Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 6 - Yāu̍ Mɛ̄lɛ̄ka̍a̍

Ā mīīŋgu̍ a̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ Chūlu̍sɛ̄lɛ̄m.

¹ O̍ ko̍ŋ kɔ̍ɔ̍lī, mi̍ Dēēve̍ chu̍u̍ŋgīāā vɛ̄lɛ̄ so̍vɛ̄i̍ya̍ sɔ̍ŋgā sɔ̍ŋgā bɛ̄ndōo̍ I̍sɔ̄lūɛ̄ī ya̍ nāa̍ pi᷅lɛ̍. Ā wa̍ wāa̍la̍ŋ be̍le̍-ya̍a̍ (30,000).

² Mi̍ Dēēve̍ chu̍ā nda̍ kpo̍u̍ ma̍ kūā Ba̍a̍lā chi̍e̍e̍ o̍ lɛ̄ŋndē Chu̍dāle̍ŋ ni᷄ŋ, le̍ mā kɔ̍ hu᷅ŋ a̍ kɔ̍fū kpe̍ma̍ Mɛ̄lɛ̄ka̍a̍. Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍, kɔ̍fōo̍ ho̍ō ndu̍ o̍o̍ si̍m le̍ dīōlā ndɔ̄la̍ŋ ni̍. Nyāā lākūmba᷅ŋāā nda̍ tūūla̍ o̍ kɔ̍fōo̍ ho̍ō chōo̍ wa̍ tɛ̄ɛ̄ŋ, kpe̍ŋgbe̍i̍ lēmāsa̍ Mɛ̄lɛ̄ka̍a̍ ō wa̍ ni̍.

³ Po̍ pi᷅lɛ̍ wa̍ Ba̍a̍lā chi̍e̍e̍ dīōla̍ŋ āā Ābi̍na̍da̍bī, o̍ ndu̍ lo̍ chi̍ɛ̍ī ni̍ŋ kɔ̍fōo̍ ho̍ō ō wa̍ ni̍. Ndu̍yɛ̍ chīɛ̄ī ndɔ̄ɔ̍ pēmbēi̍ chōo̍ te̍mā o̍ wa̍ ni̍. Mi̍ Dēēve̍ ku̍ā a̍ pūa̍a̍ ndūa̍a̍ ma̍ kɔ̍ so̍lī kɔ̍fōo̍ ho̍ō lo̍ŋ, ma̍ kɛ̄sī ndu̍ o̍ nyɛ̄ chūāā lāwōlɔ̄ɔ̄ sɛ̄nɛ̄ī nda̍ tōōsi̍a̍a̍ wo̍ ni᷄ŋ, ma̍ bīī kɔ̄la̍ŋ a̍ ndu̍. Ndu̍yɛ̍ Ābi̍na̍da̍bī ko̍ŋ pūa̍a̍ ndūa̍a̍, U̍sāā nda̍ A̍hi̍o̍ō, nda̍ wa̍ kɔ̄la̍ŋ a̍ nyɛ̄ chūāā lāwōlɔ̄ɔ̄ kɔ̍fōo̍ ho̍ō ō wa̍ ni᷄ŋ ndo̍ māndāa̍ ni̍.

⁴ A̍hi̍o̍ō ndu̍ wa̍ lāchī ni̍, mbō kūā nyɛ᷅ chūāā lāwōlɔ̄ɔ̍ ho̍ō lāchī.

⁵ Dēēve̍ ni̍, a̍ I̍sɔ̄lūɛ̍i̍ya̍ ā pīli̍a̍a̍ kpo̍u̍ ā wa̍ kɔ̄la̍ŋ a̍ yōla̍ŋ mā sōlī cho̍ndo̍ŋ kpe̍e̍kpe̍i̍ a̍ dīāllūŋ fūla᷄ŋ Mɛ̄lɛ̄ka̍ Ya̍a̍wɛ̄ɛ̍ lāchī. Ndu̍yɛ̍ ā wa̍ kɔ̄la̍ŋ a̍ nyɛ̄m chāāŋ yɛ̍ yɔ̍ŋ lɔ̄ɔ̍, ha̍ā wa̍ kɔ̄la̍ŋ a̍ tōwāla̍ŋ lɔ̄ɔ̍, mi̍ ha̍ā lūāā nyɛ᷅m chāāŋ chēle̍ŋ ŋ̄ nda̍ kīndū a̍ yūe̍i̍ yo̍ŋ, mi̍ ha̍ā lūāā du̍ndūla̍ŋ, mī ha̍ā lūāā bɔ̍mbīllo̍ŋ a̍ nyɛ̄m chāāŋ chēle̍ŋ, ŋ̄ te̍ŋge̍le̍ŋ te̍ŋge̍le̍ŋ ndo̍ŋ.

⁶ Po̍ pi᷅lɛ̍ wa̍ dīōla̍ŋ āā Na̍kɔ̄ŋ, mɛ̄ɛ̍ nda̍ fūūlu̍u̍ o̍ fo̍ndāŋ pōo̍ ho̍ō ō lūāā wi̍tīi̍ŋ ndɔ̄ɔ̍ŋ a̍ ba̍a̍līi̍ŋ ndɔ̄ɔ̍ŋ ndo̍, mi̍ nāūwāa̍ wa̍ kɔ̄la̍ŋ a̍ nyɛ̄ chūāā lāwōlɔ̄ɔ̍ ho̍ō wa̍ ō pīlɛ̍ kpēkēsīa̍ŋ mi̍ kɔ̍fu̍ Mɛ̄lɛ̄ka̍a̍ kūā le̍ dēlɔ̄ɔ̍. O̍ ko̍ŋ, mi̍ U̍sāā o̍ si̍ɛ̍ndī bāa̍ mbo̍ sāā kɔ̍fōo̍.

⁷ Dīmīo̍o̍ nu̍a̍ā mi̍ U̍sāā pi̍la̍ŋ kɔ̍fōo̍ ho̍ō, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍ŋnu᷄ŋ tu̍mbe̍ a̍ ndu̍, mbo̍ tōsā mi̍ U̍sāā de᷅l o̍ kɔ̍fū kōŋ īkɛ̄i̍ mbo̍ wu̍ o̍ fōōfōo̍ chōo̍ lo̍ŋ.

⁸ O̍ ko̍ŋ, mi̍ Dēēve̍ dūāūnu᷄ŋ tu̍mbe̍ le̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ɔ̍nu᷄ŋ tu̍mbe̍ a̍ U̍sāā mbo̍ dīī ndu̍ yɛ̍. Ndu̍yɛ̍ ma̍ kē fo̍ndāŋ kōŋ dīōla̍ŋ āā, “Pɛ̍lu̍ɛ̍sī Yu̍u̍sā.” Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ le̍nde̍ nda̍ chō wɔ̄ fo̍ndāŋ kōŋ vēēlōo̍ ni̍.

⁹ O̍ ko̍ŋ kɔ̍ɔ̍lī, mi̍ sīōōŋnde̍ bīī Dēēve̍ pāa̍le̍ le̍ŋ a̍ Mɛ̄lɛ̄ka̍ Ya̍a̍wɛ̄ɛ̄. Mbo̍ dīmī āā, “Tē ō wa̍ nu̍a̍ā pɛ̍, mɛ̄ɛ̍ yɛ̄ɛ̍nɛ̍ nɔ̍lā yɛ̍ ni̍ŋ kɔ̍fōo̍ ho̍ō māndā?”

¹⁰ O̍ ko̍ŋ, Dēēve̍ ku̍e̍ lɛ̍ a̍ kɔ̍fōo̍ ho̍ō Chūlu̍sɛ̄lɛ̄m te̍. Ma̍ lūēī ndu̍ o̍ po̍ pi᷅lɛ̍ lo̍ chi̍ɛ̍ī ni̍ŋ dīōla̍ŋ āā Ōbɛ̄ɛ̄ I̍dɔ̄m, wānā wa̍ā Ka̍a̍tī chi̍e̍e̍, ma̍ kɛ̄sī ndu̍ lo̍ŋ.

¹¹ Kɔ̍fōo̍ ho̍ō chīi̍ pāŋgo̍ŋ ŋ̄gāa̍ o̍ Ōbɛ̄ɛ̄ I̍dɔ̄m ndo̍ chi̍ɛ̍ī ni̍ŋ. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍ū Ōbɛ̄ɛ̄ I̍dɔ̄m sa̍lā a̍ chīɛ̄ī ndɔ̄ɔ̍ kpo̍u̍.

¹² O̍ ko̍ŋ kɔ̍ɔ̍lī, mi̍ Dēēve̍ tu̍ɛ̍ī māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū Ōbɛ̄ɛ̄ I̍dɔ̄m sa̍lā, a̍ nyɛ̄ o̍ nyɛ̄ o̍ nɔ̍, fo̍ndōle̍, le̍ mɛ̄ɛ̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō o̍ ndu̍ lo̍ chi̍ɛ̍ī ni̍ŋ yɛ̍. Mi̍ Dēēve̍ chu̍ā vɛ̄lɛ̄ wāŋnda̍ mbo̍ kɔ̍ so̍lī kɔ̍fōo̍ ho̍ō o̍ Ōbɛ̄ɛ̄ I̍dɔ̄m ndo̍ chi̍ɛ̍ī ni̍ŋ, ma̍ bīī kɔ̄la̍ŋ a̍ ndu̍ Chūlu̍sɛ̄lɛ̄m a̍ kɔ̄l kɛ̄ndɛ̄ bɛ̄ndōo̍.

¹³ Mɛ̄ɛ̍ wānāa̍ wa̍ kɔ̄la̍ŋ a̍ kɔ̍fōo̍ ho̍ō wa̍ ā chu̍a̍ kɔ̍fōo̍ ho̍ō ma̍ nɛ̄ī lē ŋɔ᷄mpu᷅m, mi̍ Dēēve̍ si̍mī nda̍. Mi̍ Dēēve̍ lō o̍ ko̍ŋ mbo̍ dīī nāū to̍o̍wa̍ bɛ̍ndōo̍ ō pīlɛ̍, a̍ nāū fɔ̍ŋndɔ̍ kɛ̄ndɛ̄ kɛ̍ndɔ̄ɔ̍ ō pīlɛ̍, mbo̍ sōlī sa̍lāa̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍.

¹⁴ Dōmā bi̍ŋgī wānāā sōlīāā lāsāa̍ ā wōōnūŋ o̍ dōmāa̍ chōo̍ wo̍ ko̍ni̍ wa̍ Dēēve̍ o̍ chāŋ ni̍, mbō kūā a̍ yōla̍ŋ a̍ chōndo̍ŋ kpe̍e̍kpe̍i̍, Mɛ̍lɛ̄ka̍ Ya̍a̍wɛ̄ɛ̍ lāchī a̍ dīāllūŋ fūla᷄ŋ.

¹⁵ Dēēve̍ ni̍, a̍ I̍sɔ̄lūɛ̍i̍ tu̍a̍a̍ kpo̍u̍ ā lo̍ kɔ̄la̍ŋ a̍ chōndo̍ŋ chōo̍ cho̍o̍, mā kūā a̍ yo̍la̍ŋ a̍ bu̍lu̍la̍ŋ hɔ̄ŋndo̍, ha̍a̍a̍ ma̍ fūūlūū a̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ Chūlu̍sɛ̄lɛ̄m.

¹⁶ Bōōndi̍i̍ nda̍ wa̍ hēlɔ̄ɔ̍ a̍ kɔ̍fu̍ Mɛ̄lɛ̄ka̍a̍ Chūlu̍sɛ̄lɛ̄m chi̍e̍e̍ ve̍, Ma̍kāl, la̍nɔ̍ɔ̍ Dēēve̍, ndu̍ yɔ̍nūŋ māā chūa̍ Sɔ̍ɔ̄ wo̍ ni̍, ō wa̍ chīɛ̄ī ni᷄ŋ mbō nūā o̍ wu̍ndɛ̄i̍yo̍. Mɛ̄ɛ̍ o̍ che᷅ Dēēve̍ hūnɔ̄ɔ̍ a̍ hūūlōo̍, a̍ yōla̍ŋ kɔ̍fu̍ Mɛ̄lɛ̄ka̍a̍ lāchi̍, mbo̍ pɛ̄ɛ̄sā ndu̍ o̍ kɔ̄l ni᷄ŋ.

¹⁷ O̍ ko̍ŋ kɔ̍ɔ̍lī, ma̍ kūā a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ o̍ Tɛ̍ndīi̍ Dēēve̍ ndu̍ o̍o̍ ta̍ŋgu̍l le̍ ndu̍ kɛ̄sīo̍o̍ lēni᷄ŋ ndo̍ ma̍ kɔ̍ kɛ̍sī ndu̍ lo̍ŋ. Mi̍ Dēēve̍ lo᷅ o̍ ko̍ŋ mbo̍ so̍lī sa̍lāla̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, sa̍lālā lūāmāāla̍ŋ a̍ sa̍lālā kɔ̄l nyūlūla̍ŋ.

¹⁸ Mɛ̄ɛ̍ o̍ chi̍i̍ sa̍lālā lāŋ sōlī kpo̍u̍, mbo̍ mūli᷄ŋ mbo̍ dūāū wāŋnda̍ I̍sɔ̄lūɛ̄ī sa̍lā o̍ dīōla̍ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍ la̍ŋ ni᷄ŋ.

¹⁹ O̍ ko̍ŋ kɔ̍ɔ̍lī, mbo̍ pīɔ̄ū nda̍ nyɛ̄ dīa̍a̍ mɛ̄ɛ̍ nda̍ wa̍ tu᷅, wānā la̍nɔ̍ ni̍, wānā pɔ̍nɔ̍ ni̍. Mbo̍ kē wānā o̍ wānā bēe̍dīi̍yo̍ kpūŋgbɛ̄i̍ ī pīlɛ̍, a̍ vīsīo̍ŋ ku̍ndā, a̍ Kīle̍pīi̍ma̍ ve̍sɛ̍i̍ya̍ŋ mā ti᷄ŋ. Mɛ̄ɛ̍ nda̍ chīi̍ nyɛ̄ dīāā kōŋ dīo̍ kpo̍u̍, mi̍ wānā o̍ wānā mi̍i̍ŋgū o̍ ndu̍ lo̍.

²⁰ O̍ ko̍ŋ kɔ̍ɔ̍lī, Dēēve̍ bɛ̍ɛ̍ mbo̍ mīīŋgū o̍ ndu̍ lo̍ chi̍ɛ̍ī ni̍ŋ le̍ mbō kɔ̍ dɔ̍ū chīɛ̄ī ndɔ̄ɔ̍ sa̍lā. Mɛ̄ɛ̍ Ma̍kāl, chūa̍ Sɔ̍ɔ̄ wo̍ ō chē ndu̍ hūnɔ̄ɔ̍, mbo̍ fūlā mbo̍ kūā ndu̍ lāchī. Mbo̍ dīmūl Dēēve̍ āā, “Ā chē mɛ̄ɛ̍ māsā bɛ̍ndōo̍ le̍ I̍sɔ̄lūɛ̄ī kpo̍u̍ ke̍ŋnu̍ŋ ha̍ū bɛ̍ɛ̍le̍ŋ yɛ̍. Ma̍ bīī ma̍ yūŋga᷄ŋ pu̍le̍e̍ māā wānā se̍e̍mɛ̍i̍. Pūa̍a̍ nu̍m ā so̍vɛ̄i̍ya̍, nda̍ bu̍ɛ̍i̍yāā lāāndūa̍a̍ cho̍ nda̍ wa̍llo̍ o̍ bā wa̍ bɛ̍ɛ̍, ā chē nu̍m hāū fo̍ndō.”

²¹ Mi̍ Dēēve̍ lō o̍ ko̍ŋ mbo̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, o̍ kɛ̍ɛ̍ fi̍nyā nu̍m a̍ yu̍ŋgu̍ ndɔ̄ɔ̍ o̍ lēmāsā mbo̍ hɛ̄lī ya̍ le̍ mī wa̍ māsāa̍ wānāā ndūa̍a̍ I̍sɔ̄lūɛ̄ī chōo̍ kpo̍u̍ wo̍, Mɛ̄lɛ̄ka̍ kōŋ ya̍ I̍ wa̍ yōla̍ŋ lāchī ni̍. Ndu̍yɛ̍ I̍ cho̍ hīōūwɔ̄ɔ̄ lāchī a̍ kɔ̄l kɛ̄ndɛ̄ bɛ̄ndōo̍ tōsāa̍ kpe̍e̍kpe̍i̍ Mɛ̄lɛ̄ka̍ Ya̍a̍wɛ̄ɛ̍ ko̍ŋ lāchī.

²² Tē ō wa̍ māā lēbɛ̄ɛ̄ pɛ̍ ya̍ I̍ chi̍i̍nu̍ŋ ni̍, mɛ̄ɛ̍ I̍ chi̍i̍nu̍ŋ ni̍ŋ bɛ̍ɛ̍ le̍bɛ̍ɛ̄ mbō hīōū ho̍ō. Nūm chu̍a̍ ya̍ bɛ̍ɛ̍ māā wānā fo̍ndō fu̍u̍ ya̍ I̍ cho̍ŋnu̍ŋ ni̍, kɛ̍ bu̍ɛ̍i̍yāā lāāndūāā ŋ̄ chō ha̍ā dīmīo̍o̍ wa̍ nda̍ bɛ̄ɛ̄le̍ŋ nda̍ kē ya̍ ni̍.”

²³ Ndu̍yɛ̍ le̍ nyɛ̄ Ma̍kāl chūa̍ Sɔ̍ɔ̄ wo̍ ō dīmi̍ ko̍ŋ a̍ Dēēve̍ wo̍, mi̍ Mɛ̄lɛ̄ka̍ yīī ndu̍ pūle̍i̍, ō vī le̍nde̍ ō vīlu̍ chu̍ā o̍ chūā le̍.