Lu̍kū 2 - Yāu̍ Mɛ̄lɛ̄ka̍a̍

Ā vēlū Chi̍i̍sū

¹ A̍ bōōndi̍i̍ ke̍ŋ, mi̍ Māsāa̍ Ɔ̄kɔ̍ɔ̍stɔ̄ɔ̄ o̍ wa̍ māsā bɛ̍ndōo̍ le̍ māsāa̍ kpe̍de̍ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍ ō dūāū sāwāa̍, māā wāŋnda̍ kpe̍de̍ o̍ lɛ̄ŋīī o̍ cho̍ bōlle̍ŋ nde̍ ni᷄ŋ, ā pōōnyi̍a̍a̍ nda̍ dīōla̍ŋ le̍ nda̍ chɔ̄mndo̍.

² Wāŋnda̍ dīōla̍ŋ pōōnyīāā tāso̍o̍ wa̍ ho̍ō ni̍. Bōōndi̍i̍ ke̍ŋ Kūīli̍i̍nīɔ̍ɔ̍ wa̍ māsa̍ māLu̍o̍ma᷅ŋndo̍ le̍ lɛ̄ŋndē Si̍i̍lūīāle̍ŋ nī.

³ Le̍ he̍ī, mi̍ wāŋnda̍ kpe̍de̍ ku̍ā o̍ kɔ̄ɔ̄līmā nda᷄ŋ le̍ mā pōōnyi̍a̍a̍ nda̍ dīōla̍ŋ.

^4-5 Chōo̍sɛ̍, ō ndu̍ o̍o̍ dɔ̍ū ko̍ŋ Me̍ēle̍ fu̍lu̍ wo̍ yɛ̄, ndu̍ ndu̍ kɔ̄ɔ̄līmā ndūa̍ŋ ma̍ wa̍ Bɛ̍ti̍lɛ̍hɛ̄m ni̍. Kāni̍ fu̍u̍le̍, Bɛ̍ti̍lɛ̍hɛ̄m chi̍e̍e̍ lo̍ŋ fi̍nyā ndā ma̍mā Māsāa̍ Dēēve̍, ndu̍ o̍o̍ ve̍lu᷄ŋ ni̍. Le̍ he̍ī, mi̍ Chōo̍sɛ̍ cha᷄ŋ na̍a̍ o̍ wa̍ īchāli̍ Na̍a̍sa̍lūɛ̄ī o̍ bu̍ŋgɛ̄ī Kāli̍līve̍ ni᷄ŋ nda̍. Mbo̍ kūā Bɛ̍ti̍lɛ̍hɛ̄m o̍ būŋgɛ̄ī Chūdi̍a̍āve̍ ni᷄ŋ nda̍ Mēēle̍ le̍ mā kɔ̍ po̍o̍nyīāā nda̍ dīōla̍ŋ. Ndu̍yɛ̍, Mēēle̍ wa̍ a̍ yo᷄llo̍.

⁶ Bōōndi̍i̍ nda̍ wa̍ lo̍ŋ nde̍, mi̍ pūle̍i̍ kāndū ndu̍ nɛ̄īyo̍.

⁷ Mbo̍ vīālū wānā pɔ̍nɔ̍ɔ̍. Vīōlɔ̄ɔ̄ ndɔ̍ tāso̍o̍ wa̍ ko̍ŋ ni̍. Mbo̍ wōū ndu̍ o̍ kōlāla̍ ŋ̍pɛ̍ŋgɛ̍la̍ŋ ni᷄ŋ. Mbo̍ mɔ̄ɔ̄sīāā ndu̍ mɔ̍ɔ̍su̍ mɔ̍ɔ̍su̍. Mbo̍ yāmbū ndu̍ o̍ nyɛ̄ nda̍ dōū chɔ̍lūa̍a̍ nyɛ̄ dīa̍a̍ wo̍ ni᷄ŋ. Kāni̍ fo̍ndōle̍, fo̍ndāŋ nda̍ a̍a̍ yi̍yā mi̍ālla̍ wo̍ wa̍ ō pīāā cha̍ a̍ wāŋndā chīe̍e̍ya̍.

Ki̍i̍la̍a̍ Mɛ̄lɛ̄ka̍a̍ chɔ̄mnu̍ŋ wa̍nāā māndāā lāsāa̍

⁸ Wānāā māndāā lāsāa̍ ā wa̍ o̍ tāndā kōŋ ni᷄ŋ. Ā wa̍ sāa̍ ndāa̍ īkɛ̄i̍ o̍ fo̍ndāŋ nda̍ māndā chɔ̍lūa̍a̍ wo̍ i̍chɔ᷅l kōŋ.

⁹ Mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ chɔ̄mnu᷄ŋ nda̍. Ndu̍yɛ̍, mi̍ pa̍ŋgēle̍ Māsānɔ̄ɔ̍ Mɛ̄lɛ̄ka̍a̍ bālū nda̍ si̍lɔ̍ a̍ dīōndɔ̄ɔ̍. Mi̍ sīōōŋnde̍ bīī nda̍ ta̍u̍ ta̍u̍.

¹⁰ Kɛ̍, mi̍ ki̍i̍la̍nɔ̍ Mɛ̄lɛ̄ka̍a̍ dīmūl nda̍ āā, “Lā yɔ᷅ŋ īsīōōŋ te̍. I̍ chu̍u̍ nya̍ yōōŋgū kɛ̄ndɔ̄ɔ̍, o̍ cho̍ wāŋnda̍ kpe̍de̍ kɔ᷅l kɛ̄ndɔ̄ɔ̍ kē ta̍u̍ wo̍.

¹¹ Yōōŋgū ko᷄ŋ cho̍ ni̍ māā ā vīlu̍l nya̍ wānā pi̍ŋīa̍a̍ pāa̍le̍ hāūle᷅ŋ o̍ chi̍e̍e̍ Dēēvi̍o̍o̍ ni᷄ŋ, ndu̍ yɔ̍nūŋ ni̍ māā Māsānɔ̄ɔ̍ Ki̍li̍tī.

¹² Lā chō chɛ̄lɛ̄kpɔ̍ɔ̍ kōmāl ma̍ mɔ̄ɔ̄sīāā ndu̍ o̍ kōlāla̍ i̍pɛ̍ŋgɛ̍la̍ŋ ni᷄ŋ ma̍ yāmbū ndu̍ o̍ nyɛ̄ nda̍ dōū chɔ̍lūa̍a̍ nyɛ̄ dīa̍a̍ wo̍ ni᷄ŋ. Ko̍ŋ wa᷅ ni̍ŋ ta̍a̍māsi̍o̍o̍ le̍ nya̍ mī lā sīna̍ ni̍.”

¹³ O̍ lē pīlɛ̍ ni᷄ŋ kpe̍, mi̍ ki̍i̍la̍a̍ Mɛ̄lɛ̄ka̍a̍ chēle̍ŋ ā chɔ̄mnu᷄ŋ ku̍ndā bɛ̄ndōo̍ hɔ̄lāā tūlu̍ a̍ ki̍i̍la̍nɔ̍ Mɛ̄lɛ̄ka̍ kōŋ. Ā wa̍ Mɛ̄lɛ̄ka̍ sāŋgālāa̍ mā dīmī āā,

¹⁴ “Nya̍ cho̍ o̍ fo̍nda᷄ŋ Mɛ̄lɛ̄ka̍a̍ chōo̍ cho̍o̍ wa̍, lā sāŋga̍la̍ Mɛ̍lɛ̄ka̍. Ndu̍yɛ̍, kɔ̄l nyūlōo̍ chō le̍ wānāā o̍ hi̍ni̍ kɔ̄l o̍ chi̍e̍ēŋndo̍ chōo̍ wa̍.”

¹⁵ Mɛ̄ɛ̍ ki̍i̍la̍a̍ Mɛ̄lɛ̄ka̍a̍ mɛ̄i̍ nda̍ ma̍ kūānu᷄ŋ o̍ ha̍la̍a̍ ni᷄ŋ, mi̍ wānāā māndāā lāsāa̍ dīmu̍la᷅ŋ āā, “Ŋ̄ kɔ̄nu᷅ŋ Bɛ̍ti̍lɛ̍hɛ̄m. Lā ŋ̄ kɔ̍ to̍fāŋ mī ŋ̄ chē nyɛ̍ yɔ̍nu̍ŋ ho̍ō mi̍ Māsānɔ̄ɔ̍ Mɛ̄lɛ̄ka̍ dīmūl na̍a̍ a̍ ndu̍ o̍kɔ̄ɔ̄ wo̍.”

¹⁶ Mi̍ wānāā māndāā lāsāa̍ kūā chɔ̍ chɔ̍ Bɛ̍ti̍lɛ̍hɛ̄m. Ā lo̍ nūūvīa̍a̍ ma̍ sāālu᷄ŋ Me̍ēle̍ nda̍ Chōo̍sɛ̍ a̍ chɛ̄lɛ̄kpɔ̍ɔ̍. Ō wa̍ ō yāmbāā nāa̍ nda̍ dōū chɔ̍lūa̍a̍ nyɛ̄ dīa̍a̍ wa̍.

¹⁷ Mɛ̄ɛ̍ nda̍ chē chɛ̄lɛ̄kpɔ̍ɔ̍, ma̍ tīū dīōmndā ki̍i̍la̍a̍ Mɛ̄lɛ̄ka̍a̍ dīmu̍l nda̍ a̍ pōo̍mbɔ̄ɔ̍ ho̍ō o̍kɔ̄ɔ̄ la̍ŋ si̍lɔ̍.

¹⁸ Mi̍ kɔ̄ndɔ̄fi̍llo̍ bīī wāŋnda̍ kpe̍de̍ a̍ tu̍e̍ī nyɛ̄ wānāā māndāā lāsāa̍ ā dīmi̍ wo̍ wa̍.

¹⁹ Kɛ̍, mi̍ Mēēle̍ ndu̍ ndu̍ kɛ̄si᷄ŋ sɔ̍ɔ̍ŋ mu᷅ŋ kpe̍de̍ o̍ kɔ̄l mbō yīyāŋ a̍ mu̍ŋ.

²⁰ O̍ ko̍ŋ kɔ̍ɔ̍lī, mi̍ wānāā māndāā lāsāa̍ mīīŋgū. Ma̍ kūā a̍ Mɛ̄lɛ̄ka̍ sāŋgālāa̍ le̍ nyɛ̄ o̍ nyɛ̄ nda̍ tūēī ma̍ chā, kāni̍ fo̍ndōle̍, mɛ̄ɛ̍ ki̍i̍la̍nɔ̍ Mɛ̄lɛ̄ka̍a̍ dīmu̍l nda̍ yɛ̍, le̍nde̍ ko̍ni̍ nda̍ sāālu̍ŋ ni̍.

Ā ke̍ chɛ̄lɛ̄kpɔ̍ɔ̍ dīōla̍ŋ

²¹ O̍ pālɛ̍i̍ ŋɔ̍ma̍a̍ ve̍, mɛ̄ɛ̍ te̍le̍ŋndo̍ fūūlu̍u̍ le̍ ndu̍ hīvīo̍o̍ o̍ chīɛ̄ī kɔ̄ɔ̄lī, ma̍ kē ndu̍ dīōla̍ŋ āā, Chi̍i̍sū. Kāni̍, lɔ̍ɔ̍pa̍ bɛ̍ɛ̍ Mēēle̍ chu̍ā yo᷄l ndɔ̄ɔ̍ dīōla̍ŋ nda᷅ŋ ki̍i̍la̍nɔ̍ Mɛ̄lɛ̄ka̍a̍ dīmi̍ ni̍ māā ā vēēlu̍ ndu̍ la̍ŋ.

Ā hīŋ a̍ Chi̍i̍sū o̍ chīɛ̄ī Chu̍ūwa̍ sōlī sa̍lāa̍ wo̍ ni᷄ŋ

^22-24 Mi̍ te̍le̍ŋndo̍ fūūlūū le̍ mī Mēēle̍ kūɛ̄ Chūlu̍sɛ̄lɛ̄m le̍ dīndīo̍o̍ sɔ̄lāa̍ Mɛ̄lɛ̄ka̍ o̍ hɔ̄l mɛ̄ɛ̍ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ yɛ̍. Le̍ he̍ī, ma̍ kūā Chūlu̍sɛ̄lɛ̄m nda̍ Chōo̍sɛ̍ pɔ̍nɔ̍ ndɔ̄ o̍ chīɛ̍i̍ Mɛ̄lɛ̄ka̍a̍ ni᷄ŋ. Mɛ̄ɛ̍ nda̍ fūūlu̍u̍, ma̍ sōlī sa̍lāa̍ le̍ mī Mēēle̍ si̍mnu᷄ŋ vɛ̍lɛ̄ ō dīāndāā. Kāni̍, mɛ̄ɛ̍ sāwāla̍ Māsānɔ̄ɔ̍ Mɛ̄lɛ̄ka̍la̍ŋ lā dīmi̍ yɛ̍, mɛ̄ɛ̍ mī nda̍ a̍a̍ so̍li̍ ka᷅ŋgbu̍a̍a̍ ɔ̄ɔ̄ pīīŋnda̍ ā ŋīɔ̍ɔ̍ŋ sa̍lā. Ma̍ sōlī sa̍lāa̍ ho̍ō. Kɔ̄lā nda̍ wa̍ la̍ŋ Chūlu̍sɛ̄lɛ̄m nda̍ŋ, ma̍ kūā a̍ chɛ̄lɛ̄kpɔ̍ɔ̍ Chi̍i̍sū le̍ ndu̍ mālɔ̄ɔ̍ Ma̍sānɔ̄ɔ̍ Mɛ̄lɛ̄ka̍ o̍ bā. Kāni̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Chūā tāse̍ o̍ chūā tāse̍ wānā la̍nɔ̍ɔ̍ vēlū pɛ̍, tē o̍ wa̍ wānā pɔ̍nɔ̍ɔ̍ pɛ̍, mɛ̄ɛ̍ mbō wa̍ ō yɔ̄ŋga᷄ŋ le̍ Māsānɔ̄ɔ̍ Mɛ̄lɛ̄ka̍.” Le̍ he̍ī, ma̍ chūā Chi̍i̍sū ma̍ māl ndu̍ Mɛ̄lɛ̄ka̍ o̍ bā.

²⁵ Po̍ pi᷅lɛ̍ wa̍ Chūlu̍sɛ̄lɛ̄m dīōla̍ŋ āā, Si̍mīɔ̄ŋ. Ō wa̍ wānā kɛ̍ndɛ̄. Ndu̍yɛ̍, ndu̍ o̍o̍ nɔ̍ bɛ̄ɛ̄le̍ŋ le̍ Mɛ̄lɛ̄ka̍. Ō wa̍ lēhɔ̄l o̍ nɛ̄ī le̍ bōōndi̍i̍ Mɛ̄lɛ̄ka̍ ndu̍ o̍o̍ nɔ̍ le̍ I̍sɔ̄lūɛ̄ī sōlīo̍o̍ o̍ mɔ̍nɛ̍i̍ ni᷄ŋ nde̍. Nyi̍na̍ Mɛ̄lɛ̄ka̍a̍ wa̍ ndu̍ kɔ̄ɔ̄lī.

²⁶ Mi̍ Nyi̍na̍ Mɛ̄lɛ̄ka̍a̍ chɔ̄m ndu̍ māā ō cho̍ wu̍ le̍ mɛ̄ɛ̍ mbō lo̍ o̍ ko̍ŋ mbō chē fɛ̍lɛ̍ŋ Ki̍li̍tī, wāna̍ Māsānɔ̄ɔ̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.

²⁷ Ndu̍yɛ̍, mi̍ Nyi̍na̍ Mɛ̄lɛ̄ka̍a̍ tōsā mi̍ Si̍mīɔ̄ŋ hu᷅ŋ o̍ chīɛ̍i̍ Mɛ̄lɛ̄ka̍a̍ ni᷄ŋ. Mi̍ Chōo̍sɛ̍ a̍ Mēēle̍ a̍ hu᷅ŋ a̍ pōo̍mbɔ̄ɔ̍ Chi̍i̍sū lo̍ŋ le̍ ndu̍ mālɔ̄ɔ̍ Mɛ̄lɛ̄ka̍ o̍ bā mɛ̄ɛ̍ sāwāla̍ Mɛ̄lɛ̄ka̍ ke̍ Mūu̍sē le̍ Chu̍ūwa̍ la̍ŋ lā dīmi̍ yɛ̍.

²⁸ O̍ ko̍ŋ, mi̍ Si̍mīɔ̄ŋ chu̍ā ndu̍ o̍ bāla̍ŋ chōo̍ mbo̍ mēl Mɛ̄lɛ̄ka̍ ba̍li̍ka̍a̍. Mbo̍ dīmī āā,

²⁹ “Māsānɔ̄ɔ̍ Mɛ̄lɛ̄ka̍, ā chāā ni̍ko̍ bu̍ɛ̍ī nūmndo̍ chūā mbō kūɛ̄ a̍ kɔ̄l nyūlū. Kāni̍, a̍ to̍sa̍ mɛ̄ɛ̍ ŋ̄ chūe̍l ndu̍ būŋgɛ̄i̍ yɛ̍.

³⁰ I̍ che᷅ a̍ hɔ̄ltē nīle̍ŋ pɛ̍ɛ̍ŋ mɛ̄ɛ̍ ŋ̄ pīŋī ni̍ŋ wa᷅ŋndā chīe̍e̍ya̍ yɛ̍.

³¹ A̍ to̍sa̍ he̍ī wāŋnda̍ kpo̍u̍ o̍ hɔ̄l.

³² Ndu̍ cho̍ nyɛ̄ wa̍wo̍ŋ chɔ᷅m ni̍ŋ wa̍nāa̍ cho̍ a̍ Chu̍ū le̍ wa̍ nɛ̄ī nu̍mndo̍ ni̍. Ndu̍yɛ̍, mbō tōsa̍ mī wānāā nūmnda̍ I̍sɔ̄lūɛ̄ī a̍ sɔ̍la̍ bɛ̄ɛ̄le̍ŋ.”

³³ Mi̍ kɔ̄ndɔ̄fi̍llo̍ bīī Chōo̍sɛ̍ nda̍ Mēēle̍ a̍ nyɛ̄ nda̍ dīmi̍ a̍ pōo̍mbɔ̄ɔ̍ ho̍ō o̍kɔ̄ɔ̄ wo̍.

³⁴ Mi̍ Si̍mīɔ̄ŋ du̍a̍ū nda̍ sa̍la̍. Ndu̍yɛ̍, mbo̍ dīmūl Mēēle̍ ka᷅la̍ ndɔ̄ āā, “Mɛ̄lɛ̄ka̍ hɛ̄li̍ pōo̍mbɔ̄ɔ̍ ho̍ō le̍ mbō tōsa̍ mī wānāā fāŋgā fa̍ŋgā I̍sɔ̄lūɛ̄ī a̍ sɔ̍la̍ nyɛ̄ pālāā fɛ̍ɛ̍ŋ fɛ̍ɛ̍ŋndo̍, ndu̍yɛ̍ vɛ̍lɛ̄, mī ā fāŋgā fa̍ŋgā ā sɔ̄la̍ pīōŋɔ̄ɔ̍. Mɛ̄lɛ̄ka̍ yɔ̄ŋgu̍ ndu̍ le̍ mbō wa̍ māā kpālō o̍ ŋ̄wāŋndā chīe̍e̍ lo̍. Ndu̍yɛ̍, wānāā ka̍ ka̍ cho̍ ndu̍ sīmūl.

³⁵ Le̍ he̍ī, ō chō tōsā mī yīya᷄ŋnda̍ŋ wānāā fāŋgā fa̍ŋgā o̍ lākɔ̄l mī lā wa̍ lā chɔ̄ɔ̄māā kpe̍nde̍ke̍le̍. Ndu̍yɛ̍, nūm Mēēle̍, mɔ̍nɛ̍i̍ chō lūɛ̄īyɔ̄ɔ̄ o̍ nyi̍nā nūmndo̍ ni᷄ŋ mɛ̄ɛ̍ nda̍ chūkū wa᷅ŋndo̍ nu̍a̍ā a̍ mūɛ̄ī fāŋnde̍ yɛ̍.”

³⁶ Wɛ̄ɛ̄ŋ pīlɛ̍ wa̍ vɛ̄lɛ̄, dīōla̍ŋ āā, A̍nā. Wāna̍ su̍a̍ā le̍ Mɛ̄lɛ̄ka̍a̍ wo̍ o̍ wa̍ ni̍. O̍ kāa̍le̍ A̍sīɛ̄ɛ̄le̍ŋ chōo̍ ndu̍ o̍o̍ fu̍la̍ ni̍. Nda̍ a̍a̍ ve̍e̍lū fi̍nyā ndɔ̍ āā, Fānu̍wɛ̄l. Wɛ̄ɛ̄ŋndo̍ ho̍ō ndu̍ o̍o̍ yu̍wa̍ ni᷅ŋ ta̍u̍. Chɔ̍ŋ a̍ chɔ̄nɔ᷄ŋ ndɔ̄ɔ̍ mbo̍ hīāū pɔ̍nɔ̍ɔ̍ kɔ̄ɔ̄lī, wɔ̄sīla̍ŋ lā hīōū lā ŋɔ᷄mmɛ̍ū mi̍ pɔ̍nɔ̍ɔ̍ wū.

³⁷ Chɔ̍ŋ ni᷅ŋ a̍ te̍le̍ŋ ko̍ŋ, ō chu̍e̍ lɛ̍ pɔ̍nɔ̍ che᷅le̍ŋ te̍. Ndu̍yɛ̍, wɔ̄sīlā ndɔ̄la̍ŋ la̍ a̍a̍ chīŋā ni᷅ŋ be̍le̍-ŋɔ̍ma̍a̍ a̍ lā hīɔ̍ɔ̍lu̍. Le̍ lɔ̍ɔ̍ lɔ̍ɔ̍ ō chō o̍ chīɛ̍i̍ Mɛ̄lɛ̄ka̍a̍ wo̍ ni᷄ŋ. Le̍ pāa̍le̍ŋ a̍ nyūmnda̍ŋ ō chō Mɛ̄lɛ̄ka̍ sōōlūūwo̍, su᷅mndo̍ bīyɔ̄ɔ̍ a̍ pīɛ̄īle̍ŋ.

³⁸ A̍ bōōndi̍i̍ ke̍ŋ mi̍ A̍nā hu᷅ŋ nāa̍ Mēēle̍ chu̍a̍ nda̍ Chōo̍sɛ̍. Mbo̍ kāndū Mɛ̄lɛ̄ka̍ ba̍li̍ka̍a̍ mēllo̍. Ndu̍yɛ̍, mbo̍ kāndū sūɛ̍i̍ a̍ Chi̍i̍sū o̍kɔ̄ɔ̄ nāa̍ wāŋnda̍ kpo̍u̍ chu̍a̍ a̍ wa̍ chūmndo̍ le̍ te̍le̍ŋ Mɛ̄lɛ̄ka̍ ndu̍ o̍o̍ nɔ̍ le̍ Chūlu̍sɛ̄lɛ̄m bāŋāa̍ wo̍ wa̍.

Ā mīīŋgu̍ Na̍a̍sa̍lūɛ̄ī

³⁹ Mɛ̄ɛ̍ Chōo̍sɛ̍ nda̍ Mēēle̍ a̍ chi̍i̍ nyɛ̄ o̍ nyɛ̄ tōsā mɛ̄ɛ̍ sāwāla̍ Māsānɔ̄ɔ̍ Mɛ̄lɛ̄ka̍la̍ŋ lā dīmi̍ yɛ̍, ma̍ mīīŋgū o̍ nda̍ lo̍ Na̍a̍sa̍lūɛ̄ī o̍ lɛ̄ŋndē Kāli̍līle̍ŋ ni᷄ŋ.

⁴⁰ Mi̍ pōo̍mbɔ̄ɔ̍ hīndū. Mbo̍ sīmnu᷄ŋ wa᷅na̍ dīāllūŋ kālā. Mi̍ Mɛ̄lɛ̄ka̍ kē ndu̍ kɔ̄l kālo̍o̍ ta̍u̍ bɛ̍ndū. Ndu̍yɛ̍, sa̍la̍ Mɛ̄lɛ̄ka̍a̍ wā ndu̍ kɔ̄ɔ̄lī.

Chi̍i̍sū ku̍ɛ̄ o̍ chīɛ̍i̍ Mɛ̄lɛ̄ka̍a̍ ni᷄ŋ

⁴¹ Wɔ̄sī o̍ wɔ̄sī Chōo̍sɛ̍ nda̍ Mēēle̍ nda̍ a̍a̍ ku̍ā Chūlu̍sɛ̄lɛ̄m le̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄.

⁴² Mi̍ te̍le̍ŋndo̍ fūūlūū le̍ kɔ̄la̍ŋ o̍ bɔ̄ŋa᷅ŋndo̍ ho̍ō. Bōōndi̍i̍ ke̍ŋ Chi̍i̍sū wa̍ wɔ̄sīla̍ŋ tɔ̍ a̍ lā tīɔ̍ɔ̍ŋ. Ma̍ kūā Chūlu̍sɛ̄lɛ̄m le̍ bɔ̄ŋa᷅ŋndo̍ ho̍ō māā pāāndū.

⁴³ Mɛ̄ɛ̍ bɔ̄ŋa᷅ŋndo̍ chūū ma̍ cha᷄ŋ mi̍i̍ŋgōo̍. Kɛ̍, mi̍ Chi̍i̍sū lo̍nu᷄ŋ kɔ̍ɔ̍lī Chūlu̍sɛ̄lɛ̄m. Fi̍nyā ndɔ̄ nda̍ kāla̍ ndɔ̄ ā sīna̍ le̍.

⁴⁴ Nda̍ a̍a̍ wa̍ ko̍ kɔ̍l māā ō chō wānāā nda̍ wa̍ kɔ̄la̍ŋ nda̍ tɛ̄ɛ̄ŋ. Ma̍ kūā le̍ pāa̍le̍ŋ kpɛ᷅ŋ. O̍ ko̍ŋ, ma̍ kāndū ndu̍ nūūvīa̍a̍ wānāya᷅ŋ ndāa̍ŋ tɛ̍ɛ̄ŋ a̍ ndi̍a̍a̍mɔ̍ɔ̍wa̍a̍ ndāa̍ tɛ̍ɛ̄ŋ.

⁴⁵ Kɛ̍, ā sēēlu̍ŋ ndu̍ le̍. Ma̍ mīīŋgū ndu̍ nūūvīa̍a̍ Chūlu̍sɛ̄lɛ̄m.

⁴⁶ O̍ pālɛ̍i̍ yāa̍ ndɔ̄ɔ̍ ma̍ sāālu᷄ŋ ndu̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Ō wa̍ īchāli̍ nda̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Ō wa̍ nda̍ nīla̍ŋ yāŋɔ̄ɔ̍, ndu̍yɛ̍, mbō nyūūnīāā nda̍.

⁴⁷ Mi̍ kɔ̄ndɔ̄fi̍llo̍ bīī wānā o̍ wāna̍ tu̍e̍ī mūlī kɔ̄l kālu̍ o̍ mu̍lī nyu̍u̍nīāāla̍ŋ ndo̍.

⁴⁸ Mɛ̄ɛ̍ kāla̍ ndɔ̄ nda̍ fi̍nyā ndɔ̄ a̍ che᷅ ndu̍, mi̍ kɔ̄ndɔ̄fi̍llo̍ bīī nda̍. Mi̍ kāla̍ ndɔ̄ nyu̍nā ndu̍ āā, “Vɛ᷅ na̍a̍ ī wāā nu̍a̍ā tōsāllo̍, po̍ nūu̍? Kāni̍ ni᷅ŋ, fi̍nyā nūm ni̍, ya̍ ni̍, ŋ̄ chō nu̍m nūūvīa̍a̍. Ŋ̄ wa̍ ni᷅ŋ o̍ kɔ̄l lānda᷄ŋ bɛ̍ndū ni᷄ŋ.”

⁴⁹ Mi̍ Chi̍i̍sū mūlūl nda̍ āā, “Ɔ̍ɔ̄ le̍ sa̍bū nya̍ nūūvīāā ya̍ wo̍? Lā si̍nā māā I̍ nɔ̍ le̍ wāa̍ o̍ fi̍nyā nūu̍ lo̍ chi̍ɛ̍ī ni̍ŋ te̍?”

⁵⁰ Kɛ̍, ā sīna̍ nyɛ᷅ o̍ di̍mu̍l nda̍ wo̍ pɛ̄ŋgu̍ le̍.

⁵¹ Mbo̍ kūā nda̍ nda̍ā Na̍a̍sa̍lūɛ̄ī, ndu̍yɛ̍, mbo̍ dīīku᷄ŋ nda̍. Mi̍ kāla̍ ndɔ̄ kɛ̍si᷄ŋ sɔ̍ɔ̍ŋ mu᷅ŋ kpe̍de̍ o̍ kɔ̄l.

⁵² Mi̍ Chi̍i̍sū hi̍a̍ū lāchī a̍ hīndɔ̄ɔ̍. Ndu̍yɛ̍, mi̍ kɔ̄l kālu̍ ndɔ̄ɔ̍ bɛ̍ɛ̍ hi̍a̍ū lāchī a̍ chɔ̄ɔ̄lɔ᷄ŋndo̍. Yēēmɛ̍i̍ ndūɛ̍i̍ bɛ̍ɛ̍ mi̍ ī hīāū lāchī a̍ chɔ̄ɔ̄lɔ᷄ŋndo̍ Mɛ̄lɛ̄ka̍ o̍ kɔ̄l a̍ wāŋndā chīe̍e̍ya̍ o̍ lākɔ̄l.