Lɛ̄vi̍ti̍kɔ̍ɔ̄ 14 - Yāu̍ Mɛ̄lɛ̄ka̍a̍

A̍ mɛ̄ɛ̍ wāna̍ nāā wɔ̄ɔ̍ŋndo̍ chūū lēkɔ̄ɔ̍ wo̍ ō lōōkū di̍ndīo̍o̍ sɔ̄lā yɛ̍ o̍kɔ̄ɔ̄

¹ Mi̍ Mɛ̍lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ mbo̍ di̍mūl Mūu̍sē āā,

² “Wāna̍ nāā wɔ̄ɔ̍ŋndo̍ wa᷄ lēkɔ̄ɔ̍ wo̍, to᷄lta̍ o̍ ke̍e̍kū le̍ dīndīo̍o̍ sɔ̄lāa̍ la̍ŋ, la̍ cho̍ la᷅ŋ ni̍. Ā nɔ̄ mā hīŋ a̍ wānā ko̍ŋ o̍ wānā so̍līāā lāsa̍lāa̍ lo̍.

³ O̍ ko̍ŋ, mī wānā so̍līāā lāsa̍lāa̍ ō sōli̍ ndu̍ o̍ dɔ̍ɔ̍ŋgɔ̍ɔ̍ ni᷄ŋ le̍ mbō kɔ̍ mɛ̍ɛ̍ndīa̍ŋ ndu̍. Tē nāā wɔ̄ɔ̍ŋ kōŋ ō chūū wānā ko̍ŋ lēkɔ̄ɔ̍ pɛ̍, mbō sēŋgū,

⁴ wānā so̍līāā lāsa̍lāa̍ ō nɔ̄ mbō dīmu̍l wānā ko̍ŋ mbo̍ hīŋ a̍ yōūwāa̍ cho̍ ā dīāndāā ya̍ Mɛ̍lɛ̄ka̍ o̍ hɔ̄l la̍ ā ŋīɔ̍ɔ̍ŋ, a̍ yɔ̄m si̍dāā wo̍, a̍ kōlā si̍a̍ŋā yɔ̄ɔ̄ wo̍, ndu̍yɛ̍ a̍ lɛ̄vīī ha̍sɔ̍pī ve̍, le̍ sa̍lā wānā ko̍ŋ sōlīo̍o̍ le̍ mbō sɔ̄la̍ dīndīo̍o̍ ya̍ o̍ hɔ̄l.

⁵ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō dīmi̍ mā dɔ̄ū mɛ̄ŋmā sɛ̄nɛ̄īya̍ŋ o̍ kpɛ̍ɛ̍nɛ̍i̍ pūūlūe̍i̍ ni᷄ŋ, mā dīī yōūwāā kāŋ ō pīlɛ̍ o̍ kpɛ̍ɛ̍nɛ̍i̍ ke̍ŋ chōo̍, mī kōo̍ma̍ yōū kōŋ mā dēli̍ o̍ mɛ̄ŋmā māŋ ni᷄ŋ.

⁶ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō yīŋ yōūwo̍ ō pīlɔ̄ɔ̍ o̍ cho̍ yōōmū wo̍ lātūlu̍ a̍ yɔ̄m si̍dāā wo̍, ndu̍yɛ̍ a̍ kōlā si̍a̍ŋā yɔ̄ɔ̄ kōŋ, a̍ lɛ̄vīī ha̍sɔ̍pī ve̍ o̍ mɛ̄ŋmā sɛ̄nɛ̄ī ma̍ cho̍ mā mūūli̍āŋ a̍ kōo̍ma̍ yōū nda̍ dīī kōŋ ndo̍ wa̍ŋ ni᷄ŋ.

⁷ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō fāsa̍ŋa̍ wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍ kōo̍ma̍ yōū ko̍ŋ le̍ ŋɔ᷄mmɛ̍ū. O̍ ko̍ŋ, mbō dīmu̍l wāŋnda̍ māā wānā ko̍ŋ ō sīmnu᷄ŋ o̍ di̍a̍ndāā. Ndu̍yɛ̍ mbō ma᷄l yōu̍ lo̍ ko̍ŋ yo̍o̍mū wo̍ mbō ō kūɛ̄nu᷄ŋ.

⁸ O̍ ko̍ŋ kɔ̍ɔ̍lī, mī wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍, ō tɔ̄ɔ̄ nyɛ̄lā ndɔ̄la̍ŋ, mbō sēndi̍, ndu̍yɛ̍ mbō pūlu᷄ŋ fo̍, o̍ ko̍ŋ, mbō sīmnu᷄ŋ o̍ di̍a̍ndāā. O̍ ko̍ŋ kɔ̍ɔ̍lī, mbō mīīŋgu̍ ni̍ko̍ o̍ dɔ̍ɔ̍ŋgɔ̍ nya̍ chō wo̍ ni᷄ŋ, kɛ̍ ō lu̍e̍ī yɔ̍ o̍ tɛ̍ndīi̍ ndɔ̄ɔ̍ ni᷄ŋ te̍, ha̍a̍a̍ mɛ̄ɛ̍ mī pālɛ̍i̍ hīōū ī ŋɔ᷄mmɛ̍ū.

⁹ O̍ pāa̍le̍ ŋɔ̍mmɛ̍ūle̍ŋ chōo̍, ō se᷅ndi̍ vɛ̄lɛ̄ kpo̍u̍, chɔ̍ŋ a̍ yīīŋnde̍ ndu̍ o̍ lēbōl, mbō kūɛ̄ a̍ sīɛ̍i̍ye̍, ndu̍yɛ̍ a̍ yīīŋīī lāhɔ̄l le̍, o̍ ko̍ŋ kɔ̍ɔ̍lī, a̍ yīīŋnde̍ ndu̍ o̍ ŋ̄dīāl kpo̍u̍. O̍ ko̍ŋ kɔ̍ɔ̍lī, mbō tɔ̄ɔ̄ nyɛ̄lā ndɔ̄la̍ŋ, mbō pūlu᷄ŋ fo̍. O̍ ko̍ŋ, mbō sīmnu᷄ŋ o̍ di̍a̍ndāā.

¹⁰ O̍ pāa̍le̍ ŋɔ̄ma̍a̍le̍ŋ chōo̍, ō nɔ̄ mbō hīŋ a̍ sāā ko̍ndu̍a̍a̍ fɔ̍ŋndu̍a̍a̍ ā ŋīɔ̍ɔ̍ŋ, ndu̍yɛ̍, a̍ sāā la̍a̍ndōo̍ o̍ chi̍i̍ wɔ̄sīo̍o̍ ō pīlɛ̍ wo̍, a̍ nɔ᷅ sɔ᷅ŋ o̍ sɔ̄ŋ te̍ wa̍. O̍ ko̍ŋ kɔ̍ɔ̍lī, mbō hīŋ vɛ̄lɛ̄ a̍ chūɛ̄īmā ɔ̄li̍fīi̍ya̍ŋ pa̍ŋtīi̍yo̍ tɛ̄ɛ̄ŋ, a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍, pa᷅ŋnda̍ŋ lā ŋɔ᷄mpu᷅m, ō mūūli̍āŋ a̍ chūɛ̄īmā ɔ̄li̍fīi̍ya̍ŋ.

¹¹ O̍ ko̍ŋ kɔ̍ɔ̍lī, wānā so̍līāā lāsa̍lā, di̍ndi̍ wānā ko̍ŋ ndo̍, mbō hīŋ a̍ wānā ko̍ŋ o̍ tɛ̍ndīi̍ chɔ᷅m māā Mɛ̍lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ sōndōo̍, lātūlu̍ a̍ nyɛ̄m mu᷅ŋ.

¹² Tē ō hīŋ a̍ wānā ko̍ŋ lo̍ŋ pɛ̍, sāā ko̍ndu̍a̍a̍ ŋi̍ɔ̍ɔ̍ŋāā wānā ko̍ŋ ō hīŋ nda̍, wānā so̍līāā lāsa̍lāa̍ ō sōli̍ ō pīlɔ̍ɔ̍ sa̍lāa̍ lo̍ŋ, lātūlu̍ a̍ chūɛ̄īmā ɔ̄li̍fīi̍mā wānā ko̍ŋ ō hīŋ ma̍ŋ pa̍ŋtīi̍yo̍ tɛ̄ɛ̄ŋ nda̍ŋ. Sa̍lāa̍ ho̍ō wānā so̍līāā lāsa̍lāa̍ ō nɔ̄ mbō hēēlu̍ ndu̍ o̍ bāla̍ŋ chōo̍ ya̍ Mɛ̍lɛ̄ka̍ lāchī māā sa̍lā. Sa̍lā ko᷄ŋ cho̍ le̍ yɔ̄ŋ wɔ̄ɔ̍ŋndo̍ fāŋāa̍ ni̍.

¹³ Sāa̍ ho̍ō ā nɔ̄ mā dīī ndu̍ o̍ fo̍nda̍ nī di̍a̍ndāa̍, nāa̍ nda̍ dīī chɔ̍lūa̍a̍ ā pīli̍a̍a̍ wa̍, chɔ̄lu̍ cho̍ le̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍, a̍ chɔ̄lu̍ cho̍ le̍ sa̍lā lūāmāa̍ sōlīo̍o̍ wo̍. Ndu̍yɛ̍ nyɛ̄m o̍ cho̍ mu᷅ŋ sa̍lā pāāwā bīōndɔ᷄ŋndo̍ sōlī wo̍ŋ, mu̍ŋ bɛ̍ɛ̍ wānā so̍līāā lāsa̍lāa̍ ndu̍ nɔ̍ mu̍ŋ ni̍, mɛ̄ɛ̍ nyɛ̄m sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍ŋ ŋ̄ chō yɛ̍ ko̍ni̍. Sa̍lā dīāndāa̍ hi̍o̍ū kpo̍u̍ wo̍ ndu̍ cho̍ ho̍ō ni̍.

¹⁴ Sāā ko̍ndo̍ wānā so̍līāā lāsa̍lāa̍ ō chō ho̍ō dīyɔ̄ɔ̄ le̍ sa̍lā bīōndɔ᷄ŋndo̍ sōlīo̍o̍ wo̍, wānā so̍līāā lāsa̍lāa̍ ō nɔ̄ mbō chūa̍ kōo̍ma̍ sāā ko̍ŋ mā ti᷄ŋ, mbō sūu̍ wāna̍ hi᷅ŋ ho̍ō le̍ dīndīo̍o̍ sɔ̄lāa̍ wo̍ o̍ nīlē tūmndē bā kɛ̄ndɛ̄le̍ŋ, o̍ ko̍ŋ kɔ̍ɔ̍lī, mbō sūu̍ ndu̍ vɛ̄lɛ̄ mā ti᷄ŋ o̍ sūēī bɛ̄ndūīī bā kɛ̄ndɛ̄i̍, mbō sūu̍ ndu̍ vɛ̄lɛ̄ mā ti᷄ŋ o̍ sūēī bɛ̄ndūīī pēlīī bā kɛ̄ndɛ̄i̍.

¹⁵ O̍ ko̍ŋ kɔ̍ɔ̍lī, chūɛ̄īmā ɔ̄li̍fīi̍mā wānā ko̍ŋ ō hīŋ ma̍ŋ nda̍ŋ, mī wānā so̍līāā lāsa̍lāa̍ ō tāla̍ŋ ma̍ ti̍ŋ o̍ bā ndɔ̄ mi̍āllo̍,

¹⁶ mbō yīŋ sūēī ndūɛ̍i̍ bākɛ̄ndɛ̄i̍ lēni᷄ŋ mbō fāsa̍ŋa̍ ma̍ŋ ya̍ Mɛ̍lɛ̄ka̍ Ya̍a̍wɛ̄ɛ̄ lāchī lo̍ŋ lē ŋɔ᷄mmɛ̍ū.

¹⁷ O̍ ko̍ŋ kɔ̍ɔ̍lī, chūɛ̄īmā tɔ̄ma̍ cho̍ lō wānā so̍līāā lāsa̍lāa̍ o̍ bā kɔ̄llo̍ wa̍ŋ, ō nɔ̄ mbō sūu̍ wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍ ma̍ŋ o̍ nīlē ndɔ̄le̍ tu᷅mndē bā kɛ̄ndɛ̄le̍ŋ, a̍ o̍ sūēī ndūɛ̄ī bɛ̍ndūīī bā kɛ̄ndɛ̄i̍, a̍ o̍ sūēī ndūɛ̄ī bɛ̍ndūīī pēlīī bā kɛ̄ndɛ̄i̍, o̍ fo̍ndāŋndā o̍ su̍u̍ ndu̍ ko̍ŋ kōo̍ma̍ sa̍lā bīōndɔ᷄ŋndo̍ la̍ŋ.

¹⁸ O̍ ko̍ŋ kɔ̍ɔ̍lī, chūɛ̄īmā tɔ̄ma̍ cho̍ ndu̍ lō o̍ bā kɔ̄llo̍ wa̍ŋ, ō kpɔ̄lɔ̍ki̍a̍a̍ ma̍ŋ wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍ o̍ lēbōl. Mɛ̄ɛ̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū to̍sā Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l ni̍, mī wānā ko̍ŋ ō sīmnu᷄ŋ o̍ di̍a̍ndāā.

¹⁹ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō mūli̍ŋ mbō sōli̍ sa̍la̍ fa̍ŋā yɔ̄ŋ wɔ̄ɔ̍ŋndo̍ wo̍, le̍ mī wānā ko̍ŋ sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍, mbō mīīŋgu̍ vɛ̄lɛ̄ ō dīāndāā. Tē ō chīi̍ sa̍lā kōŋ sōlī pɛ̍, ō dīī vɛ̄lɛ̄ chɔ̄lōo̍ le̍ sa̍lā lūāmāa̍ sōlīo̍o̍,

²⁰ ō sōli̍ chɔ̄lū kōŋ sa̍lā lūāmāa̍, a̍ sa̍lā nyɛ̄ dīāā ku̍llo̍ o̍ ma̍āŋndo̍ chōo̍. Tē ō chīi̍ sa̍lā kōŋ sōlī pɛ̍, ō dīī vɛ̄lɛ̄ chɔ̄lōo̍ le̍ sa̍lā lūāmāa̍ sōlīo̍o̍ o̍ ma̍āŋndo̍ chōo̍, a̍ sa̍lā nyɛ̄ dīāā ku̍llo̍. Mɛ̄ɛ̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū to̍sā ni̍, mī wānā ko̍ŋ ō sīmnu᷄ŋ o̍ di̍a̍ndāā.

²¹ Kɛ̍ tē wāŋndo̍ ō wa̍ pɛ̍ wa̍nā ta̍mbɛ̍i̍ mbō nɔ̄la̍ dɔ̍ɔ̍ chɔ̄ɔ̄vīāāla̍ŋ nda᷅ŋ sɔ̄lā kpo̍u̍ le̍, wānā ko̍ŋ ō hūŋ a̍ sāā ko̍ndo̍o̍ ō pīlɛ̍ le̍ sa̍lā pāāwā bīōndɔ᷄ŋndo̍ sōlīo̍o̍, a̍ chūɛ̄īmā ɔ̄li̍fīi̍ya̍ŋ pa̍ŋtīi̍yo̍ tɛ̄ɛ̄ŋ, a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. O̍ ko̍ŋ, mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍.

²² Wāna̍ sɔ̍lā ho̍ō dīndīo̍o̍ ya̍ Mɛ̍lɛ̄ka̍ o̍ hɔ̄l lo̍, ō hūŋ vɛ̍lɛ̄ a̍ pīīŋāā fɔ̍ŋndu̍a̍a̍ ā ŋīɔ̍ɔ̍ŋ, ɔ̄ɔ̄ ka᷅ŋbu̍a̍a̍ chūāūwa̍ ā ŋīɔ̍ɔ̍ŋ, mī ō pīlɛ̍ wa̍ le̍ sa̍la̍ fa̍ŋa̍ yɔ᷅ŋ wɔ̄ɔ̍ŋndo̍ wo̍ sōlīo̍o̍, mī ō pīlɛ̍ wa̍ le̍ sa̍lā lūāmāa̍ sōlīo̍o̍.

²³ Tē pālɛ̍i̍ ŋɔ̍mmɛ̍ū wānā ko̍ŋ nɔ̄ le̍ dīndīo̍o̍ sɔ̄lāa̍ ve̍ ī chūū pɛ̍, o̍ pāa̍le̍ ŋɔ̄ma̍a̍ le̍ŋ chōo̍ wānā ko̍ŋ ō nɔ̄ ni̍ mbō hīŋ a̍ sa̍lāla̍ŋ nda᷅ŋ nāa̍ wānā so̍līāā lāsa̍lāa̍ chūā, mā sōli̍ la̍ŋ ya̍ Mɛ̍lɛ̄ka̍ Ya̍a̍wɛ̄ɛ̄ lāchī o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ lātūlu̍ wo̍ sōndōo̍.

²⁴ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō chu̍a̍ wōlɔ̄ɔ̄la̍ŋ nda᷅ŋ, sāā fɔ̍ŋndɔ̍ cho̍ le̍ sa̍lā bīōndɔ᷄ŋndo̍ sōlīo̍o̍ wo̍ ni̍, a̍ chūɛ̄īmā ɔ̄li̍fīi̍mā wānā ko̍ŋ ō hīŋ pa̍ŋtīi̍yo̍ tɛ̄ndāa̍ tɛ̄ɛ̄ŋ nda̍ŋ, mbō hēēlu̍ la̍ŋ o̍ bāla̍ŋ cho̍o̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī māā sa̍lā

²⁵ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō dīī sāā fɔ̍ŋndɔ̍ ko̍ŋ mbō chūa̍ kōo̍ma̍ sāā ko̍ŋ mā ti᷄ŋ mbō sūu̍ wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍ o̍ nīlē ndɔ̄le̍ tūmndē bā kɛ̄ndɛ̄le̍ŋ, o̍ ko̍ŋ kɔ̍ɔ̍lī, mbō sūu̍ ndu̍ mā ti᷄ŋ o̍ sūēī bɛ̄ndūīī bā kɛ̄ndɛ̄i̍, mbō sūu̍ ndu̍ vɛ̄lɛ̄ mā ti᷄ŋ o̍ sūēī bɛ̄ndūīī pēlīī bā kɛ̄ndɛ̄i̍.

²⁶ O̍ ko̍ŋ kɔ̍ɔ̍lī, chūɛ̄īmā ɔ̄li̍fīi̍mā wānā ko̍ŋ ō hīŋ nda̍ŋ, mī wānā so̍līāā lāsa̍lāa̍ ō tāla̍ŋ ma̍ ti̍ŋ o̍ bā ndɔ̄ mi̍āllo̍,

²⁷ mbō fāsa̍ŋa̍ ma̍ŋ ya̍ Mɛ̍lɛ̄ka̍ Ya̍a̍wɛ̄ɛ̄ lāchī lo̍ŋ lē ŋɔ᷄mmɛ̍ū a̍ sūēī bā kɛ̄ndɛ̄i̍.

²⁸ O̍ ko̍ŋ kɔ̍ɔ̍lī, chūɛ̄īmā tɔ̄ma̍ cho̍ ndu̍ lō o̍ bā kɔ̄llo̍ wa̍ŋ, mbō sūu̍ wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍ o̍ nīle̍ ndɔ̄le̍ tu᷅mndē bā kɛ̄ndɛ̄le̍ŋ, a̍ o̍ sūēī ndūɛ̄ī bɛ̍ndūīī bā kɛ̄ndɛ̄i̍, a̍ o̍ sūēī ndūɛ̄ī bɛ̍ndūīī pēlīī bā kɛ̄ndɛ̄i̍, o̍ fo̍ndāŋndā o̍ su̍i̍i̍ ndu̍ kōo̍ma̍ sa̍lā bīōndɔ᷄ŋndo̍ la̍ŋ.

²⁹ O̍ ko̍ŋ kɔ̍ɔ̍lī, chūɛ̄īmā tɔ̄ma̍ cho̍ ndu̍ lō o̍ bā kɔ̄llo̍ wa̍ŋ, ō kpɔ̄lɔ̍ki̍a̍a̍ ma̍ŋ wāna̍ hi᷅ŋ ko̍ŋ le̍ dīndīo̍o̍ sɔ̄lāa̍ wo̍ o̍ lēbōl. Mɛ̄ɛ̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū wa̍nā wa̍ā le̍nde̍ di̍ndī ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l ni̍.

³⁰ O̍ ko̍ŋ kɔ̍ɔ̍lī, ō nɔ̄ mbō hīŋ vɛ̄lɛ̄ a̍ pīīŋāā fɔ̍ŋndu̍a̍a̍ ā ŋīɔ̍ɔ̍ŋ ɔ̄ɔ̄ a̍ ka᷅ŋgbu̍a̍a̍ chūāūwa̍ ā ŋīɔ̍ɔ̍ŋ nāa̍ wānā so̍līāā lāsa̍lāa̍ chūā,

³¹ mī ō pīlɛ̍ wa̍ le̍ sa̍lā fa̍ŋā yɔ᷅ŋ wɔ̄ɔ̍ŋndo̍ wo̍ sōlīo̍o̍, mī ō pīlɔ̍ɔ̍ wa̍ le̍ sa̍lā lūāmāa̍ sōlīo̍o̍, lātūlu̍ a̍ sa̍lā nyɛ̄ dīāā ku̍llo̍. Mɛ̄ɛ̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū wa̍nā wa̍ā le̍nde̍ di̍ndī ya̍ Mɛ̍lɛ̄ka̍ Ya̍a̍wɛ̄ɛ̍ o̍ hɔ̄l ni̍, mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍.

³² Wānāā nāā wɔ̄ɔ̍ŋndo̍ ō fūlā le̍kɔ̍ɔ̍ mā sēŋgū ndu̍yɛ̍, mā nɔ̄ le̍ dīndīo̍o̍ sɔ̄lāa̍ ya̍ Mɛ̍lɛ̄ka̍ o̍ hɔ̄l kɛ̍, ā nɔ̍lā sa̍lālā kpe̍e̍kpe̍i̍la̍ nda̍ nɔ̄ le̍ sōlīo̍o̍ le̍ dīndī ndāa̍ sɔ̄lāa̍ le̍ wa̍, sāwāla̍ cho̍ a̍ dīndī ndāa̍ o̍kɔ̄ɔ̄ la̍ŋ la̍ŋ la̍ cho̍ la̍ŋ ni̍.”

A̍ nyɛ̍ cha᷅l o̍ chīɛ̄īyo̍ māā yūl lo̍ o̍kɔ̄ɔ̄

³³ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

³⁴ “Nya̍ wāŋnda̍ I̍sɔ̄lūɛ̄ī, lā chō hūnɔ̄ɔ̍ lūɛ̄īyɔ̄ɔ̍ o̍ lɛ̄ŋndē Ke̍nāŋnde̍ŋ ni᷄ŋ, lɛ̄ŋndē ya̍ I̍ cho̍ nya̍ kīo̍o̍ māā nyɛ̄ nyā le̍ŋ. Tē lā lūɛ̄ī o̍ lɛ̄ŋndē lēŋ ni᷄ŋ pɛ̍, mī ī yɔ̄nu̍ŋ dɔ̍ɔ̍ mī ya̍ Mɛ̍lɛ̄ka̍ tōsa̍ mī nyɔ̄ɔ̍ ō cha᷄l o̍ chīɛ̄ī wāŋndo̍ lēni᷄ŋ māā yūl.

³⁵ Tē nyɛ̄ wāā le̍nde̍ o̍ ho̍lnu̍ŋ o̍ chīɛ̄ī wāŋndo̍ pɛ̍, wānā ko̍ŋ ō nɔ̄ mbō kɔ̍ di̍mūl wānā so̍līāā lāsa̍lāa̍ māā nyɛ̄ wāā le̍nde̍ o̍ cho̍ ō hōlna᷄ŋ o̍ chīɛ̄ī ndɔ̄ɔ̍.

³⁶ Lɔ̍ɔ̍pa̍ mī wānā so̍līāā lāsa̍lāa̍ ō lūɛ̄ī mbō kɔ̍ mɛ̍ɛ̍ndīa̍ŋ nyɛ̍ ko̍ŋ, ō nɔ̄ mbō dīmi̍ mā sōli̍ wōlɔ̄ɔ̄la̍ wa᷅ chi̍ɛ̍ī ni̍ŋ nda̍ŋ kpo̍u̍. O̍ ko̍ŋ, mī wānā so̍līāā lāsa̍lāa̍ ō lūɛ̄ī ni̍ko̍ mbō kɔ̍ mɛ̍ɛ̍ndīa̍ŋ chi̍ɛ̍ī kōŋ. Tē ō cho̍ ko̍ŋ te̍, mɛ̄ɛ̍ nyɛ᷄m wa᷅ chi̍ɛ̍ī ni̍ŋ lo̍ŋ ndo̍ŋ kpo̍u̍ ŋ̄ sīmnu᷄ŋ ŋ̍ nɔ̍ɔ̍lɛ̍i̍yo̍ŋ.

³⁷ Tē ō mɛ̄ɛ̄nda̍ŋ nyɛ᷅ cho̍ ho̍ō o̍ chīɛ̄īyo̍ ō hōlna᷄ŋ māā yūl lo̍ pɛ̍, mbō chē mī nyɔ̄ɔ̍ ho̍ō ō wa̍ ō sīāŋā, kɛ̄lɛ̄ŋgāā, mbō wa̍ ti᷄ŋ māā kɔ̄ɔ̍le̍ chāāki̍ī, ndu̍yɛ̍ mbō wa᷄ hīōūwɔ̄ɔ̍ lāchī a̍ pɛ̄ŋgɛ̄la᷄ŋndo̍ o̍ chīɛ̄īyo̍ pɛ̍,

³⁸ wānā so̍līāā lāsa̍lāa̍ ō nɔ̄ mbō fūla̍ mbō kīnda̍ dīo̍o̍, mī dīō kōŋ ō wa̍ ō kīndāā le̍ pālɛ̍i̍ ī ŋɔ᷄mmɛ̍ū.

³⁹ O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mīīŋgu̍ vɛ̄lɛ̄ o̍ kɔ̍ mɛ̍ɛ̍nda̍ŋ nyɛ̍ cho̍ ko̍ŋ o̍ chīɛ̄īyo̍ wo̍. Tē nyɛ̄ kōŋ ō hīōū lāchī a̍ pɛ̄ŋgɛ̄la᷄ŋndo̍ pɛ̍,

⁴⁰ tē o̍ pōūtā nda̍ tāŋgu̍l chīɛ̄ī kōŋ nda̍ŋ nyɛ̄ kōŋ ō chō ō hōlna᷄ŋ ni̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ mā sōli̍ pōūtā lāŋ, mā fāŋa̍ la̍ŋ o̍ chi̍e̍e̍ ko̍ŋ ni᷄ŋ mā kɔ̍ vi̍o̍ū la̍ŋ o̍ fo̍nda᷄ŋ cho̍ ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄llo̍.

⁴¹ O̍ ko̍ŋ kɔ̍ɔ̍lī, tē chīɛ̄ī kōŋ ō wa̍ ō yīkpāā lēni᷄ŋ pɛ̍, wānā so̍līāā lāsa̍lāa̍ ō tōsa̍ ā sɛ̄ɛ̄lu̍u̍ ndu̍ kpo̍u̍. O̍ ko̍ŋ kɔ̍ɔ̍lī, mī wāŋnda̍ kɔ̄ndū nyɛ̄ nda̍ sɛ̄ɛ̄lu̍u̍ ko̍ŋ ndo̍ kpo̍u̍, mā fāŋa̍ ndu̍ chi̍e̍e̍ mā kɔ᷄ vi̍o̍ū ndu̍ o̍ fo̍nda᷄ŋ cho̍ ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄llo̍.

⁴² O̍ ko̍ŋ kɔ̍ɔ̍lī, mā chūa̍ pōūtā chēle̍ŋ mā mīŋgi̍ la̍ŋ wōū nāa̍ nda̍ sōli̍ ka̍ŋ po̍ūta̍ŋ o̍ chīɛ̄īyo̍ wa̍, ndu̍yɛ̍, mā mīŋgi̍ chīɛ̄īyo̍ yīkpā lēni᷄ŋ.

⁴³ Tē ā sōōlu̍u̍ pōūtā nyɛ̄ kōŋ ō cha᷄l la̍ŋ cho̍o̍ o̍ chīɛ̄īyo̍ la̍ŋ pɛ̍, mā sɛ̄ɛ̄lu̍u̍ chīɛ̄īyo̍ lēni᷄ŋ kpo̍u̍, mī nyɛ̄ kōŋ ō mīīŋgu̍ vɛ̄lɛ̄ mbō kīla̍ŋ pɛ̍,

⁴⁴ wānā so̍līāā lāsa̍lāa̍ ō nɔ̄ mbō kūɛ̄ mbo̍ kɔ̍ mɛ̍ɛ̍nda̍ŋ vɛ̍lɛ̄ nyɛ̄ kōŋ. Tē nyɛ̍ cho̍ ko̍ŋ māā yūl lo̍ ō wa̍ hīōūwɔ̄ɔ̍ lāchī a̍ pɛ̄ŋgɛ̄la᷄ŋndo̍ o̍ chīɛ̄īyo̍ pɛ̍, mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ndu̍ ho̍lnu̍ŋ chi̍ɛ̍ī kōŋ ni̍. Chīɛ̄ī kōŋ ō wā ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

⁴⁵ Wāna̍ chīɛ̄ī kōŋ ō nɔ̄ mbō pɛ̄l chīɛ̄ī kōŋ, ndu̍yɛ̍ mbō sōōlu̍u̍ nyɛ̄ o̍ nyɛ̄ o̍ ta̍ŋgu̍l chīɛ̄ī kōŋ a̍ ndu̍, lāpōū ni̍, ŋ̄pɛ̄ŋgɛ̍ ni̍, a̍ nyɛ̄ o̍ nyɛ̄ nda̍ yīkpa̍ chīɛ̄ī kōŋ lātūlu̍ mbō fāŋa̍ la̍ŋ chi̍e̍e̍, mbō kɔ᷄ vi̍o̍ū la̍ŋ o̍ fo̍nda᷄ŋ cho̍ ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

⁴⁶ Bōōndi̍i̍ wānā so̍līāā lāsa̍lāa̍ ō chō chīɛ̄ī kōŋ kīndā le̍ pālɛ̍i̍ ī ŋɔ᷄mmɛ̍ū ve̍, wānā o̍ wāna̍ lu̍ɛ̍ī chīɛ̄ī ni̍ŋ lo̍ŋ pɛ̍, wānā ko̍ŋ pāa̍le̍ le̍ŋ kpɛ᷅ŋ, ō nɔ̄ɔ̄lɛ̍i̍yo̍ o̍ ni̍i̍lū ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

⁴⁷ Ndu̍yɛ̍ wānā o̍ wāna̍ lɔ̍l o̍ chīɛ̄ī kōŋ ni᷄ŋ pɛ̍, ɔ̄ɔ̄ mbō dē nyɛ̄ dīa̍a̍ o̍ chīɛ̄ī kōŋ ni᷄ŋ pɛ̍, mɛ̄ɛ̍ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ.

⁴⁸ Kɛ̍ tē ā mīŋgi̍ ndu̍ yīkpā lēni᷄ŋ pɛ̍, mī wānā so̍līāā lāsa̍lāa̍ ō kɔ̍ mɛ̍ɛ̍nda̍ŋ, mbō chi᷄ lɛ̍ nyɛ̄ kōŋ o̍ chīɛ̄īyo̍ le̍ pɛ̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā chīɛ̄ī kōŋ ō chō ni᷅ŋ ō dīāndāā, kāni̍ fo̍ndōle̍, nyɛ̄ kōŋ ō fāŋa̍ŋ.

⁴⁹ O̍ ko̍ŋ kɔ̍ɔ̍lī, le̍ chīɛ̄īyo̍ ho̍ō dīndīo̍o̍ kpe̍e̍kpe̍i̍, wānā so̍līāā lāsa̍lāa̍ ō nɔ̄ mbō bīī yōūwa̍ a̍ ŋīɔ̍ɔ̍ŋ, o̍ ko̍ŋ kɔ̍ɔ̍lī, mbō chūa̍ yɔ̄m si̍dāā wo̍, a̍ kōlā si̍a̍ŋā yɔ̄ɔ̄ wo̍, a̍ lɛ̄vīī ha̍sɔ̍pī ve̍.

⁵⁰ O̍ ko̍ŋ kɔ̍ɔ̍lī, mā dɔ̄ū mɛ̄ŋmā sɛ̄nɛ̄īya̍ŋ o̍ kpɛ̍ɛ̍nɛ̍i̍ pūūlūe̍i̍ ni᷄ŋ, mī wānā so̍līāā lāsa̍lāa̍ ō hāndu̍ yōūwāā kāŋ ō pīlɛ̍ o̍ mɛ̄ŋmā māŋ chōo̍, mbō dīī ndu̍, mī kōo̍ma̍ yōū kōŋ mā dēli̍ o̍ mɛ̄ŋmā māŋ ni᷄ŋ.

⁵¹ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō chu̍a̍ yɔ̄m si̍dāā wo̍, a̍ kōlā si̍a̍ŋā yɔ̄ɔ̄ kōŋ, a̍ lɛ̄vīī ha̍sɔ̍pī ve̍, lātūlu̍ a̍ yōūwo̍ ō pīlɔ̍ɔ̍ o̍ lo̍ yōōmū wo̍, mbō yīŋ o̍ mɛ̄ŋma̍ cho̍ o̍ kpɛ̍ɛ̍nɛ̍i̍ ni᷄ŋ ma̍ mu̍ūli̍āŋ a̍ kōo̍ma̍ yōū nda̍ dīī yo̍ wa̍ŋ. O̍ ko̍ŋ kɔ̍ɔ̍lī, kōo̍ma̍ yōū nda̍ dīī ko̍ŋ mi̍ mā wā mā mūūli̍āŋ a̍ mɛ̄ŋmā sɛ̄nɛ̄īya̍ŋ nda̍ŋ, mbō fāsa̍ŋa̍ ma̍ŋ o̍ chīɛ̄ī kōŋ le̍ ŋɔ᷄mmɛ̍ū.

⁵² Mɛ̄ɛ̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū chi̍ɛ̍īyo̍ ho̍ō dīndī a̍ nyɔ̄ɔ̍ŋ mu᷅ŋ ni̍, kōo̍ma̍ yōūma̍ mu̍u̍li̍āŋ ma̍ŋ a̍ mɛ̄ŋmā sɛ̄nɛ̄īya̍ŋ nda̍ŋ, a̍ yōūwo̍ ō pīlɔ̍ɔ̍ o̍ lo̍ yōōmū wo̍, a̍ yɔ̄m si̍dāā wo̍, a̍ lɛ̄vīī ha̍sɔ̍pī ve̍, ndu̍yɛ̍ a̍ kōlā si̍a̍ŋā yɔ̄ɔ̄ wo̍.

⁵³ Tē ō chīi̍ pɛ̍ kpo̍u̍, ō ma᷄l yōu̍ lo̍ ko̍ŋ yōōmū wo̍ ō kūɛ̄nu᷄ŋ. Mɛ̄ɛ̍ to᷄lta̍ŋ nda᷅ŋ wānā so̍līāā lāsa̍lāa̍ ō lōōkū to̍sā ni̍ le̍ chīɛ̄ī kōŋ dīndīo̍o̍, ndu̍yɛ̍ mī chīɛ̄ī kōŋ ō sīmnu̍ŋ o̍ di̍a̍ndāā.

^54-57 Tē lā sāālu̍ŋ pɛ̍ māā nāāla̍ŋ nda᷅ŋ ki̍nɛ̍i̍, la̍ŋ la̍ yɔ̍nūŋ ni̍ māā, tɛ̄ɛ̄ŋndo̍, a̍ pāūwo̍, a̍ kāwa̍a̍, a̍ nāa̍ de᷅l o̍ kōlāa̍ mbō yu᷄l lo̍, a̍ nyɛ᷄ ho̍lnūŋ o̍ chīɛ̄īyo̍ māā yūl lo̍, lā tōsa̍ mī wāŋndo̍ ɔ̄ɔ̄ nyɔ̄ɔ̍ ō sīmnu᷄ŋ o̍ nɔ̍ɔ̍lɛ̍i̍yo̍, to᷄lta̍ŋ nda᷅ŋ ki̍nɛ̍i̍ la̍ cho̍ le̍ tōsāa̍ mī wānā kōŋ kɛ̄lɛ̄ŋgāā mī nyɛ̄ kōŋ ō sīmnu᷄ŋ o̍ di̍a̍ndāā ni̍.”