Lɛ̄vi̍ti̍kɔ̍ɔ̄ 7 - Yāu̍ Mɛ̄lɛ̄ka̍a̍

A̍ mɛ̄ɛ̍ nda̍ nɔ̄ mā sōli̍ sa̍lālā lābīōndɔ᷄ŋnda̍ŋ yɛ̍ o̍kɔ̄ɔ̄

¹ “Sāwāla̍ cho̍ a̍ sa̍lālā lābīōndɔ᷄ŋndo̍ o̍kɔ̄ɔ̄ la̍ŋ, la̍ŋ la̍ cho̍ la᷅ŋ ni̍. Ndu̍yɛ̍ lā chō sa̍lālā dīāndāā mi̍ lā hīāū la᷅ŋ kpo̍u̍.

² Chɔ̄lū nda̍ nɔ̄ le̍ sa̍lā lāpūɛ̍ɛ̍ŋndo̍ sōlīo̍o̍ wo̍, ā nɔ̄ mā dīī ndu̍ o̍ fo̍ndāŋ nda̍ dīī chɔ̍lū sa̍lā lūāmāa̍ wo̍. Tē ā dīī chɔ̄lōo̍ ho̍ō pɛ̍, ā fāsa̍ŋi̍a̍a̍ kōo̍ma̍ ndūa̍ŋ o̍ ma̍āŋndo̍ kpēŋgo᷄ŋ vēllāa̍ vēllē.

³ Ndu̍yɛ̍ chɔ̄lōo̍ ho̍ō chūɛ̄īma̍ cho̍ ndu̍ o̍ īdīāl la̍ŋ ni̍, ma̍ cho̍ ndu̍ o̍ lōmnde̍ŋ nda̍ŋ ni̍, a̍ chūɛ̄īma̍ cho̍ ndu̍ ni᷄ŋ mi̍ mā hōlnu᷄ŋ pu̍lo̍ŋ nda̍ŋ, ā nɔ̄ mā sōli̍ ma̍ŋ mā lōm ma̍ŋ o̍ ma̍āŋndo̍ chōo̍, lātūlu̍

⁴ a̍ bɔ̄ŋgu̍ŋ ndɔ̄ŋ mūu̍ŋ ndo̍ŋ, ndu̍yɛ̍ a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, a̍ yēmi̍i̍ hɔ᷅lle̍, sōlīo̍o̍ ndi̍ le̍nde̍ a̍ bɔ̄ŋgu̍ŋ mūu̍ŋ ndo̍ŋ.

⁵ Wānā so̍līāā lāsa̍lāa̍ ō nɔ̄ mbō lōm nyɔ̄ɔ̍ŋ mu᷅ŋ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Sa̍lāa̍ ho̍ō ndu̍ cho̍ sa̍lā pāāwā lābīōndɔ᷄ŋndo̍ ni̍.

⁶ Wāŋ pīāāndūa̍a̍ o̍ yu̍ŋgu̍ wānāā sōlīāā lāsa̍lāa̍ chōo̍ ki̍nɛ̍i̍, ō kɛ᷅ o̍ kɛ᷅, ō nɔ̄ di̍ mbō dē sa̍lāa̍ ho̍ō. Ndu̍yɛ̍ o̍ fo̍ndāŋ kāsīo̍o̍, lo̍ŋ ndā nɔ̄ ni̍ mā dē sa̍lāa̍ ho̍ō. Sa̍la̍ cho̍ ō dīāndāā mbo̍ hīāū kpo̍u̍ wo̍ o̍ cho̍ ni̍.

⁷ Sa̍lā nda̍ sōlī le̍ yɔ̄ŋ wɔ̍ɔ̍ŋndo̍ fāŋāa̍ wo̍, a̍ sa̍lā nda̍ sōlī tē wāŋndo̍ ō bīōndɔ᷄ŋndo̍ le̍ nyɛ̄ o̍ nɔ̍ le̍ tōsāa̍ wo̍ tōsāa̍ pɛ̍ wo̍, sāwāla̍ pi᷅lɛ̍la̍ŋ kpe̍ la̍ cho̍ le̍ sa̍lāla̍ tīɔ̍ɔ̍ŋnda̍ŋ ndāŋ ni̍. Sa̍lālā tīɔ̍ɔ̍ŋ nda̍ŋ nda᷅ŋ kpo̍u̍, chɔ̄lūāā nda̍ chō dīū le̍ la̍ŋ sōlīo̍o̍ wa̍, wānā sōlīāā lāsa̍lā cho̍ la̍ŋ sōlīo̍o̍ wo̍, ndu̍ nɔ̍ vīsīŋ mu᷅ŋ ni̍.

⁸ O̍ ko̍ŋ kɔ̍ɔ̍lī, chɔ̄lu̍ cho̍ le̍ sa̍lā lūāmāa̍ sōlīo̍o̍ wo̍ tē ā dīī chɔ̄lū kōŋ pɛ̍, wānā so̍līāā lāsa̍la̍ cho̍ sa̍lā kōŋ sōlīo̍o̍ wo̍, ndu̍ nɔ̍ yāu̍ chɔ̄lū kōŋ ni̍.

⁹ O̍ ko̍ŋ kɔ̍ɔ̍lī, sa̍lālā nyɛ̄ dīāā lāku̍lta̍ŋ lā nda̍ bɛ̄ɛ̄ndīāā na̍a̍ lu̍a̍māā lābēe̍dīi̍ya̍ la̍ŋ, a̍ lā nda̍ bɛ̄ɛ̄ndīāā o̍ hɛ̄ŋgɛ̍i̍ kpa̍yāŋndo̍ ni᷄ŋ nda̍ŋ, a̍ ō nda̍ bɛ̄ɛ̄ndīāā o̍ hɛ̄ŋgɛ̍i̍yo̍ ni᷄ŋ ndo̍, la̍ŋ nda̍ŋ ki̍nɛ̍i̍, wānā sōlīāā lāsa̍lāa̍, o̍ cho̍ wā sa̍lāa̍ sōlīo̍o̍ wo̍ ndu̍ nɔ̍ la̍ŋ ni̍.

¹⁰ O̍ ko̍ŋ kɔ̍ɔ̍lī, sa̍lā o̍ sa̍lā nyɛ̄ dīāā ku̍l, o̍ nda̍ mūūli̍āŋ a̍ māchūɛ̄ī ni̍, ɔ̄ɔ̄ mbō wa̍ ō vēsɛ̍i̍ le̍nde̍, wānāā sōlīāā lāsa̍lāa̍ a̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍, nda̍ kpo̍u̍ nɔ̍ ni̍ mā sɔ̄la̍ ndu̍. Ndu̍yɛ̍ mā pīɔ̄ūva᷅ŋ ndu̍ kpɛ̍ŋnji̍.”

A̍ sa̍lā kɔ̄l nyūlōo̍ o̍kɔ̄ɔ̄

¹¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Sa̍lālā kɔ̄l nyūlūlā wāŋnda̍ nɔ̄ mā sōli̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ la̍ŋ ki̍nɛ̍i̍, sāwāla̍ cho̍ a̍ sa̍lālā lāŋ o̍kɔ̄ɔ̄ la̍ŋ, la̍ŋ la̍ cho̍ la᷅ŋ ni̍.

¹² Tē wāŋndo̍ ō wa̍ hūnɔ̄ɔ̍ a̍ sa̍lā ba̍li̍ka̍a̍ o̍ ya̍ Mɛ̍lɛ̄ka̍ lo̍ pɛ̍, wānā ko̍ŋ ō nɔ̄ mbō hīŋ a̍ bēe̍dīi̍la̍ yɛ̍ yɛ̍la̍ŋ o̍ bā, bēe̍dīi̍ nda̍ tōōsīāā ā do̍ū yi̍i̍sīi̍ le̍, ndu̍yɛ̍ mā mūūli̍āŋ ko̍lo̍ ndɔ̄ɔ̍ a̍ chūɛ̄īmā ɔ̄li̍fīi̍ya̍ŋ ndo̍, a̍ bēe̍dīi̍ fɛ̍fɛ̍dɛ̍ɛ̍ nda̍ tōōsīāā ā do̍ū yi̍i̍sīi̍ le̍, tē ā tōōsi̍a̍a̍ ndu̍ pɛ̍ ā sūu̍ chūɛ̄īmā ɔ̄līfīi̍ya̍ŋ lēchōo̍ wo̍, a̍ ō nda̍ tōōsīāā a̍ kōlō kɛ̍ndɛ̄ kɛ̍ndɔ̄ɔ̍ mā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ ndo̍.

¹³ Tē wāŋndo̍ ō wa̍ hūnɔ̄ɔ̍ a̍ sa̍lā kɔ̄l nyūlōo̍ ho̍ō le̍ ya̍ Mɛ̍lɛ̄ka̍ ba̍li̍ka̍a̍ mēllo̍ pɛ̍, ō nɔ̄ mbō hīŋ a̍ bēe̍dīi̍ fɛ̍fɛ̍dɛ̍ɛ̍ nda̍ tōōsīāā ā do̍ū yi̍i̍sīi̍ le̍ni̍ŋ te̍ wo̍.

¹⁴ Bēe̍dīi̍la̍ yɛ̍ yɛ̍la̍ŋ nda̍ŋ ō kɛ᷅ o̍ kɛ᷅ ō nɔ̄ mbō yɔ̄ŋgu̍ kpūŋgbɛ̄i̍ pīlɛ̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā kē. O̍ ko̍ŋ kɔ̍ɔ̍lī, chɔ̄lū nda̍ chō dīyɔ̄ɔ̄ le̍ sa̍lāa̍ ho̍ō sōlīo̍o̍ wo̍, wānā so̍līāā lāsa̍la̍ cho̍ kōo̍ma̍ chɔ̄lū kōŋ fāsa̍ŋi̍a̍a̍ o̍ ma̍āŋndo̍ wo̍, ndu̍ nda̍ nɔ̄ ni̍ mā ke̍ bēe̍dīi̍ ko̍ŋ.

¹⁵ Ndu̍yɛ̍ chɔ̄lū nda̍ chō ko̍ŋ di̍yɔ̄ɔ̄ le̍ sa̍lā kɔ̄l nyūlōo̍ sōlīo̍o̍ le̍ Mɛ̄lɛ̄ka̍ ba̍li̍ka̍a̍ mēllo̍ wo̍, vīsīŋ ndɔ᷄ŋ ā nɔ̄ mā dē mu̍ŋ pāa̍le̍ le̍ŋ kpo̍u̍, ŋ̄ nɔ̍ mī ŋ̄ lɔ᷄l ku̍ya̍ le̍.

¹⁶ Kɛ̍ tē ō wa̍ pɛ̍ māā sa̍lā wāŋndo̍ chu̍a̍ būŋgɛ̄i̍ yo̍ māā ndu̍ o̍ hi᷅ŋ sōlīo̍o̍ ni̍, ɔ̄ɔ̄ mbō wa̍ māā sa̍lā wāŋndo̍ pīla̍ o̍ kɛ̍ɛ̍si̍a̍a̍ a̍ kɔ̄l ndɔ̄ɔ̍ wo̍ māā ndu̍ o̍ hi᷅ŋ sōlīo̍o̍ ni̍ pɛ̍, vīsīŋ sa̍lāŋ mu᷅ŋ ā dīā mu̍ŋ pāa̍le̍ nda̍ chō le̍ŋ sa̍lā kōŋ sōlī le̍ŋ, ndu̍yɛ̍ ŋ̄ kɛ᷅ kɛ̍ lo̍ ku̍ya̍ pɛ̍, ā dīā mu̍ŋ vɛ̄lɛ̄ dīi̍mā ndɔ̄ɔ̍.

¹⁷ Kɛ̄ tē vīsīŋ mu᷅ŋ ŋ̄ chūu̍ di̍o̍ o̍ pālɛ̍i̍ ŋi̍i̍ŋīī kēŋ bɛ̄ŋgu̍ le̍, mɛ̄ɛ̍ pāa̍le̍ ya̍a̍ ndɔ̄le̍ŋ ni᷅ŋ, ā nɔ̄ mā lōm mu̍ŋ kpo̍u̍.

¹⁸ Sa̍lā kɔ̄l nyūlōo̍ ho̍ō, vīsīŋ ndɔ᷄ŋ tē wānā o̍ wānā o̍ de᷅ mu̍ŋ o̍ pāa̍le̍ ya̍a̍ ndɔ̄le̍ŋ chōo̍ pɛ̍, mɛ̄ɛ̍ wāna̍ yɔ̍ŋgu̍ sa̍lā kōŋ ndo̍, I̍ chɛ̍l sa̍lā ndɔ̄ ko̍ŋ te̍. Kɛ̄lɛ̄ŋgāā ni᷅ŋ te̍ mbō sɔ̄la̍ ya̍ nyɛ̄ o̍ bā le̍ ke̍ŋ. Ndu̍yɛ̍ mī sa̍lā kōŋ ō sīmnu᷄ŋ nyɛ᷅ nɔ̄ɔ̄lɛ̍i̍ ya̍ o̍ hɔ̄l. Ndu̍yɛ̍ wānā o̍ wānā de᷅ vīsīŋ mu᷅ŋ o̍ pāa̍le̍ ya̍a̍ ndɔ̄le̍ŋ chōo̍ pɛ̍, mɛ̄ɛ̍ ō chō dɛ̍nɛ̍ pa̍lāa̍ sɔ̄lā le̍ ke̍ŋ.

¹⁹ O̍ ko̍ŋ kɔ̍ɔ̍lī, tē lā wa̍ sa̍lāa̍ sōlīo̍o̍ o̍ ya̍ Mɛ̍lɛ̍ka̍ lo̍ pɛ̍, mī vīsīī nya̍ chō sa̍lā kōŋ sōlīo̍o̍ ve̍ ī pīla̍ŋ nyɛ̍ o̍ nyɛ̍ cho̍ ō nɔ̄ɔ̄lɛ̍i̍ ya̍ o̍ hɔ̄l pɛ̍, vīsīī kēŋ lā nɔ̍ mī lā dē ndi̍ le̍, lā nɔ̄ mī lā lōm ndi̍. Kɛ̍ ŋ̄ tɔ᷄ŋ mu̍ŋ mu̍ŋ, wānāa̍ cho̍ ā dīāndāā ya̍ Mɛ̍lɛ̄ka̍ o̍ hɔ̄l la̍ nda̍ nɔ̍ ni̍ mā dē mu̍ŋ.

²⁰ Kɛ̍ sa̍lā kɔ̄l nyūlū nda̍ chō ho̍ō sōlī o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍, vīsīŋ sa̍lāŋ mu᷅ŋ, wānāā sōlīāā lāsa̍lāa̍ ō kɛ᷅ kɛ̄ tē o̍ ve̍ o̍ dīāndāā le̍ mbō dē vīsīo̍ŋ mu᷅ŋ pɛ̍, lā tōu̍ ndu̍ mbō fūla̍ wānāā ndūa̍a̍ tɛ̄ɛ̄ŋ po̍.

²¹ Ndu̍yɛ̍ wānā o̍ wāna̍ pi̍la̍ŋ nyɛ̍ cho̍ ō nɔ̄ɔ̄lɛ̍i̍ ya̍ o̍ hɔ̄l lo̍ pɛ̍, ō wa̍ di̍a̍llīi̍ cho̍ īnɔ̄ɔ̄lɛ̍i̍ wāna̍ chi̍e̍e̍ o̍ ŋ̄dīāl le̍ ni̍, ō wa̍ vi̍sī cho̍ o̍ di̍a̍ndāā ya̍ o̍ hɔ̄l te̍ ni̍, kɛ̄lɛ̄ŋgāā o̍ wa̍ nyɛ᷅ o̍ nyɛ̄ cho̍ ō nɔ̄ɔ̄lɛ̍i̍ ya̍ Mɛ̄lɛ̄ka̍ o̍ hɔ̄l, mbō dē vīsīī sa̍lā kɔ̄l nyūlū cho̍ ho̍ō ō yɔ̄ŋga᷄ŋ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ pɛ̍, ā nɔ̄ mā tōū ndu̍ mā sōli̍ ndu̍ wānāā ndūa̍a̍ tɛ̄ɛ̄ŋ po̍”

²² O̍ ko̍ŋ kɔ̍ɔ̍lī, mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²³ “Di̍mu̍l I̍sɔ̄lūɛ̍i̍ya̍ māā nyɛ̄ ya̍ I̍ dīmi̍ wo̍ cho̍ ho̍ō ni̍. Nāū ni̍, chūīŋ ni̍, sāā ni̍, lā di̍ā chūɛ̄īmā nda᷄ŋ te̍.

²⁴ Chɔ̄lū o̍ chɔ̄lū vi᷅ a̍ bā ndɔ̄ pɛ̍, ɔ̄ɔ̄ mī vīsī bīyāa̍ dīī ndu̍, chɔ̄lū kōŋ chūɛ̄īmā ndūa̍ŋ lā di̍ā ma̍ŋ te̍, kɛ̍ lā sōlī kpe̍ku̍ che̍le̍ŋ a̍ ma̍ŋ.

²⁵ Wānā o̍ wāna̍ de᷅ chūɛ̄īmā chɔ̄lū mā nda̍ lūām sa̍lāa̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ wa̍ŋ pɛ̍, wānā ko̍ŋ ā nɔ̄ mā tōū ndu̍ mā sōli̍ ndu̍ wānāā ndūa̍a̍ tɛ̄ɛ̄ŋ po̍.

²⁶ Ndu̍yɛ̍ o̍ ko̍ŋ kɔ̍ɔ̍lī, yōū o̍ yōū, a̍ chɔ̄lū o̍ chɔ̄lu̍ nɔ̍ bɔ̄ɔ̄la̍ŋ, a̍ chɔ̄lū o̍ chɔ̄lū chēle̍ŋ, bā o̍ bā nya̍ wa̍ īchāli̍ pɛ̍ lā di̍ā kōo̍ma̍ nda᷄ŋ te̍.

²⁷ Wānā o̍ wāna̍ tɛ̍ɛ̍mbu̍u̍ sāwāa̍ ho̍ō pɛ̍, ā nɔ̄ mā tōū ndu̍ mā sōli̍ ndu̍ wānāā ndūa̍a̍ tɛ̄ɛ̄ŋ po̍.”

²⁸ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍ mbo̍ dīmūl ndu̍ āā,

²⁹ “Di̍mu̍l wāŋnda̍ I̍sɔ̄lūɛ̍i̍ māā wānā o̍ wāna̍ hi᷅ŋ sa̍lā kɔ̄l nyūlōo̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, wānā ko̍ŋ ō nɔ̄ mbō chu̍a̍ sa̍lāa̍ kōŋ ō ti᷄ŋ mbō yɔ̄ŋgu̍ ndu̍ māā kē o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍.

³⁰ Wānā ko̍ŋ ndu̍ pi̍la̍ nɔ̍ ni̍ mbō chūa̍ sa̍lā ho̍ō o̍ lābā mbō hīŋ a̍ ndu̍ māā sa̍lā lūāmāā o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Chɔ̄lū nda̍ chō dīyɔ̄ɔ̄ le̍ sa̍lā kōŋ sōlīo̍o̍ wo̍, wānā ko̍ŋ ō nɔ̄ mbō chūa̍ chūɛ̄īmā chɔ̄lū kōŋ a̍ mɛ̄ɛ̄mā chɔ̄lū kōŋ lātūlu̍, mbō hīŋ a̍ ma̍ŋ le̍ sa̍lāa̍ sōlīo̍o̍ ya̍ Mɛ̍lɛ̄ka̍ lāchī. Tē ō hīŋ a̍ ma̍ŋ pɛ̍, ō chu̍a̍ ni̍ko̍ mɛ̄ɛ̄mā chɔ̄lū kōŋ ō he̍e̍lū ma̍ŋ o̍ bāla̍ŋ chōo̍ māā sa̍lā kpe̍e̍kpe̍i̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍.

³¹ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō bīī chūɛ̄īmā chɔ̄lū kōŋ mbō lōm ma̍ŋ o̍ ma̍āŋndo̍ chōo̍. Kɛ̍ mɛ̄ɛ̄mā chɔ̄lū kōŋ, ma̍ŋ ma̍ŋ E̍lɔ̄ŋ nda̍ pūa̍a̍ ndūa̍a̍ le̍ nda̍ ma̍ cho̍ ni̍.

³² Ndu̍yɛ̍, chɔ̄lū nda̍ chō ko̍ŋ di̍yɔ̄ɔ̄ le̍ sa̍lā kɔ̄l nyūlōo̍ sōlīo̍o̍ wo̍, wānā so̍līāā lāsa̍lāa̍, o̍ cho̍ sa̍lā kōŋ sōlīo̍o̍ wo̍ ndu̍ nya̍ kē lɔ̄lū bā kɛ̄ndɔ̄ɔ̍ ni̍. Kīo̍o̍ o̍ ndɔ̍ɔ̍ cho̍ ko̍ŋ ni̍.

³³ Wānāā sōlīāā lāsa̍lāa̍ a̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍, ā so̍lī chūɛ̄īmā chɔ̄lūa̍a̍ a̍ kōo̍ma̍ chɔ̄lūa̍a̍ sa̍lālā kɔ̄l nyūlū la̍ŋ nda̍, ā nɔ̄ mā ke̍ nda̍ lɔ̄lū bā kɛ̄ndɔ̄ɔ̍, o̍ nda̍a̍ cho̍ ko̍ŋ ni̍.

³⁴ Mɛ̄ɛ̄mā nda̍ chō ma̍ŋ he̍e̍lū o̍ bāla̍ŋ chōo̍ ya̍ Mɛ̍lɛ̄ka̍ lāchī wa̍ŋ ni̍, a̍ lɔ̄lū nda̍ chō ko̍ŋ yɔ̍ŋgū o̍ ya̍ lo̍ māā sa̍lā kɔ̄l nyūlū wō, mu̍ŋ ya̍ ī hɛ̍li̍ ni̍ mi̍ ŋ̄ wā le̍ E̍lɔ̄ŋ nda̍ pūa̍a̍ ndūa̍a̍ a̍ cho̍ wānāā sōlīāā lāsa̍lāa̍ wa̍. Te̍le̍ŋ o̍ te̍le̍ŋ wāŋnda̍ I̍sɔ̄lūɛ̍i̍ ā sōli̍ sa̍lā kɔ̄l nyūlōo̍ o̍ ya̍ lo̍ pɛ̍, vīsīŋ E̍lɔ̄ŋ nda̍ pūa̍a̍ ndūa̍a̍ ā nɔ̄ mā sɔ̄la̍ o̍ sa̍lā kōŋ ni᷄ŋ ndo̍ŋ mu̍ŋ cho̍ mu̍ŋ ni̍.

³⁵ Pūa̍a̍ E̍lɔ̄ŋ nda̍, sa̍lā kɔ̄l nyūlū nda̍ lūām o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍, pɛ᷄llo̍ o̍ nda̍a̍ cho̍ ko̍ŋ ni̍. Bōōndi̍i̍ nda̍ sɔ̄la̍ hɛ̄līo̍o̍ māā wānāā sōlīāā lāsa̍lā ve̍, o̍ ko̍ŋ ya̍ I̍ di̍mi̍ ni̍ māā, pɛ᷄l nda̍ nɔ̄ le̍ sɔ̄lāa̍ wo̍ cho̍ ko̍ŋ ni̍.

³⁶ Pāa̍le̍ nda̍ sɔ̄la̍ hɛ̄līo̍o̍ māā wānāā sōlīāā lāsa̍lā le̍ŋ, o̍ pāa̍le̍ le̍ŋ ya̍ I̍ di̍mūl wāŋnda̍ I̍sɔ̄lūɛ̍i̍ ni̍ māā le̍ te̍le̍ŋ o̍ te̍le̍ŋ, tē ā sōli̍ sa̍lā kɔ̄l nyūlōo̍ pɛ̍, māā pɛ᷄l wāŋnda̍ ha̍ā ā nɔ̄ mā sɔ̄la̍ wo̍ ndu̍ cho̍ ko̍ŋ ni̍, ha̍a̍a̍ mbō kūɛ̄ a̍ yu̍ŋgu̍la̍ ndāla̍ŋ lāchī kɛ᷅.”

³⁷ Sāwāla̍ŋ nda᷅ŋ la̍ cho̍ le̍ sa̍lālā na̍a̍ ŋ̄ dīmi̍ la᷅ŋ nda᷅ŋ ni̍, sa̍lā lūāmāa̍ ni̍, a̍ sa̍lā nyɛ̄ dīāā ku̍llo̍, a̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍, a̍ sa̍la̍ so̍līŋ le̍ bīōndɔ᷄ŋnda̍ŋ ndo̍, a̍ sa̍la̍ cho̍ le̍ wāŋndo̍ hɛ̄līo̍o̍ le̍ kpe̍ku̍ Mɛ̄lɛ̄ka̍a̍ wo̍, a̍ sa̍lā kɔ̄l nyūlōo̍.

³⁸ Pāa̍le̍ wāŋnda̍ I̍sɔ̄lūɛ̍i̍ ā wa̍ o̍ Pēmbīī Sa̍a̍nāīve̍ chōo̍ o̍ lɛ̄ŋndē po̍lte̍ŋ ni᷄ŋ nde̍ŋ, pāa̍le̍ le̍ŋ Mɛ̄lɛ̄ka̍ Ya̍a̍wɛ̄ɛ̄ dīmu̍l Mūu̍sē ni̍ le̍ mbō dīmu̍l wāŋnda̍ I̍sɔ̄lūɛ̄ī mā kūɛ̄ a̍ sa̍lālā ndāla̍ŋ o̍ Pēmbīī Sa̍a̍nāīve̍ chōo̍.