Lɛ̄vi̍ti̍kɔ̍ɔ̄ 13 - Yāu̍ Mɛ̄lɛ̄ka̍a̍

Sāwāla̍ŋ a̍ nāā wɔ̄ɔ̍ŋ fu̍lā wa᷅ŋndo̍ lēkɔ̄ɔ̍ wo̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m Mūu̍sē nda̍ E̍lɔ̄ŋ sāwāla̍ŋ nda᷅ŋ, mbo̍ dīmūl nda̍ āā,

² “Tē hīndɔ̄ɔ̍ ō cha᷄l wāŋndo̍ pɛ̍, ɔ̄ɔ̄ tɛ̄ɛ̄ŋndo̍, kɛ̄lɛ̄ŋgāā mī nyɔ̄ɔ̍ ō fūla̍ ndu̍ o̍ ŋ̄dīāl māā kāwa̍, ndu̍yɛ̍ mbō sīmnu᷄ŋ na̍a̍ ta᷅ŋ wa̍nā pɛ̍, wānā ko̍ŋ ā nɔ̄ mā hīŋ a̍ ndu̍ o̍ E̍lɔ̄ŋ ndo̍, wānā so̍līāā lāsa̍lāa̍, ɔ̄ɔ̄ mā kūɛ̄ a̍ ndu̍ o̍ pūa̍a̍ E̍lɔ̄ŋ nda̍ ō pīlɛ̍ lo̍, a̍ cho̍ wānāā sōlīāā lāsa̍lāa̍ wa̍.

³ Tē ā kūɛ̄ a̍ wānā ko̍ŋ o̍ wānāā sōlīāā lāsa̍lāa̍ ha̍ā o̍ pīlɛ̍ lo̍ pɛ̍, wānā so̍līāā lāsa̍lā kōŋ ō mɛ̄ɛ̄ndi̍a̍ŋ wa̍nā ko̍ŋ pāū kōŋ nyɛ̄ kɛ̄ndɛ̄ kɛ̍ndɛ̄. Tē ō chē pɛ̍ mī yīīŋnde̍ o̍ pāū wānā ko̍ŋ ī yɔ̄nu̍ŋ i̍ hu̍mbū, ndu̍yɛ̍ mī pāūwo̍ ho̍ō ō yīŋgi̍la̍ ti᷄ŋ pɛ̍, mɛ̄ɛ̍ nāa̍ ta᷅ŋ wa̍nā wo̍ wānā ko̍ŋ ō sɔ̄la̍ ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

⁴ Kɛ̍ tē ō wa̍ pɛ̍, mī nyɔ̄ɔ̍ kīla̍ŋ wa᷅ŋndo̍ o̍ ŋ̄dīāl, mī fo̍ndā kōŋ ō wa̍ ō hūmbū māā kāwa̍, ndu̍yɛ̍ mī pāu̍ de̍l wānā ko̍ŋ ndo̍ ō ve̍ o̍ yi̍ŋgīlāā ti᷄ŋ te̍, ndu̍yɛ̍ vɛ̍lɛ̄ mī yīīŋīi̍ ba̍lu̍ fo̍ndāŋ kāwa̍ kōŋ nde̍ ī ve̍ i̍ hu̍mbū le̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū.

⁵ O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ wānā ko̍ŋ fo̍ndā kōŋ. Tē ō chē pɛ̍ māā pāū kōŋ mɛ̄ɛ̍ o̍ wa̍ pɛ̍i̍ yɛ̍ ko̍ni̍ o̍ cho̍ wɔ̄ ni̍, ō hīu̍ la̍chi̍ le̍ pɛ̍, wānā so̍līāā lāsa̍lāa̍ ō kɛ̄si̍ ndu̍ vɛ̄lɛ̄ nāa̍ yo̍lo̍līa̍a̍ kāŋ ndu̍ pīlɛ̍ kpe̍ le̍ pālɛ̍i̍ ī ŋɔ᷄mmɛ̍ū.

⁶ Tē pālɛ̍i̍ ī hīōū vɛ̄lɛ̄ pɛ̍ i̍ ŋɔ̍mmɛ̍ū, ō kɔ̍ mɛ̄ɛ̄nda̍ŋ vɛ̍lɛ̄ wānā ko̍ŋ. Tē ō sāālu̍ŋ pɛ̍ māā pāūwo̍ ō kāndu̍ sīōŋgɔ̄ɔ̍, ndu̍yɛ̍ ō hīu̍ lɛ̍ lāchī a̍ dīōnɔ᷄ŋndo̍ le̍ pɛ̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l. Māā tɛ̄ɛ̄ŋndo̍ ko̍ni̍ ndu̍ o̍o̍ cha̍l wānā ko̍ŋ o̍ ŋ̄dīāl ni̍. Wānā ko̍ŋ ō nɔ̄ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ fo̍, mbō mīīŋgu̍ wāŋnda̍ chōo̍ ō dīāndāā ya̍ Mɛ̍lɛ̄ka̍ o̍ hɔ̄l.

⁷ Kɛ̍ tē wānā so̍līāā lāsa̍lāa̍ ō mɛ̄ɛ̄ndi̍a̍ŋ wa̍nā ko̍ŋ pɛ̍, mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l pɛ̍, mī wānā ko̍ŋ ō mīīŋgu̍, kɛ̍ mī fo̍ndāŋ nyɔ̄ɔ̍ chō ko̍ŋ māā kāwa̍ wo̍ ō mi̍i̍ŋgu̍ vɛ̄lɛ̄ ndu̍, mbō kūā a̍ dīōnɔ᷄ŋndo̍ pɛ̍, mɛ̄ɛ̍ wānā ko̍ŋ ō nɔ̄ mbō mīīŋgu̍ pi̍la̍ nāa̍ wānā so̍līāā lāsa̍lāa̍ chūā.

⁸ Tē ō mīīŋgu̍ pɛ̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ ndu̍. Te̍ ō chē pɛ̍, māā fo̍ndāŋ kāwa̍ kōŋ ō chō hīōūwɔ̄ɔ̍ lāchī a̍ dīōnɔ᷄ŋndo̍ pɛ̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l. Māā nāā wɔ̄ɔ̍ŋ ta᷅ŋ wa̍nā wo̍ ō pu᷄m, ndu̍ cho̍ ko̍ŋ wānā ko̍ŋ lēkɔ̄ɔ̍ ni̍.

⁹ “Tē wāŋndo̍ ō nɔ̄ nāā wɔ̄ɔ̍ŋ ta᷅ŋ wa̍nā wo̍ lēkɔ̄ɔ̍ pɛ̍, wānā ko̍ŋ ā nɔ̄ mā hīŋ a̍ ndu̍ o̍ wānā so̍līāā lāsa̍lāa̍ lo̍.

¹⁰ Tē ā hīŋ a̍ ndu̍ lo̍ŋ pɛ̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ wa̍nā ko̍ŋ. Tē ō sāālu̍ŋ pɛ̍ māā fo̍ndā nāā kōŋ ō chō ko̍ŋ wa᷅ŋndo̍ wo̍, māā yīīŋīi̍ ba̍lu̍ fo̍ndāŋ kōŋ nde̍ ī yɔ̍nu̍ŋ i̍ hu̍mbū pɛ̍, ndu̍yɛ̍ mi̍ pāūwo̍ ō dēl o̍ fo̍ndāŋ kōŋ,

¹¹ mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ wānā ko̍ŋ ō sɔ̄la̍ ko̍ŋ ni̍. O̍ ko̍ŋ, wāna̍ so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l. Wānā so̍līāā lāsa̍lāa̍ ō nɔ̍ lɛ̍ mbō kɛ̄si̍ wānā ko̍ŋ nāa̍ yo̍lo̍līa̍a̍ le̍ ndu̍ mɛ̍ɛ̍ndīa̍ŋ te̍. Kāni̍ fo̍ndōle̍ ī wā ni᷅ŋ kpe̍nde̍ke̍le̍ māā nāā wɔ̄ɔ̍ŋ ta᷅ŋ wa̍nā wo̍ ō pūm wānā ko̍ŋ ō nɔ̄ ko̍ŋ le̍kɔ̍ɔ̍ ni̍.

^12-13 Kɛ̍ mī ī yɔ̄nu̍ŋ dɔ̍ɔ̍ mī nāā wɔ̄ɔ̍ŋndo̍ ho̍ō ō kēēku̍ wāŋndo̍ chōo̍ mī kāwa̍la̍ŋ lā lo̍ ndu̍ lēkɔ̄ɔ̍ kpo̍u̍, chɔ̍ŋ o̍ bōlle̍ŋ mbō tōl a̍ pēlo̍ŋ di̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l.

¹⁴ Kɛ̍ tē nāā kōŋ ō ma᷄l wāŋndo̍ pāūwo̍ lēkɔ̄ɔ̍ pɛ̍, mɛ̄ɛ̍ wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

¹⁵ Wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ wa̍nā ko̍ŋ. Tē ō sāālu̍ŋ pa̍ū kōŋ wānā ko̍ŋ lēkɔ̄ɔ̍ pɛ̍, ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, kāni̍ fo̍ndōle̍, nāa̍ ta᷅ŋ wa̍nā wo̍ ō pūm wānā ko̍ŋ ō nɔ̄ ko̍ŋ ni̍.

¹⁶ Kɛ̍ tē pāū kōŋ ō sēŋgū wānā ko̍ŋ pɛ̍, mī kāwa̍a̍ lo̍ o̍ fo̍ndā kōŋ, wānā ko̍ŋ ō nɔ̄ mbō mīīŋgu̍ nāa̍ wānā so̍līāā lāsa̍lāa̍ chūā.

¹⁷ O̍ ko̍ŋ, mbō kɔ̍ mɛ̍ɛ̍nda᷄ŋ ndu̍ vɛ̄lɛ̄. Tē sīōŋgɔ̄ɔ̍ kpe̍e̍kpe̍i̍ pāū kōŋ ō sēŋgū ni̍ mi̍ kāwa̍a̍ lō o̍ fo̍ndā kōŋ, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō sīmnu᷄ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l.”

¹⁸ Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Mī ī yɔ̄nu̍ŋ dɔ̍ɔ̍ mī hīndɔ̄ɔ̍ ō cha᷄l wāŋndo̍, ndu̍yɛ̍ mbō chɔ᷄m o̍ hɔ̄lla̍ māā ō sēŋgū.

¹⁹ Kɛ̍ tē te̍le̍ŋ ti̍ŋ ō hīōū pɛ̍, fo̍ndāŋ kōŋ ō hīndū wāŋndo̍ mbō dēndū fo̍, tē ko̍ŋ te̍ ō yɔ̄nu̍ŋ o̍ si̍a̍ŋā a̍ būŋgāŋ hūmbo᷄ŋ lēni᷄ŋ. Wānā ko̍ŋ ō nɔ̄ mbō kūɛ̄ o̍ wānā so̍līāā lāsa̍lāa̍ lo̍.

²⁰ Tē ō kūɛ̄ pɛ̍, wānā so̍līāā lāsa̍lāa̍ ō kɔ̍ mɛ̍ɛ̍ndīa̍ŋ ndu̍. Tē fo̍ndā nyɔ̄ɔ̍ hīndū ndu̍ ko̍ŋ ndo̍ ō sīmnu᷄ŋ pa̍ūwo̍ pɛ̍, ndu̍yɛ̍ mī yīīŋīi̍ ba̍lu̍ pāū kōŋ nde̍ ī yɔ̄nu̍ŋ i̍ hu̍mbū pɛ̍, mɛ̄ɛ̍ nāa̍ wɔ̄ɔ̍ŋ ta᷅ŋ wa̍nā wo̍ ndu̍ fu̍la̍ ko̍ŋ wānā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̄lɛ̄ka̍ o̍ hɔ̄l.

²¹ Kɛ̍ tē wānā so̍līāā lāsa̍lāa̍ ō mɛ̄ɛ̄ndīa̍ŋ fo̍ndāŋ kōŋ pɛ̍, mbō chē māā yīīŋīi̍ ba̍lu̍ pāū kōŋ nde̍ i̍ cho̍ i̍ hu̍mbū le̍, ndu̍yɛ̍, māā pāū kōŋ yīŋgi̍la̍ ti̍ŋ te̍, ndu̍yɛ̍ mī pāū kālāa̍ ō kāndu̍ sīōŋgɔ̄ɔ̍ pɛ̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū.

²² O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ wānā ko̍ŋ fo̍ndā kōŋ. Tē chē pɛ̍ māā pāū kālāa̍ ō chō kɔ̄la̍ŋ a̍ dīōnɔ᷄ŋndo̍ pɛ̍, mɛ̄ɛ̍ nāa̍ wɔ̄ɔ̍ŋ ta᷅ŋ wa̍nā wo̍ ō pūm ndu̍ fu̍la̍ wānā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

²³ Kɛ̍ tē fo̍ndāŋ kōŋ ō hi̍u̍ la̍chi̍ a̍ dīōnɔ᷄ŋndo̍ le̍, mɛ̄ɛ̍ ō cho̍ na̍ā wɔ̄ɔ̍ŋ te̍ cho̍ wānā ko̍ŋ lēkɔ̄ɔ̍ le̍. Hīndɔ̄ɔ̍ cha̍l ndu̍ wo̍ tīndī ndɔ̄ɔ̍ cho̍ ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ni᷅ŋ ō dīāndāā ya̍ Mɛ̍lɛ̄ka̍ o̍ hɔ̄l.

²⁴ “Mī ī yɔ̄nu̍ŋ dɔ̍ɔ̍ mī wāŋndo̍ ō lōmnu᷄ŋ, mī pāū kōŋ ō wa᷄ o̍ hu̍mbū lēni᷄ŋ a̍ būŋgāŋ sīāŋa᷄ŋ, ɔ̄ɔ̄ mbō wa᷄ ō hūmbū lēni᷄ŋ.

²⁵ Wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ pa̍ū kōŋ. Tē yīīŋīi̍ ba̍lu̍ pāū kōŋ nde̍ ī yɔ̄nu̍ŋ pɛ̍ i̍ hu̍mbū, ndu̍yɛ̍ mī pāū kālāa̍ ō yīŋgi̍la̍ ti᷄ŋ pɛ̍, mɛ̄ɛ̍ nāa̍ wɔ̄ɔ̍ŋ ta᷅ŋ wa̍nā wo̍ ō pūm, ndu̍ wānā ko̍ŋ ō sɔ̄lā ko̍ŋ o̍ lōmnɔ᷄ŋ ko̍ŋ ni᷄ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, kāni̍ fo̍ndōle̍, ī wā i̍ chɔ̍mna᷄ŋ kpe̍nde̍ke̍le̍ māā nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ wānā ko̍ŋ ō sɔ̄la̍ ko̍ŋ ni̍.

²⁶ Kɛ̍ tē wānā so̍līāā lāsa̍lāa̍ ō mɛ̄ɛ̄nda̍ŋ fo̍ndāŋ kōŋ pɛ̍, mbō sāālu̍ŋ māā yīīŋīi̍ ba̍lu̍ pāū kōŋ nde̍ ī cho̍ i̍ hu̍mbū le̍, ndu̍yɛ̍, māā pāū kālāa̍ ō yīŋgi̍la̍ ti̍ŋ te̍, ndu̍yɛ̍ mī pāū kālāa̍ ō kāndu̍ sīōŋgɔ̄ɔ̍ pɛ̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū

²⁷ O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ ndu̍. Tē pāū kōŋ ō wa̍ hīōūwɔ̄ɔ̍ lāchī a̍ dīōnɔ᷄ŋndo̍ pɛ̍, mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ō pūm ndu̍ fu̍lā ko̍ŋ wa̍nā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

²⁸ Kɛ̍ tē pāū kōŋ ō hi̍u̍ la̍chi̍ a̍ dīōnɔ᷄ŋndo̍ le̍, mbō kāndu̍ sīōŋgɔ̄ɔ̍ pɛ̍, mɛ̄ɛ̍ ō cho̍ na̍ā wɔ̄ɔ̍ŋ te̍ cho̍ wānā ko̍ŋ lēkɔ̄ɔ̍ le̍. Lōmnɔ᷄ŋ wānā ko̍ŋ ō lōmnu᷄ŋ ndo̍ ndu̍ to̍sa̍ ni̍ fo̍ndā kōŋ ō hīndū le̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō dīāndāā ya̍ Mɛ̍lɛ̄ka̍ o̍ hɔ̄l.

²⁹ “Tē pāūwo̍ ō fūla̍ wāŋndo̍ o̍ lēbōl kɛ̄lɛ̄ŋgāā o̍ da̍a̍da̍a̍ pɛ̍, ō wa̍ wa̍nā pɔ̍nɔ̍ ō wa̍ wa̍nā la̍nɔ̍,

³⁰ wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ wa̍nā ko̍ŋ pāū kōŋ. Tē pāū kōŋ ō yīŋgi̍la̍ ti᷄ŋ pɛ̍, ndu̍yɛ̍ mī yīīŋīi̍ ba̍lu̍ pāū kōŋ nde̍ ī wa̍ māā ba̍si̍, ndu̍yɛ̍ mī ī wa̍ mɔ̍lɔ̍lɔ̍ mɔ̍lɔ̍lɔ̍ pɛ̍, mɛ̄ɛ̍ nāā wɔ̄ɔ̍ŋ fu̍lā wa᷅ŋndo̍ o̍ lēbōl ɔ̄ɔ̄ o̍ da̍a̍da̍a̍ mī yīīŋnde̍ ī yūŋgāŋ, ndu̍yɛ̍ mbō tāŋ wa̍nā wo̍, mɛ̄ɛ̍ ndu̍ fu̍la̍ wānā ko̍ŋ ni̍. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l.

³¹ Kɛ̍ tē wānā so̍līāā lāsa̍lāa̍ ō mɛ̄ɛ̄ndi̍a̍ŋ pa̍ū kōŋ pɛ̍, mbō sāālu̍ŋ māā pāū kōŋ ō cho̍ la̍kɔ̍ a̍ dīōnɔ᷄ŋndo̍ le̍, ndu̍yɛ̍ mī yīīŋīi̍ ba̍lu̍ pāū kōŋ nde̍ ī ve̍ i̍ ti̍ŋī le̍, ndu̍yɛ̍ mī pāū kōŋ ō wa̍ nyūmu̍llo̍, wānā so̍līāā lāsa̍lāa̍ ō nɔ̄ mbō sōli̍ wānā ko̍ŋ wāŋnda̍ tɛ̄ɛ̄ŋ, mbō kɔ̍ wa᷅ nāa̍ yo̍lo̍līa̍a̍, ndu̍ pīlɛ̍ le̍ pālɛ̍i̍ ī ŋɔ᷄mmɛ̍ū.

³² O̍ pāa̍le̍ ŋɔ᷄mmɛ̍ūle̍ŋ chōo̍, wāna̍ so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ pāū kōŋ. Tē ō hīu̍ la̍chi̍ a̍ tīmbu̍la᷅ŋndo̍, ndu̍yɛ̍ mī yīīŋīi̍ ba̍lu̍ ndu̍ ve̍ ī ve̍ māā ba̍si̍ le̍, ndu̍yɛ̍ mī pāū kōŋ ō ve̍ ti᷄ŋ kɔ̄la̍ŋ a̍ yīŋgīlāa̍ le̍,

³³ wāna̍ pāū kōŋ ō fūlā ko̍ŋ ndo̍, ō nɔ̄ mbō sēndi̍ŋ, kɛ̍ mbō mɛ̄i̍ yīīŋīi̍ ba̍lu̍ pāū kōŋ nde̍ chɛ̍ chɛ̍. O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō sōli̍ ndu̍ wāŋnda̍ tɛ̄ɛ̄ŋ mbō kɔ̍ wa᷅ nāa̍ yo̍lo̍līa̍a̍ ndu̍ pīlɛ̍ le̍ pālɛ̍i̍ vɛ̄lɛ̄ ī ŋɔ᷄mmɛ̍ū.

³⁴ O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ wa̍nā ko̍ŋ. Tē pāūwo̍ ō hīu̍ la̍chi̍ a̍ dīōnɔ᷄ŋndo̍ le̍, ndu̍yɛ̍, mbō yīŋgi̍la̍ ti᷄ŋ lēni᷄ŋ te̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō dīāndāā ya̍ Mɛ̍lɛ̄ka̍ o̍ hɔ̄l. Wānā ko̍ŋ ō nɔ̄ mbō tɔ̄ɔ̄ nyɛ̄la̍ ndɔ̄la̍ŋ fo̍, o̍ ko̍ŋ mbō mīīŋgu̍ ō dīāndāā ya̍ Mɛ̍lɛ̄ka̍ o̍ hɔ̄l.

³⁵ Kɛ̍ tē wānā ko̍ŋ ō mīīŋgu̍ pɛ̍, a̍ dīmī wānā so̍līāā lāsa̍lāa̍ ō dīmi̍ ko̍ŋ māā ō chō ō dīāndāa̍ wo̍, mī pāūwo̍ ō kɔ̍ hi̍o̍ū lāchī a̍ dīōnɔ᷄ŋndo̍ pɛ̍,

³⁶ wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ wānā ko̍ŋ. Te̍ wānā so̍līāā lāsa̍lāa̍ ō sāālu̍ŋ pɛ̍ māā pāū kōŋ ō chō hīōūwɔ̄ɔ̍ lāchī a̍ dīōnɔ᷄ŋndo̍, wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, mbō tōfa̍ lɛ̍ bɛ̍ɛ̍ le̍ yīīŋīi̍ wa᷅ o̍ pāū kōŋ māā ba̍si̍ ve̍ le̍.

³⁷ Kɛ̍ te̍ wānā so̍līāā lāsa̍lāa̍ ō mɛ̄ɛ̄ndi̍a̍ŋ pa̍ū kōŋ pɛ̍, mbō sa̍a̍lu̍ŋ māā pāūwo̍ ō hīu̍ la̍chi̍ a̍ dīōnɔ᷄ŋndo̍ le̍, ndu̍yɛ̍ mbō chē mī yīīŋīi̍ ba̍lu̍ pāū kōŋ nde̍ ī sīmnu᷄ŋ i̍ ti̍ŋī pɛ̍, mɛ̄ɛ̍ pāū wānā ko̍ŋ ō sēŋgū. Wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō dīāndāā ya̍ Mɛ̍lɛ̄ka̍ o̍ hɔ̄l.

³⁸ “Tē kāwa̍a̍ ō de᷄l wānā pɔ̍nɔ̍ɔ̍ ɔ̄ɔ̄ wānā la̍nɔ̍ɔ̍ pɛ̍ mbō wa̍ ō hūmbū,

³⁹ wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ wa̍nā ko̍ŋ kāwa̍ kōŋ. Tē kāwa̍ kōŋ ō hīu̍ di̍o̍ndɔ̄ɔ̄ fo̍fo̍ le̍, mɛ̄ɛ̍ ō cho̍ na̍a̍ yɔ̍ŋ wānā nyɛ᷅ le̍ o̍ cho̍ ko̍ŋ te̍. Wānā ko̍ŋ ō nɔ̄ mbō wa̍ ō dīāndāā ya̍ Mɛ̍lɛ̄ka̍ o̍ hɔ̄l.

^40-41 “Mī ī yɔ̄nu̍ŋ dɔ̍ɔ̍ mī yīīŋnde̍ ī chūū wānā pɔ̍nɔ̍ɔ̍ o̍ lēbōl, mī te̍mbe̍llo̍ ō de᷄l ndu̍ lāchī, ɔ̄ɔ̄ o̍ mūndū, ko̍ŋ chɔ᷅m nu̍a̍ā māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l te̍.

⁴² Kɛ̍ tē ō wa̍ pɛ̍ mī būŋgāŋ hūmbo᷄ŋ a̍ ŋ̄ sīāŋa᷄ŋ ŋ̄ fūla̍ wānā ko̍ŋ o̍ te̍mbe̍l ko̍ŋ pɛ̍, mɛ̄ɛ̍ nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ fu̍la̍ ndu̍ ko̍ŋ ni̍.

⁴³ Wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ wa̍nā ko̍ŋ te̍mbe̍l ko̍ŋ. Te̍ ō wa̍ le̍nde̍ a̍ būŋgāŋ sīāŋa᷄ŋ ndu̍yɛ̍ a̍ ŋ̄ hūmbo᷄ŋ pɛ̍, māā nāā wɔ̄ɔ̍ŋ ta᷅ŋ wa̍nā wo̍ pɛ̍,

⁴⁴ wānā so̍līāā lāsa̍lāa̍ ō nɔ̄ mbō dīmu̍l wāŋnda̍ māā wānā ko̍ŋ ō chō ō nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l, kāni̍ fo̍ndōle̍, nāā wɔ̄ɔ̍ŋ ta᷅ŋ wa̍nā wo̍ ō pūm, ndu̍ fu̍la̍ ndu̍ ko̍ŋ o̍ lēbōl ni̍.

⁴⁵ “Tē wāŋndo̍ ō nɔ̄ nāā wɔ̄ɔ̍ŋ ta᷅ŋ wa̍nā wo̍ lēkɔ̄ɔ̍ pɛ̍, wānā ko̍ŋ ō nɔ̄ mbō wōūnu̍ŋ nyɛ̍lā yūūlu̍la̍ŋ, mbō ma᷄l yīīŋnde̍ le̍nde̍ ō sa̍a̍ndīāā le̍, ndu̍yɛ̍, mbo̍ yīīnu̍ŋ nyɔ̍ɔ̍ o̍ sōndō, mbō kūā a̍ dīmīo̍o̍ āā, ‘I̍ cho̍ ō nɔ̄ɔ̄lɛ̍i̍yo̍! I̍ cho̍ ō nɔ̄ɔ̄lɛ̍i̍yo̍.’

⁴⁶ Ndu̍yɛ̍ ha̍a̍a̍ a̍ te̍le̍ŋ nāā kōŋ ō chō wa̍nā ko̍ŋ lēkɔ̄ɔ̍ wo̍, o̍ nɔ̄ɔ̄lɛ̍i̍ wānā ko̍ŋ ō wā ni̍. Ndu̍yɛ̍ wānā ko̍ŋ ō nɔ̄ mbō fūla̍ o̍ dɔ̍ɔ̍ŋgɔ̍ kōŋ ni᷄ŋ wa᷅ŋnda̍ tɛ̄ɛ̄ŋ mbō kɔ̍ wa᷅ a̍ bā ndɔ̄ yɛ̍.”

Sāwāla̍ŋ a̍ kōlā yu̍lɛ̍i̍yo̍ o̍kɔ̄ɔ̄

⁴⁷ Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Mī ī yɔ̄nu̍ŋ dɔ̍ɔ̍ mī nyɛ̄ chūɛ̄ɛ̄na᷄ŋndo̍, o̍ cho̍ ō tōōsīāā a̍ yīīŋīī sāa̍ kɛ̄lɛ̄ŋgāā a̍ fūŋnde̍ ba̍ā kālā le̍ŋ lē chēle̍ŋ ndo̍, mī nāā wɔ̄ɔ̍ŋndo̍ dēli̍ lēchōo̍ mbō yūl.

⁴⁸ Ɔ̄ɔ̄ mī ī yɔ̄nu̍ŋ mī kōlā i̍pɛ̍ŋgɔ̍ɔ̍ o̍ cho̍ ō tōōsīāā a̍ fūŋnde̍ kɛ̍ndɛ̄ kɛ̍ndɛ̄le̍ŋ, ɔ̄ɔ̄ a̍ yīīŋīī sāa̍ wo̍, ɔ̄ɔ̄ mbō wa̍ yāu̍ vīsīo̍o̍, kɛ̄lɛ̄ŋgāā nyɛ̍ cho̍ ō tōōsīāā a̍ yāu̍ vīsīo̍o̍ wo̍, mī nāa̍ wɔ̄ɔ̍ŋndo̍ ō dēli̍ lēchōo̍ mbō yu᷄l.

⁴⁹ Tē yūl kōŋ ō wa̍ ti᷄ŋ ō tīŋī pɛ̍, māā kɔ̄ɔ̍le̍ chāāki̍ī, ɔ̄ɔ̄ mbō wa̍ ō sīāŋā pɛ̍, mɛ̄ɛ̍ yu᷄l nɔ̍lā mbō kūɛ̄ a̍ tīmbu̍la᷅ŋndo̍ wo̍ cho̍ ko̍ŋ ni̍. Ā nɔ̄ mā hīŋ a̍ nyɛ̍ yu̍l ko̍ŋ ndo̍ mā hu᷄ŋ chɔ᷅m wānā so̍līāā lāsa̍lāa̍.

⁵⁰ O̍ ko̍ŋ, mī wānā so̍līāā lāsa̍lāa̍ ō mɛ̄ɛ̄ndi̍a̍ŋ yu̍l cho̍ ko̍ŋ o̍ nyɛ̄ kōŋ ndo̍. Mbō chūa̍ nyɛ̄ kōŋ mbō kɛ̄si̍ ndu̍ īnɛ̍ te̍ŋge̍le̍ŋ le̍ pālɛ̍i̍ ī ŋɔ᷄mmɛ̍ū.

⁵¹ Ō pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō nɔ̄ mbō mɛ̄ɛ̄ndi̍a̍ŋ vɛ̍lɛ̄ yu᷄l cho̍ o̍ nyɛ̄ kōŋ ndo̍. Tē yūl kōŋ ō hīōū lāchī a̍ pɛ̄ŋgɛ̄la᷄ŋndo̍ o̍ nyɛ̄ kōŋ pɛ̍, mɛ̄ɛ̍ yu᷄l nɔ̍lā mbō tɛ̄ɛ̄mbu̍u̍ nyɔ̄ɔ̍ wo̍ cho̍ ko̍ŋ ni̍. Nyɛ̄ kōŋ ō nɔ̄ɔ̄lɛ̍i̍yo̍ o̍ wa᷅ ya̍ Mɛ̄lɛ̄ka̍ o̍ hɔ̄l ni̍.

⁵² Nyɛ̄ kōŋ ō wa̍ o̍ to̍o̍sīāā a̍ kōlā ba̍ā kālā ka̍lā, ō wa̍ nyɛ᷅ chūɛ̄ɛ̄na᷄ŋ cho̍ ō tōōsīāā a̍ yīīŋīī vīsī, ā nɔ̄ mā lōm ndu̍ chi̍li̍kɔ̍, kāni̍ fo̍ndōle̍, yūl kōŋ, yu̍l ta᷅ŋ o̍ nyɔ̄ɔ̍ mbō tɛ̄ɛ̄mbu̍u̍ nyɔ̄ɔ̍ wo̍ cho̍ ko̍ŋ ni̍.

⁵³ “Kɛ̍ tē wānā so̍līāā lāsa̍lāa̍ ō mɛ̄ɛ̄ndi̍a̍ŋ nyɛ᷅ kōŋ pɛ̍, mbō sāālu̍ŋ māā yūl kōŋ ō hīu̍ la̍chi̍ a̍ pɛ̄ŋgɛ̄la᷄ŋndo̍ le̍,

⁵⁴ wānā so̍līāā lāsa̍lāa̍ ō nɔ̄ mbō dīmi̍ mā tɔ̄ɔ̄ nyɛ̄ kōŋ, o̍ ko̍ŋ kɔ̍ɔ̍lī, mbō chu̍a̍ vɛ̄lɛ̄ nyɛ̄ kōŋ mbō kɛ̄si̍ ndu̍ īnɛ̍ te̍ŋge̍le̍ŋ le̍ pālɛ̍i̍ vɛ̄lɛ̄ ī ŋɔ᷄mmɛ̍ū.

⁵⁵ O̍ pāa̍le̍ ŋɔ̍mmɛ̍ūle̍ŋ chōo̍, wānā so̍līāā lāsa̍lāa̍ ō mɛ̄ɛ̄ndi̍a̍ŋ vɛ̍lɛ̄ nyɛ̄ kōŋ. Tē nyɛ̄ kōŋ ō wa̍ wɔ̄ pɛ̍ le̍nde̍ a̍ tɔ̄ɔ̄ nda̍ tɔ̄ɔ̄ ndu̍ ko̍ŋ ndo̍ kpo̍u̍, mbō fēŋa̍ŋ te̍, ā yɔ̍ŋ bɛ̍ɛ̍ mī yūl kōŋ ō hīu̍ la̍chi̍ a̍ pɛ̄ŋgɛ̄la᷄ŋndo̍ le̍, nyɛ̍ kōŋ ō nɔ̄ɔ̄lɛ̍i̍yo̍ o̍ wa᷅ ya̍ hɔ̄l ni̍. Ō wa᷄ o̍ hɔ̄lāā kɛ̄ndīa̍a̍, ō wa̍ o̍ hɔ̄lāā wɔ̄ɔ̍ŋnda̍ nāā kōŋ ō de᷄l o̍ nyɛ̄ kōŋ ni̍ mbo̍ yu᷄l, wānā so̍līāā lāsa̍lāa̍ ō nɔ̄ mbō lōm nyɛ̄ kōŋ chi̍li̍kɔ̍.

⁵⁶ Kɛ̍ tē wānā so̍līāā lāsa̍lāa̍ ō sāālu̍ŋ pɛ̍ māā tɔ̄ɔ̄ nda̍ tɔ̄ɔ̄ nyɛ̄ kōŋ ndo̍ yūl kōŋ ō chūu̍ fa̍ŋa᷄ŋ te̍, nyɛ̄ kōŋ ō wa̍ ya̍u̍ vīsi̍, ō wa̍ nyɛ᷅ cho̍ ō tōōsīāā a̍ kōlā chēle̍ŋ, wānā so̍līāā lāsa̍lāa̍ ō nɔ̄ mbō fāŋa̍ fo̍ndāŋ yūl kōŋ ō chō wo̍ chɛ̍ chɛ̍.

⁵⁷ Kɛ̍ tē yūl kōŋ ō mīīŋgu̍ vɛ̄lɛ̄ o̍ nyɛ̄ kōŋ pɛ̍, mbō wa̍ hīōūwɔ̄ɔ̍ lāchī a̍ pɛ̄ŋgɛ̄la᷄ŋndo̍, ō wa̍ ya̍u̍ vīsi̍, ō wa̍ nyɛ᷅ cho̍ ō tōōsīāā a̍ kōlā chēle̍ŋ, ɔ̄ɔ̄ a̍ fūŋnde̍ ba̍ā kālā ka̍lā, ā nɔ̄ mā lōm nyɛ̄ kōŋ.

⁵⁸ Ndu̍yɛ̍ ā yɔ᷄ŋ bɛ̍ɛ̍ mā tɔ̄ɔ̄ nyɔ̄ɔ̍ mī yūl kōŋ ō fāŋa̍ŋ kpo̍u̍, ā nɔ̄ vɛ̄lɛ̄ mā mīŋgi̍ ndu̍ tɔ̄ɔ̄, ma̍lāŋ o̍ si̍mnūŋ o̍ di̍a̍ndāā ya̍ o̍ hɔ̄l.

⁵⁹ “Nyɛ̄ o̍ nyɛ̍ yu̍l nu̍a̍ā pɛ̍, ō wa᷄ nyɛ̍ chūɛ̄ɛ̄na᷄ŋ cho̍ ō tōōsīāā a̍ fūŋnde̍ ba̍ā kālā ka̍lā, kɛ̄lɛ̄ŋgāā a̍ yīīŋīī sāā, ō wa̍ nyɛ̍ cho̍ ō tōōsīāā a̍ yāu̍ vīsī, sāwāla̍ŋ ndāŋ la̍ŋ la̍ cho̍ le̍ nyɛ̄ wāā le̍nde̍ ni̍. Nɛ̄īla̍ŋ ndāŋ wānā so̍līāā lāsa̍lāa̍ ō lōōkū si̍nā ni̍ tē nyɛ̄ kōŋ ō chō ō dīāndāā ya̍ o̍ hɔ̄l, ɔ̄ɔ̄ tē ō chō ō nɔ̄ɔ̄lɛ̍i̍.”