Ɛ̄fi̍sīāŋnda̍ 6 - Yāu̍ Mɛ̄lɛ̄ka̍a̍

Mɛ̄ɛ̍ kālāa̍ ŋ̄chūāūwa̍ a̍ chūāūwāā ndāa̍ nɔ̄ le̍ bīya᷅ŋndo̍ yɛ̍

¹ Nya̍ chūāūwa̍, nyɛ̍ cho̍ nya̍ kūēē le̍ tōsāa̍ māā wānāa̍ Mɛ̄lɛ̄ka̍a̍ wo̍, ndu̍ cho̍ ni̍ māā lā tūe̍i̍ wa̍nāa̍ ve̍lū nya̍ wa̍ dīōm. Kāni̍ fu̍u̍le̍, he̍ī bɛ̍nda̍ le̍ tōsāa̍ ni̍.

² Ī chō ī dīmīa̍ŋ o̍ sāwāla̍ Mɛ̄lɛ̄ka̍la̍ŋ ni᷄ŋ āā, “Ke̍ fi̍nyā nu̍m bɛ̄ɛ̄le̍ŋ a̍ kālā nu̍m.” Sāwa̍ tāse̍ Mɛ̄lɛ̄ka̍ chūe̍l na̍a̍ būŋgɛ̄i̍ lēni᷄ŋ ndo̍, ndu̍ cho̍ ko̍ŋ ni̍. Būŋgɛ̄ī kēŋ ndi̍ cho̍ ni̍ āā,

³ “Ko̍ŋ to̍sā mī nyɛ̄ o̍ nyɛ̄ wa̍ ō kɛ̄ndɛ̄ a̍ nūm, ndu̍yɛ̍, mā sɔ̄lā yōōmū vīlɛ̄īyo̍.”

⁴ Nya̍ fi̍nyāa̍ yɛ̄, lā bi̍ī chūāūwāā nyāa̍ bīyɔ̄ɔ̄ wɔ̄ɔ̍ŋ o̍ to̍sā mā tāmbu̍ kɔ̄l a̍ nya̍ wo̍ le̍. Nyɛ̄ nya̍ nɔ̄ mī lā tōsa̍ wo̍ ndu̍ cho̍ ni̍ māā tē lā wa̍ nda̍ māndāa̍ pɛ̍, lā pɛ̄ɛ̄ku̍ nda̍ pɛ̄ɛ̄kūla̍ Māsānɔ̄ɔ̍ Mɛ̄lɛ̄ka̍la̍ŋ, ndu̍yɛ̍, mī lā sīla̍ nda̍ sīlālā ndɔ̄la̍ŋ.

Mɛ̄ɛ̍ chīa̍a̍ nda̍ wānāa̍ nɔ̍ nda̍ wa̍ ā nɔ̄ mā bīya᷅ŋ yɛ̍

⁵ Nya̍ cho̍ yɛ̄ chīa̍a̍ wa̍, lā tūe̍i̍ wa̍nāā nya̍ chō o̍ bā wa̍ dīōm. Lā ke̍ nda̍ bɛ̄ɛ̄le̍ŋ ndu̍yɛ̍, mī lā nɔ̄ sīōōŋīī ndɛ̄i̍. Lā tōsa̍ mu᷅ŋ a̍ kɔ̄l kpo̍u̍. Lā tōsa̍ mu᷅ŋ kpe̍e̍kpe̍i̍ mɛ̄ɛ̍ nya̍ tōsā nyɛ᷅ Ki̍li̍tī di̍mūl nya̍ wo̍ yɛ̍.

⁶ Tē lā wa̍ he̍ī tōsāa̍ pɛ̍, ō wa᷅ ko̍ bo̍o̍ndi̍i̍ nda̍ wā o̍ hɔ̄lndɔ̄ ndu̍yɛ̍, mi̍ lā yēēma̍ mā chāndu̍ nya̍ ve̍ le̍. Kɛ̍ lā tōsa̍ ndi̍ a̍ kɔ̄l kpo̍u̍ māā chīa̍a̍ Ki̍li̍tīa̍a̍ a̍ to̍sā nyɛ᷅ Mɛ̄lɛ̄ka̍ hɛ̄na̍ŋ nda̍ le̍ tōsāa̍ wo̍ wa̍.

⁷ Lā tōsa̍ wa̍li̍ nya̍ nɔ̄ le̍ tōsāa̍ wo̍ a̍ kɔ̄ltā kɛ̄ndɛ̄ nu̍a̍ā ŋ̄ yɔ̄ŋ āā le̍ Māsānɔ̄ɔ̍ Mɛ̄lɛ̄ka̍ nya̍ chō ndu̍ tōsāa̍ ni̍. Lā to̍sā ndu̍ māā le̍ wāna̍ chi̍e̍e̍ su̍e̍e̍ le̍.

⁸ Lā sīnā wa̍la̍ŋ māā wānā o̍ wāna̍ to̍sa̍ wa̍li̍ kɛ̍ndɔ̄ɔ̍ pɛ̍, ō wa̍ chɛ̍, ō wa᷅ chɛ̄ le̍, fāndāa̍ Māsānɔ̄ɔ̍ Mɛ̄lɛ̄ka̍ fāndā ndu̍ le̍ wa̍li̍ ndɔ̄ kɛ̍ndɔ̄ɔ̍ ni̍.

⁹ Nya̍ nɔ̍ chīa̍a̍ wa̍ bɛ̍ɛ̍, lā bīi̍ chi̍a̍ā nyāa̍ ō kɛ̄ndɛ̄ le̍nde̍. Lā pɛ̄ŋgi̍ nda̍ kɔ̄ŋgɔ̄līa̍ŋnda̍ŋ, kāni̍ fu̍u̍le̍, lā sīnā wa̍la̍ŋ māā nya̍ ni̍, chīāā nya̍ nɔ̄ wa̍ ni̍, wānā cho̍ ɛ̄chɛ̍nɛ̄, ndu̍ cho̍ Māsānɔ̄ɔ̍ le̍ nya̍ ve᷅llāa̍ vēllē ni̍. Ndu̍ ndu̍ hɛ̍lī ŋ̄wāŋndā chīe̍e̍ le̍.

Wōlɔ̄ɔ̄lā chɔ̄ūlā na̍a̍ ŋ̄ nɔ̄ mī ŋ̄ wōūnu̍ŋ nda̍ŋ

¹⁰ I̍ mɛ̍ɛ̍lū wɔ̍ a̍ nya̍ dīōmnda̍ŋ nda᷅ŋ dīmūllo̍. Ha̍a̍a̍ mi̍ lā wā o̍ dīōm pīlɔ̍ɔ̍ ni᷄ŋ a̍ Māsānɔ̄ɔ̍ Mɛ̄lɛ̄ka̍, ndu̍yɛ̍ mi̍ lā wā o̍ dīōm pīlɔ̍ɔ̍ ni᷄ŋ a̍ kpāāya̍ ndɔ̄ bɛ̍ndōo̍, lā wa̍ ni̍ko̍ a̍ dīāllūŋ kālā.

¹¹ Lā wōūnu̍ŋ wo̍lɔ̄ɔ̄lā chɔ̄ūlā Mɛ̄lɛ̄ka̍ kē nya̍ la̍ŋ kpo̍u̍. Ko̍ŋ to̍sā ni̍ mī lā nɔ̄la̍ mī lā kɛ̄ɛ̍ sɔ̄ɔ̍ŋ wɔ̍ɔ̍ŋ Māsa̍ Nyi̍nāā Wɔ̄ɔ̍ŋnda̍ kɛ̄ɛ̄sīāā le̍ nya̍ dɛ̄ɛ̄nīa̍a̍ le̍ mī lā tōsa̍ wo̍ŋ.

¹² Kāni̍ fu̍u̍le̍, sɔ̍ŋgɔ̄ na̍a̍ ŋ̄ chō ho̍ō wo̍, ō cho̍ sɔ̍ŋgɔ̄ wāā a̍ ŋ̄wāŋndā chīe̍e̍ le̍. Nyi̍nāā wɔ̄ɔ̍ŋāa̍ cho̍ o̍ ha̍la̍a̍ ni᷄ŋ māā lāmāsā wa̍, a̍ nyi̍nāā wɔ̄ɔ̍ŋāa̍ nɔ̍ tɔ̍ɔ̍ o̍ ha̍la̍a̍ ni᷄ŋ nda̍, a̍ nyi̍nāā wɔ̄ɔ̍ŋāa̍ nɔ̍ kpāāyāa̍ o̍ chi̍e̍e̍ŋ cho̍ ho̍ō o̍ nīīlū mānyūmndo̍ ni᷄ŋ ndo̍ wa̍, a̍ nyi̍nāā wɔ̄ɔ̍ŋāā kɔ̄l vēsɛ̍i̍ya̍ chōo̍ cho̍o̍, a̍ nda̍ na̍a̍ ŋ̄ chō sɔ̍ŋgɔ̄ɔ̍ ni̍.

¹³ Le̍la̍ŋ, lā wōūnu̍ŋ wo̍lɔ̄ɔ̄lā chɔ̄ūlā Mɛ̄lɛ̄ka̍ kē nya̍ la̍ŋ kpo̍u̍. Ko̍ŋ to̍sā ni̍ tē bōōndi̍i̍ sɔ̄ɔ̍ŋ wɔ̍ɔ̍ŋ ndo̍ŋ ŋ̄ nɔ̄ le̍ yɔ̄nɔ᷄ŋndo̍ wo̍ŋ ī fūūlu̍u̍ pɛ̍, ndu̍yɛ̍, mī ya̍a̍mɔ̍ɔ̍ ō sāa̍ nya̍ a̍ sɔ̍ŋgɔ̄ɔ̍, lā mi̍i̍ŋgū a̍ mākɔ̄ɔ̄ le̍. Lā nɔ̄lā mī lā hīōū lāchī a̍ sɔ̍ŋgɔ̄ɔ̍ mbō lo̍ o̍ ko̍ŋ ha̍a̍a̍ mbō fūūlu̍u̍ o̍ mɛ̄ɛ̄lu̍la̍ŋ, ndu̍yɛ̍, mī lā lo̍ lēchōo̍.

¹⁴ Le̍la̍ŋ, lā si᷄m nyɛ̍ kɛ̄ndɛ̄ yi̍, mī lā chu̍a̍ tōnya̍a̍ māā lēyāu̍ le̍ kānda᷄ŋndo̍ o̍ chāŋ. Ndu̍yɛ̍, lā chu̍a̍ sa̍kpōyɛ̍i̍ le̍ wāa̍ nyɛ̍ ma̍ndā nya̍ tākpāa̍ wo̍.

¹⁵ Ndu̍yɛ̍, wāa̍ ō bɛ̄ɛ̄ndīa̍ŋ le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ a̍ kɔ̄l ndɔ̄ nyu̍lōo̍ o̍kɔ̄ɔ̄, ndu̍ cho̍ kɔ̄ɔ̄vɛ̄i̍la̍ nya̍ wōūnu̍ŋ nda̍ŋ ni̍.

¹⁶ Kɛ̍, o̍ mu᷅ŋ kɔ̄ɔ̄lī, lā chu̍a̍ ti̍i̍nda᷄ŋndo̍ te̍le̍ŋ o̍ te̍le̍ŋ mī lā dɔ̄ū o̍ Mɛ̄lɛ̄ka̍ ni᷄ŋ. Tīīnda᷄ŋndo̍ chō māchūāā māā nyɛ̄ kālā ka̍lā pūa̍a̍ chɔ̄ūwa̍ bīī o̍ bā māā bōo̍ bɛ̍ndū wo̍. A̍ ndu̍ nya̍ nɔ̄lā ni̍ mī lā nyūmi̍ chīŋɔ̍ma̍ lēyīŋnda̍ŋ mā Māsa̍ Nyi̍nāā Wɔ̄ɔ̍ŋnda̍ wūū le̍ nya̍ vīɔ̍ɔ̍ wa̍ŋ.

¹⁷ Ndu̍yɛ̍, mī lā bīī pīŋī Mɛ̄lɛ̄ka̍ pīŋī nya̍ wo̍. Ndu̍ cho̍ mɔ̍si̍l chɔ̄ū nya̍ nɔ̄ le̍ wōūnɔ᷄ŋndo̍ wo̍ ni̍. Mī lā chu̍a̍ dīo̍m Mɛ̄lɛ̄ka̍a̍ ō Nyi̍na̍ Mɛ̄lɛ̄ka̍a̍ kē nya̍ wo̍. Ndu̍ cho̍ mūɛ̄ī chɔ̄ūve̍ ni̍.

¹⁸ Lā wa̍ Mɛ̍lɛ̄ka̍ pīɛ̄īyo̍ le̍ te̍le̍ŋ o̍ te̍le̍ŋ, mɛ̄ɛ̍ Nyi̍na̍ Mɛ̄lɛ̄ka̍a̍ chɔ̄m nya̍ yɛ̍. Lā pīɛ̍i̍ Mɛ̍lɛ̄ka̍ o̍ īsɔ̄ɔ̍ o̍ īsɔ̄ɔ̍ ni̍ŋ mī lā nyūna̍ ndu̍ le̍ nya̍ mālāa̍. He̍ī ī wa̍ nya̍ o̍ lākɔ̄l, lā wa᷅ ā pūɛ̄ya᷄ŋ te̍. Ndu̍yɛ̍, lā wa̍ Mɛ̍lɛ̄ka̍ pīɛ̄īyo̍ te̍le̍ŋ o̍ te̍le̍ŋ, le̍ wānāa̍ Mɛ̄lɛ̄ka̍a̍ fa̍ū.

¹⁹ Ya̍ bɛ̍ɛ̍ lā pīɛ̍i̍ Mɛ̍lɛ̄ka̍ le̍ ya̍, le̍ mī Mɛ̄lɛ̄ka̍ chɔ᷄m ya̍ nyɛ̄ ya̍ I̍ nɔ̍ le̍ wāŋnda̍ dīmūllo̍ wo̍. Ndu̍yɛ̍, mī lā pīɛ̍i̍ Mɛ̄lɛ̄ka̍ māā sīōōŋīī wa᷅ ya̍ le̍ wāŋnda̍ dīmūllo̍ a̍ sɔ̄ɔ̍ŋ wa̍ mu̍ŋ ŋ̍ vi̍a̍ŋna᷄ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍ o̍kɔ̄ɔ̄ wo̍ŋ te̍.

²⁰ Ndu̍yɛ̍, I̍ cho̍ māchūāā māā hɔ̄lte̍ Mɛ̄lɛ̄ka̍le̍ŋ le̍ Yōōŋgū Kɛ̄ndɔ̄ɔ̍ ho̍ō, mi̍ chē bɛ̍ɛ̍ mi̍ wa᷅ o̍ bīyɔ̄ɔ̍ ni᷄ŋ pɛ̍ŋgo̍o̍ ho̍ō ni̍. Lā pīɛ̍i̍ Mɛ̍lɛ̄ka̍ māā mī nɔ̍la̍ mī di̍mu̍l wāŋnda̍ ndu̍ sīōōŋīī bɛ̍ɛ̍ ve᷅ ya̍ le̍, kāni̍ fo̍ndōle̍, le̍nde̍ ya̍ I̍ nɔ̍ ni̍ mī di̍mi̍ ndu̍.

Pɔ̍ɔ̍l yɔ̍ŋ yīlɔ̄ɔ̄ mɛ̄ɛ̄lāa̍

²¹ I̍ hɛ̍na̍ŋ vɛ̍lɛ̄ nya̍ mī lā sīna̍ lāwāā na̍nu᷄ŋ a̍ ya̍ o̍kɔ̄ɔ̄, ndu̍yɛ̍, mī lā sīna̍ nyɛ̄ ya̍ I̍ cho̍ tōsāa̍ wo̍. Le̍ he̍ī, chāa̍ŋ nāā ka̍a̍lāa̍, Ti̍chi̍kɔ̄ɔ̄, o̍ cho̍ ho̍ō bu̍ɛ̍ī sa̍kpōo̍ o̍ wa̍li̍ Māsānɔ̄ɔ̍ Mɛ̄lɛ̄ka̍a̍ ni᷄ŋ ndo̍, ō chō nya̍ lākɔ̄ ko̍na̍ do̍o̍nɔ᷄ŋ kpo̍u̍.

²² Le̍ sa̍bū kōŋ kpe̍e̍kpe̍i̍ ya̍ I̍ cho̍ ndu̍ vīōmɔ̄ɔ̍ nāa̍ nya̍ chūā ni̍. Ko̍ŋ cho̍ ni̍, mbō dōōnu̍ŋ nya̍ ko̍na̍ a̍ na̍a̍ kpo̍u̍ o̍kɔ̄ɔ̄, ndu̍yɛ̍ vɛ̄lɛ̄, mbō dɛ̄ɛ̄ni̍a̍a̍ nya̍ kɔ̄lta̍ŋ ni᷄ŋ.

²³ Mbɔ̄ Mɛ̄lɛ̄ka̍ Fi̍nyā nāa̍, a̍ Māsānɔ̍ nāa̍ Chi̍i̍sū Ki̍li̍tī, ā tōsa̍ mī wānāā lāāla᷄ŋnda̍ kpo̍u̍ mā sɔ̄la̍ kɔ̄l nyūlōo̍, ndu̍yɛ̍, mā kāāli̍āŋ ve᷅llāa̍ vēllē, ndu̍yɛ̍, mā dɔ̄ū tīīnda᷄ŋndo̍ o̍ Mɛ̄lɛ̄ka̍ ni᷄ŋ fɔ̍.

²⁴ Wānā o̍ wāna̍ ka̍a̍la̍ Ma̍sānɔ̄ nāa̍ Chi̍i̍sū Ki̍li̍tī kāāla̍ mɛ̍ɛ̍lū le̍ wo̍, mbɔ̄ Mɛ̄lɛ̄ka̍ ō yīya̍ŋ nda̍ chōo̍ fɔ̍.