Lɛ̄vi̍ti̍kɔ̍ɔ̄ 12 - Yāu̍ Mɛ̄lɛ̄ka̍a̍

Tē wānā la̍nɔ̍ɔ̍ vēlū pɛ̍, a̍ mɛ̄ɛ̍ o̍ nɔ̍ le̍ dīndīo̍o̍ sɔ̄lāa̍ Mɛ̄lɛ̄ka̍ o̍ hɔ̄l lɛ̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Chɔ̍m wa᷅ŋnda̍ I̍sɔ̄lūɛ̄ī sāwāla̍ŋ nda᷅ŋ māā, tē wānā la̍nɔ̍ɔ̍ ō chūa̍ yo̍llo̍ pɛ̍, mbo̍ vēlū wānā pɔ̍nɔ̍ɔ̍, wānā la̍nɔ̍ ko̍ŋ le̍ pālɛ̍i̍ ī ŋɔ᷄mmɛ̍ū ō wā o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. To̍fa̍ wɔ̍ ko̍ mɛ̄ɛ̍ ō cha᷅ nu̍a̍ā te̍le̍ŋ ndɔ̄ɔ̍, mbō wa̍ o̍ nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l lɛ̍.

³ Ndūyɛ̍, tē ō vēlū pɛ̍, tē pālɛ̍i̍ ī hīōū pɛ̍ i̍ ŋɔ̍mmɛ̍ū o̍ ŋɔ̄ma̍a̍ wo̍, ā nɔ̄ mā hīvi̍ po̍ o̍ ve̍lū ko̍ŋ ndo̍ o̍ chīɛ̄ī kɔ̄ɔ̄lī.

⁴ O̍ ko̍ŋ kɔ̍ɔ̍lī, wānā la̍nɔ̍ ko̍ŋ ō nɔ̄ mbō chu᷄m le̍ pālɛ̍i̍ be̍le̍-ya̍a̍ a̍ ī yāa̍, kāni̍ fu̍u̍le̍, ō nɔ̄ mbō sɔ̄la̍ dīndīo̍o̍ ya̍ Mɛ̍lɛ̄ka̍ o̍ hɔ̄l le̍ te̍le̍ŋ ndɔ̍ o̍ wa᷅ ko̍ŋ chɔ̍ɔ̍ o̍ vīōlɔ̄ɔ̍ ni᷄ŋ ndo̍. O̍ pālɛ̍i̍ be̍le̍-ya̍a̍ ve̍ he̍ī bɛ̄ŋgu̍ ki̍nɛ̍i̍, nyɛ᷅ o̍ nyɛ̍ cho̍ ō yɔ̄ŋga᷄ŋ o̍ ya̍ Mɛ̍lɛ̄ka̍ lo̍, ō nɔ̍ mbō pīla̍ŋ ndu̍ le̍, kɛ̄lɛ̄ŋgāā ni᷅ŋ te̍, mbō lūɛ̄ī o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ chō a̍ nya̍ la̍tu̍lu̍ wo̍ ni᷄ŋ.

⁵ “Kɛ̍ tē ō wa̍ pɛ̍ māā wānā la̍nɔ̍ɔ̍ o̍ ve̍lū ni̍, le̍ lɔ̍ɔ̍la̍ŋ lā tīɔ̍ɔ̍ŋ ndu̍ ko̍msa̍ ko̍ŋ, o̍ wā o̍ nɔ̍ɔ̍lɛ̍i̍ ya̍ Mɛ̍lɛ̍ka̍ o̍ hɔ̄l. To̍fa̍ wɔ̍ ko̍ mɛ̄ɛ̍ o̍ cha᷅ nu̍a̍ā te̍le̍ŋ ndɔ̄ɔ̍ mbō wa̍ o̍ nɔ̄ɔ̄lɛ̍i̍ ya̍ o̍ hɔ̄l lɛ̍. O̍ ko̍ŋ kɔ̍ɔ̍lī, ndu̍ ko̍msa̍ ko̍ŋ ō nɔ̄ mbō chu᷄m le̍ pālɛ̍i̍ be̍le̍-ŋɔ̍mpu᷅m a̍ ī ŋɔ᷄mpu᷅m, kāni̍ fu̍u̍le̍, ō nɔ̄ mbō sɔ̄la̍ dīndīo̍o̍ ya̍ Mɛ̄lɛ̄ka̍ o̍ hɔ̄l le̍ te̍le̍ŋ ndɔ̍ o̍ che᷅ o̍ vīōlɔ̄ɔ̍ ni᷄ŋ ndo̍.

⁶ “Tē pālɛ̍i̍ ndūɛ̍i̍ o̍ nɔ̍ le̍ chūmndo̍ le̍ dīndīo̍o̍ sɔ̄lāa̍ ve̍ ī chūū pɛ̍, ā yɔ᷄ŋ bɛ̍ɛ̍ āā wānā pɔ̍nɔ̍ɔ̍ kɛ̄lɛ̄ŋgāā wānā la̍nɔ̍ɔ̍ ko̍msa̍ ko̍ŋ ō vēlū ni̍, ō nɔ̄ mbō hīŋ a̍ sāa̍ fɔ̍ŋndɔ̍ chi̍i̍ wɔ̄sīo̍o̍ o̍ pīlɛ̍ wo̍ nāa̍ wānā so̍līāā lāsa̍lāa̍ chūā, o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ sōndōo̍, le̍ sa̍lā lūāmāa̍ sōlīo̍o̍. O̍ ko̍ŋ kɔ̍ɔ̍lī, mbō hīŋ vɛ̄lɛ̄ a̍ pīīŋ fɔ̍ŋndɔ̍ɔ̍, ɔ̄ɔ̄ ka᷅ŋgbo̍o̍, le̍ sa̍la̍ fa̍ŋā yɔ̍ŋ wɔ̄ɔ̍ŋndo̍ wo̍ sōlīo̍o̍.

⁷ O̍ ko̍ŋ, mī wānā so̍līāā lāsa̍lāa̍ ō sōli̍ nyāa̍ ha̍ā sa̍lāa̍ o̍ ya̍ lo̍, le̍ mī ko̍msa̍ kōŋ ō sɔ̄la̍ dīndīo̍o̍ ya̍ Mɛ̄lɛ̄ka̍ o̍ hɔ̄l. Ndu̍yɛ̍ mbō sīmnu᷄ŋ vɛ̍lɛ̄ o̍ di̍a̍ndāā le̍ te̍le̍ŋ ndɔ̍ o̍ che᷅ ko̍ŋ o̍ vīōlɔ̄ɔ̍ ni᷄ŋ ndo̍. Sāwāla̍ŋ nda᷅ŋ la̍ cho̍ le̍ wānā la̍nɔ̍ɔ̍ ni̍, tē ō vēlū wa̍nā pɔ̍nɔ̍ɔ̍ kɛ̄lɛ̄ŋgāā wānā la̍nɔ̍ɔ̍ pɛ̍.

⁸ Kɛ̍ tē chūa̍a̍ ho̍ō ō nɔ̄la̍ dɔ̍ɔ̍ sāā fɔ̍ŋndɔ̍ɔ̍ sɔ̄lā kpo̍so̍ŋ te̍, ō hūŋ vɛ̍lɛ̄ a̍ pīīŋāā chūāūwa̍ ā ŋīɔ̍ɔ̍ŋ kɛ̄lɛ̄ŋgāā ka᷅ŋgbu̍a̍a̍ ā ŋīɔ̍ɔ̍ŋ. Ō pīlɛ̍ le̍ sa̍lā lūāmāa̍ sōlīo̍o̍, ā ō pīlɛ̍ le̍ sa̍lā fa̍ŋā yɔ̍ŋ wɔ̄ɔ̍ŋndo̍ wo̍. Mɛ̍ɛ̄ o̍ nɛ̄īyo̍ ho̍ō ni᷄ŋ, wānā so̍līāā lāsa̍lāa̍ ō dīndī chūa̍a̍ ho̍ō ya̍ Mɛ̄lɛ̄ka̍ o̍ hɔ̄l ni̍.”