Lɛ̄vi̍ti̍kɔ̍ɔ̄ 25 - Yāu̍ Mɛ̄lɛ̄ka̍a̍

A̍ wɔ̄sī ŋɔ᷄mmɛ̍ū pɛ̄ŋgīa̍a̍ o̍kɔ̄ɔ̄

¹ Bōōndi̍i̍ Mūu̍sē o̍ he̍l o̍ Pēmbīī Sa̍a̍nāīve̍ chōo̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā,

² “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ di̍mi̍ a̍a̍, ‘Tē lā fūūlu̍u̍ o̍ lɛ̄ŋndē ya̍ I̍ cho̍ nya̍ kīo̍o̍ le̍ŋ ni᷄ŋ pɛ̍, mī lā kāndu̍ wa̍lta̍ nyāla̍ ŋ̄chīɛ̄ɛ̄la̍ŋ to̍sāa̍, lā nɔ̄ mī lā tōsa̍ mī lɛ̄ŋnde̍ŋ bɛ̍ɛ̍ le̍ pɛ̍ŋgi̍ le̍ ya̍ bɛ̄ɛ̄le̍ŋ kīo̍o̍.

³ Le̍ wɔ̄sīla̍ŋ lā ŋɔ᷄mpu᷅m lā nɔ̄ mī lā wa̍ wa̍lta̍ nyāla̍ ŋ̄chīɛ̄ɛ̄la̍ŋ, a̍ kpe̍le̍la̍ nyāla̍ īyɔ̄mnda̍ŋ tōsāa̍ mī lā chūūŋgīāā nyɛ̍ dīa̍a̍.

⁴ Kɛ̍ tē wɔ̄sīlā ŋɔ᷄mpu᷅m ndālāŋ lā hīōū pɛ̍, wɔ̄sī ŋɔ᷄mmɛ̍ū wo̍ ki̍nɛ̍i̍, lā nɔ̄ mī lā ma᷄l lɛ̄ŋnde̍ŋ mī lē pɛ̄ŋgi̍. Wɔ̄sī pɛ̄ŋgīa̍a̍ ya̍ Mɛ̍lɛ̍ka̍ Ya̍a̍wɛ̄ɛ̄ wo̍ cho̍ ko̍ŋ ni̍. Wānā o̍ wānā nɔ̍ mbō tōsa̍ wa̍li̍ o̍ wa̍li̍ īchīɛ̄ɛ̄ le̍, ɔ̄ɔ̄ mī wānā o̍ wānā to̍sa̍ kpe̍le̍ īyɔ̄m.

⁵ Ndu̍yɛ̍ tɔ̄lɔ̄ɔ̄ o̍ tɔ̄lɔ̄ɔ̍ mi̍i̍ŋgu̍ o̍ hōo̍la̍ nyāla̍ŋ ni᷄ŋ wɔ̍sī kōŋ a̍ ba̍ ndɔ̄ pɛ̍, lā ke̍ndī ndu̍ le̍. O̍ ko̍ŋ kɔ̍ɔ̍lī, yɔ̄mīī nyɛ̄i̍ mākīle̍pīi̍ nya̍ chō mālɔ̄ɔ̄ le̍nde̍ wɔ̍sī kōŋ lā bɛ̍ɛ̍ndīāā ndi̍ le̍ ve̍, lā ke̍e̍ndūū kīle̍pīi̍ma̍ cho̍ wā lēchōo̍ wa̍ŋ te̍. Kāni̍ fo̍ndōle̍, wɔ̄sī kōŋ ki̍nɛ̍i̍, ndu̍ lɛ̄ŋndē nyāle̍ŋ lē nɔ̄ ni̍ mī lē pɛ̄ŋgi̍.

⁶ Mi̍ chē bɛ̍ɛ̍ lā cho̍ la̍wa̍li̍ o̍ lāwa̍li̍ to̍sā wɔ̄sī kōŋ te̍ ni̍, kɛ̍ nyɛ̄ o̍ nyɛ̍ vi᷅l pɛ̍ a̍ bā ndɔ̄ nāa̍ che᷅le̍ŋ, ndu̍ cho̍ wā nyɛ̄ nyā di̍a̍a̍ ni̍, nya̍ pi̍la̍ ni̍, bu̍ɛ̍i̍yāā nyāā pi̍a̍a̍ndūa̍a̍ ni̍, ā lāāndūa̍a̍ ni̍, wānāā nya̍ pāāwā le̍ nya̍ wa̍lta̍ŋ tōsāllo̍ wa̍ ni̍, o̍ ko̍ŋ kɔ̍ɔ̍lī a̍ wānāā lēkāa̍wa̍a̍ cho̍ nya̍ tɛ̍ɛ̍ŋ nda̍.

⁷ O̍ ko̍ŋ kɔ̍ɔ̍lī, chɔ̄lūāā nyāa̍ bɛ̍ɛ̍, a̍ vīsīāā yōndūa̍a̍, nyɛ̄ o̍ nyɛ̄ dīa̍a̍ wu᷅l ni̍ŋ yo̍ndōla̍ŋ ni᷄ŋ a̍ bā ndɔ̄ wɔ̍sī kōŋ, le̍ dīo̍ ndāa̍ o̍ wa᷅ ni̍ŋ ni̍.

A̍ wɔ̄sī nda̍ mīŋgī wa᷅ŋnda̍ nyɔ̄ɔ̍ŋ o̍ bā wo̍ o̍kɔ̄ɔ̄

⁸ “ ‘Te̍le̍ŋ o̍ te̍le̍ŋ tē wɔ̄sīla̍ŋ lā chīŋa̍ pɛ̍ be̍le̍-hi̍ɔ̍ɔ̍lu̍ a̍ lā ŋɔ̄ma̍hīɔ̍ɔ̍lu̍,

⁹ pāŋgi̍i̍ ŋɔ̍mmɛ̍ūve̍ mālɔ̄ tɔ̍ o̍ wɔ̄sī mɛ̄ɛ̄lāa̍ ni᷄ŋ, lā nɔ̄ mī lā bālu̍ a̍ bu̍lu̍la̍ŋ hɔ̄ŋndo̍ chōo̍ cho̍o̍ kpe̍le̍ŋ o̍ lɛ̄ŋnde̍ŋ ni᷄ŋ kpo̍u̍. Pāa̍le̍ ya̍ Mɛ̍lɛ̄ka̍ māl nya̍ I̍sɔ̄lūɛ̍i̍ya̍ le̍ yɔ̄ŋndā nyāla̍ wɔ̍ɔ̍ŋnda̍ŋ nde̍ŋ le̍ cho̍ le̍ŋ ni̍.

¹⁰ Wɔ̄sī be̍le̍-ŋu̍ɛ̍ɛ̍no̍o̍ ndu̍ lā nɔ̄ mī lā chūa̍ ndu̍ māā wɔ̄sī te̍ŋge̍le̍ŋ. Lā nɔ̄ mī lā dīmu̍l wāŋnda̍ māā wɔ̄sīo̍o̍ ho̍ō wɔ̄sī bāŋa᷄ŋndo̍ o̍ cho̍ le̍ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ ni̍, ndu̍yɛ̍ a̍ nyɛ̄ o̍ nyɛ̄ nya̍ nɔ̍ o̍ lɛ̄ŋnde̍ŋ nde᷅ŋ ni᷄ŋ. Wɔ̄sīo̍o̍ ho̍ō wānā o̍ wānā nyɛ̄m ndɔ̄ɔ̍ŋ ki̍ɔ̍ɔ̍ŋ ŋ̄ nɔ̄ mī mīīŋgu̍ ndu̍ o̍ bā ni̍, a̍a̍ yɔ̍ŋ bɛ̍ɛ̍ mī ndu̍ o̍o̍ pi̍si̍ mu̍ŋ wānā o̍ bā. Ndu̍yɛ̍ wānā o̍ wānā nda̍ pi̍si̍ o̍ lēchɛ̄ ni᷄ŋ pɛ̍, wɔ̄sīo̍o̍ ho̍ō o̍ nɔ̍ ni̍ mbō sɔ̄la̍ bāŋa᷄ŋndo̍, mbō mīīŋgu̍ o̍ wānāā ndūa̍a̍ lo̍.

¹¹ Wɔ̄sī bāŋa᷄ŋndo̍ wɔ̄sīo̍o̍ ho̍ō ō chō ni̍. Le̍la̍ŋ wānā o̍ wānā nɔ̍ mā to̍sa̍ wa̍li̍ o̍ wa̍li̍ īchīɛ̄ɛ̄ wɔ̄sī kōŋ te̍. Ndu̍yɛ̍ nyɛ̄ o̍ nyɛ̍ mi̍i̍ŋgu̍ o̍ hōo̍la̍ nyāla̍ŋ ni᷄ŋ wɔ̍sī kōŋ pɛ̍, lā ku̍a̍ū ndu̍ le̍. O̍ ko̍ŋ kɔ̍ɔ̍lī, yɔ̄mīī nyɛ̄i̍ mākīle̍pīi̍ nya̍ chō mālɔ̄ɔ̄ le̍nde̍ wɔ̍sī kōŋ lā bɛ̍ɛ̍ndīāā ndi̍ le̍ ve̍, lā ke̍e̍ndūū kīle̍pīi̍ma̍ cho̍ wā lēchōo̍ wa̍ŋ te̍.

¹² Wɔ̄sī kōŋ kpu̍lu̍ku̍u̍, lā nɔ̄ mī lā chūa̍ ndu̍ māā wɔ̄sī te̍ŋge̍le̍ŋndo̍ o̍ cho̍ le̍ nya̍ ni̍. Tɔ̄lɔ̄ɔ̄ o̍ tɔ̄lɔ̄ɔ̍ cho̍ wūlɔ̄ɔ̄ a̍ bā ndɔ̄ yōndōla̍ŋ ni᷄ŋ wɔ̍sī kōŋ, ndu̍ nya̍ chō wā dīo̍o̍ ni̍.

¹³ “ ‘Wɔ̄sī bāŋa᷄ŋndo̍ wɔ̄sīo̍o̍ ho̍ō ō chō ni̍, wɔ̄sī wānā o̍ wānā nɔ̍ mbō mīīŋgu̍ o̍ nyɛ̄m ndɔ̄ɔ̍ŋ ki̍ɔ̍ɔ̍ŋ chōo̍ wo̍.

¹⁴ Le̍la̍ŋ wānā o̍ wāna̍ wa̍ chāa̍ŋ nūm I̍sɔ̄lūɛ̍i̍nɔ̍ɔ̍ chīɛ̍i̍ pīsīo̍o̍ o̍ bā pɛ̍, ɔ̄ɔ̄ mā wa̍ ndu̍ pīōndɔ̄ɔ̍ o̍ bā pɛ̍, lā to̍sa̍la᷅ŋ lāka̍fā o̍ wɔ̄ŋgūlā lāŋ ni᷄ŋ te̍.

¹⁵ Lɔ̍ɔ̍pa̍ ŋ̄ pīsī, ɔ̄ɔ̄ lɔ̍ɔ̍pa̍ ŋ̄ pīāndū, lā nɔ̄ fɛ̍lɛ̍ŋ mī lā yīya̍ŋ a̍ wɔ̍sīlā chīɛ̄ī kēŋ ī nɔ̄ mī ī wa̍ wānā ko̍ŋ o̍ bā la̍ŋ, ndu̍yɛ̍ mī lā yīya̍ŋ vɛ̍lɛ̄ nyɛ̄ chīɛ̄ī kēŋ ī nɔ̄lā mī ī sōli̍ o̍ wɔ̄sīlā lāŋ bɛ̄ŋgu̍ wo̍.

¹⁶ Le̍la̍ŋ mɛ̄ɛ̍ wɔ̄sīla̍ŋ lā lō le̍ wɔ̄sīlā be̍le̍-ŋu̍ɛ̍ɛ̍nu̍la̍ŋ chīŋāa̍ mī nyɛ̄ o̍ nyɛ̄ ō wa̍ ō bāŋa᷄ŋ yɛ̍, le̍nde̍ ba̍ā chīɛ̍i̍ ī nɔ̄ ni̍ mbō wa̍. Tē wɔ̄sīla̍ŋ lā lo̍ wɔ̄ pɛ̍ ta̍u̍ le̍ wɔ̄sīlā be̍le̍-ŋu̍ɛ̍ɛ̍nu̍la̍ŋ chīŋāa̍, mɛ̄ɛ̍ ba̍a̍ ō nɔ̄ mbo̍ wa̍ cha̍la̍ŋ, kɛ̍ tē wɔ̄sīla̍ŋ lā lo̍ lɛ̍ lā bɔ̄ɔ̍ le̍, mɛ̄ɛ̍ ba̍ā chīɛ̄ī kēŋ ō nɔ̄ mbō wa̍ kpɛ̍dɛ̍. Kāni̍ fo̍ndōle̍, nyɛ̄ chīɛ̄ī kēŋ ī nɔ̄lā mī ī sōli̍ o̍ wɔ̄sīlā lāŋ bɛ̄ŋgu̍ wo̍, ndu̍ nya̍ nɔ̄ ni̍ mī lā tōfa̍.

¹⁷ Wānā o̍ wānā to̍sāl chāa̍ŋ nu̍m lāka̍fā o̍ wɔ̄ŋgūla̍ŋ nda᷅ŋ ni᷄ŋ te̍. Lā tūe̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm.

A̍ nyɛ̍ yɔ̍nūŋ ni̍ŋ o̍ wɔ̄sī ŋɔ᷄mmɛ̍ū pɛ̄ŋgīa̍a̍ ni᷄ŋ ndo̍ o̍kɔ̄ɔ̄

¹⁸ “ ‘Le̍la̍ŋ nyɛ̄ o̍ nyɛ̄ sāwāla̍ nīla̍ŋ lā dīmi̍ le̍ tōsāa̍, ndu̍yɛ̍ a̍ nyɛ̄ o̍ nyɛ̄ pɛ̄ɛ̄kūlā nīla̍ŋ lā dīmi̍ le̍ tōsāa̍, lā tōsa̍ ndu̍, ko̍ŋ to̍sā ni̍ mī lā hīōū lāchī a̍ cha᷄lle̍ o̍ lɛ̄ŋnde̍ŋ nde᷅ŋ ni᷄ŋ, mī lā wa᷄ o̍ bā nyāa̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ a̍ nya̍ le̍.

¹⁹ Ndu̍yɛ̍ lā wā ni̍ŋ nyɛ̍ dīa̍a̍ sɔ̄lāa̍ o̍ chīɔ̄ɔ̄ŋ nyāa̍ŋ ni᷄ŋ ta̍u̍ ta̍u̍, nyɛ̄ dīāā ve᷅ ni̍ŋ nya̍ lēpɛ̄ŋ te̍. O̍ ko̍ŋ kɔ̍ɔ̍lī, lā wānūŋ ni̍ŋ o̍ lɛ̄ŋnde̍ŋ nde᷅ŋ ni᷄ŋ o̍ bā nyāa̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ nya̍ le̍.

²⁰ Mī lā nyūna̍ dɔ̍ɔ̍ āā, “Tē ŋ̄ ve᷄ lāwa̍li̍ to̍sā o̍ wɔ̄sī ŋɔ᷄mmɛ̍ū wo̍ ni᷄ŋ ndu̍yɛ̍ mī ŋ̄ nūūvi̍a̍a̍ nyɛ̄ dīa̍a̍ o̍ hōo̍la̍ nāāla̍ŋ ni᷄ŋ te̍, mɛ̄ɛ̄ vɛ̄ɛ̍nɛ̍ na̍a̍ ŋ̄ chō yɛ̄ wā nyɛ̄ dīa̍a̍ sɔ̄lāa̍ wɔ̄sī kōŋ?”

²¹ I̍ cho̍ chīɔ̄ɔ̄ŋ nyāa̍ŋ a̍ kpe̍le̍la̍ nyāla̍ īyɔ̄mnda̍ŋ sa̍lā dɔ̄wɔ̄ɔ̄ o̍ wɔ̄sī ŋɔ᷄mpu᷅m ndo̍ ni᷄ŋ mī to̍sa̍ mī lā sɔ̄la̍ nyɛ̄ dīa̍a̍ ta̍u̍ ta̍u̍, mbō wa᷄ bɛ̍ɛ̍ le̍ wɔ̄sīla̍ŋ lā yāa̍.

²² Ndu̍yɛ̍ lā wā ni̍ŋ nyɛ̍ dīa̍a̍ ho̍ō dīo̍o̍ mī lā tōsā wa̍lta̍ nyāla̍ ŋ̄chīɛ̄ɛ̄la̍ŋ o̍ wɔ̄sī ŋɔ̄ma̍a̍ wo̍ ni᷄ŋ. Lā lō ni̍ŋ ndu̍ dīo̍o̍ ha̍a̍a̍, mī lā kōū chīɔ̄ɔ̄ŋ nyāa̍ŋ nya̍ chō tōsā o̍ wɔ̄sī ŋɔ̄ma̍hīɔ̍ɔ̍lo̍o̍ ni᷄ŋ ndo̍ŋ.

A̍ wāŋnda̍ nyɛ̄m ndāa̍ŋ nda̍ pīsi̍ wo̍ŋ mīŋgīo̍o̍ o̍ bā o̍kɔ̄ɔ̄

²³ “ ‘Wānā o̍ wānā a̍ nɔ̍ mā pi̍si̍ wāŋndo̍ chīɛ̍i̍ o̍ bā, mī chīɛ̄ī kēŋ ī wa̍ le̍ wānā ko̍ŋ le̍ fɛ̍ɛ̍ŋ a̍ fɛ̍ɛ̍ŋ te̍. Kāni̍ fo̍ndōle̍, ya̍ Mɛ̍lɛ̄ka̍ ya̍ nɔ̍ lɛ̄ŋndē lēŋ ni̍. Lā chō māchūāā mɛ̄ɛ̍ mīālla̍ ā chō nu̍a̍ā yɛ̍, kīo̍o̍ ko̍ni̍ ya̍ I̍ ke̍ nya̍ ni̍ mī lā tōsa̍ chīɔ̄ɔ̄ŋ nyāa̍ŋ lēchōo̍.

²⁴ Ndu̍yɛ̍ o̍ lɛ̄ŋnde̍ŋ nde᷅ŋ ni᷄ŋ ki̍nɛ̍i̍, lɛ̄ŋndē ya̍ I̍ ke̍ nya̍ le᷅ŋ nde̍ŋ, lɔ̍ɔ̍pa̍ mī wānā pi̍si̍ chīɛ̍i̍ wānā o̍ wāna̍ che᷅le̍ŋ o̍ bā, ā nɔ̄ fɛ̍lɛ̍ŋ mā nyu̍na̍ wāna̍ ndu̍ o̍o̍ pi̍si̍ chīɛ̄ī kēŋ nu̍m o̍ bā wo̍, ko̍ ō yēēma̍ le̍ mīŋgīo̍o̍ pīōndɔ̄ɔ̍ wo̍o̍.

²⁵ Tē ō wa̍ pɛ̍ mī pɛ̄ŋnde̍ŋ lē bīī chāa̍ŋ nūm I̍sɔ̄lūɛ̍i̍nɔ̍ɔ̍ mbo̍ pīsī nyɛ̄m ndɔ̄ɔ̍ŋ ŋ̄ ti᷄ŋ nu̍m o̍ bā, chāa̍ŋ nūm I̍sɔ̄lūɛ̍i̍nɔ̍ ko̍ŋ wāna̍ cho̍ wānāyɛ̍ī ndūɛ̄ī kpe̍e̍kpe̍i̍ye̍ wo̍, ō nɔ̄ di̍ mbō bāŋa̍ nyɛ̄m mu᷅ŋ nu̍m o̍ bā.

²⁶ Tē ō wa̍ pɛ̍ māā chāa̍ŋ nūm ko̍ŋ ō nɔ̍ īwānāya̍ kpo̍so̍ŋ le̍ nyɛ̄m mu᷅ŋ bāŋāa̍ le̍, kɛ̍ mi̍ ndu̍ pi̍la̍ ō dīī ni᷅ŋ dɛ̍nɛ̍ mbo̍ sɔ̄lā nyɛ̄ sɔ̄lāa̍ le̍ nyɛ̄m ndɔ̄ɔ̍ŋ bāŋāa̍ nu̍m o̍ ba̍ pɛ̍,

²⁷ ō nɔ̄ di̍ mbō bāŋa̍ nyɛ̄m ndɔ̄ɔ̍ŋ. Kɛ̄ ndu̍yɛ̍ tē ō wa̍ nyɛ̄m mu᷅ŋ bāŋāa̍ pɛ̍, ō nɔ̄ mbō chɔ᷄m wɔ̄sīla̍ lo̍ le̍ chīŋāa̍ le̍ mī nyɛ̄ o̍ nyɛ̄ ō wa̍ ō bāŋa᷄ŋ nda̍ŋ, ndu̍yɛ̍ a̍ nyɛ̄ wānā ko̍ŋ ō sɔ̄la̍ o̍ wɔ̄sīla̍ hi̍o̍ū ni᷅ŋ nda̍ŋ bɛ̄ŋgu̍ wo̍. Wɔ̄sīlā tɔ̄la̍ cho̍ lō le̍ wɔ̄sīlā be̍le̍-ŋu̍ɛ̍ɛ̍nu̍la̍ŋ chīŋāa̍ la̍ŋ, tē lā fāŋa̍ nyɛ̄ wānā ko̍ŋ ō sɔ̄la̍ o̍ wɔ̄sīla̍ hi̍o̍ū la̍ŋ bɛ̄ŋgu̍ wo̍ pɛ̍, nyɛ̄ o̍ nyɛ̍ lo̍ le̍ pāāwāa̍ le̍ wɔ̄sīlā tɔ̄la̍ lo̍ la̍ŋ pɛ̍, wānā ko̍ŋ ō nɔ̄ mbō pāāwa̍ kpo̍u̍ ma̍lāŋ o̍ sɔ̍lā nyɛ᷅m mu᷅ŋ.

²⁸ Kɛ̍ tē wānā ko̍ŋ ō nɔ̍ kpa̍āya̍ o̍ ba̍ŋa̍ nyɛ̄ ndɔ̄ ko̍ŋ te̍, wānā ko̍ŋ ō nɔ̄ mbō chu᷄m mī wɔ̄sī be̍le̍-ŋu̍ɛ̍ɛ̍no̍o̍ ō fūūlu̍u̍, wɔ̄sī wānā o̍ wānā nɔ̍ mbō mīŋgi̍ nyɛ̄m ndɔ̄ɔ̍ŋ sɔ̄lā wo̍. Tē wɔ̄sī kōŋ ō fūūlu̍u̍ pɛ̍, wānā kōŋ nyɛ̄ ndɔ̄ɔ̍ mīīŋgu̍ ndu̍ o̍ bā.

²⁹ Tē wāŋndo̍ ō lēndu̍l chīɛ̄ī ndɔ̄ɔ̍ o̍ chi̍e̍e̍ cho̍ ō bālāā a̍ sāāsā ka̍lā ka̍lāa̍ wo̍ pɛ̍, wānā ko̍ŋ ō nɔ̄ wɔ̄sīo̍o̍ ō pīlɛ̍ le̍ mbō bāŋa̍ chīɛ̄ī ndɔ̍ ko̍ŋ chɔ̍ŋ a̍ te̍le̍ŋ o̍ pi̍si̍ ndu̍ wo̍. Wānā ko̍ŋ ō nɔ̄ mbō bāŋa̍ chīɛ̄ī ndɔ̄ ko̍ŋ o̍ wɔ̄sī kōŋ ni᷄ŋ.

³⁰ Kɛ̍ tē ō bāŋa̍ ndu̍ o̍ wɔ̄sīī pīlɛ̍i̍ kēŋ bɛ̄ŋgu̍ le̍, mɛ̄ɛ̍ chīɛ̄ī kōŋ ō cho̍ lɛ̍ le̍ ndu̍ le̍. Wāna̍ o̍ le̍ndu̍l chīɛ̄ī kōŋ o̍ bā wo̍ nda̍ yu̍ŋgu̍ ndɔ̄ɔ̍ nda̍ nɔ̍ ni᷅ŋ nyɛ̄m kɛ᷅ŋ mu᷅ŋ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍ ā yɔ᷄ŋ bɛ̍ɛ̍ mī wɔ̄sī nyɛ̄ o̍ nyɛ̄ ō nɔ̄ mbō sɔ̄la̍ bāŋa᷄ŋndo̍ wo̍ ō fūūlu̍u̍, wānā ko̍ŋ ō sɔ̍lā lɛ̍ chīɛ̄ī kōŋ te̍.

³¹ Kɛ̍ chīɛ̄īla̍ cho̍ o̍ sɔ̄ndɔ̄kɔ̍lta̍ cho̍ la̍ ba̍lāā a̍ lāsāāsā le̍ la̍ŋ ki̍nɛ̍i̍, tē wāŋndo̍ ō lēndu̍l chīɛ̄ī ndɔ̄ wa̍ā le̍nde̍ pɛ̍, wānā ko̍ŋ ō nɔ̄ di̍ mbō bāŋa̍ chīɛ̄ī ndɔ̄ ko̍ŋ le̍ te̍le̍ŋ o̍ te̍le̍ŋ, mɛ̄ɛ̍ wāŋndo̍ ō nɔ̄ nu̍a̍ā di̍o̍o̍ le̍ nyɛ̄m ndɔ̄ɔ̍ŋ bāŋāa̍ yɛ̍. Ndu̍yɛ̍ tē wānā ko̍ŋ ō nɔ̄la̍ ndu̍ bāŋā le̍, tē wɔ̄sīī bāŋa᷄ŋnde̍ ī fūūlu̍u̍ pɛ̍, wānā ko̍ŋ ō nɔ̄ mbō sɔ̄la̍ chīɛ̄ī ndɔ̄ɔ̍.

³² Kɛ̍ Līva̍īya̍ o̍ chi̍e̍e̍ŋ ndāa̍ŋ ni᷄ŋ ki̍nɛ̍i̍, tē ō pīlɛ̍ ō pīsi̍ chīɛ̄ī ndɔ̄ɔ̍ wānā o̍ wānā o̍ bā pɛ̍, ō nɔ̄ di̍ mbō mīŋgi̍ chīɛ̄ī ndɔ̄ ko̍ŋ pīōndɔ̄ɔ̄ te̍le̍ŋ o̍ te̍le̍ŋ.

³³ Līva̍īya̍ ki̍nɛ̍i̍, nyɛ̄ o̍ nyɛ̄ ō pīlɛ̍ lēndu̍l wānā o̍ wānā o̍ bā pɛ̍, ō nɔ̄ di̍ mbō bāŋa̍ nyɛ̄ ndɔ̄ ko̍ŋ te̍le̍ŋ o̍ te̍le̍ŋ. O̍ chi̍e̍e̍ŋ ndāa̍ŋ ni᷄ŋ ki̍nɛ̍i̍, tē ō pīlɛ̍ ō lēndu̍l chīɛ̄ī ndɔ̄ɔ̍ pɛ̍, kɛ̍ mbō nɔ̄la̍ chi̍ɛ̍ī ndɔ̄ ko̍ŋ bāŋā le̍, tē wɔ̄sīī be̍le̍-ŋu̍ɛ̍ɛ̍nu̍e̍i̍ ī fūūlu̍u̍ pɛ̍, chīɛ̄ī ndɔ̄ ko̍ŋ ō nɔ̄ mbō mīīŋgu̍ ndu̍ o̍ bā. Kāni̍ fo̍ndōle̍, Līva̍īya̍ ki̍nɛ̍i̍, chīɛ̄īlā ndāla̍ nda̍ sɔ̄la̍ o̍ chi̍o̍o̍ŋ ni᷄ŋ nda̍ŋ, la̍ŋ la̍ cho̍ nyɛ̄m ndāa̍ŋ ŋ̄ki̍ɔ̍ŋ I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ ni̍.

³⁴ Kɛ̍ fo̍ndāŋndā māndāālā chɔ̄lūāā cho̍ chi̍e̍e̍ŋ ndāa̍ŋ lā bālāā la̍ŋ ki̍nɛ̍i̍, lā nɔ̍ mī lā pīsi̍ŋ te̍, fo̍ndōle̍, fo̍ndāŋnda̍ cho̍ le̍ nda̍ le̍ fɛ̍ɛ̍ŋ a̍ fɛ̍ɛ̍ŋ nda̍ŋ la̍ cho̍ ni̍.

Sāwāla̍ cho̍ a̍ wānāā tāmbɛ̍i̍ya̍ kūēēla̍ŋ wūūwo̍ o̍kɔ̄ɔ̄ la̍ŋ

³⁵ “ ‘Tē chāa̍ŋ nūm I̍sɔ̄lūɛ̍i̍nɔ̍ɔ̍ ō wa̍ nu̍m īkɛ̄i̍ pɛ̍ ma̍ chā māā pɛ̄ŋnde̍ŋ lē bīī ndu̍ māā ō nɔ̍lā mbō sɔ̄la̍ nyɛ̄ o̍ nyɛ̄ a̍ bā ndɔ̍ le̍ pɛ̍, ma̍la̍ ndu̍ mɛ̄ɛ̍ ŋ̄ mālā nu̍a̍ā wāna̍ lēkāa̍ kɛ̄lɛ̄ŋgāā mīa̍l hi᷅ŋ nu̍m o̍ bɛ̄ŋgu̍ cho̍o̍ le̍ te̍le̍ŋ bi̍ŋgī wo̍ yɛ̍. Chu̍a̍ ndu̍ mbō wa̍ mīāl nūm.

³⁶ Ndu̍yɛ̍ tē chāa̍ŋ nūm I̍sɔ̄lūɛ̍i̍nɔ̍ ko̍ŋ ō bīī nu̍m kūo̍o̍ o̍ bā pɛ̍, he̍ndūl ndu̍ ba̍na̍sīi̍ le̍cho̍ō le̍, ɔ̄ɔ̄ mā nu̍u̍va̍ tɔ̄nɔ̄ o̍ tɔ̄nɔ̄ ndu̍ o̍ īdīāl o̍ nɛ̄ī o̍ nɛ̄ī ni᷄ŋ. Lā nɔ̄ mī lā wo᷄ ya̍ Mɛ̍lɛ̄ka̍ o̍ sūɛ̍i̍ wa̍ā le̍nde̍ ni̍ŋ. Ā nɔ̄ mā to̍sa̍ mi̍ cha᷄ŋ nūm I̍sɔ̄lūɛ̍i̍nɔ̍ ko̍ŋ ō hīōū lāchī a̍ wāa̍ nu̍m īkɛ̄i̍.

³⁷ Wu̍ū ndu̍ nyɛ̄ sɔ̄lāa̍ kūo̍o̍ mā hēndu̍l ndu̍ ba̍na̍sīi̍ le̍cho̍ō le̍, ɔ̄ɔ̄ mā pi̍si̍ ndu̍ nyɛ̄ dīa̍a̍ o̍ bā le̍ tɔ̄nɔ̄ɔ̍ sɔ̄lāa̍ le̍.

³⁸ Ya̍ cho̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Ya̍ ba̍ŋa̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍ mi̍ hu᷅ŋ a̍ nya̍ mi̍ hu̍ŋ ke᷅ nya̍ lɛ̄ŋndē Ke̍nāŋnde̍ŋ, ndu̍yɛ̍ mī wa̍ Mɛ̄lɛ̄ka̍ nyā.

³⁹ Tē pɛ̄ŋnde̍ŋ lē bīī cha᷄ŋ nūm I̍sɔ̄lūɛ̍i̍nɔ̍ɔ̍ pɛ̍, mbō kɔ̍ cha᷅l nu̍m o̍ bā o̍ lāndēi̍ ni᷄ŋ, sa̍a̍ŋgīāā ndu̍ māā chɛ̄ le̍.

⁴⁰ Bi̍i̍ ndu̍ mɛ̄ɛ̍ ŋ̄ bīī bu̍ɛ̍ī nu̍m wa̍llo̍, ɔ̄ɔ̄ mɛ̄ɛ̍ ŋ̄ bīī wa᷅na̍ lēkāa̍ o̍ hi᷅ŋ nu̍m o̍ bɛ̄ŋgu̍ cho̍o̍ le̍ te̍le̍ŋ bi̍ŋgī wo̍ yɛ̍. Chāa̍ŋ nūm I̍sɔ̄lūɛ̍i̍nɔ̍ ko̍ŋ ō nɔ̄ mbō tōsa̍l nu̍m wa̍llo̍ ha̍a̍a̍ mī wɔ̄sī be̍le̍-ŋu̍ɛ̍ɛ̍no̍o̍ ō fūūlu̍u̍.

⁴¹ Tē wɔ̄sī kōŋ ō fūūlu̍u̍ pɛ̍, ā nɔ̄ mā ma̍l ndu̍ mbō mīīŋgu̍ o̍ būŋgɛ̄ī ndūɛ̍i̍ ni᷄ŋ, o̍ nyɛ̄m ndɔ̄ɔ̍ŋ kɛ᷅ŋ fi̍nyāā ndūāā ma̍māa̍ ā me᷄l ndu̍ wo̍ŋ chōo̍ nda̍ chūāūwāā ndūa̍a̍.

⁴² Kāni̍ fo̍ndōle̍ nya̍ wāŋnda̍ I̍sɔ̄lūɛ̄ī, bu̍ɛ̍i̍yāā nīa̍a̍ nya̍ chō ni̍, nya̍ ya̍ I̍ so̍li̍ o̍ lɛ̄ŋndē I̍chi̍pīle̍ŋ ni᷄ŋ ni̍. Ō kɛ᷅ kɛ᷅ ō nɔ̍ mbō wa̍ ō pīsīāā o̍ lēchɛ̄ ni᷄ŋ te̍.

⁴³ Ndu̍yɛ̍ tē chāa̍ŋ nūm I̍sɔ̄lūɛ̍i̍nɔ̍ɔ̍ ō kɔ᷄ cha᷅l nu̍m o̍ bā o̍ lāndēi̍ ni᷄ŋ pɛ̍, bi̍ī ndu̍ bīyɔ̄ɔ̄ wɔ̄ɔ̍ŋ te̍, lā tūe̍i̍ Mɛ̍lɛ̄ka̍ nyāa̍ dīōm.

⁴⁴ Tē lā yēēma̍ chīa̍a̍ pɛ̍, ā pīāāndū ni̍ ā lāāndū ni̍, lā pīāndū nda̍ lɛ̄ŋīi̍ ba̍lu̍ nya̍ ve̍ o̍ bā.

⁴⁵ O̍ ko̍ŋ kɔ̍ɔ̍lī, wānāā lēkāa̍wa̍a̍ hi᷅ŋ le̍ nya̍ cha᷄lle̍ tɛ̄ɛ̄ŋ nda̍ ni̍, chūāūwāā ndāa̍ nda̍ vēlū o̍ lɛ̄ŋndē nyāle̍ŋ ni᷄ŋ nda̍ ni̍, lā pīāndū vɛ̍lɛ̄ ka̍ŋ mī lā sīīŋgu̍u̍ nda̍ chīa̍a̍ nyā. O̍ ko̍ŋ, mā sīmnu᷄ŋ nyɛ᷅m nyāa̍ŋ ŋ̄kɛ᷅.

⁴⁶ Chīāā nya̍ pīāndū ka̍ŋ nda̍, lā mēl chu̍a̍u̍wāā nyāa̍ nda̍ māā nyɛ̄m ŋ̄kɛ᷅, mā wa᷄ chīāā nyāa̍ le̍ fɛ̍ɛ̍ŋ a̍ fɛ̍ɛ̍ŋ. Kɛ̍ wānā o̍ wānā a̍ bi̍ī chāa̍ŋ nūm I̍sɔ̄lūɛ̍i̍nɔ̍ɔ̍ bīyɔ̄ɔ̄ lēchīɔ̍ɔ̍ mā ha̍ndu̍ ndu̍ nyɛ̄ kīndīlāā chōo̍ le̍.

⁴⁷ Mī ī yɔ̄nu̍ŋ dɔ̍ɔ̍ mī wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ō pīlɛ̍ ō sūl. O̍ ko̍ŋ kɔ̍ɔ̍lī, mī pɛ̄ŋnde̍ŋ lē bīī I̍sɔ̄lūɛ̍i̍ya̍a̍ nda̍ chīɛ̄ɛ̄li̍āŋ nda̍ ō pīlɛ̍, mī I̍sɔ̄lūɛ̍i̍nɔ̍ ko̍ŋ ō kɔ̍ cha᷅l wāna̍ lēkāa̍ ko̍ŋ o̍ bā o̍ lāndēi̍ ni᷄ŋ, ɔ̄ɔ̄ mbō kɔ᷄ cha᷅l wāna̍ lēkāa̍ ko̍ŋ wānāa̍ fu̍la̍ o̍ yu̍ŋgu̍ ndɔ̄ɔ̍ chōo̍ wa̍ ō pīlɛ̍ o̍ bā o̍ lāndēi̍ ni᷄ŋ.

⁴⁸ Tē ī yɔ̄nu̍ŋ le̍nde̍ pɛ̍, I̍sɔ̄lūɛ̍i̍nɔ̍ ko̍ŋ ō nɔ̄ di̍ mbō sɔ̄la̍ bāŋa᷄ŋndo̍ o̍ lāndīī kēŋ bɛ̄ŋgu̍. Wānāyɛ̍ī ndūɛ̍i̍ ī nɔ̄ di̍ mī ī bāŋa̍ ndu̍ wāna̍ lēkāa̍ kōŋ o̍ bā.

⁴⁹ Ō wa̍ bo᷅m ndɔ̄, ō wa̍ to̍o̍ŋgo̍o̍ ndɔ̄, ɔ̄ɔ̄ ō wa̍ wānāyɛ̍ī ndūɛ̄ī kpe̍e̍kpe̍i̍ye̍ ī pīlɛ̍, ō nɔ̄ di̍ mbō bāŋa̍ I̍sɔ̄lūɛ̍i̍nɔ̍ ko̍ŋ. Tē ō sɔ̄la̍ yɛ̍ wānā o̍ wāna̍ ba̍ŋa̍ ndu̍ le̍, tē te̍le̍ŋ fu̍u̍lu̍u̍ pɛ̍, mbō sɔ̄la̍ nyɛ᷄, ndu̍ pi̍la̍ ba̍ŋa̍ŋ.

⁵⁰ Le̍ mī I̍sɔ̄lūɛ̍i̍nɔ̍ɔ̍ ho̍ō ō sɔ̄la̍ bāŋa᷄ŋndo̍, ndu̍ ni̍ a̍ wāna̍ lēkāa̍ o̍ cho̍ o̍ bā o̍ chɛ̄le̍ŋ ni᷄ŋ ndo̍, ā nɔ̄ mā chɔ᷄m wɔ̄sīla̍ŋ chɔ̍ŋ a̍ wɔ̄sī o̍ pi̍si̍ŋ o̍ chɛ̄lēlēŋ ni᷄ŋ ndo̍, ha̍a̍a̍ mbō fūūlu̍u̍ o̍ wɔ̄sīī bāŋa᷄ŋnde̍. Tē ā chɔ᷄m wɔ̄sīlā lāŋ pɛ̍, wɔ̄sīla̍ cho̍ lō le̍ wɔ̄sīī be̍le̍-ŋu̍ɛ̍ɛ̍no̍o̍ chīŋāa̍ la̍ŋ, I̍sɔ̄lūɛ̍i̍nɔ̍ ko̍ŋ ō pāāwa̍ wāna̍ lēkāa̍ ko̍ŋ le̍ wɔ̄sīlā lāŋ. Ndu̍yɛ̍ mɛ̄ɛ̍ nda̍ pāāwā wa᷅na̍ wa̍llo̍ pāāwā lēpāla̍a̍ le̍ wɔ̄sīo̍o̍ kpu̍lu̍ku̍u̍ yɛ̍ le̍nde̍ o̍ nɔ̍ ni̍ mbō pāāwa̍ wāna̍ lēkāa̍ ko̍ŋ le̍ wɔ̄sīlā tɔ̄la̍ lo̍ la̍ŋ nda̍ŋ.

⁵¹ Tē wɔ̄sīla̍ŋ lā lo̍ wɔ̄ pɛ̍ ta̍u̍, mɛ̄ɛ̍ le̍nde̍ ko̍ni̍ o̍ nɔ̍ ni̍ mbō pāāwa̍ wāna̍ lēkāa̍ ko̍ŋ.

⁵² Tē wɔ̄sīla̍ lo̍ le̍ chīŋāa̍ la̍ŋ lā lo̍ lɛ̍ lā bɔ̄ɔ̍ le̍, mɛ̄ɛ̍ le̍nde̍ ko̍ni̍ o̍ nɔ̍ vɛ̄lɛ̄ le̍ nyɛ̄ sɔ̄lāa̍ pāāwāa̍ kpɛ̍ndɛ̍ ni̍.

⁵³ Ndu̍yɛ̍ te̍le̍ŋ I̍sɔ̄lūɛ̍i̍nɔ̍ɔ̍ ho̍ō ō chō wā wāna̍ lēkāa̍ ko̍ŋ o̍ bā o̍ lāndēi̍ ni᷄ŋ ndo̍, wāna̍ lēkāa̍ ko̍ŋ ō nɔ̄ mbō bīī I̍sɔ̄lūɛ̍i̍nɔ̍ɔ̍ ho̍ō mɛ̄ɛ̍ nda̍ bīī wa᷅na̍ wa̍li̍ nda̍ chūā le̍ ndu̍ pāāwāa̍ a̍ wɔ̄sīo̍o̍ŋ ndo̍ yɛ̍. Nya̍ I̍sɔ̄lūɛ̍i̍ya̍a̍ tu̍a̍a̍ lā nɔ̍ mī lā lo̍ tōfāa̍ mī wāna̍ lēkāa̍ ko̍ŋ ō wa̍ I̍sɔ̄lūɛ̍i̍nɔ̍ ko̍ŋ bīyɔ̄ɔ̍ ō kālā ka̍lā le̍.

⁵⁴ Tē I̍sɔ̄lūɛ̍i̍nɔ̍ɔ̍ ho̍ō ō sɔ̄la̍ dɔ̍ɔ̍ bāŋa᷄ŋ kpo̍sōŋ o̍ wɔ̄sīla̍ŋ nda᷅ŋ bɛ̄ŋgu̍ le̍, mbō lo̍ o̍ ko̍ŋ mī wɔ̄sī be̍le̍-ŋu̍ɛ̍ɛ̍no̍o̍ ō fūūlu̍u̍, mɛ̄ɛ̍ I̍sɔ̄lūɛ̍i̍nɔ̍ ko̍ŋ nda̍ chūāūwāā ndūa̍a̍ kpo̍u̍ ā nɔ̄ mā sɔ̄la̍ bāŋa᷄ŋndo̍.

⁵⁵ Kāni̍ fo̍ndōle̍, ya̍ Mɛ̍lɛ̄ka̍ I̍ chu̍a̍ māchūāā nya̍ wāŋnda̍ I̍sɔ̄lūɛ̄ī māā bu̍ɛ̍i̍yāā ni̍. Ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.’ ”