Chɔ̄ɔ̍chi̍a̍a̍ 2 - Yāu̍ Mɛ̄lɛ̄ka̍a̍

Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō sōō nāa̍ I̍sɔ̄lūɛ̍i̍ya̍ chūā Bɔ̍kīm

¹ O̍ ko̍ŋ kɔ̍ɔ̍lī, mi̍ Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō cha᷄ŋ Ki̍lkāl chi̍e̍e̍, mbo̍ kūā Bɔ̍kīm le̍ mbō kɔ̍ di̍mūl wāŋnda̍ I̍sɔ̄lūɛ̍i̍ yōōŋgōo̍. Mbo̍ dīmūl nda̍ māā Mɛ̄lɛ̄ka̍ dīmi̍ āā, “Wāŋnda̍ I̍sɔ̄lūɛ̄ī, ya̍ so̍li̍ nya̍ o̍ chɛ̄le̍ŋ ni᷄ŋ I̍chi̍pī ni̍, mi̍ hu᷅ŋ a̍ nya̍ o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē ya̍ I̍ chu̍e̍l sīndɛ̄ fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ. Mi̍ lo᷅ o̍ ko̍ŋ mi̍ di̍mūl nda̍ a̍a̍, ‘Kpe̍ma̍ cho̍ na̍a̍ tɛ̄ɛ̄ŋ na̍a̍ nya̍ā wo̍, I̍ tɛ̍ɛ̍mbūū kpe̍ma̍ ko̍ŋ te̍.

² Ndu̍yɛ̍ nya̍ bɛ̍ɛ̍ lā yi̍ī kpe̍ma̍ o̍ kpe̍ma̍ nya̍ wānāa̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍ le̍. Ma̍āŋndā wāŋnda̍ ha̍ā ā tāŋgu̍lta̍ŋ ki̍nɛ̍i̍ lā pēsi̍ pe̍si̍ la̍ŋ kpo̍u̍.’ Kɛ̍ mi̍ lā lō o̍ ko̍ŋ mi̍ lā sōlī ya̍ Mɛ̍lɛ̄ka̍ dīōm. Nyɛ̄ ya̍ I̍ di̍mu̍l nya̍ le̍ tōsāa̍ wo̍, lā chɛ᷄l mī lā tōsa̍ ndu̍ le̍. Vɛ᷅ mi̍ lā tōsā le̍nde̍?

³ Le̍ kɛ̄ɛ̄ nya̍ kɛ̄ɛ̍ ya̍ ho̍ō dīōmndo̍, mi̍ chē bɛ̍ɛ̍ mi̍ ya̍ i̍i̍ chu̍ēl nya̍ būŋgɛ̄i̍ le̍ wāŋnda̍ ha̍ā tōūwɔ̄ɔ̍ nya̍ lāchī, kɛ̍ I̍ tu̍ū lɛ̍ nda̍ nya̍ lāchī le̍. Wāŋnda̍ ha̍ā ā chō hūnɔ̄ɔ̄ sīmnɔ᷄ŋ ya̍a̍mɔ̍ɔ̍wa̍a̍ nya̍, ndu̍yɛ̍ o̍ ko̍ŋ kɔ̍ɔ̍lī, nyɛ̄m nda̍ sōōlūū māā mɛ̄lɛ̄ka̍a̍ ndā wo̍ŋ, mī nyɛ̄m mu᷅ŋ ŋ̄ sīmnu᷄ŋ ya̍ŋɔ̄ɔ̄lē bɛ̄ndūle̍ŋ le̍ nya̍.”

⁴ Mɛ̄ɛ̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chīi̍ wāŋnda̍ I̍sɔ̄lūɛ̍i̍ yōōŋgōo̍ ho̍ō dīmu̍l, nda̍ kpo̍u̍ ma̍ chāŋ chōo̍ cho̍o̍ kpu̍ū.

⁵ Mɛ̄ɛ̍ nyɛ̄ ko̍ŋ to̍sa̍ ni̍ ma̍ kē fo̍ndāa̍ ho̍ō dīōla̍ŋ āā Bɔ̍kīm. O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ o̍ fo̍ndāŋ kōŋ.

A̍ pīɔ̍m Chɔ̄ɔ̍sūāā wo̍ o̍kɔ̄ɔ̄

⁶ A̍ te̍le̍ŋ Chɔ̄ɔ̍sūāā o̍ wa̍ yōōmū wo̍, mbo̍ pīɔ̄ū I̍sɔ̄lūɛ̍i̍ya̍ lɛ̄ŋndē Mɛ̄lɛ̄ka̍ ke̍ nda̍ le̍ŋ a̍ yu̍ŋgu̍la̍ŋ kpɛ̍ kpɛ̍. Mɛ̄ɛ̍ o̍ chi̍i̍ nda̍ le̍ŋ pīɔ̄ū kpo̍u̍, mbo̍ māl nda̍, mi̍ yu̍ŋgu̍ o̍ yu̍ŋgu̍ ku̍ā mbo̍ kɔ̍ chu̍ā būŋgɛ̄ī o̍ sɔ̍la̍ ve̍ māā nyɛ̄ ndā.

⁷ Ndu̍yɛ̍ chɔ̍ŋ a̍ bōōndi̍i̍ Chɔ̄ɔ̍sūāā o̍ wa̍ I̍sɔ̄lūɛ̍i̍ya̍ chīla̍ŋnde̍, ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ, wāŋnda̍ I̍sɔ̄lūɛ̄ī a̍ wa̍ Mɛ̄lɛ̄ka̍ Ya̍a̍wɛ̄ɛ̍ sāāŋgīāllo̍. Ndu̍yɛ̍ mɛ̄ɛ̍ Chɔ̄ɔ̍sūāā o̍ vi᷅, mi̍ wāŋnda̍ I̍sɔ̄lūɛ̄ī a̍ hi̍a̍ū lāchī a̍ Mɛ̄lɛ̄ka̍ sāāŋgīāllo̍ ha̍a̍a̍ mbo̍ lō o̍ ko̍ŋ, mi̍ wāŋ bɛ̄ndūa̍a̍ wa̍ nda̍ chīla̍ŋnda̍, a̍ che᷅ sɔ̄ɔ̍ŋ kɔ̄ndɔ̄fi̍li̍ŋ bɛ̄ndū Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l I̍sɔ̄lūɛ̍i̍ya̍ wo̍ŋ ndā ā chūū kpo̍u̍.

⁸ Mi̍ bu̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ Chɔ̄ɔ̍sūāā, po̍ Nu᷅ŋ ndo̍ ō wū. Ō wa̍ wɔ̄sīla̍ŋ kɛ̄mɛ̄ a̍ tɔ̍ (110) mbo̍ wū.

⁹ Mi̍ wāŋnda̍ I̍sɔ̄lūɛ̄ī a̍ kɔ̍ chɔ᷅ ndu̍ Tīmīnātī Sɛ̍lūā chi̍e̍e̍, o̍ būŋgɛ̄ī ndūɛ̍i̍ ni᷄ŋ, o̍ lɛ̄ŋndē īpēmbūle̍ŋ E̍fi̍lūēm, kūmbū Pēmbīī Ka̍a̍sā ve̍ bā lūāŋndo̍.

¹⁰ O̍ ko̍ŋ kɔ̍ɔ̍lī, yu̍ŋgu̍la̍ wa̍ a̍ te̍le̍ŋ ko̍ŋ nda̍ŋ kpo̍u̍ mi̍ lā chūū. Mi̍ yu̍ŋgu̍la̍ che᷅le̍ŋ lā mīīŋgū. Kɛ̍ yu̍ŋgu̍la̍ mi̍i̍ŋgu̍ la᷅ŋ nda̍ŋ, ō bēndu̍ bɛ̍ɛ̍ a̍ ti᷅ŋ te̍, mi̍ lā pūɛ̄ɛ̄nu᷄ŋ a̍ Mɛ̄lɛ̄ka̍ Ya̍a̍wɛ̄ɛ̄. Sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ Mɛ̄lɛ̄ka̍ tōsa̍ le̍ I̍sɔ̄lūɛ̍i̍ya̍ wo̍ŋ, ma̍ pūɛ̄ɛ̄nu᷄ŋ a̍ mu̍ŋ o̍kɔ̄ɔ̄.

A̍ mɛ̄ɛ̍ I̍sɔ̄lūɛ̍i̍ya̍ ā pɛ̄ŋgi̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ yɛ̍ o̍kɔ̄ɔ̄

¹¹ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ to̍sā nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. Ma̍ mūli᷄ŋ Bāāl, mɛ̄lɛ̄ka̍ā chēle̍ŋnda̍ sāāŋgīāllo̍.

¹² Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍, nda̍ a̍a̍ pi̍ɛ̍īyo̍, o̍ so̍li̍ nda̍ I̍chi̍pī wo̍, ma̍ kɛ̄ɛ̄ Mɛ̄lɛ̄ka̍ kōŋ. Nyɛ̄m yɛ̍ yɛ̍ŋ che̍le̍ŋ wānāa̍ ba̍lu̍ nda̍ wa̍ nda̍ a̍a̍ pi̍ɛ̍ī māā mɛ̄lɛ̄ka̍ā ndā wo̍ŋ, nda̍ bɛ̍ɛ̍ ma̍ mūli᷄ŋ nyɛ᷅m mu᷅ŋ pīɛ̄īyo̍. O̍ ko̍ŋ, ma̍ tɛ̄ɛ̄mbūū Mɛ̄lɛ̄ka̍ Ya̍a̍wɛ̄ɛ̍ kɔ̄l mbo̍ dūāūnu᷄ŋ tu̍mbe̍ a̍ nda̍ o̍ ka̍lā ka̍lā.

¹³ Fo̍ndōle̍, le̍ mɛ̄ɛ̍ nda̍ kɛ̄ɛ̍ ndu̍, ma̍ mūli᷄ŋ Bāāl, a̍ Āsīta̍tɛ̄ɛ̄ sōōlūūwo̍ māā mɛ̄lɛ̄ka̍a̍ ndā yɛ̍.

¹⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ wāŋnda̍ I̍sɔ̄lūɛ̄ī o̍ ka̍lā ka̍lā. O̍ ko̍ŋ, mbo̍ māl nda̍ wānāa̍ ke̍ī wa᷅ŋnda̍ dēlɔ̄ɔ̍ chōo̍ mā pūŋgā nyɛ᷅m ndāa̍ŋ nda̍ o̍ bā. Mbo̍ fāŋā nda̍ bāa̍ chōo̍, mi̍ ya̍a̍mɔ̍ɔ̍wa̍a̍ ndāa̍ wa̍ nda̍ ā ba̍lāā wa̍ ā sɔ̄lā nda̍ kpāāyāa̍ chōo̍, nda̍ a̍a̍ nɔ̍lā lɛ̍ mī nda̍ a̍a̍ si̍mu̍l nda̍ le̍.

¹⁵ Te̍le̍ŋ o̍ te̍le̍ŋ nda̍ a̍a̍ kūɛ̄ ni᷅ŋ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ si̍m ya̍a̍mɔ̍ɔ̍wa̍a̍ ndāa̍ kɔ̄ɔ̄lī, ya̍a̍mɔ̍ɔ̍wa̍a̍ ndāa̍ yēm nda̍. Ndu̍yɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ mbo̍ tīāŋnu᷄ŋ ndo̍ ndu̍ wa̍ ko̍ŋ ni̍. O̍ ko̍ŋ, mi̍ sāŋgā bɛ̄ndōo̍ ō tūāl wāŋnda̍ I̍sɔ̄lūɛ̍i̍ chōo̍.

¹⁶ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍lī wāŋnda̍ I̍sɔ̄lūɛ̍i̍ya̍ tɛ̄ɛ̄ŋ mbo̍ sīīŋgūū nda̍ chɔ̍ɔ̍chi̍a̍a̍ I̍sɔ̄lūɛ̍i̍ya̍ chōo̍, le̍ mā bāŋa̍ I̍sɔ̄lūɛ̍i̍ya̍ ya̍a̍mɔ̍ɔ̍wa̍a̍ ndāa̍ nda̍ a̍a̍ hu᷅ŋ nda̍ dēlɔ̄ɔ̍ chōo̍ mā pūŋgā nyɛ᷅m nda᷄ŋ nda̍ o̍ bā.

¹⁷ Kɛ̍ wāŋnda̍ I̍sɔ̄lūɛ̄ī a̍ tu̍i̍i̍ vɛ̍lɛ̄ wānāa̍ wa̍ nda̍ ha̍ā chīla̍ŋ nda̍ dīōm te̍. Ma̍ bīī ma̍ hīāū lāchī a̍ nyɛ̄m chēle̍ŋndo̍ŋ sāāŋgīāllo̍, ndu̍yɛ̍, mā sōōlūū mu̍ŋ māā mɛ̄lɛ̄ka̍a̍ ndā. Nɛ̄i̍ fi̍nyāā ndāā ma̍māa̍ ā wa̍ chōo̍, ma̍ tūsi᷄ŋ o̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ bɛ̄ŋgu̍ a̍ kɔ̄ltā ndāla̍ŋ kpo̍u̍ wo̍, mi̍ I̍sɔ̄lūɛ̍i̍ya̍ fāŋa̍ŋ o̍ nɛ̄ī ko̍ŋ cho̍o̍ ma̍ tūāl nɛ̄ī chɛ̍le̍ŋ kɔ̄ɔ̄lī.

¹⁸ Le̍ te̍le̍ŋ o̍ te̍le̍ŋ tē Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ hɛ̍li̍ wāŋndo̍ pɛ̍, mbō ha̍ndu̍ ndu̍ I̍sɔ̄lūɛ̍i̍ya̍ chīla̍ŋ, wāa̍ Mɛ̄lɛ̄ka̍ ndu̍ o̍o̍ wa᷅ wa̍nā ko̍ŋ kɔ̄ɔ̄lī ni̍, mbō ke̍ wānā ko̍ŋ kpāāyāa̍ mbō bāŋa̍ I̍sɔ̄lūɛ̍i̍ya̍ ya̍a̍mɔ̍ɔ̍wa̍a̍ ndāa̍ o̍ bā. Ndu̍yɛ̍ ha̍a̍a̍ a̍ te̍le̍ŋ wānā ko̍ŋ ō wā yo̍o̍mū wo̍, I̍sɔ̄lūɛ̍i̍ya̍ ā ve᷅ ya̍a̍mɔ̍ɔ̍wa̍a̍ ndāa̍ o̍ bā bɛ̄ŋgu̍ le̍. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ nɔ̍ nyīɛ̍ɛ̍ye̍ ta̍u̍ le̍ wāŋnda̍ I̍sɔ̄lūɛ̄ī. Te̍le̍ŋ o̍ te̍le̍ŋ tē ya̍a̍mɔ̍ɔ̍wa̍a̍ ndāa̍ nda̍ a̍a̍ wa̍ nda̍ kīndīlāa̍ pɛ̍, mī nda̍ a̍a̍ wa̍ nda̍ nyɛ̄ pālāa̍ tūsīo̍o̍ chōo̍, tē ā kōŋu̍l nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ pɛ̍ le̍ mālāa̍, nyīɛ̍ɛ̍ye̍ ndu̍ o̍o̍ tu̍i̍i̍nūŋ nda̍ ni̍.

¹⁹ Kɛ̍ dīmīo̍o̍ nu̍a̍ā mī wāna̍ wa᷅ nda̍ ko̍ŋ chi᷅la̍ŋndo̍ ō vī, mī wāŋnda̍ I̍sɔ̄lūɛ̄ī a̍ mi̍ŋgi̍ bɛ̍ɛ̍ ba᷅la̍ŋ o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ, mā mu̍li̍ŋ bɛ̍ɛ̍ nyɛ᷅m chēle̍ŋndo̍ŋ sāāŋgīāllo̍, mā sōōlūū mu̍ŋ māā mɛ̄lɛ̄ka̍ā ndā. Sɔ̄ɔ̍ŋ wɔ̄ɔ̍ŋ nda̍ mīīŋgū ni᷅ŋ tōsāa̍ wo̍ŋ, ŋ̄ hīāū ni᷅ŋ bɛ̍ɛ̍ ŋ̄ fi̍nyāā ndāā ma̍māa̍ ā wa̍ tōsāa̍ wo̍ŋ lēwɔ̄ū. Mā hīōū lāchī a̍ bōllē kālāle̍ŋ tōsāa̍, ā chɛ᷅l mā ma᷄l yɔ̄ŋndā ndāla̍ wɔ̍ɔ̍ŋnda̍ŋ te̍.

²⁰ O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ I̍sɔ̄lūɛ̍i̍ya̍ ō kālā ka̍lā. Mbo̍ dīmī āā, “Wāŋnda̍ ha̍ā ā cho̍ wa̍nāa̍ tu̍e̍ī ya̍ dīōm te̍. Kpe̍ma̍ ya̍ I̍ yi̍i̍ a̍ fi̍nyāā ndāā ma̍māa̍ le̍ fɛ̍ɛ̍ŋ a̍ fɛ̍ɛ̍ŋ mi̍ di̍mūl nda̍ le̍ mā wa̍ lēchōo̍ wo̍, ā chi̍i̍ kpe̍ma̍ ko̍ŋ tɛ̄ɛ̄mbūū.

²¹ Le̍ he̍ī, kāa̍la̍ Chɔ̄ɔ̍sūāā o̍ mɛ̍i̍ le̍ sōlīo̍o̍ o̍ lɛ̄ŋndē Ke̍nāŋnde̍ŋ ni᷄ŋ te̍le̍ŋ pa̍ mbo̍ wū la̍ŋ ki̍nɛ̍i̍, I̍ so̍lī lɛ̍ la̍ŋ mī to̍ū la̍ŋ mɛ̄ɛ̍ ya̍ i̍i̍ chu̍e̍l nda̍ būŋgɛ̄i̍ yɛ̍ le̍.

²² I̍ cho̍ tōsā mī kāa̍la̍ la̍ŋ lā wa̍ nda̍ tɛ̄ɛ̄ŋ, le̍ mī to̍fa̍ nda̍ mī si̍na̍ tē ā tūāl ni̍ŋ nɛ̍i̍ nu̍u̍ kɔ̄ɔ̄lī, nɛ̄i̍ fi̍nyāā ndāā ma̍māa̍ ā wa̍ chōo̍ wo̍, ɔ̄ɔ̄ tē ā tu᷅l ni̍ŋ ndu̍ kɔ̄ɔ̄lī le̍.”

²³ O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ kāa̍la̍ Ke̍na̍na̍i̍tīi̍la̍ŋ nda᷅ŋ lā hīāū lāchī a̍ cha᷄lle̍ o̍ lɛ̄ŋndē Ke̍nāŋnde̍ŋ ni᷄ŋ I̍sɔ̄lūɛ̍i̍ya̍ tɛ̄ɛ̄ŋ. Ō sōli̍ nda̍ o̍ lēpīlɛ̍ ni̍ŋ kpe̍ ɔ̄ɔ̄ mbō tōsa̍ mī I̍sɔ̄lūɛ̍i̍ya̍ ā yēm nda̍ kpo̍u̍ le̍.