Tɛ̄sālo̍nīāŋ Di̍i̍ŋ Ndɔ̄ɔ̍ 3 - Yāu̍ Mɛ̄lɛ̄ka̍a̍

¹ Nyɛ̄ ya̍ hɛ̍na̍ŋ le̍ nya̍ mɛ̄ɛ̄lū dīmūllo̍ wo̍ ndu̍ cho̍ ho̍ō ni̍. Lā pīɛ̍i̍ Mɛ̍lɛ̄ka̍ le̍ na̍a̍ māā yōōŋgu̍ chɛ̍ŋ ho̍ō o̍ Māsānɔ̄ɔ̍ Mɛ̄lɛ̄ka̍ lo̍ wo̍ ō kēle̍ŋa̍ ti̍ū bā o̍ bā fe̍e̍. Ndu̍yɛ̍, mī wāŋnda̍ ā ke̍ yōōŋgū kālāa̍ bɛ̄ɛ̄le̍ŋ mɛ̄ɛ̍ i̍ yɔ̄nu᷄ŋ nu̍a̍ā nya̍ tɛ̄ɛ̄ŋ yɛ̍.

² Ndu̍yɛ̍, lā pīɛ̍i̍ vɛ̍lɛ̄ le̍ na̍a̍ māā mī Mɛ̄lɛ̄ka̍ tōsa̍ a̍ sa̍bū wānāā kɔ̄l vēsɛ̍i̍ya̍a̍ wɔ̍ɔ̍ŋnda̍ ha̍ā ā ti̍ū ba̍ mā yɔ᷄ŋ na̍a̍ nyɛ̄ le̍. Kāni̍ fo̍ndōle̍, ō cho̍ wa᷅ŋnda̍ fa̍ū le̍ a̍ dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ te̍.

³ Kɛ̍ ndu̍yɛ̍, Māsānɔ̄ɔ̍ Mɛ̄lɛ̄ka̍ chō wāna̍ wānā dɔ̍ū tīīnda᷄ŋ o̍ ndu̍ ni̍ŋ. Ō tōsā mī lā wa̍ a̍ kɔ̄ltā sīmūlāā. Ndu̍yɛ̍, ō nɔ̄lā mbō mānda̍ nya̍, ō nda̍ vēēlū āā, Wānā Wɔ̍ɔ̍ŋndo̍ wo̍ ō yɔ᷅ŋ nya̍ nyɛ̄ le̍.

⁴ Ndu̍yɛ̍, Māsānɔ̄ɔ̍ Mɛ̍lɛ̄ka̍ ō tōsa̍ mi̍ ŋ̄ nɔ̄ lāāla᷄ŋndo̍ a̍ nya̍. Ŋ̄ sīnā kpe̍e̍kpe̍i̍ māā sɔ̄ɔ̍ŋ na̍a̍ ŋ̄ dīmu̍l nya̍ le̍ tōsāa̍ wo̍ŋ māā mu̍ŋ nya̍ chō tōsāa̍ ni̍. Ndu̍yɛ̍, ŋ̄ lāāla̍ŋ kpe̍e̍kpe̍i̍ māā lā chō hīōūwɔ̄ɔ̄ lāchī a̍ tōsāa̍ le̍nde̍.

⁵ Mbɔ̄ Māsānɔ̄ɔ̍ Mɛ̄lɛ̄ka̍ ō tōsa̍ a̍ sa̍bū mī lā chɔ̄ɔ̄lu̍ sīnā pɛ̄ŋgo̍o̍ sɔ̄lā a̍ kāālā o̍ ka̍a̍la̍ nya̍ wo̍ o̍kɔ̄ɔ̄, o̍ ko̍ŋ kɔ̍ɔ̍lī, a̍ kɔ̄l bīūva᷄ŋ Ki̍li̍tī ke᷅ nya̍ wo̍ fɔ̍.

Wānā o̍ wānā ā nɔ̄ mā to̍sa̍ wa̍llo̍

⁶ Chāāŋāā nāa̍, Māsānɔ̄ɔ̍ Chi̍i̍sū Ki̍li̍tī o̍ kpāāya̍ ndɔ̄ɔ̍ ni᷄ŋ na̍a̍ ŋ̄ chō nya̍ sūɛ̍i̍ he̍ī dīmūllo̍ ni̍, māā wānā o̍ wāna̍ cho̍ wānā la̍a̍la᷄ŋ mbō wa̍ wāna̍ sīɛ̄lɛ̍i̍yo̍ pɛ̍, ndu̍yɛ̍ mbō kɛ̄ɛ̍ le̍ nyɛ̄ na̍a̍ ŋ̄ pɛ̄ɛ̄ku̍ nya̍ wo̍ tōsāa̍ pɛ̍, lā chi̍ɛ̍ɛ̄li̍āŋ a̍ ndu̍ le̍.

⁷ Nya̍ pi̍la̍ lā sīnā cha̍la̍ŋ māā lā nɔ̄ mī lā chu̍a̍ ka̍ālā nāāla̍ŋ. Kāni̍ fo̍ndōle̍, bōōndi̍i̍ na̍a̍ ŋ̄ wa̍ nya̍ tɛ̄ɛ̄ŋ nde̍, ŋ̄ ve̍ wa̍nāā sīɛ̄lɛ̍i̍ le̍.

⁸ Nyɛ̄ o̍ nyɛ̄ dīāā wāŋnda̍ wa̍ na̍a̍ kīo̍o̍, pāāvāa̍ na̍a̍ ŋ̍ pa̍a̍wā le̍ ndu̍ ni̍. O̍ he̍ī ni᷄ŋ, le̍ pāa̍le̍ŋ a̍ nyūmnda̍ŋ ŋ̄ wa̍ fāfa̍la̍a̍, mi̍ ŋ̄ wā wa̍llo̍ ō kālā ka̍lā. Kāni̍ fu̍u̍le̍, na̍a̍ ŋ̍ hɛ̍na̍ŋ nya̍ ki̍nɛ̍i̍ mī wānā pi᷅lɛ̍ lūɛ̄ī bɔ̄nɔ̄ le̍ na̍a̍ le̍.

⁹ Na̍a̍ ŋ̍ nɔ̍ di̍ kpe̍e̍kpe̍i̍ le̍ mī na̍a̍ ŋ̍ nyu̍na̍ nya̍ le̍ nyɛ̄ nāā di̍a̍a̍, na̍a̍ ŋ̍ pa̍a̍wā le̍ ndu̍ le̍. Kɛ̍ ndu̍yɛ̍, sa̍bū na̍a̍ ŋ̄ nyūna̍ nya̍ le̍ wo̍, kɛ̍ mi̍ ŋ̄ wā wa̍llo̍ le̍nde̍ o̍ ka̍lā ka̍lā wo̍ cho̍ ni̍, māā mī nyɛ̄ na̍a̍ ŋ̄ wa̍ tōsāa̍ wo̍ ndu̍ o̍o̍ wa̍ māā tāāmāsi̍ le̍ nya̍.

¹⁰ Bōōndi̍i̍ na̍a̍ ŋ̄ wa̍ ke̍ŋ la̍tu̍lu̍ na̍a̍ nya̍ā ve̍, mi̍ ŋ̄ dīmūl nya̍ māā wānā o̍ wāna̍ kɛ̍ɛ̍ le̍ wa̍llo̍ pɛ̍, lā ke᷅ ndu̍ nyɛ̄ dīāā le̍.

¹¹ Le̍ sa̍bū na̍a̍ ŋ̄ chō sɔ̄ɔ̍ŋ mu᷅ŋ dīmīo̍o̍ wo̍ cho̍ ni̍ māā ŋ̄ chō tūēīyɔ̄ɔ̍ māā wānāā pūm ā chō nya̍ tɛ̄ɛ̄ŋ ma̍ nɔ̄ sīɛ̄lɛ̍i̍ to̍sāā nyɔ̄ɔ̍. Nyɛ̄ o̍ nyɛ̄ ā to̍sā le̍, mɛ̄ɛ̍ kēī sōndōla̍ŋ wōūwo̍ o̍ sɔ̄ɔ̍ŋ pi̍la̍ŋ ni᷄ŋ.

¹² Nya̍ wānāā wāā nu̍a̍ā ŋ̄ chō nya̍ dīmūllo̍, ndu̍yɛ̍, mi̍ ŋ̄ wā nya̍ sīlāa̍ o̍ kpāāya̍ Māsānɔ̄ɔ̍ Chi̍i̍sū Ki̍li̍tīo̍o̍ ni᷄ŋ, māā lā wa̍ wa̍nāā mānda᷄ŋ a̍ ka̍ālā nyāla̍ŋ o̍kɔ̄ɔ̄, ndu̍yɛ̍, mī nya̍ pi̍la̍ tōsa̍ wa̍llo̍ le̍ nyɛ̄ nyā di̍a̍a̍.

¹³ Kɛ̍ ndu̍yɛ̍, chāāŋāā nāa̍, mī ŋ̄ dīmu̍l nya̍, lā sa̍ŋgā a̍ sɔ̄ɔ̍ŋ kɛ̍ndɔ᷄ŋ tōsāa̍ le̍.

¹⁴ Kɛ̍ mī wānā wa̍ dɔ̍ɔ̍ na̍a̍ tɛ̄ɛ̄ŋ mbō kɛ̄ɛ̍ le̍ nyɛ̄ na̍a̍ ŋ̄ dīmu̍l nya̍ o̍ yāu̍wo̍ ho̍ō ni᷄ŋ ndo̍ tōsā. Tē wānā wa̍ā le̍nde̍ wa̍ nya̍ tɛ̄ɛ̄ŋ pɛ̍, lā fūla̍ ndu̍ mākɔ̄ɔ̄. Ndu̍yɛ̍, lā nɔ᷅ kpe̍ku̍ o̍ kpe̍ku̍ a̍ ndu̍ le̍, le̍ mī si̍ɔ̍mbu̍la̍ŋ lā bīī ndu̍.

¹⁵ Kɛ̍ ndu̍yɛ̍, lā chu̍ā ndu̍ māā ya̍a̍mɔ̍ɔ̍ nya̍ le̍. Lā nɔ̄ mānūāā mī lā sīla̍ wānā wa̍ā le̍nde̍ mɛ̄ɛ̍ wānā si̍lā cha̍a̍ŋ nūm wa̍nā la̍a̍la᷄ŋndo̍ yɛ̍.

Dīōmndā mɛ̄ɛ̄lāāla̍ŋ

¹⁶ Mbɔ̄ Māsānɔ̄ɔ̍ Mɛ̄lɛ̄ka̍ pi̍la̍ o̍ ke᷅ wa᷅ŋnda̍ kɔ̄l nyūlōo̍ wo̍, ō ke̍ nya̍ kɔ̄l nyūlōo̍ te̍le̍ŋ o̍ te̍le̍ŋ o̍ nɛ̄ī o̍ nɛ̄ī ni̍ŋ fɔ̍. Nya̍ kpo̍u̍ Māsānɔ̄ɔ̍ Mɛ̄lɛ̄ka̍ wa̍ la̍tu̍lu̍ a̍ nya̍ fɔ̍.

¹⁷ Ya̍ Pɔ̍ɔ̄l pi̍la̍ cho̍ ni᷅ŋ yīlɔ̄ɔ̍ ho̍ō pōōnyīa̍a̍ ni̍. I̍ yi̍l nya̍ lāpi̍. Nu̍a̍ā ya̍ po̍o̍nyīāā di̍o̍lā nīla̍ŋ o̍ yāu̍la̍ nīla̍ŋ mɛ̄ɛ̄lu̍la̍ŋ kpo̍u̍ ni̍. Nu̍a̍ā ya̍ I̍ po̍o̍nyīāā ni̍.

¹⁸ Mbɔ̄ Māsānɔ̍ nāa̍ Chi̍i̍sū Ki̍li̍tī ō yīya̍ŋ nya̍ chōo̍ fɔ̍.