Lɛ̄vi̍ti̍kɔ̍ɔ̄ 9 - Yāu̍ Mɛ̄lɛ̄ka̍a̍

Ā sa̍lālā E̍lɔ̄ŋ o̍ so̍li̍ la̍ŋ o̍kɔ̄ɔ̄

¹ Mɛ̄ɛ̍ pālɛ̍i̍ ŋɔ̍mmɛ̍ū E̍lɔ̄ŋ nda̍ pūa̍a̍ ndūa̍a̍ nda̍ a̍a̍ nɔ̄ le̍ dīndīo̍o̍ sɔ̄lāa̍ ve̍ ī hīōū, o̍ ŋɔ̄ma̍a̍ wo̍, mi̍ Mūu̍sē ve̍e̍lū E̍lɔ̄ŋ nda̍ pūa̍a̍ ndūa̍a̍ a̍ wāŋ bɛ̄ndūāā I̍sɔ̄lūɛ̄ī nāa̍ pi᷅lɛ̍.

² Mi̍ Mūu̍sē o̍ di̍mūl E̍lɔ̄ŋ āā, “Bi̍i̍ nāū tōōyē fɔ̍ŋndɔ̍ɔ̍, o̍ nɔ̍ sɔ᷅ŋ o̍ sɔ̄ŋ te̍ wo̍ mā so̍li̍ ndu̍ sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍ mī Mɛ̄lɛ̄ka̍ ma᷄l nu̍m le̍ yɔ̄ŋ nūm wɔ̍ɔ̍ŋndo̍, ndu̍yɛ̍ mā bīī vɛ̄lɛ̄ sāā ko̍ndo̍o̍ o̍ nɔ̍ sɔ᷅ŋ o̍ sɔ̄ŋ te̍ wo̍ mā so̍li̍ ndu̍ sa̍lā lūāmāa̍ o̍ Mɛ̍lɛ̄ka̍ lo̍.

³ O̍ ko̍ŋ kɔ̍ɔ̍lī, mā di̍mu̍l wāŋnda̍ I̍sɔ̄lūɛ̍i̍ mā bīī chūīŋ tōōyōo̍ o̍ nɔ̍ sɔ᷅ŋ o̍ sɔ̄ŋ te̍ wo̍ mā so̍li̍ ndu̍ sa̍lāa̍ o̍ Mɛ̍lɛ̄ka̍ lo̍ le̍ mā sɔ̄la̍ mālɔ̄ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ, ndu̍yɛ̍ o̍ ko̍ŋ kɔ̍ɔ̍lī, mā bīī vɛ̄lɛ̄ nāū tōōyē fɔ̍ŋndɔ̍ chi̍i̍ wɔ̄sīo̍o̍ ō pīlɛ̍ wo̍, a̍ sāā la̍a̍ndu̍ chi̍i̍ wɔ̄sīo̍o̍ ō pīlɛ̍ wo̍, a̍ nɔ̍ sɔ᷅ŋ o̍ sɔ̄ŋ te̍ wa̍ mā sōli̍ nda̍ sa̍lā lūāmāa̍ o̍ Mɛ̄lɛ̄ka̍ lo̍.

⁴ O̍ ko̍ŋ kɔ̍ɔ̍lī, mā di̍mu̍l vɛ̄lɛ̄ nda̍, mā bīī nāū tōōyē fɔ̍ŋndɔ̍ɔ̍, a̍ sāā ko̍ndo̍o̍ le̍ mā sōli̍ nda̍ sa̍lā kɔ̄l nyūlōo̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, lātūlu̍ a̍ sa̍lā nyɛ̄ dīāā ku̍llo̍ ō nda̍ mūūli̍āŋ ko̍lo̍ ndɔ̄ɔ̍ a̍ chūɛ̄īmā ɔ̄li̍fīi̍ya̍ŋ le̍ ndu̍ bɛ̄ɛ̄ndīa̍a̍ wo̍. Di̍mu̍l nda̍ mā sōli̍ sa̍lāla̍ŋ ndāŋ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nda̍ chɔ̄mnɔ᷄ŋ pa̍a̍le̍ hāūle̍ŋ nde᷅ŋ.”

⁵ O̍ ko̍ŋ, mi̍ wāŋnda̍ I̍sɔ̄lūɛ̄ī a̍ hu᷅ŋ a̍ nyɛ̄ o̍ nyɛ̄ Mūu̍sē di̍mu̍l nda̍, o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nda̍ la̍tu̍lu̍ wo̍ sōndōo̍. Ndu̍yɛ̍ nda̍ kpo̍u̍ ma̍ nāŋnu᷄ŋ kpɛ̍ɛ̍lūŋ ma̍ sīm Mɛ̄lɛ̄ka̍ Ya̍a̍wɛ̄ɛ̍ lāchī.

⁶ Mi̍ Mūu̍sē o̍ lo᷅ o̍ ko̍ŋ mbo̍ dīmūl nda̍ āā, “Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̍ di̍mu̍l nya̍ le̍ tōsāa̍, tē lā tōsa̍ ndu̍ pɛ̍, lā chō pa̍ŋgēle̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ chɔ̄.”

⁷ O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl E̍lɔ̄ŋ āā, “Sɔ̍ɔ̍ŋgu̍u̍ o̍ ma̍āŋndo̍ īkɛ̄i̍ mā so̍li̍ sa̍la̍ fa̍ŋā yɔ̄ŋ wɔ̍ɔ̍ŋndo̍ wo̍, a̍ sa̍la̍ lūāmāa̍ le̍ yɔ̄ŋndā nūmnda̍ wɔ̍ɔ̍ŋnda̍ŋ fāŋāa̍. O̍ ko̍ŋ kɔ̍ɔ̍lī, mā so̍li̍ vɛ̄lɛ̄ sa̍lāla̍ŋ le̍ yɔ̄ŋndā wɔ̍ɔ̍ŋndā wāŋnda̍ I̍sɔ̄lūɛ̄ī fāŋāa̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nu̍m yɛ̍.”

⁸ O̍ ko̍ŋ, mi̍ E̍lɔ̄ŋ o̍ sɔ̍ɔ̍ŋgūū o̍ ma̍āŋndo̍ īkɛ̄i̍, mbo̍ dīī nāū tōōyē fɔ̍ŋndɔ̍ɔ̍, o̍ wa̍ le̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, le̍ yɔ̄ŋndā ndɔ̄la̍ wɔ̍ɔ̍ŋnda̍ŋ fāŋāa̍.

⁹ Mi̍ pūa̍a̍ ndūa̍a̍ ā bīī kōo̍ma̍ nāū kōŋ mā ti᷄ŋ, ma̍ kūā a̍ ma̍ŋ nāa̍ ndu̍ chu̍a̍. Mbo̍ yīŋ sūe̍i̍ o̍ ko̍o̍ma̍ ma᷅ŋ ni᷄ŋ, mbo̍ sūū ma̍ŋ o̍ nyɛ̄lā nda̍ sōli̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ. O̍ ko̍ŋ kɔ̍ɔ̍lī, mbo̍ chūā kōo̍ma̍ tɔ᷅ma̍ lo̍ wa̍ŋ mbo̍ tālā ma̍ŋ o̍ ma̍āŋndo̍ bɛ̄ŋgu̍.

¹⁰ Nāū E̍lɔ̄ŋ o̍ di̍ī ho̍ō le̍ sa̍lā fa̍ŋā yɔ̄ŋ wɔ̄ɔ̍ŋndo̍ wo̍ wo̍, mi̍ E̍lɔ̄ŋ o̍ chu̍ā chūɛ̄īmā nāū kōŋ, a̍ bɔ̄ŋgu̍ŋ ndɔ̄ɔ̍ŋ mūu̍ŋ ndo̍ŋ, a̍ yēmi̍i̍ hɔ᷅lle̍, mbo̍ hāndū o̍ ma̍āŋndo̍ chōo̍ mbo̍ lūām le̍ yɔ̄ŋ ndɔ̄ wɔ̍ɔ̍ŋndo̍ fāŋāa̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍.

¹¹ Kɛ̍ vīsīo̍ŋ mu̍ŋ, a̍ yāu̍ nāū kōŋ, mbo̍ kɔ̍ lo᷅m mu̍ŋ o̍ dɔ̍ɔ̍ŋgɔ̍ nda̍ wa̍ wo̍ da̍ŋga̍la̍.

¹² O̍ ko̍ŋ kɔ̍ɔ̍lī, mi̍ E̍lɔ̄ŋ o̍ di̍ī vɛ̄lɛ̄ chɔ̄lū o̍ nɔ̍ le̍ sa̍lā lūāmāa̍ sōlīo̍o̍ wo̍. Mi̍ pūa̍a̍ ndūa̍a̍ ā bīī kōo̍ma̍ chɔ̄lū kōŋ ma̍ kūā a̍ ma̍ŋ nāa̍ ndu̍ chu̍a̍, ndu̍yɛ̍ mi̍ E̍lɔ̄ŋ o̍ fa̍sāŋīāā ma̍ŋ o̍ ma̍āŋndo̍ kpēŋgo᷄ŋ vēllāa̍ vēllē.

^13-14 Ma̍ chūū ndu̍ vīsīŋ chɔ̄lōo̍ ho̍ō a̍ būŋga᷄ŋ, lātūlu̍ a̍ bōlle̍ŋ, ndu̍yɛ̍ ma̍ tūāā pūlu̍ŋ chɔ̄lū kōŋ lātūlu̍ a̍ pēlo̍ŋ, mbo̍ lūām vīsīŋ mu᷅ŋ kpo̍u̍ o̍ ma̍āŋndo̍ chōo̍ māā sa̍lā lūāmāā.

¹⁵ O̍ ko̍ŋ kɔ̍ɔ̍lī, mi̍ E̍lɔ̄ŋ o̍ hu᷅ŋ vɛ̄lɛ̄ a̍ chūīŋ nda̍ sōlī sa̍lā fa̍ŋā yɔ̄ŋ wɔ̍ɔ̍ŋndo̍ wo̍, le̍ wāŋnda̍ I̍sɔ̄lūɛ̄ī. Mbo̍ dīī ndu̍, mbo̍ sōlī ndu̍ sa̍lāa̍ le̍ yɔ̄ŋ nda̍ wɔ̍ɔ̍ŋndo̍ fāŋāa̍. Mɛ̄ɛ̍ o̍ to̍sa̍ a̍ chɔ̄lū tāse̍ o̍ di̍ī le̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍ le̍ ndu̍ pi̍la̍ yɛ̍.

¹⁶ O̍ ko̍ŋ kɔ̍ɔ̍lī, mbo̍ hūŋ vɛ̄lɛ̄ a̍ sa̍lā lūāmāa̍ mbo̍ sōlī ndu̍ sa̍lā mɛ̄ɛ̍ i̍ cho̍ ī tūwāā yɛ̍.

¹⁷ Mbo̍ mūli᷄ŋ mbo̍ hūŋ vɛ̄lɛ̄ a̍ kōlo̍ sa̍lā nyɛ̄ dīāā ku̍llo̍, mbo̍ kūāndū ndu̍ bāa̍ cha̍ mbo̍ lūām ndu̍ o̍ ma̍āŋndo̍ chōo̍, ō fūla̍ o̍ sa̍lā lūāmāā nda̍ sōlī i̍di̍i̍ o̍ īdīi̍ yo̍ kɔ̄ɔ̄lī.

¹⁸ O̍ ko̍ŋ kɔ̍ɔ̍lī, mi̍ E̍lɔ̄ŋ o̍ di̍ī vɛ̄lɛ̄ nāū tōōyōo̍, a̍ sāā ko̍ndo̍o̍, a̍ wa̍ le̍ sa̍lālā kɔ̄l nyūlū la̍ŋ sōlīo̍o̍, le̍ wāŋnda̍ wa̍. Mi̍ pūa̍a̍ ndūa̍a̍ ā yōū ndu̍ kōo̍ma̍ chɔ̄lūa̍a̍ ha̍ā mbo̍ fāsāŋīāā ma̍ŋ o̍ ma̍āŋndo̍ kpēŋgo᷄ŋ vēllāa̍ vēllē.

¹⁹ O̍ ko̍ŋ kɔ̍ɔ̍lī, chɔ̄lūa̍a̍ ha̍ā chūɛ̄īmā ndāa̍ŋ ki̍nɛ̍i̍, ma̍ ho̍lnu̍ŋ pu̍lo̍ŋ ndāa̍ŋ, a̍ chūɛ̄īmā lōmīī tūmnda̍ŋ, a̍ bɔ̄ŋgu̍ŋ ndāa̍ŋ, a̍ yēmu̍ŋ ndāŋ hɔ᷅llo̍ŋ,

²⁰ ma̍ chūā chūɛ̄īmā chɔ̄lūa̍a̍ ha̍ā ki̍nɛ̍i̍ ma̍ kɛ̄sī o̍ mɛ̄ɛ̄mā chɔ̄lūa̍a̍ ha̍ā chōo̍. O̍ ko̍ŋ, mi̍ E̍lɔ̄ŋ o̍ chu̍ā chūɛ̄īmā māŋ mbo̍ lūām ma̍ŋ o̍ ma̍āŋndo̍ chōo̍.

²¹ O̍ ko̍ŋ kɔ̍ɔ̍lī, mbo̍ chūā vɛ̄lɛ̄ mɛ̄ɛ̄mā chɔ̄lūa̍a̍ ha̍ā a̍ lɔ̄lūlā ndāla̍ bā kɛ̄ndɛ̄ la̍ŋ, mbo̍ hēēlū o̍ bāla̍ŋ cho̍o̍ māā sa̍lā kpe̍e̍kpe̍i̍ Mɛ̍lɛ̄ka̍ Ya̍a̍wɛ̄ɛ̄ lāchī, mɛ̄ɛ̍ Mūu̍sē o̍ di̍mu̍l ndu̍ le̍ tōsāa̍ yɛ̍.

²² Mɛ̄ɛ̍ E̍lɔ̄ŋ o̍ chi̍i̍ sa̍lā fa̍ŋā yɔ̍ŋ wɔ̄ɔ̍ŋndo̍ wo̍ sōlī a̍ sa̍lā lūāmāa̍, a̍ sa̍lālā kɔ̄l nyūlū la̍ŋ, mbo̍ sīɛ̄ndī bāla̍ŋ nāa̍ wāŋnda̍ wa̍ wa̍ mbo̍ dūāū nda̍ sa̍lā. O̍ ko̍ŋ, mbo̍ fāŋa᷄ŋ o̍ ma̍āŋndo̍ chōo̍ mbo̍ tūāl lɛ̄ŋ.

²³ Mɛ̄ɛ̍ o̍ to᷅l, ndu̍ ni̍, Mūu̍sē ni̍, ma̍ lūɛ̄ī o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ la̍tu̍lu̍ wo̍ ni̍ŋ. Mɛ̄ɛ̍ nda̍ fūla̍, ma̍ hu᷄ŋ dɔ̍ū wāŋnda̍ sa̍lā. O̍ ko̍ŋ kɔ̍ɔ̍lī, mi̍ pa̍ŋgēle̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ la̍tu̍lu̍ wo̍, ō chɔ̄mnu᷄ŋ wa᷅ŋnda̍ kpo̍u̍.

²⁴ O̍ lē pīlɛ̍ ni᷄ŋ kpe̍, mi̍ Mɛ̄lɛ̄ka̍ Ya̍a̍wɛ̄ɛ̄ yɔ᷅ŋ yīŋnde̍ŋ mi̍ lē hu᷄ŋ lo᷅m sa̍lā lūāmāa̍, a̍ chūɛ̄īma̍ wa̍ o̍ ma̍āŋndo̍ chōo̍ wa̍ŋ. Mɛ̄ɛ̍ wāŋnda̍ chē nyɛ̍ yɔ̍nu̍ŋ ndo̍, nda̍ kpe̍de̍ ma̍ dēŋī, ma̍ bāŋ wūla̍ŋ ma̍ fūūlūū hɔ̄lla̍ lɛ̄ŋ mɛ̍ɛ̄.