Lɛ̄vi̍ti̍kɔ̍ɔ̄ 21 - Yāu̍ Mɛ̄lɛ̄ka̍a̍

Sāwāla̍ŋ le̍ wānāā sōlīāā lāsa̍lāa̍

¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē āā, “Di̍mu̍l wa̍nāā sōlīāā lāsa̍lāa̍, nda̍ yɔ̍nūŋ māā pūa̍a̍ E̍lɔ̄ŋ nda̍ ni̍, māā wānā o̍ wāna̍ cho̍ wānā so̍līāā lāsa̍lāa̍, ō nɔ̍ mbō pi̍la̍ŋ wa̍nā vi̍lɛ̍i̍yo̍ le̍, ā yɔ᷄ŋ bɛ̍ɛ̍ mbō wa̍ māā wāŋndo̍ o̍ yu̍ŋgu̍ nyāa̍ chōo̍ ndu̍ o̍o̍ vi᷅ ni̍, yɔ̄ŋi̍ ŋ̄ sīmnu̍ŋ o̍ nɔ̍ɔ̍lɛ̍i̍ ya̍ o̍ hɔ̄l.

² Kɛ̍ te̍ ō wa̍ pɛ̍, māā wānāyɛ̍ī ndūɛ̍i̍ ī kpe̍e̍kpe̍i̍ye̍ ndi̍ vi᷅ ni̍, mɛ̄ɛ̍ kāla̍ ndɔ̄ cho̍ nu̍a̍ā yɛ̍, ɔ̄ɔ̄ fi̍nyā ndɔ̄, ɔ̄ɔ̄ po̍ ndɔ̄ɔ̍, ɔ̄ɔ̄ chūā ndɔ̄ɔ̍, ɔ̄ɔ̄ bɛ̄ ndɔ̄, ɔ̄ɔ̄ pɔ̄mbɔ̄ ndɔ̄,

³ ɔ̄ɔ̄ yēma̍ ndɔ̄ yu̍fu̍a̍a̍nɔ̍ɔ̍ o̍ cho̍ wɔ̍ o̍ nɔ̄ le̍, mbo̍ wā ndu̍ o̍ bā chīɛ̄ī ni̍ŋ ndo̍, ko̍ŋ ndu̍ ndu̍, ō nɔ̄ kāfɛ̍īyo̍ mbō pīla̍ŋ ndu̍.

⁴ Kɛ̍ te̍ ō wa̍ pɛ̍ māā wāŋndo̍ ho̍ō le̍ lēfēi̍ ko̍ni̍ nda̍ chō wānāyɛ̍i̍ nda̍ wānā so̍līāā lāsa̍lāa̍ ni̍, mɛ̄ɛ̍ wānā so̍līāā lāsa̍lāa̍ ō nɔ̍ mbō pīla̍ŋ wa̍nā vi̍lɛ̍i̍ ko̍ŋ te̍, yɔ̄ŋi̍ o̍ si̍mnu̍ŋ o̍ nɔ̍ɔ̍lɛ̍i̍ ya̍ o̍ hɔ̄l.

⁵ “Wānā o̍ wāna̍ cho̍ wānā so̍līāā lāsa̍lā, te̍ wāna̍ ndɔ̄ɔ̍ ō vī pɛ̍, ō nɔ̍ mbō sēndi̍ yīīŋnde̍ ndu̍ o̍ lēbōl kpēŋgēi̍ pīlɛ̍i̍ chɛ̍ chɛ̍ mbō mɛ̄i̍ kpēŋgēi̍ pīlɛ̍i̍ le̍, ɔ̄ɔ̄ mbō sēndi̍ sīɛ̍i̍ye̍ o̍ da̍ŋga̍lta̍ŋ kpo̍u̍, mbō mɛ̍i̍ he̍ī ī dīya᷄ŋ tɛ̍ɛ̄ŋ, ɔ̄ɔ̄ mbō tɛ̄ɛ̄ndi̍a̍a̍ dīāllūŋ ndɔ̄ɔ̍ŋ le̍ kɔ̄l ndɔ̄ ta̍mbɛ̍i̍yo̍ chɔ̄mndo̍ le̍ wāna̍ ndɔ̍ vi᷅ ko̍ŋ ndo̍ le̍.

⁶ Wānāā sōlīāā lāsa̍lāa̍ ā nɔ̄ mā wa̍ wānāā kāsī, ā nɔ̍ mā tōsa̍ īsɔ̄ɔ̍ o̍ īsɔ̄ɔ̍ i̍ tɛ̍ɛ̍mbūū dīōlā Mɛ̍lɛ̄ka̍ ndāa̍ lābɛ̄ɛ̄ le̍. Kāni̍ fo̍ndōle̍, nda̍ lu̍ām sa̍lāla̍ŋ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ ni̍, nyɛ̄ dīa̍a̍ cho̍ le̍ Mɛ̍lɛ̄ka̍ ndāa̍ wo̍. Le̍la̍ŋ ā nɔ̄ mā wa̍ wānāā kāsī ya̍ o̍ hɔ̄l.

⁷ “Wānā o̍ wāna̍ cho̍ wānā so̍līāā lāsa̍lā ō nɔ̍ mbō chūa̍ wānā la̍nɔ̍ ti̍a̍māa̍ o̍ nɔ̄ ni̍ŋ te̍, ō nɔ̍ mbō chu̍a̍ wānā la̍nɔ̍ si̍nā ni᷅ŋ sūɛ̍i̍ wānā pɔ̍nɔ̍ɔ̍ wo̍ o̍ nɔ̄ɔ̍ ni̍ŋ te̍, ɔ̄ɔ̄ mbō chu̍a̍ wānā la̍nɔ̍ wa̍ o̍ nɔ̄ɔ̍ kɛ̍ ma̍ kɛ̄ya᷅ŋ nda̍ pɔ̍nɔ̍ ndɔ̄ wo̍, kāni̍ fu̍u̍le̍, wānā so̍līāā lāsa̍lāa̍ wāna̍ nɔ̍ mbō wa᷄ wāna̍ kāsī Mɛ̍lɛ̄ka̍ ndāa̍ o̍ hɔ̄l lo̍ o̍ nɔ̍ ni̍ mbō wa̍.

⁸ Nya̍ wāŋnda̍ I̍sɔ̄lūɛ̄ī, lā nɔ̄ mī lā chu̍a̍ wāŋnda̍ ha̍ā māā wānāā kāsī nda̍ chō ni̍, kāni̍ fo̍ndōle̍ nda̍ so̍lī nyɛ̍ dīa̍a̍ sa̍lāa̍ o̍ Mɛ̍lɛ̄ka̍ nyāa̍ lo̍ ni̍. Lā chu̍a̍ nda̍ māā wānāa̍ cho̍ ā kāsī wa̍ nda̍ chō ni̍, fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kāsīo̍o̍ ya̍ I̍ cho̍ ni̍, ndu̍yɛ̍ ya̍ si̍i̍ŋgūū nya̍ wānāā kāsī ni̍.

⁹ Tē wānā so̍līāā lāsa̍lāa̍ chūā ndɔ̄ɔ̍ ō tɛ̄ɛ̄mbu̍ŋ la̍bɛ̍ɛ̍ mbō sīmnu̍ŋ wa̍nā la̍nɔ̍ ti̍ām le̍ nyɛ̄ sɔ̄lāa̍ wo̍ pɛ̍, mbō sōli̍ ndu̍ pi̍la̍ o̍ ba̍a̍ ni᷄ŋ pɛ̍, mɛ̄ɛ̍ fi̍nyā ndɔ̄ ko̍ŋ ō tɛ̍ɛ̍mbu̍u̍ ko̍ŋ la̍bɛ̍ɛ̍ ni̍. Chūā ndɔ̄ ko̍ŋ ā nɔ̄ mā lōm ndu̍ chi̍li̍kɔ̍.

¹⁰ “Wānā o̍ wānā nda̍ hɛ̄li̍ pɛ̍ wānāā sōlīāā lāsa̍lāa̍ tɛ̍ɛ̍ŋ, ma̍ tālā ndu̍ chūɛ̄īya̍ŋ o̍ lēbōl le̍ mbō wa̍ ō yɔ̄ŋga᷄ŋ o̍ Mɛ̍lɛ̄ka̍ lo̍, le̍ nyɛ̄lā wānā sōlīāā lāsa̍lāa̍ wōōnɔ᷄ŋndo̍ le̍ mbō wa̍ māsa̍ wānāā sōlīāā lāsa̍lāa̍ pɛ̍, tē wāna̍ ndɔ̄ɔ̍ ō vī pɛ̍, ō nɔ̍ mbō kɛ̄ɛ̍ yīīŋnde̍ sāāndīāā mbō ma᷄l ndi̍ le̍nde̍ le̍, ndu̍yɛ̍, ō nɔ̍ mbō sɛ̄ɛ̄si̍a̍ŋ nyɛ᷅la̍ŋ lēkɔ̄ɔ̍ le̍ kɔ̄l ndɔ̄ ta̍mbɛ̍i̍yo̍ chɔ̄mndo̍ le̍ wāna̍ ndɔ̍ vi᷅ wo̍ le̍.

¹¹ Wānā so̍līāā lāsa̍lā kōŋ ō nɔ̍ mbō lūɛ̄ī chīɛ̄ī wānā vīlɛ̍i̍ ni̍ŋ mbō sīmnu᷄ŋ o̍ nɔ̍ɔ̍lɛ̍i̍ le̍, ā yɔ̍ŋ bɛ̍ɛ̍ mbō wa̍ māā fi̍nyā ndɔ̄ ɔ̄ɔ̄ kāla̍ ndɔ̍ vi᷅ ni̍.

¹² Ō nɔ̍ mbō fāŋa̍ŋ o̍ tɛ̍ndīi̍ kāsi̍ Mɛ̄lɛ̄ka̍ ndɔ̄ɔ̍ mbō kūɛ̄ o̍ bīīsi̍ chōo̍ le̍, te̍ o̍ to̍sa̍ ke̍ŋ pɛ̍, mɛ̄ɛ̍ ō tɛ̍ɛ̍mbu̍u̍ tɛ̍ndīi̍ nī kāsīo̍o̍ lābɛ̄ɛ̄. Kāni̍ fo̍ndōle̍, ā tāla̍ ndu̍ chūɛ̄īya̍ŋ o̍ lēbōl mbo̍ wā ō yɔ̄ŋga᷄ŋ o̍ ya̍ Mɛ̄lɛ̄ka̍ ndɔ̄ɔ̍ lo̍ le̍ kpe̍ku̍ nūu̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹³ Wāna̍ cho̍ ho̍ō ō hɛ̄līāā māā māsa̍ wānāā sōlīāā lāsa̍lā wo̍, tē ō wa̍ la̍nɔ̍ɔ̍ chūa̍a̍ pɛ̍, yūfu̍a̍a̍nɔ̍ɔ̍ o̍ nɔ̍ ni̍ mbō chūa̍.

¹⁴ O̍ nɔ̍ mbō chūa̍ wānā la̍nɔ̍ pɔ̍nɔ̍ ndɔ̄ vi᷅ wo̍ o̍ nɔ̄ ni̍ŋ te̍, ō nɔ̍ mbō chūa̍ wānā la̍nɔ̍ wa̍ ni᷅ŋ o̍ nɔ̄ɔ̍ ma̍ kɛ̄ya᷅ŋ ndo̍ le̍, ō nɔ̍ mbō chūa̍ wānā la̍nɔ̍ ti̍ām le̍ nyɛ̄ sɔ̄lāa̍ wo̍ le̍. Wānā la̍nɔ̍ si̍nā wɔ̍ sūɛ̍i̍ wānā pɔ̍nɔ̍ le̍ wo̍, o̍ fu̍la̍ o̍ yu̍ŋgu̍ ndāa̍ chōo̍ wo̍, ndu̍ o̍ nɔ̍ ni̍ mbō chūa̍ o̍ nɔ̄ɔ̍ ni᷄ŋ.

¹⁵ O̍ nɛ̄īyo̍ ho̍ō ni̍ŋ o̍ nɔ̍ ni̍ mbō chu̍a̍ la̍nɔ̍ɔ̍, yɔ̄ŋi̍ o̍ to̍sa̍ mī chūāūwāā ndūa̍a̍ ā sīmnu̍ŋ wa̍nāa̍ nɔ̍ le̍bɛ̍ɛ̍ le̍, o̍ ku̍ndā ndāa̍ chōo̍. Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ hɛ̍li̍ ndu̍ ni̍ mi̍ si̍i̍ŋgūū ndu̍ māsa̍ wānāā sōlīāā lāsa̍la̍.”

¹⁶ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmūl Mūu̍sē āā,

¹⁷ “Di̍mu̍l E̍lɔ̄ŋ māā chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, wānā o̍ wāna̍ fu̍la̍ o̍ yu̍ŋgu̍ ndɔ̄ɔ̍ chōo̍, tē ō nɔ̄ tāmbe̍i̍ pɛ̍, ō nɔ̍ mbō sōli̍ sa̍lā nyɛ̄ dīa̍a̍ o̍ ya̍ Mɛ̍lɛ̄ka̍ ndɔ̄ɔ̍ lo̍ le̍.

^18-20 Wānāa̍ nɔ̍ tāmbe̍i̍ya̍ ki̍nɛ̍i̍, ō wa̍ wa᷅na̍ sūmɛ̍i̍, ō wa̍ wa᷅na̍ bɛ̄vɛ̍i̍, ō wa᷄ wa᷅na̍ hɔ̄lla̍ ā chō ā tāmbɛ̍i̍, ō wa᷄ wa᷅na̍ nɔ̍ nāmtāle̍ yɔ̍ŋāālē chēle̍ŋ ni̍, ō wa᷄ wa᷅na̍ nɔ̍ pēlīī tāmbɛ̍i̍ ɔ̄ɔ̄ bā tāmbɛ̍i̍ ni̍, wāna̍ ībūu̍ ni̍, tu̍ŋgū ni̍, wāna̍ hɔ̄ltē tāmbu̍ ni̍, wāna̍ nɔ̍ nāā kɔ̄ɔ̍le̍ nyu̍mūlāā ni̍, wāna̍ īpāū ni̍, wānā pɔ̍nɔ̍ būŋ kpōlō pīɔ̄lɛ̍i̍ ni̍, nda̍ ki̍nɛ̍i̍ ā nɔ̍ mā sōli̍ lāsa̍lā o̍ ya̍ Mɛ̍lɛ̄ka̍ lo̍ le̍.

²¹ Wānā o̍ wa᷅na̍ fu̍la̍ o̍ pūlāle̍ E̍lɔ̄ŋ wa̍nā sōlīāā lāsa̍lāa̍ chōo̍, tē ō nɔ̄ nāmtāle̍ŋ pɛ̍, ō nɔ̍ mbō lōm sa̍lā o̍ sa̍lā nyɛ̄ dīāā o̍ ma̍āŋndo̍ chōo̍ o̍ Mɛ̍lɛ̄kā Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ lo̍ le̍.

²² Wānā ko̍ŋ ō nɔ̄ di̍ mbō dē nyɛ̄ dīāā nda̍ sōlī sa̍lāa̍ o̍ ya̍ Mɛ̄lɛ̄ka̍ ndɔ̄ɔ̍ lo̍ wo̍, ō wa̍ nyɛ̍ dīāā sa̍lā kāsī, ō wa̍ nyɛ̍ dīāā sa̍lā kāsi̍ hi̍o̍ū kpo̍u̍ wo̍, ō nɔ̄ mbō dē la̍ŋ kpo̍u̍.

²³ Kɛ̍ le̍ mɛ̄ɛ̍ o̍ nɔ̍ tāmbe̍i̍ yɛ̍, wānā ko̍ŋ ō nɔ̍ mbō sɔ̄ɔ̄ŋgu̍u̍ kōla̍ cho̍ ō lāndāā o̍ fo̍ndā nī kāsīo̍o̍ wo̍ īkɛ̄i̍, ɔ̄ɔ̄ o̍ ma̍āŋndo̍ īkɛ̄i̍ le̍ sa̍lā o̍ sa̍lā o̍ so̍li̍ le̍, yɔ̄ŋi̍ o̍ to̍sa̍ mī fo̍ndā nī kāsīo̍o̍ ō sīmnu᷄ŋ o̍ nɔ̍ɔ̍lɛ̍i̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ya̍ to̍sā ni̍ mā wa̍ wānāā kāsī.”

²⁴ O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ dɔ̄ū Mūu̍sē o̍ sōndō le̍ E̍lɔ̄ŋ nda̍ pūa̍a̍ ndūa̍a̍, a̍ wāŋnda̍ I̍sɔ̄lūɛ̄ī kpo̍u̍, mi̍ Mūu̍sē o̍ di̍mūl nda̍ ndu̍ kpo̍u̍.