Lɛ̄vi̍ti̍kɔ̍ɔ̄ 24 - Yāu̍ Mɛ̄lɛ̄ka̍a̍

Sāwāla̍ cho̍ a̍ la̍mbūi̍la̍ŋ māndāa̍ o̍kɔ̄ɔ̄ la̍ŋ

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “La̍mbūi̍la̍ cho̍ o̍ fo̍ndā nī di̍a̍ndāa̍ la̍ŋ lā nɔ̄ mī lā wa̍ sānde̍i̍ le̍ te̍le̍ŋ o̍ te̍le̍ŋ. Le̍la̍ŋ di̍mu̍l wa᷅ŋnda̍ I̍sɔ̄lūɛ̄ī mā wa̍ nu̍m chūɛ̄īmā ɔ̄li̍fīi̍mā kɛ̄ndɛ̄ kɛ̍ndīa̍ŋ chūūwo̍ le̍ dɔ̄wɔ̄ɔ̍ o̍ la̍mbūi̍la̍ŋ nda᷅ŋ ni᷄ŋ.

³ Īchɔ̄l o̍ īchɔ̄l, kōlā bɛ̍ndu̍ cho̍ ō lāndāā kɔ̍fū kpe̍ma̍ Mɛ̄lɛ̄ka̍a̍ lāchī o̍ Tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, o̍ fo̍ndā dīāndāa̍ hi̍o̍ū kpo̍u̍ wo̍ wo̍, E̍lɔ̄ŋ o̍ nɔ̍ mbō mɛ̄ndu̍l la̍mbūi̍la̍ŋ o̍ kōlā bɛ̍ndū kōŋ lāchī, kūmbu̍ bā bi̍ɔ̍ɔ̍, mī la̍mbūi̍la̍ la̍ŋ lā lɔ᷄l sānde̍i̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l lo̍ŋ ha̍a̍a̍ mī pāa̍le̍ŋ lē sɛ̄. He̍ī ī nɔ̄ mī wa̍ māā sāwā le̍ fɛ̍ɛ̍ŋ a̍ fɛ̍ɛ̍ŋ, le̍ nya̍ a̍ yu̍ŋgu̍la̍ fu̍lā ni̍ŋ o̍ pūlāle̍ nyāle̍ŋ ni᷄ŋ nda᷄ŋ.

⁴ O̍ ko̍ŋ kɔ̍ɔ̍lī, la̍mbūi̍la̍ pīlɛ̍ la̍ŋ nda᷅ŋ kpe̍, la̍ cho̍ lā kɛ̄sīāā o̍ nyɛ̄ kɛ̄sīāā lāla̍mbūi̍ īko̍o̍līi̍ kɛ̍ndɛ̄ kɛ̍ndɔ̄ɔ̍ chōo̍ la̍ŋ, E̍lɔ̄ŋ o̍ nɔ̍ mbō wa̍ la̍mbūi̍la̍ŋ ndāŋ māndāa̍ mɛ̄ɛ̍ la̍ nɔ̍ le̍ wāa̍ yɛ̍, ndu̍yɛ̍ mbō wa̍ la̍ŋ mɛ̄ndūllo̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī le̍ te̍le̍ŋ o̍ te̍le̍ŋ.”

A̍ mɛ̄ɛ̍ nda̍ tōōsīāā be̍e̍dīi̍ wa᷅ o̍ yɔ̍ŋa᷄ŋ o̍ Mɛ̄lɛ̄ka̍ lo̍ wo̍ yɛ̍ o̍kɔ̄ɔ̄

⁵ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Ā nɔ̄ mā chu̍a̍ kōlō to̍o̍sīāā bēe̍dīi̍yo̍, ō kɛ̄ndɛ̄ kɛ̍ndɔ̄ɔ̍, mā to̍o̍si̍a̍a̍ bēe̍dīi̍yo̍ kpūŋgba᷄ŋ tɔ̍ a̍ ŋ̄ mūu̍ŋ a̍ kōlō ko̍ŋ. Bēe̍dīi̍yo̍ ho̍ō īkpūŋgbāa̍ o̍ īkpūŋgbāa̍, kōlo̍ ŋ̄ nɔ̄ mā to̍o̍si̍a̍a̍ ndu̍ wo̍ ō nɔ̄ mbō wa᷄ pa᷅ŋnda̍ŋ lā hīɔ̍ɔ̍lu̍.

⁶ Tē a̍ to̍o̍si̍a̍a̍ bēe̍dīi̍yo̍ ho̍ō pɛ̍, a̍ yɛ̍ɛ̍mbu̍u̍ ndu̍ pūla᷄ŋ mā mīɔ̍ɔ̍ŋ o̍ ti̍bīi̍ cho̍ ō tōōsīāā a̍ ko̍o̍līi̍ kɛ̍ndɛ̄ kɛ̍ndɛ̄i̍ yo̍ chōo̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī, lēpūlā o̍ lēpūlā kpūŋgba᷄ŋ ŋ̄ ŋɔ᷄mpu᷅m.

⁷ Tē a̍ yɛ̍ɛ̍mbu̍u̍ ndu̍ le̍nde̍ a̍ pūla᷄ŋ pɛ̍, ā chūchū nyɛ̄m chūŋ kɛ̄ndɛ̄ kɛ̍ndɔ᷄ŋ o̍ pūlāma̍ ma̍ŋ da̍ŋga̍lta̍ŋ chɛ̍chɛ̍. Nyɛ̄m chūŋ kɛ̄ndɛ̄ŋ mu᷅ŋ mu̍ŋ nɔ̍ ni̍ mī ŋ̄ lōmnu᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā sɔ̍ŋgɔ̍ bēe̍dīi̍ ko̍ŋ.

⁸ O̍ pāa̍le̍ o̍ pāa̍le̍ nīle̍ pɛ̍ŋgīāā chōo̍, E̍lɔ̄ŋ o̍ nɔ̍ mbō kɛ̄si̍ bēe̍dīi̍yo̍ ho̍ō le̍nde̍ ya̍ Mɛ̄lɛ̄ka̍ Ya̍a̍wɛ̄ɛ̄ lāchī le̍ I̍sɔ̄lūɛ̍i̍ya̍ kpo̍u̍. He̍ī chō māchūāā māā kpe̍ma̍a̍ na̍a̍ tɛ̍ɛ̍ŋ na̍a̍ I̍sɔ̄lūɛ̍i̍ya̍ le̍ fɛ̍ɛ̍ŋ a̍ fɛ̍ɛ̍ŋ.

⁹ Ndu̍yɛ̍ bēe̍dīi̍yo̍ ho̍ō, E̍lɔ̄ŋ nda̍ pūa̍a̍ ndūa̍a̍ fu̍la̍ o̍ pūlālē ndɔ̄le̍ŋ chōo̍ wa̍, le̍ nda̍ o̍ cho̍ ni̍. Ndu̍yɛ̍ ā nɔ̄ mā dē bēe̍dīi̍yo̍ ho̍ō o̍ fo̍ndā kāsīo̍o̍ ya̍ Mɛ̍lɛ̄ka̍ o̍ hɔ̄l la̍ŋ, fo̍ndōle̍, sa̍lā lūāmāā nya̍ chō ko̍ŋ so̍lī o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍, ō lēbōllo̍ kpe̍e̍kpe̍i̍, ndu̍ cho̍ bēe̍dīi̍ cho̍ ko̍ŋ le̍ yu̍ŋgu̍ wānāā sōlīāā lāsa̍lāa̍ wo̍ ni̍. Ā nɔ̄ mā wa̍ ndu̍ sɔ̄lāa̍ le̍ te̍le̍ŋ o̍ te̍le̍ŋ.”

Tē wāŋndo̍ ō dīmi̍ dīōmndā wɔ̄ɔ̍ŋnda̍ŋ a̍ Mɛ̄lɛ̄ka̍ pɛ̍, dɛ̍nɛ̍ pa̍lāā o̍ nɔ̍ mbō sɔ̄la̍ wo̍ cho̍ ho̍ō ni̍

¹⁰ Pāa̍le̍ pi᷅lɛ̍, mi̍ chūā I̍sɔ̄lūɛ̍i̍nɔ̍ pi᷅lɛ̍ po̍ ndɔ̄ɔ̍ ō kūā o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ni᷄ŋ, ma̍ kɔ̍ sɔ̍ŋgā nda̍ I̍sɔ̄lūɛ̍i̍nɔ̍ɔ̍. Ndu̍yɛ̍ pōo̍ ho̍ō fi̍nyā ndɔ̄ I̍chi̍pīnɔ̄ɔ̍ o̍ wa̍ ni̍.

¹¹ Mi̍ po̍ sɔ̍ŋga̍ ko̍ŋ a̍ I̍sɔ̄lūɛ̍i̍nɔ̍ɔ̍ wo̍, ō dīmī dīōmndā wɔ̄ɔ̍ŋ wɔ̄ɔ̍ŋnda̍ŋ a̍ Mɛ̄lɛ̄ka̍ Ya̍a̍wɛ̄ɛ̄. O̍ ko̍ŋ, ma̍ bīī ndu̍ ma̍ hūŋ a̍ ndu̍ nāa̍ Mūu̍sē chu̍a̍. Ndu̍yɛ̍ pōo̍ ho̍ō kāla̍ ndɔ̍ dīōla̍ŋ āā Si̍ɛ̍lo̍mi̍tī, chūa̍ Di̍bi̍lūī wo̍, fūlāa̍ o̍ yu̍ŋgu̍ Da᷅ŋndo̍ chōo̍.

¹² O̍ ko̍ŋ kɔ̍ɔ̍lī, ma̍ kɛ̄sī pōo̍ ho̍ō o̍ bīyɔ̄ɔ̍ ni᷄ŋ le̍ mī ndu̍ o̍o̍ lo̍ lo̍ŋ, mī Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ chɔ̍m nda̍ nyɛ̄ nda̍ a̍a̍ nɔ̍ mā tōsa̍ a̍ pōo̍ ho̍ō wo̍.

¹³ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹⁴ “Lā sōli̍ po̍ ko̍ŋ o̍ dɔ̍ɔ̍ŋgɔ̍ɔ̍ ni᷄ŋ. O̍ ko̍ŋ kɔ̍ɔ̍lī, mā di̍mu̍l wānāa̍ tu̍e̍ī ndu̍ mbo̍ dīmī dīōmndā wɔ̄ɔ̍ŋnda̍ŋ a̍ ya̍ Mɛ̍lɛ̄ka̍ wa̍ ki̍nɛ̍i̍, mā hāndu̍ ndu̍ bāla̍ŋ o̍ lēbōl le̍ chɔ̄mndo̍ māā pōo̍ ho̍ō ō to̍sa̍ yɔ̄ŋ wɔ̄ɔ̍ŋ wāā le̍nde̍. O̍ ko̍ŋ kɔ̍ɔ̍lī, mī I̍sɔ̄lūɛ̍i̍ya̍ kpo̍u̍ a̍ lo̍ ndu̍ vīīyo̍ a̍ pōūta̍ŋ mbō vī.

¹⁵ Ndu̍yɛ̍ di̍mu̍l I̍sɔ̄lūɛ̍i̍ya̍ māā nyɛ̄ ya̍ Mɛ̄lɛ̄ka̍ dīmi̍ wo̍ cho̍ ho̍ō ni̍. Wānā o̍ wāna̍ di̍mi̍ dīōmndā wɔ̄ɔ̍ŋnda̍ŋ mbō yēi̍ ya̍ Mɛ̍lɛ̄ka̍ pɛ̍, wānā ko̍ŋ ndu̍ pi̍la̍ tɔ̍ɔ̍ya̍ŋndo̍ wā cho̍o̍ le̍ dɛ̍nɛ̍ pa̍lāā o̍ nɔ̍ mbō sɔ̄la̍ wo̍ ni̍.

¹⁶ Ndu̍yɛ̍ wānā o̍ wāna̍ di̍mi̍ dīōmndā wɔ̄ɔ̍ŋnda̍ŋ a̍ ya̍ Mɛ̍lɛ̄ka̍ Ya̍a̍wɛ̄ɛ̄ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍. I̍sɔ̄lūɛ̍i̍ya̍ kpo̍u̍ ā nɔ̄ mā lo̍ ndu̍ vīīyo̍ a̍ pōūta̍ŋ mbō vī, wānā ko̍ŋ ō wa̍ I̍sɔ̄lūɛ̍i̍nɔ̍, ɔ̄ɔ̄ ō wa̍ wa̍nāā lēkāa̍wa̍a̍ cho̍ nya̍ tɛ̍ɛ̍ŋ nda̍ ō pīlɛ̍ ni̍, ō nɔ̄ mbō sɔ̄la̍ pīɔ̍mndo̍.

¹⁷ “O̍ ko̍ŋ kɔ̍ɔ̍lī, wānā o̍ wāna̍ di̍ī wāna̍ chi̍o̍o̍ pɛ̍, wānā ko̍ŋ bɛ̍ɛ̍ ā nɔ̄ mā dīī ndu̍.

¹⁸ Wānā o̍ wāna̍ di̍ī chɔ̄lū pi̍la̍a̍ pɛ̍, wānā ko̍ŋ ō nɔ̄ mbō mīŋgi̍ ndu̍ sɔ̍ŋgɔ̍. Kāni̍ fo̍ndōle̍, yōōmōo̍ wānā yɔ̍ŋgū le̍ yōōmōo̍ ni̍.

¹⁹ “O̍ ko̍ŋ kɔ̍ɔ̍lī, wānā o̍ wāna̍ yɔ̍ŋu̍l chāa̍ŋ ndɔ̍ pɛ̍, īdīāl o̍ īdīāl o̍ yɔ̍ŋu̍l chāa̍ŋ ndɔ̄ ko̍ŋ pɛ̍, ndu̍ bɛ̍ɛ̍ lā nɔ̄ mī lā yɔ̄ŋu̍l ndu̍ o̍ dīālīī kēŋ.

²⁰ Tē wāŋndo̍ ō yēm chāa̍ŋ ndɔ̍ pāa̍ pɛ̍, ndu̍ bɛ̍ɛ̍ lā yo᷄m ndu̍ pāa̍. Tē wāŋndo̍ ō pɛ̄l chāa̍ŋ ndɔ̍ hɔ̄lte̍ŋ pɛ̍, ndu̍ bɛ̍ɛ̍ lā pīɔ̍l ndu̍ hɔ̄lte̍ŋ. Tē wāŋndo̍ ō bɛ̄ŋi̍ chāa̍ŋ ndɔ̍ chīŋnde̍ pɛ̍, ndu̍ bɛ̍ɛ̍ lā bɛ̄ŋi̍ ndu̍ chīŋnde̍. Īdīāl o̍ īdīāl wāŋndo̍ ō yɔ̄ŋu̍l chāa̍ŋ ndɔ̍ pɛ̍, ndu̍ bɛ̍ɛ̍ lā yɔ̄ŋu̍l ndu̍ lo̍ŋ.

²¹ Tē wāŋndo̍ ō dīī chɔ̄lū pi̍la̍a̍ pɛ̍, wānā ko̍ŋ ō nɔ̄ mbō mīŋgi̍ chɔ̄lū pi̍la̍ kōŋ sɔ̍ŋgɔ̍. Kɛ̍ wānā o̍ wāna̍ di̍ī wāna̍ chi̍o̍o̍ pɛ̍, wānā ko̍ŋ bɛ̍ɛ̍ lā nɔ̄ mī lā dīī ndu̍.

²² Ndu̍yɛ̍ sāwāla̍ŋ nda᷅ŋ lā chō le̍ nya̍ I̍sɔ̄lūɛ̍i̍ya̍, ndu̍yɛ̍ mi̍ lā wā vɛ̄lɛ̄ le̍ wa̍nāā lēkāa̍wa̍a̍ cho̍ nya̍ tɛ̍ɛ̍ŋ nda̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.”

²³ O̍ ko̍ŋ kɔ̍ɔ̍lī, mi̍ Mūu̍sē o̍ di̍mu̍l I̍sɔ̄lūɛ̍i̍ya̍ nyɛ̄ o̍ nyɛ̄ Mɛ̄lɛ̄ka̍ dīmi̍. Ndu̍yɛ̍ mi̍ I̍sɔ̄lūɛ̍i̍ya̍ ā to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍, ma̍ sōlī po̍ di̍mi̍ ko̍ŋ di̍o̍mndā wɔ̄ɔ̍ŋnda̍ŋ a̍ Mɛ̄lɛ̄ka̍ wo̍ o̍ dɔ̍ɔ̍ŋgɔ̍ɔ̍ ni᷄ŋ, ma̍ lo̍ ndu̍ vīī vīīyo̍ a̍ pōūta̍ŋ mbō vī.