Cha᷄ŋ Īmɔ̍nɛ̍ Chɛ̄lūīma̍yā Wo̍ 3 - Yāu̍ Mɛ̄lɛ̄ka̍a̍

Dɛ̍nɛ̍ pa̍lāa̍, a̍ mūli᷄ŋndo̍, a̍ tīīnda᷄ŋndo̍ nɔ̄ɔ̍ o̍kɔ̄ɔ̄

¹ Ya̍ che᷅ dɛ̍nɛ̍ pa̍lāā Mɛ̄lɛ̄ka̍ ō tūsī wa̍nā cho̍o̍ tē ō dɔ̄ɔ̄nu᷄ŋ tu̍mbe̍ pɛ̍ wo̍ ni̍.

² Mɛ̄lɛ̄ka̍ lo̍ o̍ ko̍ŋ, mbo̍ nyīndū ya̍ o̍ nyūmmā tīŋgīsi̍ma̍ bɛ̍ndūa̍ŋ ni᷄ŋ, nāa̍ ya̍ I̍ chi᷅ nyɛ᷅ wa̍wo̍ŋndo̍ pu̍e̍e̍ŋ bɛ̍ɛ̍ le̍ wa̍.

³ Mūlu̍la᷅ŋndo̍ kpe̍e̍kpe̍i̍ o̍ mu̍lu̍la᷅ŋ ya̍ ni̍, mbō kpēsēlā ya̍ nyɛ̄ pālāa̍ tūsīo̍o̍ chōo̍, kīōlū kɔ̄ɔ̄lī bɛ̍ɛ̍.

⁴ Ō tōsa̍ mi̍ dīāllo̍ŋ ŋ̄ chūū ya̍, mi̍ nya̍ū sɛ̍ɛ̍ŋ, ndu̍yɛ̍ mbo̍ yīmī ya̍ pāāla̍ŋ me̍ŋgēle᷄ŋ.

⁵ Ō tōsa̍ mi̍ yōōmū nūu̍ wā o̍ kpɔ̍kɔ̍si̍ bɛ̍ndōo̍ ni᷄ŋ, a̍ nyɛ̄ pālāa̍ a̍ kɔ̄l tāmbɛ̍i̍yo̍, mɛ̄ɛ̍ wāŋndo̍ ō wā nu̍a̍ā o̍ chīɛ̄ī mānyūmndo̍ ni᷄ŋ yɛ̍.

⁶ Ō tōsa̍ mi̍ wa᷅ o̍ nyūmmā tīŋgīsi̍a̍ŋ ni᷄ŋ, mɛ̄ɛ̍ wānāa̍ vi᷅ ni᷅ŋ sīndɛ̄ pa̍ wa̍ ā chō o̍ nyūmnda̍ŋ ni᷄ŋ yɛ̍.

⁷ Ō dɔ̄ū ya̍ o̍ pi̍ŋndo̍ ni᷄ŋ kpɔ̍kɔ̍su̍, Ī nɔ̍lā mī hɛ̍lu᷄ŋ te̍. Ō dɔ̄ū ya̍ o̍ yɔ̄lɔ̄ŋ lu̍su̍lɛ̍ŋ bɛ̍ndo᷄ŋ.

⁸ I̍ pi̍ɛ̍i̍ ndu̍ bɛ̍ɛ̍ mī ko̍ŋgu̍l nāa̍ ndu̍ chu̍a̍, ō ye᷅ŋ ya̍ bɛ̍ɛ̍ la̍ni̍ le̍.

⁹ Ō hāu̍ ya̍ nɛ̄īyo̍ lāchī a̍ pōūta̍ŋ, I̍ nɔ̍lā mī hi̍o̍ū le̍. Ō tūūndu̍u̍ ya̍ nɛ̄īyo̍ lāchī kɔ̍ŋgɔ̄di̍ kɔ̍ŋgɔ̄di̍.

¹⁰ Mɛ̄ɛ̍ su̍lu̍ko̍o̍ o̍ hīnī nu̍a̍ā vīsīo̍o̍ mɛ̄ŋgɛ̄lāa̍ yɛ̍, le̍nde̍ o̍ cho̍ ya̍ mɛ̄ŋgɛ̄lāa̍ ni̍. Mɛ̄ɛ̍ kpɔ̍kūŋndo̍ ō wā nu̍a̍ā ō vīāŋna᷄ŋ le̍ vīsīo̍o̍ mɛ̄ŋgɛ̄lāa̍ yɛ̍, le̍nde̍ o̍ cho̍ ya̍ hɔ̄lte̍ŋ kɔ̄ɔ̄lī ni̍.

¹¹ Ō tōū ya̍ mbo̍ fāŋā ya̍ o̍ nɛ̄i̍, ndu̍yɛ̍ mbo̍ sɛ̄ɛ̄sīāā ya̍, mbo̍ māl la̍ le̍nde̍ wānā o̍ wānā cho̍ mbō māla̍ ya̍ le̍.

¹² Ō bɛ̄ɛ̄ndīa̍a̍ chīɔ̄ū ndɔ̄ɔ̍, ndu̍yɛ̍ mbo̍ kīndū chīŋɔ̍le̍ ndɔ̄le̍ŋ tu̍a̍ŋ, lē ya̍ vīɔ̍ɔ̍.

¹³ Ō vɛ̄ ya̍ a̍ chīŋɔ̍ma̍ ndūa̍a̍ŋ, ndu̍yɛ̍ mi̍ mā lūɛ̄ī ya̍ o̍ kɔ̄llo̍ di̍.

¹⁴ I̍ si̍mnu᷄ŋ ni᷅ŋ nyɛ̄ māmāā wāŋnda̍ o̍ hɔ̄l. Wāŋnda̍ nīīlōo̍ ya̍ māmɔ̄ɔ̍ kpɛ᷅ŋ o̍ chōndo̍ŋ ni᷄ŋ.

¹⁵ Ō pēi̍ ya̍ a̍ kɔ̄l tāmbɛ̍i̍ bɛ̍ndōo̍, ndu̍yɛ̍ mbo̍ kē ya̍ tāāla̍ nyɛ̄ lōlɛ̍i̍yo̍ le̍ mī ko̍l.

¹⁶ Ō ma᷄l la̍ lɛ̄ŋ o̍ chu̍ndo̍o̍ ni᷄ŋ, mbo̍ tōsā mi̍ su̍ām tɛ̍nɔ̍ŋ.

¹⁷ I̍ si̍nā lɛ̍ bɛ̍ɛ̍ nyɛ̍ cho̍ kɔ̄l nyūlōo̍ wo̍ o̍ yōōmū nūu̍ ni᷄ŋ te̍. I̍ pu̍ɛ̍ɛ̍nu̍ŋ ni᷅ŋ a̍ nyɛ᷄ cho̍ kɔ̄l kɛ̄ndɔ̄ɔ̍ wo̍.

¹⁸ Le̍ he̍ī, mi̍ di̍mī a̍a̍, “Bɛ̄ɛ̄le̍ nīle̍ŋ lē chūū. Nyɛ̄ o̍ nyɛ̄ ya̍ I̍ wa̍ lēhɔ̄l o̍ nɛ̄ī le̍ sɔ̄lāa̍ Mɛ̄lɛ̄ka̍ Ya̍a̍wɛ̄ɛ̄ o̍ bā, I̍ sɔ̍lā lɛ̍ ni̍ŋ ndu̍ le̍.”

¹⁹ Tē I̍ lo̍o̍nu̍ŋ pɛ̍ a̍ sāŋga̍ cho̍ ya̍ chōo̍ wo̍, ndu̍yɛ̍ mī yi̍ya̍ŋ a̍ mɛ̄ɛ̍ ya̍ I̍ nɔ̍ lɛ̍ nāa̍ cha̍lāā le̍ yɛ̍ pɛ̍, mɛ̄ɛ̍ wāŋndo̍ ō wā nu̍a̍ā nyɛ̄ lōlɛ̍i̍ bɛ̍ndōo̍ kōlɔ̄ɔ̍ yɛ̍, le̍nde̍ ya̍ I̍ si̍nāŋ ni̍.

²⁰ Ndu̍yɛ̍ a̍ ndi̍ o̍kɔ̄ɔ̄ su̍e̍e̍ ya̍ I̍ cho̍ yīya᷄ŋndo̍ le̍ te̍le̍ŋ o̍ te̍le̍ŋ ni̍. Kɔ̄l nūu̍ ō tāmbu̍ ō bɔ̄ɔ̍.

²¹ Kɛ̍ ndu̍yɛ̍ te̍le̍ŋ o̍ te̍le̍ŋ tē I̍ yi̍ya̍ŋ a̍ nyɛ᷄ di̍mi̍ŋ ho̍ō wo̍ pɛ̍, I̍ sɔ̍la̍ tīīnda᷄ŋndo̍.

²² Mɛ̄lɛ̄ka̍ Ya̍a̍wɛ̄ɛ̄ kāālā ndɔ̄ɔ̍, kāāla̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Ndu̍yɛ̍ nyīɛ̍ɛ̍yīī ndūɛ̍i̍ ī chō le̍ fɛ̍ɛ̍ŋ a̍ fɛ̍ɛ̍ŋ.

²³ Ndu̍yɛ̍ kāālā ndɔ̄ɔ̍, mɛ̄ɛ̍ pāa̍le̍ŋ lē sīā nu̍a̍ā sɛ̄nɛ̄ī yɛ̍, le̍nde̍ o̍ cho̍ ni̍. Mɛ̄ɛ̍ pāa̍le̍ŋ lē be̍ŋgā nu̍a̍ā le̍ fūlāa̍ le̍ yɛ̍, le̍nde̍ o̍ cho̍ ni̍ ō be̍ŋgā le̍.

²⁴ Nyɛ̄ kōŋ ya̍ I̍ di̍mi̍ ni̍ a̍a̍, “Mɛ̄lɛ̄ka̍ Ya̍a̍wɛ̄ɛ̍ cho̍ nyɛ̄m ni̍ ŋ̄ki̍ɔ̍ŋ ni̍. Le̍la̍ŋ I̍ cho̍ tīīnda᷄ŋ nūu̍ dɔ̄wɔ̄ɔ̄ o̍ ndu̍ ni̍ŋ.”

²⁵ Wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ pɛ̍, ndu̍yɛ̍ mbō to̍sa̍ hɛ̄na᷄ŋ ndɔ̄ɔ̍, dɛ̍nɛ̍ kɛ̍ndɔ̄ɔ̍ Mɛ̄lɛ̄ka̍ to̍sa̍l ndu̍ ni̍.

²⁶ Le̍la̍ŋ, ō bɛ̄ndā mī wānā me̍i̍ do̍ŋ, mā chu̍m Mɛ̄lɛ̄ka̍ Ya̍a̍wɛ̄ɛ̄ mbō chīīndi̍a̍a̍ nu̍m.

²⁷ Ndu̍yɛ̍ ō bɛ̄ndā mī wānā bi̍u̍nu̍ŋ nyɛ᷅ kīndīlāā o̍ ha̍ndū nu̍m chōo̍, te̍le̍ŋ ŋ̍ chō fe̍le̍ŋgu̍nɔ̍ wo̍.

²⁸ Tē Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ nu̍m sāŋgāa̍ chōo̍ pɛ̍, ō bɛ̄ndā mā cha̍l nu᷄m pīlɛ̍ kpe̍, mā me̍i̍ kpi᷅li̍.

²⁹ Ō bɛ̄ndā mā hi̍ni̍ lɛ̄ŋ sa̍kpō ndu̍ lāchī mā fu̍u̍lu̍u̍ hɔ̄lla̍ lɛ̄ŋ mɛ̍ɛ̄, kāni̍ fo̍ndōle̍, ā nɔ̄ wɔ̄ tīīnda᷄ŋndo̍ kɛ᷅, māā dɛ̍nɛ̍ kɛ̍ndɛ̄ chō nu̍m lāchī.

³⁰ Tē wāŋndo̍ ō lɔ̄ɔ̄ nu̍m kpa᷅ŋnde̍ pɛ̍, mu̍li̍ vɛ̍lɛ̄ ī pīlɛ̍i̍ mbō lɔ̄ɔ̄. Ndu̍yɛ̍ yēī o̍ yēī nda̍ yēi̍ nu̍m pɛ̍, bi̍u̍nu̍ŋ.

³¹ Kāni̍ fo̍ndōle̍, Māsānɔ̄ɔ̍ Mɛ̄lɛ̄ka̍ ō me᷅l na̍a̍ mbō chīi̍ ni̍ko̍ a̍ na̍a̍ le̍ fɛ̍ɛ̍ŋ a̍ fɛ̍ɛ̍ŋ te̍.

³² Mbō tōsa̍ mī kɔ̄l tāmbɛ̍i̍ bɛ̍ndōo̍ ō kōma̍l na̍a̍, kɛ̍ ndu̍yɛ̍ mbō tūīīnu̍ŋ na̍a̍ vɛ̄lɛ̄ īnyīɛ̍ɛ̍, kāni̍ fo̍ndōle̍, kāālā o̍ nɔ̍ le̍ na̍a̍ wo̍ ō chō ō bɔ̄ɔ̍, ndu̍yɛ̍ ō chō le̍ fɛ̍ɛ̍ŋ a̍ fɛ̍ɛ̍ŋ.

³³ Ō ve᷅ a̍ kɔ̄l kɛ̄ndɛ̄ le̍ wāna̍ chi̍o̍o̍ nyɛ̄ pālāa̍ tūsīo̍o̍ chōo̍, ɔ̄ɔ̄ le̍ tōsāa̍ mī wāna̍ chi̍o̍o̍ tāmbu̍ kɔ̄l te̍.

³⁴ Tē ā wa᷄ wānāā nda̍ dɔ̄ū o̍ chīɛ̄ī mānyūmndo̍ ni᷄ŋ nda̍ nyɛ̄ pālāa̍ tūsīo̍o̍ chōo̍ pɛ̍, Māsānɔ̄ɔ̍ Mɛ̄lɛ̄ka̍ ō sīnā.

³⁵ Tē wāŋnda̍ ā tūŋ na̍a̍ di̍la̍ nāāla̍ŋ pɛ̍, Mɛ̄lɛ̄ka̍ nɔ̍ Bɛ̄ndōo̍ Kpo̍u̍ ō chō chɔ̄ɔ̍.

³⁶ Tē ā tūŋ wāŋndo̍ di̍ ndɔ̄ɔ̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ pɛ̍, mu̍ŋ kpo̍u̍ Māsānɔ̄ɔ̍ Mɛ̄lɛ̄ka̍ ō chō chɔ̄ɔ̍.

³⁷ Tē Māsānɔ̄ɔ̍ Mɛ̄lɛ̄ka̍ chɛ᷄l le̍ mī īsɔ̄ɔ̍ o̍ īsɔ̄ɔ̍ i̍ yɔ̍nu̍ŋ te̍, ī yɔ̍nūŋ te̍.

³⁸ Īkɛ̄ndɛ̄ ni̍, īwɔ̄ɔ̍ŋ ni̍, Mɛ̄lɛ̄ka̍ Bɛ̄ndōo̍ Kpo̍u̍ ndu̍ di̍mī ni̍ māā ī yɔ̄nu̍ŋ ma̍lāŋ i̍ yɔ̍nūŋ.

³⁹ Wāna̍ chi̍o̍o̍ tē ā chō yōōmū pɛ̍, vɛ᷅ mī Mɛ̄lɛ̄ka̍ tūsi̍ nu̍m nyɛ̄ pālāa̍ chōo̍ le̍ yɔ̄ŋ nūm wɔ̍ɔ̍ŋndo̍ mā ŋɔ̍ɔ̍cha̍ŋ?

⁴⁰ Ō bɛ̄ndā mī ŋ̄ mɛ̄ɛ̄ndi̍a̍ŋ ku̍ɛ̍ɛ̍la̍ nāāla̍ŋ, mī ŋ̄ mīīŋgu̍ Mɛ̄lɛ̄ka̍ Ya̍a̍wɛ̄ɛ̄ o̍ ībūŋ.

⁴¹ Ŋ̄ hēēlu᷅ŋ bāla̍ŋ chōo̍ cho̍o̍, mī ŋ̄ pīɛ̄īnu᷅ŋ Mɛ̄lɛ̄ka̍ a̍ kɔ̄ltā nāāla̍ŋ kpo̍u̍ āā,

⁴² “O̍o̍ Mɛ̄lɛ̄ka̍ Ya̍a̍wɛ̄ɛ̄, ŋ̄ tōsa̍ yɔ̄ŋ wɔ̄ɔ̍ŋndo̍ a̍ nūm, ndu̍yɛ̍, mi̍ ŋ̄ sōlī nu̍m dīōm. Kɛ̍ a̍ me̍l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ te̍.

⁴³ “A̍ vi̍ŋ na̍a̍ hɔ̄lāā nūmnda̍ kpi̍ŋ a̍ tu̍mbe̍ bɛ̍ndū ŋ̄ dɔ̄ɔ̄nu᷄ŋ a̍ na̍a̍ wo̍. Īnyīɛ̍ɛ̍ bɛ̍ɛ̍ a̍ tu̍i̍i̍nu̍ŋ na̍a̍ le̍, ma̍ lō na̍a̍ tōūwɔ̄ɔ̍ ma̍ bīī na̍a̍ ma̍ dīū na̍a̍.

⁴⁴ Ma̍ lō o̍ ko̍ŋ ma̍ hīāūnu᷄ŋ o̍ ha̍la̍a̍ kɔ̄ɔ̄lī pɔ̍, yɔ̄ŋi̍ bɛ̍ɛ̍ pīɛ̄īlē nāāle̍ŋ lē kōma̍l nu̍m.

⁴⁵ A̍ to̍sa̍ mi̍ ŋ̄ sīmnu᷄ŋ wa᷅ŋnda̍ o̍ hɔ̄l mɛ̄ɛ̍ pōōlā ku̍ndāla̍ŋ lā wā nu̍a̍ā yɛ̍.

⁴⁶ “Ya̍a̍mɔ̍ɔ̍wa̍a̍ nāa̍ kpo̍u̍, ā pīla̍ na̍a̍ sōndōla̍ŋ ma̍ wā na̍a̍ yīōūla̍ŋ.

⁴⁷ Sīōōŋīī bɛ̄ndūe̍i̍ ī bīī na̍a̍, fo̍ndōle̍, ā ye᷄ŋ na̍a̍ yāŋɔ̄ɔ̄la̍ŋ kpo̍u̍. Ŋ̄ chūū tɛ̄ɛ̄mbūū, mi̍ fo̍ndā nāa̍ ō lō pɔ̄m.

⁴⁸ Mɛ̍mɛ̍ma̍ nīa̍a̍ŋ mā chō kɔ̄la̍ŋ kōŋgi̍la̍ŋ lɛ̄ŋ a̍ cha᷄ŋndo̍, mɛ̄ɛ̍ pēēla̍ pɔ̍mbɔ̄la̍ŋ lā hīāū nu̍a̍ā yɛ̍, fo̍ndōle̍, le̍ tɛ̄ɛ̄mbūū nda̍ tɛ̄ɛ̄mbu̍u̍ wānāā nīa̍a̍ wo̍.

⁴⁹ “Mɛ̍mi̍a̍ŋ mā chu̍ū ya̍ o̍ hɔ̄l te̍, mā ki̍o̍lū kɔ̍ɔ̍lī le̍,

⁵⁰ ha̍a̍a̍ mɛ̄ɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ to̍fa̍ lɛ̄ŋ na̍nu᷄ŋ mbō chē sāŋga̍ cho̍ na̍a̍ chōo̍ wo̍.

⁵¹ Mɔ̍nɛ̍i̍ bɛ̍ndūe̍i̍ ī pɛ̍ o̍ kɔ̄l nūu̍ ni᷄ŋ, a̍ nyɛ᷄ yɔ̍nu̍ŋ a̍ wāŋ lāāndūa̍a̍ Chūlu̍sɛ̄lɛ̄m ndo̍.

⁵² “Wānāā ya̍ I̍ yɔ̍ŋ nyɛ᷅ o̍ nyɛ̄ le̍ wa̍, ā ye᷄ŋ ya̍ yāŋɔ̄ɔ̄le̍ŋ mɛ̄ɛ̍ nda̍ yēŋ nu̍a̍ā yōūwo̍ yāŋɔ̄ɔ̄le̍ŋ yɛ̍.

⁵³ I̍ lo̍ yōōmū ma̍ chūā ya̍ ma̍ māl la̍ o̍ so̍o̍ŋ yi̍ŋgi̍lɛ̍i̍yo̍ ni᷄ŋ, ndu̍yɛ̍ ma̍ mɛ̄lī ya̍ pōūta̍ŋ chōo̍.

⁵⁴ Mi̍ mɛ̄ŋnda̍ŋ mā kūmbū ya̍ bōlle̍ŋ kpu̍. Mi̍ di̍mī a̍a̍, ‘I̍ hi᷅ŋ lō fɔ̍.’

⁵⁵ “Kɛ̍ I̍ lo̍ o̍ so̍o̍ŋ yi̍ŋgi̍lɛ̍i̍ ko̍ŋ ni᷄ŋ, mi̍ ko̍ŋūl nāa̍ nūm Mɛ̄lɛ̄ka̍ Ya̍a̍wɛ̄ɛ̄ chu̍a̍.

⁵⁶ Mi̍ nyɔ̍ɔ̍lū nu̍m a̍a̍, ‘Yāndi̍i̍ Mɛ̄lɛ̄ka̍, ya̍ŋ ya̍ nīla̍ŋ fɔ̍ mā ma̍la̍ ya̍.’ Ndu̍yɛ̍ ma̍ mūlī ya̍ dīōm.

⁵⁷ Mɛ̄ɛ̍ ya̍ I̍ ve̍e̍lu̍ nu̍m, ma̍ sɔ̄ɔ̄ŋgūū ya̍ īkɛ̄i̍, ma̍ dīmūl la̍ āā, ‘Yɔ᷅ŋ īsīōōŋ te̍.’

⁵⁸ “Ma̍ lō o̍ ko̍ŋ ma̍ sūŋgū le̍ ya̍ Māsānɔ̄ɔ̍ Mɛ̄lɛ̄ka̍, ndu̍yɛ̍ ma̍ chīīndīāā yōōmū nūu̍.

⁵⁹ Nūm pi̍la̍ che᷅ sɔ̄ɔ̍ŋ wɔ̄ɔ̍ŋ nda̍ tōsa̍ a̍ ya̍ ki̍nɛ̍i̍ yo̍ŋ Mɛ̄lɛ̄ka̍ Ya̍a̍wɛ̄ɛ̄, le̍la̍ŋ su̍ŋgu̍ le̍ ya̍.

⁶⁰ Nūm pi̍la̍ si̍nā mɛ̄ɛ̍ nda̍ yīi̍ ya̍ de̍fo̍o̍ le̍ ya̍ māa̍ mīŋgūllo̍ yɛ̍.

⁶¹ “Nūm pi̍la̍ tu̍e̍ī mɛ̄ɛ̍ nda̍ yīo̍u̍ ya̍ yɛ̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ ā sīnā kɛ̍ɛ̍sīāālā sɔ̍ɔ̍ sɔ̍ɔ̍la̍ nda̍ kɛ̄ɛ̄sīa̍a̍ a̍ ya̍ o̍kɔ̄ɔ̄ la̍ŋ ki̍nɛ̍i̍.

⁶² Ya̍a̍mɔ̍ɔ̍wa̍a̍ nīa̍a̍, mā nīīlu̍ a̍ ya̍ o̍ sōndō kpɛ᷅ŋ, ndu̍yɛ̍ mā tūū tu̍u̍lā wɔ̄ɔ̍ŋnda̍ŋ a̍ ya̍ o̍kɔ̄ɔ̄.

⁶³ Tē ā cha᷄l pɛ̍, a̍ ya̍ o̍ so̍ndō ko̍ni̍ nda̍ chāl ni̍, tē ā chɛ᷄ŋ pɛ̍, a̍ ya̍ o̍ sōndō ko̍ni̍. I̍ si̍mnu᷄ŋ ni᷅ŋ māā īchōndu̍ nda̍ o̍ sōndō.

⁶⁴ “Le̍la̍ŋ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, mi̍ŋgu̍l wa᷅ŋnda̍ ha̍ā māa̍ le̍ nyɛ̄ nda̍ tōsa̍ a̍ ya̍ wo̍.

⁶⁵ Ha̍ndu̍ nda̍ sēndi̍o̍o̍ chōo̍, ndu̍yɛ̍ mā to̍sa̍ mā tāmbu̍ lākɔ̄l.

⁶⁶ Dɔ̍u̍nu̍ŋ tu̍mbe̍ a̍ nda̍ Mɛ̄lɛ̄ka̍ Ya̍a̍wɛ̄ɛ̄, mā lo̍ nda̍ nyɛ̄ pālāa̍ tūsīo̍o̍ chōo̍ ha̍a̍a̍, mā fa̍ŋa̍ nda̍ o̍ chi̍e̍ēŋndo̍ ho̍ō chōo̍ ba̍ū.”