Ɛ̄fi̍sīāŋnda̍ 4 - Yāu̍ Mɛ̄lɛ̄ka̍a̍

Na̍a̍ wānāā lāāla᷄ŋnda̍ dīāllūŋ pīlɔ̍ŋ na̍a̍ ŋ̄ chō ni̍

¹ Mɛ̄lɛ̄ka̍ vēēlu̍ nya̍ le̍ mī lā wa̍ wānāā ndɔ̄. Le̍la̍ŋ, ya̍ Pɔ̍ɔ̍l cho̍ ho̍ō o̍ bīyɔ̄ɔ̍ ni᷄ŋ le̍ chō ya̍ I̍ cho̍ wa̍llo̍ le̍ Māsānɔ̄ɔ̍ Mɛ̄lɛ̄ka̍ wo̍, I̍ nyɔ̍ɔ̍lu̍ nya̍. Lā yāndi̍i̍ lā tōsa̍ ka̍ālā bɛ̍nda̍ a̍ vēēlū nya̍ sɔ̄lā ho̍ō le̍ wāa̍ wānāa̍ Mɛ̄lɛ̄ka̍ wo̍.

² Lā wa᷅ wānāā yōŋgā le̍. Lā wa᷅ wānāā ka̍ālā kālā ka̍lā nāa̍ wāŋnda̍ chūā le̍. O̍ īsɔ̄ɔ̍ o̍ īsɔ̄ɔ̍ ni̍ŋ, lā wa̍ wa̍nāā bīūwa᷄ŋ. Ndu̍yɛ̍, mī lā bīūwa᷅ŋ ve᷅llāa̍ vēllē māā wānāa̍ ka̍a̍li̍āŋ.

³ Nyi̍na̍ Mɛ̄lɛ̄ka̍a̍ tōsa̍ mi̍ lā wā o̍ dīōm pīlɔ̍ɔ̍ ni᷄ŋ. Le̍la̍ŋ, lā kīndi̍ o̍ nɛ̄ī o̍ nɛ̄ī ni̍ŋ mī lā hīōū lāchī a̍ dīōm pīlɔ̍ɔ̍ ho̍ō nɔ̄ɔ̍, sa̍na̍a̍ a̍ kɔ̄l nyūlu̍ mɔ̍ɔ̍sa̍ nya̍ nāa̍ pi᷅lɛ̍ wo̍ nɔ̄ɔ̍.

⁴ Tē ō wa̍ māā yɔ̄ŋɔ̄ɔ̄ pɛ̍, na̍a̍ kpo̍u̍ dīāllūŋ pīlɔ̍ŋ kpe̍ na̍a̍ ŋ̄ chō ni̍. Ndu̍yɛ̍, Nyi̍na̍ Mɛ̄lɛ̄ka̍a̍ ō pīlɛ̍ o̍ cho̍ ni̍, mɛ̄ɛ̍ vēēlū Mɛ̄lɛ̄ka̍ vēēlu̍ nya̍ wo̍ tōsa̍ mi̍ lā wā hɔ̄lte̍ŋ o̍ nɛ̄ī le̍ nyɔ̄ɔ̍ ō pīlɛ̍ kpe̍ yɛ̍.

⁵ Māsānɔ̄ɔ̍ Mɛ̄lɛ̄ka̍ ō pīlɛ̍ kpe̍ o̍ cho̍ ni̍. Ndu̍yɛ̍, o̍ nɛ̄īyo̍ ō pīlɛ̍ kpe̍ cho̍o̍ ko̍ni̍ na̍a̍ ŋ̄ lōōkū mī ŋ̄ dɔ̄ū tīīnda᷄ŋ nāa̍ o̍ ndu̍ Ma̍sānɔ̄ɔ̍ ni᷄ŋ ni̍. Ndu̍yɛ̍, pūlɔ̄ɔ̍ Mɛ̄lɛ̄ka̍a̍ ō pīlɛ̍ kpe̍ o̍ cho̍ ni̍.

⁶ Mɛ̄lɛ̄ka̍ ō pīlɛ̍ kpe̍ o̍ cho̍ ni̍. Ndu̍yɛ̍, ndu̍ cho̍ Fi̍nyāa̍ le̍ ŋ̄wāŋndā chīe̍e̍ kpo̍u̍ ni̍. Ndu̍ ŋ̄wāŋndā chīe̍e̍ kpo̍u̍ a̍ cho̍ o̍ bā bɛ̄ŋgu̍ ni̍. Ndu̍ cho̍ wa̍llo̍ tōsāa̍ sa̍na̍a̍ o̍ wāŋndā chīe̍e̍ya̍ kpo̍u̍ ni̍ŋ ni̍. Ndu̍yɛ̍, ō chō o̍ yōōmūlā wāŋnda̍ kpo̍u̍ ni̍ŋ.

⁷ Na̍a̍ pi̍lɛ̍ŋ pi̍lɛ̍ŋ nda̍ fa̍ū Mɛ̄lɛ̄ka̍ tōsa̍l na̍a̍ kɛ̄ndɛ̄i̍ ndūɛ̍i̍. Mɛ̄ɛ̍ Ki̍li̍tī pi̍ɔ̍u̍ yɛ̍, le̍nde̍ wānā o̍ wānā sɔ̍la̍ kpɛ̍ kpɛ̍ ni̍.

⁸ Le̍ he̍ī, ī chō ī dīmīa̍ŋ o̍ Yāu̍ Mɛ̄lɛ̄ka̍a̍ ni᷄ŋ āā, “Mɛ̄ɛ̍ o̍ wa̍ hēlɔ̄ɔ̍ pɔ̍ɔ̍li̍ cho̍o̍ chōo̍, mbo̍ hēl a̍ wāŋnda̍ ta̍u̍ ta̍u̍, ā o̍ bi̍ī o̍ chɔ̄ūwo̍ wa̍. Ndu̍yɛ̍, mbo̍ kē wāŋndā chīe̍e̍ya̍ nyɔ̄ɔ̍ŋ.”

⁹ Dīo̍m di̍mi̍ŋ ho̍ō āā, “Mbo̍ hēl chōo̍ cho̍o̍,” wo̍ ndu̍ chɔ̍m ni̍ māā ō tōl fɛ̍lɛ̍ŋ o̍ chi̍e̍ēŋndo̍ bɛ̄ŋgu̍ di̍ mālāŋ o̍ he᷅l.

¹⁰ Le̍la̍ŋ, wāna̍ to᷅l ho̍ō wo̍ ndu̍ ko̍ni̍ he̍l o̍ ha̍la̍a̍ lēkɔ̍ɔ̍lī di̍ ni̍, le̍ mbō wa̍ bā o̍ bā fe̍e̍, ndu̍yɛ̍ mbō wa̍ lātūlu̍ a̍ nyɛ̄ o̍ nyɛ̄ fe̍e̍ ni̍, chōo̍ cho̍o̍ ni̍, a̍ o̍ chi̍e̍ēŋndo̍ chōo̍.

¹¹ Dīōm di̍mi̍ŋ āā, “Mbo̍ kē wāŋndā chīe̍e̍ya̍ nyɔ̄ɔ̍ŋ” ndo̍, sūɛ̍i̍ ke̍ŋ ndi̍ yɔ̍nu̍ŋ he̍ī ni̍. Ndu̍ Ki̍li̍tī mbo̍ hɛ̄lī wāŋnda̍, ā pūm wānāā lāāla᷄ŋnda̍ tɛ̄ɛ̄ŋ le̍ wāa̍ wānāā o̍ ve᷅m hɔ̄ltē ndɔ̄ wa̍, ā pūm le̍ wāa̍ wānāa̍ su̍a̍ā le̍ Mɛ̄lɛ̄ka̍ wa̍, ā pūm le̍ wāa̍ wānāa̍ di̍mūl wa᷅ŋnda̍ sūɛ̍i̍ Mɛ̄lɛ̄kɛ̍i̍ ya̍, ā pūm le̍ pa̍a̍sūɛ̍i̍le̍ŋ a̍ wāŋnda̍ sūɛ̍i̍ Mɛ̄lɛ̄kɛ̍i̍ pɛ̄ɛ̄kōo̍.

¹² Ō tōsa̍ mātōsāā mu᷅ŋ le̍ wānāa̍ Mɛ̄lɛ̄ka̍a̍ bɛ̄ɛ̄ndīa̍a̍ le̍ wa̍lta̍ kɛ̍ndɛ̄la̍ Mɛ̄lɛ̄ka̍la̍ŋ tōsāa̍. O̍ ko̍ŋ kɔ̍ɔ̍lī, ō tōsa̍ vɛ̄lɛ̄ mu̍ŋ le̍ mī ku̍ndā wānāā lāāla᷄ŋnda̍ o̍ cho̍ dīāllu᷄ŋ Ki̍li̍tīo̍ŋ ndo̍ mbō sɔ̄la̍ dīāllūŋ kāla᷄ŋ.

¹³ Tē he̍ī yɔ̄nu̍ŋ pɛ̍, na̍a̍ kpo̍u̍ ŋ̄ chō fūūlūū o̍ ībōōndu̍ mī ŋ̄ nɔ̄ tīīnda᷄ŋ pi᷅lɔ̍ɔ̍ o̍ Mɛ̄lɛ̄ka̍ ni᷄ŋ, ndu̍yɛ̍, mī ŋ̄ sɔ̄la̍ sīnā pɛ̄ŋgu̍ pi᷅lɔ̍ɔ̍ a̍ Po̍ Mɛ̄lɛ̄ka̍a̍ o̍kɔ̄ɔ̄, ndu̍yɛ̍, mī ŋ̄ sīmnu᷄ŋ la̍ka̍a̍so̍ŋ o̍ tīīnda᷄ŋ na̍a̍ ŋ̄ nɔ̄ wo̍ ni᷄ŋ. O̍ ko̍ŋ kɔ̍ɔ̍lī, ŋ̄ chō fūūlūū o̍ ībōōndu̍ mī ŋ̄ sīmnu᷄ŋ kɛ̍sɛ̍ kɛ̍sɛ̍ māā Ki̍li̍tī.

¹⁴ Tē ŋ̄ sīmnu᷄ŋ yɛ̍ ni᷅ŋ le̍nde̍ pɛ̍, ŋ̄ ve᷅ lɛ̍ māā lāchūāāmbɔ̄ le̍. Nyɛ̄ o̍ nyɛ̄ nɔ̍lā lɛ̍ na̍a̍ fāŋā o̍ nɛ̄ī mɛ̄ɛ̍ mɛ̄ŋnda̍ŋ mā tūūsū nu̍a̍ā a̍ nyɔ̄ɔ̍ yɛ̍, kɛ̄lɛ̄ŋgāā mɛ̄ɛ̍ hūēīye̍ mūūlūū nu̍a̍ā nyɔ̍ɔ̍ yɛ̍ le̍. Wānāā lēyālāa̍ nɔ̍ hūnɔ̄ɔ̍ nāa̍ na̍a̍ chūā a̍ pɛ̄ɛ̄kūlā ndāla̍ lāchōōwāla̍ŋ le̍ na̍a̍ hūīyo̍ a̍ pɛ̄ɛ̄kūlā lāŋ nda̍, ā nɔ̍lā na̍a̍ hūī mā fāŋā na̍a̍ o̍ nɛ̄ī le̍.

¹⁵ Tē ŋ̄ sīmnu᷄ŋ ni᷅ŋ lāka̍a̍so̍ŋ pɛ̍, o̍ kāālāa̍ ni᷄ŋ na̍a̍ ŋ̄ dīmūl ni᷅ŋ wāŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ni̍. Ndu̍yɛ̍ o̍ ko̍ŋ kɔ̍ɔ̍lī, Ki̍li̍tī, o̍ cho̍ bōllē ku̍ndā wānāā lāāla᷄ŋnda̍ wo̍, mī ŋ̄ sīmnu᷄ŋ māā ndu̍ o̍ nɛ̄ī o̍ nɛ̄ī ni̍ŋ.

¹⁶ Pɛ᷄lta̍ yɛ̍ yɛ̍la̍ŋ o̍ dīāllo̍ŋ ni᷄ŋ nyɛ̍ bɔ̍ɔ̍ŋi̍a̍a̍ mu̍ŋ mi̍ ŋ̄ mɔ̄ɔ̄sā mu̍ŋ nāa̍ pi᷅lɛ̍ wo̍ŋ, mu̍ŋ cho̍ bōōndu̍ŋ yɛ̍ yi̍ɔ̍ɔ̍ŋ ni̍. Mɛ̄ɛ̍ tē ō wa̍ māā yɔ̄ŋɔ̄ɔ̄ pɛ̍, wāŋnda̍ o̍ ku̍ndā wānāā lāāla᷄ŋnda̍ ni᷄ŋ ā chō māchūāā mɛ̄ɛ̍ dīāllo̍ŋ nɔ̄ pɛ᷄lta̍ yɛ̍ yɛ̍la̍ŋ yɛ̍. Ndu̍yɛ̍, Ki̍li̍tī ndu̍ bɔ̍ɔ̍ŋīāā nda̍ nāa̍ pi᷅lɛ̍ ni̍. Ndu̍yɛ̍, tē pɛ᷄l o̍ pɛ᷄l to̍sa̍ wa̍li̍ o̍ nɔ̍ le̍ tōsāa̍ o̍ dīāllo̍ŋ ni᷄ŋ ndo̍ pɛ̍, mu̍ŋ pi̍la̍ ŋ̄ nɔ̄lā mī ŋ̄ hīndū o̍ kāālāa̍ ni᷄ŋ mī ŋ̄ sɔ̄la̍ kpāāyāa̍.

Mɛ̄ɛ̍ ka̍ālā wānāa̍ Mɛ̄lɛ̄ka̍a̍ lā nɔ̄ le̍ wāa̍ yɛ̍

¹⁷ I̍ cho̍ nya̍ sīlāa̍ ho̍ō kīo̍o̍ māā wāna̍ Māsānɔ̄ɔ̍ Mɛ̄lɛ̄ka̍ vēm. Ka̍ālā nyāla̍ŋ lā wa᷅ lɛ̄ mɛ̄ɛ̍ ka̍ālā wānāa̍ tu̍i̍ī Mɛ̍lɛ̄ka̍ dīōm te̍ wa̍ lā chō yɛ̍ le̍. Kāni̍ fo̍ndōle̍, wāŋnda̍ ha̍ā nda̍ nda̍ sɔ̄ɔ̍ŋ ŋ̄dīɔ̄mndo̍ŋ ko̍ni̍ ŋ̍ hu᷅ŋ nda̍ o̍ lēbōl ni̍.

¹⁸ Ā chō ā sūmɛ̍i̍ya̍ o̍ kɔ̄ltā ndāla̍ŋ ni᷄ŋ. Ndu̍yɛ̍, yōōmū Mɛ̄lɛ̄ka̍ tōsa̍ mi̍ wāŋnda̍ wā ndu̍ sɔ̄lāa̍ wo̍, ā sɔ̍lā ndu̍ kpo̍so̍ŋ te̍. Sa̍bū ko᷄ŋ cho̍ ni̍ māā, wānāā lānīa̍a̍ nda̍ chō ni̍. Le̍ he̍ī ā si̍nā nyɛ᷅ o̍ nyɛ̄ a̍ Mɛ̄lɛ̄ka̍ o̍kɔ̄ɔ̄ le̍.

¹⁹ Īsɔ̄ɔ̍ o̍ īsɔ̄ɔ̍ wɔ̍ɔ̍ŋ bɛ̍ɛ̍ ī cho̍ lɛ̍ wāŋnda̍ ha̍ā lāsi̍ɔ̍mbu̍ le̍. Ā chu̍a̍ māchūāā nda̍ pi̍la̍ ma̍ yɔ̄ŋgu᷄ŋ o̍ nīīlūlā nɔ̄ɔ̄lɛ̍i̍la̍ŋ ni᷄ŋ. Nīīlū o̍ nīīlū wɔ̄ɔ̍ŋ bālā ndāla̍ŋ lā chō lēni᷄ŋ. Kīndī bɛ̍ɛ̍ ā ki̍ndī le̍ mu̍ŋ kpɛ̄kpɛ̄lā le̍.

²⁰ Sīnā nya̍ sīna̍ a̍ Ki̍li̍tī o̍kɔ̄ɔ̄ wo̍ ō cho̍ sɔ̍ɔ̍ŋ wa̍ā le̍nde̍ le̍ nda̍ pɛ̄ɛ̄ku̍ nya̍ māā lā tōsa̍ le̍.

²¹ Lā tūēī ni᷅ŋ cha̍la̍ŋ a̍ ndu̍ o̍kɔ̄ɔ̄. Ndu̍yɛ̍, ā bīī ma̍ pɛ̄ɛ̄kū nya̍ o̍ nɛ̄i̍ tōnya̍ Chi̍i̍sōo̍ chōo̍.

²² Le̍la̍ŋ, lā ma᷄l sɔ̍ɔ̍ŋ wɔ̍ɔ̍ŋ nya̍ a̍a̍ wa̍ mu̍ŋ pa̍a̍ndū lēni᷄ŋ ndo̍ŋ. Ndu̍yɛ̍, wāna̍ chi̍e̍e̍yɛ̍ī nyɛ̄ī pa̍a̍ndūe̍i̍ ī yēēma̍ŋ wɔ̍ɔ̍ŋndo̍ŋ ŋ̄ chō tɛ̄ɛ̄mbūūwo̍ ve̍, lā ma᷄l wa᷅na̍ chi̍e̍e̍yɛ̍ī kēŋ.

²³ Kɔ̄ltā nyāla̍ŋ lā nɔ̄ mī lā sīmnu᷄ŋ la̍ sɛ̍nɛ̄ī yu̍ka̍.

²⁴ O̍ ko̍ŋ kɔ̍ɔ̍lī, lā nɔ̄ mī lā wōūnu̍ŋ wa᷅na̍ chi̍e̍e̍yɛ̍ī sɛ̄nɛ̄ī Mɛ̄lɛ̄ka̍ tōōsi̍a̍a̍ he̍ī le̍ wāa̍ māā ndu̍ pi̍la̍ ve̍. O̍ ko̍ŋ, mī lā wa̍ o̍ nɛ̄i̍ tōnya̍a̍ chōo̍, ko̍ŋ cho̍ ni̍, mī lā sīmnu᷄ŋ wa̍nāa̍ cho̍ sa̍kpō, ndu̍yɛ̍, mi̍ lā wā ā yɔ̄ŋga᷄ŋ o̍ Mɛ̄lɛ̄ka̍ lo̍.

²⁵ Le̍la̍ŋ, nya̍ wānāā lāāla᷄ŋnda̍, lā wa᷅ lɛ̄ wānāā dīmīāā lāchōōwā nāa̍ chāāŋāā nyāa̍ chūā le̍. Nya̍ kpo̍u̍ lā sōo̍ o̍ cho̍ tōnya̍a̍ wo̍ nāa̍ chāāŋāā nyāa̍ chūā. Kāni̍ fo̍ndōle̍, na̍a̍ fa̍ū ŋ̄ chō māchūāā māā pɛ᷄lta̍ yɛ̍ yɛ̍la̍ŋ o̍ dīāllūŋ pīlɔ̍ŋ ni᷄ŋ.

²⁶ O̍ ko̍ŋ kɔ̍ɔ̍lī, tē ō wa̍ pɛ̍ mā dɔ̄ūnu᷄ŋ tu̍mbe̍ o̍ īsɔ̄ɔ̍ o̍ īsɔ̄ɔ̍ ni̍ŋ, chɛ᷅l mī kɔ̄l nūm tu̍ū kōŋ ō tōsa̍ mā to̍sa̍ yɔ̄ŋ wɔ̄ɔ̍ŋndo̍ le̍. Du̍a̍u̍nu᷄ŋ tu̍mbe̍ o̍ ko̍ŋ kɔ̍ɔ̍lī, mā lo̍ o̍ tu̍mbe̍ ko̍ŋ ni᷄ŋ mī pāa̍le̍ŋ lē de᷄l te̍.

²⁷ Lā ke᷅ māsa̍ nyi̍nāā wɔ̄ɔ̍ŋnda̍ fo̍ndāŋ o̍ fo̍ndāŋ o̍ ku̍ŋgu̍la̍ŋ te̍.

²⁸ Ndu̍yɛ̍, wāna̍ wa̍ pāāndū vīīle̍ŋ ndo̍ ō ma᷄l ni̍ko̍ vi̍īlē lēŋ, o̍ ko̍ŋ kɔ̍ɔ̍lī, mbō kēlū la᷄lle̍ mbō sɔ̄la̍ nyɛ̄ sɔ̄lāā tōnya̍a̍ le̍ bā ndɔ̄ ha̍vɛ̍i̍yo̍ sōlīo̍o̍. Ko̍ŋ to̍sā bɛ̍ɛ̍ mbō wa̍ wānāa̍ cho̍ a̍ bālā hāvɛ̍i̍la̍ŋ nda̍ mālāa̍.

²⁹ Dīōm o̍ dīōm wɔ̄ɔ̍ŋ fu̍lā nya̍ o̍ sōndō le̍. Dīōmnda̍ ma̍lā wa᷅ŋnda̍ la̍ŋ, la̍ŋ nya̍ sūāā nāa̍ nda̍ chūā ni̍. Ko̍ŋ cho̍ ni̍, lā sōo̍ dīōmnda̍ ke᷅ wa᷅ŋnda̍ kpāāyāa̍, ndu̍yɛ̍ mī lā māla̍ nda̍ o̍ nyɛ̄ ndā pa̍lāa̍ ni᷄ŋ nda̍ŋ. Tē lā tōsa̍ le̍nde̍ pɛ̍, wānāa̍ tu̍ɛ̍ī nyɛ᷅ nya̍ wā di̍mīo̍o̍ wo̍ wa̍, ā nɔ̄lā mā sɔ̄la̍ mālāa̍ o̍ dīōmndā lāŋ ni᷄ŋ.

³⁰ Ndu̍yɛ̍ o̍ ko̍ŋ kɔ̍ɔ̍lī, lā to̍sā sūɛ̍i̍ tɛ̍ɛ̍mbūū Nyi̍na̍ Mɛ̄lɛ̄ka̍a̍ kɔ̄llo̍ ve̍ le̍. Kāni̍ fu̍u̍le̍, Nyi̍na̍ Mɛ̄lɛ̄ka̍a̍ ndu̍ cho̍ tāāmāsi̍ Mɛ̄lɛ̄ka̍ hāndu̍ nya̍ wo̍ ni̍, le̍ chɔ̄mndo̍ māā le̍ Mɛ̄lɛ̄ka̍ nya̍ chō ni̍. Ndu̍yɛ̍, ndu̍ cho̍ tāāmāsi̍o̍o̍ le̍ chɔ̄mndo̍ ni̍, māā Mɛ̄lɛ̄ka̍ ō bāŋā ni̍ŋ nya̍, tē pāa̍le̍ le̍ŋ lē hu᷄ŋ fu̍u̍lūū pɛ̍.

³¹ Lā ma᷄l nɛ̍i̍yɔ᷄ŋnda̍ŋ, a̍ kɔ̄l bīŋgīo̍o̍, a̍ kɔ̄l tūūwo̍, a̍ sɛ̄ɛ̄ŋgi̍āŋnda̍ŋ, a̍ wāŋndo̍ dīōlā wɔ̄ɔ̍ŋnda̍ŋ kēēlāa̍, a̍ nyɛ̄ o̍ nyɛ̍ cho̍ nīīlū yɛ̄lē tūlāā.

³² Lā tōsa̍la᷅ŋ dɛ̍nɛ̍ kɛ̍ndɔ̄ɔ̍ vēllāa̍ vēllē, ndu̍yɛ̍, mī lā nɔ̄ kɔ̄ltā īnyi̍ɛ̍ɛ̍la̍ŋ. Ndu̍yɛ̍, lā mālna᷅ŋ ve᷅llāa̍ vēllē le̍ yɔ̄ŋndā wɔ̄ɔ̍ŋnda̍ŋ, mɛ̄ɛ̍ Mɛ̄lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ o̍ sa̍bu̍ Ki̍li̍tīo̍o̍ ni᷄ŋ yɛ̍.