔ̍ŋgɔ̍ɔ̍ ni᷄ŋ, ma̍ kɔ̍ ki̍ndā ndu̍ dīo̍o̍ kɔ̄ɔ̄lī īnɛ̍, le̍ pālɛ̍i̍ ī ŋɔ᷄mmɛ̍ū. Ndu̍yɛ̍ o̍ pālɛ̍i̍ ŋɔ̍mmɛ̍ū kēŋ bɛ̄ŋgu̍ ki̍nɛ̍i̍, wāŋnda̍ I̍sɔ̄lūɛ̄ī a̍ fe̍ŋa̍ŋ o̍ dɔ̍ɔ̍ŋgɔ̍ nda̍ wa̍ wo̍, mā hīōū lāchī a̍ kɔ̄la̍ŋ te̍, mɛ̄ɛ̍ ma̍ mīīŋgū a̍ Me̍e̍līām o̍ dɔ̍ɔ̍ŋgɔ̍ɔ̍ ni᷄ŋ.

¹⁶ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ fa̍ŋa᷄ŋ nāa̍ nda̍ wa̍ ka̍ŋ Hāsɛ̍lɔ̍tī wa̍, ma̍ hīāū lāchī a̍ kɔ̄la̍ŋ. Mɛ̄ɛ̍ nda̍ fūūlu̍u̍ o̍ lɛ̄ŋndē po̍lte̍ŋ Pa̍lūāŋ, ma̍ kīālū dɔ̍ɔ̍ŋgɔ̍ɔ̍ lo̍ŋ.