Lɛ̄vi̍ti̍kɔ̍ɔ̄ 6 - Yāu̍ Mɛ̄lɛ̄ka̍a̍

¹ Mi̍ Mɛ̄lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍, mbo̍ dīmūl ndu̍ āā,

^2-3 “Tē o̍ wa̍ pɛ̍ mī wāŋndo̍ chāa̍ŋ ndɔ̄ o̍ ke̍ ndu̍ nyɔ̄ɔ̍ le̍ kɛ̄sīo̍o̍, kɛ̍ mbō dīmi̍ chōōla̍ŋ māā ā chīīmbu̍u̍ ndu̍ nyɛ̄ kōŋ o̍ bā. Ɔ̄ɔ̄ mī wāŋndo̍ chāa̍ŋ ndɔ̄ le̍ndu̍l ndu̍ nyɔ̄ɔ̍ o̍ bā, kɛ̍ mbō dē nyɛ̄ kōŋ a̍ lēdīɔ̄ɔ̄mū. Ɔ̄ɔ̄ mī wāŋndo̍ chīīmbu̍u̍ nyɛ̍ chāa̍ŋ ndɔ̄ɔ̍, ɔ̄ɔ̄ mbō dē nyɛ̄ pi̍la̍a̍ a̍ lēdīɔ̄ɔ̄mū. Ɔ̄ɔ̄ mī wāŋndo̍ nyɛ̍ chāa̍ŋ ndɔ̄ɔ̍ ō lo̍, ndu̍yɛ̍ mbō sāālu̍ŋ nyɛ᷅ kōŋ, kɛ̍ tē ā nyūna̍ ndu̍ pɛ̍ ō vīīnu̍ŋ māā ō chu̍e̍ nyɛ᷅ kōŋ te̍, o̍ ko̍ŋ ō mēna̍ŋ se᷅ndi̍ sɔ̄ŋ cho̍o̍ wo̍. Ɔ̄ɔ̄ mī wāŋndo̍ chu̍a̍ būŋgɛ̄i̍ ī kālā ka̍lā ya̍ Mɛ̄lɛ̄ka̍ o̍ hɔ̄l, kɛ̍ mbō pēēlu̍ bu̍ŋgɛ̄ī kēŋ te̍.

⁴ Sɔ̄ɔ̍ŋ mu᷅ŋ ki̍nɛ̍i̍, tē wāŋndo̍ tōsa̍ mu̍ŋ pɛ̍, ō sɔ̄la̍ yāālāa̍ māā yɔ̄ŋ wɔ̄ɔ̍ŋndo̍ o̍ to̍sa̍ ni̍. Tē nyɔ̄ɔ̍ nda̍ ke̍ ndu̍ kɛ̄sīo̍o̍ ni̍, ɔ̄ɔ̄ mi̍ nyɛ̄ pi̍la̍a̍ ō lō mbo̍ sāālu᷄ŋ, kɛ̍ mbo̍ vīīnu᷄ŋ, ō nɔ̄ mbō mīŋgi̍ nyɛ̄ kōŋ sɔ̍ŋgɔ̍ɔ̍.

⁵ Nyɛ̄ o̍ nyɛ̄ o̍ bi̍ī wāŋndo̍ o̍ bā kɛ̍ mbo̍ mēna᷄ŋ se᷅ndi̍ sɔ̄ŋ cho̍o̍ wo̍, ō nɔ̄ mbō mi̍ŋgi̍ nyɛ̄ kōŋ sɔ̍ŋgɔ̍ɔ̍. Tē ō wa̍ pɛ̍ māā nyɛ̄ kōŋ kɛ̄mɛ̄ o̍ cho̍ ni̍, ō nɔ̄ mbo̍ hāndu̍ bi̍dīi̍ŋ lēchōo̍. Ndu̍yɛ̍ wāna̍ nyɔ̄ɔ̍ o̍ bā kpe̍e̍kpe̍i̍ o̍ nɔ̍ ni̍ mbō mīŋgi̍ nyɛ̄ kōŋ sɔ̍ŋgɔ̍ɔ̍. Pāa̍le̍ o̍ nɔ̍ le̍ sa̍lāa̍ sōlīo̍o̍ le̍ yɔ̄ŋ ndɔ̄ wɔ̍ɔ̍ŋ kōŋ nde̍ŋ, pāa̍le̍ le̍ŋ kpe̍e̍kpe̍i̍ o̍ nɔ̍ ni̍ mbō mīŋgi̍ nyɛ̄ pi̍la̍ kōŋ sɔ̍ŋgɔ̍ɔ̍.

^6-7 Wānā ko̍ŋ ō nɔ̄ mbō bīī sāā fɔ̍ŋndɔ̍ɔ̍ o̍ nɔ̍ sɔ᷅ŋ o̍ sɔ̄ŋ te̍ wo̍ chɔ̄lūāā ndūa̍a̍ tɛ̄ɛ̄ŋ, mbō hīŋ a̍ ndu̍ o̍ wānā so̍līāā lāsa̍lāa̍ lo̍, mī wānā so̍līāā lāsa̍lāa̍ ō sōli̍ sāā ko̍ŋ sa̍lāa̍ le̍ yɔ̄ŋ wɔ̄ɔ̍ŋ wānā ko̍ŋ ō tōsa̍ ko̍ŋ ō sīna̍ le̍ wo̍. O̍ ko̍ŋ mī ya̍ Mɛ̍lɛ̄ka̍ ma᷄l wānā ko̍ŋ le̍ yɔ̄ŋ wɔ̄ɔ̍ŋ o̍ to̍sa̍ mbo̍ wā ō yāālāā ya̍ Mɛ̍lɛ̄ka̍ o̍ hɔ̄l le̍ dɛ̍nɛ̍ pa̍lāa̍ sɔ̄lāa̍ wo̍. Ndu̍yɛ̍ chɔ̄lōo̍ ho̍ō ba̍ā ndɔ̄ɔ̍ ō nɔ̄ mbo̍ wa̍ mɛ̄ɛ̍ ba̍ā chɔ̄lōo̍ ō chō ō chɛ̄la᷅ŋ nya̍ tɛ̄ɛ̄ŋ yɛ̍.”

A̍ sa̍lālā lūāmāā la̍ŋ o̍kɔ̄ɔ̄

⁸ O̍ ko̍ŋ kɔ̍ɔ̍lī, mi̍ Mɛ̍lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍ mbo̍ di̍mūl ndu̍ āā,

⁹ “Di̍mu̍l E̍lɔ̄ŋ nda̍ pūa̍a̍ ndūa̍a̍ māā sāwāla̍ ya̍ Mɛ̍lɛ̄ka̍ dɔ̄ū a̍ sa̍lā lūāmāa̍ o̍kɔ̄ɔ̄ la̍ŋ, la̍ cho̍ la᷅ŋ ni̍. Tē lā wa̍ sa̍lā lūāmāa̍ sōlīo̍o̍ o̍ ma̍āŋndo̍ chōo̍ pɛ̍, sa̍lā lūāmāā kōŋ ō nɔ̄ mbō wa̍ o̍ ma̍āŋndo̍ tɛ̄ɛ̄ŋ kpe̍e̍kpe̍i̍ mī yīŋnde̍ŋ lē lo̍ lēbɛ̄ŋgu̍ ha̍a̍ mī pāa̍le̍ŋ lē sɛ̄ dīi̍mā ndɔ̄ɔ̍.

¹⁰ Tē pāa̍le̍ŋ le̍ sɛ̄ pɛ̍, wānā so̍līāā lāsa̍lāa̍ ō wōōnu̍ŋ nyɛ᷅lā ndɔ̄la̍ so̍līāā lāsa̍lāla̍ŋ, tē ō wōūnu̍ŋ pɛ̍ do᷅mā le̍bɛ̍ŋgo̍o̍ ō wōūnu̍ŋ do᷅mā vi̍lɛ̄īyo̍ lēchōo̍. O̍ ko̍ŋ kɔ̍ɔ̍lī, ō kɔ̍ ko̍o̍ndīāā pūltā sa̍lā lūāmāā kōŋ o̍ ma̍āŋndo̍ chōo̍ ō dīī la̍ŋ o̍ ma̍āŋndo̍ īkɛ̄i̍ lo̍ŋ.

¹¹ Tē ō dīī la̍ŋ lo̍ŋ pɛ̍, ō sōli̍ nyɛ̄la̍ cho̍ ndu̍ la̍ŋ le̍kɔ̍ɔ̍ la̍ŋ, ō wōūnu̍ŋ nyɛ̍lā chēle̍ŋ, o̍ ko̍ŋ kɔ̍ɔ̍lī, ō kɔ̄ndū pūltā lāŋ o̍ kūɛ̄ a̍ la̍ŋ o̍ dɔ̍ɔ̍ŋgɔ̍ nya̍ chō ko̍ŋ ndo̍ da̍ŋga̍la̍ o̍ fo̍ndā dīāndāa̍ ō cho̍ te̍ŋge̍le̍ŋ ndo̍.

¹² Yīŋnde̍ cho̍ o̍ ma̍āŋndo̍ ho̍ō chōo̍ le̍ŋ lē nɔ̍ mī lē nyu᷄m te̍, lē nɔ̄ mī lē wa̍ sānde̍i̍ le̍ te̍le̍ŋ o̍ te̍le̍ŋ. Le̍la̍ŋ īdīi̍ o̍ īdīi̍ wānā so̍līāā lā sa̍lāa̍ ō nɔ̄ mbō chɔ̄ɔ̄lu̍ yɔ̄mnde̍ dɔ̄wɔ̄ɔ̄ o̍ yīŋ, o̍ ko̍ŋ kɔ̍ɔ̍lī, mbō bɛ̄ɛ̄ndi̍a̍a̍ sa̍lālā lūāmāālā nɔ̍ mī lā sōli̍ŋ pa̍a̍le̍ le̍ŋ nda̍ŋ o̍ ma̍āŋndo̍ chōo̍. O̍ ko̍ŋ kɔ̍ɔ̍lī, chɔ̄lu̍ cho̍ dīīnɔ᷄ŋ le̍ sa̍lā kɔ̄l nyūlōo̍ sōlīo̍o̍ wo̍, mbō lōm chūɛ̄īmā chɔ̄lū kōŋ o̍ ma̍āŋndo̍ chōo̍.

¹³ Le̍ te̍le̍ŋ o̍ te̍le̍ŋ yīŋnde̍ŋ lē nɔ̄ mī lē wa̍ sānde̍i̍ o̍ ma̍āŋndo̍ ho̍ō chōo̍, lē nɔ̍ mī lē nyu᷄m te̍.”

Sāwāa̍ a̍ sa̍lālā ku̍lta̍ŋ o̍kɔ̄ɔ̄

¹⁴ Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Sāwāa̍ a̍ sa̍lā nyɛ̄ dīāā ku̍llo̍ o̍kɔ̄ɔ̄ ndu̍ cho̍ ho̍ō ni̍. Pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍, nda̍ nɔ̍ ni̍ mā sōli̍ sa̍lāa̍ ho̍ō o̍ ma̍āŋndo̍ lāchī o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍.

¹⁵ Wāna̍ cho̍ wā sa̍lāla̍ŋ sōlīo̍o̍ a̍ te̍le̍ŋ ko̍ŋ ndo̍, ō nɔ̄ mbō kɔ̄ndū kōlō tānā kōŋ bāa̍ cha̍, o̍ cho̍ ko̍ŋ o̍ mūūli̍āŋ a̍ chūɛ̄īmā ɔ̄li̍fīi̍ya̍ŋ ndo̍, mbō lōm ndu̍ o̍ ma̍āŋndo̍ chōo̍ lātūlu̍ a̍ nyɛ̄m chūŋ kɛ̄ndɛ̄ŋ mu᷅ŋ kpo̍u̍. Tē chūŋ sa̍lā kōŋ ō kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

¹⁶ Tē wānā so̍līāā lāsa̍lāa̍ ō sōli̍ kōlo̍ bā cha̍ kōŋ sa̍lāa̍ pɛ̍, ō tɔ᷄ cho̍ lō wo̍, E̍lɔ̄ŋ nda̍ pu̍a̍a̍ ndūa̍a̍ nyɛ̄ ndā di̍a̍a̍ cho̍ ko̍ŋ ni̍. Ndu̍yɛ̍ tē ā wa̍ kōlōo̍ ho̍ō bɛ̄ɛ̄ndīa̍a̍ pɛ̍, ā du̍a̍ū yi̍i̍sīi̍ o̍ yi̍i̍sīi̍ le̍ni̍ŋ te̍. Ndu̍yɛ̍, ā nɔ̄ mā dē nyɛ̄ dīa̍a̍ ho̍ō o̍ fo̍ndā kāsīo̍o̍ o̍ la̍u̍ ba̍lu̍ Tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍.

¹⁷ Kōlōo̍ ho̍ō tē ā wa̍ ndu̍ bɛ̄ɛ̄ndīa̍a̍ pɛ̍, ā nɔ̍ mā dɔ̄ū yi̍i̍sīi̍ o̍ yi̍i̍sīi̍ le̍ni̍ŋ te̍. Sa̍lā lūāmāā nda̍ sōli̍ o̍ ya̍ Mɛ̍lɛ̍ka̍ lo̍ wo̍, o̍ nda̍a̍ cho̍ ko̍ŋ ni̍, ō ya̍ I̍ ke̍ nda̍ wo̍. Ndu̍yɛ̍ ō ya̍ I̍ ke̍ ko̍ŋ E̍lɔ̄ŋ nda̍ pūa̍a̍ ndūa̍a̍ wo̍, ndu̍ cho̍ sa̍lā kāsī kpe̍e̍kpe̍i̍yo̍ ni̍, mɛ̄ɛ̍ i̍ cho̍ nu̍a̍ā a̍ sa̍la̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍, a̍ sa̍lā bīōndɔ᷄ŋndo̍ yɛ̍ ko̍ni̍.

¹⁸ Pūa̍a̍ fu̍la̍ o̍ pūlāle̍ E̍lɔ̄ŋ nde̍ŋ chōo̍ wa̍ ki̍nɛ̍i̍, chɔ̍ŋ a̍ te̍le̍ŋndo̍ ho̍ō mbō kūɛ̄ a̍ yu̍ŋgu̍la̍ ndāla̍ŋ lāchī kɛ᷅, nda̍ ko̍ni̍ nɔ̍ ni̍ mā dē nyɛ̍ dīāā sa̍lā ku̍llo̍ ho̍ō. Kāni̍ fo̍ndōle̍, sa̍lā nyɛ̄ dīāā ku̍l nda̍ lūām Yā Mɛ̄lɛ̄ka̍ Ya̍a̍wɛ̄ɛ̄ lo̍ wo̍, ō tɔ᷄ lo᷅ wo̍ o̍ nda̍a̍ cho̍ ko̍ŋ ni̍. Ndu̍yɛ̍ ō fu̍la̍ o̍ pūa̍a̍ E̍lɔ̄ŋ nda̍ kɔ̄ɔ̄lī, wānā o̍ wānā pi̍la̍ŋ nyɛ̍ dīāā sa̍lā nda̍ chō ko̍ŋ yɔ̍ŋgū le̍ nda̍ wo̍ pɛ̍, mɛ̄ɛ̍ ō tɛ̄ɛ̄mbu̍u̍ sāwāa̍ ya̍ Mɛ̍lɛ̍ka̍ o̍ hɔ̄l.”

¹⁹ O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hīāū lāchī a̍ sūɛ̍i̍ nāa̍ Mūu̍sē chu̍a̍, mbo̍ dīmūl ndu̍ āā,

²⁰ “Chɔ̍ŋ a̍ E̍lɔ̄ŋ mbō kūɛ̄ a̍ pūa̍a̍ ndūa̍a̍, pāa̍le̍ nda̍ wa̍ ō pīlɛ̍ hɛ̄līo̍o̍ pɛ̍ māā wānā so̍līāā lāsa̍lāa̍, sa̍lālā wānā ko̍ŋ ō nɔ̄ mbō sōli̍ la̍ŋ, la̍ŋ la̍ cho̍ ni̍. Ō nɔ̄ mbō hīŋ a̍ kōlō kɛ̄ndɛ̄ kɛ̍ndɔ̄ɔ̍ sa̍lāa̍ pa᷅ŋnda̍ŋ lā tīɔ̍ɔ̍ŋ nāa̍ ya̍ Mɛ̄lɛ̄ka̍ Ya̍a̍wɛ̄ɛ̄ chu̍a̍. Sa̍lā nyɛ̄ dīāā ku̍llo̍ bɛ̍ɛ̍, nu̍a̍ā ko̍ni̍ nda̍ nɔ̄ ni̍ mā tūu̍ ndu̍. Tē ā sōli̍ pɛ̍ o̍ ti̍ŋ sa̍lāa̍ īdīi̍yo̍, a̍ si̍o̍u̍ ō tɔ̄ɔ̍ sa̍lāa̍ sōlī a̍ fīti̍līo̍o̍.

²¹ Kōlōo̍ ho̍ō tē ā wa̍ ndu̍ bɛ̄ɛ̄ndīa̍a̍ bēe̍dīi̍yo̍ pɛ̍, ā nɔ̄ mā bīŋu̍la᷅ŋ ndu̍ a̍ chūɛ̄īmā ɔ̄li̍fīi̍ya̍ŋ o̍ hɛ̄ŋgɛ̍i̍ kpa̍yāŋdo̍ ni᷄ŋ. O̍ ko̍ŋ kɔ̍ɔ̍lī, mā yīmi̍ yi̍mi̍ bēe̍dīi̍ nda̍ chō ko̍ŋ bɛ̍ɛ̍ndīāā wo̍ kpūŋgba᷄ŋ. Tē ā chīi̍ ndu̍ bɛ̄ɛ̄ndīāā pɛ̍, ā chūa̍ ndu̍ ā sōli̍ ndu̍ sa̍lāa̍ māā sa̍lā nyɛ̄ dīāā ku̍l o̍ ya̍ Mɛ̍lɛ̄ka̍ lo̍. Tē chūŋ kōŋ ko̍ma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

²² Māsa̍ wānāā sōlīāā lāsa̍lāa̍, o̍ fu̍lā o̍ pūa̍a̍ E̍lɔ̄ŋ nda̍ tɛ̄ɛ̄ŋ ndo̍, ndu̍ nɔ̍ ni̍ mbō bɛ̄ɛ̄ndi̍a̍a̍ sa̍lāa̍ ho̍ō. Chɔ̍ŋ a̍ te̍le̍ŋ ndo̍ ho̍ō mbō kūɛ̄ a̍ lāchī kɛ̍, nyɛ̄ nda̍ nɔ̄ mā wa̍ tōsāa̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍ fɛ̍ɛ̍ŋ a̍ fɛ̍ɛ̍ŋ ndo̍, ndu̍ cho̍ ko̍ŋ ni̍. Ndu̍yɛ̍ sa̍lāa̍ ho̍ō ā nɔ̄ mā lōm ndu̍ kpo̍u̍ o̍ ma̍āŋndo̍ chōo̍.

²³ Nyɛ̄ dīa̍a̍ o̍ nyɛ̄ dīāā ku̍l wānā so̍līāā lāsa̍lāa̍ ō yɔ̄ŋgu̍ sa̍lāa̍ pɛ̍, ō lōmnu᷄ŋ kpo̍u̍, ō nɔ̍ mbō dēnu᷄ŋ te̍.”

Sa̍lāla̍ŋ le̍ yɔ̄ŋ wɔ̄ɔ̍ŋndo̍ fāŋāa̍

²⁴ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²⁵ “Di̍mu̍l E̍lɔ̄ŋ nda̍ pūa̍a̍ ndūa̍a̍ māā sāwāla̍ ya̍ Mɛ̄lɛ̄ka̍ dɔ̄ū a̍ sa̍lāla̍ fa̍ŋā yɔ̄ŋ wɔ̄ɔ̍ŋndo̍ o̍kɔ̄ɔ̄ la̍ŋ, la̍ŋ la̍ cho̍ la᷅ŋ ni̍. Chɔ̄lū nda̍ nɔ̄ le̍ sa̍lā fāŋā yɔ̄ŋ wɔ̄ɔ̍ŋndo̍ wo̍, ā nɔ̄ mā dīī ndu̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī, nāa̍ chɔ̄lu̍ cho̍ le̍ sa̍lā lūāmāa̍ wo̍ ō nɔ̄ le̍ dīīnɔ᷄ŋ wa̍. Kāni̍ fo̍ndōle̍, sa̍lā nda̍ chō ho̍ō sōlī a̍ chɔ̄lōo̍ ho̍ō wo̍, sa̍lā dīāndāa̍ hi̍o̍u̍ kpo̍u̍ wo̍ o̍ cho̍ ni̍.

²⁶ Wānā so̍līāā lāsa̍lāa̍ o̍ cho̍ sa̍lāa̍ ho̍ō sōlī wo̍, ndu̍ pīlɛ̍ kpe̍ nɔ̍ ni̍ mbō dē sa̍lāa̍ ho̍ō. Ndu̍yɛ̍ o̍ fo̍ndā nī di̍a̍ndāa̍ o̍ nɔ̍ ni̍ mbō dē nyɛ̄ dīa̍a̍ ho̍ō, o̍ la̍u̍ ba̍lu̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍.

²⁷ Chɔ̄lū nda̍ chō ho̍ō dīyɔ̄ɔ̄ le̍ sa̍lāa̍ ho̍ō sōlīo̍o̍ wo̍, nyɛ̍ o̍ nyɛ̍ pi̍la̍ŋ vi̍sīŋ ndɔ᷄ŋ pɛ̍, mɛ̄ɛ̍ ō tɛ̄ɛ̄mbu̍u̍ sāwāa̍ ya̍ Mɛ̍lɛ̄ka̍ o̍ hɔ̄l. Kōo̍ma̍ ndūa̍ŋ bɛ̍ɛ̍ ma̍ fāsa̍ŋa̍ŋ o̍ dōma̍ wānā pɛ̍, ā nɔ̄ mā kɔ̍ tɔ̍ɔ̄ dōmā ko̍ŋ o̍ fo̍ndāŋ nī di̍a̍ndāa̍.

²⁸ O̍ ko̍ŋ kɔ̍ɔ̍lī, vīsīŋ sa̍lāŋ mu᷅ŋ tē o̍ kpɛ̍ɛ̍nɛ̍i̍ pūūlūe̍i̍ ni̍ŋ nda̍ yāu̍ mu̍ŋ ni̍, tē ā chīi̍ pɛ̍ kpo̍u̍, kpɛ̍ɛ̍nɛ̍i̍ pūūlūīī kēŋ ā nɔ̄ mā pɛ̄l ndi̍. Tē o̍ kpɛ̍ɛ̍nɛ̍i̍ cho̍ ī tōōsīāā a̍ chīli̍ŋi̍i̍ būlɔ̍ŋsīi̍ye̍ ve̍ ni᷄ŋ nda̍ yāu̍ ndu̍ ni̍, kpɛ̍ɛ̍nɛ̍i̍ ke̍ŋ ā nɔ̄ mā su̍sa̍ ndi̍, mā tūe̍i̍ ndi̍ a̍ mɛ̄ŋnda̍ŋ fo̍ fo̍.

²⁹ Ndu̍yɛ̍ sa̍lāa̍ ho̍ō, wāŋ pīāāndūa̍a̍ o̍ yu̍ŋgu̍ wānāā sōlīāā lāsa̍lāa̍ chōo̍ ki̍nɛ̍i̍, ō kɛ᷅ o̍ kɛ᷅ nɔ̄ di̍ mbō dē ndu̍. Sa̍la̍ cho̍ ō dīāndāā ya̍ Mɛ̄lɛ̄ka̍ o̍ hɔ̄l mbo̍ hīāū kpo̍u̍ wo̍ o̍ cho̍ ni̍.

³⁰ Kɛ̄ tē ō wa̍ pɛ̍ mā dīī chɔ̄lōo̍ le̍ sa̍lā fa̍ŋā yɔ̄ŋ wɔ̄ɔ̍ŋndo̍ wo̍ sōlīo̍o̍, le̍ mī ya̍ Mɛ̍lɛ̄ka̍ ma᷄l wāŋnda̍ le̍ yɔ̄ŋndā wɔ̍ɔ̍ŋndo̍, mā kūɛ̄ a̍ kōo̍ma̍ chɔ̄lū kōŋ o̍ tɛ̍ndīi̍ chɔ᷅m māā Mɛ̍lɛ̄ka̍ chō a̍ nya̍ la̍tu̍lu̍ wo̍ ni᷄ŋ, le̍ mā kɔ̍ so̍lī ma̍ŋ sa̍lāa̍ o̍ fo̍nda̍ cho̍ ō dīāndāā wo̍ pɛ̍, chɔ̄lū nda̍ chō ko̍ŋ di̍yɔ̄ɔ̄ wo̍, wānā o̍ wānā nɔ̍ mbō dē vīsīŋ ndɔ᷄ŋ te̍. Ā nɔ̄ mā lōm chɔ̄lū kōŋ kpo̍u̍.