Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 9 - Yāu̍ Mɛ̄lɛ̄ka̍a̍

Nyɛ̍ yɔ̍nu̍ŋ Dēēve̍ tɛ̄ɛ̄ŋ nda̍ Mɛ̄fībo̍sīɛ̄ɛ̄ wo̍

¹ Pāa̍le̍ pi᷅lɛ̍, mi̍ Dēēve̍ nyu̍nā āā, “Wānā lo̍ pa̍ yo̍o̍mū o̍ yu̍ŋgu̍ Sɔ̍ɔ̄ wo̍ chōo̍ mī mi̍ŋgu̍l ndu̍ kɛ̄ndɛ̄i̍ Chōna̍ta᷅ŋ to̍sa̍l la̍ ve̍?”

² Po̍ pi᷅lɛ̍ wa̍ sīndɛ̄ Sɔ̍ɔ̍ wa̍llo̍ o̍ bā dīōla̍ŋ āā Si̍bā. Ma̍ dīmūl Dēēve̍ a̍ ndu̍ o̍kɔ̄ɔ̄, mi̍ Dēēve̍ yo̍o̍ŋgū le̍ ndu̍ mbo̍ hūŋ. Mi̍ Māsāa̍ Dēēve̍ nyu̍nā ndu̍ āā, “Pōo̍ nu̍m cho̍ Si̍bā ni̍?” Mi̍ Si̍bā mu̍lī āā, “Ya̍ ni̍ māsānɔ̄ɔ̍.”

³ Mi̍ Māsāa̍ Dēēve̍ nyūnā ndu̍ āā, vɛ̄ɛ̄ “Wānā lo̍ pa̍ yo̍o̍mū o̍ yu̍ŋgu̍ Sɔ̍ɔ̄, fi̍nyāa̍ Chōna̍ta᷅ŋ ndo̍ chōo̍, mī mi̍ŋgu̍l ndu̍ kɛ̄ndɛ̄i̍ mɛ̄ɛ̍ ya̍ I̍ chu̍a̍ būŋgɛ̄i̍ Mɛ̄lɛ̄ka̍ o̍ hɔ̄l lɛ̍?” Mi̍ Si̍bā mu̍lī āā, “E̍ī fāllo̍. Chōna̍ta᷅ŋ po̍ ndɔ̄ pūa̍a̍ ndūa̍a̍ ō pīlɛ̍ chō yōōmū. Kɛ̍ nāmtāa̍ o̍ cho̍ ni̍.”

⁴ Mi̍ Māsāa̍ Dēēve̍ nyūnā ndu̍ āā, “Kūɛ̍ɛ̍nɛ̍ o̍ cho̍ yɛ̍?” Mi̍ Si̍bā mu̍lūl ndu̍ āā, “Ō chō Lo̍dɛ̍bāā chi̍e̍e̍, o̍ lāŋu̍nɔ̄ pīlɛ̍ lo̍ chi̍ɛ̍ī ni̍ŋ dīōla̍ŋ āā Māka̍yā, po̍ A̍mīɛ̄l wo̍.”

⁵ Mi̍ Dēēve̍ yo̍o̍ŋgū le̍ po̍ Chōna̍ta᷅ŋ ndo̍ ho̍ō.

⁶ Mɛ̄ɛ̍ po̍ Chōna̍ta᷅ŋ ndo̍ ō fūūlu̍u̍ nāa̍ Dēēve̍ chu̍a̍, mbo̍ tūndu᷄ŋ Dēēve̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mi̍ Dēēve̍ nyūnā ndu̍ āā, “Nu̍m cho̍ Mɛ̄fībo̍sīɛ̄ɛ̄ ni̍?” Mbo̍ chɛ̄l āā, “Ya̍ ni̍ fāllo̍.”

⁷ Mi̍ Dēēve̍ di̍mūl ndu̍ āā, “Yɔ᷅ŋ īsīōōŋ a̍ ya̍ le̍. Chōna̍ta᷅ŋ fi̍nyā nūm chāa̍ŋ nūu̍ o̍ wa̍ ni̍. Kɛ̄ndɛ̄i̍ o̍ to̍sa̍l la̍ ve̍, I̍ cho̍ nu̍m kɛ̄ndɛ̄ī ke̍ŋ mīŋgūl le̍ sa̍bū ndɔ̄ɔ̍. Yōndō o̍ yōndō Sɔ̍ɔ̄ fi̍nyā nūm ma̍mā ndu̍ o̍o̍ nɔ̍, I̍ cho̍ tōsā mbō wa̍ mīāl nūm. Ndu̍yɛ̍ wa̍ hu̍nɔ̄ɔ̍ o̍ ya̍ lo̍ chi̍ɛ̍ī ni̍ŋ mī ŋ̄ dīā nyɛ̍ dīa̍a̍ na̍a̍ nūm o̍ ti̍bīi̍ pi᷅lɔ̍ɔ̍ chōo̍.”

⁸ O̍ ko̍ŋ, mi̍ Mɛ̄fībo̍sīɛ̄ɛ̄ o̍ tu̍ndu᷄ŋ vɛ̍lɛ̄ Dēēve̍ o̍ lābɛ̄ŋgu̍ ni̍ŋ. Mbo̍ dīmūl ndu̍ āā, “Fāllo̍, vɛ᷅ ma̍ yīya᷄ŋ yi̍ya᷄ŋ kɛ̍ndɛ̄ wa̍ā nu̍a̍ā ya̍ chōo̍? Ya̍ cho̍ ho̍ō fo̍ndō fu̍u̍ māā tūŋ vīlɛ̍i̍yo̍, ya̍ ŋ̄ tōsāl kɛ̄ndɛ̄ī bɛ̍ndūīī wa̍ā nu̍a̍ā ni̍?”

⁹ O̍ ko̍ŋ kɔ̍ɔ̍lī, mi̍ Dēēve̍ vēēlū Si̍bā, bu̍ɛ̍i̍ wa̍ sīndɛ̄ Sɔ̍ɔ̄ o̍ bā wo̍, mbo̍ dīmūl ndu̍ āā, “Nyɛ̄ o̍ nyɛ̄ Sɔ̍ɔ̄ nda̍ yu̍ŋgu̍ ndɔ̄ɔ̍ nda̍ a̍a̍ nɔ̍, Mɛ̄fībo̍sīɛ̄ɛ̄ po̍ ndɔ̄ ma̍mā ndu̍ ya̍ I̍ ke̍ ni᷅ŋ mu̍ŋ nyɛ̄ ndɔ̄ ni̍.

¹⁰ Ndu̍yɛ̍ nūm Si̍bā, nūm ni̍ pūa̍a̍ nu̍m nda̍ ni̍, wānāa̍ cho̍ nu̍m wa̍llo̍ o̍ bā wa̍ ni̍, nya̍ nɔ̍ ni᷅ŋ ni̍ mī lā tōsa̍ wa̍llo̍ o̍ yōndōla̍ŋ la̍ŋ nda᷅ŋ ni᷄ŋ le̍ mī lā nūūwa̍ nyɛ̄ le̍ Mɛ̄fībo̍sīɛ̄ɛ̄, wānā nu̍m bānāa̍ po̍ ndɔ̄ ma̍māa̍. Kɛ̍ a̍ ko̍ŋ kpo̍u̍, Mɛ̄fībo̍sīɛ̄ɛ̄ o̍ cho̍ wā nyɛ̄ dīa̍a̍ dīo̍o̍ o̍ ya̍ lo̍ chi̍ɛ̍ī ni̍ŋ o̍ ti̍bīi̍ nūu̍ chōo̍.” Ndu̍yɛ̍ Si̍bā ndu̍ o̍o̍ nɔ̍ pūa̍a̍ tɔ̍ a̍ ā ŋūɛ̍ɛ̍nu̍ a̍ bu̍ɛ̍i̍yāā wa̍lla̍ bi̍dīi̍ŋ.

¹¹ Mi̍ Si̍bā lō o̍ ko̍ŋ mbo̍ dīmūl Māsāa̍ Dēēve̍ āā, “Bu̍ɛ̍ī nūm ndo̍ ya̍ I̍ cho̍ ni̍ māsānɔ̄ɔ̍. Nyɛ̄ o̍ nyɛ̄ ŋ̄ dīmu̍l la̍ I̍ cho̍ tōsā.” Mɛ̄ɛ̍ o̍ Dēēve̍ lo̍ chi̍ɛ̍ī ni̍ŋ Mɛ̄fībo̍sīɛ̄ɛ̄ ndu̍ o̍o̍ di̍ā ni᷅ŋ nyɛ̄ dīa̍a̍ o̍ ti̍bīi̍ pi᷅lɔ̍ɔ̍ chōo̍ nda̍ Dēēve̍ ni̍. O̍ wa̍ ni᷅ŋ māwāā o̍ Dēēve̍ lo̍ chi̍ɛ̍ī ni̍ŋ māā po̍ ndɔ̄.

¹² Mɛ̄fībo̍sīɛ̄ɛ̄ ndu̍ o̍o̍ nɔ̍ pōo̍ dīōla̍ŋ āā Mi̍kāā, ō wa̍ wɔ̄ fe̍le̍ŋgu̍nɔ̍. Ndu̍yɛ̍ chɔ̍ŋ ni᷅ŋ a̍ te̍le̍ŋ ko̍ŋ wānā o̍ wāna̍ wa̍ o̍ Si̍bā lo̍ chi̍ɛ̍ī ni̍ŋ, nda̍ kpo̍u̍ ma̍ sīmnu᷄ŋ wa̍nāā wa̍li̍a̍a̍ Mɛ̄fībo̍sīɛ̄ɛ̄ wa̍.

¹³ Mi̍ Mɛ̄fībo̍sīɛ̄ɛ̄ o̍ hu᷅ŋ ni̍ko̍ Chūlu̍sɛ̄lɛ̄m mbo̍ hu᷄ŋ cha᷅l o̍ chīɛ̄ī lēmāsāa̍ ni᷄ŋ mā dīā nyɛ̍ dīa̍a̍ nda̍ māsāa̍ Dēēve̍ o̍ ti̍bīi̍ pi᷅lɔ̍ɔ̍ chōo̍.