Lu̍fū 2 - Yāu̍ Mɛ̄lɛ̄ka̍a̍

Lu̍fū ku̍ɛ̄ o̍ chīɛ̍i̍ Bo̍wa̍ā ve̍ ni᷄ŋ

¹ Nāo̍mī pɔ̍nɔ̍ ndɔ̍ vi᷅ wo̍, Ɛ̄līmɛ̍lɛ̍kī, ndu̍ o̍o̍ nɔ̍ wānāyɛ̍ī pīlɛ̍ dīōla̍ŋ, āā Bo̍wāā. Wānā su̍lāa̍ o̍ wa̍ ni̍, ndu̍yɛ̍ wāŋnda̍ nda̍ a̍a̍ si̍nā ndu̍ ta̍u̍.

² Pāa̍le̍ pi᷅lɛ̍, mi̍ Lu̍fū di̍mūl Nāo̍mī āā, “I̍ ku̍ā wɔ̍ o̍ chīɔ̍ɔ̍ŋ ni᷄ŋ nāa̍ wāŋnda̍ chō ba̍a̍līi̍yo̍ŋ kīōlɔ̄ɔ̍ wa̍, mī kɔ̍ nu̍u̍vīāā nda̍ kɔ̄ɔ̄lī, kɛ̄lɛ̄ŋgāā mī wānā kɔ̍ yi̍ya᷄ŋ ya̍ chōo̍ mbō chɛ᷄l la̍ mī nu̍u̍va̍ o̍ chīɛ̄ī ndūɛ̍i̍ ni᷄ŋ.” Mi̍ Nāo̍mī mu̍lūl ndu̍ āā, “Kɔ̍ chūā nūu̍.”

³ O̍ ko̍ŋ, mi̍ Lu̍fū ku̍ā o̍ chīɔ̍ɔ̍ŋ ni᷄ŋ nāa̍ wāŋnda̍ wa̍, ba̍a̍līi̍yo̍ŋ kīōlɔ̄ɔ̍ wa̍, mbo̍ kɔ̍ wa᷅ nda̍ nūūvīa̍a̍ kɔ̄ɔ̄lī. Mɛ̄ɛ̄māā wānāyɛ̍ī Ɛ̄līmɛ̍lɛ̍kī ve̍ Bo̍wāā, o̍ chīɛ̄ī ndūɛ̍i̍ ni᷄ŋ kpe̍e̍kpe̍i̍ ndu̍ o̍o̍ ku̍ɛ̄ kɔ̄lālāŋ ni̍.

⁴ Te̍le̍ŋ ti̍ŋ hīōūwɔ̄ɔ̍, mi̍ Bo̍wāā pi̍la̍ fu̍lā Bɛ̍ti̍lɛ̍hɛ̄m mbo̍ hūŋ o̍ chīɛ̍i̍ ni᷄ŋ. O̍ ko̍ŋ kɔ̍ɔ̍lī, mbo̍ yīl wānāā ndūa̍a̍ wa̍lla̍ āā, “Mɛ̄lɛ̄ka̍ Ya̍a̍wɛ̄ɛ̄ wa̍ a̍ nya̍ lātūlu̍.” Ma̍ mūlī āā, “Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ nu̍m sa̍lā.”

⁵ Mi̍ Bo̍wāā nyu̍nā bu̍ɛ̍ī ndɔ̍ wa̍ wānāā ndūa̍a̍ wa̍lla̍ bōlle̍ŋ ndo̍ āā, “Chūā lāāndu̍, kūɛ̍ɛ̍nɛ̍ cho̍ yɛ̄ ko̍ŋ?”

⁶ Mi̍ bu̍ɛ̍ī ndɔ̄ɔ̍ mūlūl ndu̍ āā, “Chūā mīāl Nāo̍mī fu̍la̍ o̍ lɛ̄ŋndē Mo̍wa̍bīle̍ŋ ni᷄ŋ ndo̍.

⁷ Mɛ̄ɛ̍ o̍ hi᷅ŋ dīi̍lɛ̄ŋ, mbo̍ dīmūl la̍ māā ya̍ I̍ chɛ̍l ndu̍ mbō nūūwa̍ ba̍a̍līi̍yo̍ŋ wānāā wa̍lla̍ kɔ̍ɔ̍lī. Kāni̍ dīi̍lɛ̄ŋ mbo̍ hūŋ, mɛ̄ɛ̍ su̍ŋ su̍ŋ mbo̍ lāŋga̍ cha᷅l pɛ̄ŋgīo̍o̍ o̍ wūndu̍le̍ŋ.”

⁸ O̍ ko̍ŋ, mi̍ Bo̍wāā di̍mūl Lu̍fū āā, “I̍ di̍mūl lɔ̍ nu̍m īsɔ̄ɔ̍ chūā nūu̍, fa̍ŋa᷄ŋ ndɛ̍ na̍nu᷄ŋ mā kūɛ̄ nūūwā o̍ chīɛ̄ī wānā che᷅le̍ŋ ni᷄ŋ te̍. Wa̍ ni᷅ŋ bu̍ɛ̍i̍yāā nīāā la̍a̍ndūa̍a̍ ha̍ā kɔ̄ɔ̄lī na̍nu᷄ŋ.

⁹ Wa̍ nda̍ tōfāa̍, chīɛ̄ī nda̍ chō lākɔ̄ mā kɔ̍ wa᷅ kīōlɔ̄ɔ̍ ve̍, ā kūɛ̄ nda̍ kɔ̄ɔ̄lī. I̍ di̍mu̍l pūa̍a̍ nīa̍a̍ a̍ nūm o̍kɔ̄ɔ̄ māā ā yɔ᷅ŋ nu̍m nyɛ̄ o̍ nyɛ̄ le̍. Tē kōlɔ̄ɔ̍ bīī nu̍m pɛ̍, a̍ kɔ̍ ko᷅l mɛ̄ŋmā nda̍ kɔ̄ndū o̍ kpɛ̍ɛ̍nɛ̍i̍ ni᷄ŋ nda̍ŋ.”

¹⁰ Mi̍ Lu̍fū lo᷅ o̍ ko̍ŋ mbo̍ bāŋ wūla̍ŋ Bo̍wāā o̍ lābɛ̄ŋgu̍ ni̍ŋ mbo̍ tūndū hɔ̄lla̍ lɛ̄ŋ. Mbo̍ dīmūl Bo̍wāā āā, “Ya̍ wa᷅na̍ lēkāa̍ ho̍ō, vɛ᷅ mā to̍sa̍l la̍ kɛ̄ndɛ̄ī bɛ̍ndūī wāā nu̍a̍ā?”

¹¹ Mi̍ Bo̍wāā mu̍lūl ndu̍ āā, “Nyɛ̄ o̍ nyɛ̄ ŋ̄ tōsa̍l kālālɛ̍i̍ nu̍m chɔ̍ŋ a̍ bōōndi̍i̍ pɔ̍nɔ̍ nu̍m ō vī ve̍, wāŋnda̍ dīmu̍l la̍ kpo̍u̍. Ā dīmu̍l la̍ a̍ mɛ̄ɛ̍ ŋ̄ mɛ̄i̍ fi̍nyā nu̍m, a̍ kālā nu̍m, a̍ lɛ̄ŋndē nūmnde̍ŋ ma̍ hu᷄ŋ cha᷅l wānāā ŋ̄ si̍nā bɛ̍ɛ̍ pa̍a̍ndū le̍ wa̍ tɛ̄ɛ̄ŋ yɛ̍.

¹² Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l nu̍m dɛ̍nɛ̍ kɛ̍ndɛ̄ bɛ̄ndōo̍ le̍ nyɛ̄ ŋ̄ tōsa̍ wo̍ fɔ̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō ŋ̄ hīŋ nāa̍ ndu̍ chu̍a̍ le̍ nu̍m māndāa̍ wo̍ ō mīŋgu̍l nu̍m kɛ̄ndɛ̄i̍ ŋ̄ tōsa̍l kālālɛ̍i̍ nu̍m nde̍ fɔ̍.”

¹³ Mi̍ Lu̍fū dīmūl ndu̍ āā, “A̍ to̍sa̍l la̍ dɛ̍nɛ̍ kɛ̍ndɛ̄ bɛ̄ndū fāllo̍. Dīōmndā ŋ̄ sōō nāa̍ ya̍ chu̍a̍ la̍ŋ, lā nyɔ̄ɔ̄lu̍ ya̍ kɔ̄llo̍, mi̍ chē bɛ̍ɛ̍ bu̍ɛ̍i̍yāā nūm nda̍ ō pīlɛ̍ bɛ̍ɛ̍ ŋ̄ sīīma᷅ŋ na̍a̍ ndu̍ le̍ ni̍.”

¹⁴ Mɛ̄ɛ̍ te̍le̍ŋ di̍a̍ā nyɛ̄ dīa̍a̍ ō fūūlu̍u̍, mi̍ Bo̍wāā ve̍e̍lū Lu̍fū āā, “Hu̍ŋ ŋ̄ dīōnu᷅ŋ nyɛ̄ dīa̍a̍. Hu̍ŋ chu̍ā bēe̍dīi̍yo̍ mā dē a̍ lāmndo̍.” Mi̍ Lu̍fū kɔ̍ cha᷅l wānāā wa̍lla̍ īkɛ̄i̍. Mi̍ Bo̍wāā hi̍wūl ndu̍ bēe̍dīi̍ ŋ̄ba̍a̍līi̍yo̍. Mi̍ Lu̍fū di̍ā mbo̍ pūm, mbo̍ mɛ̄ī ō ti᷄ŋ.

¹⁵ Mɛ̄ɛ̍ Lu̍fū mi̍i̍ŋgu̍ ba̍a̍līi̍yo̍ŋ nūūwāa̍, mi̍ Bo̍wāā dīmūl pūa̍a̍ ndūa̍a̍ wa̍lla̍ āā, “Ō wa̍ yāsāla̍ŋ chɔ̄ɔ̄vi̍a̍a̍ nāa̍ bālā ŋ̄ba̍a̍līi̍la̍ŋ lā chō wa̍. Lā tu̍a̍ū ndu̍ le̍.

¹⁶ Lā sōōlu̍u̍ yāsāla̍ŋ lā ti᷄ŋ o̍ bālā ŋ̄ba̍a̍līi̍la̍ŋ ni᷄ŋ mī lā mɛ̄lu̍l ndu̍ mbō chɔ̄ɔ̄vi̍a̍a̍. Lā ku̍u̍nā ndu̍ le̍.”

¹⁷ O̍ ko̍ŋ, mi̍ Lu̍fū ni̍i̍lū ba̍a̍līi̍ŋ mu᷅ŋ nūūwāa̍ kpɛ᷅ŋ. A̍ pāa̍le̍ de̍lāāle̍ŋ, mbo̍ lūāā ba̍a̍līi̍ŋ o̍ nu̍u̍va̍ mu̍ŋ ndo̍ŋ. Mɛ̄ɛ̍ o̍ tu̍u̍ mu̍ŋ, mu̍ŋ wa᷅ le̍ pa᷅ŋnda̍ŋ be̍le̍-ŋu̍ɛ̍ɛ̍nu̍.

¹⁸ Mbo̍ kūā a̍ mu̍ŋ chi̍e̍e̍ mbo̍ kɔ̍ chɔ᷅m kālālɛ̍i̍ ndɔ̄. O̍ ko̍ŋ kɔ̍ɔ̍lī, mbo̍ chūū ndu̍ vɛ̄lɛ̄ nyɛ̄ dīāā o̍ de᷅ ko̍ŋ mbo̍ mɛ̄ī o̍ ti᷄ŋ ndo̍.

¹⁹ Mi̍ Nāo̍mī lo᷅ o̍ ko̍ŋ mbo̍ nyūnā ndu̍ āā, “Kūɛ̍ɛ̍nɛ̍ ŋ̄ nūūwa̍ yɛ̄ ba̍a̍līi̍ŋ bɛ̍ndo᷄ŋ mu᷅ŋ? O̍ chīɛ̍i̍ nɛ̄ɛ̍nɛ̍ ni̍ŋ ŋ̄ nīīlu̍ yɛ̄ wa̍llo̍? Mbɔ̄ māā Mɛ̄lɛ̄ka̍ dɔ̄u̍ wa᷅na̍ yi̍ya̍ŋ ho̍ō nu̍m chōo̍ wo̍ sa̍lā fɔ̍.” Mi̍ Lu̍fū di̍mūl ndu̍ āā, “Po̍ pi᷅lɛ̍ dīōla̍ŋ āā, Bo̍wāā, o̍ chīɛ̄ī ndūɛ̍i̍ ni᷄ŋ ya̍ I̍ ni̍i̍lu̍ ni̍.”

²⁰ Mi̍ Nāo̍mī di̍mī āā, “Būŋgɛ̄ī Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l wānāa̍ cho̍ yōōmū wa̍ a̍ wānāa̍ vi᷅ wa̍ ve̍, pēēlōo̍ o̍ pe̍e̍lū ndi̍ lɔ̍ɔ̍ lɔ̍ɔ̍ ni̍. Mbɔ̄ Mɛ̄lɛ̄ka̍ Ya̍a̍wɛ̄ɛ̄ ō dɔ̄u̍ Bo̍wa̍a̍ sa̍lā fɔ̍. Bo̍wāā ko̍ŋ, pɔ̍nɔ̍ ni̍ vi᷅ wo̍, wānāyɛ̍ī ndūɛ̍i̍ kɛ̍sɛ̍ kɛ̍sɛ̍ o̍ cho̍ ni̍. Ndu̍yɛ̍ wānāa̍ nɔ̍ le̍ chīɛ̄ī nāa̍ lōōwo̍ wa̍, ō pīlɛ̍ cho̍ ko̍ŋ ni̍.”

²¹ O̍ ko̍ŋ kɔ̍ɔ̍lī, mi̍ Lu̍fū di̍mūl ndu̍ āā, “Mi̍ Bo̍wāā di̍mūl la̍ vɛ̄lɛ̄ āā, ya̍ I̍ wa̍ bu̍ɛ̍i̍yāā ndūa̍a̍ īkɛ̄i̍ mī lo̍ nda̍ nūūwāa̍ kɔ̄ɔ̄lī ha̍a̍a̍ mā chīi̍ chīɔ̍ɔ̍ŋ kōwɔ̄ɔ̍.”

²² Mi̍ Nāo̍mī di̍mūl ndu̍, āā, “Chūā nūu̍, ō bɛ̄nda̍ mī lā wa̍ wa̍llo̍ o̍ chīɛ̍i̍ Bo̍wāā ve̍ ni᷄ŋ nya̍ bu̍ɛ̍i̍yāā ndūāā la̍a̍ndūa̍a̍. Ku̍ā o̍ chīɛ̄ī wānā chēle̍ŋ ni᷄ŋ te̍, yɔ̄ŋi̍ nda̍ yɔ᷄ŋ nu̍m nyɛ̄.”

²³ O̍ ko̍ŋ, mi̍ Lu̍fū hi̍a̍ū lāchī a̍ wa̍llo̍ o̍ chīɛ̍i̍ Bo̍wāāve̍ ni᷄ŋ nda̍ bu̍ɛ̍i̍yāā ndūāā la̍a̍ndūa̍a̍ ha̍a̍a̍ ma̍ chīī ba̍a̍līi̍yo̍ŋ a̍ wi̍tīi̍yo̍ŋ kīōlɔ̄ɔ̄. Ndu̍yɛ̍, mi̍ Lu̍fū hi̍a̍ū lāchī a̍ wāa̍ kālālɛ̍i̍ ndɔ̍ īkɛ̄i̍.