Lɛ̄vi̍ti̍kɔ̍ɔ̄ 5 - Yāu̍ Mɛ̄lɛ̄ka̍a̍

A̍ sa̍lālā wāŋnda̍ sōlī le̍ sɔ̄ɔ̍ŋ wɔ̍ɔ̍ŋ nda̍ tōsā wo̍ŋ nda̍ŋ o̍kɔ̄ɔ̄

¹ “Tē ō wa̍ pɛ̍ mā vēēlu̍ wāŋndo̍ le̍ mbō tɛ̄nda̍ se̍īle̍ŋ o̍ tōŋgo̍ kɔ̍ɔ̍sɔ̍ɔ̍ ni᷄ŋ le̍ sūɛ̍i̍ o̍ tu̍e̍ī ndu̍yɛ̍ mbo̍ chā ve̍, kɛ̍ mī wānā ko̍ŋ ō kɛ̄ɛ̍ le̍ se̍īlēlēŋ tɛ̄ndāa̍ pɛ̍, mɛ̄ɛ̍ yɔ̄ŋ wɔ̍ɔ̍ŋndo̍ o̍ to̍sā ko̍ŋ ni̍, ō nɔ̄ mbō sɔ̄la̍ dɛ̍nɛ̍ pa̍lāa̍.

² Tē ō wa̍ pɛ̍ mī wāŋndo̍ ō pīla̍ŋ nyɛ̍ cho̍ o̍ di̍a̍ndāā ya̍ Mɛ̄lɛ̄ka̍ o̍ hɔ̄l te̍ wo̍, ō wa̍ chɔ̍lū vīlɛ̍i̍, ō wa̍ vi̍sī vīlɛ̍i̍, ɔ̄ɔ̄ nyɛ̄ o̍ nyɛ̄ yōōmāa̍ sa̍su̍ŋ lɛ᷅ŋ o̍ dēmbe̍ ndɔ̄ɔ̍ chōo̍, ā yɔ᷄ŋ bɛ̍ɛ̍ mī wānā ko̍ŋ ō sīna̍ le̍, ko̍ŋ bɛ̍ɛ̍ yɔ̄ŋ wɔ̄ɔ̍ŋndo̍ o̍ cho̍ ni̍, sīmnɔ᷄ŋndo̍ o̍ si̍mnūŋ o̍ nɔ̍ɔ̍lɛ̍i̍ ya̍ o̍ hɔ̄l ni̍.

³ Ɔ̄ɔ̄ mī wāŋndo̍ pīla̍ŋ dɔ̍ɔ̍ īdīāl o̍ īdīāl o̍ dīāllūŋ wāna̍ chi̍o̍o̍, i̍ cho̍ i̍ di̍a̍ndāā ya̍ o̍ hɔ̄l te̍ ve̍, ndu̍yɛ̍ mbō sīna̍ le̍, kɛ̍ dīmīo̍o̍ nu̍a̍ā mbō sīna̍ a̍ ndi̍ o̍kɔ̄ɔ̄, mɛ̄ɛ̍ ō tōsa̍ yɔ̄ŋ wɔ̍ɔ̍ŋndo̍.

⁴ Tē ō wa̍ pɛ̍ mī wāŋndo̍ chu̍a̍ būŋgɛ̄i̍ le̍ īsɔ̄ɔ̍ to̍sā, ō wa̍ i̍ kɛ̍ndɛ̄ ō wa̍ i̍ wɔ̍ɔ̍ŋ ni̍, ndu̍yɛ̍ mbo̍ mēna᷄ŋ māā ō chō būŋgɛ̄ī kēŋ pēēlū, kɛ̍ mbō lōōnu̍ŋ a̍ ndi̍ o̍kɔ̄ɔ̄ le̍, o̍ mɛ̄ɛ̄lu̍la̍ŋ dīmīo̍o̍ nu̍a̍ā mbō sīna̍ māā ō nɔ̄ le̍ ndi̍ tōsāa̍ pɛ̍, mɛ̄ɛ̍ ō tōsa̍ yɔ̄ŋ wɔ̄ɔ̍ŋndo̍.

⁵ Sɔ̄ɔ̍ŋ mu᷅ŋ ki̍nɛ̍i̍, tē wānā o̍ wānā o̍ to̍sa̍ ī pīlɛ̍ bɛ̍ɛ̍ pɛ̍, wānā ko̍ŋ ō nɔ̄ mbō chɔ̄ɔ̄mu̍u̍ nyɛ̄ o̍ to̍sa̍ ko̍ŋ ndo̍ wāŋnda̍ o̍ hɔ̄l māā yɔ̄ŋ wɔ̄ɔ̍ŋndo̍ o̍ to̍sa̍ ni̍.

⁶ Ndu̍yɛ̍ wānā ko̍ŋ ō nɔ̄ mbō bīī sāā fɔ̍ŋndɔ̍ la̍a̍ndōo̍ kɛ̄lɛ̄ŋgāā chūīŋndo̍ o̍ chɔ̄lūāā ndūa̍a̍ tɛ̄ɛ̄ŋ mbō hīŋ a̍ ndu̍ o̍ wānā so̍līāā lāsa̍lāa̍ lo̍, mī wānā so̍līāā lāsa̍lāa̍ ō sōli̍ chɔ̄lū kōŋ sa̍lāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍ yɔ̄ŋ wɔ̄ɔ̍ŋ wānā ko̍ŋ o̍ to̍sa̍ ko̍ŋ ndo̍.

⁷ Kɛ̍ tē wānā ko̍ŋ ō nɔ̄la̍ dɔ̍ɔ̍ sāā fɔ̍ŋndɔ̍ɔ̍ sɔ̄lā kpo̍sōŋ te̍, ō hūŋ vɛ̍lɛ̄ a̍ pīīŋnda̍ ā ŋīɔ̍ɔ̍ŋ ɔ̄ɔ̄ ka᷅ŋgbu̍a̍a̍ ā ŋīɔ̍ɔ̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, mɛ̄ɛ̍ tɔ᷅ŋndo̍ pīōndɔ̄ɔ̍ cho̍ ko̍ŋ ni̍, le̍ yɔ̄ŋ wɔ̄ɔ̍ŋ o̍ to̍sa̍ wo̍. Yōūwāā ŋīɔ̍ɔ̍ŋnda̍ ha̍ā, mī ō pīlɔ̍ɔ̍ si᷄m le̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍, mī ō pīlɔ̍ɔ̍ si᷄m le̍ sa̍lā lūāmāa̍.

⁸ Ō nɔ̄ mbō hīŋ a̍ yōūwāā ŋīɔ̍ɔ̍ŋnda̍ ha̍ā o̍ wānā so̍līāā lāsa̍lāa̍ lo̍, mī wānā so̍līāā lāsa̍lāa̍ ō sōli̍ fɛ̍lɛ̍ŋ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍ a̍ yōūwo̍ ō pīlɔ̍ɔ̍. Wānā so̍līāā lāsa̍lāa̍ ō nɔ̄ mbō nyūmbū yōū kōŋ kɛ̄se̍i̍ mbō sūŋgū bōlle̍ŋ, kɛ̍ ō ki̍lū kpa̍li̍ le̍.

⁹ Tē ō dīī yōūwo̍ ho̍ō pɛ̍, ō fāsa̍ŋa̍ kōo̍ma̍ ndūa̍ŋ mā ti᷄ŋ o̍ ma̍āŋndo̍ kpēŋgo᷄ŋ vēllāa̍ vēllē. O̍ ko̍ŋ kɔ̍ɔ̍lī, kōo̍ma̍ tɔ᷅ ma̍ cho̍ lō yōūwo̍ ho̍ō o̍ īdīāl la̍ŋ, ō tōsa̍ mā yūēīnu̍ŋ o̍ ma̍āŋndo̍ bɛ̄ŋgu̍ kpo̍u̍. Sa̍lā kōŋ cho̍ le̍ yɔ̄ŋ wɔ̄ɔ̍ŋ wānā ko̍ŋ fāŋāa̍ ni̍.

¹⁰ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ o̍ sōli̍ vɛ̄lɛ̄ yōūwo̍ ō pīlɔ̍ɔ̍ sa̍lā lūāmāa̍ mɛ̄ɛ̍ i̍ cho̍ ī dīmīāā o̍ sāwāa̍ ni᷄ŋ yɛ̍. Mɛ̄ɛ̍ nu̍a̍ā wānā so̍līāā lāsa̍lāa̍ ō nɔ̄ ni̍ mbō sōli̍ sa̍lāa̍ ho̍ō le̍ yɔ̄ŋ wɔ̄ɔ̍ŋ wānā ko̍ŋ ō tōsa̍ ko̍ŋ ndo̍, ndu̍yɛ̍ mī wānā ko̍ŋ sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋ ko̍ŋ.

¹¹ Kɛ̍ tē wānā ko̍ŋ ō nɔ̄la̍ pi̍i̍ŋāā ŋīɔ̍ɔ̍ŋ nda̍ kɛ̄lɛ̄ŋgāā ka᷅ŋgbu̍a̍a̍ ŋīɔ̍ɔ̍ŋ nda̍ sɔ̄lā le̍, ō hīŋ a̍ kōlo̍ nda̍ tōōsīāā bēe̍dīi̍yo̍ wo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, le̍ sa̍la̍ yɔ̄ŋ wɔ̍ɔ̍ŋ o̍ to̍sa̍ wo̍ sōlīo̍o̍. Ndu̍yɛ̍, tē ō wa̍ hūnɔ̄ɔ̍ a̍ kōlōo̍ ho̍ō pɛ̍, ō du̍a̍ū chūɛ̄īmā ɔ̄li̍fīi̍ya̍ŋ kɛ̄lɛ̄ŋgāā nyɛ̄ o̍ nyɛ̄ chūŋ kɛ̄ndɛ̄ lēchōo̍ le̍. Kāni̍ fu̍u̍le̍, sa̍la̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍ wo̍ o̍ cho̍ ni̍.

¹² Wānā ko̍ŋ ō nɔ̄ mbō hīŋ a̍ kōlō ko̍ŋ nāa̍ wānā so̍līāā lāsa̍lāa̍ chūā, o̍ ko̍ŋ mī wānā so̍līāā lāsa̍lāa̍ ō nyɔ̄la̍ kōlō ko̍ŋ ō tānāa̍ bāa̍ cha̍, mbō lōm ndu̍ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Sa̍lāa̍ ho̍ō ndu̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍ ni̍.

¹³ Mɛ̄ɛ̍ o̍ nɛ̄īyo̍ ho̍ō ni᷄ŋ wānā so̍līāā lāsa̍lāa̍ ō nɔ̄ ni̍ mbō sōli̍ sa̍lāa̍ ho̍ō le̍ wānā ko̍ŋ, tē o̍ wa̍ pɛ̍ mbō tōsa̍ yɔ̄ŋndā wɔ̄ɔ̍ŋnda̍ wāā nu̍a̍ā ō pīlɛ̍ bɛ̍ɛ̍ pɛ̍. Ko̍ŋ to̍sā ni̍ mī wānā ko̍ŋ sɔ̄la̍ mālɔ̄ɔ̍ le̍ yɔ̄ŋ wɔ̄ɔ̍ŋ wāā le̍nde̍. Tē wānā so̍līāā lāsa̍lāa̍ ō sōli̍ kōlo̍ tānā kōŋ sa̍lāa̍ pɛ̍, ō tɔ᷄ cho̍ lō wo̍, wānā so̍līāā lāsa̍lāa̍ nɔ̍ ko̍ŋ ni̍, mɛ̄ɛ̍ nda̍ tōsā nu̍a̍ā a̍ sa̍lā nyɛ̄ ndīāā ku̍llo̍ yɛ̍.”

A̍ mɛ̄ɛ̍ nda̍ nɔ̄ mā sōli̍ sa̍lālā lāpūɛ̍ɛ̍ŋndo̍ yɛ̍ o̍kɔ̄ɔ̄

¹⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ Mūu̍sē chūa̍ mbo̍ dīmūl ndu̍ āā,

¹⁵ “Nyɛ̄ o̍ nyɛ̄ nɔ̍ le̍ yɔ̄ŋgɔ᷄ŋndo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, tē wāŋndo̍ pūɛ̄ɛ̄nu̍ŋ le̍ ndu̍ yɔ̄ŋgōo̍ pɛ̍, wānā ko̍ŋ ō nɔ̄ mbō bīī sāā fɔ̍ŋndɔ̍ɔ̍, o̍ nɔ̍ sɔ᷅ŋ o̍ sɔ̄ŋ te̍ wo̍ o̍ chɔ̄lūāā ndūa̍a̍ tɛ̄ɛ̄ŋ, mbō hu᷄ŋ so̍lī ndu̍ sa̍lāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Sa̍lā wānā ko̍ŋ ō nɔ̄ mbō sōli̍ le̍ pūɛ̍ɛ̍ŋnda̍ ndɔ̄la̍ la̍ŋ ndo̍, ndu̍ cho̍ ko̍ŋ ni̍. Ndu̍yɛ̍, chɔ̄lōo̍ ho̍ō bāa̍ ndɔ̄ɔ̍ ō nɔ̄ mbo̍ wa̍ mɛ̄ɛ̍ ba̍ā chɔ̄lōo̍ ō chō ō chɛ̄la᷅ŋ nya̍ tɛ̄ɛ̄ŋ yɛ̍.

¹⁶ Ndu̍yɛ̍ nyɛ̄ wānā ko̍ŋ ndu̍ o̍o̍ nɔ̍ ko̍ŋ le̍ yɔ̄ŋgōo̍ kɛ̍ mbo̍ pūɛ̄ɛ̄nu᷄ŋ ndo̍, ō nɔ̄ mbō yɔ̄ŋgu̍ ndu̍ ka̍ŋga̍la̍ŋ. Ndu̍yɛ̍ tē ō wa̍ ni᷅ŋ nyɛ̄ kōŋ yɔ̄ŋgōo̍ pɛ̍, te̍ nyɛ̄ kōŋ ō wa̍ kɛ̄mɛ̄ pɛ̍, ō nɔ̄ mbō hāndu̍ lēchōo̍ lā ŋu̍ɛ̍ɛ̍nu̍. O̍ ko̍ŋ kɔ̍ɔ̍lī, mbō chu̍a̍ ni̍ko̍ sāā fɔ̍ŋndɔ̍ o̍ nɔ̍ le̍ yɔ̄ŋgōo̍ le̍ sa̍lāa̍ wo̍, mbo̍ ke̍ wānā so̍līāā lāsa̍lāa̍. Mī wānā so̍līāā lāsa̍lāa̍ ō sōli̍ sa̍lā kōŋ le̍ pūɛ̍ɛ̍ŋnda̍ wānā ko̍ŋ. O̍ ko̍ŋ mī wānā ko̍ŋ sɔ̄la̍ mālɔ̄ɔ̍ le̍ pūɛ̍ɛ̍ŋnda̍ ndɔ̄la̍ la̍ŋ.

¹⁷ “Sāwā o̍ sāwā ya̍ Mɛ̍lɛ̄ka̍ Ya̍a̍wɛ̄ɛ̄ ke̍ nya̍, wānā o̍ wāna̍ tɛ̍ɛ̍mbu̍u̍ nyɛ̄ sāwā ko̍ŋ ō kūūna̍ nya̍ wo̍ ō pīlɛ̍ bɛ̍ɛ̍ pɛ̍, ā yɔ᷄ŋ bɛ̍ɛ̍ mī wānā ko̍ŋ ō sīna̍ le̍, mɛ̄ɛ̍ ō tōsa̍ yɔ̄ŋ wɔ̄ɔ̍ŋndo̍. Ndu̍yɛ̍ ō nɔ̄ mbō pēndū tɔ᷅ŋndo̍ le̍ nyɛ̄ o̍ to̍sa̍ ko̍ŋ ndo̍.

¹⁸ Wānā ko̍ŋ ō nɔ̄ mbō bīī sāā fɔ̍ŋndɔ̍ɔ̍ o̍ nɔ̍ sɔ᷅ŋ o̍ sɔ̄ŋ te̍ wo̍ o̍ chɔ̄lūāā ndūa̍a̍ tɛ̄ɛ̄ŋ, mbō hīŋ a̍ ndu̍ o̍ wānā so̍līāā lāsa̍lāa̍ lo̍, mī wānā so̍līāā lāsa̍lāa̍ ō sōli̍ sāā ko̍ŋ sa̍lāa̍ le̍ bīōndɔ᷄ŋ wānā ko̍ŋ ō tōsa̍ ō sīna̍ le̍ wo̍. O̍ ko̍ŋ mī wānā ko̍ŋ sɔ̄la̍ mālɔ̄ɔ̍ le̍ bīōndɔ᷄ŋ ndɔ̄ɔ̍. Ndu̍yɛ̍ chɔ̄lōo̍ ho̍ō ba̍ā ndɔ̄ɔ̍ ō nɔ̄ mbo̍ wa̍ mɛ̄ɛ̍ ba̍ā chɔ̄lōo̍ ō chō ō chɛ̄la᷅ŋ nya̍ tɛ̄ɛ̄ŋ yɛ̍.

¹⁹ Sa̍lā bīōndɔ᷄ŋndo̍ o̍ cho̍ ni̍. Sa̍la̍ nɔ̍ mbo̍ sōli̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā pāāwā le̍ sāwa̍ wānā ko̍ŋ ō tɛ̄ɛ̄mbu̍u̍ wo̍, ndu̍ cho̍ ko̍ŋ ni̍.”