Lɛ̄vi̍ti̍kɔ̍ɔ̄ 19 - Yāu̍ Mɛ̄lɛ̄ka̍a̍

Sāwāla̍ŋ le̍ wāa̍ ō kāsī ndu̍yɛ̍ a̍ wāa̍ sa̍kpō Mɛ̄lɛ̄ka̍ o̍ hɔ̄l

¹ Mi̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Di̍mu̍l wa᷅ŋnda̍ I̍sɔ̄lūɛ̄ī kpo̍u̍ māā nyɛ̄ ya̍ I̍ dīmi̍ wo̍ cho̍ ho̍ō ni̍. Wāŋnda̍ I̍sɔ̄lūɛ̄ī, lā wa̍ wānāā kāsī, kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, wāna̍ kāsīo̍o̍ ya̍ cho̍ ni̍.

³ Wānā o̍ wānā ke̍ fi̍nyā nu̍m bɛ̄ɛ̄le̍ŋ a̍ kālā nu̍m, ndu̍yɛ̍, mā ke̍ pāa̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁴ “Ō fūla̍ o̍ ya̍ kɔ̄ɔ̄lī, lā so̍o̍lūū nyɛ̄ o̍ nyɛ̄ chēle̍ŋ māā mɛ̄lɛ̄ka̍ nyā le̍, ɔ̄ɔ̄ mī lā tōōsi̍a̍a̍ nyɛ̄ o̍ nyɛ̄ chēle̍ŋ a̍ īchīli̍ŋ le̍ ndu̍ sōōlūū māā mɛ̄lɛ̄ka̍ nyā le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁵ “Tē lā hīŋ a̍ sa̍lālā nyāla̍ kɔ̄l nyūlūla̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, lā sōli̍ la̍ŋ o̍ nɛ̄i̍ ya̍ I̍ hīnī kɔ᷅l mī lā bīīlu̍ wo̍ chōo̍.

⁶ Tē lā sōli̍ sa̍lāla̍ŋ nda᷅ŋ pɛ̍, lā nɔ̄ mī lā dē nyɛ̄ dīāā lāsa̍la̍ kōŋ pāa̍le̍ le̍ŋ. Ndu̍yɛ̍, tē nyɛ̄ o̍ nyɛ̄ lɔ̍l ku̍ya̍ pɛ̍, lā dīā ndu̍ vɛ̄lɛ̄ dīi̍mā ndɔ̄ kōŋ. Kɛ̍ tē nyɛ̄ o̍ nyɛ̄ ō lɔ᷄l ni᷅ŋ ku̍ya̍ pɛ̍, o̍ pāa̍le̍ ya̍a̍ ndɔ̄le̍ŋ chōo̍, lā nɔ̄ mī lōm ndu̍.

⁷ Tē lā dē ndu̍ o̍ pāa̍le̍ ya̍a̍ ndɔ̄le̍ŋ chōo̍ pɛ̍, mɛ̄ɛ̍ sūɛ̍i̍ wɔ̍ɔ̍ŋīī bɛ̄ndūe̍i̍ pīla̍ nya̍ tōsa̍ ke̍ŋ ni̍. I̍ bi̍ī sa̍lā nya̍ sōlī ko̍ŋ ndo̍ le̍.

⁸ Ndu̍yɛ̍ wānā o̍ wāna̍ de᷅ ndu̍ pɛ̍, mɛ̄ɛ̍ wānā ko̍ŋ ō tōsa̍ sūɛ̍i̍ wɔ̍ɔ̍ŋīī bɛ̄ndū bɛ̍ndū. Kāni̍ fu̍u̍le̍, wānā ko̍ŋ ō ke̍ nyɛ᷅m dīānda᷄ŋ Mɛ̄lɛ̄ka̍ Ya̍a̍wɛ̄ɛ̄ wo̍ŋ lēbɛ̄ɛ̄ le̍. Wānā ko̍ŋ a̍ nɔ̄ mā sōli̍ ndu̍ wānāā ndūa̍a̍ tɛ̄ɛ̄ŋ po̍.

⁹ “Tē lā wa̍ wi̍tīi̍ŋ nyāa̍ŋ kōūwɔ̄ɔ̍ pɛ̍, lā fu̍u̍lūū a̍ kōūwɔ̄ɔ̍ o̍ sɔ̍ŋgi̍ sɔ̍ŋgi̍la̍ŋ te̍. Ndu̍yɛ̍ bā o̍ bā nya̍ chīi̍ ni᷅ŋ kōūwɔ̄ɔ̄ pɛ̍, lā mi̍i̍ŋgū lɛ̄ ŋ̍ lo̍ kɔ̄ɔ̄lī wo̍ŋ nūūwā le̍, ŋ̍ lo᷅ mu̍ŋ kɔ̍ɔ̍lī wo̍ŋ wānāā tāmbɛ̍i̍ya̍ a̍ wānāā lēkāa̍ wa̍a̍ cho̍ nya̍ tɛ̍ɛ̍ŋ nda̍, nda̍ nɔ̍ mu̍ŋ ni̍.

¹⁰ O̍ ko̍ŋ kɔ̍ɔ̍lī, tē lā wa̍ kīle̍pīi̍ma̍ nyāa̍ŋ kēēndūūwo̍ pɛ̍, lā di̍ndī ma̍ŋ kēēndūūwo̍ fo̍ fo̍ le̍. Mā pɔ̄mpɔ̍mbɔ̄ma̍ lo᷅ ma̍ŋ le̍cho̍o̍ wa̍ŋ, a̍ ma̍ de̍lī lɛ᷅ŋ nda̍ŋ, wānāā tāmbɛ̍i̍ya̍ a̍ wānāā lēkāa̍ wa̍a̍ cho̍ nya̍ tɛ̄ɛ̄ŋ nda̍, nda̍ nɔ̍ ma̍ŋ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

¹¹ “Wānā to̍sā le̍vi̍i̍ le̍. Wānā to̍sā la̍ka̍fā le̍. Lā di᷅mu̍la̍ŋ chōōla̍ŋ te̍.

¹² Wānā me̍nāŋ se᷅ndi̍ sɔ̄ŋ cho̍o̍ wo̍ a̍ dīōlā nīla̍ŋ te̍. Tē wānā to̍sa̍ ke̍ŋ pɛ̍ mɛ̄ɛ̍ a̍ tɛ̍ɛ̍mbu̍u̍ dīōlā nīla̍ŋ lābɛ̄ɛ̄. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹³ “Wānā to̍sāl cha̍a̍ŋ nu̍m ka̍fāla̍ŋ ɔ̄ɔ̄ mā chi̍i̍mbu̍u̍ nyɛ̄ ndɔ̄ le̍. Tē a̍ chu̍a̍ wāŋndo̍ le̍ wa̍li̍ lēpāla̍a̍ pɛ̍, pāāwāa̍ ndɔ̄ɔ̍ ō lɔ᷅l nu̍m kūēē mɛ̄ɛ̍ dīi̍mā ndɔ̄ɔ̍ le̍.

¹⁴ Wānā ye̍ī wa᷅na̍ nīlā bāŋu̍lɛ̍i̍yo̍ le̍. Wānā chi᷅ wa̍nā su̍mɛ̍i̍yo̍ hūnɔ̄ɔ̍ mā kɛ̍si̍ ndu̍ nyɔ̄ɔ̍ lāchī le̍ mbō bo᷄ŋ te̍. Lā nɔ̍ si̍o̍ōŋnde̍ le̍ Mɛ̄lɛ̄ka̍ nyāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁵ “Tē a̍ wa̍ wāŋnda̍ yāmɛ̍i̍ kīōlɔ̄ɔ̍ tɛ̄ɛ̄ŋ pɛ̍, wa̍ sa̍kpō o̍ ndi̍ kīōlɔ̄ɔ̍ ni᷄ŋ, ndu̍yɛ̍ mā di̍mi̍ tōnya̍a̍. Si᷅m wāŋndo̍ kɔ̄ɔ̄lī, le̍ mɛ̄ɛ̍ o̍ cho̍ wānā ta̍mbɛ̍i̍, ɔ̄ɔ̄ wānā su̍lāā yɛ̍ mā ke̍ ndu̍ di̍o̍o̍ le̍.

¹⁶ Wānā be̍lu̍ a̍ dīōlā wāŋndo̍ o̍ sōndō mā tɛ̍ɛ̍mbu̍u̍ ndu̍ tɔ̍ɔ̍ wāŋnda̍ tɛ̄ɛ̄ŋ te̍. Ndu̍yɛ̍ wānā to̍sā i̍sɔ̍ɔ̍ o̍ īsɔ̄ɔ̍ i̍ to̍sā mī yōōmu̍ chāa̍ŋ nūmndo̍ ō wa̍ o̍ kpūndɔ̍ɔ̍ ni᷄ŋ te̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁷ “Wānā nɔ᷅ yɛ̄lē tūlāāle̍ chāa̍ŋ nūmnde̍ŋ o̍ kɔ̄l te̍. Tē chāa̍ŋ nūm o̍ to̍sa̍l nu̍m sūɛ̍i̍ pɛ̍, di̍mu̍l ndu̍ kpe̍nde̍ke̍le̍ mī lā tōōsi̍āŋ tɛ̍ɛ̄ŋ. Yɔ̄ŋi̍ o̍ lo̍ o̍ ko̍ŋ mī nūm bɛ̍ɛ̍ mā to̍sa̍ yɔ̄ŋ wɔ̄ɔ̍ŋndo̍.

¹⁸ Tē chāa̍ŋ nūm o̍ to̍sa̍l nu̍m sūɛ̍i̍ wɔ̍ɔ̍ŋnde̍ pɛ̍, ki̍ndī le̍ ndu̍ māa̍ mi̍ŋgūl te̍, ɔ̄ɔ̄ mā bīī ndu̍ o̍ kɔ̄l te̍. Lā kāāla̍ wa̍nāā nya̍ chīɛ̄ɛ̄li̍āŋ nda̍ mɛ̄ɛ̍ nya̍ kāāla̍ nya̍ pi̍la̍ yɛ̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

¹⁹ “Lā tōsa̍ nyɛ᷅ sāwāla̍ nīla̍ŋ lā dīmi̍ wo̍. Wānā o̍ wānā chɛ᷅l mī chɔ̄lū nūmndo̍ ō he᷄l chɔ̄lū nda̍ cho̍ su̍u̍ pi᷅lɛ̍ le̍ wo̍ le̍. Wānā to̍sā kpe̍lo̍o̍ mā tɔ̄l yɛ̄i̍yo̍ŋ ŋ̄ mūu̍ŋ lēni᷄ŋ te̍. Wānā wo̍u̍nu̍ŋ nyɛ᷅ chūɛ̄ɛ̄na᷄ŋ nda̍ tōōsīāā a̍ fūŋnde̍ mu̍ūli̍āŋnde̍ŋ ndo̍ le̍.

²⁰ “Tē pōo̍ chē wānā la̍nɔ̍ chi̍ɔ̍ɔ̍ mbō yēēma̍ le̍ ndu̍ kɛ̄sīo̍o̍ o̍ nɔ̄ɔ̍ ni᷄ŋ pɛ̍, kɛ̍ ndu̍yɛ̍ mbō pāāwa̍ wɔ̍ nyɛ̍ sɔ̄lāa̍ o̍ nɔ̍ le̍ pāāwāa̍ le̍ ndu̍ bāŋāa̍, mbō sɔ̄la̍ wɔ̍ ba̍ŋa᷄ŋndo̍ wo̍ le̍, mbō lo̍ o̍ ko̍ŋ mī wānā pɔ̍nɔ̍ che᷅le̍ŋ ō sūūnda̍ a̍ chɛ̄ kōŋ pɛ̍, wānā pɔ̍nɔ̍ ko̍ŋ a̍ chɛ̄ kōŋ, ā nɔ̍ mā dīī nda̍ le̍, kāni̍ fo̍ndōle̍, chɛ̄ kōŋ ō cho̍ wɔ̍ o̍ ba̍ŋa᷄ŋ te̍. Wāŋ bɛ̄ndūa̍a̍ ā nɔ̄ mā yāāsi̍a̍a̍ o̍ sūɛ̍i̍ ke̍ŋ ni᷄ŋ mā sīna̍ nyɛ̄ kpe̍e̍kpe̍i̍ yɔ̍nu̍ŋ ndo̍.

²¹ Kɛ̍ wānā pɔ̍nɔ̍ ko̍ŋ ō nɔ̄ mbō hīŋ a̍ sāā fɔ̍ŋndɔ̍ɔ̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ dīō le̍ mā sōli̍ sa̍lāa̍ le̍ pāāwā bīōndɔ᷄ŋndo̍.

²² Ndu̍yɛ̍ mī wānā so̍līāā lāsa̍lāa̍ ō sōli̍ sāā ko̍ŋ sa̍lāa̍ ya̍ Mɛ̍lɛ̄ka̍ Ya̍a̍wɛ̄ɛ̄ lāchī le̍ yɔ̄ŋ wɔ̄ɔ̍ŋ o̍ to̍sa̍ ko̍ŋ ndo̍. O̍ ko̍ŋ, mī po̍ ko̍ŋ ō sɔ̄la̍ mālɔ̄ɔ̍ le̍ yɔ̄ŋ wɔ̄ɔ̍ŋ o̍ to̍sa̍ wo̍.

²³ “O̍ ko̍ŋ kɔ̍ɔ̍lī, tē lā fūūlu̍u̍ o̍ lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ le̍ŋ ni᷄ŋ pɛ̍, mī lā cha᷄l ni᷅ŋ ndo̍ŋ, ndu̍yɛ̍, mī lā kāndu̍ wa̍lta̍ nyāla̍ ŋ̄chīɛ̄ɛ̄la̍ŋ tōsāa̍ pɛ̍, wɔ̄sīlā yāa̍la̍ tāse̍la̍ nya̍ chō wā chīɔ̄ɔ̄ŋ nyāa̍ŋ tōsāa̍ la̍ŋ ki̍nɛ̍i̍, kōmɔ̄ɔ̄ o̍ kōmɔ̄ɔ̄ yɔ̄mīī nyɛ̄i̍ ī kōm pɛ̍, o̍ wɔ̄sīlā lāŋ bɛ̄ŋgu̍, lā di̍ā kōmɔ̄ɔ̄lā lāŋ te̍, nyɛ̄ dīāā ya̍ I̍ ku̍u̍na̍ nya̍ le̍ dīo̍o̍ wo̍ la̍ cho̍ ni̍.

²⁴ O̍ ko̍ŋ kɔ̍ɔ̍lī, te̍ wɔ̄sīlā yāa̍la̍ la̍ŋ lā hīōū pɛ̍, wɔ̄sī hi̍ɔ̍ɔ̍lu̍ ndɔ̄ɔ̍, kōmɔ̄ɔ̄ o̍ kōmɔ̄ɔ̄ yɔ̄mīī nyɛ̄i̍ ī kōm pɛ̍, kōmɔ̄ɔ̄lā lāŋ ki̍nɛ̍i̍ lā sīmnu᷄ŋ la̍ di̍a̍ndāā. Lā nɔ̍ mī lā yɔ̄ŋgu̍ la̍ŋ kpo̍u̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, le̍ ya̍ ba̍li̍ka̍a̍ mēllo̍.

²⁵ O̍ ko̍ŋ kɔ̍ɔ̍lī, te̍ wɔ̄sī kōŋ ō chūū pɛ̍, wɔ̄sī ŋūɛ̍ɛ̍nu̍ ndɔ̄ɔ̍, lā kāndu̍ ni̍ko̍ ko̍mɔ̄ɔ̄lā yɔ̄mīī nyɛ̄i̍ dīo̍o̍. Tē lā tōsa̍ nu̍a̍ā pɛ̍, tɔ̄lɔ̄ɔ̄lā nyāla̍ŋ lā wā ni̍ŋ ko̍mɔ̄ɔ̍ ta̍u̍ ta̍u̍ o̍ chīɔ̄ɔ̄ŋ nyāa̍ŋ ni᷄ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

²⁶ “Lā di̍ā vīsīe̍i̍ a̍ kōo̍wa̍ŋ lēni᷄ŋ te̍. Lā ku̍ā o̍ wānāā vīāmāā lāyāwāa̍, ɔ̄ɔ̄ wānāā ko̍o̍ma̍ wɔ̍ɔ̍ŋnda̍ lo̍ le̍.

²⁷ Lā se̍ndī yīīŋnde̍ nya̍ o̍ lēbōl o̍ da̍ŋga̍lta̍ŋ chɛ̍ chɛ̍ mī lā mɛ̄i̍ bōmbōo̍ tɛ̄ɛ̄ŋ te̍. Ɔ̄ɔ̄ wānā se᷅ndi̍ si̍ɛ̍i̍yi̍i̍ nu̍mnde̍ o̍ da̍ŋga̍lta̍ŋ kpo̍u̍ mā mɛ̍i̍ ndi̍ ī dīya᷄ŋ tɛ̍ɛ̄ŋ te̍.

²⁸ Lā tɛ̍ɛ̍ndīāā dīāllūŋ nyāa̍ŋ tē wāna̍ nya̍a̍ vi᷅ pɛ̍ le̍ ndu̍ cha᷄ŋndo̍ le̍. Vɛ̄lɛ̄, wānā tu̍u̍lā nyɛ̄ o̍ nyɛ̄ o̍ dīāllūŋ nūmndo̍ŋ te̍. Ya̍ cho̍ Mɛ̍lɛ̄ka̍ Ya̍a̍wɛ̄ɛ̄ ni̍.

²⁹ “Lā si̍i̍ŋgūū chūāūwāā nyāā wāŋ lāāndūa̍a̍ ti̍ām le̍ nyɛ̄ sɔ̄lāa̍ wa̍ le̍. Tē lā tōsa̍ ke̍ŋ pɛ̍, lɛ̄ŋnde̍ŋ lē sīmnu᷄ŋ lɛ᷅ŋndē wānāā tīāmāā, ndu̍yɛ̍ mī lē sīmnu᷄ŋ lɛ᷅ŋndē dɛ̍nɛ̍ wɔ̍ɔ̍ŋ bɛ̄ndū.

³⁰ Lā ke̍ pa̍a̍le̍ nīle̍ pɛ̍ŋgīāāle̍ŋ lēbɛ̄ɛ̄, ndu̍yɛ̍, mī lā ke̍ fo̍ndā nī di̍a̍ndāa̍ hi̍o̍ū kpo̍u̍ wo̍ bɛ̄ɛ̄le̍ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³¹ “Lā ku̍ā o̍ wānāā ŋ̄wāŋ vīlɛ̍i̍ya̍ lo̍, ndu̍yɛ̍ a̍ o̍ māndi̍a̍a̍ lo̍ le̍ nya̍ lāyāwā vi᷅m te̍. Tē lā tōsa̍ ke̍ŋ pɛ̍, lā sīmnu᷄ŋ a̍ nɔ̍ɔ̍lɛ̍i̍. Ya̍ cho̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

³² “Tē lā chē bɛ̄ndūa̍a̍ pɛ̍, lā chɔ᷄ŋ i̍si̍si̍ le̍ nda̍ bɛ̄ɛ̄le̍ŋ kīo̍o̍. O̍ ko̍ŋ kɔ̍ɔ̍lī, lā nɔ̍ si̍o̍o̍ŋīī nīi̍, ndu̍yɛ̍, mī lā tūēī ya̍ dīōm. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³³ “Tē wāna̍ lēkāa̍ ō kōma̍l nya̍ pɛ̍ le̍ nya̍ cha᷄lle̍ tɛ̄ɛ̄ŋ o̍ lɛ̄ŋndē nyāle̍ŋ ni᷄ŋ, lā to̍sāl ndu̍ sūɛ̍i̍ wɔ̍ɔ̍ŋ te̍.

³⁴ Lā bīi̍ ndu̍ mɛ̄ɛ̍ nya̍ bīī nya̍ pi̍la̍ I̍sɔ̄lūɛ̍i̍ya̍ yɛ̍. Lā kāāla̍ ndu̍ mɛ̄ɛ̍ nya̍ kāāla̍ nya̍ pi̍la̍ yɛ̍. Lā sīna̍ pɛ̍ŋgu̍ māā nya̍ bɛ̍ɛ̍ wānāā lēkāa̍wa̍ nya̍ wa᷄ o̍ lɛ̄ŋndē I̍chi̍pīle̍ŋ ni᷄ŋ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

³⁵ “Lā to̍sāl wāŋnda̍ ka̍fāla̍ŋ o̍ nda̍ nyɔ̄ɔ̍ŋ tūūlūllo̍ ni᷄ŋ te̍, ō wa᷄ nyɛ᷅ wānā tu̍u̍ o̍ nyɛ̄ ni᷄ŋ, ō wa᷄ nyɛ᷅ hāndāā o̍ sēke̍lēi̍ chōo̍, ɔ̄ɔ̄ nyɛ̄ o̍ nyɛ̄ tūwāā.

³⁶ Tē lā wa᷄ wāŋnda̍ nyɔ̄ɔ̍ŋ tūūlūllo̍ pɛ̍, ō wa᷄ se᷅ke̍lēi̍, ō wa᷄ nyɛ᷅ o̍ nyɛ̄ tūwāā nda̍ tūu̍ nyɛ̄, lā wa̍ sa̍kpō o̍ mu̍ŋ tūūwo̍ ni᷄ŋ. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ndo̍ ni̍.

³⁷ Lā tōsa̍ nyɛ᷅ o̍ nyɛ̄ sāwāla̍ nīla̍ŋ lā dīmi̍ le̍ tōsāa̍, o̍ ko̍ŋ kɔ̍ɔ̍lī, nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍ mī lā wa̍ ndu̍ tōsāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”