Lɛ̄vi̍ti̍kɔ̍ɔ̄ 22 - Yāu̍ Mɛ̄lɛ̄ka̍a̍

A̍ mɛ̄ɛ̍ sa̍lāla̍ Mɛ̄lɛ̄ka̍la̍ŋ lā nɔ̄ mī lā wa̍ lā kāsī yɛ̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē āā,

² “Di̍mu̍l E̍lɔ̄ŋ nda̍ pūa̍a̍ ndūa̍a̍ māā ya̍ Mɛ̍lɛ̄ka̍ dīmi̍ a̍a̍, ‘Sa̍lālā wāŋnda̍ I̍sɔ̄lūɛ̄ī a̍ hu᷅ŋ mā yɔ̄ŋgu̍ la̍ŋ o̍ ya̍ Mɛ̍lɛ̄ka̍ lo̍ la̍ŋ, lā chāa̍ la̍ŋ bīyɔ̄ɔ̄ ndu̍yɛ̍ mī lā ke᷄ la̍ŋ bɛ̄ɛ̄le̍ŋ, kāni̍ fo̍ndōle̍, sa̍lāla̍ chō lā kāsī ya̍ o̍ hɔ̄l la̍ŋ la̍ cho̍ ni̍. Lā to̍sā mī dīōlā nīla̍ kāsīla̍ŋ lā fūla̍ o̍ ba̍ā ni̍ŋ te̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³ “ ‘Chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, wānāa̍ fu̍la̍ o̍ pūlālē nu̍mnde̍ŋ chōo̍ wa̍ ki̍nɛ̍i̍ tē ō pīlɛ̍ wa̍ ō nɔ̄ɔ̄lɛ̍i̍ ya̍ Mɛ̄lɛ̄ka̍ o̍ hɔ̄l pɛ̍, mbō pīla̍ŋ nyɛ᷅m kāsīŋ wāŋnda̍ I̍sɔ̄lūɛ̄ī a̍ hu᷅ŋ mā yɔ̄ŋgū mu̍ŋ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ŋ pɛ̍, wāna̍ ko̍ŋ ō nɔ̄ mbō wa̍ ō fāŋāā, ō bɛ̍ndā lɛ̍ mbō si̍m ya̍ Mɛ̍lɛ̄ka̍ o̍ hɔ̄l mbō sāāŋgi̍a̍l la̍ le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.’

⁴ “Wānāa̍ fu̍la̍ o̍ pūlāle̍ E̍lɔ̄ŋ nde̍ŋ chōo̍ wa̍ ki̍nɛ̍i̍, wānā o̍ wāna̍ nɔ̍ nāā wɔ̄ɔ̍ŋ pu᷄m ta᷅ŋ wa̍nā wo̍ lēkɔ̄ɔ̍ pɛ̍, ɔ̄ɔ̄ mbō nɔ̄ nāā wāŋndo̍ ō chīī o̍ lɛ̄mbɔ̄ɔ̍ ni᷄ŋ ndo̍ pɛ̍, wānā ko̍ŋ sa̍lālā kāsīlā wāŋnda̍ sōlī la̍ŋ ki̍nɛ̍i̍, ō nɔ̍ mbō dē la̍ŋ te̍, ha̍a̍a̍ mɛ̄ɛ̍ mbō sɔ̄la̍ dīndīo̍o̍. Wānā o̍ wāna̍ cho̍ wānā so̍līāā lāsa̍lāa̍, te̍ ō pīla̍ŋ wa̍nā vi̍lɛ̍i̍yo̍ pɛ̍, ɔ̄ɔ̄ mbō sɔ̄la̍ nāā wānā pɔ̍nɔ̍ɔ̍ ō chīī o̍ lɛ̄mbɔ̄ɔ̍ ni᷄ŋ ndo̍,

⁵ ɔ̄ɔ̄ mbō pīla̍ŋ nya̍ā yōōmāa̍ ku̍ā ŋa̍a̍yā ŋāāyā ma̍ wā ā nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l lā, ɔ̄ɔ̄ mbō pīla̍ŋ wa᷅na̍ si̍mnu̍ŋ o̍ nɔ̍ɔ̍lɛ̍i̍ ya̍ o̍ hɔ̄llo̍, ɔ̄ɔ̄ mbō pīla̍ŋ nyɛ᷅ o̍ nyɛ̍ to̍sā ndu̍ mbō sīmnu̍ŋ o̍ nɔ̍ɔ̍lɛ̍i̍, mɛ̄ɛ̍ wānā so̍līāā lāsa̍lā kōŋ ō sīmnūŋ o̍ nɔ̍ɔ̍lɛ̍i̍ ya̍ o̍ hɔ̄l te̍.

⁶ Wānā so̍līāā lāsa̍la̍ pi̍la̍ŋ ko̍ŋ nyɛ̍m mu᷅ŋ ō pīlɛ̍ bɛ̍ɛ̍ wo̍, pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ o̍ ni̍i̍lū ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl. Ndu̍yɛ̍ ō nɔ̍ mbō dē nyɛ̄ dīāā o̍ nyɛ̄ dīa̍a̍ cho̍ ō kāsī ya̍ Mɛ̍lɛ̄ka̍ o̍ hɔ̄l te̍, ha̍a̍a̍ mɛ̄ɛ̍ mbō pūlu̍ŋ fo̍.

⁷ Wānā ko̍ŋ pāa̍le̍le̍ŋ kpɛ᷅ŋ ō nɔ̄ɔ̄lɛ̍i̍yo̍ o̍ ni̍i̍lū ni̍, ha̍a̍a̍ mɛ̄ɛ̍ mī pāa̍le̍ŋ lē de᷄l ma̍lāŋ o̍ si̍mnūŋ o̍ di̍a̍ndāā. Tē pāa̍le̍ŋ lē de᷄l pɛ̍, ō nɔ̄ ni᷅ŋ di̍o̍o̍ mbō dē nyɛ̄ dīāā sa̍la̍ cho̍ ō kāsīo̍o̍ wo̍, o̍ ndɔ̍ɔ̍.

⁸ Nyɛ̄ o̍ nyɛ̍ vi᷅ o̍ bā chōo̍ pɛ̍, kɛ̄lɛ̄ŋgāā mī vīsī bīyāā ō dīī ndu̍, wānā o̍ wa᷅na̍ cho̍ wānā so̍līāā lāsa̍lā, ō nɔ̍ mbō dē le̍. Tē ō dē ndu̍ pɛ̍ ō sīmnu̍ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁹ “Wānāā sōlīāā lāsa̍lāa̍ ā nɔ̄ mā chūa̍ sāwāla̍ nīla̍ŋ nda᷅ŋ kpo̍u̍. Tē ā chūe̍ la̍ŋ te̍ ā sɔ̄la̍ yāālāa̍ māā ā tōsa̍ yɔ̄ŋ wɔ̄ɔ̍ŋndo̍, o̍ ko̍ŋ mā sɔ̄la̍ pīɔ̍mndo̍ le̍ mɛ̄ɛ̍ nda̍ sōli̍ ya̍ dīōm ma̍ pɛ̄ɛ̄sā sāwāla̍ nīla̍ kāsī la̍ŋ yɛ̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ya̍ si̍i̍ŋgu̍u̍ la̍ŋ sāwāla̍ kāsī ni̍.

¹⁰ “Wānā o̍ wāna̍ fu̍la̍ o̍ yu̍ŋgu̍ wānāā sōlīāā lāsa̍lāa̍ chōo̍ le̍, ō nɔ̍ mbō dē nyɛ̄ dīāā sa̍la̍ cho̍ ō kāsīo̍o̍ wo̍ le̍. Mīāllo̍ o̍ fu̍la̍ nāa̍ che᷅le̍ŋ mbo̍ hūŋ sūmīālīī wānā so̍līāā lāsa̍lāa̍ wo̍ bɛ̍ɛ̍, ō nɔ̍ mbō dē ndu̍ le̍, ɔ̄ɔ̄, wāna̍ cho̍ wānā so̍līāā lāsa̍lāa̍ wa̍llo̍ o̍ bā wo̍.

¹¹ Kɛ̍ te̍ ō wa̍ pɛ̍ mī wānā so̍līāā lāsa̍lāa̍ ō pēndū chīɔ̍ɔ̍, mi̍ chɛ̄ kōŋ ō wā ni᷅ŋ le̍ ndu̍, ɔ̄ɔ̄ mbo̍ nɔ̄ chīɔ̍ɔ̍ o̍ ve̍lu᷄ŋ o̍ ndu̍ lo̍ chi̍ɛ̍ī ni̍ŋ ndo̍ pɛ̍, chɛ̄ kōŋ ō dīā nyɛ᷅ dīāā lāsa̍lā kōŋ.

¹² Wānā so̍līāā lāsa̍lāa̍ te̍ chūā ndɔ̄ɔ̍ ō cha̍l o̍ nɔ̄ɔ̍ wāna̍ cho̍ wa̍nā so̍līāā lāsa̍lā le̍ wo̍ o̍ bā pɛ̍, chūā ndɔ̄ ko̍ŋ ō nɔ̍ mbō dē nyɛ̄ dīāā sa̍la̍ cho̍ ō kāsīo̍o̍ wo̍ le̍.

¹³ Kɛ̍ tē wānā so̍līāā lāsa̍lāa̍ pɔ̍nɔ̍ɔ̍ chūā ndɔ̄ɔ̍ vī pɛ̍, ɔ̄ɔ̄ mī ī yɔ̄nu̍ŋ mā kɛ̄ya᷅ŋ nda̍ pɔ̍nɔ̍ ndɔ̄, ndu̍yɛ̍ mī chūā ndɔ̄ ko̍ŋ ō vīlu̍ chu̍ā o̍ chūā le̍, mbō mīīŋgu̍ o̍ fi̍nyā ndɔ̄ lo̍ chi̍ɛ̍ī ni̍ŋ le̍ mbō kɔ̍ wa᷅ lo̍ŋ mɛ̄ɛ̍ o̍ wa̍ pāāndū yɛ̍ pɛ̍, chūā ndɔ̄ ko̍ŋ ō nɔ̄ di̍ mbō dē nyɛ̄ dīāā lāsa̍lāa̍, ō fi̍nyā ndɔ̄ nɔ̍ mbō sɔ̄la̍ wo̍. Kɛ̍ ō fūla̍ o̍ ha̍ā kɔ̄ɔ̄lī, wānā o̍ wānā che᷅le̍ŋ ō nɔ̍ lɛ̍ mbō dē nyɛ̄ dīāā kōŋ te̍.

¹⁴ “Tē wāna̍ fu̍la̍ o̍ yu̍ŋgu̍ wānāā sōlīāā lāsa̍lā chōo̍ le̍ wo̍ ō dē nyɛ̄ dīāā sa̍lā cho̍ ō kāsīo̍o̍ wo̍ pɛ̍, kɛ̍ mbō sīna̍ le̍, wānā ko̍ŋ ō nɔ̄ mbō mīŋgi̍ nyɛ̄ dīāā kōŋ sɔ̍ŋgɔ̍ɔ̍ wānā so̍līāā lāsa̍lāa̍ o̍ bā, ndu̍yɛ̍ tē nyɛ̄ dīāā kōŋ ō wa̍ nyɛ̄ pīɔ̄wāā ku̍ndāla̍ŋ lā ŋūɛ̍ɛ̍nu̍ pɛ̍, ō nɔ̄ mbō hāndu̍ ku̍ndāa̍ ō pīlɛ̍ lēchōo̍, mbō chīŋa̍ lā ŋɔ᷄mpu᷅m.

¹⁵ Wānāā sōlīāā lāsa̍lāa̍ ā nɔ̍ mā tōsa̍ mī sa̍lālā dīāndāālā wāŋnda̍ I̍sɔ̄lūɛ̄ī a̍ hu᷅ŋ nāa̍ ya̍ Mɛ̍lɛ̄ka̍ Ya̍a̍wɛ̄ɛ̄ chu̍a̍ la̍ŋ lā sīmnu᷄ŋ nyɛ᷅ fo̍ndō fu̍u̍ le̍.

¹⁶ Ā lo᷅ tōfā mī wānāa̍ nɔ̍ le̍ la̍ŋ di̍o̍ le̍ wa̍ ā dē la̍ŋ te̍. Tē ā lo̍ tōfā pɛ̍ mī wāna̍ nɔ̍ le̍ nyɛ̄ dīāā dīāndāā wāŋnda̍ I̍sɔ̄lūɛ̄ī a̍ hu᷅ŋ o̍ ya̍ lo̍ wo̍ dīo̍ le̍ wo̍ ō dē ndu̍ pɛ̍, mɛ̄ɛ̍ ā tōsa̍ mi̍ wānā ko̍ŋ ō wā ō yāālāā le̍ dɛ̍nɛ̍ pa̍lāa̍ sɔ̄lāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ya̍ si̍i̍ŋgu̍u̍ sa̍lālā kāsī ni̍.”

¹⁷ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹⁸ “Di̍mu̍l E̍lɔ̄ŋ nda̍ pūa̍a̍ ndūa̍a̍ a̍ wāŋnda̍ I̍sɔ̄lūɛ̄ī kpo̍u̍ māā ya̍ Mɛ̍lɛ̄ka̍ dīmi̍ a̍a̍, ‘Wānā o̍ wāna̍ hi᷅ŋ a̍ chɔ̄lōo̍ le̍ sa̍lā lūāmāa̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, ō wa̍ sa̍lāa̍ le̍ būŋgɛ̄ī ŋ̄ chūa̍ ve̍ pēēlōo̍ ni̍, ō wa̍ sa̍lā ŋ̄ kɛ̄ɛ̄si̍a̍a̍ a̍ kɔ̄l nūmndo̍ le̍ sōlīo̍o̍ wo̍ ni̍, wānā ko̍ŋ ō wa᷄ I̍sɔ̄lūɛ̍i̍nɔ̍, ō wa̍ wa̍nāā lēkāa̍wa̍a̍ cho̍ nya̍ tɛ̍ɛ̍ŋ nda̍ ō pīlɛ̍,

¹⁹ le̍ mī sa̍lā kōŋ ō wa᷄ ō chɛ̄lna᷄ŋ, chɔ̄lū kōŋ mɛ̄ɛ̍ mbō wa̍ ō pīāāndōo̍, ndu̍yɛ̍ ō nɔ᷅ sɔ᷅ŋ o̍ sɔ̄ŋ te̍, ō wa᷄ nāū, ɔ̄ɔ̄ sāa̍, ɔ̄ɔ̄ ō wa᷄ bɛ̍ɛ̍ chu̍i̍ŋndo̍.

²⁰ Chɔ̄lū o̍ chɔ̄lu̍ nɔ̍ sɔ̄ŋndo̍ pɛ̍, lā so̍lī ndu̍ sa̍lāa̍ o̍ ya̍ Mɛ̍lɛ̄ka̍ lo̍ le̍. Ya̍ Mɛ̍lɛ̄ka̍ I̍ bi̍ī sa̍lā kōŋ te̍.

²¹ Wānā o̍ wāna̍ hi᷅ŋ a̍ nāū nūmndo̍ kɛ̄lɛ̄ŋgāā sāā nu̍mndo̍, ɔ̄ɔ̄ chūīŋ nūmndo̍ le̍ sa̍lā kɔ̄l nyūlōo̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, ō wa̍ sa̍lāa̍ le̍ būŋgɛ̄ī ŋ̄ chūa̍ ve̍ pēēlōo̍ ni̍, ō wa̍ sa̍lā ŋ̄ kɛ̄ɛ̄si̍a̍a̍ a̍ kɔ̄l nūmndo̍ le̍ sōlīo̍o̍ ni̍, le̍ mī sa̍lā kōŋ ō wa᷄ ō chɛ̄lna᷄ŋ, chɔ̄lū kōŋ mɛ̄ɛ̍ mbō wa᷄ ō nɔ᷅ sɔ᷅ŋ o̍ sɔ̄ŋ te̍.

²² Chɔ̄lū sūmɛ̍i̍ ni̍, chɔ̄lū nāmtā ni̍, chɔ̄lū nda̍ yɔ̄ŋu̍l mbō sɔ̄la̍ nāmtāle̍ le̍ŋ ndo̍ ni̍, chɔ̄lū yu̍ŋga̍ ni̍, chɔ̄lu̍ nɔ̍ nāā o̍ nāā wɔ̄ɔ̍ŋ chēle̍ŋ lēkɔ̄ɔ̍ ni̍, chɔ̄lūāā wāā le̍nde̍ ki̍nɛ̍i̍ lā nɔ̍ mī lā yɔ̄ŋgu̍ nda̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍. Lā nɔ̍ mī lā sōli̍ ō pīlɛ̍ bɛ̍ɛ̍ sa̍lā lūāmāa̍ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍.

²³ Nāū fɔ̍ŋndɔ̍ ni̍, sāā fɔ̍ŋndɔ̍ ni̍, chɔ̄lūāā ŋīɔ̍ɔ̍ŋnda̍ ha̍ā ō kɛ᷅ o̍ kɛ᷅ fu̍u̍lu̍u̍ chɔ̍lū lāpi̍ le̍, ɔ̄ɔ̄ mbō nɔ̄ nāmtāle̍ yɔ̍ŋāā pɛ̍, lā sōlī ko̍ŋ sa̍lā kɔ̄l chɛ̄lāā wāŋndo̍ ō kɛ̄ɛ̄sīāā a̍ kɔ̄l ndɔ̄ɔ̍ le̍ sōlīo̍o̍ wo̍. Kɛ̍ te̍ lā sōli̍ ndu̍ sa̍lāa̍ le̍ būŋgɛ̄ī wāŋndo̍ ō chūa̍ ve̍ pēēlōo̍ pɛ̍, sa̍lā kōŋ ō ve᷅ o̍ chɛ̍lna᷄ŋ te̍.

²⁴ Chɔ̄lū o̍ chɔ̄lū nda̍ pɛ̄l bōōsīo̍o̍ pɛ̍, kɛ̄lɛ̄ŋgāā mi̍ nyɛ̄ yɔ̄nu̍ŋ a̍ būŋndā ŋ̄kpōlōlā ndɔ̄la̍ŋ mi̍ lā fūlā, ɔ̄ɔ̄ mi̍ lā tāmbū pɛ̍, lā nɔ̍ mī lā sōli̍ chɔ̄lū wāā le̍nde̍ sa̍lāa̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍. Lā nɔ̍ mī lā tōsa̍ ī wāā le̍nde̍ o̍ lɛ̄ŋndē nyāle̍ŋ ni᷄ŋ te̍.

²⁵ “ ‘O̍ ko̍ŋ kɔ̍ɔ̍lī, chɔ̄lū o̍ chɔ̄lū nya̍ sɔ̄la̍ wānāā lēkāa̍wa̍ o̍ bā pɛ̍, lā nɔ̍ mī lā sōli̍ ndu̍ sa̍lā nyɛ̄ dīa̍a̍ o̍ ya̍ Mɛ̄lɛ̄ka̍ nyāa̍ Ya̍a̍wɛ̄ɛ̄ lo̍ le̍, fo̍ndōle̍, chɔ̄lū kōŋ chɔ̄lu̍ nɔ᷅ sɔ᷅ŋndo̍ wo̍ o̍ cho̍ ni̍. Ndu̍yɛ̍ sa̍lā so̍līŋ ko̍ŋ ndo̍ ō ve᷅ o̍ chɛ̍lna᷄ŋ te̍.’ ”

²⁶ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍, le̍ mbō dīmu̍l I̍sɔ̄lūɛ̍i̍ya̍ āā,

²⁷ “Tē nāūwo̍, ɔ̄ɔ̄ sāa̍, ɔ̄ɔ̄ chūīŋndo̍ ō kōm pɛ̍, chɔ̄lū o̍ ku̍ām ko̍ŋ ndo̍ ō nɔ̄ mbō wa̍ a̍ kālāa̍ lātūlu̍ le̍ pālɛ̍i̍ ī ŋɔ᷄mmɛ̍ū. Tē pālɛ̍i̍ i̍ ŋɔ̍mmɛ̍ū kēŋ ī hīōū ni᷅ŋ pɛ̍, ā nɔ̄lā ni᷅ŋ mā sōli̍ ndu̍ sa̍lā lūāmāa̍ o̍ ya̍ Mɛ̄lɛ̄ka̍ lo̍ ndu̍yɛ̍ mī bi̍ī sa̍lā kōŋ.

²⁸ Ndu̍yɛ̍, nāū fɔ̍ŋndɔ̍ ni̍, sāā fɔ̍ŋndɔ̍ ni̍, chūīŋ fɔ̍ŋndɔ̍ ni̍, lā di̍ī ndu̍ nda̍ kālāa̍ lātūlu̍ o̍ pāa̍le̍ pi᷅lɛ̍ le̍ŋ chōo̍ le̍ sa̍lā o̍ sa̍lā le̍.

²⁹ Ndu̍yɛ̍, tē lā wa̍ sa̍lā nya̍ mēl ya̍ Mɛ̍lɛ̄ka̍ Ya̍a̍wɛ̄ɛ̍ ba̍li̍ka̍a̍ wo̍ sōlīo̍o̍ pɛ̍, lā nɔ̄ mī lā sōli̍ ndu̍ mɛ̄ɛ̍ i̍ cho̍ ī dīmīāā le̍ ndu̍ sōlīo̍o̍ yɛ̍, ko̍ŋ to̍sā ni̍ mī sa̍lā nyā ko̍ŋ ō wa᷄ ō chɛ̄lna᷄ŋ.

³⁰ Tē lā sōli̍ sa̍lāa̍ ho̍ō pɛ̍, lā nɔ̄ mī lā dē ndu̍ pāa̍le̍ le̍ŋ kpo̍u̍, ō nɔ̍ mbō lɔ̍l ku̍ya̍ le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³¹ “Lā chūa̍ sa̍wāla̍ nīla̍ŋ ndu̍yɛ̍, mī lā tōsa̍ nyɛ̄ o̍ nyɛ̄ la̍ di̍mi̍ le̍ to̍sāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³² Lā to̍sā mī dīōlā nīla̍ŋ lā sīmnu̍ŋ nyɛ᷅ fo̍ndō fu̍u̍ le̍. Wāŋnda̍ I̍sɔ̄lūɛ̄ī kpo̍u̍ ā nɔ̄ mā ke̍ ya̍ bɛ̄ɛ̄le̍ŋ māā Mɛ̄lɛ̄ka̍ kāsīo̍o̍ ya̍ I̍ cho̍ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ya̍ si̍i̍ŋgūū nya̍ wānāā kāsī ni̍.

³³ Ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍, mi̍ hu᷅ŋ a̍ nya̍, le̍ mī wa̍ Mɛ̄lɛ̄ka̍ nyā. Ya̍ cho̍ Mɛ̍lɛ̄ka̍ Ya̍a̍wɛ̄ɛ̄ ni̍.”