Lɛ̄vi̍ti̍kɔ̍ɔ̄ 23 - Yāu̍ Mɛ̄lɛ̄ka̍a̍

Sāwāla̍ŋ a̍ bɔ̄ŋa᷅ŋnda̍ Mɛ̄lɛ̄ka̍ la̍ŋ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Di̍mu̍l I̍sɔ̄lūɛ̍i̍ya̍ māā ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ a̍a̍, ‘Wāŋnda̍ I̍sɔ̄lūɛ̄ī, pālɛ̍i̍ bɛ̍ndūe̍i̍, i̍ ya̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ hɛ̍li̍ mi̍ ī wā ī yɔ̄ŋa᷄ŋ o̍ ya̍ Mɛ̍lɛ̄ka̍ lo̍, le̍ mī nya̍ I̍sɔ̄lūɛ̍i̍ya̍ lā wa̍ chūūŋgi̍āŋndo̍ le̍ ya̍ sōōlūūwo̍ ve̍ ndi̍ cho̍ he̍ī ni̍.

³ Pālɛ̍i̍ bɛ̍ndūīī kēŋ lē pīlɛ̍ le̍ cho̍ pāa̍le̍ nīle̍ pɛ̍ŋgīāāle̍ŋ ni̍. Lā nɔ̄ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍ le̍ wa̍lta̍ nyāla̍ŋ tōsāa̍. Kɛ̍ o̍ pāa̍le̍ ŋɔ̍mmɛ̍ū le̍ŋ chōo̍, lā nɔ̍ mī lā tōsa̍ kpe̍ku̍ o̍ kpe̍ku̍ le̍cho̍ō le̍, fo̍ndōle̍, pāa̍le̍ nīle̍ pɛ̍ŋgīāāle̍ŋ le̍ cho̍ ni̍, pāa̍le̍ cho̍ lē yɔ̄ŋa᷄ŋ o̍ ya̍ Mɛ̍lɛ̄ka̍ lo̍ le̍ŋ, lā nɔ̄ mī lā pɛ̄ŋgi̍ o̍ pāa̍le̍ le̍ŋ chōo̍. Lā nɔ̄ mī lā chūūŋgi̍āŋ na̍a̍ pi᷅lɛ̍ o̍ pāa̍le̍ le̍ŋ chōo̍ mī lā sōōlu̍u̍ ya̍ Mɛ̍lɛ̄ka̍, bā o̍ bā nya̍ wa̍.

⁴ Pālɛ̍i̍ bɛ̍ndūīī ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍ hɛ̍li̍ le̍ ya̍ wāa̍ sōōlūūwo̍ a̍ te̍le̍ŋnda̍ yɛ̍ yɛ̍la̍ŋ nde̍, lē pīlɛ̍le̍ŋ le̍ cho̍ vɛ̄lɛ̄ le᷅ŋ ni̍.

Sāwāla̍ŋ a̍ hīōūwɔ̄ɔ̄ cho̍o̍ wo̍ o̍kɔ̄ɔ̄ a̍ bēe̍dīi̍ nda̍ do̍ū yi̍i̍sīi̍ le̍ wo̍

⁵ “ ‘O̍ ko̍ŋ kɔ̍ɔ̍lī, pāŋgi̍i̍ tāse̍i̍ o̍ wɔ̄sī o̍ wɔ̄sī ni᷄ŋ mālɔ̄ tɔ̍ a̍ lē hīɔ̍ɔ̍lu̍, lā nɔ̄ mī lā bīī Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄, le̍ ya̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍.

⁶ O̍ mālɔ̄ tɔ̍ a̍ lē ŋūɛ̍ɛ̍nu̍a̍ŋ chōo̍ di̍i̍mā ndɔ̄ɔ̍, lā nɔ̄ mī lā kāndu̍ bɔ̄ŋa᷅ŋ pālɛ̍i̍ ŋɔ̍mmɛ̍ūwo̍ le̍ ya̍ Mɛ̍lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍. Ndu̍yɛ̍ o̍ pālɛ̍i̍ ŋɔ̍mmɛ̍ūve̍ he̍ī bɛ̄ŋgu̍ ki̍nɛ̍i̍, bēe̍dīi̍ nɔ̍ yi̍i̍sīi̍ le̍ni̍ŋ te̍ wo̍ ndu̍ nya̍ nɔ̄ ni̍ mī lā wa̍ dīo̍o̍.

⁷ Ndu̍yɛ̍ o̍ pāa̍le̍ tāse̍le̍ bɔ̄ŋa᷅ŋ pālɛ̍i̍ ŋɔ̍mmɛ̍ū wo̍ ho̍ō chōo̍, lā nɔ̄ mī lā bɔ̄ɔ̄ŋi̍āŋ kpo̍u̍ na̍a̍ pi᷅lɛ̍. Wānā o̍ wānā a̍ nɔ̍ mā to̍sa̍ wa̍li̍ pa̍a̍le̍ le̍ŋ te̍.

⁸ Ndu̍yɛ̍ pālɛ̍i̍ ŋɔ̍mmɛ̍ū nya̍ nɔ̄ mī lā chīi̍ o̍ bɔ̄ŋa᷅ŋndo̍ ho̍ō chōo̍ ve̍, lēpāa̍ o̍ lēpāa̍ lā nɔ̄ mī lā sōli̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. O̍ ko̍ŋ kɔ̍ɔ̍lī, o̍ pāa̍le̍ ŋɔ̍mmɛ̍ū le̍ŋ chōo̍ lā nɔ̄ mī lā chūūŋgi̍āŋ vɛ̍lɛ̄ nāa̍ pi᷅lɛ̍ le̍ ya̍ sōōlūūwo̍, fo̍ndōle̍, pāa̍le̍ cho̍ lē yɔ̄ŋa᷄ŋ o̍ ya̍ Mɛ̍lɛ̄ka̍ lo̍ le̍ŋ le̍ cho̍ ni̍. Ndu̍yɛ̍, o̍ pāa̍le̍ le̍ŋ chōo̍ lā nɔ̍ mī lā tōsa̍ wa̍li̍ o̍ wa̍li̍ le̍.’ ”

⁹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍, mbo̍ dīmūl ndu̍ āā,

¹⁰ “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ a̍a̍, ‘Tē lā fūūlu̍u̍ o̍ lɛ̄ŋndē ya̍ I̍ cho̍ nya̍ kīo̍o̍ le̍ŋ ni᷄ŋ pɛ̍, mī lā kāndu̍ wa̍lta̍ nyāla̍ŋ ŋ̄chīɛ̄ɛ̄la̍ŋ tōsāa̍, tē lā kāndu̍ tɔ̄lɔ̄ɔ̄lā nyāla̍ŋ kēndīo̍o̍ pɛ̍, tɔ̄lɔ̄ɔ̄ tāse̍ wānā o̍ wānā cho̍ kēndī wo̍, ō nɔ̄ mbō hīŋ a̍ ndu̍ o̍ wānā so̍līāā lāsa̍lāa̍ lo̍.

¹¹ Tē ō hīŋ a̍ ndu̍ o̍ wānā so̍līāā lāsa̍lāa̍ lo̍ pɛ̍, wānā so̍līāā lāsa̍lāa̍ ō bīī tɔ̄lɔ̄ɔ̄ kōŋ pɛ̍, ō hēēlu̍ ndu̍ o̍ bāla̍ŋ chōo̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī māā sa̍lā. Ko̍ŋ to̍sā ni̍ mī sa̍lā kōŋ ō wa᷄ ō chɛ̄lna᷄ŋ. Tē bɔ̄ŋa᷅ŋ pāa̍le̍ pɛ̍ŋgīa̍a̍ ō hīōū pɛ̍, dīi̍mā ndɔ̄ɔ̍ pīlɔ̍ɔ̍ wānā so̍līāā lāsa̍lāa̍ ō nɔ̄ mbō yɔ̄ŋgu̍ tɔ̄lɔ̄ɔ̄ sa̍lā kōŋ o̍ ya̍ Mɛ̍lɛ̄ka̍ lo̍ ni̍.

¹² Ndu̍yɛ̍ pāa̍le̍ wānā so̍līāā lāsa̍lāa̍ ō nɔ̄ mbō yɔ̄ŋgu̍ tɔ̄lɔ̄ɔ̄ kōŋ o̍ ya̍ Mɛ̍lɛ̄ka̍ lo̍ māā sa̍lā le̍ŋ, wāna̍ hu᷅ŋ ko̍ŋ a̍ tɔ̄lɔ̄ɔ̄ kōŋ ndo̍, ō nɔ̄ mbō sōli̍ sāā ko̍ndo̍o̍ o̍ chi̍i̍ yɔ̄ wɔ̄sīo̍o̍ ō pīlɛ̍ wo̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, o̍ nɔ̍ sɔ᷅ŋ o̍ sɔ̄ŋ te̍ wo̍.

¹³ O̍ ko̍ŋ kɔ̍ɔ̍lī, tē ā wa̍ sāā ko̍ndo̍o̍ ho̍ō sa̍lāa̍ sōlīo̍o̍ o̍ ya̍ Mɛ̍lɛ̄ka̍ lo̍ pɛ̍, ā nɔ̄ mā mɔ̄sɔ̍ŋa̍ ndu̍ lōmɔ̄ɔ̄ a̍ sa̍lā tɔ̄lɔ̄ɔ̄ ku̍llo̍ lātūlu̍, kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍, mā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Tē chūŋ sa̍lā kōŋ ō kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. O̍ ko̍ŋ kɔ̍ɔ̍lī, tē ā wa̍ sa̍lāa̍ ho̍ō sōlīo̍o̍ pɛ̍, ā sōli̍ vɛ̄lɛ̄ mūɛ̄īya̍ŋ sa̍lāa̍ li̍tɛ̄i̍yo̍ ō pīlɛ̍.

¹⁴ Tē lā kāndu̍ chīɔ̄ɔ̄ŋ nyāa̍ŋ kōūwɔ̄ɔ̍ pɛ̍, lɔ̍ɔ̍pa̍ bɛ̍ɛ̍ mī lā kāndu̍ nyɛ̄ dīāā kōŋ dīo̍o̍, ō wa̍ dīo̍o̍ ō kīyɛ̍i̍ le̍nde̍, ō wa̍ be̍e̍dīi̍ nya̍ tōōsi̍a̍a̍ a̍ tɔ̄lɔ̄ɔ̄ kōŋ, ō wa̍ tu̍ɛ̍i̍yɔ̄ɔ̄ nya̍ tūɛ̍i̍ ndu̍ ni̍, lā nɔ̄ fɛ̍lɛ̍ŋ mī lā hīŋ a̍ ō tāse̍ ko̍ŋ, ndu̍yɛ̍ mī lā hu᷄ŋ so̍lī ndu̍ sa̍lāa̍ o̍ ya̍ Mɛ̍lɛ̄ka̍ nyāa̍ lo̍. Sāwāa̍ ho̍ō sāwa̍ ya̍ Mɛ̍lɛ̄ka̍ dɔ̄ū mbo̍ wā le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Nya̍ ni̍ a̍ yu̍ŋgu̍la̍ nyāla̍ŋ mbō kūɛ̄ a̍ lāchī kɛ᷅, yu̍ŋgu̍la̍ŋ o̍ yu̍ŋgu̍la̍ŋ ni᷄ŋ, lā wa̍ o̍ sāwāa̍ ho̍ō bɛ̄ŋgu̍ bā o̍ bā nya̍ wa̍.

A̍ bɔ̄ŋa᷅ŋ chīɔ̄ɔ̄ŋ kūāūwāa̍ o̍kɔ̄ɔ̄

¹⁵ “ ‘O̍ ko̍ŋ kɔ̍ɔ̍lī, tē bɔ̄ŋa᷅ŋ pāa̍le̍ pɛ̍ŋgīa̍a̍ ō hīōū pɛ̍, dīi̍mā ndɔ̄ɔ̍ pīlɔ̍ɔ̍, ndu̍ yɔ̍nūŋ māā pāa̍le̍ nya̍ nɔ̄ mī lā yɔ̄ŋgu̍ tɔ̄lɔ̄ɔ̄ nyā ta̍se̍ nya̍ chō yɔ̄ŋgū o̍ bāla̍ŋ chōo̍ māā sa̍lā wo̍ ni̍, lā nɔ̄ mī lā kāndu̍ pālɛ̍i̍ chɔ̄mndo̍ pāa̍le̍ le̍ŋ ha̍a̍a̍ mī lɔ̍ɔ̍la̍ŋ lā hīōū lā ŋɔ᷄mmɛ̍ū.

¹⁶ Tē bɔ̄ŋa᷅ŋndā pālɛ̍i̍ pɛ̍ŋgīāāla̍ŋ lā hīōū pɛ̍ la̍ ŋɔ̍mmɛ̍ū, dīi̍mā ndɔ̄ɔ̍, o̍ pāa̍le̍ be̍le̍-ŋu̍ɛ̍ɛ̍nu̍le̍ŋ chōo̍, lā nɔ̄ vɛ̄lɛ̄ mī lā hīŋ a̍ sa̍lāla̍ tɔ̄lɔ̄ɔ̄lā tāse̍la̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍.

¹⁷ Pāa̍le̍ le̍ŋ yu̍ŋgu̍ o̍ yu̍ŋgu̍ ō nɔ̄ mbō hīŋ a̍ bēe̍dīi̍yo̍ kpūŋgba᷄ŋ ŋ̄mūu̍ŋ, fūlāa̍ o̍ fo̍ndāŋndā yɛ̍ yɛ̍la̍ nya̍ chō īchāli̍ la̍ŋ. Ndu̍yɛ̍, bēe̍dīi̍yo̍ ho̍ō a̍ kōlō to̍o̍sīāā bēe̍dīi̍ kɛ̍ndɛ̄ kɛ̍ndɔ̄ɔ̍ nya̍ nɔ̄ ni̍ mī lā tōōsi̍a̍a̍ ndu̍, ndu̍yɛ̍ mī lā dɔ̄ū yi̍i̍sīi̍yo̍ lēni᷄ŋ, īkpūŋgbāa̍ o̍ īkpūŋgbāa̍, kōlō to̍o̍sīāā bēe̍dīi̍yo̍ ō nɔ̄ mbō wa᷄ pa᷅ŋnda̍ŋ lā hīɔ̍ɔ̍lu̍. Tē lā hīŋ a̍ bēe̍dīi̍yo̍ ho̍ō pɛ̍, lā yɔ̄ŋgu̍ ndu̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ o̍ bāla̍ŋ chōo̍ māā sa̍lā tɔ̄lɔ̄ɔ̄ tāse̍.

¹⁸ Ndu̍yɛ̍ tē lā wa̍ bēe̍dīi̍yo̍ ho̍ō sa̍lāa̍ sōlīo̍o̍ pɛ̍, chɔ̄lūāā yɛ̍ yi̍a̍a̍ nya̍ wāŋnda̍ I̍sɔ̄lūɛ̄ī nɔ̍ mī lā mɔ̄sɔ̍ŋa̍ nda̍ sa̍lāa̍ sōlī a̍ bēe̍dīi̍yo̍ ho̍ō lātūlu̍ wa̍ nda̍ cho̍ ha̍ā ni̍. Sāā fɔ̍ŋndu̍a̍a̍ chi̍i̍ wɔ̄sīo̍o̍ ō pīlɛ̍ wa̍ ā ŋɔ᷄mmɛ̍ū, a̍ nɔ̍ sɔ᷅ŋ o̍ sɔ̄ŋ te̍ wa̍, a̍ nāū tōōyē fɔ̍ŋndɔ̍ɔ̍ ō pīlɛ̍, a̍ sāā fɔ̍ŋndu̍a̍a̍ ā ŋīɔ̍ɔ̍ŋ. Lā nɔ̄ mī lā sōli̍ chɔ̄lūa̍a̍ ha̍ā sa̍lā lūāmāa̍ lātūlu̍ a̍ sa̍lā nyɛ̄ dīāā ku̍llo̍, ndu̍yɛ̍ a̍ mūɛ̄īya̍ŋ. Sa̍lā nya̍ chō ho̍ō lōmɔ̄ɔ̄ o̍ ya̍ lo̍ wo̍, te̍ chūŋ ndɔ̄ɔ̍ kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

¹⁹ O̍ ko̍ŋ kɔ̍ɔ̍lī, mī lā sōli̍ chūīŋ tōōyōo̍ sa̍lāa̍ le̍ yɔ̄ŋndā wɔ̄ɔ̍ŋnda̍ŋ fāŋāa̍, ndu̍yɛ̍ mī lā sōli̍ vɛ̄lɛ̄ sa̍lā kɔ̄l nyūlōo̍ a̍ sāā ko̍ndu̍a̍a̍ a̍ chi̍i̍ wɔ̄sīla̍ŋ lā pīlɛ̍ŋ nda̍ ā ŋīɔ̍ɔ̍ŋ.

²⁰ Wānā so̍līāā lāsa̍lāa̍ ō nɔ̄ mbō hēēlu̍ sāā fɔ̍ŋndu̍a̍a̍ ŋi̍ɔ̍ɔ̍ŋnda̍ ha̍ā o̍ bāla̍ŋ chōo̍ ya̍ Mɛ̍lɛ̄ka̍ Ya̍a̍wɛ̄ɛ̄ lāchī, lātūlu̍ a̍ bēe̍dīi̍ ba̍a̍līi̍ŋ ta̍se̍ nya̍ hīŋ le̍ sa̍lāa̍ sōlīo̍o̍ wo̍, le̍ sāā ka̍ŋ a̍ bēe̍dīi̍ ko̍ŋ yɔ̄ŋgōo̍ o̍ ya̍ Mɛ̍lɛ̄ka̍ lo̍ māā lāsa̍lā. Sa̍lālā tīɔ̍ɔ̍ŋndā lāŋ, sa̍lāla̍ cho̍ lā kāsī ya̍ Mɛ̍lɛ̄ka̍ Ya̍a̍wɛ̄ɛ̄ nyāa̍ o̍ hɔ̄l la̍ŋ la̍ cho̍ ni̍. Wānāā sōlīāā lāsa̍lāa̍ nda̍ nɔ̍ sa̍lālā tīɔ̍ɔ̍ŋndā lāŋ ni̍.

²¹ Ndu̍yɛ̍ o̍ pāa̍le̍ le̍ŋ chōo̍ lā nɔ̍ mī lā tōsa̍ kpe̍ku̍ o̍ kpe̍ku̍ le̍, lā nɔ̄ mī lā chūūŋgi̍āŋ kpo̍u̍ na̍a̍ pi᷅lɛ̍ le̍ ya̍ sōōlūūwo̍, fo̍ndōle̍ pāa̍le̍ cho̍ lē yɔ̄ŋa᷄ŋ o̍ ya̍ Mɛ̍lɛ̄ka̍ lo̍ le̍ŋ le̍ cho̍ ni̍. Sāwāa̍ ho̍ō sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍, nya̍ ni̍ a̍ yu̍ŋgu̍la̍ nyāla̍ŋ o̍ yu̍ŋgu̍la̍ŋ ni᷄ŋ lā nɔ̄ mī lā wa̍ o̍ sāwāa̍ ho̍ō bɛ̄ŋgu̍, bā o̍ bā nya̍ wa̍.

²² “ ‘Tē lā wa̍ chīɔ̄ɔ̄ŋ nyāa̍ŋ kōūwɔ̄ɔ̍ pɛ̍, lā fu̍u̍lūū a̍ kōūwɔ̄ɔ̍ o̍ sɔ̍ŋgi̍ sɔ̍ŋgi̍la̍ŋ te̍. Ndu̍yɛ̍ bā o̍ bā nya̍ chīi̍ ni᷅ŋ kōūwɔ̄ɔ̄ pɛ̍, lā mi̍i̍ŋgū lɛ̄ ŋ̍ lo̍ kɔ̄ɔ̄lī wo̍ŋ nūūwā le̍, ŋ̍ lo᷅ mu̍ŋ kɔ̍ɔ̍lī wo̍ŋ wānāā tāmbɛ̍i̍ya̍ a̍ wānāā lēkāa̍wa̍a̍ cho̍ nya̍ tɛ̍ɛ̍ŋ nda̍, nda̍ nɔ̍ mu̍ŋ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.’ ”

A̍ bɔ̄ŋa᷅ŋ wɔ̄sī sɛ̄nɛ̄īyo̍ o̍kɔ̄ɔ̄

²³ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ Mūu̍sē chūa̍ āā,

²⁴ “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ a̍a̍, ‘Pa̍ŋgi̍i̍ ŋɔ̍mmɛ̍ūve̍ o̍ wɔ̄sīo̍o̍ ni᷄ŋ, pāa̍le̍ tāse̍le̍ŋ, pāa̍le̍ pɛ̍ŋgīāālē te̍ŋge̍le̍ŋ nde̍ŋ le̍ cho̍ ni̍, pāa̍le̍ cho̍ lē yɔ̄ŋga᷄ŋ o̍ ya̍ lo̍ le̍ŋ, lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍. Tē lā tūēī bu̍lu̍la̍ŋ pɛ̍, nya̍ kpo̍u̍ lā nɔ̄ mī lā chūūŋgi̍āŋ na̍a̍ pi᷅lɛ̍ le̍ ya̍ sōōlūūwo̍.

²⁵ Lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍. Lā nɔ̄ mī lā sōli̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pa̍a̍le̍ le̍ŋ.’ ”

A̍ pāa̍le̍ bɛ̍ndūle̍ Mɛ̄lɛ̄ka̍ māl wa᷅ŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ nde̍ŋ o̍kɔ̄ɔ̄

²⁶ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²⁷ “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ āā, ‘O̍ īwɔ̄sī o̍ wɔ̄sī ni᷄ŋ, pāŋgi̍i̍ ŋɔ̍mmɛ̍ūve̍ mālɔ̄ tɔ̍, pāa̍le̍ le̍ŋ ya̍ Mɛ̍lɛ̄ka̍ māl wa᷅ŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ ni̍, pāa̍le̍ cho̍ lē yɔ̄ŋa᷄ŋ o̍ ya̍ lo̍ le̍ŋ le̍ cho̍ ni̍. Pāa̍le̍ le̍ŋ wānā o̍ wānā nɔ̍ mbō dē nyɛ̄ dīāā o̍ nyɛ̄ dīāā le̍, nya̍ kpo̍u̍ lā nɔ̄ mī lā chūūŋgi̍āŋ na̍a̍ pi᷅lɛ̍ le̍ ya̍ sōōlūūwo̍, ndu̍yɛ̍ mī lā sōli̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍.

²⁸ Pāa̍le̍ le̍ŋ bɛ̍ɛ̍ lā nɔ̍ mī lā tōsa̍ wa̍li̍ o̍ wa̍li̍ le̍, kāni̍ fo̍ndōle̍ pāa̍le̍ le̍ŋ ya̍ Mɛ̍lɛ̄ka̍ māl nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ ni̍. Pāa̍le̍ le̍ŋ nya̍ nɔ̄ ni̍ mī lā sōli̍ sa̍lāla̍ŋ o̍ ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍, le̍ mī ma̍l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ.

²⁹ Wānā o̍ wāna̍ de᷅ nyɛ̄ dīa̍a̍ pāa̍le̍ le̍ŋ pɛ̍, wānā ko̍ŋ ō nɔ̄ mbō wa̍ ō fāŋāā I̍sɔ̄lūɛ̍i̍ya̍ chōo̍ ba̍ū.

³⁰ Ndu̍yɛ̍ wānā o̍ wāna̍ to̍sa̍ wa̍llo̍ pāa̍le̍ le̍ŋ pɛ̍, wānā ko̍ŋ dīyɔ̄ɔ̍ ya̍ I̍ di̍ī ndu̍ chāāŋāā ndūāā I̍sɔ̄lūɛ̍i̍ya̍ tɛ̄ɛ̄ŋ ni̍.

³¹ Wa̍li̍ o̍ wa̍li̍ nɔ̍ mbō tōsa̍ŋ o̍ pāa̍le̍ŋ nde᷅ŋ chōo̍ le̍. Sāwāa̍ ho̍ō sāwa̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍, nya̍ ni̍ a̍ yu̍ŋgu̍la̍ nyāla̍ŋ mbō kūɛ̄ a̍ lēpūlā kɛ᷅, lā nɔ̄ mī lā wa̍ o̍ sāwāa̍ ho̍ō bɛ̄ŋgu̍, bā o̍ bā nya̍ wa̍.

³² Pāa̍le̍ŋ nde᷅ŋ lā nɔ̄ mī lā chūa̍ le̍ŋ māā pāa̍le̍ nyāle̍ pɛ̍ŋgīāā. Nya̍ kpo̍u̍ lā nɔ̄ mī lā pɛ̄ŋgi̍ o̍ pāa̍le̍ŋ nde̍ŋ chōo̍, wānā o̍ wānā nɔ̍ mbō tōsa̍ wa̍li̍ o̍ wa̍li̍ pa̍a̍le̍ le̍ŋ te̍. Ndu̍yɛ̍, wānā o̍ wānā nɔ̍ mbō dē nyɛ̄ dīāā o̍ nyɛ̄ dīāā pāa̍le̍ le̍ŋ te̍, nya̍ kpo̍u̍ lā nɔ̄ mī lā bīī su᷅mndo̍ pāa̍le̍ le̍ŋ. Chɔ̍ŋ a̍ fīti̍līo̍o̍ o̍ pāa̍le̍ ŋɔ̍ma̍hīɔ̍ɔ̍lu̍le̍ŋ chōo̍ ha̍a̍a̍ a̍ fīti̍līo̍o̍ dīi̍mā ndɔ̄ɔ̍, lā nɔ̍ mī lā tōsa̍ nyɛ̄ o̍ nyɛ̄ le̍ ndu̍yɛ̍, lā nɔ̍ mī lā dē nyɛ̄ o̍ nyɛ̄ dīāā le̍.’ ”

A̍ bɔ̄ŋa᷅ŋ kūāūwāa̍ ŋ̄chīɔ̍ɔ̍ o̍kɔ̄ɔ̄

³³ O̍ ko̍ŋ kɔ̍ɔ̍lī, mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

³⁴ “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ a̍a̍, ‘Pāŋgi̍i̍ ŋɔ̍mmɛ̍ūve̍ o̍ wɔ̄sīo̍o̍ ni᷄ŋ mālɔ̄ tɔ̍ a̍ lē ŋūɛ̍ɛ̍nu̍, pāa̍le̍ le̍ŋ bɔ̄ŋa᷅ŋ kūāūwāa̍ ŋ̄chīɔ̍ɔ̍ ō nɔ̄ mbō kāndu̍ŋ ni̍ le̍ ya̍ Mɛ̍lɛ̄ka̍ Ya̍a̍wɛ̄ɛ̍ sōōlūūwo̍. Ndu̍yɛ̍ bɔ̄ŋa᷅ŋndo̍ ho̍ō lā tōsa̍ ndu̍ le̍ pālɛ̍i̍ ī ŋɔ᷄mmɛ̍ū.

³⁵ Pāa̍le̍ bɔ̄ŋa᷅ŋndo̍ ho̍ō ō nɔ̄ mbō kāndu̍ŋ nde̍ŋ, lā nɔ̄ mī lā chūūŋgi̍āŋ na̍a̍ pi᷅lɛ̍ le̍ ya̍ sōōlūūwo̍, fo̍ndōle̍, pāa̍le̍ cho̍ lē yɔ̄ŋa᷄ŋ o̍ Mɛ̍lɛ̄ka̍ lo̍ le̍ŋ le̍ cho̍ ni̍. Lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍.

³⁶ Ndu̍yɛ̍ o̍ ko̍ŋ kɔ̍ɔ̍lī, pālɛ̍i̍ ŋɔ̍mmɛ̍ūve̍ he̍ī, lēpāa̍ o̍ lēpāa̍ lā nɔ̄ mī lā sōli̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. O̍ ko̍ŋ kɔ̍ɔ̍lī, o̍ pāa̍le̍ ŋɔ̄ma̍a̍le̍ŋ chōo̍, nya̍ kpo̍u̍ lā nɔ̄ mī lā chūūŋgi̍āŋ na̍a̍ pi᷅lɛ̍ le̍ ya̍ sōōlūūwo̍, ndu̍yɛ̍ mī lā sōli̍ vɛ̄lɛ̄ sa̍lā lūāmāa̍ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Ndu̍yɛ̍ pāa̍le̍ le̍ŋ bɛ̍ɛ̍ wānā o̍ wānā nɔ̍ mbō tōsa̍ wa̍li̍ le̍. Pāa̍le̍ le̍ŋ bɔ̄ŋa᷅ŋndo̍ ho̍ō ō nɔ̄ mbō chūū ni̍.’ ” (

³⁷ Pālɛ̍i̍ cho̍ ī hɛ̄līāā o̍ wɔ̄sīo̍o̍ ni᷄ŋ le̍ bɔ̄ŋa᷅ŋndā yɛ̍ yɛ̍la̍ŋ bīyɔ̄ɔ̍ ve̍, ndi̍ cho̍ ke̍ŋ ni̍, le̍ chūūŋgi̍āŋndo̍ le̍ ya̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍, ndu̍yɛ̍ mī lā sōli̍ sa̍lālā yɛ̍ yɛ̍la̍ŋ ō ya̍ Mɛ̍lɛ̄ka̍ lo̍ ve̍, ndi̍ cho̍ ke̍ŋ ni̍. Ndu̍yɛ̍ sa̍lālā yɛ̍ yɛ̍la̍ nya̍ nɔ̄ mī lā sōli̍ la̍ŋ, la̍ŋ la̍ cho̍ la᷅ŋ ni̍, sa̍lālā nyɛ̄ dīa̍a̍ la̍ŋ, a̍ sa̍lāla̍ lūāmāā la̍ŋ, a̍ sa̍lālā tɔ̄lɔ̄ɔ̄ lāku̍lta̍ŋ, a̍ sa̍lālā mūɛ̄īmā mākīle̍pīi̍la̍ŋ, a̍ sa̍lālā yɔ̄ŋāālā chēle̍ŋ nda̍ŋ. Sa̍lāla̍ŋ nda᷅ŋ nya̍ nɔ̄ ni̍ mī lā sōli̍ o̍ pālɛ̍i̍ yɛ̍ yɛ̍i̍ bɔ̄ŋa᷅ŋnde̍ he̍ī chōo̍, ndu̍yɛ̍ a̍ te̍le̍ŋnda̍ nya̍ nɔ̄ le̍ la̍ŋ sōlīo̍o̍ la̍ŋ.

³⁸ Ō fūla̍ o̍ sa̍lālā nya̍ sōlī le̍ pāa̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ kīo̍o̍ la̍ŋ kɔ̄ɔ̄lī, lā nɔ̄ mī lā sōli̍ vɛ̄lɛ̄ sa̍lālā chēle̍ŋ hāndɔ̄ɔ̍ o̍ sa̍lālā la̍ŋ nda᷅ŋ chōo̍, la̍ŋ la̍ yɔ̍nūŋ māā, sa̍lālā nya̍ yɔ̄ŋgū māā kē la̍ŋ, a̍ sa̍lālā nya̍ sōlī le̍ būŋgāŋ nya̍ chūā wo̍ŋ pēēlōo̍ la̍ŋ, a̍ sa̍lālā nya̍ pi̍la̍ kɛ̄ɛ̄sīāā a̍ kɔ̄ltā nyāla̍ŋ le̍ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ la̍ŋ.)

³⁹ O̍ ko̍ŋ kɔ̍ɔ̍lī, mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ a̍a̍, ‘Tē lā chīi̍ chīɔ̄ɔ̄ŋ nyāa̍ŋ kōūwɔ̄ɔ̄ pɛ̍ kpo̍u̍, lā nɔ̄ mī lā bīī bɔ̄ŋa᷅ŋ lābāfɛ̄i̍yo̍ le̍ pālɛ̍i̍ ī ŋɔ᷄mmɛ̍ū le̍ ya̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍. Bɔ̄ŋa᷅ŋndo̍ ho̍ō ō nɔ̄ mbō kāndu̍ŋ o̍ mālɔ̄ tɔ̍ a̍ lē ŋūɛ̍ɛ̍nu̍a̍ŋ chōo̍ o̍ pāŋgi̍i̍ ŋɔ̍mmɛ̍ūve̍ ni᷄ŋ. Ndu̍yɛ̍ pāa̍le̍ bɔ̄ŋa᷅ŋndo̍ ho̍ō ō nɔ̄ mbō kāndu̍ŋ nde̍ŋ, pāa̍le̍ le̍ŋ pāa̍le̍ pɛ̍ŋgīāāle̍ŋ le̍ cho̍ ni̍, lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍. Ndu̍yɛ̍ o̍ pāa̍le̍ ŋɔ̄ma̍a̍le̍ŋ chōo̍ bɛ̍ɛ̍, pāa̍le̍ bɔ̄ŋa᷅ŋndo̍ ho̍ō ō nɔ̄ mbō chūū le̍ŋ, lā nɔ̍ mī lā tōsa̍ wa̍li̍ o̍ wa̍li̍ pa̍a̍le̍ le̍ŋ te̍.

⁴⁰ Pāa̍le̍ bɔ̄ŋa᷅ŋndo̍ ho̍ō ō nɔ̄ mbō kāndu̍ŋ nde̍ŋ, lā nɔ̄ mī lā hīŋ a̍ kōmɔ̄ɔ̄lā nyāla̍ kɛ̍ndɛ̄ kɛ̍ndɛ̄lā nya̍ kēēndu̍u̍ o̍ kpe̍le̍la̍ nyāla̍ īyɔ̄mnda̍ŋ ni᷄ŋ nda̍ŋ, o̍ ko̍ŋ kɔ̍ɔ̍lī, mī lā hīŋ a̍ sīɔ̍ɔ̍la̍ wāūla̍ŋ a̍ lɛ̄ūwūŋ yɔ̄mndo̍ŋ ndu̍yɛ̍ a̍ yɔ̄mīī pūīyɛ̄i̍ wa᷅ o̍ pīo̍o̍ kɔ̄ŋgɔ̍ ve̍, le̍ ya̍ Mɛ̄lɛ̄ka̍ Ya̍a̍wɛ̄ɛ̍, Mɛ̄lɛ̄ka̍ nyāa̍ sāŋgālāa̍ a̍ nya̍a̍lo̍o̍ le̍ pālɛ̍i̍ ī ŋɔ᷄mmɛ̍ū.

⁴¹ Īwɔ̄sī o̍ īwɔ̄sī lā nɔ̄ mī lā bīī bɔ̄ŋa᷅ŋ pālɛ̍i̍ ŋɔ̍mmɛ̍ū wo̍ le̍ ya̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍. He̍ī chō māchūāā māā sāwā le̍ fɛ̍ɛ̍ŋ a̍ fɛ̍ɛ̍ŋ, chɔ̍ŋ a̍ nya̍ mbō kūɛ̄ a̍ yu̍ŋgu̍la̍ nyāla̍ŋ lēpūlā kɛ᷅. Lā nɔ̄ mī lā bīī bɔ̄ŋa᷅ŋndo̍ ho̍ō o̍ wɔ̄sī o̍ wɔ̄sī ni᷄ŋ o̍ pāŋgi̍i̍ ŋɔ̍mmɛ̍ūve̍ ni᷄ŋ.

⁴² Pālɛ̍i̍ ŋɔ̍mmɛ̍ū nya̍ nɔ̄ mī lā wa̍ o̍ bɔ̄ŋa᷅ŋndo̍ ho̍ō chōo̍ ve̍ ki̍nɛ̍i̍, wānā o̍ wāna̍ cho̍ I̍sɔ̄lūɛ̍i̍nɔ̍ ō nɔ̄ mbō wa̍ o̍ bāfɛ̄i̍yo̍ ni᷄ŋ.

⁴³ Lā chō māchūāā wā he̍ī tōsāa̍, le̍ mī yu̍ŋgu̍la̍ fu̍lā ni̍ŋ o̍ nya̍ ni᷄ŋ nda̍ŋ, lā sīna̍ māā bōōndi̍i̍ ya̍ Mɛ̍lɛ̄ka̍ sōli̍ nya̍ I̍sɔ̄lūɛ̍i̍ya̍ o̍ lɛ̄ŋndē I̍chi̍pī ni᷄ŋ, mi̍ wa᷅ hūnɔ̄ɔ̍ a̍ nya̍ ve̍, māā mi̍ to̍sā mi̍ lā lɔ̄l o̍ tɛ̍ndɛ̄i̍la̍ŋ ni᷄ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.’ ”

⁴⁴ Mɛ̄ɛ̍ nu̍a̍ā Mūu̍sē o̍ lo̍o̍ku̍ tōsā ni̍, mbo̍ chɔ̄m I̍sɔ̄lūɛ̍i̍ya̍ pālɛ̍i̍ bɛ̍ndūi̍ wa̍ ī hɛ̄līāā le̍ mā chūūŋgi̍āŋ mā sōōlu̍u̍ Mɛ̄lɛ̄ka̍ Ya̍a̍wɛ̄ɛ̍ ve̍.