Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 8 - Yāu̍ Mɛ̄lɛ̄ka̍a̍

Lɛ̄ŋīī Dēēve̍ yēm nde̍

¹ Mɛ̄ɛ̍ te̍le̍ŋ ti̍ŋ hīo̍u̍, mi̍ Dēēve̍ kɔ̍ de᷅l Fīli̍i̍tīāŋnda̍ chōo̍ a̍ sɔ̍ŋgɔ̄ɔ̍, ndu̍yɛ̍ mbo̍ yām nda̍. Mbo̍ bīī chi̍e̍e̍ ndā bɛ̍ndōo̍, ndu̍ yɔ̍nūŋ māā Mɛ̄tɛ̄kī A̍māā ni̍.

² O̍ ko̍ŋ kɔ̍ɔ̍lī, mi̍ Dēēve̍ kɔ̍ chi᷅ŋa̍la᷅ŋ vɛ̍lɛ̄ wāŋnda̍ Mo̍wa̍bī, nda̍ bɛ̍ɛ̍ mbo̍ yām nda̍. Pūa̍a̍ ndāa̍ o̍ bīī ya̍ ki̍nɛ̍i̍, mbo̍ yɛ̄ɛ̄mbūū nda̍ lɛ̄ŋ, tē ō chɔ̍m pɛ̍ a̍ ya̍a̍, ō dīī ā ŋīɔ̍ɔ̍ŋ, ō mɛ̄i̍ ō pīlɛ̍. Mi̍ wāŋnda̍ Mo̍wa̍bī a̍ wa᷅ ni̍ko̍ Dēēve̍ o̍ bā bɛ̄ŋgu̍. Dēēve̍ o̍ bā nda̍ a̍a̍ ma᷅l ni᷅ŋ pāāwāla̍ŋ ni̍.

³ A̍ te̍le̍ŋ ko̍ŋ, Hādādɛ̍sɛ̄ɛ̄, po̍ Lu̍i̍ho̍bī wo̍ ndu̍, wa̍ māsā bɛ̍ndōo̍ So̍bāā chi̍e̍e̍ ni̍. Mbo̍ ku̍ā le̍ lɛ̄ŋnde̍ ho̍lnu̍ŋ pe̍ē bɛ̍ndōo̍ Yūfi̍lu̍a̍tīī le̍ŋ pōōndāa̍ I̍sɔ̄lūɛ̍i̍ya̍ o̍ bā, lɛ̄ŋnde̍ wa̍ ndu̍ pāāndū o̍ bā bɛ̄ŋgu̍ le̍ŋ. Kɛ̍ mi̍ Dēēve̍ ya᷅m ndu̍.

⁴ Mi̍ Dēēve̍ bīī so̍vɛ̄i̍ya̍a̍ ndūa̍a̍ ku̍ā o̍ su̍a̍a̍ chōo̍ wa̍ wāa̍ ō pīlɛ̍ a̍ kɛ̄mɔ̄ɔ̍ le̍ ŋɔ᷄mmɛ̍ū (1,700), o̍ ko̍ŋ kɔ̍ɔ̍lī, mbo̍ bīī so̍vɛ̄i̍ya̍a̍ sɔ̍ŋgā lɛ᷅ŋ nda̍ wāa̍la̍ŋ bi̍di̍i̍ŋ (20,000). Mi̍ Dēēve̍ hɛ̍lī su̍a̍ā ā ti᷄ŋ su̍a̍ā o̍ bi̍ī ya̍ tɛ̍ɛ̍ŋ, ā nda̍ a̍a̍ wa᷅ tu̍u̍le̍ŋ le̍ nyɛ̄lā su̍a̍a̍ ā nāŋ nda̍ŋ kɛ̄mɔ̄ɔ̍ lē pīlɛ̍ nānɔ̄ɔ̍ wa̍ mbō kɛ̄sī ka̍ŋ. Kɛ̍ ā tūa̍a̍ ni᷅ŋ kpo̍u̍ mbo̍ yīmī nda̍ pēlo̍ŋ.

⁵ Bōōndi̍i̍ Dēēve̍ nda̍ Hādādɛ̍sɛ̄ɛ̄ a̍ wa̍ sɔ̍ŋgɔ̄ɔ̍ ve̍, mi̍ wāŋnda̍ Si̍i̍līāā a̍ wa̍ Dāma̍si̍kɔ̄ɔ̄ chi̍e̍e̍ wa̍ ā yɔ̄ŋ so̍vɛ̄i̍ya̍a̍ ndāa̍ le̍ mā hu᷄ŋ ma̍lā Māsāa̍ Hādādɛ̍sɛ̄ɛ̄ sɔ̍ŋgɔ̍ɔ̍. Kɛ̍ nda̍ bɛ̍ɛ̍ mi̍ Dēēve̍ yām nda̍, mbo̍ dīī nda̍ wāa̍la̍ŋ bi̍di̍i̍ŋ a̍ lā tīɔ̍ɔ̍ŋ (22,000).

⁶ Mi̍ Dēēve̍ lō o̍ ko̍ŋ, mbo̍ tāŋgūl dɔ̍ɔ̍ŋgɔ̍lā chɔ̄ūla̍ŋ Dāma̍si̍kɔ̄ɔ̄ chi̍e̍e̍. Mi̍ wāŋnda̍ Si̍i̍līāā a̍ wa᷅ ni̍ko̍ Dēēve̍ o̍ bā bɛ̄ŋgu̍, mā māl ndu̍ ni᷅ŋ pāāwāa̍ o̍ bā. Ndu̍yɛ̍ bā o̍ bā Dēēve̍ ndu̍ o̍o̍ kɔ̍ a̍ sɔ̍ŋgɔ̄ɔ̍, kpāāyāa̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ke᷅ ndu̍ ni̍ mbō yēm.

⁷ Māsāa̍ Hādādɛ̍sɛ̄ɛ̄, wānāā ndūāā bɛ̍ndūa̍a̍ nyɛ̄lā nda̍ a̍a̍ sɔ̍ŋgā o̍ lābā māā bōo̍la̍ bɛ̍ndū le̍ nda̍ māndāa̍ la̍ŋ, a̍ ko̍o̍līi̍yo̍ŋ la̍ wa̍ lā tōōsīāā ni̍. Nyɛ̄lā lāŋ kpo̍u̍, mi̍ Dēēve̍ chu̍ā la̍ŋ mbo̍ kūānu᷄ŋ a̍ la̍ŋ Chūlu̍sɛ̄lɛ̄m.

⁸ Hādādɛ̍sɛ̄ɛ̄ chi̍e̍e̍ŋ ndɔ̄ɔ̍ŋ o̍ wa̍ māsāa̍ chōo̍ wo̍ŋ, ŋ̄ pīlɔ̍ŋ wa̍ Bɛ̍tāā a̍ Bɛ̍lɔ̍tāī ni̍. Nyɛ᷄m wa̍ o̍ chi̍e̍e̍ŋ mu̍ŋ ni̍ŋ mi̍ ŋ̄ wā ŋ̄ tōōsīāā a̍ Būlɔ̍ŋsīi̍yo̍ŋ ndo̍ŋ, mi̍ Dēēve̍ chūā mu̍ŋ ta̍u̍ ta̍u̍ mbo̍ kūānu᷄ŋ a̍ mu̍ŋ.

^9-10 Ndu̍yɛ̍ a̍ te̍le̍ŋ ko̍ŋ, Māsāa̍ To̍ī, o̍ wa̍ Ha̍ma̍tī wo̍, ya̍a̍mɔ̍ɔ̍ ndɔ̄ɔ̍ wa̍ Māsāa̍ Hādādɛ̍sɛ̄ɛ̄ ni̍, le̍ te̍le̍ŋ o̍ te̍le̍ŋ sɔ̍ŋgɔ̄ɔ̍ wa̍ nda̍ tɛ̄ɛ̄ŋ nda̍ ndu̍. Mɛ̄ɛ̍ Māsāa̍ To̍ī o̍ tu̍e̍ī māā Dēēve̍ yēm Hādādɛ̍sɛ̄ɛ̄, mbo̍ vīām Cho̍lūām po̍ ndɔ̍ le̍ mbō kɔ̍ yi᷅l Māsāa̍ Dēēve̍ mbō me̍l ndu̍ ba̍li̍ka̍ le̍ yōmɔ̄ɔ̄ o̍ ye᷅m Hādādɛ̍sɛ̄ɛ̄ wo̍. Mi̍ Māsāa̍ To̍ī o̍ chu̍ā nyɛ̄m ba̍ā kāla᷄ŋ ŋ̄ ti᷄ŋ, ŋ̍ wa̍ ŋ̄ tōōsi̍a̍a̍ a̍ ka̍ni̍ŋ hu̍mbo̍ŋ ndo̍ŋ, a̍ ŋ̍ wa̍ ŋ̄ tōōsīāā a̍ ko̍o̍līi̍yo̍ŋ ndo̍ŋ, a̍ ŋ̍ wa̍ ŋ̄ tōōsīāā a̍ būlɔ᷄ŋsīi̍ye̍ wo̍ŋ, mbo̍ kē Cho̍lūām po̍ ndɔ̄ le̍ mbō yōo̍ Dēēve̍.

^11-12 Mi̍ Māsāa̍ Dēēve̍ chūā nyɛ̄m mu᷅ŋ kpo̍u̍ mbo̍ yɔ̄ŋgū mu̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, le̍ kpe̍ku̍ Mɛ̄lɛ̄ka̍ sōlīo̍o̍, lātūlu̍ a̍ nyɛ̄m o̍ chu̍a̍ o̍ lɛ̄ŋīī o̍ ye᷅m nde̍ ni᷄ŋ ndo̍ŋ, ŋ̍ wa̍ ŋ̄ tōōsīāā a̍ ko̍o̍līi̍yo̍ŋ ndo̍ŋ a̍ ŋ̍ wa̍ ŋ̄ tōōsīāā a̍ ka̍ni̍ŋ hu̍mbo̍ŋ ndo̍ŋ. Ndu̍yɛ̍ lɛ̄ŋīī Dēēve̍ yēm ke̍ŋ nde̍ ndi̍ wa̍ he̍ī ni̍, I̍dɔ̄m, a̍ Mo̍wa̍bī, a̍ A̍mɔ᷅ŋ a̍ Fīli̍i̍tīāŋnda̍, a̍ A̍ma̍lɛ̍ka̍i̍tīi̍ya̍. O̍ ko̍ŋ kɔ̍ɔ̍lī, nyɛ̄ o̍ nyɛ̄ Dēēve̍ chūa̍ Māsāa̍ Hādādɛ̍sɛ̄ɛ̄ o̍ bā o̍ wa̍ māsāa̍ So̍bāā wo̍, ndu̍ yɔ̍nūŋ māā po̍ Lu̍i̍ho̍bī wo̍ ni̍, mu̍ŋ bɛ̍ɛ̍ mbo̍ yɔ̄ŋgū mu̍ŋ le̍ kpe̍ku̍ Mɛ̄lɛ̄ka̍a̍.

¹³ Bōōndi̍i̍ Dēēve̍ kɔ̍ sɔ̍ŋgā a̍ wāŋnda̍ I̍dɔ̄m nde̍, mbo̍ dīī nda̍ wāa̍la̍ŋ tɔ̍ a̍ lā ŋɔ̄ma̍a̍ (18,000), o̍ lɛ̄ŋndē dɛ̍ŋgbɛ̍le̍ īhɛ᷄lte̍ŋ ni᷄ŋ. Mɛ̄ɛ̍ o̍ kɔ̍ chi̍ī nda̍ yōmɔ̄ɔ̄ mbo̍ mīīŋgū Chūlu̍sɛ̄lɛ̄m, mbo̍ sīmnu᷄ŋ wa᷅na̍ tɔ̍ɔ̍ bɛ̍ndū.

¹⁴ Mi̍ Dēēve̍ ti̍ū dɔ̍ɔ̍ŋgɔ̄lā chɔ̄ūla̍ŋ tāŋgūllo̍ o̍ lɛ̄ŋndē I̍dɔ̄mnde̍ŋ ni᷄ŋ kpo̍u̍. Mi̍ wāŋnda̍ I̍dɔ̄m a̍ wa᷅ ni᷅ŋ Dēēve̍ o̍ bā bɛ̄ŋgu̍. Ndu̍yɛ̍ bā o̍ bā Dēēve̍ ndu̍ o̍o̍ kɔ̍ a̍ sɔ̍ŋgɔ̄ɔ̍, yōmɔ̄ɔ̍ ndu̍ o̍o̍ ya᷅m ni̍, fo̍ndōle̍ māsānɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ ndu̍ kɔ̄ɔ̄lī.

¹⁵ Lɛ̄ŋndē I̍sɔ̄lūɛ̍i̍le̍ŋ kpo̍u̍, mi̍ lē wā ni̍ko̍ Dēēve̍ o̍ bā bɛ̄ŋgu̍, ndu̍ wa̍ māsāa̍ lɛ̄ŋndē lēŋ chōo̍ kpo̍u̍ ni̍. Ndu̍yɛ̍ ō wa̍ sa̍kpō wānāā ndūa̍a̍ tɛ̄ɛ̄ŋ o̍ māsāle̍ ndɔ̄le̍ŋ ni᷄ŋ, ō ve̍ wa᷅na̍ to̍sa̍ lāka̍fā le̍.

¹⁶ Wāna̍ wa̍ pūa̍a̍ ndūa̍a̍ chɔ̄ūwa̍ kpo̍u̍ bɔ̍lle̍ŋ ndo̍ wa̍ Cho̍wa̍bī, po̍ Sɛ̄lu̍i̍yā wo̍ ni̍. Chɛ̄hōsi̍a̍fa̍tī, po̍ A̍hi̍lu̍dī wo̍, ndu̍ wa̍ chīla̍ŋ le̍ sɔ̄ɔ̍ŋ lēlɛ̄ŋndo̍ŋ ni̍.

¹⁷ Sa̍dɔ̍kī, po̍ A̍hi̍tu̍bī wo̍, nda̍ Āhīmɛ̍lɛ̍kī, po̍ Ābīa̍a̍tā wo̍, nda̍ wa̍ wānāa̍ sōlīāā lāsa̍lāa̍ ni̍. Sɛ̄lu̍i̍yā, ndu̍ wa̍ wānā po̍o̍nyīa̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ni̍.

¹⁸ Bɛ̄na̍yā po̍ Chɛ̄hōwa̍dā wo̍, ndu̍ wa̍ pūa̍a̍ wa̍ Dēēve̍ māndāa̍ wa̍ bōlle̍ŋ ni̍. Wānāā sōlīāā lāsa̍lāa̍ ā pīli̍a̍a̍ nda̍ wa̍ pūa̍a̍ Dēēvi̍a̍a̍ ni̍.