Ha̍kāī 2 - Yāu̍ Mɛ̄lɛ̄ka̍a̍

A̍ nāŋɔ̄ɔ̄ bɛ̄ndū chīɛ̄ī sɛ̄nɛ̄i̍ Mɛ̄lɛ̄ka̍a̍ o̍kɔ̄ɔ̄

¹ Wɔ̄sī Māsā Bɛ̍ndōo̍ Da̍līɔ̄ɔ̄ o̍ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā Pa̍a̍sīāā wo̍, o̍ pāŋgi̍i̍ ŋɔ̍mmɛ̍ūve̍ ni᷄ŋ, mālɔ̄ bi̍di̍i̍ŋ a̍ lē pīlɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̍lɛ̄ nāa̍ Ha̍kāī, wāna̍ su̍a̍ā le̍ Mɛ̄lɛ̄ka̍ wo̍ chūā. Mbo̍ dīmūl ndu̍ āā,

² “Nyu̍na̍ wɔ̍ Sɛ̄lūba̍bɛ̄l, māsa̍ ībūŋgāa̍ le̍ Chu̍dā, po̍ Si̍ɛ̍ɛ̍tīɛ̄l wo̍, nda̍ Chɔ̄ɔ̍sūāā, Māsa̍ wānāā sōlīāā lāsa̍lāa̍, po̍ Chɛ̄hōsa̍da̍kī wo̍, a̍ wānā o̍ wāna̍ fu̍la̍ o̍ bīyɔ̄ɔ̍ ni᷄ŋ ma̍ mīīŋgū. Nyu̍na̍ wɔ̍ nda̍ āā,

³ ‘Ō nɛ̄ɛ̍nɛ̍ cho̍ yɛ̄ nya̍ tɛ̄ɛ̄ŋ na̍ŋ, mbo̍ chā mɛ̄ɛ̍ chīɛ̍i̍ Mɛ̄lɛ̄ka̍a̍ ndu̍ o̍o̍ na̍ŋ pāāndū yɛ̍? Ndu̍yɛ̍ vɛ̄ɛ̍nɛ̍ nya̍ chō yɛ̄ ni᷅ŋ ndu̍ chɔ̄ɔ̍ ha̍ū? Tē wānā tu̍u̍ chīɛ̄īyo̍ ho̍ō a̍ ō pāāndōo̍ pɛ̍, ho̍ō cho̍ nyɛ᷅ o̍ nyɛ̄ le̍.’

⁴ Kɛ̍ ndu̍yɛ̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. Nūm Sɛ̄lūba̍bɛ̄l, a̍ nūm Chɔ̄ɔ̍sūāā, māsa̍ wānāā sōlīāā lāsa̍lāa̍, a̍ nya̍ wānāā tūa̍a̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍ kpo̍u̍, lā sīmu̍l kɔ᷅lta̍ŋ yi̍, mī lā tōsa̍ wa̍llo̍, I̍ cho̍ wā a̍ nya̍ lātūlu̍.

⁵ Bōōndi̍i̍ nya̍ I̍sɔ̄lūɛ̍i̍ya̍ fūla̍ sīndɛ̄ I̍chi̍pī o̍ chɛ̄le̍ŋ ni᷄ŋ nde̍, mi̍ I̍ chu̍ēl nya̍ būŋgɛ̄i̍ māā I̍ cho̍ wā a̍ nya̍ lātūlu̍ le̍ te̍le̍ŋ o̍ te̍le̍ŋ. Le̍la̍ŋ lā yɔ᷅ŋ īsīōōŋ te̍ I̍ cho̍ a̍ nya̍ lātūlu̍.

⁶ “Ya̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ Bɛ̄ndōo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. O̍ te̍le̍ŋ bi̍ŋgī bɛ̄ŋgu̍, I̍ cho̍ vɛ̄lɛ̄ nyɔ̄ɔ̍ŋ mu᷅ŋ hīīlūū, ha̍lāa̍, a̍ chi̍e̍ēŋndo̍, a̍ Pēē Mɛ̄ŋmā Īhɛ᷄llo̍ ndu̍yɛ̍ a̍ lɛ̄ŋndē vēsɛ̍i̍le̍ŋ.

⁷ I̍ cho̍ lɛ̄ŋīī chēle̍ŋnde̍ o̍ chi̍e̍ēŋndo̍ ni᷄ŋ hi̍i̍lūū, mī I̍ to̍sa̍ mī lɛ̄ŋīī kēŋ hīŋ a̍ nyɛ̄m nda᷄ŋ ba̍ā kāla᷄ŋ na̍ŋnu᷄ŋ, o̍ ko̍ŋ, mī chīɛ̍i̍ Mɛ̄lɛ̄ka̍a̍ pɛ̄ a̍ nyɛ̄m ba̍ā kālāŋ bɛ̄ndo᷄ŋ.

⁸ Ka̍ni̍ŋ hu̍mbo᷄ŋ ni̍, ko̍o̍līi̍yo̍ŋ ni̍, ya̍ Mɛ̄lɛ̄ka̍ ya̍ nɔ̍ mu̍ŋ kpo̍u̍ ni̍.

⁹ Bɛ̄ɛ̄le̍ chīɛ̄īyo̍ ho̍ō, ō chō ni᷅ŋ hūnɔ̄ɔ̄ sɔ̄lā le̍ŋ, lē hīāū ni᷄ŋ bɛ̄ɛ̄le̍ tāse̍le̍ŋ. Ndu̍yɛ̍ o̍ fo̍ndāŋndo̍ ho̍ō, ya̍ I̍ to̍sā ni̍ŋ ni̍ mī wānāā nīa̍a̍ ā sɔ̄la̍ dɛ̍nɛ̍ kɛ̍ndɛ̄ bɛ̍ndōo̍. Ya̍ Mɛ̍lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nyɛ̄ ya̍ I̍ di̍mi̍ wo̍ cho̍ ko̍ŋ ni̍.”

A̍ mɛ̄ɛ̍ wāna̍ su̍a̍ā le̍ Mɛ̄lɛ̄ka̍ wo̍ ō nyūna̍ wānāā sōlīāā lāsa̍lāa̍ dīōm yɛ̍ o̍kɔ̄ɔ̄

¹⁰ Wɔ̄sī Māsāa̍ Bɛ̍ndōo̍ Da̍līɔ̄ɔ̄ o̍ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā wo̍, o̍ pāŋgi̍i̍ ŋɔ̍ma̍hīɔ̍ɔ̍lūe̍i̍ ni᷄ŋ mālɔ̄ bi̍di̍i̍ŋ a̍ lē hīɔ̍ɔ̍lu̍, mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō sūāā vɛ̄lɛ̄ nāa̍ Ha̍kāī, wāna̍ su̍a̍ā le̍ Mɛ̄lɛ̄ka̍ wo̍ chūā.

¹¹ Mbo̍ dīmūl ndu̍ āā, “Nyu̍na̍ wa̍nāā sōlīāā lāsa̍lāa̍ nyūnāa̍ ho̍ō mā mūlu̍l nu̍m. Nyu̍na̍ nda̍ āā,

¹² Tē ō wa̍ pɛ̍ mī wāŋndo̍ ō chu̍a̍ vīsīi̍ cho̍ ī yɔ̄ŋga᷄ŋ o̍ Mɛ̄lɛ̄ka̍ lo̍ ve̍ mbō dɔ̄ū ndi̍ o̍ dōma̍ ndɔ̄ɔ̍ ni᷄ŋ, mbō lo̍ kɔ̄la̍ŋ a̍ ndi̍, mī bɔ̄ɔ̄lē dōma̍ ko̍ŋ lē kēi̍ bēe̍dīi̍yo̍, ɔ̄ɔ̄ nyɛ̄ dīāā yāūwāa̍, ɔ̄ɔ̄ māmūɛ̄īmā mākīle̍pīi̍ya̍ŋ, ɔ̄ɔ̄ chūɛ̄īmā ɔ̄li̍fīi̍ya̍ŋ, ɔ̄ɔ̄ nyɛ̄ o̍ nyɛ̄ dīāā chēle̍ŋ pīla᷄ŋ, bāā nyɛ̄ bɔ̄ɔ̄lē dōmā ko̍ŋ pīlāŋ ko̍ŋ ndo̍ ō sīmnūŋ pa̍ nyɛ᷅ kāsī, le̍ mɛ̄ɛ̍ vīsīī kēŋ ī chō o̍ dōmā ko̍ŋ ni᷄ŋ yɛ̍?” Ndu̍yɛ̍ mɛ̄ɛ̍ nyūnāa̍ ho̍ō ō nyūna̍ŋ, mi̍ wānāā sōlīāā lāsa̍lāa̍ ā mūlī āā, “Sāko̍.”

¹³ Mi̍ Ha̍kāī lo᷅ o̍ ko̍ŋ mbo̍ nyūnā vɛ̄lɛ̄ āā, “Kɛ̍ tē ō wa̍ yɛ̍ mi̍ wāŋndo̍ ō sīmnu᷄ŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l le̍ mɛ̄ɛ̍ o̍ pi̍la̍ŋ wa̍nā vi̍lɛ̍i̍yo̍ yɛ̍, mī wānā ko̍ŋ ō pīla̍ŋ nyɔ̍ɔ̍ŋ mu᷅ŋ ō pīlɛ̍ bɛ̍ɛ̍, bāā nyɛ̄ o̍ pi̍lāŋ ko̍ŋ ndo̍ ō sīmnūŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l?” Mi̍ wānāā sōlīāā lāsa̍lāa̍ ā mūlī āā, “E̍ī, mbō sīmnūŋ o̍ nɔ̍ɔ̍lɛ̍i̍.”

¹⁴ Mi̍ Ha̍kāī o̍ di̍mūl nda̍ māā, Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Mɛ̄ɛ̍ le̍nde̍ ko̍ni̍ i̍ cho̍ a̍ wānāa̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍ ni̍, ā cho̍ a̍ di̍a̍ndāā ya̍ Mɛ̄lɛ̄ka̍ o̍ hɔ̄l te̍. Ndu̍yɛ̍ nyɛ̍ o̍ nyɛ̄ nda̍ chō sɔ̄lāa̍ o̍ wa̍lta̍ ndāla̍ īchīɛ̄īla̍ŋ ni᷄ŋ, ō cho̍ o̍ di̍a̍ndāā le̍. Le̍ he̍ī, nyɛ̄ o̍ nyɛ̄ nda̍ chō hūnɔ̄ɔ̍ le̍ sa̍lāa̍ sōlīo̍o̍ o̍ ma̍āŋndo̍ ho̍ō chōo̍, ō cho̍ o̍ di̍a̍ndāā ya̍ Mɛ̄lɛ̄ka̍ o̍ hɔ̄l te̍.”

Mɛ̄lɛ̄ka̍ Ya̍a̍wɛ̄ɛ̄ chu̍e̍l wānāā ndūa̍a̍ būŋgɛ̄i̍ le̍ nda̍ sa̍lāa̍ dɔ̄wɔ̄ɔ̍

¹⁵ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbo̍ dīmī āā, “Lā kāndu̍ wɔ̍ ha̍ū yi̍ya᷄ŋndo̍. Lɔ̍ɔ̍pa̍ mi̍ lā kāndū chīɛ̍i̍ Mɛ̄lɛ̄ka̍a̍ ho̍ō mīŋgīo̍o̍ tāŋgūllo̍, lā yīya᷄ŋ ndɔ̍ mɛ̄ɛ̍ sɔ̄ɔ̍ŋ ŋ̄ wa̍ nya̍ yɔ̄nɔ᷄ŋndo̍ yɛ̍.

¹⁶ A̍ te̍le̍ŋ ko̍ŋ, mī wāŋndo̍ ndu̍ o̍o̍ chu̍u̍ŋgi̍a̍a̍ tɔ̄lɔ̄ɔ̄ ndɔ̄ɔ̍, mbō yīya̍ŋ māā ō chō sɔ̄lā bu̍sɛ̄la̍ŋ bi̍di̍i̍ŋ. Kɛ̍ bu̍sɛ̄la̍ŋ tɔ̍ ko̍ni̍ o̍ sɔ̍lā ni̍. Ndu̍yɛ̍, mī wāŋndo̍ ndu̍ o̍o̍ wa̍ mūɛ̄īmā kīle̍pīi̍ya̍ŋ tōōsīa̍a̍ o̍ fo̍ndāŋ tōōsīāā māmūɛ̄īyo̍, mbō yīya̍ŋ māā ō chō sɔ̄lā ka̍lɔ̄ŋnda̍ŋ be̍le̍-ŋu̍ɛ̍ɛ̍nu̍, kɛ̍ bi̍di̍i̍ŋ ko̍ni̍ o̍ sɔ̄la̍ ni̍.

¹⁷ Mi̍ I̍ lō o̍ ko̍ŋ mi̍ yɔ᷅ŋ hūēīyīī tūū bɛ̄ndūe̍i̍, a̍ kɛ̍ŋgɛ̍ŋgu̍lu̍ma̍a̍, a̍ lōōŋ kpu̍ŋbāŋ bɛ̄ndo᷄ŋ mi̍ tɛ̍ɛ̍mbūū tɔ̄lɔ̄ɔ̄la̍ŋ o̍ chīɔ̍ɔ̍ŋ nya᷄ŋ ni᷄ŋ. Kɛ̍ a̍ ko̍ŋ kpo̍u̍ lā chɛ᷄l mī lā mīīŋgu̍ ya̍ Mɛ̍lɛ̄ka̍ Ya̍a̍wɛ̄ɛ̍ nyāa̍ o̍ ībūŋ te̍.

¹⁸ Pāŋgi̍i̍ ŋɔ̍ma̍hīɔ̍ɔ̍lūe̍i̍ o̍ wɔ̄sīo̍o̍ ho̍ō ni᷄ŋ, ī chō hāū ma̍lɔ̄ bi̍di̍i̍ŋ a̍ lē hīɔ̍ɔ̍lu̍. Pāa̍le̍ŋ nde᷅ŋ nya̍ chīi̍ chīyīī chīɛ̍i̍ Mɛ̄lɛ̄ka̍a̍ kīlā ni̍. Le̍la̍ŋ, chɔ̍ŋ a̍ pāa̍le̍ hāūle̍ŋ nde᷅ŋ mbō kūɛ̄ a̍ lāchī, lā kāndu̍ to̍fāa̍ a̍ mɛ̄ɛ̍ sɔ̄ɔ̍ŋ ŋ̄ chō nya̍ wā yɔ̄nɔ᷄ŋndo̍ yɛ̍.

¹⁹ Ko̍nda̍la̍ nyāla̍ŋ kpo̍u̍, wānā se̍e̍lūŋ ndɛ̍ hāū īyɛ̄i̍ o̍ īyɛ̄i̍ o̍ wāŋndo̍ lo̍ le̍. Ndu̍yɛ̍, yɔ̄mīī nyɛ̄i̍ mākīle̍pīi̍ye̍ ni̍, yɔ̄mīī māfi̍kīi̍ye̍ ni̍, yɔ̄mīī māpɔ̄mɛ̄ki̍la̍ne̍tīi̍ye̍ ni̍, a̍ yɔ̄mīī ɔ̄li̍fīi̍ye̍, ndi̍ kpo̍u̍ ō pīlɛ̍ bɛ̍ɛ̍ o̍ kēndu̍ wɔ̍ ko̍mɔ̄ɔ̍ le̍. Kɛ̍ chɔ̍ŋ a̍ pa̍a̍le̍ hāūle̍ŋ nde᷅ŋ, I̍ cho̍ nya̍ sa̍lāa̍ dɔ̄wɔ̄ɔ̄.”

Mɛ̄lɛ̄ka̍ Ya̍a̍wɛ̄ɛ̄ chu̍e̍l Sɛ̄lūba̍bɛ̄l būŋgɛ̄i̍

²⁰ O̍ ko̍ŋ kɔ̍ɔ̍lī, o̍ pāa̍le̍ pi᷅lɛ̍lē lēŋ chōo̍ kpe̍, pāa̍le̍ bi̍di̍i̍ŋ a̍ lē hi̍ɔ̍ɔ̍lūle̍ŋ o̍ pāŋge̍i̍ ke̍ŋ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ Ha̍kāī chu̍a̍ di̍i̍ŋ ndɔ̄ɔ̍.

²¹ Mbo̍ dīmūl ndu̍ āā, “Di̍mu̍l Sɛ̄lūba̍bɛ̄l, māsa̍ ībūŋgāa̍ le̍ Chu̍dā āā, ‘I̍ bɛ̍ɛ̍ndi̍a̍ŋ le̍ ha̍la̍a̍, a̍ chi̍e̍ēŋndo̍ hīīlūūwo̍,

²² ndu̍yɛ̍ mī I̍ fa̍ŋa̍ māsāa̍ cho̍ o̍ kpāāyāla̍ŋ ni᷄ŋ nda̍ o̍ lēmāsā. I̍ bɛ̍ɛ̍ndi̍a̍ŋ le̍ mī tɛ̍ɛ̍mbu̍u̍ kpāāyāla̍ māsāa̍ o̍ chi̍e̍ēŋndo̍ ni᷄ŋ a̍ ti̍i̍nda̍ŋ nda̍ŋ. O̍ ko̍ŋ kɔ̍ɔ̍lī, mī I̍ tɛ̍ɛ̍mbu̍u̍ nyɛ̄lā ndāla̍ sūa̍a̍ ā nāŋ nda̍ŋ ndu̍yɛ̍, a̍ wānāa̍ ku̍ā a̍ nyɛ̄lā lāŋ nda̍. I̍ cho̍ tōsā mī sūa̍a̍ ndāa̍ chɔ̄ūwa̍ ā sɔ̄la̍ pīɔ̍mnda̍ŋ, ndu̍yɛ̍ mī wānāa̍ ku̍ā a̍ o̍ su̍a̍ā kāŋ nda̍ mī nda̍ pi̍la̍ ā dīūwa᷅ŋ a̍ mɔ̄ɔ̄ŋ fāŋndo̍ŋ.

²³ Nūm bu̍ɛ̍ī nūu̍ Sɛ̄lūba̍bɛ̄l, po̍ Si̍ɛ̍ɛ̍ti̍ɛ̄l wo̍, tē pāa̍le̍ le̍ŋ lē fūūlu̍u̍ pɛ̍, I̍ cho̍ nu̍m hɛ̄lī mī si̍i̍ŋgu̍u̍ nu̍m māsāa̍. Mɛ̄ɛ̍ māsā bɛ̄ndōo̍ nɔ̄ nu̍a̍ā kēlɛ̄i̍ ta̍mbūe̍i̍ye̍ o̍ īsū le̍ kpāāya̍ ndɔ̄ɔ̍ chɔ̄mndo̍ yɛ̍, le̍nde̍ ya̍ cho̍ nu̍m kpāāya̍ nūu̍ kē ni̍ le̍ mā wa̍ māsāa̍ wāŋnda̍ chōo̍. Ya̍ Mɛ̄lɛ̄ka̍, ya̍ hɛ̍li̍ nu̍m ni̍.’ ” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ō dīmi̍ wo̍ cho̍ ko̍ŋ ni̍.