Wa̍lta̍ Wānāa̍ Chi̍i̍sūa̍a̍ 2 - Yāu̍ Mɛ̄lɛ̄ka̍a̍

Nyi̍nā Kāsīo̍o̍ hīŋ nāa̍ wānāā lāāla᷄ŋnda̍ chūā

¹ Mɛ̄ɛ̍ pāa̍le̍ Pɛ̍ŋti̍kɔ̍ɔ̍sīle̍ŋ lē fūūlu̍u̍, mi̍ wānāā lāāla᷄ŋnda̍ lo̍ŋ kpe̍de̍ ma̍ bɔ̄ɔ̄ŋi̍āŋ na̍a̍ pi᷅lɛ̍.

² Mɛ̄ɛ̍ nda̍ bɔ̄ɔ̄ŋi̍āŋ, ma̍ tūɛ̄ī bɔ̄ɔ̄lūū bɛ̄ndōo̍ o̍ lē pīlɛ̍ ni᷄ŋ kpe̍, chɔ̄nɔ᷄ŋndo̍ o̍ ha̍la̍a̍ ni᷄ŋ mɛ̄ɛ̍ hūēīyīī bɛ̄ndūe̍i̍ wā hɔ᷅ŋndo̍ nu̍a̍ā yɛ̍. Mi̍ bɔ̄ɔ̄lūū bɛ̄ndū kōŋ tīū si̍lɔ̍ nāa̍ nda̍ wa̍ īchāli̍ chi̍ɛ̍ī ni̍ŋ nda̍.

³ Ma̍ chā nyɔ̄ɔ̍ŋ māā dīɔ̄ɔ̄mūīī lēyīŋ pīɔ̄ūvi̍āŋndo̍ mi̍ ŋ̄ chāl nda̍ chōo̍ a̍ pi̍lɛ̍ŋ pi̍lɛ̍ŋ nda̍ kpe̍de̍.

⁴ Nda̍ kpo̍u̍ mi̍ Nyi̍nā Kāsīo̍o̍ tūāl nda̍ kɔ̄ɔ̄lī. Ma̍ kāndū sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋndo̍ŋ ni᷄ŋ, mɛ̄ɛ̍ Nyi̍nā Kāsīo̍o̍ ō ke̍ nda̍ kpāāyāa̍ le̍ mu̍ŋ dīmīo̍o̍ yɛ̍.

⁵ O̍ bōōndi̍i̍ ke̍ŋ ni᷄ŋ, Chu̍ūwa̍ a̍ pi̍ɛ̍ī Mɛ̍lɛ̄ka̍ wa̍ ā wa̍ Chūlu̍sɛ̄lɛ̄m chi̍e̍e̍, fūlāa̍ o̍ lɛ̄ŋnde̍ ni᷄ŋ kpo̍u̍ o̍ chi̍e̍ēŋndo̍ chōo̍.

⁶ Mɛ̄ɛ̍ nda̍ tūēī bɔ̄ɔ̄lūū bɛ̄ndōo̍ ho̍ō, ma̍ hūŋ. Ma̍ chūūŋgi̍āŋ fa̍ŋgā bɛ̍ndōo̍ lo̍ŋ. Mi̍ kɔ̄ndɔ̄fi̍llo̍ bīī wānāā kāa̍la̍ yɛ̍ yɛ̍la̍ wa̍ o̍ fāŋgā ko̍ŋ ni᷄ŋ nda̍. Kāni̍ fo̍ndōle̍, ā wa̍ wānāā lāāla᷄ŋnda̍ sūɛ̍i̍ tūēīyɔ̄ɔ̍ o̍ sɔ̄ɔ̍ŋ nda̍ŋ māŋgālāŋ yɛ̍ yɔ̍ŋ ni᷄ŋ.

⁷ Mi̍ sūɛ̍i̍ he̍ī bīī nda̍ kɔ̄ndɔ̄fi̍li̍ ta̍u̍ ta̍u̍. Ma̍ kāndū nyūūni̍āŋndo̍ āā, “Ō cho̍ o̍ lɛ̄ŋndē Kāli̍līle̍ŋ ni᷄ŋ te̍ pūa̍a̍ ha̍ā kpo̍u̍ a̍ fu̍la̍ le̍?

⁸ Kɛ̍ vɛ᷅ mi̍ na̍a̍ kpe̍de̍ ŋ̍ wa᷅ nda̍ sɔ̄ɔ̍ŋ na̍a̍ ŋ̄ māŋgālāŋ yɛ̍ yɔ̍ŋ tūēīyɔ̄ɔ̍ o̍ dīmīo̍o̍?

⁹ Lɛ̄ŋīī yɛ̍ yɛ̍ na̍a̍ ŋ̄ fūla̍ ve̍ cho̍ he̍ī ni̍. Pa̍a̍tīāā, a̍ Mi̍dīāā, a̍ Ɛ̍lām, a̍ Mɛ̄sōpōte̍e̍mīāā, a̍ Chūdi̍a̍ā, a̍ Kāpādo̍o̍sīāā, a̍ Po̍ŋtɔ̄ɔ̄, a̍ E̍e̍sīā,

¹⁰ a̍ Fi̍lu̍a̍chīāā, a̍ Pāmfi̍i̍līāā, a̍ I̍chi̍pī, a̍ lɛ̄ŋndē Li̍bīāāle̍ŋ, Sāīlu̍i̍nī chi̍e̍e̍ i̍kɛ̍i̍, a̍ mīālāa̍ chɛ̍ŋ Lu̍o̍m chi̍e̍e̍ wa̍,

¹¹ Chu̍ūwa̍ ni̍, a̍ wānāa̍ chu̍a̍ lāāla᷄ŋ Chu̍ūwa̍ wā, Ki̍le̍tīnda̍ ni̍, a̍ Ālu̍e̍e̍bīāā. Na̍a̍ kpo̍u̍ ŋ̄ chō nda̍ sūɛ̍i̍ tūēīyɔ̄ɔ̍ a̍ wa̍lta̍ kɔ̄ndɔ̄fi̍ltā Mɛ̄lɛ̄ka̍ tōsa̍ lāŋ o̍kɔ̄ɔ̄ o̍ sɔ̄ɔ̍ŋ nāāŋ māŋgālāŋ yɛ̍ yɔ̍ŋ ni᷄ŋ.”

¹² Mi̍ sūɛ̍i̍ he̍ī bīī nda̍ kɔ̄ndɔ̄fi̍li̍. Nda̍ a̍a̍ si̍nā nyɛ᷅ nda̍ a̍a̍ to̍sā le̍. Ma̍ kāndū nyūūni̍āŋndo̍ āā, “Ī māā vɛ̄ɛ̍nɛ̍ cho̍ yɛ̄ he̍ī?”

¹³ Kɛ̍ ndu̍yɛ̍, mi̍ ā pūm ā kāndū wānāā lāāla᷄ŋnda̍ māmɔ̄ɔ̍. Ma̍ dīmī āā, “Mbɔ̄ mūɛ̄īya̍ŋ nda̍ ko᷄l ni̍.”

Pītɛ̍ sōō nāa̍ fāŋgā bɛ̄ndōo̍ chūā

¹⁴ Pītɛ̍ wa̍ ŋ̄wāŋ tɔ̍ a̍ wānā pīli̍a̍a̍ Chi̍i̍sū ve᷅m hɔ̄ltē ndɔ̄ wa̍ tɛ̍ɛ̄ŋ. Mbo̍ cha᷄ŋ, mbo̍ kāndū sūɛ̍i̍ nāa̍ fāŋgā bɛ̍ndōo̍ ho̍ō chūā. Mbo̍ dīmī chōo̍ cho̍o̍ āā, “Chāa̍ŋāā nīāā Chu̍ūwa̍ a̍ wānā o̍ wāna̍ cho̍ Chūlu̍sɛ̄lɛ̄m na̍nu᷄ŋ, lā ya᷄ŋ ya̍ nīla̍ŋ nyɛ̄ kɛ̄ndɛ̍ī mī chɔ̍m nya̍ nyɛ̍ yɔ̍nu̍ŋ ho̍ō wo̍.

¹⁵ Ō cho̍ mɛ̄ɛ̍ nya̍ chō yīya᷄ŋndo̍ yɛ̍ le̍ i̍ cho̍ le̍. Ō cho̍ ma̍mu̍ɛ̍i̍ le̍ wāŋnda̍ ha̍ā ko᷄l te̍, kāni̍ fu̍u̍le̍ yɛ̄ɛ̄ŋnde̍ŋ lē lāŋga̍ fu̍lā su̍ŋ.

¹⁶ Nyɛ̍ yɔ̍nu̍ŋ ndo̍ cho̍ ho̍ō ni̍ māā, wāna̍ su̍a̍ā le̍ Mɛ̄lɛ̄ka̍ wo̍ dīōla̍ŋ āā, Cho̍wɛ̄ɛ̄, nyɛ̄ o̍ di̍mi̍ wo̍ ndu̍ yɔ̍nu̍ŋ ho̍ō ni̍. Mi̍ Cho̍wɛ̄ɛ̄ di̍mī sīndɛ̄ māā,

¹⁷ Mɛ̄lɛ̄ka̍ dīmi̍ āā, nyɛ̄ ya̍ Mɛ̍lɛ̄ka̍ chō tōsā o̍ pālɛ̍i̍ mɛ̍ɛ̍lɛ̄ī chōo̍ wo̍, ndu̍ cho̍ ho̍ō ni̍. I̍ cho̍ Nyi̍nā nūu̍ yɔ̄ŋ wāŋnda̍ kpe̍de̍ kɔ̍ɔ̍lī. Pūa̍a̍ nyāa̍, a̍ chūāūwāā nyāā la̍a̍ndūa̍a̍, ā chō yōōŋgu̍ Mɛ̄lɛ̄ka̍a̍ dīmī nāa̍ wāŋnda̍ chūā. Chūāā nyāā pi̍a̍a̍ndūa̍a̍ chō yōōŋgu̍ Mɛ̄lɛ̄ka̍a̍ sɔ̄lā o̍ yi̍lāŋnda̍ŋ ni᷄ŋ, mī wānāā nyāā yu̍vɛ̍i̍ya̍ sɔ̄la̍ yōōŋgu̍ Mɛ̄lɛ̄ka̍a̍ o̍ lɔ̄mā sɔ̄la᷄ŋ ni᷄ŋ.

¹⁸ A̍ tōnya̍, I̍ cho̍ Nyi̍nā nūu̍ yɔ̄ŋ bu̍ɛ̍i̍yāā nīa̍a̍ kɔ̄ɔ̄lī o̍ pālɛ̍i̍ ke̍ŋ ni᷄ŋ, wānā pɔ̍nɔ̍ ni̍, wānā la̍nɔ̍ ni̍, ndu̍yɛ̍, mā dīmi̍ yōōŋgu̍ Mɛ̄lɛ̄ka̍a̍.

¹⁹ I̍ cho̍ kɔ̄ndɔ̄fi̍lta̍ŋ chɔ̄m o̍ ha̍la̍a̍ ni᷄ŋ cho̍o̍ cho̍o̍, mī chɔ̍m ka̍a̍ma̍āla̍ŋ o̍ chi̍e̍ēŋndo̍ chōo̍. Nyɔ̄ɔ̍ŋ mu᷅ŋ mu̍ŋ wa᷅ ni̍ŋ ni̍, kōo̍wa̍ŋ, a̍ yīŋnde̍ŋ, a̍ ku᷄mnde̍ ta̍u̍.

²⁰ Pāa̍le̍ŋ lē pɛ̄ŋgī ni̍ŋ fūlāa̍, mī pāŋge̍i̍ sīmnu᷄ŋ i̍ si̍a̍ŋā māā mākōo̍. Mu̍ŋ cho̍ yɔ̄nɔ᷄ŋ ni̍, lɔ̍ɔ̍ pa̍ pāa̍le̍ bɛ̍ndūlē Māsānɔ̄ɔ̍ Mɛ̄lɛ̄ka̍ chō nyɛ̄ tōsā le̍ŋ lē fūūlūū.

²¹ Ndu̍yɛ̍, ī chō yɔ̄nɔ᷄ŋ māā wānā o̍ wāna̍ pi̍ɛ̍i̍ Māsānɔ̄ɔ̍ Mɛ̄lɛ̄ka̍ le̍ ndu̍ mālāa̍ pɛ̍, Mɛ̄lɛ̄ka̍ chō ndu̍ pīŋī.”

²² Mi̍ Pītɛ̍ hi̍a̍ū lāchī a̍ dīmīo̍o̍ āā, “Chāāŋāā nīāā Chu̍ūwa̍, lā ya᷄ŋ ni᷅la̍ŋ o̍ sūɛ̍i̍ ya̍ cho̍ nya̍ dīmūllo̍ ve̍. Mɛ̄lɛ̄ka̍ chɔ᷄m kpe̍nde̍ke̍le̍ māā ndu̍ wa̍ wa̍llo̍ a̍ Chi̍i̍sū o̍ fu̍la̍ Na̍a̍sa̍lūɛ̄ī yo̍ ni̍. Ō chɔ᷄m he̍ī sa̍na̍a̍ o̍ ka̍a̍ma̍āla̍ŋ ni᷄ŋ, a̍ kɔ̄ndɔ̄fi̍lta̍ŋ, a̍ kpālōla̍ o̍ to̍sa̍ a̍ Chi̍i̍sū la̍ŋ. Nya̍ pi̍la̍ lā sīnā sɔ̍ɔ̍ŋ yɔ̍nu̍ŋ ndo̍ŋ, kāni̍ fo̍ndōle̍, nya̍ tɛ̄ɛ̄ŋ na̍nu᷄ŋ ŋ̍ yɔ̍nu̍ŋ ni̍.

²³ Ndu̍ Mɛ̍lɛ̄ka̍ ndu̍ kɛ̍ɛ̍si̍a̍a̍ le̍ Chi̍i̍su̍ yɔ̄ŋgōo̍ nāa̍ nya̍ chūā ni̍. Chi̍i̍sū ko̍ŋ ndu̍ nya̍ tōsa̍ ni̍, mi̍ wānāā yɔ̄ŋ wɔ̄ɔ̍ŋnda̍ bāŋ ndu̍ o̍ yɔ̄m sīŋgāfīlāa̍ chōo̍. Mi̍ lā dīī ndu̍. Kɛ̍ ndu̍yɛ̍, Mɛ̄lɛ̄ka̍ pi̍la̍ kɛ̍ɛ̍si̍a̍a̍ ndi̍ le̍nde̍ ni̍. Mɛ̄lɛ̄ka̍ sīna̍ ndi̍ fɛ̍lɛ̍ŋ pa̍a̍ndū.

²⁴ Chi̍i̍sū ko̍ŋ ndu̍ Mɛ̄lɛ̄ka̍ mīŋgi̍ yōōmū ni̍. Ndu̍yɛ̍, mbo̍ sōlī ndu̍ o̍ nyɛ̄ nɛ̄īyāa̍ ni᷄ŋ, nyɛ̄ nɛ̄īyāa̍ chi̍e̍e̍ pīɔ̍m. Kāni̍ fo̍ndōle̍, pīɔ̍mndo̍ ndu̍ o̍o̍ nɔ̍ kpa̍a̍yā le̍ ndu̍ kɛ̄sīo̍o̍ chi̍e̍e̍ pīɔ̄m te̍.

²⁵ Mi̍ Dēēve̍ di̍mī a̍ ndu̍ o̍kɔ̄ɔ̄ māā, i̍ sa̍a̍lu̍ŋ māā Māsānɔ̄ɔ̍ Mɛ̄lɛ̄ka̍ chō ya̍ kɔ̄ɔ̄lī lɔ̍ɔ̍ lɔ̍ɔ̍. Wānā o̍ wānā yɔ᷅ŋ ya̍ nyɛ̄ le̍. Kāni̍ fo̍ndōle̍, ō chō ya̍ īkɛ̄i̍ le̍ ya̍ mālāa̍.

²⁶ Le̍la̍ŋ, I̍ cho̍ a̍ kɔ̄l kɛ̄ndɛ̄. Ndu̍yɛ̍, I̍ cho̍ wāŋnda̍ dīmūl a̍ kɔ̄l nī kɛ̍ndɔ̄ɔ̍ o̍kɔ̄ɔ̄. I̍ si̍nā māā I̍ cho̍ wu̍. Kɛ̍ ō wa̍ bɛ̍ɛ̍ le̍nde̍ ni̍, I̍ cho̍ lēhɔ̄l o̍ nɛ̄ī le̍ Mɛ̄lɛ̄ka̍ lɔ̍ɔ̍ ya̍ I̍ cho̍ yōōmū wo̍.

²⁷ Kāni̍ fo̍ndōle̍, nūm Mɛ̄lɛ̄ka̍ a̍ me᷅l la̍ mī wa̍ o̍ sɛ̄īyo̍ ni᷄ŋ te̍. A̍ me᷅l bu̍ɛ̍ī nūm sa̍kpōo̍, mbō sɛ̄ le̍.

²⁸ A̍ chɔ̍m ya̍ nɛ̄īla̍ŋ le̍ lūɛ̄īyɔ̄ɔ̍ o̍ yōōmū kpe̍e̍kpe̍i̍yo̍ ni᷄ŋ. Ā chō ya̍ īkɛ̄i̍. Le̍la̍ŋ, ā chō tōsā mī wa̍ a̍ kɔ̄l kɛ̄ndɛ̄ ta̍u̍.”

²⁹ Mi̍ Pītɛ̍ di̍mī āā, “Chāāŋāā nīa̍a̍, I̍ chɔ᷅m ndɔ̍ nya̍ kpe̍nde̍ke̍le̍ a̍ fi̍nyā nāā ma̍māa̍ Dēēve̍ o̍kɔ̄ɔ̄. Dēēve̍ vi᷅ ni᷅ŋ, ma̍ chɔ̄ ndu̍. Ndu̍yɛ̍, sɛ̄i̍ ndɔ̄ɔ̍ chō na̍nu᷄ŋ mɛ̄ɛ̍ na̍a̍ ŋ̄ sūāā nu̍a̍ā yɛ̍.

³⁰ Wāna̍ su̍a̍ā le̍ Mɛ̄lɛ̄ka̍ wo̍ o̍ wa̍ ni̍. Ndu̍ o̍o̍ si̍nā bu̍ŋgɛ̄ī Mɛ̄lɛ̄ka̍ chūe̍l ndu̍ ve̍. Mi̍ Mɛ̄lɛ̄ka̍ chūā būŋgɛ̄i̍ ī kālā ka̍lā māā, ō chō tōsā mī chūāūwāā māmāa̍ Dēēvi̍a̍a̍ ō pīlɛ̍ wa̍ māsā bɛ̍ndōo̍ o̍ fo̍nda᷄ŋ Dēēvi̍o̍o̍.

³¹ Dīmī Dēēve̍ di̍mi̍ māā Mɛ̄lɛ̄ka̍ me᷅l ndu̍, mbō wa̍ o̍ sɛ̄īyo̍ ni᷄ŋ te̍ wo̍, ō wa̍ māwāā sūɛ̍i̍ wa̍ā lāchī dīmīo̍o̍ a̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, mīīŋgū o̍ mi̍i̍ŋgu̍ yōōmū wo̍ o̍kɔ̄ɔ̄. Ndu̍yɛ̍, mbo̍ dīmī māā ō me᷅l di̍a̍llūŋ ndɔ̄ŋ, mī ŋ̄ sɛ̄ le̍.

³² Chi̍i̍sū ko̍ŋ ndu̍ Mɛ̄lɛ̄ka̍ mīŋgi̍ yōōmū ni̍. Na̍a̍ kpe̍de̍ mi̍ ŋ̄ chā ndu̍.

³³ O̍ ko̍ŋ kɔ̍ɔ̍lī mi̍ Mɛ̄lɛ̄ka̍ hēl a̍ Chi̍i̍sū. Mbo̍ kē ndu̍ nāa̍ si̍māā bɛ̄ndūa̍a̍ ndu̍ pi̍la̍ īkɛ̄i̍. Mbo̍ kē ndu̍ Nyi̍nā ndɔ̄ɔ̍ mɛ̄ɛ̍ Mɛ̍lɛ̄ka̍ fi̍nyā ndɔ̄ o̍ chu̍e̍l ndu̍ būŋgɛ̄i̍ yɛ̍. Nyɛ̄ o̍ nyɛ̄ nya̍ chē, mi̍ lā tūɛ̄ī, ō chō māchūāā chɔ̄nɔ᷄ŋndo̍ o̍ Chi̍i̍sū lo̍.

³⁴ Dēēve̍ he̍l ɛ̄chɛ̍nɛ̄ mɛ̄ɛ̍ Chi̍i̍sū he̍l ɛ̄chɛ̍nɛ̄ yɛ̍ le̍. Kɛ̍ mi̍ Dēēve̍ di̍mī māā, mi̍ Māsānɔ̄ɔ̍ Mɛ̄lɛ̄ka̍ dīmūl Māsānɔ̍ nūu̍ āā, Cha̍l o̍ bā ni̍ kɛ̍ndɔ̄ɔ̍ chōo̍,

³⁵ mī to̍sa̍ mā yēm ya̍a̍mɔ̍ɔ̍wa̍a̍ nu̍mnda̍, mā wa̍ nu̍m o̍ bā bɛ̄ŋgu̍.”

³⁶ Mi̍ Pītɛ̍ hi̍a̍ū lāchī a̍ sūɛ̍i̍ āā, “Le̍la̍ŋ, nya̍ Chu̍ūwa̍ kpe̍de̍, lā sīna̍ kpe̍nde̍ke̍le̍ māā Chi̍i̍su̍ nya̍ ba᷄ŋ ho̍ō o̍ yɔ̄m sīŋgāfīlāa̍ chōo̍ wo̍, ndu̍ Mɛ̄lɛ̄ka̍ sīīŋgūū Māsānɔ̄ɔ̍ ni̍. Mbo̍ sīīŋgūū ndu̍ Ki̍li̍tī, wāna̍ o̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.”

³⁷ Mɛ̄ɛ̍ wāŋnda̍ ha̍ā tūēī nyɛ̄ Pītɛ̍ dīmi̍ wo̍, mi̍ mɔ̍nɛ̍i̍ bīī nda̍ ta̍u̍. Ma̍ nyūnā Pītɛ̍ a̍ wānāā Chi̍i̍sū ve᷅m hɔ̄ltē ndɔ̄ wa̍ ā pīli̍a̍a̍ āā, “Yɛ̄ɛ̍nɛ̍ na̍a̍ ŋ̄ tōsa̍ yɛ̍, chāa̍ŋāā nāa̍?”

³⁸ Mi̍ Pītɛ̍ lō lo̍ŋ mbo̍ mu̍lī āā, “Lā ma᷄l yɔ᷅ŋndā nyāla̍ wɔ̍ɔ̍ŋnda̍ŋ, mī lā pɛ̄l dīōla̍ Chi̍i̍sū Ki̍li̍tīla̍ŋ, mā yīŋ nya̍ mɛ̄ɛ̍ nya̍ chō fa̍ū, le̍ mī Mɛ̄lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ, ndu̍yɛ̍, mbō ke̍ nya̍ Nyi̍nā ndɔ̍ Kāsīo̍o̍.

³⁹ Ō chu̍a̍ būŋgɛ̄i̍ he̍ī nāa̍ nya̍ chūā, a̍ chūāūwāā nyāa̍, a̍ wānāa̍ cho̍ o̍ lɛ̄ŋīī la̍nda̍ŋ nde̍ ni᷄ŋ nda̍. Būŋgɛ̄i̍ he̍ī chō le̍ na̍a̍ wānā o̍ wāna̍ Māsānɔ̄ɔ̍ Mɛ̄lɛ̄ka̍ nāa̍ ō vēēlu̍ nāa̍ ndu̍ chu̍a̍.”

⁴⁰ Mi̍ Pītɛ̍ hi̍a̍ū lāchī a̍ nda̍ to̍kpālā fāŋgā fa̍ŋgā chɔ̄mndo̍. Mbo̍ sīlā nda̍ ō kālā ka̍lā āā, “Lā pīŋi̍ nya̍ pi̍la̍, yɔ̍ŋi̍ nya̍ sɔ̄la̍ nyɛ̍ pālāa̍ mɛ̄ɛ̍ wānāā kɔ̄l vēsɛ̍i̍ya̍ ha̍ā chō nyɛ̄ pālāa̍ sɔ̄la̍ yɛ̍.”

⁴¹ Ma̍ yīŋ wānāa̍ la̍a̍la̍ŋ a̍ dīōmndā Pītɛ̍ di̍mi̍ la᷅ŋ nda̍ŋ. Wānāa̍ de̍l wānāā lāāla᷄ŋnda̍ chōo̍ pa̍a̍le̍ le̍ŋ nda̍, nda̍ a̍a̍ wa᷅ wāa̍la̍ŋ lā yāa̍.

⁴² O̍ ko̍ŋ kɔ̍ɔ̍lī, nyɛ̄m wānāā lāāla᷄ŋnda̍ ha̍ā hīōū lāchi̍ a̍ tōsāa̍ wo̍ŋ, mu̍ŋ cho̍ mu᷅ŋ ni̍, mi̍ wānāā Chi̍i̍sū ve᷅m hɔ̄ltē ndɔ̄ wa̍ pɛ̄ɛ̄kū nda̍. Ma̍ pīɔ̄ūvi̍āŋ nyɛ᷅m nda̍ nɔ̄ wo̍ŋ. Ma̍ hīāū lāchī a̍ nyɛ̄ dīa̍a̍ dīo̍o̍ lātūlu̍, a̍ Mɛ̄lɛ̄ka̍ pīɛ̄īyo̍ mɛ̄ɛ̍ ka̍ā ndāa̍ wa̍ yɛ̍.

Dīōm pīlɔ̍ɔ̄ wānāā lāāla᷄ŋnda̍ tɛ̄ɛ̄ŋ

⁴³ Mi̍ wānāā lāāla᷄ŋnda̍ tōsā ka̍a̍ma̍āla̍ŋ a̍ kɔ̄ndɔ̄fi̍lta̍ŋ ta̍u̍. Mi̍ kɔ̄ndɔ̄fi̍llo̍ bīī wānā o̍ wānā.

⁴⁴ Mi̍ wānāā lāāla᷄ŋnda̍ kpo̍u̍ a̍ hi̍a̍ū lāchī a̍ chūūŋgi̍āŋ le̍ndi̍a̍a̍mɔ̍ɔ̍ nāa̍ pi᷅lɛ̍, a̍ nyɛ̄m nda᷄ŋ pīɔ̄ūvi̍āŋndo̍.

⁴⁵ O̍ pi̍sī ko̍ nyɛ᷅m ndɔ̄ɔ̍ŋ, ā pīɔ̄ūvi̍āŋ ka̍ni̍ŋ mu̍ŋ nda̍ kpe̍de̍. Mɛ̄ɛ̍ wāŋndo̍ nɔ̄ ba̍ ha̍vɛ̍i̍yo̍ yɛ̍, le̍nde̍ ndu̍ o̍o̍ sɔ̍lā ni̍.

⁴⁶ Lēpāla̍ o̍ lēpāla̍ chūūŋgi̍āŋndo̍ o̍ chīɛ̍i̍ Mɛ̄lɛ̄ka̍a̍ ni᷄ŋ na̍a̍ pi᷅lɛ̍. Mā hīāū la̍chi̍ a̍ nyɛ̄ dīa̍a̍ dīo̍o̍ lātūlu̍ o̍ chīɛ̄īlā ndāla̍ yɛ̍ yɛ̍la̍ŋ ni᷄ŋ. Mā kēna᷅ŋ nyɛ̍ ndā di̍a̍a̍ a̍ kɔ̄ltā kɛ̄ndɛ̄, a̍ kɔ̄ltā kūmbīa̍ŋnda̍ŋ.

⁴⁷ Ā wa̍ Mɛ̄lɛ̄ka̍ sāŋgālāa̍ lɔ̍ɔ̍ lɔ̍ɔ̍. Wāŋnda̍ kpe̍de̍ nda̍ a̍a̍ nɔ̍ bɛ̄ɛ̄le̍ŋ le̍ wānāā lāāla᷄ŋnda̍. Lēpāa̍ o̍ lēpāa̍, Māsānɔ̄ɔ̍ Mɛ̄lɛ̄ka̍ ndu̍ o̍o̍ chɔ̍ɔ̍lū wa̍nāā Mɛ̄lɛ̄ka̍ pīŋi̍ wa̍ o̍ ku̍ndā wānāā lāāla᷄ŋnda̍ chōo̍.