Chɔ̄ɔ̍sūāā 2 - Yāu̍ Mɛ̄lɛ̄ka̍a̍

Chɔ̄ɔ̍sūāā ve᷅m su̍a̍ŋsu̍a̍ŋnda̍ Chɛ̄lu̍i̍kō

¹ A̍ bōōndi̍i̍ I̍sɔ̄lūɛ̍i̍ya̍ ā wa̍ o̍ dɔ̍ɔ̍ŋgɔ̍ɔ̍ ni᷄ŋ Āke̍e̍sīāā ve̍, mi̍ Chɔ̄ɔ̍sūāā hɛ̍lī pūa̍a̍ ā ŋīɔ̍ɔ̍ŋ mbo̍ dīmūl nda̍ āā, “Lā kɔ̍ o̍ lɛ̄ŋndē Ke̍nāŋnde̍ŋ ni̍ŋ mī lā kɔ̍ mɛ̍ɛ̍ndīa̍ŋ mɛ̄ɛ̍ le̍ cho̍ yɛ̍, tāāma̍ ta̍āma̍ Chɛ̄lu̍i̍kō chi̍e̍e̍.” Mi̍ pūa̍a̍ māl ma̍ kūā. Mɛ̄ɛ̍ nda̍ fūūlu̍u̍ Chɛ̄lu̍i̍kō, ma̍ kūā o̍ wānā la̍nɔ̍ pi᷅lɛ̍ lo̍ chi̍ɛ̍ī ni̍ŋ dīōla̍ŋ āā Lu̍e̍ha̍bī. Wānā la̍nɔ̍ ti̍a̍māa̍ kɛ̍sī pɔ̍nɔ̍ le̍ wo̍ chūa̍a̍ ho̍ō ō wa̍ ni̍. Mbo̍ yīyā pūa̍a̍ ha̍ā.

² Kɛ̍ mi̍ māsā bɛ̍ndōo̍ Chɛ̄lu̍i̍kō o̍ tu̍ɛ̍ī māā I̍sɔ̄lūɛ̍i̍ya̍a̍ pu᷅m ā kūɛ̄ īchɔ̄l kōŋ lo̍ŋ le̍ lɛ̄ŋndē ndāle̍ŋ mɛ̄ɛ̄ndīa̍ŋ ndo̍ mɛ̄ɛ̍ le̍ cho̍ yɛ̍.

³ O̍ ko̍ŋ, mbo̍ vīām pūa̍a̍ nāa̍ Lu̍e̍ha̍bī chu̍a̍ ma̍ kɔ̍ di̍mūl ndu̍ āā, “Pūa̍a̍ pu᷅m ā hīŋ o̍ nūm ndo̍ chi̍ɛ̍ī ni̍ŋ na̍nu᷄ŋ chu̍ɛ̍llɛ̄ŋ, su̍a̍ŋsu̍a̍ŋnde̍ŋ ndā hīŋ ō lɛ̄ŋndē nāāle̍ŋ ni̍ŋ ni̍. Le̍la̍ŋ so̍li̍ nda̍ na̍nu᷄ŋ.”

^4-6 Kɛ̍ lɔ̍ɔ̍pa̍ mi̍ pūa̍a̍ māsā bɛ̍ndōo̍ ō vēm ha̍ā wa̍ ā fūūlūū o̍ chīɛ̍i̍ Lu̍e̍ha̍bī wo̍, Lu̍e̍ha̍bī ndu̍ o̍o̍ chi̍i̍ ni᷅ŋ pūa̍a̍ ŋi̍ɔ̍ɔ̍ŋnda̍ ha̍ā vīōŋɔ̄ɔ̄. Ndu̍ o̍o̍ nɔ̍ tɔ̄lɔ̄ɔ̄ pūm o̍ chīɛ̄ī ndɔ̄ɔ̍ chōo̍ mā vēēlū ndu̍ āā fi̍la̍ki̍ŋsīŋ, ō yīūwāā a̍ kpɔ̄ŋnda̍ŋ. Mbo̍ hēēlū pūa̍a̍ ŋi̍ɔ̍ɔ̍ŋnda̍ ha̍ā o̍ chīɛ̄īyo̍ chōo̍, mbo̍ kɔ̍ vi̍ōŋ nda̍ o̍ tɔ̄lɔ̄ɔ̄ kōŋ bɛ̄ŋgu̍. O̍ ko̍ŋ, mɛ̄ɛ̍ pūa̍a̍ māsā bɛ̍ndōo̍ ō vēm ka̍ŋ nda̍ ā kɔ̍ nyu̍nā ndu̍, mbo̍ dīmūl nda̍ āā, “Ī chō tōnya̍ māā mi̍ pūa̍a̍ pūm ā hūŋ na̍nu᷄ŋ, kɛ̍ I̍ si̍nā ba᷅ nda̍ a̍a̍ fu̍la̍ le̍. Ā lāŋga̍ kɔ᷅ su̍ŋ su̍ŋ a̍ pāa̍le̍ de̍lāā le̍ŋ. Kɔ̄lā ndāla̍ŋ ō bēndu̍ bɛ̍ɛ̍ ti᷅ŋ te̍ mi̍ wāŋnda̍ kīndā dīō sāāsa̍ chi̍o̍o̍. Kɛ̍ ndu̍yɛ̍, I̍ si̍nā ba̍ nda̍ kūɛ̄ le̍. Tē lā tōl nda̍ kɔ̄ɔ̄lī su̍ŋ su̍ŋ pɛ̍ lā chō nda̍ bīyɔ̄ɔ̄.”

⁷ Dīmūl kōŋ pūa̍a̍ māsā bɛ̍ndōo̍ ō vēm ka̍ŋ nda̍ le̍nde̍, ma̍ fūlā ma̍ tīsā pūa̍a̍ ŋi̍ɔ̍ɔ̍ŋnda̍ ha̍ā nūūvīa̍a̍. Mɛ̄ɛ̍ nda̍ fūla̍, mi̍ wāŋnda̍ mīŋgī dīō sāāsa̍ chi̍o̍o̍ kīndā. Ma̍ lō nda̍ nūūvīa̍a̍ ha̍a̍a̍ ma̍ kɔ̍ fu̍u̍lūū Chɔ̍ɔ̍dāŋ o̍ pēēlo̍.

⁸ Lɔ̍ɔ̍pa̍ mi̍ pūa̍a̍ su̍a̍ŋsu̍a̍ŋa̍a̍ ŋi̍ɔ̍ɔ̍ŋnda̍ ha̍ā ā hīni̍, mi̍ Lu̍e̍ha̍bī he᷅l o̍ chīɛ̄īyo̍ chōo̍.

⁹ Mbo̍ kɔ̍ di̍mūl nda̍ āā, “I̍ si̍nā ni᷅ŋ māā Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ nya̍ lɛ̄ŋnde̍ŋ nde᷅ŋ kē. Ndu̍yɛ̍ sīōōŋnde̍ chō ni᷅ŋ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ a̍ nya̍.

¹⁰ Kāni̍ fu̍u̍le̍ ŋ̄ tūēī a̍ bōōndi̍i̍ nya̍ ma̍l o̍ lɛ̄ŋndē I̍chi̍pīle̍ŋ ni̍ŋ nde̍, a̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍li̍a̍a̍ pēē si̍a̍ŋā mɛ̄ŋmā hɛ᷄llo̍ nya̍ lāchī le̍ mī lā ta᷄ŋ yɛ̍. Mi̍ ŋ̄ tūɛ̄ī vɛ̄lɛ̄ a̍ mɛ̄ɛ̍ nya̍ dīu̍ māsāā bɛ̍ndūāā māA̍mɔ̍lu̍a̍i̍tīi̍ya̍a̍ ŋi̍ɔ̍ɔ̍ŋnda̍, Si̍hɔ̄ŋ nda̍ Ɔ̍kū, a̍ wa̍ Chɔ̍ɔ̍dāŋ le̍e̍lōo̍ wa̍ yɛ̍.

¹¹ Ndu̍yɛ̍ dīmīo̍o̍ nu̍a̍ā mi̍ ŋ̄ tūɛ̄ī le̍nde̍, nāā kpo̍u̍ mi̍ kɔ̄lta̍ŋ lā lāāsīa̍ŋ na̍a̍ ni̍ŋ a̍ sīōōŋīī nyɛ̄i̍. Mi̍ yōōmūa̍ŋ mā fūlā pūa̍a̍ po̍. Kāni̍ fu̍u̍le̍ ŋ̄ sīnā māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ndu̍ cho̍ Mɛ̄lɛ̄ka̍ o̍ cho̍ māsāa̍ le̍ ɛ̄chɛ̍nɛ̄ a̍ chi̍e̍ēŋndo̍ ho̍ō kpo̍u̍ wo̍ ni̍.

¹² Le̍la̍ŋ lā mēna̍la̍ŋ ya̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ māā kɛ̄ndɛ̄i̍ ya̍ I̍ to̍sa̍l nya̍ he̍ī ve̍, lā mīŋgī ni̍ŋ ndi̍ o̍ wānāā nīa̍a̍ lo̍. Lā chɔ᷄m ya̍ tāāmāsi̍o̍o̍,

¹³ o̍ chɔ᷅m ya̍ māā fi̍nyā nūu̍, a̍ kāla̍ nūu̍ a̍ yēmāa̍ nīa̍a̍, a̍ pɔ̄mbūāā nīa̍a̍, a̍ bɛ̄ndāā nīa̍a̍, ndu̍yɛ̍ a̍ wānāā ndāa̍ kpo̍u̍ lā chō na̍a̍ chīīndīāā wo̍. Lā chūe̍l la̍ ībūŋgā māā lā di̍ī ni̍ŋ na̍a̍ le̍.”

¹⁴ O̍ ko̍ŋ, mi̍ pūa̍a̍ su̍a̍ŋsu̍a̍ŋnda̍ dīmūl ndu̍, āā, “Tē a̍ chi̍i̍ndi̍a̍a̍ yōōmūlā nāāla̍ŋ pɛ̍, ŋ̄ chīīndi̍a̍a̍ yōōmūlā nyāla̍ŋ. Tē a̍ di̍mu̍l wa̍nā o̍ wānā nyɛ̄ na̍a̍ ŋ̄ hīŋ tōsā na̍nu᷄ŋ ndo̍ le̍, ŋ̄ mēna̍la̍ŋ nu̍m o̍ Mɛ̄lɛ̄ka̍ lo̍ mi̍ ŋ̄ chūēl nu̍m būŋgɛ̄i̍ māā tē Mɛ̄lɛ̄ka̍ Ya̍a̍wɛ̄ɛ̄ o̍ hu̍ŋ ke᷅ na̍a̍ lɛ̄ŋnde̍ŋ nde᷅ŋ pɛ̍, ŋ̄ chō kɛ̄ndɛ̄ī nu̍m nde̍ mīŋgī.”

Pūa̍a̍ su̍a̍ŋsu̍a̍ŋnda̍ mīīŋgu̍

¹⁵ Chīɛ̍i̍ Lu̍e̍ha̍bī wo̍ ō wa̍ ō chīŋāā a̍ sāāsa̍ ba̍lu̍ chi̍o̍o̍ wo̍. Mi̍ Lu̍e̍ha̍bī so̍lī pūa̍a̍ ŋi̍ɔ̍ɔ̍ŋnda̍ ha̍ā o̍ dīō pɔ̄mbɔ̄ɔ̍ mbo̍ tūsī nda̍ a̍ yōōle̍ŋ.

¹⁶ Mɛ̄ɛ̍ o̍ tu̍si̍ nda̍, mbo̍ dīmūl nda̍ āā, “Lā kɔ̍ o̍ pēmbo᷄ŋ tɛ̄ɛ̄ŋ mī lā kɔ̍ vi̍o̍ŋnu̍ŋ ndo̍ŋ yɔ̄ŋi̍ pūa̍a̍ māsā bɛ̍ndōo̍ vēm nda̍ ā sāālu̍ŋ nya̍. Lā kɔ̍ vi̍o̍ŋnu᷄ŋ lo̍ŋ le̍ pālɛ̍i̍ ī yāa̍. Tē ā mīīŋgu̍ na̍nu᷄ŋ pɛ̍ lā kūɛ̄ ni̍ko̍ nāa̍ nya̍ fūla̍ wa̍.”

¹⁷ Lɔ̍ɔ̍pa̍ mi̍ pūa̍a̍ ha̍ā māl, ma̍ dīmūl Lu̍e̍ha̍bī āā, “Būŋgɛ̄ī ŋ̄ tōsa̍ mi̍ ŋ̄ chūēl nu̍m nde̍ ī te̍mbū ku̍mbū nāa̍ le̍.

¹⁸ Le̍la̍ŋ nyɛ̄ ŋ̄ nɔ̄ mā tōsa̍ wo̍ cho̍ ho̍ō ni̍, bōōndi̍i̍ na̍a̍ ŋ̍ chō hūnɔ̄ɔ̄ lūɛ̄īyɔ̄ɔ̄ o̍ lɛ̄ŋndē nyāle̍ŋ ni̍ŋ a̍ sɔ̍ŋgɔ̄ɔ̍ ve̍, ŋ̄ kōma̍l mā ba̍a̍ yōōlē sīāŋāle̍ŋ nde᷅ŋ o̍ dīō pɔ̄mbɔ̄ ŋ̄ sōli̍ na̍a̍ ho̍ō wo̍. Ndu̍yɛ̍ o̍ ko̍ŋ kɔ̍ɔ̍lī, mā ve̍e̍lu̍ fi̍nyā nu̍m, a̍ kālā nu̍m, a̍ yēmāā nu̍m nda̍, ndu̍yɛ̍ a̍ wānā o̍ wāna̍ fu̍la̍ o̍ yu̍ŋgu̍ fi̍nyā nūm ndo̍ chōo̍ o̍ nūm ndo̍ chi̍ɛ̍ī ni̍ŋ.

¹⁹ Tē wānā o̍ wānā fu̍la̍ o̍ nūm ndo̍ chi̍ɛ̍ī ni̍ŋ pɛ̍ mbō kūɛ̄ o̍ bɛ̍ɛ̄, mɛ̄ɛ̍ ndu̍ pi̍la̍ nu̍u̍va̍ pīɔ̍mndo̍ ni̍. Ō ve᷅ na̍a̍ le̍ tɔ̍ɔ̍ya̍ŋ pīɔ̍m ndɔ̄ɔ̍ ō wā cho̍o̍ le̍. Kɛ̍ tē nyɛ̄ o̍ nyɛ̄ yɔ̍nu̍ŋ a̍ wānā o̍ wāna̍ o̍ nūm ndo̍ chi̍ɛ̍ī ni̍ŋ na̍nu᷄ŋ pɛ̍, mɛ̄ɛ̍ na̍a̍ tɔ̍ɔ̍ya̍ŋ pīɔ̍m ndɔ̄ɔ̍ ō wa̍ chōo̍ ni̍.

²⁰ Kɛ̍ ndu̍yɛ̍ nūm yɛ̍ tē a̍ ko̍ma̍ di̍mūl wānā o̍ wānā nyɛ̄ na̍a̍ ŋ̄ hīŋ tōsā na̍nu᷄ŋ ndo̍ pɛ̍, mɛ̄ɛ̍ būŋgɛ̄ī na̍a̍ ŋ̄ chūe̍l nu̍m mi̍ ŋ̄ mēna᷄ŋ nde̍ ŋ̄ cho̍ di̍ōm nāa̍ pēēlū le̍, ndu̍yɛ̍ tɔ̍ɔ̍ya̍ŋ ve᷅ na̍a̍ chōo̍ le̍.”

²¹ Mi̍ Lu̍e̍ha̍bī chɛ᷅l nyɛ̄ nda̍ dīmu̍l ndu̍ wo̍ mbo̍ māl nda̍ ma̍ kūā. Mɛ̄ɛ̍ nda̍ kūɛ̄, mbo̍ kōma̍ ba̍ā yōōlē si̍a̍ŋāle̍ŋ o̍ dīō pɔ̄mbɔ̄ o̍ so̍li̍ nda̍ wo̍ mɛ̄ɛ̍ nda̍ dīmu̍l ndu̍ yɛ̍.

²² Mi̍ pūa̍a̍ su̍a̍ŋsu̍a̍ŋnda̍ ha̍ā ā kɔ̍ vi̍o̍ŋnu᷄ŋ o̍ pēmbo᷄ŋ tɛ̄ɛ̄ŋ. Le̍ pālɛ̍i̍ ī yāa̍ ā wa̍ ā vīāŋna᷄ŋ lo̍ŋ. Mi̍ pūa̍a̍ nda̍ vēm nda̍ ā nūūvīāā nda̍ o̍ tāndā kōŋ ni̍ŋ kpo̍u̍ ā sēēlu̍ŋ nda̍ le̍ ma̍ mīīŋgu᷄ŋ.

²³ O̍ ko̍ŋ, mi̍ pūa̍a̍ ha̍ā kōma̍ fu̍lā nāa̍ nda̍ wa̍ ā vīāŋna᷄ŋ nda̍, ma̍ mīīŋgū le̍e̍lōo̍ nāa̍ Chɔ̄ɔ̍sūāā chu̍a̍. Ma̍ kɔ̍ do̍o̍nu᷄ŋ ndu̍ ko̍na̍ a̍ nyɛ̄ o̍ nyɛ̍ yɔ̍nu̍ŋ a̍ nda̍.

²⁴ Ma̍ dīmūl ndu̍ āā, “A̍ tōnya̍ kpe̍e̍kpe̍i̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ na̍a̍ lɛ̄ŋndē lēŋ kē. Nda̍ kpo̍u̍ mɛ̄ɛ̍ nda̍ tūēī a̍ na̍a̍ o̍kɔ̄ɔ̄ mi̍ sīōōŋnde̍ bīī nda̍ ta̍u̍.”