Tɛ̄sālo̍nīāŋ Di̍i̍ŋ Ndɔ̄ɔ̍ 2 - Yāu̍ Mɛ̄lɛ̄ka̍a̍

¹ I̍ di̍mūl lɔ̍ nya̍ a̍ Māsānɔ̍ nāa̍ Chi̍i̍sū Ki̍li̍tī, hūnɔ̄ɔ̄ ndɔ̄ɔ̍ o̍kɔ̄ɔ̄. Ndu̍yɛ̍, I̍ cho̍ vɛ̄lɛ̄ nya̍ chɔ̄m a̍ mɛ̄ɛ̍ o̍ chu̍u̍ŋgīāā ni̍ŋ na̍a̍ kpo̍u̍ ndu̍ pi̍la̍ īkɛ̄i̍ yɛ̍.

² Wānāā pūm ā chō dīmīo̍o̍ māā pāa̍le̍ Māsānɔ̄ɔ̍ nɔ̄ le̍ hūnɔ̄ɔ̍ le̍ŋ lē chūū ni᷅ŋ hīōūwɔ̄ɔ̄. Kɛ̍ ndu̍yɛ̍, I̍ cho̍ nya̍ nyɔ̄ɔ̄lōo̍, lā yāndi̍i̍ chāāŋāā nīa̍a̍, lā chɛ᷅l mī wānāā wāā le̍nde̍ a̍ to̍sa̍ mī kɔ̄ltā nyāla̍ŋ lā lāāsi̍a̍ŋ kɛ̄lɛ̄ŋgāā mī lā būūla̍ŋ a̍ sūɛ̍i̍ he̍ī o̍kɔ̄ɔ̄ le̍. Kɛ̄lɛ̄ŋgāā dɔ̍ɔ̍ wānāā pu᷄m a̍ wa̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ dīmīo̍o̍ ni̍ ma̍ dīmūl nya̍ māā pāa̍le̍ le̍ŋ lē hīōū ni᷅ŋ. Kɛ̄lɛ̄ŋgāā dɔ̍ɔ̍ mbō wa̍ wānāā pu᷄m a̍ wa̍ wāŋnda̍ sūɛ̍i̍ Mɛ̄lɛ̄kɛ̍i̍ dīmūllo̍ ni̍ ma̍ dīmī le̍nde̍. Ɔ̄ɔ̄ mī wānāā pūm ā dīmi̍ dɔ̍ɔ̍ māā le̍nde̍ na̍a̍ ŋ̄ pōōnyi̍a̍a̍ o̍ yāu̍la̍ na̍a̍ ŋ̄ yɔ᷄ŋ nda̍ŋ ni᷄ŋ ni̍.

³ Kɛ̍ ndu̍yɛ̍, lā chɛ᷅l mī wānā o̍ wānā hu̍i̍ nya̍ o̍ sūɛ̍i̍ he̍ī ni᷄ŋ o̍ nɛ̄ī o̍ nɛ̄ī ni᷄ŋ te̍. Kāni̍ fu̍u̍le̍, lā nɔ̄ mī lā sīna̍ pɛ̄ŋgu̍ māā lɔ̍ɔ̍ pa̍ mī pāa̍le̍ le̍ŋ lē fūūlu̍u̍, sɔ̄ɔ̍ŋ pūm chō mɛ̄ɛ̍ mī ŋ̄ yɔ̄nu̍ŋ. Mɛ̄ɛ̍ mī bōōndi̍i̍ fu̍u̍lu̍u̍, mī wāŋnda̍ sīmu̍l Mɛ̄lɛ̄ka̍. Ndu̍yɛ̍, wāna̍ cho̍ ho̍ō mbo̍ kɛ̄ɛ̄ nyɛ̄ o̍ nyɛ̄ fe̍e̍ Mɛ̄lɛ̄ka̍ ō dīmi̍ wo̍ wo̍, mɛ̄ɛ̍ mbō hīŋ. Ndu̍ Mɛ̄lɛ̄ka̍ tɛ̄ɛ̄mbūū ni̍ŋ mbō chīi̍ a̍ ndu̍ ni̍.

⁴ Ndu̍yɛ̍, wāna̍ kɛ̍ɛ̄ ni̍ŋ ko̍ŋ nyɛ᷅ Mɛ̄lɛ̄ka̍ dīmī wo̍ wo̍ ō sīmūl ni̍ŋ nyɛ᷅ o̍ nyɛ̄ wāŋnda̍ chu̍a̍ māā mɛ̄lɛ̄ka̍ ndā, kɛ̄lɛ̄ŋgāā ma̍ wā mu̍ŋ sōōlūū wo̍. O̍ ko̍ŋ, mbō chu̍a̍ ndu̍ pi̍la̍ māā ndu̍ hi̍o̍ū a̍ mu̍ŋ kpo̍u̍. Ō fūla̍ o̍ ko̍ŋ kɔ̍ɔ̍lī, mbō lūɛ̄ī bɛ̍ɛ̍ o̍ chīɛ̍i̍ Mɛ̄lɛ̄ka̍a̍ ni᷄ŋ mbō cha᷄l, mbō dīmi̍ māā ndu̍ cho̍ Mɛ̄lɛ̄ka̍ ni̍.

⁵ I̍ di̍mu̍l nya̍ ni᷅ŋ sɔ̄ɔ̍ŋ mu᷅ŋ fa̍ū bōōndi̍i̍ ya̍ I̍ wa̍ nya̍ tɛ̄ɛ̄ŋ nde̍. Bāā lā pu̍ɛ̍ɛ̍ŋ?

⁶ Nya̍ pi̍la̍ lā sīnā nyɛ̍ cho̍ wāŋndo̍ ho̍ō kūūnā hūnɔ̄ɔ̍ pɛ̄ŋgo̍o̍ ho̍ō wo̍. He̍ī yɔ̄nu̍ŋ le̍ mbō lo̍ o̍ ko̍ŋ mī bōōndi̍i̍ o̍ nɔ̍ le̍ hūnɔ̄ɔ̍ ve̍ ī fūūlu̍u̍ fɛ̍ɛ̍ŋ.

⁷ Dīōm kɛ̄yāa̍ ho̍ō le̍ nyɛ̄ Mɛ̄lɛ̄ka̍ dīmi̍ wo̍ tōsāa̍, ō chō ni᷅ŋ bɛ̍ɛ̍ yɔ̍nɔ᷄ŋndo̍, kɛ̍ ī fūla̍ wɔ̍ kpe̍nde̍ke̍le̍ le̍. Kɛ̍ ndu̍yɛ̍, wāna̍ cha̍l sūɛ̍i̍ he̍ī lāchī wo̍ chō hīōūwɔ̄ɔ̄ lāchī a̍ cha᷄lle̍ ndi̍ lāchī ha̍a̍a̍ mbō lo̍ o̍ ko̍ŋ mī Mɛ̄lɛ̄ka̍ fāŋa̍ ndu̍ lāchī.

⁸ Tē Mɛ̄lɛ̄ka̍ fāŋa̍ ndu̍ lāchī pɛ̍, o̍ ko̍ŋ, wāna̍ cho̍ ho̍ō mbo̍ kɛ̄ɛ̄ nyɛ̄ o̍ nyɛ̄ fe̍e̍ Mɛ̄lɛ̄ka̍ dīmi̍ wo̍ wo̍, ō hīŋ. Kɛ̍ ndu̍yɛ̍, Māsānɔ̄ɔ̍ Chi̍i̍sū cho̍ ndu̍ dīyɔ̄ɔ̄ a̍ hūēīye̍ ndu̍ o̍ sōndō, ndu̍yɛ̍, mbō tɛ̄ɛ̄mbu̍u̍ ndu̍ a̍ yēlēŋgi̍ ye̍lēŋgi̍ cho̍ ndu̍ wā ō bālāā o̍ hūnɔ̄ɔ̄ ndɔ̄ɔ̍ wo̍.

⁹ Wāna̍ kɛ̍ɛ̍ ko̍ŋ nyɛ᷅ o̍ nyɛ̄ Mɛ̄lɛ̄ka̍ dīmi̍ wo̍ wo̍, tē ō hīŋ pɛ̍, Sēta̍nā o̍ cho̍ māsa̍ nyi̍nāā wɔ̄ɔ̍ŋnda̍ wo̍, a̍ kpāāya̍ ndɔ̄ɔ̍ o̍ hu᷅ŋ ni̍ŋ ni̍. Ndu̍yɛ̍ ō tōsā ni̍ŋ sɔ̍ɔ̍ŋ kɔ̄ndɔ̄fi̍li̍ŋ fāŋgā fa̍ŋgā, a̍ kpālōla̍ lāchōōwāla̍ŋ, a̍ ka̍a̍ma̍āla̍ŋ.

¹⁰ Ndu̍yɛ̍, ō tōsā ni̍ŋ sɔ̍ɔ̍ŋ wɔ̍ɔ̍ŋ fāŋgā fa̍ŋgā le̍ mbō hūi̍ wānāa̍ nɔ̍ ha̍ā le̍ kɔ̄la̍ŋ o̍ nyɛ̄ pālāa̍ ni᷄ŋ nda̍. Sa̍bū nda̍ kūā ni̍ŋ o̍ nyɛ̄ pālāa̍ ni᷄ŋ ndo̍ cho̍ ni̍ māā le̍ mɛ̄ɛ̍ nda̍ kāāla̍ yo̍o̍ŋgū tōnya̍a̍ ho̍ō le̍ yɛ̍. Kāni̍ fo̍ndōle̍, tē nda̍ a̍a̍ ka̍a̍la̍ yōōŋgōo̍ ho̍ō pɛ̍, nu̍a̍ā Mɛ̄lɛ̄ka̍ ndu̍ o̍o̍ pi̍ŋī nda̍.

¹¹ Kɛ̍ ndu̍yɛ̍, le̍ mɛ̄ɛ̍ nda̍ kāāla̍ yo̍o̍ŋgōo̍ ho̍ō le̍ yɛ̍, mi̍ Mɛ̄lɛ̄ka̍ lāāsīāā nda̍ hūlla̍ŋ la̍a̍sī la̍a̍sī, le̍ mā lāāla̍ŋ a̍ sɔ̄ɔ̍ŋ cho̍ to᷅nya̍ le̍ wo̍ŋ.

¹² O̍ he̍ī ni᷄ŋ, wānā o̍ wāna̍ cho̍ ma̍ kāālā yɔ̄ŋ wɔ̄ɔ̍ŋndo̍ tōsāa̍ yɔ̄ŋi̍ nda̍ a̍a̍ la̍a̍la̍ŋ a̍ yōōŋgū tōnya̍a̍ yɛ̍, wānāā kāŋ Mɛ̄lɛ̄ka̍ chō nda̍ yāmɛ̍i̍ kīlūl mbō tūsi̍ nda̍ nyɛ̄ pālāa̍ chōo̍.

Mɛ̄lɛ̄ka̍ hɛ̄li̍ nya̍ le̍ mbō pīŋi̍ nya̍

¹³ Chāāŋāā nāa̍, nya̍ Māsānɔ̄ɔ̍ Mɛ̄lɛ̄ka̍ kāāla̍ ha̍ā wa̍, le̍ te̍le̍ŋ o̍ te̍le̍ŋ ŋ̄ nɔ̄ mī ŋ̄ me᷄l Mɛ̄lɛ̄ka̍ ba̍li̍ka̍a̍ le̍ nya̍, le̍ mɛ̄ɛ̍ Mɛ̄lɛ̄ka̍ hɛ̄li̍ nya̍ o̍ kāndɔ᷄ŋndo̍ di̍ le̍ mbō pīŋi̍ nya̍ yɛ̍. Ō tōsa̍ he̍ī sa̍na̍a̍ a̍ nyi̍nā ndɔ̄ɔ̍, o̍ si̍i̍ŋgu̍u̍ nya̍ wānāa̍ cho̍ ā yɔ̄ŋga᷄ŋ o̍ Mɛ̄lɛ̄ka̍ lo̍ wa̍, ndu̍yɛ̍ o̍ ko̍ŋ kɔ̍ɔ̍lī, a̍ tīīnda᷄ŋ nya̍ nɔ̄ o̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ni᷄ŋ ndo̍.

¹⁴ Ndu̍yɛ̍, Mɛ̄lɛ̄ka̍ vēēlu̍ māvēēlāā nya̍ vēēlōo̍ ho̍ō sa̍na̍a̍ a̍ yōōŋgū ndɔ̄ kɛ̍ndɛ̄ na̍a̍ ŋ̄ dīmu̍l nya̍ wo̍, le̍ nya̍ bɛ̍ɛ̍ mī lā sɔ̄la̍ nāŋɔ̄ɔ̍ Ma̍sānɔ̄ nāa̍ Chi̍i̍sū Ki̍li̍tīo̍o̍.

¹⁵ Le̍la̍ŋ chāāŋāā nāa̍, lā si᷄m nyɛ̍ kɛ̄ndɛ̄ yi̍ o̍ lāāla᷄ŋ nyāa̍ chōo̍, ndu̍yɛ̍ mī lā bīī sɔ̄ɔ̍ŋ na̍a̍ ŋ̄ pɛ̄ɛ̄ku̍ nya̍ wo̍ŋ kpi̍ŋ, ŋ̄ na̍a̍ ŋ̄ pɛ̄ɛ̄ku̍ nya̍ a̍ sōndō wo̍ŋ ni̍, a̍ ŋ̄ na̍a̍ ŋ̄ pōōnyi̍a̍l nya̍ yāu̍wo̍ a̍ mu̍ŋ o̍kɔ̄ɔ̄ wo̍ŋ.

¹⁶ I̍ cho̍ Māsānɔ̍ nāa̍ Chi̍i̍sū Ki̍li̍tī pi̍la̍ pīɛ̄īle̍ŋ nda̍ Mɛ̄lɛ̄ka̍ Fi̍nyā nāa̍ o̍ ka̍a̍la̍ na̍a̍ wo̍ le̍ nya̍. Ndu̍ yɔ̍nūŋ ni̍ māā Mɛ̄lɛ̄ka̍ ō tōsa̍l na̍a̍ kɛ̄ndɛ̄i̍ ndūɛ̍i̍ mbo̍ kē na̍a̍ kɔ̄ltā sīmūlāāla̍ŋ le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍, mbo̍ tōsā mi̍ ŋ̄ wā hɔ̄lte̍ŋ o̍ nɛ̄ī nyɛ̄ kɛ̄ndɛ̄ kɛ̍ndɛ̍ī yo̍.

¹⁷ Mbɔ̄ ā dɛ̄ɛ̄ni̍a̍a̍ nya̍ kɔ̄lta̍ŋ fɔ̍. Ā sīmu̍l nya̍ kɔ̄lta̍ŋ pɛ̄ŋgu̍ o̍ pɛ̄ŋgu̍ le̍ wa̍lta̍ kɛ̍ndɛ̄la̍ŋ tōsāa̍ a̍ sɔ̄ɔ̍ŋ kɛ̍ndɔ᷄ŋ dīmīo̍o̍ fɔ̍.