Ɛ̄fi̍sīāŋnda̍ 3 - Yāu̍ Mɛ̄lɛ̄ka̍a̍

A̍ wa̍li̍ Pɔ̍ɔ̍l to̍sa̍ wānāa̍ cho̍ a̍ Chu̍ū le̍ wa̍ tɛ̄ɛ̄ŋ ndo̍ o̍kɔ̄ɔ̄

¹ Le̍ he̍ī, ya̍ Pɔ̍ɔ̍l, ya̍ cho̍ ho̍ō Chi̍i̍sū Ki̍li̍tī o̍ bā o̍ bīyɔ̄ɔ̍ ni᷄ŋ le̍ nya̍ wānāa̍ cho̍ a̍ Chu̍ū le̍ wa̍ wo̍, I̍ cho̍ Mɛ̄lɛ̄ka̍ pīɛ̄īyo̍ le̍ nya̍.

² Ndu̍yɛ̍, I̍ nɔ̍ o̍ kɔ̄l māā lā tūēī ni᷅ŋ a̍ wa̍li̍ Mɛ̄lɛ̄ka̍ ke̍ ya̍ le̍ tōsāa̍ le̍ nya̍ wo̍. Ndu̍ cho̍ ni̍, yōōŋgōo̍ nya̍ dīmūllo̍ a̍ mɛ̄ɛ̍ Mɛ̄lɛ̄ka̍ chō wāna̍ īkɛ̄ndɛ̄ yɛ̍ o̍kɔ̄ɔ̄.

³ Ndu̍yɛ̍, lā tūēī a̍ mɛ̄ɛ̍ Mɛ̄lɛ̄ka̍ chɔ᷄m ya̍ sɔ̄ɔ̍ŋ o̍ kɛ̍ɛ̍si̍a̍a̍ le̍ tōsāa̍ wo̍ŋ yɛ̍. Mu̍ŋ wa̍ ŋ̄ vīāŋāā, kɛ̍ mbo̍ chɔ̄ɔ̄mūū mu̍ŋ nāa̍ ya̍ chu̍a̍. I̍ so̍ō ni᷅ŋ ti᷄ŋ a̍ mu̍ŋ o̍kɔ̄ɔ̄ o̍ yāu̍wo̍ ho̍ō ni᷄ŋ.

⁴ Ndu̍yɛ̍, tē lā tōfa̍ nyɛ̄ ya̍ I̍ po̍o̍nyi̍a̍a̍ ko̍ŋ ndo̍ pɛ̍, lā chō sīnā pɛ̄ŋgo̍o̍ sɔ̄lā a̍ mɛ̄ɛ̍ ya̍ I̍ si̍nā a̍ sɔ̄ɔ̍ŋ Mɛ̄lɛ̄ka̍ kɛ̄ɛ̄si̍a̍a̍ a̍ Ki̍li̍tī o̍kɔ̄ɔ̄ mi̍ mu̍ŋ wa᷅ ŋ̄ vīāŋna᷄ŋ ndo̍ŋ pɛ̄ŋgu̍ yɛ̍.

⁵ Mɛ̄lɛ̄ka̍ ndu̍ o̍o̍ chɔ̍m wa᷅ŋnda̍ sūɛ̍i̍ he̍ī o̍ pāāndōo̍ ni᷄ŋ te̍. Kɛ̍ ndu̍yɛ̍, pɛ̄ŋgo̍o̍ ho̍ō ni᷅ŋ ō tōsa̍ o̍ Nyi̍nā ndɔ̄ɔ̍ ni᷄ŋ sa̍na̍a̍ mbo̍ chɔ̄ɔ̄mūū ndi̍ nāa̍ wānāā ndūa̍a̍ o̍ ve᷅m hɔ̄ltē ndɔ̄ wa̍ chūā, a̍ wānāā ndūa̍a̍ su̍a̍ā le̍ ndu̍ wa̍ a̍ cho̍ ā yɔ̄ŋga᷄ŋ o̍ ndu̍ lo̍ wa̍.

⁶ Sɔ̄ɔ̍ŋ Mɛ̄lɛ̄ka̍ kɛ̄ɛ̄si̍a̍a̍ mi̍ ŋ̄ wā pāāndū ŋ̄ vīāŋna᷄ŋ ndo̍ŋ, mu̍ŋ cho̍ ni̍ māā wānāa̍ cho̍ a̍ Chu̍ū le̍ wa̍ ā sīmnu᷄ŋ wa̍nāā sɔ̄lāā nyɛ̄m kɛ̍ŋ Mɛ̄lɛ̄ka̍ŋ nda̍ Chu̍ūwa̍ lātūlu̍. Ō wa̍ māā yɔ̄ŋɔ̄ɔ̄ pɛ̍, wānāā ku̍ndālā tīɔ̍ɔ̍ŋnda̍ ha̍ā ā chō ni᷅ŋ māchūāā māā pɛ᷄lta̍ yɛ̍ yɛ̍la̍ŋ o̍ dīāllūŋ pīlɔ̍ŋ, ndu̍yɛ̍, mi̍ nyɛ̄ Mɛ̄lɛ̄ka̍ chu̍a̍ būŋgɛ̄i̍ yo̍ wā le̍ nda̍ ve̍llāa̍ vēllē. Mu᷅ŋ ki̍nɛ̍i̍ ŋ̄ yɔ̄nu̍ŋ ma̍yɔ̍ŋna᷄ŋ le̍ chō nda̍ chō o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wo̍. Kɛ̍ ndu̍yɛ̍, Yōōŋgū Kɛ̄ndɛ̍ Mɛ̄lɛ̄ka̍a̍ ndu̍ hi᷅ŋ a̍ mu̍ŋ kpo̍u̍ ni̍.

⁷ Mi̍ Mɛ̄lɛ̄ka̍ kē ya̍ wa̍llo̍ le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō dīmūllo̍. Ndu̍yɛ̍, kɛ̄ndɛ̄i̍ Mɛ̄lɛ̄ka̍ tōsa̍l la̍ ni̍, mbo̍ kē ya̍ wa̍llo̍ ho̍ō māā nyɛ̄ kīāā. O̍ ko̍ŋ kɔ̍ɔ̍lī, mbo̍ lūēī ya̍ kpāāya̍ ndɔ̄ɔ̍ le̍ wa̍li̍ ka̍lāa̍ tōsāa̍.

⁸ Ndu̍yɛ̍, wānāa̍ Mɛ̄lɛ̄ka̍a̍ tɛ̄ɛ̄ŋ kpo̍u̍, ya̍ hi̍o̍ū wā ō dɔ̄ɔ̄na᷄ŋ fa̍ū. Kɛ̍ ndu̍yɛ̍, mi̍ Mɛ̄lɛ̄ka̍ tōsāl la̍ kɛ̄ndɛ̄i̍ he̍ī, mbo̍ kē ya̍ fo̍ndāa̍ le̍ wānāa̍ cho̍ a̍ Chu̍ū le̍ wa̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ a̍ nyɛ̄m kɛ̄ndɛ̄ kɛ̍ndɛ̄ŋ bɛ̄ndūŋ wānā nɔ̍lā mu᷅ŋ pɛ̄ŋgu̍ si̍nā le̍ wo̍ŋ o̍kɔ̄ɔ̄, ŋ̄ na̍a̍ ŋ̄ sɔ̄lā o̍ Ki̍li̍tī sīnāa̍ ni᷄ŋ ndo̍ŋ.

⁹ Mi̍ Mɛ̄lɛ̄ka̍ o̍ to̍o̍si̍a̍a̍ nyɛ̄ o̍ nyɛ̄ fe̍e̍ wo̍ vīāŋ sɔ̄ɔ̍ŋ mu᷅ŋ kpi̍ŋ. Mi̍ ŋ̄ lō ŋ̄ vīāŋāā ha̍a̍a̍ mbo̍ lō o̍ ko̍ŋ mbo̍ fūūla᷅ŋ a̍ pɛ̄ŋgo̍o̍ ho̍ō. Ndu̍yɛ̍, mbo̍ kē ya̍ wa̍llo̍ le̍ mī tɛ̍ɛ̍si̍a̍l wāŋnda̍ kpo̍u̍ a̍ mɛ̄ɛ̍ Mɛ̄lɛ̄ka̍ chō sɔ̄ɔ̍ŋ o̍ kɛ̍ɛ̍si̍a̍a̍ mu᷅ŋ le̍ tōsāa̍ wo̍ŋ tōsā yɛ̍.

¹⁰ Le̍ sa̍bū Mɛ̄lɛ̄ka̍ ndu̍ o̍o̍ ve᷅ŋ sɔ̄ɔ̍ŋ mu᷅ŋ ndo̍ cho̍ ni̍ māā le̍ mbō tōsa̍ mī ku̍ndā wānāā lāāla᷄ŋnda̍ tōsa̍ pɛ̄ŋgo̍o̍ ho̍ō mī nyi̍nāā cho̍ o̍ ha̍la̍a̍ ni᷄ŋ māā lāmāsā wa̍ a̍ nyi̍nāā nɔ̍ tɔ̍ɔ̍ lo̍ŋ nda̍ mā sīna̍ mɛ̄ɛ̍ Mɛ̄lɛ̄ka̍ chō wāna̍ kɔ̄l kālu̍ bɛ̍ndū o̍ īsɔ̄ɔ̍ o̍ īsɔ̄ɔ̍ ni̍ŋ yɛ̍.

¹¹ Nyɛ̄ ndu̍ Mɛ̍lɛ̄ka̍ kɛ̄ɛ̄si̍a̍a̍ o̍ kāndɔ᷄ŋndo̍ di̍ le̍ tōsāa̍ wo̍, ndu̍ kpe̍e̍kpe̍i̍ o̍ to̍sa̍ ho̍ō ni̍. Ndu̍yɛ̍, a̍ Ma̍sānɔ̄ nāa̍ Chi̍i̍sū Ki̍li̍tī sa̍na̍a̍ o̍ to̍sa̍ ndi̍ ni̍.

¹² Ndu̍yɛ̍, chō na̍a̍ ŋ̄ chō dīōm pīlɛ̍ a̍ Chi̍i̍sū, ndu̍yɛ̍, mi̍ ŋ̄ dūāū tīīnda᷄ŋ nāa̍ o̍ ndu̍ ni̍ŋ ndo̍, ko̍ŋ to̍sa̍ ni̍ ŋ̄ yɔ᷅ŋ i̍si̍o̍o̍ŋ te̍, ndu̍yɛ̍, kīīsa᷄ŋ ve᷅ na̍a̍ le̍ hūnɔ̄ɔ̍ nāa̍ Mɛ̄lɛ̄ka̍ chūā le̍.

¹³ Le̍la̍ŋ, I̍ cho̍ Mɛ̄lɛ̄ka̍ pīɛ̄īyo̍ māā lā wu᷅ ŋ̄dīāl le̍ mɛ̄ɛ̍ ya̍ cho̍ mɔ̍nɛ̍i̍ bīyɔ̄ɔ̍ le̍ nya̍ yɛ̍ le̍. Kāni̍ fu̍u̍le̍, le̍ dɛ̍nɛ̍ nya̍ kɛ̄ndɔ̄ɔ̍ ko̍ ya̍ cho̍ mɔ̍nɛ̍i̍ he̍ī bīyɔ̄ɔ̍ ni̍.

Pɔ̍ɔ̍l pi̍ɛ̍i̍ Mɛ̄lɛ̄ka̍ le̍ wānāā lāāla᷄ŋnda̍ Ɛ̍fi̍sīā

¹⁴ Le̍ he̍ī ya̍ I̍ cho̍ o̍ wūla̍ŋ chōo̍ ni̍, mī pi̍ɛ̍ī Fi̍nyā nāa̍.

¹⁵ Wānāā lāāla᷄ŋnda̍ ku̍ndāla̍ŋ ɛ̄chɛ̍nɛ̄ ni̍, a̍ la᷅ŋ o̍ chi̍e̍ēŋndo̍ chōo̍ kpo̍u̍, ndu̍ to̍sa̍ ni̍ ma̍ wā.

¹⁶ I̍ cho̍ pīɛ̄īle̍ŋ māā Mɛ̄lɛ̄ka̍ o̍ cho̍ ho̍ō ō sūlāā a̍ nyɛ̄m kɛ̄ndɛ̄ŋ bɛ̄ndo᷄ŋ ta̍u̍ wo̍ māā ō lūe̍i̍ nyi̍nāā nyāa̍ kpāāyāa̍ a̍ nyɛ̄m mu᷅ŋ ŋ̄ ti᷄ŋ sa̍na̍a̍ a̍ Nyi̍nā ndɔ̄ɔ̍.

¹⁷ I̍ cho̍ pīɛ̄īle̍ŋ māā tē ō wa̍ māā yɔ̄ŋɔ̄ɔ̄ pɛ̍, māā mī kɔ̄ltā nyāla̍ŋ lā wa̍ māā nāa̍ cha̍lāā le̍ Ki̍li̍tī sa̍na̍a̍ le̍ tīīnda᷄ŋ nya̍ dɔ̄ū o̍ ndu̍ ni̍ŋ ndo̍. Ndu̍yɛ̍, I̍ cho̍ pīɛ̄īle̍ŋ māā nyɛ̄ o̍ nyɛ̄ nya̍ tōsa̍ ō chɔ᷄ŋ tu̍m o̍ kāālāa̍ ni᷄ŋ.

¹⁸ I̍ cho̍ vɛ̄lɛ̄ pīɛ̄īle̍ŋ māā nya̍ ni̍ a̍ wānāa̍ Mɛ̄lɛ̄ka̍a̍ kpo̍u̍, mī lā sɔ̄la̍ kpāāyāa̍ le̍ mī lā sīna̍ pɛ̄ŋgu̍ mɛ̄ɛ̍ kāālā Ki̍li̍tī ka̍a̍la̍ ŋ̄wāŋndā chīe̍e̍ wo̍ chō ō bɛ̄ndū bɛ̍ndū ta̍u̍ yɛ̍. Ō wa̍ nyɛ̄ tūwāā pɛ̍, I̍ nɔ̍lā mī di̍mi̍ māā mɛ̄ɛ̍ o̍ nɔ̍ bu̍o̍o̍ ta̍u̍ yɛ̍, le̍nde̍ o̍ ba̍ndu̍, le̍nde̍ o̍ he̍l, ndu̍yɛ̍, le̍nde̍ o̍ yi̍ŋgi̍la̍.

¹⁹ I̍ cho̍ pīɛ̄īle̍ŋ māā kāālā bɛ̄ndū Chi̍i̍sū ka̍a̍la̍ nya̍ ho̍ō wo̍ māā lā sīna̍ŋ ndu̍ o̍ yōōmūlā nyāla̍ŋ ni᷄ŋ, mi̍ chē bɛ̍ɛ̍ wānā nɔ̍lā mā chi̍i̍ ndu̍ pɛ̄ŋgu̍ si̍nā le̍ ni̍. Tē lā sīna̍ŋ ka̍a̍lā ndɔ̄ɔ̍ ho̍ō nya̍ ni᷄ŋ pɛ̍, Mɛ̄lɛ̄ka̍yɛ̍i̍ Māsānɔ̄ɔ̍ Mɛ̄lɛ̄kɛ̍i̍ ī pēi̍ nya̍ nyɛ̄ kɛ̄ndɛ̄ kɛ̍ndɛ̍ī.

²⁰ Le̍la̍ŋ, ŋ̄ sāŋga̍la᷅ŋ Māsānɔ̄ɔ̍ Mɛ̄lɛ̄ka̍. Ndu̍ nɔ̍lā ni̍ nyɛ̄ o̍ nyɛ̄ na̍a̍ ŋ̄ nyūna̍ ndu̍ le̍ ndu̍, mbō tōsa̍l na̍a̍ ndu̍ mbō hīōū bɛ̍ɛ̍ mɛ̄ɛ̍ na̍a̍ ŋ̄ nyūna̍ yɛ̍, ndu̍yɛ̍ mbō hīōū bɛ̍ɛ̍ nyɛ᷅ na̍a̍ ŋ̄ tūūnūŋ o̍ kɔ̄l lo̍ po̍lo̍ŋ po̍lo̍ŋ bɛ̍ndū. A̍ kpāāya̍ ndɔ̍ cho̍ wa̍llo̍ o̍ na̍a̍ ni᷄ŋ ndo̍ sa̍na̍a̍ Mɛ̄lɛ̄ka̍ tōsā mu᷅ŋ ki̍nɛ̍i̍ ni̍.

²¹ Chɔ̍ŋ a̍ pɛ̄ŋgo̍o̍ ho̍ō mbō kūɛ̄ a̍ lāchī kɛ᷅, na̍a̍ ŋ̍ cho̍ o̍ ku̍ndā wānāā lāāla᷄ŋnda̍ ni᷄ŋ ndu̍yɛ̍, mi̍ ŋ̄ wā o̍ dīōm pīlɔ̍ɔ̍ ni᷄ŋ na̍a̍ Chi̍i̍sū Ki̍li̍tī wa̍ā wa̍, lā ŋ̄ sāŋga̍la᷅ŋ Mɛ̄lɛ̄ka̍ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.