Lɛ̄vi̍ti̍kɔ̍ɔ̄ 17 - Yāu̍ Mɛ̄lɛ̄ka̍a̍

Ā mɛ̄ɛ̍ Mɛ̄lɛ̄ka̍ kūūna̍ le̍ kōo̍ma̍ vīsīo̍o̍ dīo̍o̍ yɛ̍ o̍kɔ̄ɔ̄

¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē āā,

² “Di̍mu̍l E̍lɔ̄ŋ nda̍ pūa̍a̍ ndūa̍a̍ a̍ wāŋnda̍ I̍sɔ̄lūɛ̄ī kpo̍u̍, māā nyɛ̄ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍.

^3-4 I̍sɔ̄lūɛ̍i̍nɔ̍ o̍ I̍sɔ̄lūɛ̍i̍nɔ̍ o̍ di̍ī nāūwo̍, ɔ̄ɔ̄ sāa̍, ɔ̄ɔ̄ chūīŋndo̍, mbō sōli̍ ndu̍ sa̍lāa̍ o̍ dɔ̍ɔ̍ŋgɔ̍ɔ̍ ni᷄ŋ ɔ̄ɔ̄ bā o̍ bā chēle̍ŋ pɛ̍, mbō ve̍ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ lātūlu̍ wo̍ dīō le̍ o̍ hu̍ŋ di̍ī chɔ̄lū kōŋ, mbo̍ sōlī ndu̍ sa̍lāa̍ māā kē o̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍, I̍sɔ̄lūɛ̍i̍nɔ̍ ko̍ŋ ō tɛ̄ɛ̄mbu̍u̍ sāwa̍ di̍mi̍ māā wānā so̍lī wa᷅ŋndo̍ ɔ̄ɔ̄ chɔ̄lōo̍ kōo̍wa̍ŋ te̍ wo̍. Wāna̍ to̍sā su̍ɛ̍i̍ ke̍ŋ ndo̍, ā nɔ̄ mā sōli̍ ndu̍ I̍sɔ̄lūɛ̍i̍ya̍ tɛ̄ɛ̄ŋ po̍.

⁵ Mɛ̄ɛ̍ kūūnāa̍ kpe̍e̍kpe̍i̍ chō ko̍ŋ ni̍ māā I̍sɔ̄lūɛ̍i̍ya̍ ā nɔ̍ lɛ̍ mā wa̍ chɔ̄lūāā ndāa̍ dīūwo̍ yōndōla̍ŋ ni᷄ŋ mā sōlī nda̍ sa̍lāla̍ŋ lo̍ŋ te̍. Ā nɔ̄ ni᷅ŋ mā wa̍ hūnɔ̄ɔ̍ a̍ chɔ̄lūāā ndāa̍ nāa̍ wānā so̍līāā lāsa̍lāa̍ chūā, ko̍ŋ cho̍ ni̍, hūnɔ̄ɔ̍ a̍ nda̍ nāa̍ ya̍ Mɛ̍lɛ̄ka̍ Ya̍a̍wɛ̄ɛ̄ chu̍a̍, o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ chō a̍ nya̍ lātūlu̍ dīō, mī lā dīī nda̍ lo̍ŋ, mī lā sōli̍ nda̍ sa̍lālā kɔ̄l nyūlūla̍ŋ lo̍ŋ o̍ Mɛ̍lɛ̄ka̍ Ya̍a̍wɛ̄ɛ̄ lo̍.

⁶ Wānā o̍ wāna̍ hi᷅ŋ a̍ chɔ̄lū ndɔ̄ɔ̍ lo̍ŋ le̍ sa̍lāa̍ sōlīo̍o̍ pɛ̍, wānā so̍līāā lāsa̍lāa̍ ō nɔ̄ mbō fāsa̍ŋa̍ kōo̍ma̍ chɔ̄lū kōŋ o̍ ma̍āŋ Mɛ̍lɛ̄ka̍ Ya̍a̍wɛ̄ɛ̄ wo̍, o̍ cho̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ dīō wo̍, o̍ ko̍ŋ kɔ̍ɔ̍lī, mbō lōm chūɛ̄īmā chɔ̄lū kōŋ o̍ ma̍āŋndo̍ chōo̍. Tē chūŋ sa̍lā kōŋ ō kōma̍l Ya̍ Mɛ̍lɛ̄ka̍ Ya̍a̍wɛ̄ɛ̄ pɛ̍, ō hīni̍ kɔ̄l nyɛ̄ kɛ̄ndɛ̄ kɛ̍ndɛ̄.

⁷ Lā so̍lī lɛ̄ sa̍lālā nyāla̍ŋ o̍ chūīŋāā nya̍ sōōlūū ha̍ā māā mɛ̄lɛ̄ka̍ā nyā wa̍ lo̍ le̍. Le̍ mɛ̄lɛ̄ka̍a̍ ha̍ā nya̍ kɛ̄ɛ̍ wāa̍ sa̍kpō a̍ ya̍ ni̍, mɛ̄ɛ̍ wānā la̍nɔ̍ɔ̍ ō kɛ̄ɛ̄ nu̍a̍ā wāa̍ sa̍kpō a̍ pɔ̍nɔ̍ ndɔ̄ mbō lūɛ̄ī tīɔ̄mɔ̄ɔ̍ yɛ̍, mī lā sōlī chɔ̍lūāā nyāa̍ sa̍lāla̍ŋ o̍ nda̍ lo̍. Sāwa̍ ya̍ Mɛ̍lɛ̄ka̍ dōu̍ nya̍ mbo̍ wa̍ le̍ fɛ̍ɛ̍ŋ a̍ fɛ̍ɛ̍ŋ ndu̍yɛ̍ mbo̍ wā le̍ nya̍, a̍ yu̍ŋgu̍la̍ fu̍lā ni̍ŋ o̍ nya̍ ni᷄ŋ nda̍ŋ mbō kūɛ̄ a̍ lāchī kɛ᷅ wo̍, ndu̍ cho̍ ko̍ŋ ni̍.

⁸ “Di̍mu̍l nda̍ māā wānā o̍ wāna̍ cho̍ I̍sɔ̄lūɛ̄ī, ō wa̍ I̍sɔ̄lūɛ̍i̍nɔ̍, o̍ wa̍ wa̍nāā lēkāa̍ wa̍a̍ cho̍ nya̍ tɛ̄ɛ̄ŋ nda̍, wānā o̍ wāna̍ so̍li̍ sa̍lā lūāmāa̍ ɔ̄ɔ̄ sa̍lā o̍ sa̍lā bā o̍ ba̍ chēle̍ŋ pɛ̍,

⁹ mbō ve̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ dīō le̍ o̍ hu̍ŋ so̍lī sa̍lā kōŋ o̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍, wānā ko̍ŋ ā nɔ̄ mā sōli̍ ndu̍ I̍sɔ̄lūɛ̍i̍ya̍ tɛ̄ɛ̄ŋ po̍.

¹⁰ “O̍ ko̍ŋ kɔ̍ɔ̍lī, wānā o̍ wāna̍ cho̍ I̍sɔ̄lūɛ̄ī, ō wa̍ I̍sɔ̄lūɛ̍i̍nɔ̍, ō wa̍ wa̍nāā lēkāa̍ wa̍a̍ cho̍ nya̍ tɛ̄ɛ̄ŋ nda̍, wānā o̍ wāna̍ de᷅ kōo̍ma̍ vīsīo̍o̍ pɛ̍, I̍ dɔ̍ɔ̍nu᷄ŋ tu̍mbe̍ a̍ wānā ko̍ŋ, ndu̍yɛ̍ mī I̍ so̍li̍ ndu̍ I̍sɔ̄lūɛ̍i̍ya̍ tɛ̄ɛ̄ŋ po̍.

¹¹ Kāni̍ fo̍ndōle̍, nyɛ̍ o̍ nyɛ̄ yōōmāā, o̍ kōo̍wa̍ŋ ni᷄ŋ yōōmū ndɔ̄ɔ̍ o̍ cho̍ ni̍. Le̍ sa̍bū kōŋ ya̍ dīmi̍ ni̍, māā lā nɔ̄ mī lā sōli̍ kōo̍wa̍ŋ sa̍lāa̍ o̍ ma̍āŋndo̍ chōo̍, le̍ yɔ̄ŋndā nyāla̍ wɔ̍ɔ̍ŋnda̍ŋ fāŋāa̍.

¹² Le̍la̍ŋ ya̍ dīmi̍ ni̍, māā ō wa̍ I̍sɔ̄lūɛ̍i̍nɔ̍, ō wa̍ wa᷅na̍ lēkāa̍, wānā o̍ wānā di̍ā kōo̍ma̍ vīsīo̍o̍ le̍.

¹³ O̍ ko̍ŋ kɔ̍ɔ̍lī, wānā o̍ wāna̍ cho̍ I̍sɔ̄lūɛ̄ī, ō wa̍ I̍sɔ̄lūɛ̍i̍nɔ̍, ō wa̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, tē ā dīī vīsīo̍o̍ ɔ̄ɔ̄ yōūwo̍ o̍ dōōsūle̍ŋ ni᷄ŋ pɛ̍, o̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l le̍ dīo̍o̍ wo̍, ā nɔ̄ mā kēlū vīsī kōŋ, ɔ̄ɔ̄ yōū kōŋ bo̍lōla̍ŋ, mī kōo̍ma̍ ndūa̍ŋ mā yūēīnu̍ŋ lɛ᷅ŋ ndu̍yɛ̍, mā kūmbū ma̍ŋ a̍ pūūlōo̍.

¹⁴ Kāni̍ fo̍ndōle̍, nyɛ̄ o̍ nyɛ̄ yōōmāā, o̍ kōo̍wa̍ŋ ni᷄ŋ yōōmū ndɔ̄ɔ̍ o̍ cho̍ ni̍. Le̍la̍ŋ ya̍ I̍ di̍mu̍l nya̍ ni̍, māā wānā o̍ wānā di̍ā kōo̍ma̍ vīsīo̍o̍ le̍, māā wānā o̍ wāna̍ de᷅ ma̍ŋ pɛ̍, wānā ko̍ŋ I̍ fa̍ŋa̍ ndu̍ I̍sɔ̄lūɛ̍i̍ya̍ chōo̍ ba̍ū.

¹⁵ Wānā o̍ wāna̍ de᷅ vīsi̍ vi᷅ o̍ bā chōo̍ wo̍, ɔ̄ɔ̄ ō vīsī bīyāa̍ ō dīī yo̍ pɛ̍, wānā ko̍ŋ ō wa̍ I̍sɔ̄lūɛ̍i̍nɔ̍, ō wa̍ wa̍nāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍, wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍yo̍. Pāa̍le̍ le̍ŋ kpɛ᷅ŋ, ō nɔ̄ɔ̄lɛ̍i̍ o̍ ni̍i̍lū ni̍, ha̍a̍a̍ mī fīti̍līo̍o̍ tōl. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ mbō pūlu̍ŋ fo̍ ma̍lāŋ o̍ si̍mnūŋ o̍ di̍a̍ndāā.

¹⁶ Kɛ̍ wānā ko̍ŋ ō tōo̍ nyɛ᷅lā ndɔ̄la̍ŋ ndu̍yɛ̍, mbō pūlu̍ŋ fo̍ le̍, mɛ̄ɛ̍ wānā ko̍ŋ ndu̍ pi̍la̍ tu̍si̍ŋ nyɛ᷅ pālāa̍ chōo̍ le̍ nyɛ̄ o̍ to̍sa̍ wo̍ ni̍.”