Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 7 - Yāu̍ Mɛ̄lɛ̄ka̍a̍

Yōōŋgū Mɛ̄lɛ̄ka̍ ke̍ Ne̍ta̍ŋ le̍ Dēēve̍ a̍ chīɛ̍i̍ Mɛ̄lɛ̄ka̍a̍ o̍kɔ̄ɔ̄ wo̍

¹ Mi̍ Māsā Bɛ̍ndōo̍ Dēēve̍ mi̍i̍ŋgu̍ ni̍ko̍ mbo̍ kɔ̍ cha᷅l o̍ chīɛ̄ī ndɔ̍ lēmāsāa̍ ni᷄ŋ. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ma̍ndā ndu̍ ya̍a̍mɔ̍ɔ̍wa̍a̍ ndūa̍a̍ tɛ̄ɛ̄ŋ, mbo̍ wā a̍ kɔ̄l nyūlū.

² Pāa̍le̍ pi᷅lɛ̍, mi̍ Māsāa̍ Dēēve̍ dīmūl wāna̍ su̍a̍ā le̍ Mɛ̄lɛ̄ka̍ wo̍ Ne̍ta̍ŋ āā, “I̍ Ye̍e̍ma̍ mī te̍ŋgu̍l Mɛ̄lɛ̄ka̍ chīɛ̄īyo̍. Ō bɛ̄nda̍ mī ya̍ I̍ wa̍ o̍ chīɛ̄ī yɔ̄mīī si̍dāā kɛ̄ndɛ̄ bɛ̄ndū wāā nu̍a̍ā ni᷄ŋ mī kɔ̍fū kpe̍ma̍ Mɛ̄lɛ̄ka̍a̍ ndu̍ wa̍ o̍ tɛ̍ndīi̍yo̍ ni᷄ŋ te̍.”

³ Mi̍ Ne̍ta̍ŋ di̍mūl ndu̍ āā, “Māsānɔ̄ɔ̍, nyɛ̄ o̍ nyɛ̄ ŋ̄ yīya̍ŋ pɛ̍ le̍ tōsāa̍ to̍sa̍. Mɛ̄lɛ̄ka̍ Ya̍a̍wɛ̄ɛ̄ cho̍ nu̍m kɔ̄ɔ̄lī.”

⁴ Kɛ̍ nyūmmā pīlɛ̍ māmāŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Ne̍ta̍ŋ chu̍a̍

⁵ mbo̍ dīmūl ndu̍ āā, “Chɔ̍ŋ mā kɔ̍ di̍mūl bu̍ɛ̍ī nūu̍ Dēēve̍ māā nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍, āā, ‘Ō cho̍ nu̍m te̍ nɔ̍ mā te̍ŋgu̍l la̍ chīɛ̄īyo̍ le̍ mī wa̍ lēni᷄ŋ te̍.

⁶ Chɔ̍ŋ a̍ bōōndi̍i̍ ya̍ I̍ so̍li̍ wāŋnda̍ I̍sɔ̄lūɛ̄ī o̍ chɛ̄le̍ŋ ni᷄ŋ I̍chi̍pī mi̍ hu᷅ŋ a̍ nda̍ na̍nu᷄ŋ nde̍ mbo̍ bīī a̍ pāa̍le̍ hāūle̍ŋ nde᷅ŋ, ō cho̍ chi̍ɛ̍ī ni̍ŋ te̍ ya̍ I̍ wa̍ le̍. Bālɔ̄ɔ̄ ya̍ I̍ wa̍ ho̍ō kpo̍u̍ a̍ nda̍ wo̍, tɛ̍ndīi̍yo̍ wa̍ nāa̍ nīāā cha̍lāa̍ ni̍.

⁷ Fo̍ndāŋndā ya̍ I̍ ba̍lu̍ a̍ I̍sɔ̄lūɛ̍i̍ya̍ la̍ŋ kpo̍u̍, chɔ̍ɔ̍chi̍a̍a̍ ya̍ I̍ wa̍ hɛ̄līo̍o̍ le̍ mā wa̍ I̍sɔ̄lūɛ̍i̍ya̍ chīla̍ŋ māā wānāā māndāā lāsāā wa̍ ki̍nɛ̍i̍, o̍ pāa̍le̍ŋ ni᷄ŋ bɛ̍ɛ̍, I̍ di̍mu̍l o̍ pi᷅lɛ̍ le̍ mbō tēŋgu̍l la̍ chīɛ̄ī yɔ̄mīī si̍dāā le̍ mī wa̍ lēni᷄ŋ te̍.’

⁸ “Le̍la̍ŋ kɔ̍ mā kɔ̍ di̍mūl bu̍ɛ̍ī nūu̍ Dēēve̍ māā nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍ dīmi̍ wo̍ cho̍ ho̍ō ni̍, āā, ‘Dēēve̍, a̍ wa̍ sāa̍ māndāa̍ yōndōo̍ ni᷄ŋ pɔ̍, mi̍ so̍lī nu̍m ndo̍ŋ le̍ mā hu̍ŋ wa᷅ māsāa̍ wānāā nīa̍a̍ chōo̍ I̍sɔ̄lūɛ̄ī.

⁹ Ndu̍yɛ̍ bā o̍ bā nūm o̍o̍ kɔ̍, I̍ wa̍ nu̍m kɔ̄ɔ̄lī. Ya̍a̍mɔ̍ɔ̍wa̍a̍ wa̍ nu̍m lāchī wa̍ kpo̍u̍ mi̍ chi̍ī a̍ nda̍. I̍ cho̍ tōsā mā sīmnu̍ŋ ma᷅sa̍ tɔ̍ɔ̍ bɛ̍ndū mɛ̄ɛ̍ māsāā bɛ̍ndūa̍a̍ o̍ chi̍e̍ēŋndo̍ ho̍ō ni᷄ŋ a̍ fu̍la̍ tɔ̍ɔ̍ yɛ̍.

^10-11 Ya̍ hɛ̍li̍ fo̍ndā kōŋ ni̍ mi̍ ke᷅ wānāā nīa̍a̍ I̍sɔ̄lūɛ̄ī māā nāa̍ ndāā cha̍lāā ma̍ wā lo̍ŋ. Ndu̍yɛ̍ ā wānūŋ ni̍ŋ lo̍ŋ, wānā o̍ wānā nɔ̍lā ni̍ŋ mbō yɔ᷄ŋ nda̍ nyɛ̄ le̍. Te̍le̍ŋnda̍ māsāa̍ kɔ̍ɔ̍sā a̍ wāŋnda̍ wa̍ ā wa̍ I̍sɔ̄lūɛ̍i̍ya̍ chīla̍ŋ nda̍ŋ, lɛ̄ŋīī bɔ̄ɔ̍ bɔ̍ɔ̍ mi̍ ī tūsī I̍sɔ̄lūɛ̍i̍ya̍ nyɛ̄ pālāa̍ chōo̍. Kɛ̍ I̍ cho̍ tōsā ī wāā le̍nde̍ i̍ yɔ̍nūŋ ndɛ̍ a̍ nya̍ le̍. I̍ wa᷅ ni̍ŋ nu̍m māndāa̍ ya̍a̍mɔ̍ɔ̍wa̍a̍ nu̍m nda̍ tɛ̄ɛ̄ŋ le̍ te̍le̍ŋ o̍ te̍le̍ŋ. Ndu̍yɛ̍ vɛ̍lɛ̄, I̍ chu̍e̍l nu̍m būŋgɛ̄i̍ māā I̍ cho̍ tōsā mī wānāa̍ fu̍lā ni̍ŋ o̍ pūlālē nūm nde̍ŋ chōo̍ wa̍ ā hīōū lāchī a̍ wāa̍ lāmāsā I̍sɔ̄lūɛ̄ī.

¹² Tē a̍ hu̍ŋ wu᷅ fɛ̍ɛ̍ŋ pɛ̍, mā kūɛ̄ nāa̍ fi̍nyāā nūm a̍ māmāa̍ ā kūɛ̄ wa̍, I̍ cho̍ wāŋndo̍ hɛ̄lī o̍ pūlālē nūm nde̍ŋ chōo̍, ō nūm pi̍la̍ ve̍lū kɛ̍sɛ̍ kɛ̍sɛ̍ wo̍, mī mi̍ŋgi̍ ndu̍ o̍ fōōfō nu̍m ndo̍ mbō wa̍ māsāa̍ le̍ I̍sɔ̄lūɛ̄ī kpo̍u̍. Ndu̍yɛ̍ I̍ cho̍ tōsa̍ mī māsāle̍ ndɔ̄le̍ŋ lē wa̍ māsāle̍ kpi̍i̍li̍a̍a̍ bɛ̄ndū.

¹³ Po̍ nu̍m ko̍ŋ ndu̍ hu᷅ŋ ni̍ŋ ni̍, mbō hu᷄ŋ te̍ŋgūl la̍ chīɛ̄īyo̍, mī wa̍ lēni᷄ŋ. Ndu̍yɛ̍ I̍ cho̍ tōsā mī māsāle̍ ndɔ̄le̍ŋ lē hīōū lāchī a̍ wāa̍ o̍ yu̍ŋgu̍ ndɔ̄ɔ̍ chōo̍ le̍ fɛ̍ɛ̍ŋ a̍ fɛ̍ɛ̍ŋ.

¹⁴ Ya̍ cho̍ wā fi̍nyā ndɔ̄ ni̍, ndu̍yɛ̍ mī ndu̍ wa̍ po̍ nī. Tē ō tōsa̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ pɛ̍, I̍ ve᷅m wānāā chēle̍ŋnda̍ ā kɔ̍ tu̍sī ndu̍ nyɛ̄ pālāa̍ chōo̍ le̍ ndu̍ sīlāa̍ mɛ̄ɛ̍ kāla̍ chūa̍a̍ sīlā chūā ndɔ̄ɔ̍ yɛ̍.

¹⁵ Kɛ̍ a̍ ko̍ŋ kpo̍u̍ kāālā ndɔ̄ɔ̍ ō fu̍lā ya̍ ni̍ŋ o̍ kɔ̄l mɛ̄ɛ̍ kāāla̍ Sɔ̍ɔ̄ wo̍ ō fūla̍ ya̍ o̍ kɔ̄l mi̍, mi̍ pi̍āl ndu̍ o̍ lēmāsā mi̍ mi̍ŋgī nu̍m o̍ fōōfo̍ ndɔ̄ɔ̍ yɛ̍ le̍.

¹⁶ Wānāa̍ fu̍lā ni̍ŋ o̍ pūlālē nūm nde̍ŋ chōo̍ wa̍ ā hīāū ni̍ŋ la̍chi̍ a̍ kūīyo̍ ta̍u̍ ta̍u̍. Ndu̍yɛ̍ māsāle̍ nu̍m nde̍ŋ lē nɔ᷅ ni̍ŋ la̍mɛ̍ɛ̍lu̍ le̍, lē hīāū ni̍ŋ la̍chi̍ le̍ fɛ̍ɛ̍ŋ a̍ fɛ̍ɛ̍ŋ.’ ”

¹⁷ O̍ ko̍ŋ, mi̍ Ne̍ta̍ŋ kɔ̍ di̍mūl Dēēve̍ nyɛ̄ o̍ nyɛ̄ Mɛ̄lɛ̄ka̍ chɔ᷄m ndu̍ o̍ yi̍lāŋndo̍ ni᷄ŋ le̍ Dēēve̍.

Dēēve̍ me̍l Mɛ̄lɛ̄ka̍ ba̍li̍ka̍ o̍ pīɛ̄īle̍ŋ ni᷄ŋ

¹⁸ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Dēēve̍ kūā o̍ Tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ, mbo̍ chāl ndu̍ lāchī, mbo̍ pīɛ̄ī Mɛ̄lɛ̄ka̍. Mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, kɛ̄ndɛ̄i̍ ŋ̄ tōsa̍l la̍ ve̍ ī chō ī bɔ̄ɔ̍. Ya̍ ni̍, yu̍ŋgu̍ nūu̍ ni̍, wānāā māāvɛ̄ɛ̄ na̍a̍ ŋ̄ chō yɛ̄ le̍ mā to̍sa̍l na̍a̍ kɛ̄ndɛ̄ī bɛ̍ndūīī wāā nu̍a̍ā?

¹⁹ Ndu̍yɛ̍ nyɛ̄ o̍ nyɛ̄ ŋ̄ tōsa̍ Mɛ̄lɛ̄ka̍, a̍ chi̍ wɔ̍ ndu̍ bɛ̍ɛ̍ nyɛ᷅ o̍ nyɛ̍ nu̍m o̍ hɔ̄l te̍, ā chō wɔ̄ hi̍o̍u̍wɔ̄ɔ̍ lāchī a̍ ya̍ bu̍ɛ̍ī nu̍m ndo̍ būŋgāŋ chēle̍ŋ chūēllo̍ kɛ᷅, le̍ yu̍ŋgu̍ nūu̍ hūnɔ̄ɔ̍ sɔ̄ɔ̍ŋ bɛ̍ndūŋ chēle̍ŋ tōsāllo̍ fɛ̍ɛ̍ŋ. Mɛ̄lɛ̄ka̍ Ya̍a̍wɛ̄ɛ̄ Kpu̍lu̍ŋgu̍mā bɛ̄ndōo̍, bāā pāāndū bɛ̍ɛ̍ nu̍a̍ā ko̍ni̍ nūm o̍o̍ bi̍ī wa᷅ŋnda̍ ni̍?

²⁰ O̍o̍ Mɛ̄lɛ̄ka̍ Ya̍a̍wɛ̄ɛ̄ Kpu̍lu̍ŋgu̍mā bɛ̄ndōo̍, I̍ nɔ̍ lɛ̍ nyɛ̄ o̍ nyɛ̄ ya̍ I̍ di̍mūl nu̍m te̍. Kāni̍ fo̍ndōle̍ nūm pi̍la̍ si̍nā wa᷅na̍ bu̍ɛ̍ī nūm ndo̍ chō wo̍.

²¹ Nyɛ̄ ŋ̄ tōsāl la̍ wo̍ ō chō ō bɔ̄ɔ̍ Mɛ̄lɛ̄ka̍. Nūm pi̍la̍ chu̍e̍l la̍ būŋ̄gɛ̄i̍ he̍ī ni̍ ā kɔ̄l nūm ndo̍ kpo̍u̍. Ndu̍yɛ̍ nyɛ̄ o̍ nyɛ̄ ŋ̄ chūe̍l la̍ būŋgɛ̄i̍ ō pīlɛ̍ bɛ̍ɛ̍ a̍ mɛ̍i̍ ndu̍ mā kɛ̍ɛ̍ ya̍ ndu̍ tōsāl te̍, le̍ mā chɔ̍m ya̍ māā būŋgɛ̄ī ŋ̄ chu̍e̍l la̍ ve̍, a̍ chi̍i̍ ndi̍ pēēlū.

²² O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ā chō ō bɛ̄ndū. Wānā o̍ wānā cho̍ māā nūm te̍. Nyɛ̄ o̍ nyɛ̄ na̍a̍ ŋ̄ wa̍ tūēīyɔ̄ɔ̍ a̍ nūm o̍kɔ̄ɔ̄, tōnya̍ o̍ cho̍ ni̍, mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ nūm kɔ̍ɔ̍lī le̍.

²³ Mɛ̄lɛ̄ka̍, lēlɛ̄ŋ o̍ lēlɛ̄ŋ lē cho̍ o̍ chi̍e̍ēŋndo̍ chōo̍ mi̍ lē wa̍ māā wānāā nu̍m nda̍ I̍sɔ̄lūɛ̄ī le̍. Nu̍m kɔ̍ ba̍ŋā ndā o̍ chɛ̄lē nda̍ wa̍ lē bɛ̄ŋgu̍ le̍ŋ ni̍ ma̍ sīīŋgu̍u̍ nda̍ wānāā nūm. Sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ ŋ̄ tōsa̍ le̍ nda̍ wo̍ŋ, mu̍ŋ to̍sa̍ ni̍ mi̍ tɔ̍ɔ̍ nu̍m ndo̍ tīū o̍ chi̍e̍ēŋndo̍ chōo̍ kpo̍u̍. Kāa̍la̍ wa̍ nda̍ lāchī la̍ŋ ki̍nɛ̍i̍ ma̍ sōlī la̍ŋ kpo̍u̍, a̍ mɛ̄lɛ̄ka̍a̍ ndāa̍ lātūlu̍.

²⁴ Mɛ̄lɛ̄ka̍ Ya̍a̍wɛ̄ɛ̄, a̍ hɛ̍li̍ māhɛ̄līāā I̍sɔ̄lūɛ̍i̍ya̍ kpe̍e̍kpe̍i̍ le̍ mā wa̍ wānāā nūm le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ ma̍ sīmnu᷄ŋ Mɛ̄lɛ̄ka̍ nda̍.

²⁵ “Le̍la̍ŋ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, nyɛ̄ o̍ nyɛ̄ ŋ̄ chūe̍l na̍a̍ būŋgɛ̄i̍, ya̍ bu̍ɛ̍ī nūm ndo̍ ni̍, a̍ yu̍ŋgu̍ nūu̍, hi̍o̍u̍ la̍chi̍ a̍ na̍a̍ ndu̍ tōsāllo̍ le̍ te̍le̍ŋ o̍ te̍le̍ŋ.

²⁶ Ko̍ŋ to̍sa̍ ni̍, mī wāŋnda̍ hīōū lāchī a̍ dīōlā nūm nda̍ŋ sāŋgālāa̍ le̍ fɛ̍ɛ̍ŋ a̍ fɛ̍ɛ̍ŋ, mā dīmi̍ āā, ‘I̍sɔ̄lūɛ̍i̍ya̍, Mɛ̄lɛ̄ka̍ ndāa̍ ndu̍ cho̍ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍ ni̍.’ To̍sa̍ mī bu̍ɛ̍ī nūm ndo̍ Dēēve̍, yu̍ŋgu̍ ndɔ̄ɔ̍ hīōū lāchī a̍ wāa̍ lāmāsā I̍sɔ̄lūɛ̄ī le̍ fɛ̍ɛ̍ŋ a̍ fɛ̍ɛ̍ŋ.

²⁷ O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍, sɔ̄ɔ̍ŋ mu᷅ŋ kpo̍u̍ a̍ chi̍i̍ ya̍ ni᷅ŋ mu̍ŋ chɔ̄m. Nu̍m pi̍la̍ chu̍e̍l la̍ būŋgɛ̄i̍ ni̍ māā ā chō tōsā mī wānāa̍ fu̍la̍ o̍ pūlālē nīle̍ŋ chōo̍ wa̍ ā hīōū lāchī a̍ wāa̍ lāmāsā I̍sɔ̄lūɛ̄ī le̍ fɛ̍ɛ̍ŋ a̍ fɛ̍ɛ̍ŋ. Nyɛ̄ ko̍ŋ to̍sa̍ ni̍, mi̍ sɔ̍lā kɔ̄l sīmūlāa̍, mi̍ wa᷅ nu̍m pīɛ̄īlē wāā nu̍a̍ā.

²⁸ “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nu̍m pīlɛ̍ kpe̍ cho̍ Mɛ̄lɛ̄ka̍ ni̍. Ndu̍yɛ̍ ā chō wāna̍ lo̍ o̍ lēdīōm. Nūm pi̍la̍ chu̍e̍l bu̍ɛ̍ī nūm ndo̍ būŋgɛ̄i̍ he̍ī ni̍, māā ā tōsāl la̍ ni̍ŋ sɔ̍ɔ̍ŋ kɛ̍ndɛ̄ŋ bɛ̄ndūŋ wāā nu̍a̍ā.

²⁹ Le̍la̍ŋ yāndi̍i̍ Mɛ̄lɛ̄ka̍, dɔ̍u̍ wa̍nāa̍ fu̍la̍ o̍ pūlālē nīle̍ŋ chōo̍ wa̍ sa̍lā, mā to̍sa̍ mā hīōū lāchī a̍ wāa̍ o̍ dɛ̍nɛ̍ kɛ̍ndɛ̄ bɛ̄ndōo̍ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ. Nūm Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nūm pi̍la̍ chu̍e̍l la̍ būŋgɛ̄i̍ he̍ī ni̍. Ndu̍yɛ̍ I̍ si̍nā māā ā dūāū ni̍ŋ wa̍nāa̍ fu̍la̍ o̍ pūlālē nīle̍ŋ chōo̍ wa̍ sa̍lā, mī sa̍lā kōŋ wa̍ nda̍ chōo̍ le̍ fɛ̍ɛ̍ŋ a̍ fɛ̍ɛ̍ŋ.”