Lɛ̄vi̍ti̍kɔ̍ɔ̄ 4 - Yāu̍ Mɛ̄lɛ̄ka̍a̍

Sa̍lāla̍ŋ a̍ yɔ̄ŋndā wɔ̄ɔ̍ŋndā wāŋnda̍ tōsā ō ve᷅ kɛ̍ɛ̍sīāā ndā le̍ la̍ŋ o̍kɔ̄ɔ̄

¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmūl Mūu̍sē āā,

² “Di̍mu̍l wa᷅ŋnda̍ I̍sɔ̄lūɛ̄ī, māā tē ō wa̍ pɛ̍ mī wāŋndo̍ ō tōsa̍ yɔ̄ŋ wɔ̄ɔ̍ŋndo̍, nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ māā lā to̍sā le̍ wo̍ mbō tōsa̍, kɛ̍ ndu̍yɛ̍ mbō ve̍ kɛ̄ɛ̄sīāā le̍ wānā ko̍ŋ ō kɛ̄ɛ̄si̍a̍a̍ le̍ yɔ̄ŋ wɔ̄ɔ̍ŋ wāā le̍nde̍ to̍sā le̍, mɛ̄ɛ̍ nyɛ̄ wānā ko̍ŋ ō nɔ̄ mbō tōsa̍ wo̍ ndu̍ cho̍ ho̍ō ni̍.

³ Tē ō wa̍ pɛ̍ māā māsa̍ wānāā sōlīāā lāsa̍lāa̍ o̍ to̍sa̍ yɔ̄ŋ wɔ̄ɔ̍ŋ wāā le̍nde̍ ni̍, mbō tōsa̍ mī wāŋnda̍ ā sɔ̄la̍ yāālāa̍ ya̍ Mɛ̄lɛ̄ka̍ o̍ hɔ̄l le̍ dɛ̍nɛ̍ pa̍lāa̍ sɔ̄lāa̍, māsa̍ wānāā sōlīāā lāsa̍lā kōŋ ō nɔ̄ mbō hīŋ a̍ nāū tōōyōo̍ o̍ nɔ̍ sɔ᷅ŋ o̍ sɔ̄ŋ te̍ wo̍, mā sōli̍ sa̍lāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍ yɔ̄ŋ wɔ̄ɔ̍ŋ o̍ to̍sa̍ wo̍.

⁴ Māsa̍ wānāā sōlīāā lāsa̍lā kōŋ ō nɔ̄ mbō hīŋ a̍ nāū tōōyē kōŋ o̍ tɛ̍ndīi̍ chɔ᷅m māā Mɛ̄lɛ̄ka̍ ō chō a̍ nya̍ la̍tu̍lu̍ wo̍ sōndōo̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Tē ō hīŋ a̍ ndu̍ pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, ā dīī nāū kōŋ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l.

⁵ Tē ā dīī nāūwo̍ ho̍ō pɛ̍, wānā so̍līāā lāsa̍lā ko̍ŋ, ō chūa̍ kōo̍ma̍ nāū kōŋ mā ti᷄ŋ ō lūɛ̄ī a̍ ma̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ ni᷄ŋ.

⁶ Tē ō lūɛ̄ī a̍ ma̍ŋ lo̍ŋ pɛ̍, kōlā bɛ̍ndu̍ cho̍ ō lāndāā o̍ fo̍ndāŋ kāsīo̍o̍ wo̍, wānā so̍līāā lāsa̍lā kōŋ ō yīŋ sūe̍i̍ o̍ ko̍o̍ma̍ ma̍ŋ ni᷄ŋ o̍ fāsa̍ŋa̍ ma̍ŋ o̍ kōlā bɛ̍ndū kōŋ hɔ̄lndɔ̄ lē ŋɔ᷄mmɛ̍ū.

⁷ O̍ ko̍ŋ kɔ̍ɔ̍lī, mī wānā so̍līāā lāsa̍lā kōŋ ō chu̍a̍ kōo̍ma̍ ma̍ŋ mā ti᷄ŋ, mbō sūu̍ ma̍ŋ o̍ nyɛ̄la̍ cho̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ, ma̍āŋ cho̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ le̍chōo̍ Mɛ̍lɛ̄ka̍ Ya̍a̍wɛ̄ɛ̄ lāchī wo̍, o̍ cho̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ ndo̍.

⁸ Nāū nda̍ chō ho̍ō dīyɔ̄ɔ̄ wo̍, ā nɔ̄ mā sōli̍ chūɛ̄īma̍ cho̍ ndu̍ ni᷄ŋ mā hōlna᷄ŋ o̍ pūlo̍ŋ nda̍ŋ ki̍nɛ̍i̍,

⁹ a̍ bɔ̄ŋgu̍ŋ mūu̍ŋ ndo̍ŋ, lātūlu̍ a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, a̍ yēmi̍i̍ hɔ᷅lle̍, sōlīo̍o̍ ndi̍ le̍nde̍ a̍ bɔ̄ŋgu̍ŋ mūu̍ŋ ndo̍ŋ lātūlu̍.

¹⁰ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō chūa̍ nyɛ̄m nda̍ chō mu̍ŋ so̍lī wo̍ŋ, mbō lōm mu̍ŋ o̍ ma̍āŋ nda̍ lūām sa̍lā lūāmāa̍ wo̍ chōo̍. Chɔ̄lū nda̍ dīī le̍ sa̍lā kɔ̄l nyūlōo̍ sōlīo̍o̍ wo̍, nyɛ̄m nda̍ nɔ̄ mā sōli̍ chɔ̄lū kōŋ ni᷄ŋ ndo̍ŋ, mu̍ŋ ko̍ni̍ nda̍ nɔ̄ mā sōli̍ vɛ̄lɛ̄ chɔ̄lōo̍ ho̍ō ni᷄ŋ mā lōm mu̍ŋ ni̍.

^11-12 Kɛ̍ nāūwo̍ ho̍ō yāu̍ ndɔ̄ɔ̍ ni̍, vīsīŋ tɔ᷄ŋ ni̍, bōlle̍ŋ ni̍, a̍ pēlo᷄ŋ, a̍ nyɛ̄ o̍ nyɛ̍ cho̍ ndu̍ ni᷄ŋ, lātūlu̍ a̍ pōōlā ndɔ̄la̍ŋ kpo̍u̍, lā nɔ̄ mī lā chūa̍ mu̍ŋ kpo̍u̍ mī lā kūɛ̄ a̍ mu̍ŋ o̍ dɔ̍ɔ̍ŋgɔ̍ nya̍ chō wo̍ da̍ŋga̍la̍, o̍ fo̍nda̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l lo̍ nāa̍ nda̍ vīāū pu᷅lta̍ŋ nda̍, mī lā kɔ̍ ki̍i̍sūū yīŋnde̍ŋ lo̍ŋ mī lā lōm vīsīŋ nāū kōŋ lo̍ŋ kpo̍u̍.

¹³ Tē ō wa̍ pɛ̍ mī nya̍ wāŋnda̍ I̍sɔ̄lūɛ̍i̍ kpo̍u̍ mī lā tōsa̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ dīmu̍l nya̍ māā lā to̍sā le̍ wo̍, kɛ̍ ndu̍yɛ̍ lā si̍nā le̍, ko̍ŋ bɛ̍ɛ̍ I̍ chu̍a̍ ndu̍ māā yɔ̄ŋ wɔ̍ɔ̍ŋndo̍ nya̍ tōsa̍ ni̍.

¹⁴ Le̍la̍ŋ tē lā sāālu̍ŋ dɔ̍ɔ̍ pɛ̍ māā lā tōsa̍ yɔ̄ŋ wɔ̄ɔ̍ŋndo̍, nya̍ wa᷅ o̍ ku̍ndā kōŋ chōo̍ wa̍, lā bīi̍ na̍ū tōōyōo̍ lā hīŋ a̍ ndu̍, lā sōli̍ ndu̍ sa̍lāa̍ le̍ yɔ̄ŋ wɔ̄ɔ̍ŋ kōŋ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ sōndōo̍.

¹⁵ Tē lā hīŋ a̍ nāūwo̍ ho̍ō pɛ̍, wāŋ bɛ̄ndūa̍a̍ I̍sɔ̄lūɛ̄ī a̍ ha̍ndu̍ ndu̍ bāla̍ŋ o̍ lēbōl, ā dīī ndu̍ ya̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

¹⁶ Tē ā dīī ndu̍ pɛ̍, māsa̍ wānāā sōlīāā lāsa̍lāa̍ ō chūa̍ kōo̍ma̍ nāū kōŋ mā ti᷄ŋ, ō lūɛ̄ī a̍ ma̍ŋ o̍ tɛ̍ndīi̍ chɔ᷅m māā Mɛ̍lɛ̄ka̍ chō a̍ nya̍ la̍tu̍lu̍ wo̍ ni᷄ŋ.

¹⁷ Tē ō lūɛ̄ī a̍ ma̍ŋ lo̍ŋ pɛ̍, kōlā bɛ̍ndu̍ cho̍ ō lāndāā wo̍, māsa̍ wānāā so̍līāā lāsa̍lā kōŋ ō yīŋ sūe̍i̍ o̍ ko̍o̍ma̍ ma̍ŋ ni᷄ŋ, o̍ fāsa̍ŋa̍ ma̍ŋ o̍ kōlā bɛ̍ndū kōŋ hɔ̄lndɔ̄ lē ŋɔ᷄mmɛ̍ū, Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

¹⁸ O̍ ko̍ŋ kɔ̍ɔ̍lī, mī wānā so̍līāā lāsa̍lā kōŋ ō chu̍a̍ kōo̍ma̍ ma̍ŋ mā ti᷄ŋ mbō kɔ̍ su̍ū ma̍ŋ o̍ nyɛ̄la̍ cho̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ. Mɛ̄lɛ̄ka̍ Ya̍a̍wɛ̄ɛ̄ lāchī, ma̍āŋ cho̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ ndo̍.

¹⁹ O̍ ko̍ŋ kɔ̍ɔ̍lī, chūɛ̄īma̍ cho̍ nāū kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ, mbō lōm ma̍ŋ kpo̍u̍ o̍ ma̍āŋndo̍ chōo̍.

²⁰ Nāū wāŋnda̍ I̍sɔ̄lūɛ̄ī a̍ cho̍ ko̍ŋ sa̍lāa̍ sōlī wo̍, māsa̍ wānāā sōlīāā lāsa̍lāa̍ ō nɔ̄ mbō tōsa̍ a̍ nāū kōŋ, mɛ̄ɛ̍ o̍ to̍sa̍ a̍ nāū tāse̍ o̍ so̍li̍ sa᷅la̍ fa̍ŋā yɔ᷅ŋ wɔ̄ɔ̍ŋndo̍ wo̍ yɛ̍, mɛ̄ɛ̍ nu̍a̍ā wānā so̍līāā lāsa̍lāa̍ ō lōōkū to̍sā ni̍ mī wāŋnda̍ sɔ̄la̍ mālɔ̄ɔ̍ le̍ yɔ̄ŋ ndā wɔ̍ɔ̍ŋndo̍.

²¹ O̍ ko̍ŋ, mbō chu̍a̍ nāū kōŋ mbō kɔ̍ lo᷅m ndu̍ o̍ dɔ̍ɔ̍ŋgɔ̍ nya̍ chō wo̍ da̍ŋga̍la̍, mɛ̄ɛ̍ nda̍ lo᷅m nu̍a̍ā nāū tāso̍o̍ yɛ̍ ko̍ni̍. Sa̍la̍ nɔ̍ mbō sōli̍ŋ le̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄īyo̍ ndu̍ cho̍ ko̍ŋ ni̍.

²² Tē ō wa̍ pɛ̍ mī wāŋ bɛ̄ndūa̍a̍ I̍sɔ̄lūɛ̄ī ō pīlɛ̍ ō tōsa̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ ndɔ̄ɔ̍ dīmu̍l nya̍ māā lā to̍sā le̍ wo̍, kɛ̍ ndu̍yɛ̍ mbō sīna̍ le̍, ko̍ŋ bɛ̍ɛ̍ I̍ chu̍a̍ ndu̍ māā yɔ̄ŋ wɔ̍ɔ̍ŋndo̍ o̍ to̍sa̍ ni̍.

²³ Le̍la̍ŋ tē ō sīna̍ dɔ̍ɔ̍ pɛ̍ māā ō tōsa̍ yɔ̄ŋ wɔ̄ɔ̍ŋ wāā le̍nde̍, ō nɔ̄ mbō hīŋ a̍ chūīŋ tōōyōo̍ o̍ nɔ̍ sɔ᷅ŋ o̍ sɔ̄ŋ te̍ wo̍ mbō sōli̍ ndu̍ sa̍lāa̍ o̍ ya̍ Mɛ̍lɛ̄ka̍ lo̍.

²⁴ Tē ō hīŋ a̍ chūīŋndo̍ ho̍ō pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ, a̍ dīī chūīŋndo̍ ho̍ō ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l, nāa̍ nda̍ nɔ̄ mā dīī chɔ̄lu̍ cho̍ le̍ sa̍lā lūāmāa̍ sōlīo̍o̍ wo̍ wa̍. Sa̍lā nɔ̍ mbō sōli̍ŋ le̍ yɔ̄ŋ wɔ̍ɔ̍ŋndo̍ wo̍ cho̍ ko̍ŋ ni̍.

²⁵ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō yīŋ sūe̍i̍ o̍ kōo̍ma̍ cho̍ ma̍ŋ le̍ sa̍lā yɔ̄ŋ wɔ̍ɔ̍ŋndo̍ sōlīo̍o̍ wa̍ŋ ni᷄ŋ ma̍ ti᷄ŋ, mbō kɔ̍ su̍i̍ī ma̍ŋ o̍ nyɛ̄la̍ cho̍ o̍ ma̍āŋndo̍ sɔ̍ŋgi̍la̍ŋ māā lālēē la̍ŋ. O̍ kōŋ kɔ̍ɔ̍lī, kōo̍ma̍ tɔ᷅ ma̍ cho̍ lō wa̍ŋ, ō chūa̍ ma̍ŋ ō tāla̍ ma̍ŋ o̍ ma̍āŋ lūāmāā lāsa̍la̍ kōŋ bɛ̄ŋgu̍.

²⁶ O̍ ko̍ŋ kɔ̍ɔ̍lī, chūɛ̄īma̍ cho̍ chūīŋ kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ mbō lōm ma̍ŋ kpo̍u̍ o̍ ma̍āŋndo̍ chōo̍, mɛ̄ɛ̍ o̍ to̍sā nu̍a̍ā a̍ chūɛ̄īmā chɔ̄lū sa̍lā kɔ̄l nyūlōo̍ yɛ̍. Mɛ̄ɛ̍ nu̍a̍ā wānā so̍līāā lāsa̍lāa̍ ō lōōkū sa̍lāa̍ ho̍ō sōlī ni̍, le̍ mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍.

²⁷ Tē ō wa̍ pɛ̍ mī nya̍ wāŋnda̍ I̍sɔ̄lūɛ̄ī wānā pīlɛ̍ ō tōsa̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ dīmu̍l nya̍ māā lā to̍sā le̍ wo̍, kɛ̍ ndu̍yɛ̍ mbō sīna̍ le̍, ko̍ŋ bɛ̍ɛ̍ I̍ chu̍a̍ ndu̍ māā yɔ̄ŋ wɔ̍ɔ̍ŋndo̍ o̍ to̍sa̍ ni̍.

²⁸ Le̍la̍ŋ tē ō sīna̍ dɔ̍ɔ̍ pɛ̍ māā ō tōsa̍ yɔ̄ŋ wɔ̄ɔ̍ŋ wāā le̍nde̍, ō nɔ̄ mbō hīŋ a̍ chūīŋ lāāndōo̍ o̍ nɔ̍ sɔ᷅ŋ o̍ sɔ̄ŋ te̍ wo̍, mbō sōli̍ ndu̍ sa̍lāa̍ le̍ yɔ̄ŋ wɔ̄ɔ̍ŋ o̍ to̍sa̍ ko̍ŋ ndo̍.

²⁹ Tē wāŋndo̍ ho̍ō ō hīŋ a̍ chūīŋndo̍ ho̍ō le̍ sa̍lāa̍ sōlīo̍o̍ le̍ yɔ̄ŋ ndɔ̄ wɔ̍ɔ̍ŋndo̍ pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, a̍ dīī chūīŋndo̍ ho̍ō o̍ fo̍ndāŋ nda̍ dīī chɔ̍lōo̍ le̍ sa̍lālā lūāmāāla̍ŋ sōlīo̍o̍ wo̍.

³⁰ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō yīŋ sūe̍i̍ o̍ kōo̍ma̍ chɔ̄lōo̍ ho̍ō ni᷄ŋ ma̍ ti̍ŋ, mbō kɔ̍ su̍i̍ī ma̍ŋ o̍ nyɛ̄la̍ cho̍ o̍ ma̍āŋ lūāmāā lāsa̍lā kōŋ sɔ̍ŋgi̍la̍ŋ māā lālēē la̍ŋ. O̍ kōŋ kɔ̍ɔ̍lī, kōo̍ma̍ tɔ᷅ ma̍ cho̍ lō wa̍ŋ, ō chūa̍ ma̍ŋ ō tāla̍ ma̍ŋ o̍ ma̍āŋ kōŋ bɛ̄ŋgu̍.

³¹ O̍ ko̍ŋ kɔ̍ɔ̍lī, chūɛ̄īma̍ cho̍ chūīŋ kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ mbō lōm ma̍ŋ mɛ̄ɛ̍ nda̍ sōlī nu̍a̍ā chūɛ̄īmā chɔ̄lū sa̍lā kɔ̄l nyūlōo̍ yɛ̍. O̍ ko̍ŋ, tē wānā so̍līāā lāsa̍lāa̍ ō lōm ma̍ŋ o̍ ma̍āŋndo̍ chōo̍ pɛ̍, mī chūŋ kōŋ ō kōma̍l la̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. Mɛ̄ɛ̍ nu̍a̍ā wānā so̍līāā lāsa̍lāa̍ ō nɔ̄ ni̍ mbō sōli̍ sa̍lāa̍ ho̍ō, le̍ mī wānā ko̍ŋ sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍.

³² Tē sāā fɔ̍ŋndɔ̍ɔ̍ wānā kōŋ ō yēēma̍ le̍ sa̍lāa̍ sōlīo̍o̍ le̍ yɔ̄ŋ ndɔ̄ wɔ̄ɔ̍ŋ kōŋ ni̍, sāā ko̍ŋ ō nɔ̄ mbō wa̍ ō lāāndōo̍, ndu̍yɛ̍ ō nɔ᷅ sɔ̄ŋ o̍ sɔ̄ŋ te̍.

³³ Ndu̍yɛ̍ tē wānā ko̍ŋ ō hīŋ a̍ sāā ko̍ŋ pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ, ā dīī sāā ko̍ŋ o̍ fo̍ndāŋ nda̍ dīī chɔ̍lōo̍ le̍ sa̍lālā lūāmāāla̍ŋ sōlīo̍o̍ wo̍.

³⁴ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō yīŋ sūe̍i̍ o̍ kōo̍ma̍ cho̍ ma᷅ŋ le̍ sa̍lā fa̍ŋā yɔ̄ŋ wɔ̍ɔ̍ŋndo̍ wo̍ wa̍ŋ ni᷄ŋ, mbō kɔ̍ su̍i̍ī ma̍ŋ o̍ nyɛ̄la̍ cho̍ o̍ ma̍āŋ lūāmāā lāsa̍lāa̍ sɔ̍ŋgi̍la̍ŋ māā lālēē la̍ŋ. O̍ kōŋ kɔ̍ɔ̍lī, kōo̍ma̍ tɔ᷅ ma̍ cho̍ lō wa̍ŋ, ō chūa̍ ma̍ŋ ō tāla̍ ma̍ŋ o̍ ma̍āŋ lūāmāā lāsa̍la̍ kōŋ bɛ̄ŋgu̍.

³⁵ O̍ ko̍ŋ kɔ̍ɔ̍lī, chūɛ̄īma̍ cho̍ sāā fɔ̍ŋndɔ̍ kōŋ ni᷄ŋ nda̍ŋ ki̍nɛ̍i̍, mbō sōli̍ ma̍ŋ mɛ̄ɛ̍ nda̍ sōlī nu̍a̍ā chūɛ̄īmā chɔ̄lū sa̍lā kɔ̄l nyūlōo̍ yɛ̍. O̍ ko̍ŋ, mī wānā so̍līāā lāsa̍lāa̍ ō lōm ma̍ŋ o̍ ma̍āŋ nda̍ sōlī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ chōo̍. Mɛ̄ɛ̍ nu̍a̍ā wānā so̍līāā lāsa̍lāa̍ ō nɔ̄ mbō sōli̍ sa̍lāa̍ ho̍ō ni̍, le̍ mī wānā ko̍ŋ sɔ̄la̍ mālɔ̄ɔ̍, le̍ yɔ̄ŋ ndɔ̄ wɔ̍ɔ̍ŋndo̍.”