Cho̍wɛ̄ɛ̄ 2 - Yāu̍ Mɛ̄lɛ̄ka̍a̍

Mɛ̄lɛ̄ka̍ yɔ᷄ŋ so̍o̍nu̍a̍a̍ Chu̍dā māā sīlā le̍ pāa̍le̍ ndu̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni᷄ŋ tu̍mbe̍ le̍ŋ

¹ Lā hɔ᷄ŋ pu̍tɛ̍nɛ̍i̍yo̍ Sa̍a̍yɔ̄ŋ chi̍e̍e̍. Lā hɔ᷄ŋ pu̍tɛ̍nɛ̍i̍yo̍ o̍ pēmbīī nīī di̍a̍ndɛ̄i̍ chōo̍ kpe̍le̍ŋ mī wānā o̍ wānā tu̍e̍ī. Nya̍ wānā o̍ wānā cho̍ Chu̍dā, sīōōŋnde̍ bīi̍ nya̍ mī lā nyīīya̍, kāni̍ fu̍u̍le̍, pāa̍le̍ kpūndɛ̍lē bɛ̄ndūle̍ŋ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō ni᷅ŋ kpɛ̍ɛ̍lūŋ.

² Pāa̍le̍ le̍ŋ nyūmnda̍ŋ mā tūāl ni̍ŋ mī mā wa̍ ti̍ŋgīsi̍ bɛ̍ndū. Pɛ̍ɛ̍ŋ bɛ̍ɛ̍ wānā chi᷅ ni̍ŋ ha̍la̍a̍ pāa̍le̍ le̍ŋ te̍, nyūmnda̍ŋ mā chō tōlɔ̄ɔ̄ ti̍ŋgīsi̍. So̍o̍nu̍a̍a̍ chō hūnɔ̄ɔ̄ ku̍ndā bɛ̄ndōo̍ mā hu᷄ŋ ku̍mbū pēmbo᷄ŋ Chu̍dā kpo̍u̍, mɛ̄ɛ̍ nyūmnda̍ŋ mā kūmbū nu̍a̍ā fo̍ndāa̍ yɛ̍. Nyɛ̍ yɔ̍nūŋ ni̍ŋ pa̍a̍le̍ le̍ŋ ndo̍, kāni̍ bɛ̍ɛ̍ ī wāā le̍nde̍ i̍ yɔ̍nu̍ŋ ndɔ̍ le̍, ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ, ī wāā le̍nde̍ i̍ yɔ̍nūŋ ndɛ̍ le̍.

³ So̍o̍nu̍a̍a̍ ha̍ā mɛ̄ɛ̍ yīŋnde̍ŋ lē kūā nu̍a̍ā a̍ bīl vēsɛ̍i̍yo̍ lōmōo̍ yɛ̍, le̍nde̍ nda̍ wā ni̍ŋ kɔ᷅la̍ŋ a̍ tɔ̄lɔ̄ɔ̄la̍ŋ tɛ̄ɛ̄mbūūwo̍ ni̍. Lɛ̄ŋnde̍ŋ lē wā ni̍ŋ nda̍ lāchī nāŋɔ̄ɔ̍ mɛ̄ɛ̍ kpe̍lo̍o̍ I̍dɛ̄ŋ o̍ wa̍ nu̍a̍ā yɛ̍. Kɛ̍ tē ā hīōū pɛ̍, nda̍ a̍ mākɔ̄ɔ̄ mɛ̄ɛ̍ lɛ̄ŋndē po̍lte̍ŋ lē wā nu̍a̍ā yɛ̍ le̍nde̍ nyɛ̄ o̍ nyɛ̄ ō wā ni̍ŋ ni̍. Nyɛ̄ o̍ nyɛ̄ nɔ̍lā ni̍ŋ mbō hɛ̄lu᷄ŋ so̍o̍nu̍a̍a̍ ha̍ā le̍.

⁴ So̍o̍nu̍a̍a̍ ha̍ā, wānā che᷅ nda̍ pɛ̍ a̍a̍, su̍a̍a̍ ni̍, ndu̍yɛ̍ nyāānɔ᷄ŋndo̍ mɛ̄ɛ̍ su̍a̍ā chɔ̄ūwa̍ ā nyāānūŋ nu̍a̍ā yɛ̍.

⁵ Tē ā wa̍ hūūlōo̍ o̍ pēmbo᷄ŋ chōo̍ pɛ̍, wānā cha᷅ ko̍ bɛ̍ɛ̍ āā nyɛ̄lā su̍a̍a̍ ā nāŋ nda̍ŋ la̍ cho̍ kɔ̄la̍ŋ īdīkī dīkīe̍i̍ ni̍. Ndu̍yɛ̍, tē wānā tu̍e̍ī nda̍ kɔ̄la̍ŋ ā īpūlūlū pūlūlūe̍i̍ pɛ̍, āā yīŋnde̍ŋ le̍ cho̍ kɔ̄la̍ŋ a̍ bīllo̍ lōmɔ̄ɔ̍ ni̍. Ā chō hūnɔ̄ɔ̍ o̍ pūlāle̍ŋ ni᷄ŋ mɛ̄ɛ̍ pūa̍a̍ chɔ̄ūwāā kpāāyāā bɛ̍ndūa̍a̍ ā bɛ̄ɛ̄ndīa̍ŋ nu̍a̍ā le̍ chɔ̄ūwo̍ yɛ̍.

⁶ Sīōōŋīī bɛ̄ndūe̍i̍ bīī wāŋnda̍ pɔ̍ɔ̍ nda̍ lāchī. Hɔ̄lla̍ ā māŋga̍li̍a̍ŋ wa᷅ŋnda̍ kpo̍u̍ a̍ sīōōŋnde̍.

⁷ So̍o̍nu̍a̍a̍ ha̍ā, mɛ̄ɛ̍ ku̍u̍ba̍a̍ chɔ̄ūwa̍ ā chīŋa̍la᷅ŋ nu̍a̍ā ya̍a̍mɔ̍ɔ̍wa̍ yɛ̍, le̍nde̍ nda̍ wā ni̍ŋ ni̍. Mɛ̄ɛ̍ pūa̍a̍ chɔ̄ūwa̍ ā hēl nu̍a̍ā o̍ sāāsāa̍ chōo̍ le̍ chi̍o̍o̍ bīyɔ̄ɔ̍ yɛ̍, le̍nde̍ nda̍ wā ni̍ŋ ni̍. Ndu̍yɛ̍ tē ā wa̍ kɔ̄la̍ŋ pɛ̍, ō kɛ᷅ o̍ kɛ᷅ kɔ̄la̍ŋ lāchī sa̍kpō, ō se̍ī ba᷅ o̍ bā le̍,

⁸ kɛ̄lɛ̄ŋgāā ni᷅ŋ te̍ mbō kēlū chāa̍ŋ ndɔ̍ lāchī. Ō kɛ᷅ o̍ kɛ̄, kɔ̄la̍ŋ ndu̍ lāchī sa̍kpō. Ā kēī ni̍ŋ ku̍ndā bɛ̄ndū ya̍a̍mɔ̍ɔ̍wa̍ tɛ̍ɛ̄ŋ mā hīōū, nyɛ̄ ō nyɛ̄ he̍u̍nūŋ nda̍ le̍.

⁹ Mā de᷄l chi̍e̍e̍ bɛ̍ndōo̍ chōo̍, mā nyāānu᷄ŋ mā he᷄l o̍ sāāsāla̍ ba̍lu̍ chi̍o̍o̍ la̍ŋ chōo̍, mā tōl lēkɔ̍ɔ̍lī, mā lūɛ̄ī chīɛ̄īla̍ŋ ni᷄ŋ, mā kēēku̍ o̍ wu̍ndɛ̄i̍la̍ŋ mā lūɛ̄ī chīɛ̄īla̍ŋ ni᷄ŋ māā lāvīī.

¹⁰ Tē ā wa̍ kɔ̄la̍ŋ pɛ̍, lɛ̄ŋnde̍ŋ nyīīyāa̍, mī ha̍la̍a̍ hīīlu̍ŋ, mī pāa̍le̍ŋ, a̍ pāŋge̍i̍ ā nyu᷄m mī nyūmnda̍ŋ mā tōl. Lo̍o̍ŋ bɛ̍ɛ̍, mī ŋ̄ pɛ̄ŋgi̍ dīōndɔ̄ɔ̍.

¹¹ Mɛ̄lɛ̄ka̍ Ya̍a̍wɛ̄ɛ̄ o̍ si̍m pūa̍a̍ ndūa̍a̍ chɔ̄ūwa̍ lāchī mbo̍ wā kɔ̄la̍ŋ a̍ nda̍ a̍ dēŋīo̍o̍. Pūa̍a̍ ndūa̍a̍ chɔ̄ūwa̍ tu̍e̍ī ndu̍ dīōm nda̍, ā chō sɛ̍lɛ̍ ndu̍yɛ̍ ma̍ wā pūa̍a̍ chɔ̄ūwāā kpāāyāā bɛ̍ndū. Pāa̍le̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō pāa̍le̍ kpūndɛ̍ lē bɛ̄ndū. Ō nɛ̄ɛ̍nɛ̍ nɔ̍lā yɛ̍ ni̍ŋ mbō chīnda̍ pāa̍le̍ le̍ŋ?

Mɛ̄lɛ̄ka̍ dīmu̍l wāŋnda̍ le̍ mā ma᷄l yɔ̄ŋndā ndāla̍ wɔ̍ɔ̍ŋnda̍ŋ

¹² Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Kɛ̍ a̍ ko̍ŋ kpo̍u̍ lā mīīŋgu̍ ya̍ o̍ ībūŋ a̍ kɔ̄ltā nyāla̍ŋ kpo̍u̍, mī lā bīī su᷅mndo̍, mī lā cha᷄ŋ ndu̍yɛ̍ mī lā bīī mɔ̍nɛ̍i̍ o̍ kɔ̄ltā nyāla̍ŋ ni᷄ŋ.

¹³ Lā sɛ̄ɛ̄si̍a̍ŋ bɛ̍ɛ̍ nyɛ᷅la̍ŋ lēkɔ̄ɔ̍, ko̍ŋ cho̍ le̍ tu̍u̍ le̍. Mɛ̄ɛ̍ mī lā bīī mɔ̍nɛ̍i̍ o̍ kɔ̄ltā nyāla̍ŋ ni᷄ŋ. “Lā mīīŋgu̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ ībūŋ. Ō chō wāna̍ īkɛ̄ndɛ̄ ndu̍yɛ̍, ō chō wāna̍ īnyīɛ̍ɛ̍ bɛ̄ndū. Ō chō wānā bīu̍wa̍ŋ bɛ̍ndū, ndu̍yɛ̍ kāālā ndɔ̄ɔ̍ ō chō ō bɔ̄ɔ̍. Le̍ te̍le̍ŋ o̍ te̍le̍ŋ ō chō ō bɛ̄ɛ̄ndīa̍ŋ le̍ wāŋnda̍ mālɔ̄ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ, mbo̍ hīāū le̍ nda̍ nyɛ̄ pālāa̍ tūsīo̍o̍ chōo̍.

¹⁴ Tē lā tōsa̍ le̍nde̍ pɛ̍, kɛ̄lɛ̄ŋgāā mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō māŋga̍la̍ dɔ̍ɔ̍ kɔ̄l ndɔ̄ɔ̍, ō tu̍sī lɛ̍ nya̍ nyɛ̄ pālāā chōo̍ le̍, ndu̍yɛ̍ mbō dɔ̄ū nya̍ sa̍lā. O̍ ko̍ŋ, sa̍lālā tɔ̄lɔ̄ɔ̄lā ku̍lta̍ nya̍ a̍a̍ so̍lī o̍ chīɛ̍i̍ Mɛ̄lɛ̄ka̍a̍ la̍ŋ, a̍ sa̍lālā mūɛ̄īmā mākīle̍pīi̍la̍ŋ, mī lā mūli̍ŋ la̍ŋ vɛ̄lɛ̄ sōlīo̍o̍ lo̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ chūā.

¹⁵ “Lā hɔ᷄ŋ pu̍tɛ̍nɛ̍i̍yo̍ Sa̍a̍yɔ̄ŋ chi̍e̍e̍, lā chūūŋgi̍a̍a̍ wa᷅ŋnda̍ nāa̍ pi᷅lɛ̍, mī lā dīmu̍l nda̍ mā bīī su᷅mndo̍.

¹⁶ Lā chūūŋgi̍a̍a̍ wa᷅ŋnda̍ kpo̍u̍ nāa̍ pi᷅lɛ̍, mī lā dīndi̍ nda̍ le̍ bɔ̄ŋa᷅ŋndo̍. Bɛ̄ndū ni̍, chūāāmbɔ̄ ni̍, chɛ̄lɛ̄kpɛ̍ wɛ̍i̍yāā ni̍, kpo̍u̍ lā chūūŋgi̍a̍a̍ nda̍. Wānāa̍ la̍ŋga̍ cha᷅l bɛ̍ɛ̍ o̍ nɔ̄la̍ŋ ni᷄ŋ nda̍, ā fūla̍ chīɛ̄īla̍ŋ ni᷄ŋ mā hīŋ.

¹⁷ Wānāā sōlīāā lāsa̍lāa̍ a̍ sa̍a̍ŋgīāl Mɛ̍lɛ̄ka̍ wa̍, ā si᷄m ma̍āŋndo̍ tɛ̍ɛ̄ŋ a̍ dīo̍o̍ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mā cha᷄ŋ cha̍ŋ īmɔ̍nɔ̍ɔ̍ nāa̍ Mɛ̄lɛ̄ka̍ Ya̍a̍wɛ̄ɛ̄ chūā mā dīmi̍ māā, o̍o̍ Mɛ̄lɛ̄ka̍ Ya̍a̍wɛ̄ɛ̄, tūīīnu̍ŋ wa̍nāā nūmnda̍ īnyīɛ̍ɛ̍. Nyɛ̄m nu̍m ŋ̄ki̍ɔ̍ŋ na̍a̍ ŋ̄ chō ni̍, to̍sā mī lɛ̄ŋīī chēle̍ŋnde̍ ī pɛ̄ɛ̄sa̍ na̍a̍ ndu̍yɛ̍ mī ī ma᷄m na̍a̍ mī ī dīmi̍ āā, ‘Vɛ᷅ Mɛ̄lɛ̄ka̍ ndāa̍ ō ma̍lā nda̍ le̍, le̍.’ ”

A̍ mɛ̄ɛ̍ Mɛ̄lɛ̄ka̍ chō tōsā mī lɛ̄ŋndē Chu̍dāle̍ŋ lē mīīŋgu̍ vɛ̄lɛ̄ tɔ̄lɔ̄ɔ̄la̍ŋ nāŋɔ̄ɔ̄ yɛ̍ o̍kɔ̄ɔ̄

¹⁸ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ bu̍u̍la̍ŋ a̍ lɛ̄ŋndē ndɔ̄le̍ŋ o̍kɔ̄ɔ̄, mbo̍ tūīīnu᷄ŋ wa̍nāā ndūa̍a̍ īnyīɛ̍ɛ̍.

¹⁹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍li̍ nda̍ dīōm mbo̍ dīmī āā, “I̍ cho̍ nya̍ tɔ̄lɔ̄ɔ̄ ku̍llo̍ kē ta̍u̍ ta̍u̍, a̍ mūɛ̄īmā mākīle̍pīi̍ma̍ sɛ̄nɛ̄īya̍ŋ, ndu̍yɛ̍ a̍ chūɛ̄īmā ɔ̄li̍fīi̍ya̍ŋ mī lā hīni̍ kɔ̄l. I̍ to̍sā lɛ̍ mī lɛ̄ŋīi̍ ba̍lu̍ nya̍ ve̍ ī ma᷄m nya̍ mī ī pɛ̄ɛ̄sa̍ nya̍ le̍.

²⁰ I̍ cho̍ so̍o̍nu̍a̍a̍ cho̍ māā pūa̍a̍ chɔ̄ū ma̍ fūlā bā lūāŋndo̍ wa̍ sōlī o̍ lɛ̄ŋndē nyāle̍ŋ ni᷄ŋ, ndu̍yɛ̍ mī to̍ū ā ti᷄ŋ o̍ lɛ̄ŋndē po̍lte̍ ve̍sɛ̍i̍le̍ bɛ̍ndūle̍ŋ ni᷄ŋ. A̍ cho̍ lāchī wa̍, I̍ cho̍ tōsā mā dēli̍ o̍ Pēē Mɛ̄ŋmā Īhɛ᷄llo̍ ni᷄ŋ, a̍ cho̍ a̍ mākɔ̄ɔ̄ wa̍, mī to̍sa̍ mā dēli̍ o̍ Pēē Mɛ̄ŋmā Īhɛ᷄llo̍ Mɛ̄dītālu̍e̍e̍nīāā. Dīāllu᷄ŋ ndāa̍ŋ ŋ̄ chō sīɔ̄ mī ŋ̄ chu᷅ŋ. I̍ cho̍ nda̍ tɛ̄ɛ̄mbūū, fo̍ndōle̍, le̍ nyɛ̄ o̍ nyɛ̄ nda̍ tōsa̍ a̍ nya̍.”

²¹ “Nya̍ wāŋnda̍ o̍ lɛ̄ŋnde̍ŋ nde᷅ŋ ni᷄ŋ lā yɔ᷅ŋ īsīōōŋ te̍, lā na᷄ŋ kɔ̍l mī lā dɔ̄ɔ̄nu᷄ŋ nya̍a̍le̍. Kāni̍ fu̍u̍le̍, le̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ nya̍ tɛ̄ɛ̄ŋ ndo̍ŋ.

²² Nya̍ vīsīāā yōndūa̍a̍ bɛ̍ɛ̍, lā yɔ᷅ŋ īsīōōŋ te̍. Kāni̍ fo̍ndōle̍, bīllo̍ o̍ fo̍ndāŋndā nya̍ kūā di̍o̍la̍ŋ nda̍ŋ ō chō pūīī. Yɔ̄mīi̍ ku̍ām nde̍ bɛ̍ɛ̍ i̍ chō kōmɔ̄ɔ̄. Yɔ̄mīī māfi̍kīi̍ye̍ a̍ yɔ̄mīī mākīle̍pīi̍ye̍ ī kūām ni̍ŋ lɔ̍pī lɔ̍pī.

²³ “Le̍la̍ŋ nya̍ wāŋnda̍ Sa̍a̍yɔ̄ŋ, lā na᷄ŋ kɔ̍l, mī lā dɔ̄ūnu᷄ŋ nya̍a̍le̍ le̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsa̍l nya̍ ni̍ŋ ndo̍. Ō chō nya̍ pīɔ̍ɔ̍ yɔ̄ŋ tūu̍le̍ŋ a̍ te̍le̍ŋnda̍ kpe̍e̍kpe̍i̍la̍ŋ, ō chō nya̍ pīɔ̄ɔ̄ tāso̍o̍ yɔ̄ŋ tūu̍le̍ŋ, ndu̍yɛ̍ mbō yɔ᷄ŋ nya̍ vɛ̄lɛ̄ pīɔ̄ɔ̄ mɛ̄ɛ̍lāa̍ tūu̍le̍ŋ.

²⁴ Fo̍ndāŋndā nda̍ lūāā wi̍tīi̍yo̍ŋ a̍ ba̍a̍līi̍yo̍ŋ nda̍ŋ, lā chō wā lā pīāā cha̍ a̍ wi̍tīi̍yo̍ŋ ndu̍yɛ̍ a̍ ba̍a̍līi̍yo̍ŋ. Mūɛ̄īmā mākīle̍pīi̍ya̍ŋ, a̍ chūɛ̄īmā ɔ̄li̍fīi̍ya̍ŋ mā wā ni̍ŋ kɔ᷅la̍ŋ kōŋgi̍la̍ŋ nāa̍ nda̍ tōōsīāā ma̍ŋ nda̍.

²⁵ Nyɛ̄ o̍ nyɛ̄ so̍o̍nu̍a̍a̍ ku̍ndāa̍ bɛ̄ndūa̍a̍ ā tɛ̄ɛ̄mbu̍u̍ nya̍ o̍ bā o̍ wɔ̄sīla̍ hi̍o̍ū la̍ŋ ni᷄ŋ, I̍ cho̍ tōsā mbō mīīŋgu̍ nya̍ o̍ bā. Ya̍ pi̍la̍ yɔ̍ŋ so̍o̍nu̍a̍a̍ ku̍ndālā yɛ̍ yi̍a̍a̍ bɛ̄ndūāā kāŋ, mɛ̄ɛ̍ pūa̍a̍ chɔ̄ūwa̍ ā chō nu̍a̍ā yɛ̍ ni̍, le̍ tɔ̄lɔ̄ɔ̄lā nyāla̍ŋ tɛ̄ɛ̄mbūūwo̍.

²⁶ I̍ cho̍ tōsā mī nyɛ̄ dīa̍a̍ kūi̍ nya̍ o̍ bā, mī wānā o̍ wānā de᷅ nyɛ̄ dīa̍a̍ mbo̍ hīni̍ kɔ̄l. Lā sāŋgālā ni̍ŋ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, kāni̍ fo̍ndōle̍, le̍ sɔ̄ɔ̍ŋ kɔ̄ndɔ̄fi̍li̍ bɛ̄ndūŋ o̍ to̍sāl ni̍ŋ nya̍ wo̍ŋ. Ndu̍yɛ̍ I̍ cho̍ tōsā le̍ fɛ̍ɛ̍ŋ a̍ fɛ̍ɛ̍ŋ si̍ɔ̍mbu̍la̍ bi̍ī lɛ̍ ni̍ŋ wa̍nāā nīa̍a̍ le̍.

²⁷ A̍ te̍le̍ŋ ko̍ŋ, lā chō sīnā māā I̍ cho̍ nya̍ wānāā nīa̍a̍ I̍sɔ̄lūɛ̄ī tɛ̄ɛ̄ŋ, ndu̍yɛ̍ mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍, māā ō fūla̍ o̍ ya̍ kɔ̍ɔ̍lī, Mɛ̄lɛ̄ka̍ o̍ Mɛ̄lɛ̄ka̍ chēle̍ŋ cho̍ lɛ̍ le̍. Ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ, si̍ɔ̍mbu̍la̍ bi̍ī lɛ̍ ni̍ŋ wa̍nāā nīa̍a̍ le̍.”

A̍ būŋgɛ̄ī Mɛ̄lɛ̄ka̍ chūe̍l wānāā ndūa̍a̍ le̍ mī Nyi̍nā Ndɔ̄ɔ̍ tōl nda̍ kɔ̄ɔ̄lī ve̍ o̍kɔ̄ɔ̄

²⁸ Mi̍ Mɛ̄lɛ̄ka̍ hīāū lāchī a̍ sūɛ̍i̍ āā, “Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ Nyi̍nā nūu̍ yɔ̄ŋ wāŋnda̍ kpe̍de̍ kɔ̍ɔ̍lī. Pūa̍a̍ nya̍a̍ a̍ chūāā nyāā la̍a̍ndūa̍a̍ ā chō yōōŋgu̍ Mɛ̄lɛ̄ka̍a̍ dīmī nāa̍ wāŋnda̍ chūā. Wānāā nyāā yu̍vɛ̍i̍ya̍ sɔ̄la̍ ni̍ŋ yo̍o̍ŋgu̍ Mɛ̄lɛ̄ka̍a̍ o̍ lɔ̄mā sɔ̄la᷄ŋ ni᷄ŋ ndu̍yɛ̍ mī chūāā nyāā pīāāndūāā ā sɔ̄la̍ yōōŋgu̍ Mɛ̄lɛ̄ka̍a̍ o̍ yi̍lāŋnda̍ŋ ni᷄ŋ,

²⁹ A̍ tōnya̍, I̍ cho̍ Nyi̍nā nūu̍ yɔ̄ŋ bu̍ɛ̍i̍yāā nīa̍a̍ kɔ̄ɔ̄lī o̍ pālɛ̍i̍ ke̍ŋ ni᷄ŋ, wānā pɔ̍nɔ̍ ni̍, wānā la̍nɔ̍ ni̍.

³⁰ “I̍ cho̍ kɔ̄ndɔ̄fi̍lta̍ŋ chɔ̄m o̍ ha̍la̍a̍ ni᷄ŋ cho̍o̍ cho̍o̍, a̍ o̍ chi̍e̍ēŋndo̍ chōo̍. Nyɔ̄ɔ̍ŋ mu᷅ŋ mu̍ŋ wa᷅ ni̍ŋ ni̍, kōo̍wa̍ŋ, a̍ yīŋnde̍ŋ, a̍ ku᷄mnde̍ ta̍u̍.

³¹ Pāa̍le̍ŋ lē pɛ̄ŋgī ni̍ŋ fu̍lāa̍, mī pāŋge̍i̍ sīmnu᷄ŋ i̍ si̍a̍ŋā māā mākōo̍. Mu̍ŋ cho̍ yɔ̄nɔ᷄ŋ ni̍, lɔ̍ɔ̍ pa̍ pāa̍le̍ kpūndɛ̍lē bɛ̄ndūle̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē fūūlūū.

³² Ndu̍yɛ̍, ī chō yɔ̄nɔ᷄ŋ māā wānā o̍ wāna̍ pi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̍ le̍ ndu̍ mālāa̍ pɛ̍, ō chō ndu̍ pīŋī. Ndu̍yɛ̍ o̍ Pēmbīī Sa̍a̍yɔ̄ŋnde̍ chōo̍ Chūlu̍sɛ̄lɛ̄m, lo̍ŋ wānāa̍ hi̍a̍lūŋ ni̍ŋ mā lo̍ yōōmū wa̍ ā wā ni᷄ŋ ni̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ yɛ̍. Ndu̍yɛ̍ wānāā Mɛ̍lɛ̄ka̍ Ya̍a̍wɛ̄ɛ̄ hɛ̍lī ni̍ŋ mā lo̍ yōōmū wa̍ nda̍ wa᷅ ni̍ŋ lo̍ŋ ni̍.”