Lɛ̄vi̍ti̍kɔ̍ɔ̄ 11 - Yāu̍ Mɛ̄lɛ̄ka̍a̍

A̍ nyāā yōōmāā Mɛ̄lɛ̄ka̍ dīmi̍ māā wānā di̍ā wa̍ o̍kɔ̄ɔ̄

¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

² “Lā dīmu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ di̍mi̍ a̍a̍, ‘Nyāā yōōmāa̍ ki̍nɛ̍i̍, chɔ̄lū ni̍, vīsī yōndō ni̍, a̍ nya̍ nɔ̄ mī lā dē wa̍ nda̍ cho̍ ha̍ā ni̍.

³ Vīsī o̍ vīsi̍ nɔ̍ pɛ̍ bu̍u̍kōo̍ ō tɛ̄ndāā, ndu̍yɛ̍ mbō dē bīllo̍ mbō kpūku̍la̍ pɛ̍, lā dīā ko̍ŋ.

⁴ Kɛ̄ɛ̍ŋa̍a̍ ba̍ndi̍la̍a̍ ā nɔ̄ būūkūla̍ŋ lā tɛ̄ɛ̄ndīāā, kɛ̍ ā di᷅ nyɛ̍ dīāā mā kpūku̍la̍ le̍. Ā pūm yɛ̍ mā dē mā kpūku̍la̍ kɛ̍, ā nɔ̍ bu̍u̍kūla̍ tɛ̍ɛ̍ndīāā le̍. Vīsīāā wāā le̍nde̍ ki̍nɛ̍i̍, lā di̍ā ka̍ŋ te̍. Nyɔ̍mi̍a̍a̍ ā dīā bi᷅llo̍ mā kpūku̍la̍, kɛ̍ ā nɔ̍ bu̍u̍kūla̍ tɛ̍ɛ̍ndīāā le̍. Le̍la̍ŋ lā nɔ̍ mī lā dē nda̍ le̍, kāni̍ fo̍ndōle̍, chɔ̄lūa̍a̍ cho̍ ā nɔ̄ɔ̄lɛ̍i̍ le̍ nya̍ wa̍ nda̍ chō ni̍.

⁵ O̍ ko̍ŋ kɔ̍ɔ̍lī, kɛ̍ɛ̍ŋa̍a̍ ba̍ndi̍la̍a̍ ā dīā bi᷅llo̍ mā kpūku̍la̍, kɛ̍ ā nɔ̍ bu̍u̍kūla̍ tɛ̍ɛ̍ndīāā le̍. Nda̍ bɛ̍ɛ̍ vīsīa̍a̍ cho̍ ā nɔ̄ɔ̄lɛ̍i̍ le̍ nya̍ wa̍ nda̍ chō ni̍.

⁶ Sa̍ŋnda̍ bɛ̍ɛ̍ mā dē bīllo̍ mā kpūku̍la̍, kɛ̍ ā nɔ̍ bu̍u̍kūla̍ tɛ̍ɛ̍ndīāā le̍. Nda̍ bɛ̍ɛ̍ vīsīa̍a̍ cho̍ ā nɔ̄ɔ̄lɛ̍i̍ le̍ nya̍ wa̍ nda̍ chō ni̍.

⁷ O̍ ko̍ŋ kɔ̍ɔ̍lī, pēūwo̍ ō nɔ̄ būūkūla̍ŋ lā tɛ̄ndāā kpa̍la̍, kɛ̍ ō di᷅ nyɛ̍ dīāā mbō kpūku̍la̍ le̍. Ndu̍ bɛ̍ɛ̍ chɔ̄lu̍ cho̍ ō nɔ̄ɔ̄lɛ̍i̍ le̍ nya̍ wo̍ o̍ cho̍ ni̍.

⁸ Vīsīa̍a̍ ha̍ā ki̍nɛ̍i̍, lā di̍ā nda̍ le̍, kɛ̄lɛ̄ŋgāāle̍ mī lā pīla̍ŋ bɛ̍ɛ̍ nda̍ ā vīlɛ̍i̍ya̍, kāni̍ fo̍ndōle̍, vīsīa̍a̍ cho̍ ā nɔ̄ɔ̄lɛ̍i̍ le̍ nya̍ wa̍ nda̍ chō ni̍.

⁹ “ ‘O̍ ko̍ŋ kɔ̍ɔ̍lī, nyāā yōōmāa̍ o̍ pēēlo̍ ki̍nɛ̍i̍, ō kɛ᷅ ō kɛ᷅ nɔ̍ pɛ̄ɛ̄pɔ̍ŋ a̍ kɛ̄kɛ̍u̍la̍ŋ, ō wa̍ o̍ pēē mɛ̄ŋmā īhɛ᷄llo̍ ni᷄ŋ ni̍, o̍ wa̍ o̍ pēēla̍ chēle̍ŋ nda̍ŋ ni᷄ŋ ni̍, lā dīā ka̍ŋ.

¹⁰ Kɛ̍ nyɛ̄ o̍ nyɛ̄ yōōmāa̍ cho̍ o̍ pēē mɛ̄ŋmā īhɛ᷄llo̍ ni᷄ŋ, a̍ pēēla̍ chēle̍ŋ nda̍ŋ, a̍ nɔ̍ ŋ̄pɛ̍ɛ̄pɛ̍ ndu̍yɛ̍ a̍ lākɛ̄kɛ̍u̍ le̍ wa̍, nyāā yōōmāa̍ ke̍lā o̍ mɛ̄ŋnda̍ŋ ni᷄ŋ nda̍ ni̍, a̍ nyāā yōōmāa̍ cho̍ o̍ pēēlo̍ mā sāānā wa̍, lā di̍ā nda̍ le̍. Lā nɔ̄ mī lā chūa̍ nda̍ māā nyɛ̄ nɔ̄ɔ̄lɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū nda̍ cho̍ le̍ nya̍ ni̍.

¹¹ Lā di̍ā nda̍ le̍, kɛ̄lɛ̄ŋgāā le̍ mī lā pīla̍ŋ nda̍ bɛ̍ɛ̍ a̍ vi̍lɛ̍i̍ya̍. Lā nɔ̄ mī la̍ chūa̍ nyāā yōōmāa̍ ha̍ā māā nyɛ̄ nɔ̄ɔ̄lɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū nda̍ chō le̍ nya̍ ni̍.

¹² Nyɛ̄ o̍ nyɛ̄ yōōmāa̍ cho̍ o̍ pēēlo̍ te̍ ō nɔ̍ pɛ̍ɛ̄pɔ̍ŋ mbō nɔ̄ kɛ̄kɛ̍u̍la̍ŋ te̍, nyɛ̄ nɔ̄ɔ̄lɛ̍i̍ wɔ̍ɔ̍ŋ wɔ̍ɔ̍ŋ bɛ̄ndōo̍ o̍ cho̍ le̍ nya̍ ni̍.

^13-19 “ ‘O̍ ko̍ŋ kɔ̍ɔ̍lī, yōūwa̍ ha̍ā ki̍nɛ̍i̍, nda̍ bɛ̍ɛ̍ lā di̍ā nda̍ le̍. Lā chūa̍ nda̍ māā nyɛ̄ nɔ̄ɔ̄lɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū nda̍ chō le̍ nya̍ ni̍. Ā cho̍ yo̍u̍wāā wānā de᷅ le̍. Nda̍ yɔ̍nūŋ ni̍ māā kōvi̍a̍a̍, a̍ hu̍a̍a̍, a̍ kōya᷄ŋnda̍, a̍ fa̍a̍būa̍a̍, a̍ si̍ŋgbīa̍a̍, a̍ yi̍bɛ̍i̍ya̍, a̍ bāsa̍bāsa̍kūēndi̍a̍a̍, a̍ ɔ̍si̍lu̍i̍chīi̍ya̍, a̍ hɔ̄lɔ̍hɔ̄lu̍a̍a̍, a̍ sɔ̍kūa̍a̍, a̍ hɛ̍lɔ̄ŋnda̍, a̍ pɛ̍li̍kāŋnda̍, a̍ lɛ̄fɛ̄ŋnda̍, a̍ kɔ̍mɔ̍lūāŋnda̍, a̍ ku̍a̍āŋnda̍, a̍ tāsa̍a̍.

²⁰ “ ‘O̍ ko̍ŋ kɔ̍ɔ̍lī, nyāā yōōmāa̍ nɔ̍ bɔ̄ɔ̄la̍ŋ ndu̍yɛ̍ mā kūā lɛ᷅ŋ nda̍, nda̍ bɛ̍ɛ̍ lā nɔ̍ mī lā dē nda̍ le̍, lā nɔ̍ mī lā chūa̍ nda̍ māā nyɛ̄ nɔ̄ɔ̄lɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū nda̍ chō le̍ nya̍ ni̍.

²¹ Kɛ̍ nyāā yōōmāa̍ nɔ̍ ha̍ā bɔ̄ɔ̄la̍ŋ mā kūā lɛ᷅ŋ, ma̍ nɔ̄ kpāsa᷄ŋ mā hūūlū wa̍, lā dīā ka̍ŋ.

²² Nyāā yōōmāā kāŋ nda̍ cho̍ ha̍ā ni̍. So̍o̍nu̍a̍a̍, a̍ pa̍a̍le̍e̍nda̍, a̍ kāmbālla̍.

²³ Kɛ̄ nyāā yōōmāa̍ nɔ̍ bɔ̄ɔ̄la̍ŋ ndu̍yɛ̍ mā kūā lɛ᷅ŋ nda̍ a̍ tūa̍a̍ ā pīli̍a̍a̍ ki̍nɛ̍i̍, lā nɔ̄ mī la̍ chu̍a̍ nda̍ māā nyɛ̄ nɔ̄ɔ̄lɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū nda̍ chō le̍ nya̍ ni̍.’ ”

²⁴ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Nyāā yōōmāa̍ ha̍ā ki̍nɛ̍i̍, ō pīlɛ̍ bɛ̍ɛ̍ wānā pi̍la̍ŋ o̍ vi̍lɛ̍i̍yo̍ pɛ̍, ā sīmnu᷄ŋ o̍ nɔ̍ɔ̍lɛ̍i̍ ya̍ o̍ hɔ̄l le̍ pāa̍le̍ le̍ŋ kpɛ᷅ŋ, ha̍a̍a̍ mī fīti̍līo̍o̍ tōl.

²⁵ O̍ pīlɛ̍ bɛ̍ɛ̍ vi᷅ pɛ̍ mi̍ wāŋndo̍ ō chu̍a̍ ndu̍, wānā ko̍ŋ mɛ̄ɛ̍ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

²⁶ Vīsī o̍ vīsi̍ nɔ̍ pɛ̍ bu̍u̍kōo̍ ō tɛ̄ndāā kɛ̍ mī būūkū ko̍ŋ ō fūūlu̍u̍ a̍ tɛ̄ndāa̍ di̍ le̍, ndu̍yɛ̍ mī vīsī kōŋ ō ve̍ vi̍sī kpu̍ku̍la̍ mbō tīāāmu̍u̍ le̍, mɛ̄ɛ̍ nyɛ̄ nɔ̄ɔ̄lɛ̍i̍yo̍ o̍ cho̍ le̍ nya̍ ni̍. Ndu̍yɛ̍, wānā o̍ wāna̍ pi̍la̍ŋ vi̍sī wāā le̍nde̍ o̍ vi̍lɛ̍i̍yo̍ pɛ̍, ō sīmnu᷄ŋ o̍ nɔ̍ɔ̍lɛ̍i̍.

²⁷ Vīsī o̍ vīsi̍ nɔ̍ pēlo̍ŋ ŋ̄ hīɔ̍ɔ̍lu̍ mbō kūā o̍ bālā kɔ̄lta̍ŋ chōo̍, nyɛ̄ nɔ̄ɔ̄lɛ̍i̍yo̍ o̍ cho̍ le̍ nya̍ ni̍. Wānā o̍ wānā pi̍la̍ŋ vi̍sī wāā le̍nde̍ o̍ vi̍lɛ̍i̍yo̍ pɛ̍, pāa̍le̍ le̍ŋ kpɛ᷅ŋ, ō nɔ̄ɔ̄lɛ̍i̍ wānā ko̍ŋ nīīlū ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

²⁸ Vīsīa̍a̍ ha̍ā ki̍nɛ̍i̍, nyɛ̄ nɔ̄ɔ̄lɛ̍i̍yo̍ nda̍ chō le̍ nya̍ ni̍. Wānā o̍ wānā pi̍la̍ŋ nda̍ ā vīlɛ̍i̍ya̍ pɛ̍, wānā ko̍ŋ mɛ̄ɛ̍ mbō tɔ̄ɔ̄ nyɛ̄la̍ wa᷅ ndu̍ lēkɔ̄ɔ̍ la̍ŋ, ndu̍yɛ̍ pāa̍le̍ le̍ŋ kpɛ᷅ŋ ō nɔ̄ɔ̄lɛ̍i̍ wānā ko̍ŋ ō nīīlū ya̍ Mɛ̍lɛ̄ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl.”

^29-30 O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Bɛ̄lāā su̍u̍la̍ yɛ̍ yi̍a̍a̍ ki̍nɛ̍i̍, a̍ nyāā yōōmāā su̍u̍la̍ yɛ̍ yi̍a̍a̍ ku̍ā lɛ᷅ŋ ŋa̍a̍yā ŋāāyā wa̍, nda̍ yɔ̍nūŋ ni̍ māā kpo̍o̍sīa̍a̍, a̍ nyāŋga̍fe̍li̍a̍a̍, a̍ kūīya̍, nda̍ ki̍nɛ̍i̍ nyɛ̄ nɔ̄ɔ̄lɛ̍i̍yo̍ nda̍ chō le̍ nya̍ ni̍.

³¹ Nyāā yōōmāa̍ ku̍ā ka̍ŋ lɛ᷅ŋ ŋa̍a̍yā ŋāāyā wa̍ ki̍nɛ̍i̍, nyɛ̄ nɔ̄ɔ̄lɛ̍i̍yo̍ nda̍ chō le̍ nya̍ ni̍. Wānā o̍ wānā pi̍la̍ŋ nda̍ ā vīlɛ̍i̍ya̍ pɛ̍, wānā ko̍ŋ pāa̍le̍ le̍ŋ kpɛ᷅ŋ, ō nɔ̄ɔ̄lɛ̍i̍yo̍ o̍ nīīlū ya̍ Mɛ̍lɛ̍ka̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

³² Nyāā yōōmāa̍ ha̍ā ki̍nɛ̍i̍, ō kɛ̄ o̍ kɛ᷅, tē ō vīlɛ̍i̍yo̍ ō de᷄l o̍ nyɛ̄ o̍ nyɛ̄ chōo̍ pɛ̍, nyɛ̄ kōŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̄lɛ̄ka̍ o̍ hɔ̄l. Nyɛ̄ kōŋ ō wa̍ yɔ̍m, ō wa̍ do᷅mā, ō wa̍ yāu̍ vīsī, ō wa̍ o̍ nyɛ̄lā lābɛ̍kī chōo̍, ndu̍yɛ̍ nyɛ̄ kōŋ ō wa̍ bɛ̍ɛ̍ le̍ kpe̍ku̍ o̍ kpe̍ku̍, lā nɔ̄ mī lā tɔ̄ɔ̄ ndu̍ a̍ mɛ̄ŋnda̍ŋ. Kɛ̍ nyɛ̄ kōŋ le̍ pāa̍le̍ŋ kpɛ᷅ŋ, ō wā o̍ nɔ̍ɔ̍lɛ̍i̍yo̍ ya̍ Mɛ̄lɛ̄ka̍ o̍ hɔ̄l, ha̍a̍a̍ mī fīti̍līo̍o̍ tōl, ma̍lāŋ o̍ si̍mnūŋ vɛ̍lɛ̄ ō dīāndāā ya̍ o̍ hɔ̄l.

³³ Tē o̍ kpɛ̍ɛ̍nɛ̍i̍ pūūlūe̍i̍ ni᷄ŋ nyāā yōōmāa̍ ha̍ā ō pīlɛ̍ de᷄l ni̍, nyɛ̄ o̍ nyɛ̍ wa᷅ o̍ kpɛ̍ɛ̍nɛ̍i̍ ke̍ŋ ni᷄ŋ, o̍ si̍mnūŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ lā nɔ̄ mī lā pɛ̄l kpɛ̍ɛ̍nɛ̍i̍ ke̍ŋ.

³⁴ Tē mɛ̄ŋnda̍ŋ mā wa̍ o̍ kpɛ̍ɛ̍nɛ̍i̍ he̍ī ni᷄ŋ pɛ̍, mī mā de᷄l o̍ nyɛ̄ dīāā o̍ nyɛ̄ dīāā bɛ̍nda̍ le̍ dīo̍o̍ wo̍ chōo̍ pɛ̍, nyɛ̄ dīāā kōŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ vɛ̍lɛ̄ nyɛ̄ o̍ nyɛ̄ wa̍ o̍ kpɛ̍ɛ̍nɛ̍i̍ he̍ī ni᷄ŋ pɛ̍, mbō wa̍ māā nyɛ̄ wānā ko̍l pɛ̍, nyɛ̄ kōŋ bɛ̍ɛ̍ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

³⁵ Nyāā ha̍ā, tē ō vīlɛ̍i̍yo̍ ō de᷄l o̍ nyɛ̄ o̍ nyɛ̄ chōo̍ pɛ̍, nyɛ̄ kōŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Tē ō nyɛ̄ nda̍ tōōsīāā bēe̍dīi̍yo̍ wo̍ cho̍o̍ o̍ de̍l ni̍, kɛ̄lɛ̄ŋgāā tē o̍ kpɛ̍ɛ̍nɛ̍i̍ ya̍u̍vɛ̄i̍ ni᷄ŋ o̍ de̍l ni̍, nyɛ̄ ko̍ŋ, ā nɔ̄ mā pɛ̄l ndu̍ wɔ̍ wɔ̍. Kāni̍ fo̍ndōle̍, nyɛ̄ o̍ nyɛ̄, nyɛ̄ vīlɛ̍i̍ ko̍ŋ ō de᷄l chōo̍ pɛ̍, ō sīmnu᷄ŋ o̍ nɔ̄ɔ̄lɛ̍i̍ ya̍ o̍ hɔ̄l, ndu̍yɛ̍ mī lā chu̍a̍ ndu̍ māā nyɛ̄ nɔ̄ɔ̄lɛ̍i̍yo̍ o̍ cho̍ le̍ nya̍ ni̍.

³⁶ Kɛ̍ tē o̍ pēē pɔ̍mbɔ̄ɔ̍, kɛ̄lɛ̄ŋgāā o̍ so̍o̍ŋ ku̍a̍ndāā māmɛ̄ŋndo̍ ni᷄ŋ nyɛ̄ vīlɛ̍i̍ ko̍ŋ ō de᷄l ni̍, mɛ̄ŋnda̍ŋ o̍ pēē ko̍ŋ kɛ̄lɛ̄ŋgāā o̍ so̍o̍ŋ māmɛ̄ŋ kōŋ mā si̍mnūŋ ma̍ nɔ̍ɔ̍lɛ̍i̍ ya̍ o̍ hɔ̄l te̍. Kɛ̍ wānā o̍ wāna̍ so̍li̍ nyɛ̄ vīlɛ̍i̍ ko̍ŋ o̍ pēē ko̍ŋ, kɛ̄lɛ̄ŋgāā o̍ so̍o̍ŋ ko̍ŋ ni᷄ŋ pɛ̍, wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l.

³⁷ Kɛ̍ tē ō wa̍ pɛ̍, māā o̍ yɛ̄yi̍i̍ wāŋndo̍ ō kɛ̄si̍ le̍ sāŋɔ̄ɔ̍ ve̍ chōo̍ nyɛ̄ vīlɛ̍i̍yo̍ ō de᷄l ni̍, yɛ̄yi̍i̍ ke̍ŋ ī si̍mnūŋ i̍ nɔ̍ɔ̍lɛ̍i̍ ya̍ o̍ hɔ̄l te̍.

³⁸ Kɛ̍ tē ō wa̍ pɛ̍ mī yɛ̄i̍ye̍ he̍ī ī wa̍ ī līvɛ̍i̍ye̍, o̍ ko̍ŋ mī nyɛ̄ vīlɛ̍i̍ ko̍ŋ ō de᷄l lēchōo̍ pɛ̍, mɛ̄ɛ̍ yɛ̄yi̍i̍ ke̍ŋ ī sīmnu᷄ŋ i̍ nɔ̍ɔ̍lɛ̍i̍ le̍ nya̍.”

³⁹ Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Tē ō wa̍ pɛ̍ mi̍ vīsīāā ya̍ Ī di̍mu̍l nya̍ ha̍ā ki̍nɛ̍i̍ le̍ dīo̍o̍ wa̍, mī ō pīlɛ̍ vī o̍ bā chōo̍ pɛ̍, wānā o̍ wāna̍ pi̍la̍ŋ vi̍sī vīlɛ̍i̍ ko̍ŋ pɛ̍, wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̍ka̍ o̍ hɔ̄l le̍ pāa̍le̍ le̍ŋ kpɛ᷅ŋ, ha̍a̍a̍ mī fīti̍līo̍o̍ tōl.

⁴⁰ Wānā o̍ wāna̍ chu̍a̍ vīsī vīlɛ̍i̍ ko̍ŋ kɛ̄lɛ̄ŋgāā mbō dē ndu̍ pɛ̍, wānā ko̍ŋ ō nɔ̄ mbō tɔ̄ɔ̄ nyɛ̄la̍ wa̍ ndu̍ la̍ŋ lēkɔ̄ɔ̍ la̍ŋ. Ndu̍yɛ̍ pāa̍le̍ le̍ŋ kpɛ᷅ŋ, ō nɔ̄ɔ̄lɛ̍i̍ wānā ko̍ŋ ō nīīlū ya̍ o̍ hɔ̄l ni̍, ha̍a̍a̍ mī fīti̍līo̍o̍ tōl.

^41-42 “Nyāā yōōmāa̍ sa̍sūŋ ha̍ā lɛ̄ŋ nda̍ ki̍nɛ̍i̍, a̍ nyāā yōōmāa̍ ku̍ā o̍ dēmbōo̍ chōo̍ wa̍, a̍ nyāā yōōmāa̍ nɔ̍ pēlo̍ŋ ta̍u̍ mā kūā le̍cho̍o̍ kɛ̍ sɔ̍ŋgɔ̍ sāsɔ᷄ŋndo̍ wa̍, lā nɔ̍ mī lā dē nda̍ le̍, kāni̍ fo̍ndōle̍, nyɛ̄ nɔ̄ɔ̄lɛ̍i̍yo̍ nda̍ chō le̍ nya̍ ni̍.

⁴³ Lā to̍sā mī nyāā yōōmāa̍ ha̍ā ā sīīŋgu̍u̍ nya̍ ā nɔ̄ɔ̄lɛ̍i̍ ya̍ Mɛ̍lɛ̍ka̍ o̍ hɔ̄l te̍. Lā si̍i̍ŋgūū nya̍ pi̍la̍ ā nɔ̄ɔ̄lɛ̍i̍ ya̍ o̍ hɔ̄l le̍ sa̍bū ndāa̍ le̍.

⁴⁴ Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ nyāa̍ ni̍. Lā ki̍ndi̍ mī lā dīndi̍ nya̍ pi̍la̍, mī lā wa̍ ā dīāndāā ya̍ o̍ hɔ̄l, kāni̍ fo̍ndōle̍, Mɛ̄lɛ̄ka̍ dīāndāa̍ ya̍ I̍ cho̍ ni̍. Nyāā yōōmāa̍ sa̍sūŋ ha̍ā lɛ̄ŋ kɛ̄lɛ̄ŋgāā mā kūā lɛ᷅ŋ o̍ pēlo̍ŋ chōo̍ kɛ̍ sɔ̍ŋgɔ̍ sāsɔ᷄ŋndo̍ wa̍, lā chɛ᷅l mī nyāā ha̍ā ā sīīŋgu̍u̍ nya̍ ā nɔ̄ɔ̄lɛ̍i̍ ya̍ o̍ hɔ̄l te̍.

⁴⁵ Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍, mi̍ hu᷅ŋ a̍ nya̍ le̍ mī hu̍ŋ wa᷅ Mɛ̄lɛ̄ka̍ nyā. Le̍la̍ŋ lā kīndi̍ mī lā wa̍ ā dīāndāā, kāni̍ fo̍ndōle̍, ya̍ Mɛ̍lɛ̄ka̍, wānā di̍a̍ndāa̍ ya̍ I̍ cho̍ ni̍.

⁴⁶ “Sāwāla̍ŋ nda᷅ŋ, la̍ŋ ya̍ I̍ ke̍ nya̍ a̍ nyāā yōōmāā yɛ̍ yi̍a̍a̍ ha̍ā o̍kɔ̄ɔ̄ ni̍. Nda̍ yɔ̍nūŋ ni̍ māā, vīsīa̍a̍, a̍ yōūwa̍, a̍ nyāā yōōmāa̍ cho̍ o̍ pēēla̍ŋ nda̍, ndu̍yɛ̍, a̍ nyāā yōōmāa̍ sa̍sūŋ lɛ᷅ŋ kɛ̄lɛ̄ŋgāā mā kūā kɛ̍ sɔ̍ŋgɔ̍ sāsɔ᷄ŋndo̍ wa̍.

⁴⁷ Lā kīndi̍ mī lā sīna̍ yɛ̍ yi̍ɔ̍ɔ̍ nyāā yōōmāa̍ ha̍ā tɛ̄ɛ̄ŋ, a̍ cho̍ ā dīāndāā ya̍ Mɛ̍lɛ̄ka̍ o̍ hɔ̄l la̍, a̍ a̍ cho̍ a̍ di̍a̍ndāā ya̍ o̍ hɔ̄l te̍ wa̍. Ndu̍yɛ̍, mī lā sīna̍ vɛ̄lɛ̄ yɛ̍ yi̍ɔ̍ɔ̍ a̍ bɛ̍nda̍ le̍ dīo̍o̍ wa̍ tɛ̄ɛ̄ŋ, a̍ a̍ bɛ̍nda̍ le̍ di̍o̍o̍ le̍ wa̍.”