Dītɔ̍nɔ̍mi̍ī 2 - Yāu̍ Mɛ̄lɛ̄ka̍a̍

¹ Mi̍ ŋ̄ mūli᷄ŋ mi̍ ŋ̄ mīīŋgū o̍ lɛ̄ŋndē po̍lte̍ŋ ni᷄ŋ mi̍ ŋ̄ kūā a̍ nɛ̄i̍ ku̍ɛ̄ kūmbū Pēē Si̍a̍ŋā māmɛ̄ŋ īhɛ᷄llo̍ wo̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ yɛ̍. Le̍ te̍le̍ŋ vi̍lɛ̄ī, ŋ̄ chō bālɔ̄ɔ̍ o̍ lɛ̄ŋndē īpēmbūle̍ŋ I̍dɔ̄m ni̍ŋ.

² “O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā,

³ ‘Lā vīōū ni᷅ŋ bɔ̄ɔ̍ ba̍lɔ̄ɔ̍ o̍ lɛ̄ŋndē īpēmbūle̍ŋ nde᷅ŋ ni᷄ŋ. Lā mūli̍ŋ mī lā kūɛ̄ kūmbū bā lūāŋndo̍.

⁴ Kɛ̍ ndu̍yɛ̍ si̍la̍ wa᷅ŋnda̍ I̍sɔ̄lūɛ̍i̍ sīlāa̍ ho̍ō, māā ya̍ Mɛ̍lɛ̄ka̍ dīmi̍ māā, mālɔ̄ɔ̄ nya̍ chō ho̍ō na̍nu᷄ŋ ndo̍, lā chō lūɛ̄īyɔ̄ɔ̄ o̍ lɛ̄ŋndē I̍dɔ̄mnde̍ŋ ni᷄ŋ su̍ŋ su̍ŋ, le̍ kēēkōo̍ lēni᷄ŋ mī lā hīōū. Wānāya᷅ŋ nyāa̍ŋ nda̍ yɔ̍nūŋ māā wānāa̍ fu̍la̍ o̍ pūlāle̍ I̍īsɔ̄le̍ŋ chōo̍ wa̍ ni̍, nda̍ nɔ̍ lɛ̄ŋnde̍ŋ nde᷅ŋ ni̍. Tē ā chē nya̍ pɛ̍, sīōōŋnde̍ chō nda̍ bīyɔ̄ɔ̄. Kɛ̍ lā mānda̍ŋ.

⁵ Lā chi᷅ŋa̍la᷅ŋ nda̍ a̍ sɔ̍ŋgɔ̄ le̍, kāni̍ fo̍ndōle̍, lɛ̄ŋndē ndāle̍ŋ nyɛ̄ pɔ̄mbɔ̄ bɛ̍ɛ̍ I̍ cho̍ nya̍ le̍ŋ kē le̍. Kāni̍ fu̍u̍le̍, I̍īsɔ̄ ya̍ I̍ ke̍ lɛ̄ŋndē I̍dɔ̄mnde̍ŋ sīndɛ̄ pa̍ ni̍ māā nyɛ̄ ndɔ̄.

⁶ Tē lā yēēma̍ nyɛ̄ o̍ nyɛ̄ dīāā nda̍ o̍ bā pɛ̍, lā pēndū ndu̍ nda̍ o̍ ba̍. Mɛ̄ŋnda̍ŋ bɛ̍ɛ̍ nya̍ yēēma̍ le̍ kōlɔ̄ɔ̍ ni̍, mɛ̄ɛ̍ mī lā pēndū ma̍ŋ nda̍ o̍ bā.’

⁷ “Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dɔ̄ū nya̍ sa̍lā o̍ nyɛ̄ o̍ nyɛ̄ ni᷄ŋ nya̍ tōsa̍. Bālɔ̄ɔ̄ nya̍ wa̍ ho̍ō o̍ lɛ̄ŋndē po̍lte̍ bɛ̍ndūle̍ŋ nde᷅ŋ ni᷄ŋ ndo̍ kpo̍u̍, ndu̍ wa̍ nya̍ māndāa̍ ni̍. Wɔ̄sīlā be̍le̍-hi̍ɔ̍ɔ̍lu̍la̍ nya̍ chīi̍ la᷅ŋ o̍ lɛ̄ŋndē po̍lte̍ŋ nde᷅ŋ ni᷄ŋ nda̍ŋ kpo̍u̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō wa̍ a̍ nya̍ lātūlu̍. Ndu̍yɛ̍ nyɛ̄ o̍ nyɛ̄ ō ve̍ nya̍ lēpɛ̄ŋ te̍.

⁸ “O̍ ko̍ŋ kɔ̍ɔ̍lī, mi̍ ŋ̄ hīāū lāchī a̍ kɔ̄la̍ŋ, mi̍ ŋ̄ kēēkū o̍ lɛ̄ŋndē wānāya᷅ŋ nāa̍ŋ mu᷅ŋ ni᷄ŋ, nda̍ yɔ̍nūŋ māā wānāa̍ fu̍la̍ o̍ pūlāle̍ I̍i̍sɔ̄le̍ŋ chōo̍ wa̍ ni̍, a̍ wa̍ I̍dɔ̄m nda̍, mi̍ ŋ̄ hīāū lo̍ŋ. Mi̍ ŋ̄ mɛ̄ī nɛ̄i̍ ku̍ɛ̄ o̍ lɛ̄ŋndē dɛ̍ŋgbɛ̍le̍ŋ Chɔ̍ɔ̍dāŋ ndo̍, chɔ̄nɔ᷄ŋndo̍ Ɛ̍la̍tī chi̍e̍e̍ a̍ Ɛ̄sīɔ̄ŋkɛ̍bɛ̄ chi̍e̍e̍, mi̍ ŋ̄ mūli᷄ŋ mi̍ ŋ̄ kūā kūmbū lɛ̄ŋndē po̍lte̍ŋ Mo̍wa̍bī.

⁹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, ‘Lā yɔ᷅ŋ wāŋnda̍ Mo̍wa̍bī nyɛ̄ o̍ nyɛ̄ le̍. Lā chi᷅ŋa̍la᷅ŋ nda̍ a̍ sɔ̍ŋgɔ̄ le̍. Kāni̍ fu̍u̍le̍, lɛ̄ŋndē ndāle̍ŋ nyɛ̄ pɔ̄mbɔ̄ bɛ̍ɛ̍ I̍ cho̍ nya̍ le̍ŋ kē le̍. Wānāa̍ fu̍la̍ o̍ pūlāle̍ Lɔ̍tūle̍ŋ chōo̍ wa̍, nda̍ ya̍ I̍ ke̍ chi̍e̍e̍ bɛ̍ndōo̍ A̍ā ni̍, o̍ cho̍ o̍ lɛ̄ŋndē lēŋ ni᷄ŋ ndo̍.’ ” (

¹⁰ Ndu̍yɛ̍ Ɛ̄mi̍ma̍i̍tīi̍ya̍ nda̍ wa̍ pāāndū A̍ā chi̍e̍e̍ ni̍. Wāŋnda̍ ha̍ā wānāā dīāllūŋ kālāā bɛ̄ndūa̍a̍ pīla̍ nda̍ wa̍ ni̍, ndu̍yɛ̍ ku̍ndā bɛ̄ndōo̍ pīla̍ nda̍ wa̍ ni̍. Nda̍ bɛ̍ɛ̍ ā wa̍ ā vīlɛ̄ī kpo̍lōŋ bɛ̄ndū, mɛ̄ɛ̍ A̍na̍ka̍i̍tīi̍ya̍ ā wa̍ yɛ̍.

¹¹ Wāŋnda̍ ha̍ā, nda̍ bɛ̍ɛ̍ wāŋnda̍ nda̍ a̍a̍ chu̍a̍ nda̍ māā Lu̍ɛ̍fēmtīi̍ya̍ nda̍ wa̍ ni̍, mɛ̄ɛ̍ wāŋnda̍ nda̍ a̍a̍ chu̍a̍ A̍na̍ka̍i̍tīi̍ya̍ yɛ̍ ko̍ni̍. Kɛ̍ mi̍ wāŋnda̍ Mo̍wa̍bī nda̍ nda̍ vēēlū nda̍ āā Ɛ̄mi̍ma̍i̍tīi̍ya̍.

¹² Ndu̍yɛ̍, Hɔ̄lu̍a̍tīi̍ya̍ bɛ̍ɛ̍, ā wā pāāndū I̍dɔ̄m. Kɛ̍ mi̍ wānāa̍ fu̍la̍ o̍ pūlāle̍ I̍īsɔ̄le̍ŋ chōo̍ wa̍ ā tūāū nda̍, ma̍ sōlī nda̍ lo̍ŋ po̍, ndu̍yɛ̍ ma̍ tōsā mi̍ kāa̍le̍ ndāle̍ŋ lē nyūm. Mi̍ wānāa̍ fu̍la̍ o̍ pūlāle̍ I̍i̍sɔ̄le̍ŋ chōo̍ wa̍ ā chūā fo̍ndā wāŋnda̍ ha̍ā ā wa̍ wo̍, ma̍ chāl lo̍ŋ, mɛ̄ɛ̍ I̍sɔ̄lūɛ̍i̍ya̍ ā tōsa̍ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ ke̍ nda̍ māā nyɛ̄ ndā le̍ŋ ni᷄ŋ yɛ̍.)

¹³ “O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, ‘Lā chɔ̍ŋ mī lā ta᷄ŋ pēē pɔ̍mbɔ̄ɔ̍ Sɛ̍lu̍ɛ̍dī.’ O̍ ko̍ŋ, mi̍ ŋ̄ tāŋ pēē pɔ̍mbɔ̄ɔ̍ ho̍ō.

¹⁴ Chɔ̍ŋ a̍ te̍le̍ŋ na̍a̍ ŋ̄ ma᷄l Ka̍dɛ̍sī Ba̍a̍nīāā wo̍, mbo̍ bīī a̍ te̍le̍ŋ na̍a̍ ŋ̄ ta᷄ŋ pēē pɔ̍mbɔ̄ɔ̍ ho̍ō wo̍, wɔ̄sīla̍ŋ be̍le̍-ya̍a̍ a̍ lā ŋɔ̄ma̍a̍ la̍a̍ hi̍o̍ū ni᷅ŋ ni̍. Pūa̍a̍ chɔ̄ūwāā I̍sɔ̄lūɛ̍i̍ya̍a̍ wa̍ a̍ te̍le̍ŋ ko̍ŋ nda̍, nda̍ kpo̍u̍ ma̍ chūū o̍ wɔ̄sīla̍ŋ nda᷅ŋ bɛ̄ŋgu̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ te̍ŋnu᷄ŋ a̍ nda̍ o̍kɔ̄ɔ̄ mbo̍ mēna᷄ŋ yɛ̍.

¹⁵ Mɛ̄lɛ̄ka̍ Ya̍a̍wɛ̄ɛ̄ o̍ lo̍ nda̍ nyɛ̄ pālāa̍ tūsīo̍o̍ chōo̍ ha̍a̍a̍ le̍ mbō tɛ̄ɛ̄mbu̍u̍ nda̍, mbō fāŋa̍ nda̍ I̍sɔ̄lūɛ̍i̍ya̍a̍ tu̍a̍a̍ tɛ̄ɛ̄ŋ, mbo̍ chīī nda̍ kpo̍u̍.

¹⁶ “Mɛ̄ɛ̍ pūa̍a̍ chɔ̄ūwa̍ ha̍ā ā chūū le̍nde̍ kpo̍u̍,

¹⁷ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ pāa̍le̍ pi᷅lɛ̍ āā,

¹⁸ ‘Pāa̍le̍ hāūle̍ŋ nde᷅ŋ, lā chō A̍ā chi̍e̍e̍ hi̍o̍u̍wɔ̄ɔ̄, mī lā kēēku̍ o̍ lɛ̄ŋndē Mo̍wa̍bīle̍ŋ ni᷄ŋ mī lā hīōū.

¹⁹ Lā chō fūūlūū o̍ pɛ̍ŋgu̍la̍ lɛ̄ŋndē A̍mɔ᷅na̍i̍tīi̍ya̍. Kɛ̍ tē lā fūūlu̍u̍ lo̍ŋ pɛ̍, lā yɔ᷅ŋ wāŋnda̍ ha̍ā nyɛ̄ o̍ nyɛ̄ le̍. Lā chi᷅ŋa̍la᷅ŋ nda̍ a̍ sɔ̍ŋgɔ̄ le̍. Kāni̍ fo̍ndōle̍, I̍ cho̍ nya̍ lɛ̄ŋndē ndāla̍ŋ kē nyɛ̄ pɔ̄mbɔ̄ bɛ̍ɛ̍ mī lē sīmnu᷄ŋ nyɛ̍ nyā le̍. Kāni̍ fu̍u̍le̍, wānāa̍ fu̍la̍ o̍ pūlāle̍ Lɔ̍tūle̍ŋ chōo̍ wa̍ nda̍ ya̍ I̍ ke̍ lɛ̄ŋnde̍ŋ nde᷅ŋ ni̍ māā nyɛ̄ ndā.’ ” (

²⁰ Lɛ̄ŋndē lēŋ bɛ̍ɛ̍ le̍ Lu̍ɛ̍fēmtīi̍ya̍ le̍ wa̍ ni̍, fo̍ndōle̍, nda̍ wa̍ īchāli̍ lo̍ŋ ni̍. Kɛ̍ mi̍ A̍mɔ᷅na̍i̍tīi̍ya̍ nda̍ vēēlū wāŋnda̍ ha̍ā āā Sāmsūmi̍mi̍tīi̍ya̍.

²¹ Wāŋnda̍ ha̍ā wānāā dīāllūŋ kālāā bɛ̄ndūa̍a̍ pīla̍ nda̍ wa̍ ni̍, ndu̍yɛ̍ ku̍ndā bɛ̄ndōo̍ pīla̍ nda̍ wa̍ vɛ̄lɛ̄ ni̍. Nda̍ bɛ̍ɛ̍ ā wa̍ ā vīlɛ̄ī kpo̍lōŋ bɛ̄ndū, mɛ̄ɛ̍ A̍na̍ka̍i̍tīi̍ya̍ ā wa̍ yɛ̍. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍lā A̍mɔ᷅na̍i̍tīi̍ya̍, ma̍ dīū wāŋnda̍ ha̍ā ta̍u̍ ta̍u̍, ndu̍yɛ̍ a̍ tūa̍a̍ lo̍ yōōmū wa̍, mi̍ A̍mɔ᷅na̍i̍tīi̍ya̍ ā tūāū nda̍ ma̍ sōlī nda̍ o̍ lɛ̄ŋndē lēŋ ni᷄ŋ. O̍ ko̍ŋ kɔ̍ɔ̍lī, mi̍ A̍mɔ᷅na̍i̍tīi̍ya̍ ā chūā lɛ̄ŋndē wāŋnda̍ ha̍ā ma̍ chāl lo̍ŋ.

²² Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍la̍ wāŋnda̍ ha̍ā yɛ̍ ko̍ni̍ o̍ ma̍la̍ wāŋnda̍ I̍dɔ̄m ni̍, wānāa̍ fu̍la̍ o̍ pūlāle̍ I̍īsɔ̄le̍ŋ chōo̍ ma̍ wa̍ īchāli̍ o̍ lɛ̄ŋndē īpēmbūle̍ŋ I̍dɔ̄m nda̍. Wāŋnda̍ I̍dɔ̄m bɛ̍ɛ̍ mi̍ Mɛ̄lɛ̄ka̍ mālā nda̍ ma̍ dīū Hɔ̄lu̍a̍tīi̍ya̍a̍ nda̍ a̍a̍ nɔ̍ lɛ̄ŋndē lēŋ nda̍ ta̍u̍ ta̍u̍, ndu̍yɛ̍, ā tūa̍a̍ lo̍ yōōmū wa̍ ma̍ tūāū nda̍, ma̍ sōlī nda̍ o̍ lɛ̄ŋndē lēŋ ni᷄ŋ po̍. O̍ ko̍ŋ kɔ̍ɔ̍lī, mi̍ wāŋnda̍ I̍dɔ̄m a̍ chu̍ā ni̍ko̍ lɛ᷅ŋndē wāŋnda̍ ha̍ā ma̍ chāl lo̍ŋ.

²³ O̍ ko̍ŋ kɔ̍ɔ̍lī, wānāā pūm ā wa̍ vɛ̄lɛ̄ īchāli̍ o̍ lɛ̄ŋnde̍ ho̍lnu̍ŋ pe̍e̍ mɛ̄ŋmā īhɛ᷄llo̍ Mɛ̄dītālu̍e̍e̍nīāā le̍ŋ ni᷄ŋ, mbo̍ kūā le̍nde̍ a̍ Ka̍a̍sā chi̍e̍e̍ ba᷅ tōūwo̍ di̍, mā vēēlū nda̍ āā A̍va̍i̍tīi̍ya̍. Wāŋnda̍ ha̍ā bɛ̍ɛ̍, mi̍ wāŋnda̍ Ki̍le̍tī a̍ di̍ū nda̍ kpo̍u̍, o̍ ko̍ŋ kɔ̍ɔ̍lī, ma̍ chūā chi̍e̍e̍ŋ ndāāŋ mu̍ŋ ma̍ chāl lo̍ŋ.)

²⁴ “Mɛ̄ɛ̍ na̍a̍ ŋ̄ chīi̍ lɛ̄ŋndē Mo̍wa̍bī le̍ŋ kpo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, ‘Lā chɔ᷄ŋ mī lā hīōū lāchī a̍ kɔ̄la̍ŋ. Lā ta᷄ŋ A̍nɔ̄ŋ le̍e̍lōo̍. I̍ ma̍l Māsā Bɛ̍ndōo̍ Si̍hɔ̄ŋ nya̍ o̍ bā, a̍ lɛ̄ŋndē ndɔ̄le̍ŋ fa̍ū, māsa̍ A̍mɔ̍lu̍a̍i̍tīi̍ya̍, o̍ cho̍ Hɛ̍si̍bɔ̄ŋ chi̍e̍e̍ wo̍. Lā kɔ̍ chi᷅ŋa̍la᷅ŋ ndu̍ a̍ sɔ̍ŋgɔ̄ɔ̍ mī lā kāndu̍ lɛ̄ŋndē ndɔ̄le̍ŋ bīyɔ̄ɔ̍.

²⁵ Ndu̍yɛ̍ chɔ̍ŋ a̍ pāa̍le̍ hāūle̍ŋ nde᷅ŋ, I̍ cho̍ tōsā mī sīōōŋīī bɛ̄ndūe̍i̍ ī kāndū wāŋnda̍ o̍ lɛ̄ŋndē ni᷄ŋ kpo̍u̍ bi̍yɔ̄ɔ̍ le̍ nya̍. I̍ cho̍ tōsā, tē wānā o̍ wānā tu̍e̍ī a̍ nya̍ o̍kɔ̄ɔ̄ pɛ̍, sīōōŋīī bɛ̄ndūe̍i̍ chō ndu̍ bīyɔ̄ɔ̄ mbō nyīīya̍ kpa̍ kpā.’ ”

I̍sɔ̄lūɛ̍i̍ya̍ yēm Māsā Bɛ̍ndōo̍ Si̍hɔ̄ŋ

²⁶ O̍ ko̍ŋ kɔ̍ɔ̍lī, mi̍ Mūu̍sē hi̍a̍ū lāchī a̍ sūɛ̍i̍ nāa̍ I̍sɔ̄lūɛ̍i̍ya̍ chūā mbo̍ dīmī āā, “Mi̍ so̍lī ki̍i̍la̍a̍, nāa̍ na̍a̍ ŋ̄ wa̍ o̍ lɛ̄ŋndē po̍lte̍ŋ Kɛ̍dɛ̍mɔ̍tī wa̍, mi̍ yɔ᷅ŋ nda̍ nāa̍ Māsā Bɛ̍ndōo̍ Si̍hɔ̄ŋ chu̍a̍, o̍ wa̍ Hɛ̍si̍bɔ̄ŋ chi̍e̍e̍ wo̍ a̍ yo̍o̍ŋgū kɔ̄l nyūlōo̍ ho̍ō. Mi̍ di̍mūl Māsāa̍ Si̍hɔ̄ŋ a̍a̍,

²⁷ ‘Yāndi̍i̍ chɛ̍l na̍a̍ mī ŋ̄ kēēku̍ o̍ lɛ̄ŋndē nūmnde̍ŋ ni᷄ŋ mī ŋ̄ hīōū. Nɛ̄īyo̍ sa̍kpō na̍a̍ ŋ̄ chō chūā ni̍ mī ŋ̄ hīōū, ŋ̄ cho̍ se̍ī bā o̍ bā le̍.

²⁸ Nyɛ̄ dīāā nyā bɛ̍ɛ̍, kɛ̄lɛ̄ŋgāā mɛ̄ŋmā nyā ma̍ ko̍lāā, ŋ̄ cho̍ chu̍ā fo̍ndō le̍, pīōndɔ̄ɔ̍ na̍a̍ ŋ̄ chō nya̍ o̍ bā ni̍. Nyɛ̄ ya̍ I̍ ye̍e̍ma̍ tu̍ŋ mā to̍sa̍l na̍a̍ wo̍, chɛ̄lɔ̄ɔ̍ na̍a̍ mī ŋ̄ kēēku̍ o̍ lɛ̄ŋnde̍ nūmnde̍ŋ ni᷄ŋ,

²⁹ ha̍a̍a̍ mī ŋ̄ ta᷄ŋ Chɔ̍ɔ̍dāŋ le̍e̍lōo̍ mī ŋ̄ kūɛ̄ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō chō na̍a̍ kīo̍o̍ le̍ŋ ni᷄ŋ. Wānāa̍ fu̍la̍ o̍ pūlāle̍ I̍i̍sɔ̄le̍ŋ chōo̍ ma̍ wa̍ I̍dɔ̄m nda̍, a̍ Mo̍wa̍bi̍tīi̍ya̍a̍ cho̍ A̍ā chi̍e̍e̍ wa̍, nda̍ bɛ̍ɛ̍ le̍nde̍ ko̍ni̍ nda̍ chɛ᷄l na̍a̍ ni̍ mi̍ ŋ̄ kēēkū o̍ lɛ̄ŋīī ndɛ̄i̍ ni᷄ŋ mi̍ ŋ̄ hīāū.’

³⁰ “Kɛ̍ mi̍ Māsā Bɛ̄ndōo̍ Si̍hɔ̄ŋ o̍ wa̍ Hɛ̍si̍bɔ̄ŋ ndo̍ ō kūūnā na̍a̍ le̍ kēēkōo̍ o̍ lɛ̄ŋndē ndɔ̄le̍ŋ ni᷄ŋ. Mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō kīndī ndu̍ bōlle̍ŋ, ndu̍yɛ̍ mbo̍ lūēī ndu̍ kɔ̄l yōŋgāa̍ ni᷄ŋ le̍ sɔ̍ŋgɔ̄ɔ̍ a̍ na̍a̍, le̍ hāli̍ kpe̍ŋ mī Mɛ̄lɛ̄ka̍ ndu̍ o̍o̍ ma̍l ndu̍ na̍a̍ o̍ bā mī na̍a̍ ŋ̍ ye᷅m ndu̍ mī ŋ̄ chūa̍ lɛ̄ŋndē ndɔ̄le̍ŋ mɛ̄ɛ̍ i̍ yɔ̍nu̍ŋ nu̍a̍ā yɛ̍.

³¹ “Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, ‘Mūu̍sē, I̍ ka̍ndu̍ Māsā Bɛ̍ndōo̍ Si̍hɔ̄ŋ mālɔ̄ɔ̍ nya̍ o̍ bā a̍ lɛ̄ŋndē ndɔ̄le̍ŋ. Lā chīŋa̍la᷅ŋ ndu̍, mī lā kāndu̍ lɛ̄ŋndē ndɔ̄le̍ŋ chūa̍a̍ nyɛ̄ nyā.’

³² O̍ ko̍ŋ kɔ̍ɔ̍lī, mi̍ Māsāa̍ Si̍hɔ̄ŋ o̍ chu̍ā wānāā ndūa̍a̍ kpo̍u̍ ma̍ hu᷄ŋ sa̍ā na̍a̍ a̍ sɔ̍ŋgɔ̄ɔ̍ Cha̍ha̍sī chi̍e̍e̍ i̍kɛ̍i̍.

³³ Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō kē na̍a̍ kpāāyāa̍ mi̍ ŋ̄ yām ndu̍. Ndu̍ ni̍, a̍ pūa̍a̍ ndūa̍a̍ o̍ ve̍lū wa̍, a̍ wānāā ndūa̍a̍, nda̍ kpo̍u̍ mi̍ ŋ̄ dīū nda̍.

³⁴ O̍ ko̍ŋ kɔ̍ɔ̍lī, chi̍e̍e̍ŋ ndɔ̄ɔ̍ŋ kpo̍u̍, mi̍ ŋ̄ bīī mu̍ŋ ndu̍yɛ̍ mi̍ ŋ̄ tɛ̄ɛ̄mbūū mu̍ŋ. Ndu̍yɛ̍ wānā o̍ wāna̍ wa̍ o̍ chi̍e̍e̍ŋ mu̍ŋ ni᷄ŋ, wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ pɔ̄mbɔ̄ ni̍, nda̍ kpo̍u̍ mi̍ ŋ̄ dīū nda̍ kpo̍u̍, ō pīlɛ̍ bɛ̍ɛ̍ ŋ̄ mɛ̄i̍ le̍.

³⁵ Kɛ̍ chɔ̄lūa̍a̍ nda̍ ki̍nɛ̍i̍, a̍ nyɛ̄m kɛ̄ndɛ᷄ŋ wa̍ o̍ chi̍e̍e̍ŋ mu̍ŋ ni᷄ŋ ndo̍ŋ, mi̍ ŋ̄ pūŋgā mu̍ŋ, mi̍ ŋ̄ kūānu᷄ŋ a̍ mu̍ŋ.

³⁶ Mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō tōsā mi̍ ŋ̄ bīī chi̍o̍o̍ŋ mu᷅ŋ kpo̍u̍, chɔ̍ŋ a̍ chi̍e̍e̍ bɛ̍ndōo̍ A̍lo̍yā, o̍ wa̍ o̍ lɛ̄ŋndē dɛ̍ŋgbɛ̍le̍ŋ A̍nɔ̄ŋ mɛ̄ɛ̄lu̍la̍ŋndo̍, ndu̍yɛ̍ a̍ chi̍e̍e̍ wa̍ o̍ lɛ̄ŋndē dɛ̍ŋgbɛ̍le̍ le̍ŋ ni᷄ŋ ndo̍, mbo̍ kūā a̍ chi̍o̍o̍ŋ ŋ̄ pīlɔ̍ŋ, chɔ̍ŋ le̍nde̍ mbo̍ kūā a̍ būŋgɛ̄ī Ki̍i̍li̍a̍dīve̍ di̍. Chi̍o̍o̍ŋ mu᷅ŋ ki̍nɛ̍i̍, ō pīlɛ̍ bɛ̍ɛ̍ ō ve̍ o̍ ka̍lā mbō pāla̍ na̍a̍ bīyɔ̄ɔ̄ le̍. Mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ō māl mu̍ŋ kpo̍u̍ na̍a̍ o̍ bā mi̍ ŋ̄ bīī mu̍ŋ.

³⁷ Kɛ̍ lɛ̄ŋndē wāŋnda̍ A̍mɔ᷅ŋ ki̍nɛ̍i̍, le̍ŋ le̍ yɔ̍nūŋ ni̍, māā Pīo̍o̍ Cha̍bɔ̍kī kɔ̍ŋgɔ̍ ki̍nɛ̍i̍, ndu̍yɛ̍ a̍ chi̍e̍e̍ŋ ndāa̍ŋ o̍ lɛ̄ŋndē īpēmbūle̍ŋ ni᷄ŋ, o̍ ko̍ŋ kɔ̍ɔ̍lī, a̍ fo̍ndāŋnda̍ŋ lā pīlɛ̍ la̍ŋ. Fo̍ndāŋndā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō dīmu̍l na̍a̍ māā na̍a̍ ŋ̄ ku̍ā lo̍ŋ te̍ la̍ŋ, lo̍ŋ ndu̍ ŋ̄ kūe̍ bɛ̍ɛ̍ i̍kɛ̍i̍ le̍.”