Lɛ̄vi̍ti̍kɔ̍ɔ̄ 26 - Yāu̍ Mɛ̄lɛ̄ka̍a̍

Tē wānā tu̍e̍ī Mɛ̄lɛ̄ka̍ dīōm pɛ̍, sa̍lālā o̍ du̍a̍ū nu̍m nda̍ŋ

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l I̍sɔ̄lūɛ̍i̍ya̍ āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Lā to̍o̍sīāā pīɔ̄m o̍ pīɔ̄m, ɔ̄ɔ̄ mī lā tōōsi̍a̍a̍ nyɛ̄ o̍ nyɛ̄ chēle̍ŋ māā wāna̍ chi̍e̍e̍, ɔ̄ɔ̄ mī lā sīmi̍ nyɛ̄ o̍ nyɛ̄ māā lēsūŋgbu̍, ɔ̄ɔ̄ mī lā sīmi̍ pōūtā sīālāā o̍ lɛ̄ŋnde̍ŋ nde᷅ŋ ni᷄ŋ mī lā tūndu᷄ŋ mī lā sōōlu̍u̍ mu̍ŋ māā mɛ̄lɛ̄ka̍ā nyā le̍.

² Lā ke̍ pa̍a̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ, ndu̍yɛ̍ mī lā nɔ̄ vɛ̄lɛ̄ bɛ̄ɛ̄le̍ŋ le̍ fo̍ndā ni̍ nya̍ sōōlūū ya̍ wo̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³ “Tē lā tōsa̍ nyɛ̄ sāwāla̍ nīla̍ŋ lā dīmi̍ wo̍ pɛ̍, ndu̍yɛ̍ o̍ ko̍ŋ kɔ̍ɔ̍lī, nyɛ̄ o̍ nyɛ̄ pɛ̄ɛ̄kūlā nīla̍ŋ lā dīmi̍ le̍ to̍sāa̍ mī lā tōsa̍ ndu̍ pɛ̍,

⁴ I̍ wa᷅ ni̍ŋ pi̍ɔ̍ɔ̍ yɔ̄ŋndo̍ o̍ lɛ̄ŋndē nyāla̍ŋ ni᷄ŋ a̍ te̍le̍ŋnda̍ pīɔ̍ɔ̍ ō nɔ̄ le̍ sīa̍a̍ la̍ŋ, o̍ ko̍ŋ, mī to̍sa̍ mī tɔ̄lɔ̄ɔ̄lā nyāla̍ŋ lā na᷄ŋ mī lā kōm ta̍u̍ ta̍u̍ o̍ chīɔ̄ɔ̄ŋ nyāa̍ŋ ni᷄ŋ, ndu̍yɛ̍ mī kpe̍le̍la̍ nyāla̍ īyɔ̄mnda̍ŋ lā kōm ta̍u̍ ta̍u̍.

⁵ Lā sɔ̄lā ni̍ŋ nyɛ̍ dīa̍a̍ o̍ chīɔ̄ɔ̄ŋ nyāa̍ŋ ni᷄ŋ ha̍a̍a̍, lā lō ni̍ŋ wi̍tīi̍ŋ nyāa̍ŋ a̍ ba̍a̍līi̍ŋ nyāa̍ŋ lɔ̄ɔ̍ mī kīle̍pīi̍ya̍ŋ ma̍ŋ ma̍ di̍ū o̍ kpe̍le̍la̍ nyāla̍ŋ ni᷄ŋ le̍ kēndīo̍o̍. Ndu̍yɛ̍, lā lō ni̍ŋ ma̍ŋ ke̍ndīo̍o̍ mī te̍le̍ŋ lāwa̍llo̍ ō fūūlu̍u̍ o̍ chīɔ̄ɔ̄ŋ nyāa̍ŋ ni᷄ŋ. Nyɛ̄ dīa̍a̍ ō wā ni̍ŋ nya̍ o̍ bā ha̍a̍a̍ mɛ̄ɛ̍ nya̍ yēēmā ni̍ŋ le̍ dīo̍o̍ yɛ̍ le̍nde̍ nya̍ dīā ni̍ŋ ni̍. O̍ ko̍ŋ kɔ̍ɔ̍lī, lā wānūŋ ni̍ŋ o̍ lɛ̄ŋndē nyāle̍ŋ ni᷄ŋ o̍ bā nyāa̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ ni̍ŋ wa̍nā le̍.

⁶ “I̍ cho̍ ni̍ŋ to̍sā mī kɔ̄l nyūlōo̍ ō wa̍ o̍ lɛ̄ŋndē nyāle̍ŋ ni᷄ŋ kpo̍u̍. Wānā o̍ wānā lā hīnīŋ ni̍ŋ mī lā lɔ̄lnu̍ŋ, nyɛ̄ o̍ nyɛ̄ nɔ̍lā mbō dɔ̄ū nya̍ īsīōōŋ te̍. O̍ ko̍ŋ kɔ̍ɔ̍lī, vīsīāā bīyāā kpo̍u̍ I̍ cho̍ nda̍ sōlī o̍ lɛ̄ŋndē nyāle̍ŋ ni᷄ŋ, ndu̍yɛ̍ mī to̍sa̍ chɔ̄ū o̍ chɔ̄ū ō lu̍e̍ī o̍ lɛ̄ŋndē nyāle̍ŋ ni᷄ŋ te̍.

⁷ Lā nyāānūŋ ni̍ŋ ya̍a̍mɔ̍ɔ̍wa̍a̍ nyāa̍ kɔ̄ɔ̄lī, ndu̍yɛ̍ mī lā dīu̍ nda̍ a̍ mɔ̄ɔ̄ŋ nyāa̍ŋ fāŋndo̍ŋ.

⁸ Wānāā ŋūɛ̍ɛ̍nu̍ nya̍ tɛ̄ɛ̄ŋ ā nɔ̄lā ni̍ŋ mā tōū ya̍a̍mɔ̍ɔ̍wa̍ kɛ̄mɛ̄. O̍ ko̍ŋ kɔ̍ɔ̍lī, wāŋnda̍ kɛ̄mɛ̄ nya̍ tɛ̍ɛ̍ŋ ā nɔ̄lā ni̍ŋ mā tōū ya̍a̍mɔ̍ɔ̍wa̍a̍ nyāa̍ wāa̍la̍ŋ tɔ̍. Lā yām ni̍ŋ ya̍a̍mɔ̍ɔ̍wa̍a̍ nyāa̍ ndu̍yɛ̍ mī lā dīu̍ nda̍ a̍ mɔ̄ɔ̄ŋ nya̍ŋ fāŋndo̍ŋ.

⁹ I̍ cha᷅ ni̍ŋ nya̍ nyīnā, ndu̍yɛ̍ mī to̍sa̍ mī lā kūi̍ kūīyo̍ pīla̍ o̍ lɛ̄ŋndē nyāle̍ŋ ni᷄ŋ, ndu̍yɛ̍ kpe̍ma̍ ya̍ I̍ yi̍i̍ a̍ nya̍ wo̍ mī lo̍ o̍ kpe̍ma̍ ko̍ŋ chōo̍.

¹⁰ Ko̍nda̍la̍ nyāla̍ŋ lā pīā ni̍ŋ cha̍ cha̍ a̍ nyɛ̄ dīa̍a̍, nyɛ̄ dīa̍a̍ lō ni̍ŋ nya̍ o̍ bā o̍ lāko̍nda̍ mi̍ ho̍ō vēsa̍ o̍ chīɔ̍ɔ̍ŋ ni᷄ŋ. Nyɛ̄ dīa̍a̍ wā ni̍ŋ nya̍ o̍ bā ha̍a̍a̍, mɛ̄ɛ̍ mī lā kpēēŋā ō pāāndōo̍ le̍ ō sɛ̄nɛ̄īyo̍ dɔ̄wɔ̄ɔ̍.

¹¹ Yā Mɛ̄lɛ̄ka̍ pīla̍ I̍ wa᷅ ni̍ŋ nya̍ īchāli̍ tɛ̍ɛ̄ŋ, ndu̍yɛ̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ I̍ mu̍lūl lɛ̍ nya̍ kɔ̄ɔ̍ le̍.

¹² I̍ wa᷅ ni̍ŋ a̍ nya̍ lātūlu̍, ndu̍yɛ̍ mī hi̍o̍ū lāchī a̍ wāa̍ Mɛ̄lɛ̄ka̍ nyā, mī nya̍ bɛ̍ɛ̍ mī lā wa̍ wānāā nī.

¹³ Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍, māā lā wa᷅ lɛ̄ lāchɛ̄ nda̍ o̍ bā le̍. Wōlɔ̄ɔ̄lā lūsu̍lɛ̍i̍la̍ wa̍ nya̍ o̍ lēbōl la̍ŋ mi̍ fa̍ŋā la̍ŋ nya̍ o̍ lēbōl, mi̍ to̍sa̍ lā cho̍ lɛ̍ wāna̍ o̍ wāna̍ o̍ bā bɛ̄ŋgu̍ le̍.”

Tē wānā so̍li̍ Mɛ̄lɛ̄ka̍ dīōm pɛ̍, dɛ̍nɛ̍ pa̍lāā o̍ tu̍sī nu̍m chōo̍ wo̍

¹⁴ Mi̍ Mɛ̄lɛ̄ka̍ dīmūl I̍sɔ̄lūɛ̍i̍ya̍ āā, “Kɛ̍ ndu̍yɛ̍ nyɛ̄ o̍ nyɛ̄ sāwāla̍ nīla̍ŋ lā dīmi̍ le̍ tōsāa̍, ndu̍yɛ̍ a̍ nyɛ̄ o̍ nyɛ̄ pɛ̄ɛ̄kūlā nīla̍ŋ lā dīmi̍ te̍ lā tōsa̍ ndu̍ le̍,

¹⁵ mī lā kɛ̄ɛ̍ sāwāla̍ la̍ŋ ndu̍yɛ̍ a̍ pɛ̄ɛ̄kūlā lāŋ, nyɛ̄ o̍ nyɛ̄ la̍ di̍mi̍ le̍ tōsāa̍ mī lā tōsa̍ ndu̍ le̍, mī lā tɛ̄ɛ̄mbu̍u̍ kpe̍ma̍ ya̍ I̍ yi̍i̍ a̍ nya̍ wo̍ pɛ̍,

¹⁶ sɔ̄ɔ̍ŋ ya̍ I̍ to̍sā ni̍ŋ a̍ nya̍ ki̍nɛ̍i̍ yo̍ŋ mu̍ŋ wa᷅ ni̍ŋ mu᷅ŋ ni̍. I̍ cho̍ tōsā mī sīōōŋīī bɛ̄ndūe̍i̍ ī bīī nya̍ o̍ lēpīlɛ̍ ni᷄ŋ kpe̍ ndu̍yɛ̍, mī to̍sa̍ mī nāālā ŋ̄kɔ̄ŋnja̍la̍ŋ lā tīu̍ nya̍ tɛ̄ɛ̄ŋ. O̍ ko̍ŋ kɔ̍ɔ̍lī, mī to̍sa̍ mī nāā dīāllūŋ tūū kālā ka̍lāa̍, o̍ su̍u̍mīāā wa̍nā ndu̍yɛ̍ mbō sɔ̄ɔ̄si̍a̍a̍ nu̍m kpo̍u̍ wo̍ ō de᷄l nya̍ tɛ̄ɛ̄ŋ, ndu̍yɛ̍ mbō tīu̍ kpo̍u̍. O̍ ko̍ŋ kɔ̍ɔ̍lī, lā tōsā ni̍ŋ wa̍lta̍ nyāla̍ ŋ̄chīɛ̄ɛ̄la̍ŋ kɛ̍ lā di᷅ la̍ŋ tɔ̄nɔ̄ le̍. Ya̍a̍mɔ̍ɔ̍wa̍a̍ nyāa̍ nda̍ di̍ā ni̍ŋ chīɔ̄ɔ̄ŋ nyāa̍ŋ mu̍ŋ tɔ̄nɔ̄ ni̍.

¹⁷ I̍ cho̍ nya̍ kɔ̄ɔ̍ mūlūl ndu̍yɛ̍ mī to̍sa̍ mī ya̍a̍mɔ̍ɔ̍wa̍a̍ nyāa̍ ā yēm nya̍. Wānāa̍ tu̍l nya̍ yɛ̄le̍ŋ nda̍ mī to̍sa̍ mā wa̍ nya̍ chōo̍ la̍ma̍sā. O̍ ko̍ŋ kɔ̍ɔ̍lī, lā pīā ni̍ŋ a̍ sīōōŋīī bɛ̄ndūe̍i̍ ha̍a̍a̍, wānā o̍ wānā ve᷅ ni̍ŋ nya̍ tōūwɔ̄ɔ̄ le̍ mī lā nyāānu̍ŋ.

¹⁸ “Ndu̍yɛ̍ tē mu᷅ŋ ŋ̄ kēēku̍ nya̍ chōo̍ pɛ̍ kpo̍u̍, mī lā tūi̍i̍ ya̍ dīōm te̍, I̍ chɔ̍ɔ̍lu̍ nya̍ vɛ̄lɛ̄ nyɛ̄ pālāa̍ chēle̍ŋ hāndɔ̄ɔ̄ chōo̍ sa̍lā ŋɔ᷄mmɛ̍ū, kāni̍ fo̍ndōle̍ le̍ yɔ̄ŋndā nyāla̍ wɔ̍ɔ̍ŋnda̍ŋ.

¹⁹ Mī to̍sa̍ mī yōŋgā bɛ̍ndū nya̍ wa̍ kīōlɔ̄ɔ̍ le̍ kpāāya̍ nyā nɔ̄ wo̍ wo̍ ō mɛ̄ɛ̄lū. Mī ha̍la̍ cho̍ nya̍ ō lānda᷄ŋ cho̍o̍ mbō kē nya̍ pīɔ̍ɔ̍ wo̍ ō kēndū, māā īchīli̍ŋ, le̍ pīɔ̄ɔ̄ lēpɛ̄ŋndo̍. O̍ ko̍ŋ mī lɛ̄ŋndē nyāle̍ŋ lē yɔ̄nu̍ŋ le̍ ka̍lā ka̍lā, to̍fa̍ wɔ̍ ko̍ mɛ̄ɛ̍ būlɔ̍ŋsīi̍ye̍ ī chō nu̍a̍ā yɛ̄.

²⁰ Lā wā ni̍ŋ yɔ̍kpāa̍ o̍ chīɔ̄ɔ̄ŋ nyāa̍ŋ ni᷄ŋ a̍ o̍ kpe̍le̍la̍ nyāla̍ŋ ni᷄ŋ fo̍ndō fu̍u̍, kāni̍ fo̍ndōle̍, lɛ̄ŋndē nyāle̍ŋ lē ve᷅ ni̍ŋ nyɛ᷅ nāŋɔ̄ɔ̄ le̍, ndu̍yɛ̍ yɔ̄mīī nyɛ̄i̍ bɛ̍ɛ̍ ī ve᷅ ni̍ŋ ko̍mɔ̄ɔ̄ o̍ kpe̍le̍la̍ nyāla̍ŋ ni᷄ŋ te̍.

²¹ “Tē mu̍ŋ ŋ̍ ke̍e̍ku̍ vɛ̄lɛ̄ nya̍ chōo̍ pɛ̍ kpo̍u̍, mī lā hīōū lāchī a̍ ya̍ dīōmndo̍ sōlīo̍o̍, mī lā tūi̍i̍ ya̍ dīōm te̍, I̍ chɔ̍ɔ̍lu̍ nya̍ vɛ̄lɛ̄ nyɛ̄ pālāa̍ chēle̍ŋ hāndɔ̄ɔ̄ chōo̍ sa̍lā ŋɔ᷄mmɛ̍ū. Mɛ̄ɛ̍ kpɛ̍ yɔ̄ŋndā nyāla̍ wɔ̍ɔ̍ŋnda̍ŋ lā wā yɛ̍ le̍nde̍ ya̍ I̍ tu̍sī nya̍ nyɛ̄ pālāa̍ chōo̍ ni̍.

²² Mī lo̍ o̍ ko̍ŋ mī yɔ̍ŋ vīsīāā bīyāa̍ nya̍ tɛ̄ɛ̄ŋ, mā hu᷄ŋ di̍ū chūāūwāā nyāa̍ mī lā lo̍ kɔ̄ɔ̄lā fo̍ndō, ndu̍yɛ̍ mā tɛ̄ɛ̄mbu̍u̍ chɔ̄lūāā nyāa̍. Nya̍ lo᷅ ni̍ŋ yo̍o̍mū wa̍ lā ve᷅ ni̍ŋ a̍ bɔ̍ɔ̍ le̍. Nɛ̄īla̍ nyāla̍ŋ kpo̍u̍ lā chō yīmbɔ̄ɔ̄, fo̍ndōle̍, wānā ve᷅ ni̍ŋ le̍ bālɔ̄ɔ̍ o̍ nɛ̄īla̍ la̍ŋ te̍.

²³ “Tē nyɛ̄ pālāā ya̍ I̍ ha̍ndu̍ nya̍ ko̍ŋ cho̍o̍ le̍ nya̍ mīŋgīo̍o̍ o̍ nɛ̄ī yo̍ ō būmba̍ vɛ̄lɛ̄ nya̍ pɛ̍, mī lā mīīŋgu̍ ya̍ o̍ ībūŋ te̍, ndu̍yɛ̍ mī lā hīōū lāchī a̍ ya̍ dīōmndo̍ sōlīo̍o̍ kɛ᷅,

²⁴ Ya̍ pi̍la̍ mu̍lu̍la᷅ŋ nya̍ ni̍ko̍ kɛ̍sɛ̍ kɛ̍sɛ̍, a̍ nya̍ nyɛ̄ pālāa̍ tūsīo̍o̍ chōo̍. Nyɛ̄ pālāā ya̍ I̍ ha̍ndū nya̍ vɛ̄lɛ̄ chōo̍ wo̍, ō wā le̍ o̍ ke̍e̍ku̍ nya̍ chōo̍ wo̍ sālā lē ŋɔ᷄mmɛ̍ū, fo̍ndōle̍ le̍ yɔ̄ŋndā nyāla̍ wɔ̍ɔ̍ŋnda̍ŋ.

²⁵ Mī lo̍ o̍ ko̍ŋ mī to̍sa̍ mī ya̍a̍mɔ̍ɔ̍wa̍ hu᷄ŋ de᷅l nya̍ chōo̍ a̍ mɔ̄ɔ̄ŋ fāŋndo̍ŋ, le̍ mī mi̍ŋgu̍l nya̍ māa̍ le̍ tɛ̄ɛ̄mbūū nya̍ tɛ̄ɛ̄mbu̍u̍ kpe̍ma̍a̍ na̍a̍ tɛ̄ɛ̄ŋ na̍a̍ nya̍ā wo̍. Ndu̍yɛ̍ tē lā nyāānu̍ŋ pɛ̍, mī lā kūɛ̄ o̍ chi̍e̍e̍ŋ nyāa̍ŋ le̍ mī lā vēŋnu᷄ŋ ya̍a̍mɔ̍ɔ̍wa̍a̍ nyāa̍ pɛ̍, I̍ to̍sa̍ nāālā wɔ̄ɔ̍ŋ wɔ̄ɔ̍ŋnda̍ŋ lā de᷄l nya̍ tɛ̄ɛ̄ŋ, o̍ ko̍ŋ, I̍ to̍sa̍ ya̍a̍mɔ̍ɔ̍wa̍a̍ nyāa̍ ā bīī nya̍.

²⁶ O̍ ko̍ŋ kɔ̍ɔ̍lī, mī to̍sa̍ mī yīa̍a̍ŋ mā de᷄l nya̍ o̍ lɛ̄ŋndē nyāle̍ŋ ni᷄ŋ. Nyɛ̄ dīa̍a̍ wā ni̍ŋ pɛ᷅ŋnde̍ŋ ha̍a̍a̍, fo̍ndā tōōsīāā bēe̍dīi̍ cho̍ le̍ yu̍ŋgo̍o̍ ō pīlɛ̍ wo̍, ō wā ni̍ŋ le̍ yu̍ŋgu̍la̍ŋ tɔ̍, kāni̍ fo̍ndōle̍ wānā o̍ wānā nɔ᷅ ni̍ŋ ko̍lō to̍o̍sīāā bēe̍dīi̍yo̍ ō bɔ̄ɔ̍ le̍. Ndu̍yɛ̍ tūūwo̍ wānā o̍ wāna̍ o̍ wa᷅ ni̍ŋ ko̍lō to̍o̍sīāā bēe̍dīi̍yo̍ ni̍ le̍ mbō sīna̍ mɛ̄ɛ̍ kpɛ̍ɛ̍ wānā pi᷅lɛ̍ o̍ yu̍ŋgu̍ ndɔ̄ɔ̍ chōo̍ o̍ nɔ̍ mbō sɔ̄la̍ yɛ̍. Wānā o̍ wānā o̍ sɔ̍lā ni̍ŋ bēe̍dīi̍yo̍ tūu̍le̍ŋ le̍ dīo̍o̍ le̍. Wāŋndo̍ ō chīī ni̍ŋ o̍ ndɔ̍ɔ̍ dīo̍ kpo̍u̍ kɛ̍ mī yīa̍a̍ŋ mā wa̍ ndu̍ nɛ̄īyo̍ kɛ᷅.

²⁷ “O̍ ko̍ŋ kɔ̍ɔ̍lī, te̍ mu᷅ŋ ŋ̄ kēēku̍ nya̍ vɛ̄lɛ̄ chōo̍ pɛ̍ kpo̍u̍ mī lā hīōū lāchī a̍ ya̍ dīōmndo̍ sōlīo̍o̍, mī lā tūi̍i̍ ya̍ vɛ̄lɛ̄ dīōmndo̍ te̍,

²⁸ I̍ dɔ̍ɔ̍nu᷄ŋ ni̍ko̍ tu̍mbe̍ kpe̍e̍kpe̍i̍ a̍ nya̍. Ndu̍yɛ̍ dɛ̍nɛ̍ pa̍lāā ya̍ I̍ ha̍ndū ni᷅ŋ nya̍ chōo̍ wo̍ ō hīāū o̍ ke̍e̍ku̍ nya̍ chōo̍ wo̍ sālā ŋɔ᷄mmɛ̍ū, fo̍ndōle̍, le̍ yɔ̄ŋndā nyāla̍ wɔ̍ɔ̍ŋnda̍ŋ.

²⁹ Yīmā ya̍ I̍ tu̍sī ni̍ŋ nya̍ chōo̍ wa̍ŋ, chūāūwāā nyāa̍ nya̍ vēlū wa̍ kɛ̍sɛ̍ kɛ̍sɛ̍, nda̍ nya̍ mūlīŋ ni̍ŋ di̍o̍o̍ ni̍.

³⁰ Fo̍ndāŋndā nyāla̍ lāsōōlu̍u̍la̍ŋ kpo̍u̍, mī lo̍ o̍ ko̍ŋ mī tɛ̍ɛ̍mbu̍u̍ la̍ŋ, ndu̍yɛ̍ mī pe̍si̍ ma̍āŋndā nyāla̍ nya̍ lūām nyɛ᷅m chūŋ kɛ̄ndɔ᷄ŋ lēchōo̍ la̍ŋ kpo̍u̍. Nyɛ̄m nya̍ sōōlūū mu̍ŋ māā mɛ̄lɛ̄ka̍a̍ nyā wo̍ŋ mī yi̍mi̍ mu̍ŋ, ŋ̄ wā ni̍ŋ ŋ̍ mɛ̍līāā ŋ̄ tīūwāā lɛ̄ŋ kpo̍u̍, o̍ ko̍ŋ kɔ̍ɔ̍lī, mī dīāllūŋ nyāāŋ vi̍lɛ̍i̍yo̍ŋ ŋ̄ wa᷄ ŋ̄ dīyāā ku̍ndāla̍ŋ o̍ nyɛ̄m mu᷅ŋ chōo̍. Yɛ̄le̍ŋ kpe̍e̍kpe̍i̍ ya̍ Mɛ̍lɛ̄ka̍ tūl ni̍ŋ nya̍ ni̍.

³¹ Chi̍e̍e̍ŋ nyāāŋ bɛ̍ndo᷄ŋ kpo̍u̍ mī to̍sa̍ mī ŋ̄ lo᷄ pɔ̄mnda̍ŋ, o̍ ko̍ŋ kɔ̍ɔ̍lī fo̍ndāŋndā nyāla̍ lāsōōlu̍u̍la̍ŋ kpo̍u̍ mī tɛ̍ɛ̍mbu̍u̍ la̍ŋ. Ndu̍yɛ̍ sa̍lālā nyāla̍ nya̍ a̍a̍ so̍lī pa̍a̍ndū o̍ ya̍ lo̍ te̍ chūŋ kōŋ ō kōma̍l la̍ pɛ̍, I̍ na̍ŋ kɔ̄l la̍ŋ, I̍ ye̍e̍mā lɛ̍ mī chūŋ ndɔ̄ɔ̍ ō kōma̍l la̍ le̍.

³² Lɛ̄ŋndē nyāle̍ŋ kpo̍u̍ mī tɛ̍ɛ̍mbu̍u̍ le̍ŋ mī lē lo᷄ pɔ̄m. Ndu̍yɛ̍ ya̍a̍mɔ̍ɔ̍wa̍a̍ nyāa̍ chu̍ā ni̍ŋ lɛ̍ŋndē kālā le̍ŋ nda̍ bɛ̍ɛ̍ kɛ̍sɛ̍, mī kɔ̄ndɔ̄fi̍llo̍ ō bīī nda̍ a̍ mɛ̄ɛ̍ lɛ̄ŋndē nyāle̍ŋ lē tāmbū ni̍ŋ yɛ̍.

³³ O̍ ko̍ŋ kɔ̍ɔ̍lī, mī ma̍l nya̍ chɔ̄ūwo̍ chōo̍, mī to̍sa̍ mā sɛ̄ŋi̍ŋ a̍ nya̍ o̍ lɛ̄ŋnde̍ ni᷄ŋ kpo̍u̍ o̍ bīyɔ̄ɔ̍ ni᷄ŋ. Lɛ̄ŋnde̍ nyāle̍ŋ kpo̍u̍ mī tɛ̍ɛ̍mbu̍u̍ le̍ŋ, ndu̍yɛ̍, mī chi̍e̍e̍ŋ nyāāŋ bɛ̍ndo̍ŋ ŋ̄ sīmnu᷄ŋ pɔ᷅mnda̍ŋ.

^34-35 O̍ ko̍ŋ, mī lɛ̄ŋnde̍ŋ lē sɔ̄la̍ pɛ̄ŋgīo̍o̍ a̍ wa̍lta̍ŋ tōsāa̍ lēchōo̍. Bōōndi̍i̍ nya̍ chō wā o̍ bīyɔ̄ɔ̍ ni᷄ŋ o̍ lɛ̄ŋndē sūmīālte̍ŋ ni᷄ŋ nde̍, lɛ̄ŋnde̍ŋ lē chō kōmā pɛ̄ŋgī, pɛ̄ŋgī le̍e̍ nɔ̍ le̍ sɔ̄lāa̍ o̍ wɔ̄sīī ŋɔ᷄mmɛ̍ū o̍ wɔ̄sīī ŋɔ᷄mmɛ̍ū wo̍.

³⁶ O̍ ko̍ŋ kɔ̍ɔ̍lī, wānāa̍ lo᷅ ni̍ŋ yo̍o̍mū, mī ya̍a̍mɔ̍ɔ̍wa̍ kūɛ̄ a̍ nda̍ o̍ bīyɔ̄ɔ̍ ni᷄ŋ nda̍, mī pe̍i̍ nda̍ a̍ sīōōŋīī bɛ̄ndū bɛ̍ndūe̍i̍ o̍ lɛ̄ŋīī ya̍a̍mɔ̍ɔ̍wa̍a̍ ka̍ŋ ni᷄ŋ. Sīōōŋnde̍ wā ni̍ŋ nda̍ o̍ lɛ̄ŋīī kēŋ ni᷄ŋ ha̍a̍a̍, hūēīye̍ bɛ̍ɛ̍ i̍ hɔ̍ŋ pɛ̍, mī ī hīīlu̍u̍ pēēle̍ŋ, ā sūŋgū kīlta̍ŋ. Ā wā ni̍ŋ nya̍a̍nɔ᷄ŋndo̍ wānā cha᷅ ni̍ŋ ko̍ bɛ̍ɛ̍ āā ya̍a̍mɔ̍ɔ̍wa̍ cho̍ nda̍ tōūwɔ̄ɔ̍ a̍ mɔ̄ɔ̄ŋ fāŋndo̍ŋ ni̍. Ndu̍yɛ̍ ā wa̍ ni̍ŋ de̍līla̍ŋ o̍ kīlta̍ŋ ni᷄ŋ kɛ̍, wānā o̍ wānā ve᷅ ni̍ŋ nda̍ tōūwɔ̄ɔ̄ le̍.

³⁷ Ā wā ni̍ŋ ke̍īyo̍ bōŋī bōŋīo̍o̍ nda̍ pi̍la̍ o̍ kīlta̍ŋ ni᷄ŋ mā dēlī o̍ kīlta̍ŋ ni᷄ŋ, wānā cha᷅ ni̍ŋ ko̍ bɛ̍ɛ̍ āā chɔ̄ūwo̍ nda̍ cho̍ nyāānɔ᷄ŋndo̍ ni̍, mi̍ chē bɛ̍ɛ̍ wānā o̍ wānā o̍ ve᷅ ni̍ŋ nda̍ tōūwɔ̄ɔ̄ le̍. Ndu̍yɛ̍ ā nɔ̍lā ni̍ŋ mī lā sīmu̍l ya̍a̍mɔ̍ɔ̍wa̍a̍ nyāa̍ a̍ sɔ̍ŋgɔ̄ɔ̍ le̍.

³⁸ O̍ lɛ̄ŋīī sūmīālle̍ ni᷄ŋ nya̍ lō ni̍ŋ ni̍ mī lā sɔ̄la̍ pīɔ̍mnda̍ŋ, ndu̍yɛ̍ mā chɔ᷄ nya̍ o̍ lɛ̄ŋīī ya̍a̍mɔ̍ɔ̍wa̍a̍ nyāa̍ ka̍ŋ ni᷄ŋ.

³⁹ Ndu̍yɛ̍ nya̍ wānāā tūa̍a̍ lo᷅ ni̍ŋ yo̍o̍mū o̍ lɛ̄ŋīī kēŋ ni᷄ŋ nda̍, nāāla̍ŋ lā lō ni̍ŋ nya̍ sɔ̄ɔ̄sīa̍a̍ mī lā chūu̍ pa̍ku̍, fo̍ndōle̍ le̍ yɔ̄ŋndā nyāla̍ wɔ̍ɔ̍ŋnda̍ŋ ndu̍yɛ̍, a̍ le̍ yɔ̄ŋndā wɔ̄ɔ̍ŋndā fi̍nyāā nyāā ma̍māa̍ ā tōsa̍ la̍ŋ.

^40-42 “Wāŋnda̍ ha̍ā yɔ̄ŋndā ndāla̍ wɔ̍ɔ̍ŋnda̍ŋ, ndu̍yɛ̍ a̍ yɔ̄ŋndā wɔ̄ɔ̍ŋndā fi̍nyāā ndāā ma̍māa̍, la̍ŋ la̍ to̍sa̍ ni̍ mī mu̍lu̍la᷅ŋ nda̍, ndu̍yɛ̍ mi̍ to̍sā mi̍ ya̍a̍mɔ̍ɔ̍wa̍a̍ ndāa̍ ā kūa̍ a̍ nda̍ o̍ bīyɔ̄ɔ̍ ni᷄ŋ. Ndu̍ yɔ̍nūŋ māā sīmūl nda̍ sīmu̍l la̍ ndu̍yɛ̍ ma̍ sōlī ya̍ dīōmndo̍ ni̍. Kɛ̍ wānāā tūa̍a̍ lo̍ yo̍o̍mū wa̍ tē ā sɔ̄la̍ pɛ̍ dɛ̍nɛ̍ pa̍lāā nda̍ nɔ̄ le̍ sɔ̄lāa̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndo̍, mī kɔ̄ltā ndāla̍ ka̍lā ka̍lāla̍ŋ lā mūli᷄ŋ mā chɔ̄ɔ̄mu̍u̍ yɔ̄ŋndā ndāla̍ŋ wɔ̍ɔ̍ŋnda̍ŋ a̍ yɔ̄ŋndā wɔ̄ɔ̍ŋndā fi̍nyāā ndāā ma̍māa̍ pɛ̍, I̍ cho̍ lōōnɔ᷄ŋ a̍ kpe̍ma̍ ya̍ I̍ yi̍i̍ a̍ fi̍nyāā ndāā ma̍māa̍, Che̍kɔ̍pū, a̍ Āa̍se̍, a̍ E̍bīlāha᷅m ndo̍. Ndu̍yɛ̍ mī lo̍o̍nu̍ŋ vɛ̍lɛ̄ a̍ būŋgɛ̄ī ya̍ I̍ chu̍e̍l nda̍ a̍ lɛ̄ŋndē ya̍ I̍ ke̍ nda̍ le̍ŋ o̍kɔ̄ɔ̄ ve̍.

⁴³ Kɛ̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ ā chō nda̍ fɛ̍lɛ̍ŋ hu̍nɔ̄ɔ̄ sōlī kpo̍u̍ mā kūɛ̄ a̍ nda̍ o̍ lɛ̄ŋndē sūmīālte̍ŋ ni᷄ŋ o̍ bīyɔ̄ɔ̍ ni᷄ŋ, mī lɛ̄ŋnde̍ŋ lē lo̍ fo̍ndō. Lɛ̄ŋnde̍ŋ lē chō sīmnɔ᷄ŋ pɔ᷅mndo̍, o̍ ko̍ŋ mī lē kōma̍ pɛ̍ŋgī a̍ wa̍lta̍ŋ tōsāa̍ lēchōo̍. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nya̍ wāŋnda̍ I̍sɔ̄lūɛ̄ī to̍sa̍ a̍ ya̍, kɛ̄ɛ̄ nya̍ kɛ̄ɛ̍ sāwāla̍ nīla̍ chūa̍a̍ ndu̍yɛ̍ mi̍ lā kɛ̄ɛ̄ pɛ̄ɛ̄kūlā nīla̍ŋ ndo̍ kpo̍u̍, lā chō hūnɔ̄ɔ̄ pāāwā kōŋ chūā ō pīāā cha̍.

⁴⁴ Kɛ̍ a̍ ko̍ŋ kpo̍u̍, mi̍ chē bɛ̍ɛ̍ mi̍ ya̍a̍mɔ̍ɔ̍wa̍a̍ nyāa̍ ā wā nya̍ hūnɔ̄ɔ̄ bīyɔ̄ɔ̄ mā kūɛ̄ a̍ nya̍ o̍ lɛ̄ŋndē ndāle̍ŋ ni᷄ŋ ni̍, kɛ̍ I̍ me᷅l ni̍ŋ nya̍ wa̍ŋ wa̍ŋ te̍, kɛ̄lɛ̄ŋgāāle̍ mī tu̍l nya̍ yɛ̄le̍ŋ mī tɛ̍ɛ̍mbu̍u̍ nya̍ kpo̍u̍ le̍. Tē I̍ to̍sa̍ ke̍ŋ pɛ̍, mɛ̄ɛ̍ kpe̍ma̍ ya̍ I̍ yi̍i̍ a̍ nya̍ wo̍, mɛ̄ɛ̍ I̍ chi̍i̍ kpe̍ma̍ ko̍ŋ tɛ̄ɛ̄mbūū. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁴⁵ Le̍la̍ŋ le̍ sa̍bū fi̍nyāā nyāā ma̍māa̍, I̍ cho̍ lōōnɔ᷄ŋ a̍ kpe̍ma̍ ya̍ I̍ yi̍i̍ a̍ nda̍ wo̍. Bōōndi̍i̍ ya̍ I̍ so̍li̍ nda̍ o̍ lɛ̄ŋndē I̍chi̍pīle̍ŋ ni᷄ŋ mi̍ hu᷅ŋ a̍ nda̍ ve̍, lɛ̄ŋīī bɔ̄ɔ̍ bɔ̍ɔ̍ ma̍ chā mɛ̄ɛ̍ ya̍ cho̍ wāna̍ kpāāyā yɛ̍, le̍ mī wa̍ Mɛ̄lɛ̄ka̍ nyā. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.”

⁴⁶ Sāwāla̍ŋ nda᷅ŋ, a̍ pɛ̄ɛ̄kūla̍ŋ nda᷅ŋ, la̍ŋ Mɛ̄lɛ̄ka̍ Ya̍a̍wɛ̄ɛ̄ o̍ ke̍ Mūu̍sē o̍ Pēmbīī Sa̍a̍nāīve̍ chōo̍ ni̍ le̍ mī lā wa᷄ ndu̍ Mɛ̍lɛ̄ka̍ tɛ̄ɛ̄ŋ nda̍ wāŋnda̍ I̍sɔ̄lūɛ̄ī.