Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 4 - Yāu̍ Mɛ̄lɛ̄ka̍a̍

A̍ pīɔ̍m Īsībo̍si̍ɛ̍tī wo̍ o̍kɔ̄ɔ̄

¹ Mɛ̄ɛ̍ Īsībo̍si̍ɛ̍tī, po̍ Sɔ̍ɔ̄ wo̍ ō tūēī māā ā dīī A̍bi̍nā Hi̍būlɔ̄ŋ chi̍e̍e̍, mbo̍ sīnā māā tīīnda᷄ŋ ndɔ̄ɔ̍ chūū. I̍sɔ̄lūɛ̍i̍ya̍a̍ tu̍a̍a̍ kpo̍u̍ mi̍ kɔ̄lta̍ŋ lā tāmbū nda̍.

² Īsībo̍si̍ɛ̍tī ndu̍ o̍o̍ nɔ̍ lāŋgba̍ā pūm nda̍ ŋi̍ɔ̍ɔ̍ŋ, nda̍ wa̍ so̍vɛ̄i̍ya̍a̍ ndūa̍a̍ nda̍ a̍a̍ ba̍lū ya̍a̍mɔ̍ɔ̍wa̍a̍ ndāa̍ dēlɔ̄ɔ̍ chōo̍ mā pūŋgā nyɛ᷅m ndāa̍ŋ nda̍ bōlle̍ŋ ni̍. Ō pīlɔ̍ɔ̍ dīōla̍ŋ āā Ba̍nā, ō pīlɔ̍ɔ̍ āā Lu̍e̍cha̍bī. Pūa̍a̍ ha̍ā fi̍nyā nda̍ wa̍ Lu̍i̍mɔ̄ŋ ni̍, wānā wa̍ā o̍ yūŋgu̍ Bɛ̍ŋnja̍mīŋ ndo̍ chōo̍. Bīɛ̄ɛ̄lɔ̍tī chi̍e̍e̍ wāŋnda̍ ha̍ā ā wa̍ īchāli̍ ni̍. Ndu̍yɛ̍ Bīɛ̄ɛ̄lɔ̍tī ko̍ŋ bɛ̍ɛ̍ o̍ būŋgɛ̄ī Bɛ̍ŋnja̍mīŋ nde̍ chōo̍ o̍ wa̍ ni̍.

³ Wānāā nda̍ a̍a̍ nɔ̍ chi̍o̍o̍ ho̍ō wa̍, ma̍ nyāānu᷄ŋ ma̍ kūānu᷄ŋ Ki̍tīm chi̍e̍e̍ ma̍ kɔ̍ cha᷅l lo̍ŋ. O̍ ko̍ŋ, mi̍ chi̍o̍o̍ ho̍ō ō wā ni̍ko̍ le̍ būŋgɛ̄ī Bɛ̍ŋnja̍mīŋ nde̍. Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ wāŋnda̍ ha̍ā ā chō o̍ chi̍e̍e̍ nda̍ nyāānu̍ŋ ko̍ŋ ndo̍ ni᷄ŋ mi̍ālla̍.

⁴ Chōna̍ta᷅ŋ, po̍ Sɔ̍ɔ̄ wo̍ ndu̍ o̍o̍ nɔ̍ pōo̍, dīōla̍ŋ āā Mɛ̄fībo̍sīɛ̄ɛ̄. Kɛ̍ Nāmtāa̍ pōo̍mbɔ̄ɔ̍ ho̍ō wa̍ ni̍. Pōo̍mbɔ̄ɔ̍ ho̍ō ō wa̍ wɔ̄sīla̍ŋ lā ŋūɛ̍ɛ̍nu̍ ma̍ dīī Sɔ̍ɔ̄ nda̍ Chōna̍ta᷅ŋ. O̍ ko̍ŋ, mi̍ yōōŋgōo̍ cha᷄ŋ Chɛ̍si̍lūɛ̄ɛ̄ chi̍e̍e̍ māā ā dīī Sɔ̍ɔ̄ nda̍ Chōna̍ta᷅ŋ po̍ ndɔ̄. Mɛ̄ɛ̍ chūa̍ wa̍ pōo̍mbɔ̄ɔ̍ ho̍ō māndāa̍ wo̍ ō tūēī yōōŋgōo̍ ho̍ō, mbo̍ chūā pōo̍mbɔ̄ɔ̍ ho̍ō mbo̍ wā kīlta̍ŋ a̍ ndu̍ le̍ ndu̍ kɔ̄la̍ŋ vīōŋɔ̄ɔ̍. Kɛ̍ ō lo̍ nyāānɔ᷄ŋndo̍ a̍ ndu̍ mbo̍ hīālu᷄ŋ ndu̍, mbo̍ dēl mi̍ pēlo̍ŋ yōmī ndu̍.

⁵ Pāa̍le̍ pi᷅lɛ̍, a̍ bōōndi̍i̍ pāa̍le̍ŋ lē sīm o̍ bōlle̍ŋ chōo̍ ve̍ ki̍nɛ̍i̍, mi̍ pūa̍a̍ Lu̍i̍mɔ̄ŋ nda̍, Lu̍e̍cha̍bī nda̍ Ba̍nā a̍ ma̍lnu᷄ŋ ma̍ kūā o̍ chīɛ̍i̍ Īsībo̍si̍ɛ̍tī wo̍. Īsībo̍si̍ɛ̍tī wa̍ īhīni̍ o̍ ndu̍lo̍ chi̍ɛ̍ī ni̍ŋ pɛ̄ŋgīo̍o̍ a̍ pāa̍le̍ ka̍lālē lēŋ.

⁶ Chūā wa̍ dīō ndɔ̄ɔ̍ māndāa̍ wo̍ ō wa̍ īchāli̍ o̍ dīō wi̍tīi̍yo̍ŋ tōōsīa̍a̍, kɛ̍ mi̍ lūa̍ŋ mā hīālū ndu̍ mbo̍ lɔ̄lnu᷄ŋ. O̍ ko̍ŋ, mi̍ Lu̍e̍cha̍bī nda̍ Ba̍nā a̍ hi̍a̍ū yɛ̍lɛ̍ŋ yɛ̍lɛ̍ŋ ma̍ lūɛ̄ī chīɛ̄ī ni̍ŋ.

⁷ Ma̍ lūɛ̄ī nāa̍ Īsībo̍si̍ɛ̍tī o̍ lɔ᷅l la̍. Ā kōma̍l ndu̍ īhīni̍ o̍ ndu̍ lo̍ kpēlē. O̍ ko̍ŋ, ma̍ chūku᷄ŋ a̍ ba̍llo̍ ma̍ dīī ndu̍. Ma̍ kīālū ndu̍ bōlle̍ŋ, ma̍ chūā bōllē le̍ŋ ma̍ bīī kɔ̄la̍ŋ a̍ le̍ŋ Hi̍būlɔ̄ŋ nāa̍ Dēēve̍ chu̍a̍. Ma̍ lɔ̄ɔ̄lū kɔ̄la̍ŋ īchɔ̄l kōŋ pi̍i̍ pi̍i̍ o̍ lɛ̄ŋndē dɛ̍ŋgbɛ̍le̍ ho̍lnu̍ŋ Chɔ̍ɔ̍dāŋ nda̍ŋ nde̍ŋ ni᷄ŋ.

⁸ Mɛ̄ɛ̍ nda̍ fūūlu̍u̍ Hi̍būlɔ̄ŋ chi̍e̍e̍, ma̍ chūā bōllē lēŋ ma̍ yōō Dēēve̍. Ma̍ dīmūl Dēēve̍ āā, “Fāllo̍, ya̍a̍mɔ̍ɔ̍nɔ̍ nu̍m ndo̍ Sɔ̍ɔ̄, o̍ wa̍ nɛ̄īla̍ŋ nūūvīa̍a̍ le̍ nu̍m dīyɔ̄ɔ̍ wo̍, Īsībo̍si̍ɛ̍tī po̍ ndɔ̄ bōllē ndɔ̄le̍ŋ le̍ cho̍ le᷅ŋ ni̍. Sɔ̍ɔ̄ ni̍, yu̍ŋgu̍ ndɔ̄ɔ̍ ni̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ sɔ̍ŋga̍ māsɔ̄ŋgāā a̍ nda̍ pa̍a̍le̍ hāūle̍ŋ nde᷅ŋ mbo̍ mīŋgūl nda̍ māa̍, fo̍ndōle̍, le̍ nyɛ̄ Sɔ̍ɔ̄ to̍sa̍ a̍ nūm ndo̍.”

⁹ Mi̍ Dēēve̍ lō o̍ ko̍ŋ, mbo̍ dīmūl nda̍ āā, “I̍ me̍na̍ŋ, a̍ Mɛ̄lɛ̄ka̍ Ya̍a̍wɛ̄ɛ̄ po̍, Mɛ̄lɛ̄ka̍ cho̍ yōōmū mbo̍ chīīndīāā ya̍ ya̍a̍mɔ̍ɔ̍wa̍a̍ nīa̍a̍ o̍ bā wo̍, nya̍ bɛ̍ɛ̍ mɛ̄ɛ̍ mī di̍ī nya̍ mɛ̄ɛ̍ ya̍ I̍ di̍ī lāŋu̍nɔ̄ɔ̍ Si̍ki̍lāā chi̍e̍e̍ yɛ̍, o̍ chu̍u̍ ya̍ yōōŋgū pīɔ̍m Sɔ̍ɔ̄ wo̍ wo̍.

¹⁰ Bōōndi̍i̍ nda̍ dīī Sɔ̍ɔ̍l ve̍, mi̍ lāŋu̍nɔ̄ pīlɛ̍ mālnu᷄ŋ mbo̍ kūā a̍ yōōŋgū kōŋ nāa̍ ya̍ chu̍a̍ Si̍ki̍lāā chi̍e̍e̍. Ndu̍ o̍o̍ yi̍ya̍ŋ ko̍ bɛ̍ɛ̍ māā yōōŋgū kɛ̄ndɔ̄ɔ̍ pīla̍ ndu̍ o̍o̍ yo̍o̍ ya̍ ko̍ŋ ni̍. Kɛ̍ mɛ̄ɛ̍ o̍ chi̍i̍ ya̍ yōōŋgōo̍ ho̍ō dīmūl kpo̍u̍, mi̍ bi̍ī ndu̍ mi̍ di̍ī ni̍. Fāndā ya̍ I̍ fa̍nda̍ ndu̍ wo̍ wa̍ ko̍ŋ ni̍.

¹¹ Nāa̍ ya̍ I̍ di̍ī yɔ̄ ko̍ŋ, kɛ̄lɛ̄ŋgāā ni᷅ŋ te̍ nya̍ wānāā dɛ̍nɛ̍ wɔ̍ɔ̍ŋnda̍ ha̍ā, nya̍ bɛ̍ɛ̍ dīyɔ̄ɔ̍ ya̍ I̍ cho̍ nya̍ ni̍. Wāna̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍, ō wānu̍ŋ i̍hi̍ni̍ o̍ ndu̍lo̍ kpēlē dɛ̍, mi̍ lā kɔ̍ de᷅l ndu̍ chōo̍ mi̍ lā dīī ndu̍. Le̍la̍ŋ le̍ nyɛ̄ nya̍ tōsa̍ ko̍ŋ ndo̍, nya̍ bɛ̍ɛ̍ mɛ̄ɛ̍ mī lā chūa̍ pāāwā kōŋ, mī fa̍ŋa̍ nya̍ o̍ chi̍e̍ēŋndo̍ ho̍ō chōo̍ ba̍ū.”

¹² O̍ ko̍ŋ, mi̍ Dēēve̍ vi̍ām so̍vɛ̄i̍ya̍a̍ ndūa̍a̍ ma̍ kɔ̍ di̍ū nda̍. O̍ ko̍ŋ kɔ̍ɔ̍lī, ma̍ kīlī nda̍ pēlo̍ŋ a̍ bāla̍ŋ, ma̍ kɔ̍ lɛ̍ɛ̍ndūū dīāllūŋ ndāa̍ŋ o̍ yɔ̄mnde̍ o̍ mɛ̄ŋmā ībūŋga᷄ŋ Hi̍būlɔ̄ŋ i̍kɛ̍i̍. Ndu̍yɛ̍, ma̍ chūā bōlle̍ Īsībo̍si̍ɛ̍tī le̍ŋ, ma̍ kɔ̍ chɔ̄ le̍ŋ Hi̍būlɔ̄ŋ lo̍ŋ o̍ sɛ̄i̍ nda̍ chɔ̍ A̍bi̍nā wo̍ ni᷄ŋ.