Lɛ̄vi̍ti̍kɔ̍ɔ̄ 18 - Yāu̍ Mɛ̄lɛ̄ka̍a̍

A̍ mɛ̄ɛ̍ Mɛ̄lɛ̄ka̍ kūūna̍ sūūndāa̍ nya̍ wāna̍ nya̍ cho̍ o̍ nɔ̄ ni̍ŋ te̍ wo̍ yɛ̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Di̍mu̍l wa᷅ŋnda̍ I̍sɔ̄lūɛ̄ī māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

³ Lā to̍sā ka̍ālā wāŋnda̍ I̍chi̍pī a̍ tōsā la̍ŋ te̍, wānāā nya̍ wa̍ o̍ lɛ̄ŋndē ndāle̍ŋ ni᷄ŋ nda̍. Ndu̍yɛ̍ lā to̍sā ka̍ālā wāŋnda̍ lɛ̄ŋndē Ke̍nāŋnde̍ŋ ā tōsā la̍ŋ te̍, lɛ̄ŋndē ya̍ I̍ cho̍ nya̍ le᷅ŋ yɔ̄ɔ̍ lēni᷄ŋ nde̍ŋ. Lā tu̍āl ka̍ālā ndāla̍ŋ kɔ̄ɔ̄lī le̍.

⁴ Lā tōsa̍ nyɛ᷅ sāwāla̍ nīla̍ŋ lā dīmi̍ wo̍, ndu̍yɛ̍, mī lā tōsa̍ nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.

⁵ Le̍la̍ŋ lā tōsa̍ nyɛ᷅ o̍ nyɛ̄ sāwāla̍ nīla̍ŋ lā dīmi̍, ndu̍yɛ̍ ā nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍. Wānā o̍ wāna̍ to̍sa̍ nyɛ̄ sāwāla̍ŋ nda᷅ŋ lā dīmi̍ wo̍ pɛ̍, wānā ko̍ŋ ō hīōū lāchī a̍ wāa̍ yōōmū. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁶ Wānā o̍ wānā su̍u̍ndā a̍ wānāyɛ̍ī nūmnde̍ le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁷ Wānā su̍u̍ndā nya̍ kālā nu̍m te̍. Kāni̍ fo̍ndōle̍, kālā nu̍m o̍ cho̍ ni̍. Tē a̍ to̍sa̍ ke̍ŋ pɛ̍, mɛ̄ɛ̍ a̍ tɛ̍ɛ̍mbu̍u̍ fi̍nyā nu̍m lābɛ̄ɛ̄.

⁸ Wānā su̍u̍ndā a̍ la̍nɔ̍ɔ̍ fi̍nyā nūm te̍. Bɛ̄ɛ̄la̍ŋ fi̍nyā nu̍m tɛ̄ɛ̄mbūūwo̍ cho̍ ko̍ŋ ni̍.

⁹ Wānā su̍u̍ndā a̍ yēmā nu̍m te̍, ō wa̍ ye̍mā nu̍m kālā pi᷅lɛ̍, ō wa̍ ye̍mā nu̍m fi̍nyā pīlɛ̍, ō wa̍ ye̍mā nu̍m nya̍ fūla̍ o̍ yu̍ŋgu̍ pi᷅lɔ̍ɔ̍ chōo̍, kɛ̄lɛ̄ŋgāā o̍ wa̍ ye̍mā nu̍m ve̍lu᷄ŋ na̍a̍ che̍le̍ŋ.

¹⁰ Wānā su̍u̍ndā a̍ chūa̍ po̍ nu̍mndo̍, kɛ̄lɛ̄ŋgāā chūā chūā nūmndo̍ vēlū wo̍ le̍. Bɛ̄ɛ̄la̍ŋ nūm pi̍la̍ tɛ̄ɛ̄mbɔ᷄ŋndo̍ cho̍ ko̍ŋ ni̍.

¹¹ Wānā su̍u̍ndā a̍ yēmā nu̍m fi̍nyā pīlɔ̍ɔ̍ le̍, fo̍ndōle̍, ndu̍ bɛ̍ɛ̍ yēmā nu̍m o̍ cho̍ ni̍.

¹² Wānā su̍u̍ndā a̍ yēmāa̍ fi̍nyā nūm te̍, fo̍ndōle̍, te̍nā nūmndo̍ o̍ cho̍ ni̍, fi̍nyā nūm wānāyɛ̍ī ndūɛ̍i̍ kpe̍e̍kpe̍i̍ye̍.

¹³ Wānā su̍u̍ndā a̍ pɔ̄mbɔ̄ɔ̍ kālā nu̍m, kɛ̄lɛ̄ŋgāā kālā nu̍m bɛ̄ ndɔ̄ le̍, fo̍ndōle̍ kālā nu̍m wānāyɛ̍ī ndūɛ̄ī kpe̍e̍kpe̍i̍ye̍ nda̍ chō ni̍.

¹⁴ Wānā su̍u̍ndā a̍ la̍nɔ̍ɔ̍ fi̍nyā nūm pɔ̍mbɔ̄ kɛ̄lɛ̄ŋgāā la̍nɔ̍ɔ̍ fi̍nyā nūm bɛ̍ndū le̍, fo̍ndōle̍, kālā nu̍m pɔ̄mbɔ̄ ɔ̄ɔ̄ kālā nu̍m bɛ̄ndū o̍ cho̍ ni̍.

¹⁵ Wānā su̍u̍ndā a̍ la̍nɔ̍ɔ̍ po̍ nu̍mndo̍ le̍, fo̍ndōle̍, ō cho̍ wa᷅na̍ nya̍ nya̍ sūūnda̍ le̍ o̍ cho̍ le̍, la̍nɔ̍ɔ̍ po̍ nu̍mndo̍ o̍ cho̍ ni̍.

¹⁶ Wānā su̍u̍ndā a̍ la̍nɔ̍ɔ̍ bɛ̄ nūm te̍. Tē a̍ to̍sa̍ ke̍ŋ pɛ̍, mɛ̄ɛ̍ a̍ tɛ̍ɛ̍mbu̍u̍ bɛ̄ nu̍m lābɛ̄ɛ̄.

¹⁷ Wānā su̍u̍ndā a̍ wānā la̍nɔ̍ɔ̍ ma̍ mu̍li̍ŋ mā su̍u̍nda̍ vɛ̄lɛ̄ a̍ chūā ndɔ̄ɔ̍ le̍. Wānā la̍nɔ̍ ko̍ŋ chūā ndɔ̄ɔ̍ kɛ̄lɛ̄ŋgāā chūā ndɔ̍ ō vēlū bɛ̍ɛ̍, su̍u̍ndā lɛ̄ a̍ ndu̍ le̍, fo̍ndōle̍, nda̍ kpo̍u̍ ni᷅ŋ wānāya᷅ŋ nūm kpe̍e̍kpe̍i̍yo̍ŋ nda̍ chō ni̍. Tē a̍ to̍sa̍ ke̍ŋ pɛ̍, mɛ̄ɛ̍ a̍ to̍sa̍ māāla̍ŋ.

¹⁸ Wānā chu̍ā pɔ̄mbɔ̄ɔ̍ la̍a̍ nu̍m o̍ nɔ̄ɔ̍ ni᷄ŋ te̍, ha̍a̍a̍ tē la̍a̍ nu̍m ō chō wɔ̄ yōōmū pɛ̍.

¹⁹ Wānā su̍u̍ndā a̍ wānā la̍nɔ̍ɔ̍ bōōndi̍i̍ o̍ cho̍ o̍ te̍le̍ŋ ndɔ̄ɔ̍ ni᷄ŋ nde̍ le̍, kāni̍ fo̍ndōle̍, tē wānā la̍nɔ̍ɔ̍ ō wa̍ o̍ te̍le̍ŋ ndɔ̄ɔ̍ ni᷄ŋ pɛ̍, ō ve᷅ o̍ di̍a̍ndāā ya̍ o̍ hɔ̄l te̍.

²⁰ Wānā su̍u̍ndā a̍ la̍nɔ̍ pi̍la̍ le̍. Tē a̍ to̍sa̍ ke̍ŋ pɛ̍, a̍ sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

²¹ Wānā yɔ̍ŋgū chūā nūmndo̍ ō pīlɛ̍ bɛ̍ɛ̍ le̍ mā lōm ndu̍ sa̍lāa̍ o̍ mɛ̄lɛ̄ka̍ Mo̍lɛ̍kī lo̍ le̍. Tē a̍ to̍sa̍ ke̍ŋ pɛ̍, mɛ̄ɛ̍ ya̍ Mɛ̍lɛ̄ka̍ nūmndo̍, ya̍ ŋ̄ tɛ̄ɛ̄mbu̍u̍ ko̍ŋ la̍bɛ̍ɛ̍ ni̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²² Wānā hi̍nī a̍ chāa̍ŋ nūm wa̍nā pɔ̍nɔ̍ɔ̍ le̍, māāla̍ŋ la̍ cho̍ la̍ŋ ni̍.

²³ Wānā hi̍nī a̍ chɔ̄lōo̍ le̍. Wānā la̍nɔ̍ɔ̍ a̍ nɔ̍ mā chɛ̍l mī chɔ̄lōo̍ ō hīni̍ a̍ nūm te̍. Wānā o̍ wānā to̍sa̍ māāla̍ wa̍ā le̍nde̍ pɛ̍, mɛ̄ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l.

²⁴ Sɔ̄ɔ̍ŋ mu᷅ŋ ki̍nɛ̍i̍, lā to̍sā mu̍ŋ te̍, yɔ̄ŋi̍ nya̍ sīmnu̍ŋ a̍ nɔ̍ɔ̍lɛ̍i̍ ya̍ o̍ hɔ̄l. Kāa̍la̍ cho̍ nya̍ lāchī, mi̍ wa̍ nda̍ tōūwɔ̄ɔ̍ nya̍ lāchī la̍ŋ, ka̍āla̍ŋ ndāŋ nda̍ chō chōo̍ ni̍, ma̍ tōsā ma̍ sīmnu᷄ŋ a̍ nɔ̍ɔ̍lɛ̍i̍ ya̍ o̍ hɔ̄l.

²⁵ Lɛ̄ŋnde̍ŋ kpo̍u̍ mi̍ lē lō o̍ ko̍ŋ mi̍ lē sīmnu᷄ŋ le̍ nɔ̍ɔ̍lɛ̍i̍ ya̍ o̍ hɔ̄l a̍ sɔ̄ɔ̍ŋ nda̍ chō mu᷅ŋ tōsāa̍ wo̍ŋ. Le̍la̍ŋ ya̍ I̍ cho̍ lɛ̄ŋndē le̍ŋ nyɛ̄ pālāa̍ tūsī chōo̍ ni̍, mī to̍sa̍ mī lɛ̄ŋndē lēŋ lē kɛ̄ɛ̍ wānāa̍ cho̍ lēni᷄ŋ nda̍, mā fūla̍ lo̍ŋ po̍.

²⁶ Lā tōsa̍ nyɛ᷅ sāwāla̍ nīla̍ŋ lā dīmi̍ wo̍, ndu̍yɛ̍ mī lā tōsa̍ nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍. Sɔ̄ɔ̍ŋ wɔ̍ɔ̍ŋ wāŋnda̍ ha̍ā ā chō mu᷅ŋ tōsāa̍ mi̍ tu᷅l mu̍ŋ yɛ̄le̍ŋ tūl bɛ̄ndōo̍ wo̍ŋ, nya̍ wāŋnda̍ I̍sɔ̄lūɛ̄ī lā to̍sā mu̍ŋ te̍. Ndu̍yɛ̍ sāwāla̍ ya̍ I̍ chō la᷅ŋ dɔ̄wɔ̄ɔ̍ la̍ŋ, lā chō le̍ nya̍ I̍sɔ̄lūɛ̍i̍ya̍ ndu̍yɛ̍, mi̍ lā wā vɛ̄lɛ̄ le̍ wānāa̍ lēkāa̍wa̍ cho̍ nya̍ tɛ̄ɛ̄ŋ nda̍.

²⁷ Lɛ̄ŋnde̍ cho̍ nya̍ le᷅ŋ lāchī mi̍ lā wā le̍ŋ kɔ̄la̍ŋ bīyɔ̄ɔ̍ le̍ŋ, wānāa̍ cho̍ o̍ lɛ̄ŋndē lēŋ ni᷄ŋ nda̍, ka̍ālā wɔ̄ɔ̍ŋndā nda̍ wa̍ chōo̍ la̍ŋ, la̍ŋ la̍ cho̍ la̍ŋ ni̍. O̍ ko̍ŋ ma̍ tōsā mi̍ lɛ̄ŋnde̍ŋ lē sīmnu᷄ŋ le̍ nɔ̍ɔ̍lɛ̍i̍.

²⁸ Le̍la̍ŋ nya̍ bɛ̍ɛ̍ tē lā tōl ka̍āla̍ŋ nda᷅ŋ kɔ̄ɔ̄lī pɛ̍, lā chō tōsā mī lɛ̄ŋnde̍ŋ kpo̍u̍ mī lē sīmnu᷄ŋ le̍ nɔ̍ɔ̍lɛ̍i̍, ndu̍yɛ̍ nya̍ bɛ̍ɛ̍ mī to̍sa̍ mī lɛ̄ŋndē lēŋ lē kɛ̄ɛ̍ nya̍ mī lā fūla̍ lo̍ŋ po̍, mɛ̄ɛ̍ i̍ cho̍ nu̍a̍ā yɔ̄nɔ᷄ŋ a̍ wāŋnda̍ ha̍ā yɛ̍.

²⁹ Sɔ̄ɔ̍ŋ lāmāā wo̍ŋ mu᷅ŋ ki̍nɛ̍i̍, wānā o̍ wāna̍ to̍sa̍ mu̍ŋ pɛ̍, wānā ko̍ŋ ā sōli̍ ndu̍ wānāā ndūa̍a̍ tɛ̄ɛ̄ŋ po̍.

³⁰ Lā tūe̍i̍ ya̍ dīōm mī lā tōsa̍ nyɛ̄ ya̍ I̍ dīmu̍l nya̍ le̍ tōsāa̍ wo̍. Sɔ̄ɔ̍ŋ lāmāā wāŋnda̍ o̍ lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ le̍ŋ ni᷄ŋ a̍ wa᷅ mu̍ŋ tōsāa̍ wo̍ŋ, lā tu̍āl nda̍ kɔ̄ɔ̄lī mī lā mūli̍ŋ mu̍ŋ tōsāa̍ le̍. Yɔ̄ŋi̍ nya̍ sīmnu᷄ŋ a̍ nɔ̍ɔ̍lɛ̍i̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.”