Ɛ̄fi̍sīāŋnda̍ 2 - Yāu̍ Mɛ̄lɛ̄ka̍a̍

O̍ kɛ̄ndɛ̄i̍ Mɛ̄lɛ̄kɛ̍i̍ ni᷄ŋ sa̍na̍a̍ wāŋnda̍ sɔ̄la̍ pīōŋɔ̄ɔ̍ ni̍

¹ Ō wa̍ māā yɔ̄ŋɔ̄ɔ̄ pɛ̍, lā wa̍ ni᷅ŋ māwāā ā vīlɛ̍i̍ pɛ̍ le̍ kɛ̄ɛ̄ nya̍ a̍a̍ kɛ̍ɛ̍ le̍ nyɛ̄ Mɛ̄lɛ̄ka̍ ndu̍ o̍o̍ di̍mu̍l nya̍ wo̍ tōsāa̍ wo̍, a̍ yɔ̄ŋndā wɔ̄ɔ̍ŋndā nya̍ wa̍ tōsāa̍ la̍ŋ.

² Lā wa̍ māwāā sɔ̄ɔ̍ŋ tōsāa̍ bōōndi̍i̍ ke̍ŋ mɛ̄ɛ̍ wāŋnda̍ o̍ chi̍e̍ēŋndo̍ ni᷄ŋ a̍ to̍sā sɔ̍ɔ̍ŋ yɛ̍. Ndu̍yɛ̍, māsā wɔ̍ɔ̍ŋ cho̍ o̍ māsāle̍ŋ chōo̍ o̍ ha̍la̍a̍ ni᷄ŋ ndo̍, nyɛ̄ ndu̍ o̍o̍ di̍mūl nya̍ wo̍, ndu̍ ko̍ni̍ nya̍ a̍a̍ to̍sā ni̍. Ndu̍yɛ̍, wānāa̍ kɛ̍ɛ̄ le̍ nyɛ̄ Mɛ̄lɛ̄ka̍ dīmūl nda̍ le̍ tōsāa̍ wo̍ wa̍, nyi̍nā kōŋ ko̍ni̍ nda̍ chō ni᷅ŋ o̍ bā bɛ̄ŋgu̍ ni̍.

³ Na̍a̍ ha̍ā fa̍ū le̍nde̍ na̍a̍ ŋ̄ wa̍ ni̍. Nyɛ̄ wāna̍ chi̍e̍e̍yɛ̍ī nɛ̄ī pa̍a̍ndūe̍i̍ ndi̍ i̍i̍ hɛ̍nāŋ ndo̍ ko̍ni̍ na̍a̍ ŋ̄ wa̍ tōsāa̍ ni̍. Nyɛ̄ o̍ nyɛ̄ dīāllūŋ na᷄ŋ mu̍ŋ ye̍e̍mā le̍ tōsāa̍, a̍ nyɛ̄ o̍ nyɛ̄ ndu̍ o̍o̍ hu᷅ŋ na̍a̍ o̍ lēbōl, ndu̍ ko̍ni̍ na̍a̍ ŋ̄ wa̍ tōsāa̍ ni̍. Le̍la̍ŋ, le̍ wāna̍ chi̍e̍e̍yɛ̍ī nɛ̄ī pa̍a̍ndūīī kēŋ mɛ̄ɛ̍ mī Mɛ̄lɛ̄ka̍ ndu̍ o̍o̍ dɔ̍u̍nu᷄ŋ tu̍mbe̍ a̍ na̍a̍, mī ndu̍ o̍o̍ tu̍si̍ na̍a̍ nyɛ̄ pālāa̍ chōo̍, mɛ̄ɛ̍ i̍ nɔ̍ mī ī yɔ̄nu̍ŋ a̍ wānā o̍ wānā yɛ̍.

⁴ Kɛ̍ ndu̍yɛ̍, Mɛ̄lɛ̄ka̍ chō wāna̍ īnyīɛ̍ɛ̍ bɛ̄ndū bɛ̍ndū. Ndu̍yɛ̍, le̍ kāālā bɛ̄ndū o̍ ka̍a̍la̍ na̍a̍ wo̍,

⁵ mbo̍ mīŋgī na̍a̍ yōōmū na̍a̍ Ki̍li̍tī wa̍ā. Bōōndi̍i̍ ke̍ŋ ŋ̄ wa̍ wɔ̄ ā vīlɛ̍i̍ya̍ le̍ kɛ̄ɛ̄ na̍a̍ ŋ̄ kɛ̄ɛ̍ le̍ nyɛ̄ ndu̍ o̍o̍ di̍mu̍l na̍a̍ wo̍ to̍sāa̍ wo̍. O̍ kɛ̄ndɛ̄i̍ Mɛ̄lɛ̄kɛ̍i̍ ni᷄ŋ sa̍na̍a̍ nya̍ sɔ̄la̍ pīōŋɔ̄ɔ̍ ni̍.

⁶ Ndu̍yɛ̍, le̍ mɛ̄ɛ̍ na̍a̍ ŋ̄ chō dīōm pīlɛ̍ a̍ Chi̍i̍sū Ki̍li̍tī yɛ̍, mi̍ Mɛ̄lɛ̄ka̍ mīŋgī na̍a̍ yōōmū na̍a̍ nda̍ā, ndu̍yɛ̍, mbo̍ kɛ̄sī na̍a̍ Chi̍i̍sū Ki̍li̍tī īkɛ̄i̍ o̍ fo̍nda᷄ŋ Mɛ̄lɛ̄ka̍a̍.

⁷ Mɛ̄lɛ̄ka̍ tōsa̍ mātōsāā he̍ī le̍ chɔ̄mndo̍ le̍ fɛ̍ɛ̍ŋ a̍ fɛ̍ɛ̍ŋ mɛ̄ɛ̍ kɛ̄ndɛ̄i̍ o̍ to̍sa̍l na̍a̍ ve̍ ī chō ī bɛ̄ndū bɛ̍ndū yɛ̍. Ndu̍yɛ̍ ō to̍sa̍l na̍a̍ kɛ̄ndɛ̄i̍ he̍ī sa̍na̍a̍ a̍ Chi̍i̍sū Ki̍li̍tī.

⁸ Kāni̍ fo̍ndōle̍, o̍ kɛ̄ndɛ̄i̍ ndūɛ̍i̍ ni᷄ŋ Mɛ̄lɛ̄ka̍ pīŋi̍ nya̍ ni̍ sa̍na̍a̍ o̍ tīīnda᷄ŋ nya̍ dɔ̄ū o̍ ndu̍ ni̍ŋ ndo̍. Ō cho̍ su̍ɛ̍i̍ yɔ̍nu̍ŋ le̍ nya̍ pi̍la̍ wa̍li̍ nyā to̍sāā le̍. Ke̍ Mɛ̄lɛ̄ka̍a̍ i̍ cho̍ ni̍.

⁹ Ō cho̍ su̍ɛ̍i̍ wānā ke̍lū yōŋgā o̍ nūm pi̍la̍ ni̍ŋ te̍, kāni̍ fu̍u̍le̍, ō cho̍ nyɛ᷅ wānā sɔ̍la̍ le̍ wa̍li̍ nu̍m tōsāā le̍.

¹⁰ Kāni̍ fo̍ndōle̍, Mɛ̄lɛ̄ka̍ ndu̍ to̍o̍si̍a̍a̍ na̍a̍ tōōsīa̍a̍ ho̍ō ni̍. Ndu̍yɛ̍ ha̍a̍a̍ mi̍ ŋ̄ wā o̍ dīōm pīlɔ̍ɔ̍ ni᷄ŋ na̍a̍ Chi̍i̍sū Ki̍li̍tī wa̍ā, Mɛ̄lɛ̄ka̍ tōōsi̍a̍a̍ na̍a̍ le̍ mī ŋ̄ tōsa̍ sɔ̄ɔ̍ŋ kɛ̍ndɔ᷄ŋ. Pāāndū pa̍ o̍ bɛ̍ɛ̍ndi̍a̍a̍ sɔ̄ɔ̍ŋ kɛ̍ndɛ̄ŋ mu᷅ŋ le̍ na̍a̍ mī ŋ̄ tōsa̍ mu̍ŋ ni̍.

Ki̍li̍tī hi᷅ŋ ā dīōm pīlɔ̍ɔ̍ Chu̍ūwa̍ tɛ̄ɛ̄ŋ nda̍ wānāa̍ cho̍ a̍ Chu̍ū le̍ wa̍

¹¹ Lā lōōnu̍ŋ māā lā wa̍ māwāā pāāndū māā wānāā nda̍ vīlu̍ a̍ Chu̍ū le̍ wa̍. Ndu̍yɛ̍, mi̍ Chu̍ūwa̍ vēēlū nya̍ āā, “Wānāa̍ cho̍ a̍ hi̍vīāā o̍ chīɛ̄ī kɔ̄ɔ̄lī le̍ wa̍.” Ma̍ vēēlū nda̍ pi̍la̍ āā, “Wānāa̍ cho̍ ā hīvīāā wa̍.” Kɛ̍ ndu̍yɛ̍ hīvī chīɛ̄ī kɔ̄ɔ̄lī nda̍ hīvī ko̍ŋ wa᷅ŋnda̍ wo̍, ndu̍ cho̍ māchūāā nyɛ̄ wāna̍ chi̍o̍o̍ tōsā a̍ dīāllūŋ ndɔ᷄ŋ ndu̍ pi̍la̍ŋ ndo̍.

¹² Lā lōōnu̍ŋ māā a̍ bōōndi̍i̍ ke̍ŋ nya̍ a̍a̍ si̍nā a̍ Ki̍li̍tī o̍kɔ̄ɔ̄ le̍. Wānāā lēkāa̍wa̍ nya̍ wa̍ ni̍. Nya̍ cho̍ a̍ Chu̍ū le̍ wa̍, lā ve̍ o̍ ku̍ndā wānāā Mɛ̄lɛ̄ka̍ hɛ̄li̍ le̍ wāa̍ wānāā ndɔ̄ wa̍, chōo̍ le̍. Ndu̍yɛ̍, o̍ ko̍ŋ kɔ̍ɔ̍lī, kpe̍ma̍ Mɛ̄lɛ̄ka̍ yīi̍ nda̍ wānāā ndūa̍a̍, mbo̍ chūēl nda̍ būŋga᷄ŋ le̍ nda̍ nyɛ̄ tōsāl lo̍, lā ve̍ o̍ kpe̍ma̍ ko̍ŋ chōo̍ le̍. Lā wa̍ māwāā chi̍e̍ēŋ māā wānāa̍ nɔ̍ ti̍i̍nda᷄ŋ māā dɛ̍nɛ̍ kɛ̍ndɛ̄ chō nda̍ lāchī le̍ wa̍. Nya̍ a̍a̍ si̍nā Mɛ̍lɛ̄ka̍ le̍.

¹³ Kɛ̍, pɛ̄ŋgo̍o̍ ho̍ō ni᷅ŋ nyɛ̄ o̍ nyɛ̄ ō māŋga̍la̍ŋ, kāni̍ fu̍u̍le̍, le̍ chō nya̍ chō o̍ dīōm pīlɔ̍ɔ̍ ni᷄ŋ nya̍ Ki̍li̍tī wa̍ā wo̍. Nya̍ a̍a̍ wa̍ la̍nda̍ŋ a̍ Mɛ̄lɛ̄ka̍, kɛ̍ pīɔ̍m Ki̍li̍tī sɔ̍la̍ wo̍ tōsa̍ a̍ sa̍bū mi̍ Mɛ̄lɛ̄ka̍ mīŋgi᷄ŋ nya̍ o̍ ībūŋ.

¹⁴ Ki̍li̍tī pi̍la̍ to̍sa̍ mi̍ kɔ̄l nyūlōo̍ mīīŋgū na̍a̍ tɛ̄ɛ̄ŋ. Ō tōsa̍ Chu̍ūwa̍ ni̍, a̍ wānāa̍ cho̍ a̍ Chu̍ū le̍ wa̍, ma̍ sīmnu᷄ŋ wa̍nāā pīlɛ̍. Kāni̍ fo̍ndōle̍, pīɔ̍m o̍ sɔ̍la̍ wo̍ pɛ̄l kpāki̍ lēya̍a̍mɔ̍ɔ̍ ndu̍ o̍o̍ pi̍ɔ̍u̍ nda̍ tɛ̄ɛ̄ŋ ndo̍ wɔ̍ wɔ̍.

¹⁵ Ō tōsa̍ he̍ī sa̍na̍a̍ a̍ fāŋā o̍ fa̍ŋa̍ sāwāla̍ Mɛ̄lɛ̄ka̍ ke̍ Mūu̍sē la̍ŋ ndo̍, o̍ ko̍ŋ kɔ̍ɔ̍lī, a̍ fāŋā o̍ fa̍ŋa̍ sɔ̄ɔ̍ŋ sāwāla̍ŋ nda᷅ŋ lā dīmi̍ māā wāŋnda̍ nɔ̄ mā tōsa̍ wo̍ŋ a̍ ŋ̄ nda̍ nɔ̍ mā tōsa̍ le̍ wo̍ŋ. Ndu̍yɛ̍, sa̍bū o̍ fa̍ŋa̍ sāwāla̍ŋ nda᷅ŋ ndo̍ cho̍ ni̍ māā le̍ mī na̍a̍ wānāā ku̍ndālā tīɔ̍ɔ̍ŋāa̍ cho̍ ha̍ā o̍ dīōm pīlɔ̍ɔ̍ ni᷄ŋ a̍ ndu̍ wa̍ mī ŋ̄ sīmnu᷄ŋ wa̍nāā pīlɛ̍ kpe̍. Mɛ̄ɛ̍ o̍ he̍ī ni᷄ŋ, mbo̍ tōsā mi̍ kɔ̄l nyūlōo̍ mīīŋgū na̍a̍ tɛ̄ɛ̄ŋ.

¹⁶ O̍ pīɔ̍m Ki̍li̍tī sɔ̍la̍ ho̍ō o̍ yɔ̄m sīŋgāfīlāa̍ chōo̍ wo̍ ni᷄ŋ, mbo̍ tōsā mi̍ wānāā ku̍ndālā tīɔ̍ɔ̍ŋnda̍ ha̍ā sīmnu᷄ŋ ku̍ndāa̍ ō pīlɛ̍. Ndu̍yɛ̍, mi̍ pīɔ̍m o̍ vi᷅ ko̍ŋ ndo̍ tōsā mi̍ ŋ̄ mīīŋgū o̍ dīōm pīlɔ̍ɔ̍ ni᷄ŋ na̍a̍ Mɛ̄lɛ̄ka̍ wa̍ā. O̍ he̍ī ni᷄ŋ, mi̍ pīɔ̍m ndɔ̄ɔ̍ ho̍ō tōsā mi̍ ya̍a̍mɔ̍ɔ̍le̍ŋ lē chūū ku̍ndālā tīɔ̍ɔ̍ŋ nda̍ŋ nda᷅ŋ tɛ̄ɛ̄ŋ.

¹⁷ Mi̍ Ki̍li̍tī hu᷅ŋ mbo̍ dīmūl wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍, yōōŋgu̍ chɔ᷅m a̍ mɛ̄ɛ̍ wāŋnda̍ lōōkū mā sɔ̄la̍ kɔ̄l nyūlōo̍ yɛ̍ wo̍. Mbo̍ dīmūl wānāa̍ cho̍ a̍ Chu̍ū le̍ wa̍ kpo̍u̍, a̍ wa̍ lēvīl ta̍u̍ a̍ Mɛ̄lɛ̄ka̍ wa̍. Mbo̍ dīmūl vɛ̄lɛ̄ Chu̍ūwa̍ a̍ ve̍ le̍vi̍l ta̍u̍ a̍ Mɛ̄lɛ̄ka̍ le̍ wa̍.

¹⁸ Kāni̍ fu̍u̍le̍, Chu̍ūwa̍ ni̍, wānāa̍ cho̍ a̍ Chu̍ū le̍ wa̍ ni̍, na̍a̍ kpo̍u̍, o̍ Ki̍li̍tī ni̍ŋ sa̍na̍a̍ na̍a̍ ŋ̄ nɔ̄lā ni̍ mī ŋ̄ fūūlu̍u̍ nāa̍ Mɛ̄lɛ̄ka̍ Fi̍nyāa̍ chūā. Ndu̍yɛ̍, Nyi̍na̍ Mɛ̄lɛ̄ka̍ pīlɔ̍ɔ̍ ho̍ō ndu̍ ma̍lā na̍a̍ ni̍ mī ŋ̄ fūūlu̍u̍ lo̍ŋ.

¹⁹ Le̍la̍ŋ, nya̍ cho̍ a̍ Chu̍ū le̍ wa̍ lā cho̍ lɛ̍ māā wānāā lēkāa̍ kɛ̄lɛ̄ŋgāā māā lāmīāl te̍. Pi̍la̍chi̍e̍e̍ya̍ nya̍ chō ni᷅ŋ lātūlu̍ nya̍ Mɛ̄lɛ̄ka̍ wānāā ndūa̍a̍ ni̍. Lā chō ni᷅ŋ māchūāā wānāa̍ cho̍ o̍ yu̍ŋgu̍ Mɛ̄lɛ̄ka̍a̍ ni᷄ŋ nda̍.

²⁰ Ō wa̍ māā yɔ̄ŋɔ̄ɔ̄ pɛ̍, wānāā Chi̍i̍sū ve᷅m hɔ̄ltē ndɔ̄ wa̍ a̍ wānāa̍ su̍a̍ā le̍ Mɛ̄lɛ̄ka̍ wa̍, nda̍ cho̍ chīyīī chīɛ̍i̍ Mɛ̄lɛ̄ka̍a̍ ō nɔ̄ mbō si᷄m lēchōo̍ ve̍ ni̍. Ndu̍yɛ̍, o̍ chīyīī kēŋ chōo̍ nya̍ chō ā tāŋgūlāā ni̍. O̍ ko̍ŋ kɔ̍ɔ̍lī, Chi̍i̍sū Ki̍li̍tī pi̍la̍ ndu̍ cho̍ pōu̍ sa̍a̍ tāŋgūllo̍ le̍ mī tāŋgūllo̍ yɔ̄nu̍ŋ o̍ ka̍lā ka̍lā wo̍ ni̍.

²¹ Ndu̍ mɔ̍ɔ̍sa̍ chīɛ̄īyo̍ ho̍ō nāa̍ pi᷅lɛ̍ ni̍. Ndu̍yɛ̍, ndu̍ to̍sā ni̍ mī chīɛ̄īyo̍ ho̍ō ō tāŋgu̍lu̍ŋ mbō sīmnu᷄ŋ o̍ bɛ̍ndū, ndu̍yɛ̍, mbō sīmnu᷄ŋ chi̍ɛ̍i̍ cho̍ ō yɔ̄ŋga᷄ŋ le̍ Māsānɔ̄ɔ̍ Mɛ̄lɛ̄ka̍ wo̍.

²² Mɛ̄ɛ̍ nya̍ chō nu̍a̍ā o̍ dīōm pīlɔ̍ɔ̍ ni᷄ŋ a̍ Ki̍li̍tī yɛ̍, nya̍ bɛ̍ɛ̍ Ki̍li̍tī cho̍ nya̍ tāŋgūllo̍ nya̍ wāŋnda̍ ā pīli̍a̍a̍ māā chīɛ̍i̍ Mɛ̄lɛ̄ka̍, nāa̍ Mɛ̄lɛ̄ka̍ wā o̍ īnyi̍nāya̍ wa̍.