Lɛ̄vi̍ti̍kɔ̍ɔ̄ 8 - Yāu̍ Mɛ̄lɛ̄ka̍a̍

A̍ mɛ̄ɛ̍ E̍lɔ̄ŋ nda̍ pūa̍a̍ ndūa̍a̍ ā nɔ̄ mā wa᷄ ā yɔ̄ŋa᷄ŋ o̍ Mɛ̄lɛ̄ka̍ lo̍ le̍ wa̍li̍ Mɛ̄lɛ̄ka̍a̍ yɛ̄ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̍lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍ mbo̍ di̍mūl ndu̍ āā,

² “Hu̍ŋ a̍ E̍lɔ̄ŋ nda̍ pūa̍a̍ ndūa̍a̍ o̍ tɛ̍ndīi̍ chɔ᷅m māā Mɛ̍lɛ̄ka̍ Ya̍a̍wɛ̄ɛ̄ chō a̍ nya̍ lātūlu̍ wo̍ sōndōo̍, lātūlu̍ a̍ dōmāla̍ wānāā so̍līāā lāsa̍lāa̍, ndu̍yɛ̍ a̍ chūɛ̄īmā nda̍ tālā wa᷅ŋndo̍ o̍ lēbōl le̍ ndu̍ hɛ̄līo̍o̍ wa̍ŋ, a̍ nāū tōōyōo̍ le̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍ sōlīo̍o̍, a̍ sāā ko̍ndu̍a̍a̍ ā ŋīɔ̍ɔ̍ŋ, a̍ bēe̍dīi̍ nda̍ do̍ū yi̍i̍sīi̍ le̍ wo̍ o̍ kāmbɛ̍i̍yo̍ ni᷄ŋ.

³ Ndu̍yɛ̍, mā chu̍u̍ŋgi̍a̍a̍ I̍sɔ̄lūɛ̍i̍ya̍ kpo̍u̍ lo̍ŋ.”

⁴ O̍ ko̍ŋ kɔ̍ɔ̍lī, mi̍ Mūu̍sē o̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Mbo̍ tōsā mi̍ wāŋnda̍ I̍sɔ̄lūɛ̄ī a̍ chu̍ūŋgi̍āŋ kpo̍u̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ la̍tu̍lu̍ wo̍ sōndōo̍.

⁵ Mi̍ Mūu̍sē o̍ lo᷅ o̍ ko̍ŋ mbo̍ dōōnu᷄ŋ nda̍ ko̍na̍, mbo̍ dīmūl nda̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ ve᷅m ya̍ le̍ tōsāa̍ wo̍, ndu̍ ya̍ hi᷅ŋ ho̍ō tōsāa̍ ni̍.”

⁶ O̍ ko̍ŋ kɔ̍ɔ̍lī mī Mūu̍sē o̍ hu᷅ŋ a̍ E̍lɔ̄ŋ nda̍ pūa̍a̍ ndūa̍a̍ wāŋnda̍ lāchī, mbo̍ pūlū nda̍ le̍ mā sīmnu᷄ŋ a̍ di̍a̍ndāā Mɛ̄lɛ̄ka̍ o̍ hɔ̄l.

⁷ Mi̍ Mūu̍sē o̍ lo᷅ o̍ ko̍ŋ mbo̍ wōū E̍lɔ̄ŋ dōmā vi̍lɛ̄ī wānāā sōlīāā lāsa̍lāa̍ ā wōūnūŋ le̍bɛ̍ŋgu̍ wo̍, mbo̍ chūā yāu̍le̍ kōlāle̍ŋ mbō yīī lēchōo̍ ndu̍ o̍ chāŋ. Mbo̍ mūli᷄ŋ mbo̍ wōu̍ ndu̍ dōmā vi̍lɛ̄i̍ nɔ̍ mbō wa̍ o̍ dōmā ko̍ŋ chōo̍, a̍ dōmā bi̍ŋgī nda̍ wōūnūŋ o̍ dōmā le̍cho̍o̍ ko̍ŋ chōo̍ le̍ Mɛ̄lɛ̄ka̍ dīōmndo̍ nyūnāa̍ wo̍. Mɛ̄ɛ̍ o̍ wo̍u̍ ndu̍ dōmā bīŋgī kōŋ, mbo̍ yīī ndu̍ kōlāla̍ i̍pɛ̍ŋgɛ̍la̍ wa̍ o̍ dōmā ko̍ŋ lā tōōsīāā a̍ pa̍tāŋndā kɛ̄ndɛ̄ kɛ̍ndɛ̄la̍ŋ nda̍ŋ o̍ chāŋ. Mi̍ dōmāa̍ ō wā E̍lɔ̄ŋ ō yīyāā lēkɔ̄ɔ̍ le̍nde̍.

⁸ Mi̍ Mūu̍sē o̍ lo᷅ o̍ ko̍ŋ mbo̍ chūā nyɛ̍ wa᷅ wa̍nāā sōlīāā lāsa̍lāa̍ o̍ tākpāa̍ o̍ dōmāa̍ chōo̍ wo̍, mbo̍ bāā E̍lɔ̄ŋ. Mbo̍ chūā nyɛ̄lā nda̍ nyūnā Mɛ̍lɛ̄ka̍ dīōm a̍ la̍ŋ nda̍ŋ, Yu̍lūīm a̍ Tu̍mīm mbo̍ wōū ndu̍ o̍ yi̍fɔ̄ nyɛ̄ kōŋ ni᷄ŋ.

⁹ Mbo̍ chūā mɔ̍si̍l vi̍lɛ̄īyo̍, mbo̍ wōū ndu̍, o̍ ko̍ŋ kɔ̍ɔ̍lī, mbo̍ chūā nyɛ̄ nda̍ tōōsi̍a̍a̍ a̍ ko̍o̍līi̍ye̍ wo̍, o̍ chɔ᷅m māā wāŋndo̍ ō chō ō yɔ̄ŋga᷄ŋ o̍ Mɛ̄lɛ̄ka̍ lo̍ le̍ kpe̍ku̍ Mɛ̄lɛ̄ka̍a̍ wo̍, mbo̍ hāndū E̍lɔ̄ŋ o̍ mɔ̍si̍l vi̍lɛ̄ī o̍ wo̍u̍ ndu̍ ko̍ŋ ndo̍ lāchī, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

¹⁰ O̍ ko̍ŋ kɔ̍ɔ̍lī, mi̍ Mūu̍sē o̍ chu̍ā chūɛ̄īmā nda̍ tālā wāŋndo̍ o̍ lēbōl le̍ ndu̍ hɛ̄līo̍o̍ wa̍ŋ, mbo̍ fāsāŋīāā ma̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ la̍tu̍lu̍ wo̍, ndu̍yɛ̍ a̍ o̍ nyɛ̄ o̍ nyɛ̍ wa̍ lēni᷄ŋ, mbo̍ dīndī la̍ŋ Mɛ̄lɛ̄ka̍ o̍ hɔ̄l.

¹¹ Ndu̍yɛ̍, mbo̍ fāsāŋā vɛ̄lɛ̄ chūɛ̄īmā māŋ o̍ ma̍āŋ nda̍ sōlī sa̍lāla̍ŋ chōo̍ wo̍ lē ŋɔ᷄mmɛ̍ū, mbo̍ fāsāŋīāā vɛ̄lɛ̄ o̍ wōlɔ̄ɔ̄la̍ nda̍ tōsā wa̍llo̍ o̍ ma̍āŋndo̍ la̍ŋ, ndu̍yɛ̍ mbo̍ fāsāŋā vɛ̄lɛ̄ o̍ hɛ̄ŋgɛ̍i̍ bɛ̍ndū māmɛ̄ŋndo̍ a̍ nyɛ̄ hɛ̄ŋgɛ̍i̍ ko̍ŋ ō cha᷄l chōo̍ wo̍, le̍ la̍ŋ dīndīo̍o̍ Mɛ̄lɛ̄ka̍ o̍ hɔ̄l.

¹² O̍ ko̍ŋ kɔ̍ɔ̍lī, mbo̍ tālā vɛ̄lɛ̄ E̍lɔ̄ŋ chūɛ̄īmā māŋ mā ti᷄ŋ o̍ lēbōl le̍ la̍ŋ dīndīo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l le̍ kpe̍ku̍ Mɛ̄lɛ̄ka̍a̍.

¹³ O̍ ko̍ŋ kɔ̍ɔ̍lī, mi̍ Mūu̍sē o̍ si̍mī vɛ̄lɛ̄ pūa̍a̍ E̍lɔ̄ŋ nda̍ wāŋnda̍ o̍ hɔ̄l lo̍ŋ mbo̍ wo̍u̍ nda̍ dōmāla̍ vi̍lɛ̄īlā wānāā sōlīāā lāsa̍lāa̍ ā wōūnūŋ le̍bɛ̍ŋgu̍ la̍ŋ, mbo̍ yīī nda̍ kōlāla̍ i̍pɛ̍ŋgɛ̍la̍ŋ o̍ lāchāŋ māā īyāu̍, mbo̍ wōū nda̍ nyɛ̄la̍ŋ o̍ lēbōl māā lāko̍o̍ko̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

¹⁴ O̍ ko̍ŋ kɔ̍ɔ̍lī, mi̍ Mūu̍sē o̍ hu᷅ŋ a̍ nāū tōōyē nda̍ a̍a̍ nɔ̍ le̍ sa̍lāa̍ sōlīo̍o̍ le̍ yɔ̄ŋndā wɔ̄ɔ̍ŋnda̍ŋ fāŋāa̍ wo̍. Mi̍ E̍lɔ̄ŋ nda̍ pūa̍a̍ ndūa̍a̍ ā hāndū nāūwo̍ ho̍ō bāla̍ŋ o̍ lēbōl.

¹⁵ O̍ ko̍ŋ, mi̍ Mūu̍sē o̍ di̍ī nāū kōŋ, mbo̍ chūā kōo̍ma̍ nāū kōŋ mā ti᷄ŋ, mbo̍ yīŋ sūe̍i̍ lēni᷄ŋ, mbo̍ sūū ma̍ŋ o̍ nyɛ̄lā wa̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ, le̍ ma̍āŋndo̍ dīndīo̍o̍ Mɛ̄lɛ̄ka̍ o̍ hɔ̄l. Mbo̍ chūā kōo̍ma̍ tɔ᷅ma̍ lo̍ wa̍ŋ, mbo̍ tālā ma̍ŋ o̍ ma̍āŋndo̍ bɛ̄ŋgu̍. Mɛ̄ɛ̍ o̍ nɛ̄īyo̍ ho̍ō ni᷄ŋ mbo̍ tōsā mi̍ ma̍āŋndo̍ ō sīmnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l.

¹⁶ O̍ ko̍ŋ kɔ̍ɔ̍lī, mi̍ Mūu̍sē o̍ chu̍ā chūɛ̄īma̍ wa̍ nāū kōŋ ni᷄ŋ mā hōlna᷄ŋ o̍ pūlo̍ŋ nda̍ŋ kpo̍u̍, a̍ yēmi̍i̍ hɔ᷅lle̍, ndu̍yɛ̍ a̍ bɔ̄ŋgu̍ŋ mūu̍ŋ ndo̍ŋ, lātūlu̍ a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, mbo̍ lūām kpo̍u̍ o̍ ma̍āŋndo̍ chōo̍.

¹⁷ Kɛ̍ nāū kōŋ yāu̍ ndɔ̄ ni̍, vīsīŋ ndɔ̄ ni̍, a̍ pōōlā ndɔ̄la̍ŋ kpo̍u̍, mbō chūā mbo̍ kɔ̍ lo᷅m o̍ dɔ̍ɔ̍ŋgɔ̍ nda̍ wa̍ wo̍ da̍ŋga̍la̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

¹⁸ O̍ ko̍ŋ kɔ̍ɔ̍lī, mi̍ Mūu̍sē o̍ hu᷅ŋ a̍ sāā ko̍ndo̍ nda̍ a̍a̍ nɔ̍ le̍ sa̍lā lūāmāa̍ sōlīo̍o̍ wo̍, Mɛ̄lɛ̄ka̍ Ya̍a̍wɛ̄ɛ̍ lāchī. Mi̍ E̍lɔ̄ŋ nda̍ pūa̍a̍ ndūa̍a̍ ā hāndū sāā ko̍ndo̍o̍ ho̍ō bāla̍ŋ o̍ lēbōl.

¹⁹ Mi̍ Mūu̍sē o̍ di̍ī sāā ko̍ŋ, mbo̍ chūā kōo̍ma̍ ndūa̍ŋ mbo̍ fāsāŋīāā ma̍ŋ o̍ ma̍āŋndo̍ kpēŋgo᷄ŋ vēllāa̍ vēllē.

^20-21 O̍ ko̍ŋ kɔ̍ɔ̍lī, mɛ̄ɛ̍ Mūu̍sē o̍ sɛ᷅ŋ sāā ko̍ndo̍o̍ ho̍ō, mbo̍ kīlī kīlī ndu̍ mu̍i̍mu̍i̍, ndu̍yɛ̍ mbo̍ tūāā pūlu̍ŋ ndɔ̄ɔ̍ŋ, lātūlu̍ a̍ pēlo̍ŋ, mbo̍ chūā vīsīŋ mu᷅ŋ kpo̍u̍, a̍ bōlle̍ŋ, lātūlu̍ a̍ chūɛ̄īmā ndūa̍ŋ mbo̍ lūām o̍ ma̍āŋndo̍ chōo̍. O̍ ko̍ŋ, mbo̍ lūām sāā ko̍ŋ kpo̍u̍ o̍ ma̍āŋndo̍ chōo̍ māā sa̍lā lūāmāā, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ di̍mu̍l ndu̍ yɛ̍. Ndu̍yɛ̍ mɛ̄ɛ̍ chūŋ sa̍lā kōŋ ō kōma̍l Mɛ̄lɛ̄ka̍ Ya̍a̍wɛ̄ɛ̄, mbo̍ hīnī kɔ̄l nyɛ̄ kɛ̄ndɛ̄ kɛ̍ndɛ̄.

²² O̍ ko̍ŋ kɔ̍ɔ̍lī, mi̍ Mūu̍sē o̍ hu᷅ŋ vɛ̄lɛ̄ a̍ sāa̍ ko̍ndo̍ chēle̍ŋ, le̍ E̍lɔ̄ŋ nda̍ pūa̍a̍ ndūa̍a̍ hɛ̄līo̍o̍ Mɛ̄lɛ̄ka̍ o̍ hɔ̄l māā wānāā sōlīāā lāsa̍lā. Mi̍ E̍lɔ̄ŋ nda̍ pūa̍a̍ ndūa̍a̍ ā hāndū sāā ko̍ndo̍o̍ ho̍ō bāla̍ŋ o̍ lēbōl.

²³ Mi̍ Mūu̍sē o̍ di̍ī sāā ko̍ndo̍ ko̍ŋ mbo̍ chūā kōo̍ma̍ ndūa̍ŋ mā ti᷄ŋ mbo̍ sūū E̍lɔ̄ŋ o̍ nīlē tūmndē bā kɛ̄ndɛ̄le̍ŋ, mbo̍ sūū ndu̍ vɛ̄lɛ̄ mā ti᷄ŋ o̍ sūēī bɛ̄ndūīī bā kɛ̄ndɛ̄i̍, mbo̍ sūū ndu̍ mā ti᷄ŋ o̍ sūēī bɛ̄ndūīī pēlīī bā kɛ̄ndɛ̄i̍.

²⁴ O̍ ko̍ŋ kɔ̍ɔ̍lī, mbo̍ hūŋ vɛ̄lɛ̄ a̍ pūa̍a̍ E̍lɔ̄ŋ nda̍ mbo̍ sūū nda̍ kōo̍ma̍ sāā ko̍ŋ o̍ nīlā ndāla̍ tu᷅mndā bā kɛ̄ndɛ̄la̍ŋ, mbo̍ sūū nda̍ vɛ̄lɛ̄ mā ti᷄ŋ o̍ sōōŋ ndāŋ bɛ̍ndūŋ bā kɛ̄ndɔ᷄ŋ, mbo̍ sūū nda̍ vɛ̄lɛ̄ mā ti᷄ŋ o̍ sōōŋ bɛ̍ndūŋ lābɛ̄ŋgu̍ŋ bā kɛ̄ndɔ᷄ŋ. O̍ ko̍ŋ kɔ̍ɔ̍lī, mbo̍ chūā kōo̍ma̍ tu̍a̍ŋ mbo̍ fāsāŋīāā ma̍ŋ o̍ ma̍āŋndo̍ kpēŋgo᷄ŋ vēllāa̍ vēllē.

²⁵ O̍ ko̍ŋ kɔ̍ɔ̍lī, mi̍ Mūu̍sē o̍ chu̍ā chūɛ̄īmā sāā ko̍ŋ, a̍ chūɛ̄īmā lōmndē tūmnda̍ŋ, a̍ chūɛ̄īma̍ wa̍ ndu̍ ni᷄ŋ mā hōlna᷄ŋ o̍ pūlo̍ŋ nda̍ŋ kpo̍u̍, a̍ yēmi̍i̍ hɔ᷅lle̍, a̍ bɔ̄ŋgu̍ŋ mūu̍ŋ ndo̍ŋ, a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, a̍ lɔ̄lū bā kɛ̄ndɔ̄ɔ̍ mbo̍ kɛ̄sī.

²⁶ O̍ ko̍ŋ kɔ̍ɔ̍lī, bēe̍dīi̍la̍ yɛ̍ yɛ̍la̍ nda̍ kɛ̄sī Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l o̍ kāmbɛ̍i̍yo̍ ni᷄ŋ nda̍ŋ, mi̍ Mūu̍sē chu̍ā bēe̍dīi̍la̍ la̍ŋ kpūŋgba᷄ŋ pīlɛ̍ŋ pi̍lɛ̍ŋ, mɛ̄ɛ̍ o̍ chu̍a̍ ō li̍kpi̍ŋndo̍ kpūŋgbɛ̄i̍ ī pīlɛ̍, mbo̍ chūā ō nda̍ tōōsīāā a̍ chūɛ̄īmā ɔ̄li̍fīi̍ya̍ŋ ndo̍ kpūŋgbɛ̄i̍ ī pīlɛ̍, mbo̍ chūā ō fɛ̍fɛ̍dɛ̍ɛ̍ wo̍ kpūŋgbɛ̄i̍ ī pīlɛ̍, mbo̍ hāndū la̍ŋ o̍ chūɛ̄īmā sāā ko̍ŋ chōo̍, a̍ sāā ko̍ŋ lɔ̄lū ndɔ̍ bā kɛ̄ndɔ̄ɔ̍.

²⁷ Mi̍ Mūu̍sē o̍ chu̍ā wōlɔ̄ɔ̄lā lāŋ mbo̍ dūāū la̍ŋ E̍lɔ̄ŋ nda̍ pūa̍a̍ ndūa̍a̍ o̍ lābā ma̍ hēēlū la̍ŋ chōo̍ cho̍o̍ māā sa̍lā kpe̍e̍kpe̍i̍ Mɛ̍lɛ̄ka̍ Ya̍a̍wɛ̄ɛ̄ lāchī.

²⁸ O̍ ko̍ŋ kɔ̍ɔ̍lī, mi̍ Mūu̍sē o̍ bi̍ī nda̍ wōlɔ̄ɔ̄lā lāŋ o̍ bā mbo̍ hāndū la̍ŋ o̍ ma̍āŋndo̍ chōo̍ o̍ sa̍lā lūāmāā nda̍ a̍a̍ nɔ̍ le̍ sōlīo̍o̍ wo̍ chōo̍, mbo̍ lūām nda̍ŋ a̍ sa̍lā lūāmāā kōŋ lātūlu̍ le̍ E̍lɔ̄ŋ nda̍ pūa̍a̍ ndūa̍a̍ hɛ̄līo̍o̍ māā wānāā sōlīāā lāsa̍lā. Ndu̍yɛ̍ mɛ̄ɛ̍ chūŋ sa̍lā kōŋ ō kōma̍l Mɛ̄lɛ̄ka̍ Ya̍a̍wɛ̄ɛ̄, mbo̍ hīnī kɔ̄l nyɛ̄ kɛ̄ndɛ̄ kɛ̍ndɛ̄.

²⁹ O̍ ko̍ŋ kɔ̍ɔ̍lī, mi̍ Mūu̍sē o̍ chu̍ā vɛ̄lɛ̄ mɛ̄ɛ̄mā sāā ko̍ŋ mbo̍ hēēlū ma̍ŋ o̍ bāla̍ŋ chōo̍ māā sa̍lā kpe̍e̍kpe̍i̍ Mɛ̄lɛ̄ka̍ Ya̍a̍wɛ̄ɛ̄ lāchī. Ndu̍yɛ̍ sāā ko̍ndo̍ nda̍ dīī ho̍ō le̍ E̍lɔ̄ŋ nda̍ pūa̍a̍ ndūa̍a̍ hɛ̄līo̍o̍ wo̍, mɛ̄ɛ̄mā sāa̍ ko̍ŋ Mūu̍sē ndu̍ o̍o̍ nɔ̍ ma̍ŋ ni̍, kāni̍ fo̍ndōle̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ di̍mu̍l ndu̍ ni̍ māā pɛ᷄llo̍ o̍ ndɔ̍ɔ̍ cho̍ ko̍ŋ ni̍.

³⁰ O̍ ko̍ŋ kɔ̍ɔ̍lī, mi̍ Mūu̍sē chu̍ā chūɛ̄īmā nda̍ tālā wa᷅ŋndo̍ o̍ lēbōl le̍ ndu̍ hɛ̄līo̍o̍ wa̍ŋ mā ti᷄ŋ, a̍ kōo̍ma̍ chɔ̄lū ma̍ wa̍ o̍ ma̍āŋndo̍ chōo̍ wa̍ŋ, mbō fāsāŋīāā E̍lɔ̄ŋ, mbo̍ fāsāŋā vɛ̄lɛ̄ o̍ dōma̍ so̍līāā sa̍lā E̍lɔ̄ŋ ndo̍. Mbo̍ fāsāŋīāā vɛ̄lɛ̄ pūa̍a̍ E̍lɔ̄ŋ nda̍, ndu̍yɛ̍, mbo̍ fāsāŋīāā vɛ̄lɛ̄ o̍ dōmāla̍ ndāla̍ so̍līāā lāsa̍lāla̍ŋ. Mɛ̄ɛ̍ o̍ nɛ̄īyo̍ ho̍ō ni᷄ŋ o̍ lo̍ o̍ ko̍ŋ ni̍ mbo̍ dīndī E̍lɔ̄ŋ nda̍ pūa̍a̍ ndūa̍a̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l lātūlu̍ a̍ nyɛ̄lā ndāla̍ so̍līāā lāsa̍lā la̍ŋ.

³¹ O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl E̍lɔ̄ŋ nda̍ pūa̍a̍ ndūa̍a̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ māā nūm nya̍ pūa̍a̍ nu̍mnda̍ lā nɔ̄ mī lā yāu̍ vīsīŋ tɔ̄ɔ̍ŋ mu᷅ŋ o̍ tɛ̍ndīi̍ chɔ᷅m māā Mɛ̍lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ sōndōo̍, mī lā dē mu̍ŋ lo̍ŋ lātūlu̍ a̍ bēe̍dīi̍ cho̍ o̍ kāmbɛ̍i̍yo̍ ni᷄ŋ mā sōlī sa̍lāa̍ a̍ ndu̍ le̍ wāŋndo̍ hɛ̄līo̍o̍ wo̍.

³² Ndu̍yɛ̍ vīsīo̍ŋ mu᷅ŋ a̍ bēe̍dīi̍ ko̍ŋ lātūlu̍, ō kɛ᷅ o̍ kɛ᷅ lo̍ pɛ̍, lā nɔ̄ mī lā lōm ndu̍.

³³ Ndu̍yɛ̍ lā fa̍ŋa᷄ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ chō a̍ nya̍ la̍tu̍lu̍ wo̍ sōndōo̍ le̍, lā lo̍ lo̍ŋ le̍ pālɛ̍i̍ ī ŋɔ᷄mmɛ̍ū ha̍a̍a̍ mī pālɛ̍i̍ nya̍ nɔ̄ le̍ dīndīo̍o̍ sɔ̄lāa̍ ve̍ ī chūū.

³⁴ Nyɛ̄ o̍ nyɛ̍ to̍sa̍ŋ ho̍ō na̍nu᷄ŋ, Mɛ̄lɛ̄ka̍ Ya̍a̍wɛ̄ɛ̄ pi̍la̍ ndu̍ di̍mi̍ ni̍ māā le̍nde̍ nyɛ̄ o̍ nyɛ̄ nɔ̄ ni̍ mbō tōsa̍ŋ, le̍ yɔ̄ŋndā nyāla̍ yɔ̍ɔ̍ŋnda̍ŋ fāŋāa̍.

³⁵ Lā nɔ̄ mī lā wa̍ o̍ tɛ̍ndīi̍ chɔ᷅m māā Mɛ̍lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ sōndōo̍ īdīi̍ a̍ īchɔ̄l le̍ pālɛ̍i̍ ī ŋɔ᷄mmɛ̍ū, ndu̍yɛ̍ mī lā tōsa̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nya̍ le̍ tōsāa̍. Tē lā sōli̍ Mɛ̄lɛ̄ka̍ dīōm pɛ̍, mī lā tōsa̍ nyɛ᷅ ya̍ ī di̍mu̍l ho̍ō nya̍ wo̍ le̍, lā chō pīɔ̍mndo̍ sɔ̄lā. Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l la̍ le̍ nya̍ dīmūllo̍ wo̍ cho̍ ko̍ŋ ni̍.”

³⁶ O̍ ko̍ŋ kɔ̍ɔ̍lī, mi̍ E̍lɔ̄ŋ nda̍ pūa̍a̍ ndūa̍a̍ ā tōsā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l Mūu̍sē le̍ nda̍ mā tōsa̍.