Ti̍mo̍tī Di̍i̍ŋ Ndɔ̄ɔ̍ 2 - Yāu̍ Mɛ̄lɛ̄ka̍a̍

¹ Le̍la̍ŋ po̍ nūu̍, kɛ̄ndɛ̄i̍ Mɛ̄lɛ̄ka̍ tōsa̍l nu̍m le̍ chō ŋ̄ chō dīōm pīlɛ̍ a̍ Chi̍i̍sū Ki̍li̍tī wo̍, kɛ̄ndɛ̄ī ke̍ŋ ī ke̍ nu̍m kpāāyāa̍ fɔ̍.

² Pɛ̄ɛ̄kūlā ŋ̄ tūēī ya̍ dīōm mi̍ I̍ pɛ̍ɛ̍kū wāŋnda̍ la̍ŋ fāŋgāa̍ o̍ hɔ̄l la̍ŋ, pɛ̍ɛ̍ku̍ pu̍a̍a̍ ā wānā nɔ̍lā mā ti̍i̍nda̍ŋ nda̍, a̍ nɔ̍lā mā kɔ̍ pɛ̍ɛ̍kū chāāŋāā ndāa̍ wa̍.

³ Nūm bɛ̍ɛ̍ wa̍ o̍ bɛ̍ɛ̍ndīa̍ŋ le̍ mā sɔ̍la̍ nyɛ̄ pālāa̍ māā so̍vɛ̄i̍nɔ̍ le̍ Chi̍i̍sū Ki̍li̍tī.

⁴ Wānā o̍ wāna̍ cho̍ so̍vɛ̄i̍nɔ̍ ō wo̍ū ba̍ o̍ sɔ̄ɔ̍ŋ wānāa̍ cho̍ a̍ so̍vɛ̄i̍ le̍ wa̍ ni᷄ŋ te̍. Kāni̍ fu̍u̍le̍, yēēmɛ̍i̍ ndūɛ̍i̍ cho̍ ni̍, māā mbō tōsa̍ nyɛ̄ wāna̍ cho̍ ndu̍ bōlle̍ŋ ndo̍ ō hɛ̄nāŋ ndo̍.

⁵ Le̍nde̍ ko̍ni̍, wāna̍ ku̍ā ho̍ō nyāānɔ᷄ŋ lābɛ̄ɛ̄la̍a̍ nda̍ chāāŋāā ndūa̍a̍ wo̍, mɛ̄ɛ̍ mbō chu̍a̍ sāwā o̍ sāwa̍ cho̍ a̍ kīlta̍ la̍ŋ o̍kɔ̄ɔ̄. Tē ō chu̍e̍ la̍ŋ te̍, ō sɔ̍lā fa̍ndā nda̍ kē wa̍nāa̍ sɔ̍lā chāndūla̍ŋ nda̍ wo̍ le̍.

⁶ Ō fūla̍ o̍ ko̍ŋ kɔ̍ɔ̍lī, wāna̍ wa̍li̍ īchīɔ̍ɔ̍ o̍ to̍sā wa̍llo̍ ō kālā ka̍lā wo̍ ō nɔ̄ mbō wa̍ wāna̍ tāso̍o̍ le̍ tɔ̄lɔ̄ɔ̄ kōŋ dīo̍o̍.

⁷ Le̍la̍ŋ, yi̍ya̍ŋ a̍ sɔ̄ɔ̍ŋ ya̍ I̍ cho̍ mu᷅ŋ nu̍m dīmūllo̍ wo̍ŋ o̍kɔ̄ɔ̄. Tē a̍ wa̍ yīya᷄ŋndo̍ a̍ mu̍ŋ o̍kɔ̄ɔ̄ pɛ̍, Māsānɔ̄ɔ̍ Mɛ̄lɛ̄ka̍ nɔ̄lā mbō tōsa̍ mā si̍na̍ mu̍ŋ pɛ̄ŋgu̍ kpo̍u̍.

⁸ Chi̍i̍sū Ki̍li̍tī ō Mɛ̄lɛ̄ka̍ sōli̍ o̍ pīɔ̍mndo̍ ni᷄ŋ mbo̍ mīŋgī ndu̍ yōōmū wo̍, Chi̍i̍su̍ fu̍la̍ ho̍ō o̍ pūlāle̍ māsāa̍ De̍e̍ve̍le̍ŋ chōo̍ wo̍, mɛ̄ɛ̍ Yōōŋgū Kɛ̄ndɛ̍ Mɛ̄lɛ̄ka̍ ya̍ I̍ di̍mūl wa᷅ŋnda̍ wo̍ ō dīmi̍ yɛ̍, wa̍ yi̍ya᷄ŋndo̍ a̍ ndu̍ o̍kɔ̄ɔ̄ te̍le̍ŋ o̍ te̍le̍ŋ.

⁹ Le̍ Yōōŋgū Kɛ̄ndɛ̍ Mɛ̄lɛ̄ka̍ ya̍ I̍ cho̍ ho̍ō wāŋnda̍ dīmūllo̍ wo̍, ya̍ cho̍ mɔ̍nɛ̍i̍ bīyɔ̄ɔ̍ ni̍. Le̍ ndu̍ ko̍ nda̍ dɔ̄ū ya̍ dɔ̄wɔ̄ɔ̍ ho̍ō o̍ yɔ̄lɔ᷄ŋ ni̍, mɛ̄ɛ̍ wānā tɛ̍ɛ̍mbūū sa᷅wa̍ lēlɛ̄ŋ. Kɛ̍ ndu̍yɛ̍, I̍ cho̍ bɛ̍ɛ̍ o̍ yɔ̄lɔ᷄ŋ ni̍, kɛ̍ dīo̍m Mɛ̄lɛ̄ka̍a̍ ndu̍ ndu̍ cho̍ o̍ hāū ni᷄ŋ te̍.

¹⁰ Le̍la̍ŋ, nyɛ̄ o̍ nyɛ̍ cho̍ yɔ̄nɔ᷄ŋndo̍ nāa̍ ya̍ chu̍a̍, I̍ cho̍ hīōūwɔ̄ɔ̍ lāchī a̍ mu̍ŋ bīūwɔ᷄ŋndo̍, kāni̍ fu̍u̍le̍, le̍ wānāā Mɛ̄lɛ̄ka̍ hɛ̄li̍ wa̍. I̍ hɛ̍na̍ŋ nda̍ bɛ̍ɛ̍ mā sɔ̄la̍ pīōŋɔ̄ɔ̍ wāŋndo̍ sɔ̄lā o̍ Chi̍i̍sū Ki̍li̍ti̍ tīīnda᷄ŋndo̍ ni᷄ŋ ndo̍, mā sɔ̄la̍ ndu̍ lātūlu̍ a̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍.

¹¹ Dīōmnda̍ di̍mi̍ŋ la᷅ŋ nda̍ŋ lā chō tōnya̍ āā, “Tē ō wa̍ pɛ̍ māā na̍a̍ Ki̍li̍tī wa̍a̍ ŋ̍ vi᷅ ni̍, mɛ̄ɛ̍ ŋ̄ chō vɛ̄lɛ̄ wā lātūlu̍ na̍a̍ nda̍ā.

¹² Tē ŋ̄ bi̍u̍ŋ nyɛ᷅ pālāa̍ pɛ̍, mɛ̄ɛ̍ ŋ̄ chō hūnɔ̄ɔ̄ wā māsāa̍ o̍ māsāle̍ ndɔ̄le̍ŋ ni᷄ŋ na̍a̍ na̍a̍ nda̍ā. Kɛ̍, tē ŋ̄ kɛ̄ɛ̍ ndu̍ pɛ̍, ndu̍ bɛ̍ɛ̍ kīɔ̍ɔ̍ o̍ kɛ̍ɛ̄ na̍a̍ ni̍.

¹³ Ā yɔ᷄ŋ bɛ̍ɛ̍ mī na̍a̍ na̍a̍ ŋ̄ fa̍ŋa̍ŋ o̍ mɛ̄ī nāa̍ chōo̍, ndu̍ ndu̍ lōo̍ o̍ lo᷅ o̍ mɛ̄ī ndɔ̄ɔ̍ chōo̍ ni̍. Kāni̍ fo̍ndōle̍, ndu̍ nɔ̍lā mbō tɛ̄ɛ̄mbu̍u̍ bu̍ŋgɛ̄ī o̍ chu̍a̍ le̍ tōsāa̍ ve̍ le̍.”

Wa̍ wa᷅na̍ wa̍li̍ kɛ̍ndɛ̄ le̍ Mɛ̄lɛ̄ka̍

¹⁴ Hi̍o̍u̍ la̍chi̍ a̍ wānāā nūmnda̍ yīyāla᷄ŋndo̍ a̍ sūɛ̍i̍ he̍ī o̍kɔ̄ɔ̄. Si̍la̍ nda̍ Mɛ̄lɛ̄ka̍ o̍ hɔ̄l māā ā wo̍ū lābā o̍ dīōmnda̍ŋ hīŋa᷅ŋndo̍ ni᷄ŋ o̍ sɔ̄ɔ̍ŋ chōo̍ le̍. Tɔ̄nɔ̄ bɛ̍ɛ̍ cho̍ o̍ dīōmnda̍ŋ hīŋa᷅ŋ kōŋ ni᷄ŋ te̍. Wānāa̍ ya᷅ŋ nda̍ŋ nīla̍ŋ nda̍, tɛ̄ɛ̄mbūūwo̍ ko̍ni̍ la̍ tɛ̍ɛ̍mbūū nda̍ ni̍.

¹⁵ Ki̍ndi̍ kpo᷅ke̍ mā to̍sa̍ wa̍li̍ nu̍mndo̍ ō kɛ̄ndɛ̄ kɛ̍ndɛ̄ le̍ mī Mɛ̄lɛ̄ka̍ chu̍a̍ nu̍m māā wāna̍ wa̍li̍ kɛ̍ndɛ̄. Ko̍ŋ cho̍ ni̍, wāna̍ wa̍llo̍ ō si̍ɔ̍mbu̍la̍ bi̍ī a̍ wa̍li̍ ndɔ̄ɔ̍ le̍ wo̍. Wa̍ wa᷅na̍ wa̍llo̍ o̍ to̍sā wa̍li̍ ndɔ̄ɔ̍ nyɛ̄ kɛ̄ndɛ̄ sa̍kpō o̍ dīōm tōnya̍a̍ hīvīo̍o̍ ni᷄ŋ wa᷅ŋnda̍ o̍ lānī wo̍.

¹⁶ Wo̍ū sōndō o̍ dīɔ̄mndo̍ŋ ni᷄ŋ di̍ōmnda̍ŋ hīŋa᷅ŋndo̍ o̍ sɔ̄ɔ̍ŋ fo̍ndo᷄ŋ chōo̍ le̍. Dīōmndā lāŋ hīŋa᷅ŋndo̍ lā tōsā ma̍to̍sāā mī wāŋnda̍ chɔ̄ɔ̄lu̍ fāŋa᷄ŋ Mɛ̍lɛ̄ka̍ īkɛ̄i̍, mā kūɛ̄nu᷄ŋ la̍nda̍ŋ a̍ ndu̍.

¹⁷ Pɛ̄ɛ̄kūlā wāā le̍nde̍ la̍ŋ lā chō māchūāā mɛ̄ɛ̍ pāū ko̍lo̍ŋndo̍ ō wā nu̍a̍ā yɛ̍, kɔ̄la̍ŋ ko̍ o̍ ku̍ā a̍ dīōnɔ᷄ŋndo̍ ni̍, ō si̍ŋgū kpo̍so̍ŋ te̍. Hāīmāni̍yā ni̍ nda̍ Fāīli̍tɔ̄ɔ̄, wānāa̍ cho̍ wāŋnda̍ pɛ̄ɛ̄kūlā lāŋ nda̍ ā ti᷄ŋ a̍ cho̍ ka̍ŋ ni̍.

¹⁸ Pūa̍a̍ ŋi̍ɔ̍ɔ̍ŋnda̍ ha̍ā bīī ma̍ fāŋa᷄ŋ o̍ nɛ̄i̍ tōnya̍a̍ chōo̍ ma̍ wā tīīnda᷄ŋ wānāā pūm ā nɔ̄ o̍ Mɛ̄lɛ̄ka̍ ni᷄ŋ ndo̍ lāāsīa̍a̍ a̍ dīōmndā lāŋ. Nda̍ di̍mi̍ ni̍ māā nyɛ̍ di̍mi̍ŋ a̍ wāŋnda̍ mīīŋgōo̍ yōōmū o̍kɔ̄ɔ̄ wo̍ māā ō chūū ni᷅ŋ yɔ̄nɔ᷄ŋ.

¹⁹ Kɛ̍ ndu̍yɛ̍, chīyīī kālā ka̍lɛ̄ī Mɛ̄lɛ̄ka̍ kīla̍ le̍ tāŋgūl ndɔ̄ɔ̍ ve̍ ī chō wɔ̄ īsīsi̍ yi̍. Dīōmnda̍ cho̍ lā dūāūvāā o̍ chīīye̍ he̍ī la̍ŋ la̍ cho̍ la᷅ŋ ni̍ āā, “Māsānɔ̄ɔ̍ Mɛ̄lɛ̄ka̍ sīnā wa̍nāa̍ cho̍ wānāā ndūa̍a̍ wa̍.” Ō chō vɛ̄lɛ̄ ō dūāūvāā lēchōo̍ āā, “Wānā o̍ wāna̍ di̍mi̍ pɛ̍ māā wāna̍ Māsānɔ̄ɔ̍ Mɛ̄lɛ̄ka̍a̍ wo̍ ŋ̄ chō ni̍, mɛ̄ɛ̍ ma̍l ni̍ko̍ yɔ᷅ŋ wɔ̄ɔ̍ŋndo̍ tōsāa̍.”

²⁰ O̍ chīɛ̄ī bɛ̄ndōo̍ ni᷄ŋ nyɛ̄m lāāndo᷄ŋ ŋ̄ chō lēni᷄ŋ su̍u̍la̍ŋ yɛ̍ yɛ̍. Ŋ̄ pūm chō ŋ̄ tōōsīāā a̍ ko̍o̍līi̍yo̍ŋ, ŋ̄ pūm yɛ̍ a̍ ka̍ni̍ŋ hu̍mbo᷄ŋ, ŋ̄ pūm a̍ yɔ̄mndo̍, ŋ̄ pūm yɛ̍ a̍ pūūlōo̍. Nyɛ̄m lāāndūŋ mu᷅ŋ ŋ̄ pūm ŋ̄ chō le̍ dɛ̍nɛ̍la̍ bɛ᷅nda̍ŋ, ŋ̄ pūm yɛ̍ le̍ kpe̍ku̍la̍ yɔ̍ŋāāla̍ŋ.

²¹ Wānā o̍ wāna̍ di̍ndi̍ ndu̍ pi̍la̍ pɛ̍, mbō wōu̍ ba̍ o̍ sɔ̄ɔ̍ŋ ya̍ I̍ wa̍ mu᷅ŋ sīlāa̍ a̍ mu̍ŋ o̍kɔ̄ɔ̄ wo̍ŋ ni᷄ŋ te̍, ō nɔ̄lā mbō wa̍ māā nyɛ̄ īlāāndūi̍ bɛ̍nda̍ le̍ dɛ̍nɛ̍la̍ bɛ᷅nda̍ŋ nde̍. Wānā wa̍ā nu̍a̍ā ō chō wā ō yɔ̄ŋga᷄ŋ o̍ Mɛ̄lɛ̄ka̍ lo̍. Ō chō wā wāna̍ Māsānɔ̍ ndɔ̄ɔ̍ nɔ̄lā mbō sōli̍ŋ kpe̍ku̍, ndu̍yɛ̍, ō chō wā ō bɛ̄ɛ̄ndīa̍ŋ le̍ wa̍li̍ o̍ wa̍li̍ kɛ̍ndɛ̄ fe̍e̍ to̍sāa̍.

²² Le̍la̍ŋ, kpɛ̍kpɛ̍la̍ ye̍e̍ma̍ŋ chūā pīāāndūya̍ŋ. La̍ndu̍ŋ kɔ̍l le̍ wāa̍ sa̍kpo̍ Mɛ̄lɛ̄ka̍ o̍ hɔ̄l, a̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ, a̍ kāālāa̍ nɔ̄ɔ̍, a̍ wāa̍ a̍ kɔ̄l nyūlū a̍ wāŋndā chīe̍e̍ya̍. La̍ndu̍ŋ kɔ̍l le̍ sɔ̄ɔ̍ŋ mu᷅ŋ kpo̍u̍ to̍sāa̍ nya̍ wānāa̍ cho̍ Māsānɔ̄ɔ̍ Mɛ̄lɛ̄ka̍ pīɛ̄īyo̍ a̍ kɔ̄l dīāndāa̍ wa̍ la̍tu̍lu̍.

²³ Kɛ̍ ndu̍yɛ̍, wo̍ū sōndō o̍ dīɔ̄mūŋ fo̍ndōŋ mu᷅ŋ ni᷄ŋ te̍. Ndu̍ yɔ̍nūŋ ni̍ māā dīōmnda̍ŋ hīŋa᷅ŋ kōŋ. Nūm pi̍la̍ si̍nā māā sɛ̄ɛ̄ŋgi̍āŋnda̍ŋ ko̍ni̍ sɔ̄ɔ̍ŋ mu̍ŋ ŋ̄ māl wa᷅ŋnda̍ tɛ̄ɛ̄ŋ ni̍.

²⁴ Wāna̍ cho̍ ho̍ō mbo̍ wā bu̍ɛ̍i̍ Māsānɔ̄ɔ̍ Mɛ̄lɛ̄ka̍a̍ wo̍, ō nɔ̍ mbō wa̍ wāna̍ lāsɛ̄ɛ̄ŋgi̍āŋ te̍. Ō nɔ̄ mānūāā mbō wa̍ wāna̍ īkɛ̄ndɛ̄ nāa̍ wānā o̍ wānā chu̍a̍. Ō nɔ̄ mbō wa̍ wāna̍ cha̍ā wa᷅ŋnda̍ pɛ̄ɛ̄kōo̍ wo̍. Ndu̍yɛ̍, ō nɔ̄ mbō wa̍ wānā bi̍u̍wa᷄ŋ.

²⁵ Wānā wa̍ā le̍nde̍ tē ō wa̍ wānāa̍ si̍mu̍l ndu̍ wa̍ mīŋgīo̍o̍ o̍ nɛ̄ī pɛ̍, ō nɔ̄ mbō tōsa̍ ndi̍ o̍ nɛ̄i̍ lēbɛ̄ɛ̄ ni᷄ŋ. Kāni̍ fo̍ndōle̍, mī ī yɔ̄nu̍ŋ dɔ̍ɔ̍ mī Mɛ̄lɛ̄ka̍ ke̍ wānāā wāā le̍ndi̍a̍a̍ fo̍ndāa̍ le̍ mā ma᷄l yɔ̄ŋndā ndāla̍ wɔ̍ɔ̍ŋnda̍ŋ, ndu̍yɛ̍, mā sīna̍ tōnya̍a̍.

²⁶ Tē he̍ī yɔ̄nu̍ŋ yɛ̍ pɛ̍, mɛ̄ɛ̍ yāŋɔ̄ɔ̄lē Māsa̍ Nyi̍nāā Wɔ̄ɔ̍ŋnda̍ ō bīī nda̍ lēni᷄ŋ, ndu̍yɛ̍, mbo̍ wā nda̍ kīndīlāa̍ mā tōsā nyɛ᷅ o̍ hɛ̍na̍ŋ ndo̍ le̍ŋ, ā sɔ̄la̍ tāāsi̍o̍o̍ ā hɛ̄lu᷄ŋ o̍ le̍ŋ ni̍ŋ.