Ɛ̄si̍tā 2 - Yāu̍ Mɛ̄lɛ̄ka̍a̍

Ɛ̄si̍tā si̍mnu᷄ŋ la̍nɔ̍ɔ̍ māsā bɛ̍ndōo̍

¹ Mɛ̄ɛ̍ te̍le̍ŋ ti᷅ŋ hīo̍u̍, mi̍ kɔ̄llo̍ pɔ̄lūl Māsāa̍ Bɛ̍ndōo̍ Sɛ̍sɛ̄ɛ̄. O̍ ko̍ŋ, mbo̍ sāā yīya᷄ŋndo̍ a̍ Va̍si̍tā la̍a̍ ndɔ̄ o̍kɔ̄ɔ̄, mbo̍ wā yīya᷄ŋndo̍ a̍ nyɛ̄ o̍ to̍sa̍ wo̍, ndu̍yɛ̍, mbo̍ wā vɛ̄lɛ̄ yīya᷄ŋndo̍ a̍ sāwa̍ o̍ dɔ̍ū a̍ ndu̍ o̍kɔ̄ɔ̄ wo̍.

² Pāa̍le̍ pi᷅lɛ̍, mi̍ wānāa̍ wa̍ ndu̍ wa̍llo̍ o̍ bā bɛ̄ŋgu̍ wa̍ ā dīmūl ndu̍ āā, “Fāllo̍, ō bɛ̄ndā mī ŋ̄ kēēla̍ hɔ̄lte̍ŋ mī ŋ̄ tōfa̍l nu̍m wānā la̍nɔ̍ɔ̍ mbō mīīŋgu̍ o̍ fōōfo̍ Va̍si̍tā wo̍.

³ Le̍la̍ŋ, hɛ̍li̍ wa᷅ŋnda̍ mā bālu̍ o̍ būŋgāŋ ŋ̄ chō māsāa̍ chōo̍ ki̍nɛ̍i̍ yo̍ŋ ni᷄ŋ, mā hɛ̄li̍ chūāā lāāndūāā kɛ̄ndɛ̄ kɛ̍ndīa̍a̍, a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍. Tē ā hɛ̄li̍ nda̍ pɛ̍ kpo̍u̍, ā hīŋ a̍ nda̍ Su̍sā chi̍e̍e̍ na̍nu᷄ŋ, o̍ cho̍ chi̍e̍e̍ le̍bo᷅llo̍ wo̍, ā hu᷄ŋ kɛ̍sī nda̍ o̍ chīɛ̄ī lēmāsāa̍ ni᷄ŋ nāa̍ wāŋ lāāndūa̍a̍ ā chō wa̍. O̍ ko̍ŋ, mī ŋ̄ chūa̍ nda̍ mī ŋ̄ ke̍ He̍kāī, lāŋu̍nɔ̄ cho̍ wāŋ lāāndāā nūmnda̍ māndāa̍ wo̍, mbō mānda̍ nda̍ le̍ te̍le̍ŋ ti᷅ŋ, mbō bīī nda̍ nyɛ̄ kɛ̄ndɛ̄ kɛ̍ndɛ̄, bīyɔ̄ɔ̍ to̍sā mī wānā la̍nɔ̍ɔ̍ ō na᷄ŋ ndo̍.

⁴ Tē te̍le̍ŋ ko̍ŋ ō hīōū pɛ̍, chūāā lāāndūāā kāŋ ki̍nɛ̍i̍ ō ŋ̄ chā māā ō na᷄ŋ mbo̍ hīnī nu̍m kɔ̄llo̍, a̍ chu̍a̍ ndu̍ ō sīmnu᷄ŋ la̍a̍ nu̍m, ō mīīŋgu̍ o̍ fōōfo̍ Va̍si̍tā wo̍.” Mɛ̄ɛ̍ Māsāa̍ Sɛ̍sɛ̄ɛ̄ o̍ tu̍e̍ī sīlāa̍ ho̍ō, mbo̍ chɛ̄la᷅ŋ a̍ nda̍, mbo̍ tōsā le̍nde̍.

⁵ Ndu̍yɛ̍ lāŋu̍nɔ̄ Chu̍ūnɔ̄ pīlɛ̍ wa̍ Su̍sā lo̍ŋ dīōla̍ŋ āā Mɔ̍di̍kāī, fi̍nyā ndɔ̍ dīōla̍ŋ āā Cha̍yāā. Cha̍yāā ko̍ŋ, fi̍nyā ndɔ̍ wa̍ Si̍mɛ̄ī ni̍, Si̍mɛ̄ī ko̍ŋ yɛ̍, ndu̍ fi̍nyā ndɔ̍ wa̍ Ki̍sī ni̍, fūlāa̍ o̍ yu̍ŋgu̍ Bɛ̍ŋnja̍mīŋndo̍ chōo̍.

⁶ Bōōndi̍i̍ Māsāa̍ Nābi̍u̍kānɛ̍ɛ̍sā, o̍ wa̍ Ba̍bi̍lɔ̄ŋ ndo̍ ō bīī Chūlu̍sɛ̄lɛ̄m nde̍, wānāā o̍ ku̍ɛ̄ o̍ bīyɔ̄ɔ̍ ni᷄ŋ a̍ Māsāa̍ Chɛ̄hōwa̍chīŋ, o̍ wa̍ Chu̍dā wo̍ la̍tu̍lu̍ wa̍, Mɔ̍di̍kāī o̍ wa̍ wāŋndo̍ ō pīlɛ̍.

⁷ Mɔ̍di̍kāī ko̍ŋ ndu̍ o̍o̍ nɔ̍ chūāāmbɔ̄ pīlɛ̍ o̍ bā dīōla̍ŋ āā Hāda̍sāā, kɛ̍ mī nda̍ a̍a̍ ve̍e̍lū ndu̍ vɛ̄lɛ̄ āā Ɛ̄si̍tā. Bōm ndɔ̍ ndu̍ o̍o̍ ve̍lū chūāāmbɔ̄ɔ̍ ho̍ō ni̍, kɛ̍ bōm ndɔ̄ ko̍ŋ nda̍ la̍a̍ ndɔ̄ kpo̍u̍ ma̍ wū. Mɔ̍di̍kāī lo̍ ni᷅ŋ chūāāmbɔ̄ɔ̍ ho̍ō māndāa̍ ni̍ mbo̍ sōlī ndu̍ lēni᷄ŋ. Mi̍ Mɔ̍di̍kāī chu̍ā ni̍ko̍ chu̍a̍a̍mbɔ̄ɔ̍ ho̍ō māā chūā ndɔ̍ ŋ̄pūlu̍ kpe̍e̍kpe̍i̍. Ndu̍yɛ̍, Ɛ̄si̍tā yɛ̍ nāŋɔ̄ɔ̍ pīla̍ ndu̍ o̍o̍ na̍nu᷄ŋ ni̍, wānā o̍ wānā ndu̍ o̍o̍ che᷅ ndu̍ pɛ̍, nyɔ̄ɔ̍ hɛ̍nāŋ ndu̍ ni̍.

⁸ Mi̍ Māsāa̍ Sɛ̍sɛ̄ɛ̄ o̍ ma᷅l wāŋnda̍ ma̍ bālū o̍ lɛ̄ŋnde̍ŋ ni᷄ŋ kpo̍u̍, le̍ mā hɛ̄li̍ chūāā lāāndūāā kɛ̄ndɛ̄ kɛ̍ndīa̍a̍, ā nda̍ a̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍. O̍ ko̍ŋ, ma̍ hɛ̄lī chūāā lāāndūa̍a̍ ta̍u̍ ta̍u̍ ma̍ kūā a̍ nda̍ Su̍sā chi̍e̍e̍ o̍ chīɛ̄ī lēmāsāa̍ ni᷄ŋ. Ndu̍yɛ̍, Ɛ̄si̍tā bɛ̍ɛ̍, ō wa̍ chūāā lāāndūa̍a̍ ha̍ā tɛ̄ɛ̄ŋ. O̍ ko̍ŋ, ma̍ chūā chūāā lāāndūa̍a̍ ha̍ā ma̍ yɔ̄ŋgū He̍kāī, wāna̍ wa̍ wāŋ lāāndūa̍a̍ māndāa̍ wo̍ le̍ mbō wa̍ nda̍ māndāa̍, mbō bīī nda̍ nyɛ̄ kɛ̄ndɛ̄ kɛ̍ndɛ̄.

⁹ Ndu̍yɛ̍ mi̍ He̍kāī o̍ cha᷅ Ɛ̄si̍tā nyīnā ta̍u̍. O̍ ko̍ŋ, ta̍ma̍la̍ bɛ̍ɛ̍ ō tōsa̍ le̍, mbo̍ kāndū bɛ̍ɛ̍ Ɛ̄si̍tā bīyɔ̄ɔ̍ nyɛ̄ kɛ̄ndɛ̄ kɛ̍ndɛ̄, bīyɔ̄ɔ̍ to̍sā mī wānā la̍nɔ̍ɔ̍ ō na᷄ŋ ndo̍, mbo̍ wā ndu̍ nyɛ̄ dīāā kɛ̄ndɛ̄ kɛ̍ndɔ̄ɔ̍ kīo̍o̍. O̍ ko̍ŋ kɔ̍ɔ̍lī, mbo̍ fāŋā ndu̍ ha̍ā chōo̍ mbo̍ hīvī ndu̍ o̍ fo̍ndāŋ kɛ̄ndɛ̄ kɛ̍ndɔ̄ɔ̍, ō ndu̍ o̍o̍ bɛ̍nda̍ mbo̍ hīāū la᷅ŋ kpo̍u̍ wo̍. O̍ ko̍ŋ kɔ̍ɔ̍lī, mbō hɛ̄lī chūāā lāāndūa̍a̍ ā ŋɔ᷄mmɛ̍ū o̍ chīɛ̄ī lēmāsāa̍ ni᷄ŋ, mbo̍ kē Ɛ̄si̍tā le̍ mā wa̍ ndu̍ mālāa̍.

¹⁰ Kɛ̍, Ɛ̄si̍tā o̍ chɔ̍m wa̍nā o̍ wānā māā Chu̍ūnɔ̄ le̍ o̍ cho̍ le̍, kāni̍ fo̍ndōle̍, mi̍ Mɔ̍di̍kāī o̍ si̍lā ndu̍ o̍ kālā ka̍lā māā ō chɔ᷅m wānā a̍ ndi̍ o̍kɔ̄ɔ̄ le̍.

¹¹ Ndu̍yɛ̍, lēpāa̍ o̍ lēpāa̍, Mɔ̍di̍kāī ndu̍ o̍o̍ nɔ̍ kɔ̄la̍ŋ o̍ chīɛ̄ī nda̍ wa̍ ho̍ō chūāā lāāndūa̍a̍ ha̍ā māndāa̍ wo̍ dīō, mbō bālū wa᷅ŋnda̍ tɛ̄ɛ̄ŋ le̍ mbō tūēī a̍ Ɛ̄si̍tā o̍kɔ̄ɔ̄, mbō sīna̍ mɛ̄ɛ̍ o̍ wa̍ yɛ̍.

¹² Ndu̍yɛ̍, le̍ pāŋgo̍ŋ tɔ̍ a̍ ŋ̄ mūu̍ŋ nda̍ a̍a̍ nɔ̍ le̍ chūāā lāāndūa̍a̍ ha̍ā bīyɔ̄ɔ̄ kɛ̄ndɛ̄ kɛ̍ndɛ̄ kōŋ ni̍, o̍ to̍sā mī wānā la̍nɔ̍ɔ̍ o̍ na᷄ŋ ndo̍. Pāŋgu̍ŋ ŋɔ̍mpu᷅m tāso̍ŋ ki̍nɛ̍i̍, chūɛ̄īmā Mɔ̍ɔ̄ wa̍ŋ, ma̍ŋ nda̍ wa̍ nda̍ kīo̍o̍ le̍ sūūnɔ᷄ŋndo̍ ni̍. O̍ ko̍ŋ kɔ̍ɔ̍lī, pāŋgu̍ŋ ŋɔ̍mpu᷅m ndo̍ŋ ŋ̄ pīlɔ̍ŋ vɛ̄lɛ̄ ki̍nɛ̍i̍, chūɛ̄īmā bāli̍sām nda̍ŋ, ma̍ŋ nda̍ wa̍ nda̍ kīo̍o̍ le̍ sūūnɔ᷄ŋndo̍ ni̍. Mɛ̄ɛ̍ pāŋgu̍ŋ tɔ̍ a̍ ŋ̄ mūu̍ŋ ndo̍ŋ mu᷅ŋ ŋ̄ hīo̍u̍, ma̍ kāndū ni̍ko̍ kɔ᷅la̍ŋ a̍ nda̍ a̍ pi̍lɛ̍ŋ pi̍lɛ̍ŋ nda̍ o̍ Māsā Bɛ̍ndōo̍ Sɛ̍sɛ̄ɛ̄ lo̍.

¹³ Ndu̍yɛ̍ chūāā lāāndūa̍a̍ ha̍ā, te̍ te̍le̍ŋ ō pīlɛ̍ ndu̍ o̍o̍ fu̍u̍lu̍u̍ pɛ̍, mī ndu̍ o̍o̍ wa̍ kɔ̄la̍ŋ o̍ māsāa̍ lō, nyɛ̄ o̍ nyɛ̄ chūɛ̄ɛ̄na᷄ŋ ndu̍ o̍o̍ ye̍e̍ma̍ pɛ̍ o̍ chīɛ̄ī nda̍ wa̍ ko̍ŋ ndo̍, ndu̍ nda̍ a̍a̍ ke᷅ ndu̍ ni̍ mbō wōūnu̍ŋ.

¹⁴ Tē nyūmnda̍ŋ mā tōl pɛ̄, ā kūɛ̄ a̍ ndu̍ o̍ māsāa̍ lo̍ chi̍ɛ̍ī ni̍ŋ. Tē ō pāa̍le̍ŋ lē sɛ̄ pɛ̍ dīi̍mā ndɔ̄ɔ̍, ā pēna̍ ndu̍ sōlī ā kūɛ̄ a̍ ndu̍ o̍ chīɛ̄ī wāŋ lāāndūa̍a̍ kpēŋgēi̍ pīlɛ̍i̍, nāa̍ lāāndāā ndūāā pɔ̍mbūa̍a̍ ā pīli̍a̍a̍ ā chō wa̍, ā kɔ̍ yɔ̍ŋgū ndu̍ o̍ Sīāāsīka̍a̍sī lo̍, Po̍ wa̍ māsāa̍ lāāndāā ndūāā pɔ̍mbūa̍a̍ māndāa̍ wo̍. Ndu̍yɛ̍ tē nda̍ a̍a̍ ku̍ɛ̄ ni᷅ŋ a̍ ndu̍ lo̍ŋ pɛ̍, lo̍ŋ ndu̍ o̍o̍ nɔ̍ ni᷅ŋ ni̍ mbō wa̍, mɛ̄ɛ̍ mī māsāa̍ ndu̍ o̍o̍ ye̍e̍ma̍ ndu̍, mbō vēēlu̍ ndu̍ dīōla̍ŋ, mā kūɛ̄ mā kɔ̍ hu᷅ŋ a̍ ndu̍.

¹⁵ O̍ ko̍ŋ kɔ̍ɔ̍lī, mi̍ te̍le̍ŋndo̍ fūūlūū le̍ mī Ɛ̄si̍tā ku̍ɛ̄ o̍ māsāa̍ lo̍ chi̍ɛ̍ī ni̍ŋ. Ndu̍yɛ̍ Ɛ̄si̍tā fi̍nyā ndɔ̍ wa̍ A̍bi̍hēē ni̍. Mɔ̍di̍kāī yɛ̍, bōm ndɔ̍ wa̍ ko̍ŋ ni̍. Kɛ̍ Mɔ̍di̍kāī, ndu̍ lo̍ ni᷅ŋ Ɛ̄si̍tā māndāa̍ ni̍ mbo̍ sōlī ndu̍ lēni᷄ŋ. Ndu̍yɛ̍ Ɛ̄si̍tā yɛ̍, nāŋɔ̄ɔ̍ pīla̍ ndu̍ o̍o̍ na̍ŋ ni̍, wānā o̍ wānā ndu̍ o̍o̍ che᷅ ndu̍ pɛ̍, nyɔ̄ɔ̍ hɛ̍nāŋ ndu̍ ni̍. Mɛ̄ɛ̍ te̍le̍ŋ Ɛ̄si̍tā wo̍ ō fūūlu̍u̍, mi̍ Ɛ̄si̍tā do̍vi̍ŋ nyɛ̍ kɛ̄ndɛ̄ kɛ̍ndɛ̄. Ndu̍yɛ̍ He̍kāī, Po̍ wa̍ nda̍ māndāa̍ wo̍, ndu̍ chɔ̍m ndu̍ nyɛ̄lā ndu̍ o̍o̍ nɔ̍ mbō wōūnu̍ŋ nda̍ŋ ni̍.

¹⁶ O̍ ko̍ŋ kɔ̍ɔ̍lī, ma̍ chūā ndu̍ ma̍ kūā a̍ ndu̍ o̍ māsāa̍ lo̍ chi̍ɛ̍ī ni̍ŋ. Wɔ̄sī Māsāa̍ Sɛ̍sɛ̄ɛ̄ o̍ chi̍ŋa̍ wɔ̄sīla̍ŋ lā ŋɔ᷄mmɛ̍ū o̍ lēmāsā wo̍, pāŋgi̍i̍ tɔ̍ ve̍ o̍ wɔ̄sī kōŋ ni᷄ŋ, ī nda̍ vēēlū āā Tɛ̍bɛ̄ɛ̄ ve̍, o̍ pāŋgi̍i̍ ke̍ŋ ni᷄ŋ nda̍ kūɛ̄ a̍ Ɛ̄si̍tā o̍ māsāa̍ lo̍, o̍ chi̍ɛ̍ī lēmāsāa̍ ni᷄ŋ ni̍.

¹⁷ Ndu̍yɛ̍, mɛ̄ɛ̍ māsā bɛ̍ndōo̍ ō chē Ɛ̄si̍tā, mbo̍ kāālā Ɛ̄si̍tā mbo̍ hīāū chūāā lāāndūa̍a̍ ā pīli̍a̍a̍ kpo̍u̍. Mbo̍ chā Ɛ̄si̍tā nyīnā mbo̍ hīāū ha̍ā kpe̍nde̍. Mi̍ māsāa̍ lō o̍ ko̍ŋ mbo̍ wōū Ɛ̄si̍tā mɔ̍si̍l lēmāsāa̍, mbo̍ sīīŋgūū Ɛ̄si̍tā la̍nɔ̍ɔ̍ Māsā Bɛ̍ndōo̍ o̍ fōōfo̍ Va̍si̍tā wo̍.

¹⁸ Mi̍ māsā bɛ̍ndōo̍ lō o̍ ko̍ŋ mbo̍ vēēlū lāŋgba̍ā ndūāā ka᷅lla̍, a̍ wāŋ bɛ̄ndūāā lēlɛ̄ŋnda̍ kpo̍u̍, mbo̍ tōsā bɔ̄ŋa᷅ŋ dīāā nyɛ̄ dīāā bɛ̄ndōo̍ le̍ Ɛ̄si̍tā bɛ̄ɛ̄le̍ŋ kīo̍o̍. Ndu̍yɛ̍, mbo̍ pīɔ̄ū wāŋnda̍ nyɛ̄m lēmāsa᷄ŋ ta̍u̍ ta̍u̍, le̍ chɔ̄mndo̍ māā ō hīni̍ kɔ̄l. O̍ ko̍ŋ kɔ̍ɔ̍lī, mbo̍ sīīŋgūū pāa̍le̍ le̍ŋ pāa̍le̍ bɛ̍ndūle̍ŋ le̍ lɛ̄ŋnde̍ŋ kpo̍u̍.

Mɔ̍di̍kāī chi̍i̍ndi̍a̍a̍ yōōmū māsāa̍

¹⁹ O̍ ko̍ŋ kɔ̍ɔ̍lī, mi̍ ī yɔ̄nu᷄ŋ mi̍ Mɔ̍di̍kāī bɛ̍ɛ̍ o̍ si̍mnu᷄ŋ wa᷅na̍ wa̍llo̍ ō pīlɛ̍ o̍ chīɛ̄ī lēmāsāa̍ ni᷄ŋ.

²⁰ Kɛ̍, a̍ ko̍ŋ kpo̍u̍, Ɛ̄si̍tā ō dīmu̍l wa̍nā o̍ wānā māā Chu̍ūnɔ̄ le̍ o̍ cho̍ le̍. Mi̍ Mɔ̍di̍kāī o̍ si̍lā ndu̍ ō kālā ka̍lā māā ō chɔ᷅m wānā o̍ wānā ka̍a̍le̍ ndɔ̄le̍ŋ te̍. Ndu̍yɛ̍, nyɛ̄ o̍ nyɛ̄ Mɔ̍di̍kāī ndu̍ o̍o̍ di̍mu̍l ndu̍ le̍ to̍sāa̍ pɛ̍, ō so̍lī ndu̍ dīōm te̍, mɛ̄ɛ̍ ndu̍ o̍o̍ tu̍ɛ̍ī ndu̍ dīōm lɔ̍ɔ̍ o̍ wa̍ ndu̍ māndāa̍ wo̍ yɛ̍, le̍nde̍ ko̍ni̍ ndu̍ o̍o̍ tu̍e̍ī ndu̍ dīōm ni̍.

²¹ Ndu̍yɛ̍, wānāā nda̍ a̍a̍ to̍sā wa̍llo̍ o̍ chīɛ̄ī lēmāsāa̍ ni᷄ŋ nda̍ ā pīli̍a̍a̍, wa̍ Bīkīta̍nā nda̍ Tɛ̍lu̍ɛ̍sī ni̍. Wānāā ŋīɔ̍ɔ̍ŋnda̍ ha̍ā, nda̍ nda̍ a̍a̍ ma̍ndā di̍ōla̍ŋ le̍ lūɛ̄īyɔ̄ɔ̍ o̍ fo̍ndā lēmāsāa̍ ni̍. Kɛ̍, mi̍ pūa̍a̍ ŋi̍ɔ̍ɔ̍ŋnda̍ ha̍ā ā tāmbū kɔ̄l a̍ māsāa̍, ma̍ kɛ̄ɛ̄sīāā le̍ ndu̍ dīyɔ̄ɔ̍. Te̍le̍ŋ nda̍ wa̍ sūɛ̍i̍ he̍ī kɛ̄ɛ̄sīa̍a̍ wō, Mɔ̍di̍kāī wa̍ īchāli̍ o̍ dīō kpākīo̍o̍ īkɛ̄i̍.

²² Ndu̍yɛ̍ mbo̍ tūɛ̄ī nyɛ̄ o̍ nyɛ̄ nda̍ kɛ̄ɛ̄si̍a̍a̍ wo̍, mbo̍ kūā mbo̍ kɔ̍ di̍mūl Ɛ̄si̍tā. O̍ ko̍ŋ, mi̍ Ɛ̄si̍tā kɔ̍ di̍mūl māsāa̍, māā Mɔ̍di̍kāī di̍mu̍l ndu̍ a̍ ndi̍ o̍kɔ̄ɔ̄ ni̍.

²³ O̍ ko̍ŋ, ma̍ vēēlū pūa̍a̍ ŋi̍ɔ̍ɔ̍ŋnda̍ ha̍ā, ma̍ kɔ̄ɔ̄sā a̍ nda̍, ndu̍yɛ̍ mi̍ sūɛ̍i̍ bīī nda̍. O̍ ko̍ŋ, nda̍ ŋi̍ɔ̍ɔ̍ŋ kpo̍u̍ ma̍ lāndū nda̍. Ndu̍yɛ̍, mi̍ māsāa̍ dīmī māā ā pōōnyi̍a̍a̍ su̍ɛ̍i̍ he̍ī o̍ yāu̍ sɔ̄ɔ̍ŋ lēlɛ̄ŋndo̍ ni᷄ŋ.