Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 3 - Yāu̍ Mɛ̄lɛ̄ka̍a̍

¹ Mi̍ sɔ̍ŋgɔ̄ɔ̍ hīāū lāchī le̍ te̍le̍ŋ vi̍lɛ̄ī ku̍ndālā tīɔ̍ɔ̍ŋnda̍ŋ nda᷅ŋ tɛ̄ɛ̄ŋ, ku̍nda̍ Dēēvi̍o̍o̍ a̍ ku̍nda̍ yu̍ŋgu̍ Sɔ̍ɔ̄ wo̍. Kɛ̍ mi̍ ku̍nda̍ Dēēvi̍o̍o̍ hīāū lāchī a̍ kpāāyāa̍ sɔ̄lāa̍, mi̍ kpāāya̍ ku̍nda̍ yu̍ŋgu̍ Sɔ̍ɔ̄ wo̍ ndu̍ hi̍a̍ū lāchī a̍ dɔ̄ɔ̄na᷄ŋndo̍.

Pūa̍a̍ Dēēve̍ ve̍lū Hi̍būlɔ̄ŋ nda̍

² Bōōndi̍i̍ Dēēve̍ wa̍ Hi̍būlɔ̄ŋ nde̍, mbo̍ vīālū pūa̍a̍ lo̍ŋ a̍ ŋɔ̍mpu᷅m. Pūa̍a̍ ka̍ŋ nda̍ cho̍ ha̍ā ni̍. Po̍ ndɔ̍ tāso̍o̍ wa̍ A̍mi̍nɔ̄ŋ ni̍. Ndu̍ kāla̍ ndɔ̍ wa̍ Āhīno̍wām, chūā wāā Chɛ̍si̍lūɛ̄ɛ̄ ni̍.

³ Ō dīi̍ŋ ndɔ̄ɔ̍ dīōla̍ŋ āā Chi̍li̍a̍a̍bī. Ndu̍ ndu̍ kāla̍ ndɔ̍ wa̍ Ābi̍kēē ni̍, Na̍bāl, wānā wa̍ā Ka̍mɛ̄l chi̍e̍e̍ la̍nɔ̍ o̍ mɛ̍i̍yo̍. Po̍ ndɔ̄ ya̍a̍ ndɔ̄ɔ̍ dīōla̍ŋ āā A̍bi̍sa̍lɔ̄m. Ndu̍ kāla̍ ndɔ̍ wa̍ Ma̍a̍kāā ni̍, Māsāa̍ Ta̍māā o̍ wa̍ Kɛ̍sīɔ̄ɔ̄ wo̍ chūā ndɔ̄ɔ̍.

⁴ Po̍ ndɔ̄ hi̍ɔ̍ɔ̍lo̍o̍ dīōla̍ŋ āā Ādo̍ni̍chā. Ndu̍ kāla̍ ndɔ̍ wa̍ Hākīki̍tī ni̍. Ō ŋu̍ɛ̍ɛ̍no̍o̍ dīōla̍ŋ āā Sīɛ̄fa̍tīāā, ndu̍ kāla̍ ndɔ̍ dīōla̍ŋ āā Ābi̍tāā.

⁵ Ō ŋɔ᷄mpu᷅m ndo̍ dīōla̍ŋ āā I̍ti̍lūēm. Ndu̍ kāla̍ ndɔ̍ dīōla̍ŋ āā Ɛ̍ki̍lāā. Bo̍o̍ndi̍i̍ Dēēve̍ wa̍ Hi̍būlɔ̄ŋ nde̍ o̍ ve̍lū pūa̍a̍ ha̍ā kpo̍u̍ ni̍.

A̍bi̍nā hi̍o̍u̍nu᷄ŋ Dēēve̍ kɔ̄ɔ̄lī

⁶ O̍ ko̍ŋ kɔ̍ɔ̍lī, mi̍ sɔ̍ŋgɔ̄ɔ̍ wā hīōūwɔ̄ɔ̍ lāchī kɛ᷅ yu̍ŋgu̍ Dēēvi̍o̍o̍ tɛ̄ɛ̄ŋ, a̍ yu̍ŋgu̍ Sɔ̍ɔ̄ wo̍. Ndu̍yɛ̍ mi̍ A̍bi̍nā, wāna̍ wa̍ so̍vɛ̄i̍ya̍a̍ Sɔ̍ɔ̄ wa̍ bōlle̍ŋ ndo̍ ō tōsā mbo̍ sīmnu᷄ŋ wa᷅na̍ kpāāyā o̍ chīɛ̍i̍ Sɔ̍ɔ̄ wo̍ ni᷄ŋ.

⁷ Sɔ̍ɔ̄ ndu̍ o̍o̍ nɔ̍ la̍nɔ̍ pɔ̍mbɔ̄ pīlɛ̍, dīōla̍ŋ āā Lu̍i̍si̍pā, chu̍a̍ E̍yā wo̍. Mi̍ ī yɔ̄nu᷄ŋ mi̍ Īsībo̍si̍ɛ̍tī o̍ chi̍i̍kūū māā A̍bi̍nā cho̍ nda̍ chūa̍a̍ ho̍ō. Pāa̍le̍ pi᷅lɛ̍, mi̍ Īsībo̍si̍ɛ̍tī di̍mūl A̍bi̍nā āā, “A̍bi̍nā, a̍ to̍sa̍ sūɛ̍i̍ wɔ̍ɔ̍ŋ. Nūm o̍o̍ nɔ̍ ku̍e̍ē mī nūm o̍o̍ wa̍ a̍ la̍nɔ̍ɔ̍ fi̍nyā nūu̍ le̍.”

⁸ O̍ ko̍ŋ, mi̍ A̍bi̍nā o̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ Īsībo̍si̍ɛ̍tī, le̍ nyɛ̄ o̍ di̍mu̍l ndu̍ ko̍ŋ ndo̍. Mi̍ A̍bi̍nā di̍mūl ndu̍ āā, “Īsībo̍si̍ɛ̍tī, ā chē ya̍ ko̍ bɛ̍ɛ̍ āā tūŋndo̍ ya̍ I̍ cho̍ o̍ lɛ̄ŋndē Chu̍dāle̍ŋ ni᷄ŋ ni̍, I̍ si̍nā i̍kɛ̍ndɛ̄ le̍? Le̍ te̍le̍ŋ vi̍lɛ̄ī fi̍nyā nūm ni̍, yu̍ŋgu̍ ndɔ̄ɔ̍ ni̍, a̍ wānāya᷅ŋ ndɔ̄ɔ̍ŋ, a̍ chāāŋāā ndūa̍a̍ kpo̍u̍ I̍ cho̍ nya̍ dīīkɔ᷄ŋndo̍. I̍ chɛ̍l mī ma̍l nya̍ Dēēve̍ o̍ bā mbō yēm nya̍ le̍. Le̍ wānā la̍nɔ̍ɔ̍ ŋ̄ sīīŋgūū ya̍ wānā wɔ̍ɔ̍ŋ pāa̍le̍ hāūle̍ŋ nde᷅ŋ ni̍?

^9-10 Le̍ nyɛ̄ ŋ̄ to̍sa̍ ho̍ō a̍ ya̍ wo̍, I̍ me̍na̍ŋ o̍ Mɛ̄lɛ̄ka̍ po̍, mɛ̄ɛ̍ mī to̍sa̍ mī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l Dēēve̍ būŋgɛ̄i̍ yo̍ ō yɔ̄nu̍ŋ. Mi̍ Mɛ̄lɛ̄ka̍ chūēl Dēēve̍ būŋgɛ̄i̍ māā ō chō māsāle̍ŋ nde᷅ŋ sōlī o̍ fi̍nyā nūmndo̍ chi̍ɛ̍ī ni̍ŋ mbō ke̍ Dēēve̍, mī Dēēve̍ wa̍ māsāa̍ le̍ I̍sɔ̄lūɛ̄ī a̍ Chu̍dā kpo̍u̍, chɔ̍ŋ Da᷅ŋ chi̍e̍e̍ mbō kūɛ̄ Bɛ̄ɛ̄si̍ɛ̍bā. Ndu̍yɛ̍ mɛ̄ɛ̍ mī to̍sa̍ mī ī yɔ̄nu̍ŋ mɛ̄ɛ̍ Mɛ̄lɛ̄ka̍ dīmi̍ yɛ̍.”

¹¹ Mɛ̄ɛ̍ Īsībo̍si̍ɛ̍tī o̍ tu̍e̍ī nyɛ̄ A̍bi̍nā o̍ di̍mi̍ wo̍, mi̍ sīōōŋnde̍ bīī Īsībo̍si̍ɛ̍tī, ō nɔ̄la̍ mbō sōō ba̍kō le̍.

¹² O̍ ko̍ŋ kɔ̍ɔ̍lī, mi̍ A̍bi̍nā vi̍ām ki̍i̍la̍a̍ nāa̍ Dēēve̍ chu̍a̍ Hi̍būlɔ̄ŋ a̍ yōōŋgōo̍ ho̍ō, mbo̍ dīmūl Dēēve̍ āā, “I̍ si̍nā māā nu̍m nɔ̍ lɛ̄ŋnde̍ŋ nde᷅ŋ kpo̍u̍ ni̍. Tē a̍ chɛ̍l pɛ̍ mā to̍sa̍ chɛ̄la᷅ŋ kɔ̄l nyūlōo̍ a̍ ya̍, I̍ nɔ̍lā mī mu̍li̍ I̍sɔ̄lūɛ̍i̍ya̍ kpo̍u̍ ku̍mbū nūm ndo̍.”

¹³ Mi̍ Dēēve̍ lo᷅ o̍ ko̍ŋ mbo̍ dīmūl ndu̍ āā, “Ō na᷄ŋ le̍nde̍. Kɛ̍ ndu̍yɛ̍ nūm bɛ̍ɛ̍ mɛ̄ɛ̍ mā to̍sa̍ fɛ̍lɛ̍ŋ nyɛ᷅ ya̍ I̍ cho̍ nu̍m dīmūllo̍ mālāŋ ya̍ I̍ to̍sā chɛ᷅la᷅ŋ kɔ̄l nyūlōo̍ a̍ nu̍m. Tē a̍ ye̍e̍ma̍ pɛ̍ mī ŋ̄ bɔ̄ŋa̍ hɔ̄lla̍ na̍a̍ nu̍m mī to̍sa̍ chɛ̄la᷅ŋndo̍ a̍ nūm, mɛ̄ɛ̍ chu̍u̍ ya̍ fɛ̍lɛ̍ŋ Ma̍kāl la̍a̍ nī, chūa̍ Sɔ̍ɔ̄ wo̍.”

¹⁴ O̍ ko̍ŋ kɔ̍ɔ̍lī, mi̍ Dēēve̍ vi̍ām vɛ̄lɛ̄ ki̍i̍la̍a̍ nāa̍ Īsībo̍si̍ɛ̍tī, po̍ Sɔ̍ɔ̄ wo̍ chūā. Mbo̍ dīmūl ndu̍ āā, “Mi̍ŋgi̍ ya̍ Ma̍kāā o̍ bā, la̍a̍ nūu̍ o̍ cho̍ ni̍. Le̍ mī sɔ̍la̍ ndu̍ o̍ nɔ̄ɔ̍ ni᷄ŋ, Fīli̍i̍tīāŋnda̍ kɛ̄mɛ̄ ya̍ I̍ di̍ī ni̍, mi̍ hu᷅ŋ a̍ su̍ūndu̍lā ndāla̍ŋ o̍ Sɔ̍ɔ̄ fi̍nyā nūmndo̍, ma̍lāŋ o̍ ke᷅ ya̍ ndu̍.”

¹⁵ Ndu̍yɛ̍ Ma̍kāl wa̍ ni̍ŋ o̍ nɔ̄ɔ̍ po̍ pi᷅lɛ̍ o̍ bā dīōla̍ŋ āā Pa̍li̍tīɛ̄ɛ̄, po̍ La̍i̍sī wo̍. Kɛ̍ mi̍ Īsībo̍si̍ɛ̍tī vi̍ām pūa̍a̍ ndūa̍a̍ ma̍ kɔ̍ su̍ŋgū ndu̍ o̍ nɔ̄ ko̍ŋ, le̍ mbō mīŋgi̍ ndu̍ Dēēve̍ o̍ bā.

¹⁶ Mɛ̄ɛ̍ nda̍ wa̍ kɔ̄la̍ŋ a̍ ndu̍, mi̍ pɔ̍nɔ̍ ndɔ̄ ko̍ŋ tūāl nda̍ kɔ̄ɔ̄lī a̍ cha᷄ŋndo̍, mbo̍ lō kɔ̄la̍ŋ nda̍ kɔ̄ɔ̄lī a̍ cha᷄ŋndo̍ ha̍a̍a̍ ma̍ fūūlūū Ba̍hu̍lūīm. Mɛ̄ɛ̍ nda̍ fūūlu̍u̍ lo̍ŋ, mi̍ A̍bi̍nā di̍mūl ndu̍ āā, “Pōo̍ mi̍i̍ŋgu̍ o̍ nūm ndo̍.” Mi̍ pōo̍ mīīŋgū.

¹⁷ Mi̍ A̍bi̍nā ma̍lnu᷄ŋ mbo̍ kɔ̍ su̍ūki̍āŋ a̍ wāŋ bɛ̄ndūa̍a̍ I̍sɔ̄lūɛ̄ī. Mbo̍ dīmūl nda̍ āā, “I̍ si̍nā māā le̍ te̍le̍ŋ vi̍lɛ̄ī ni᷅ŋ, Dēēve̍ nya̍ a̍a̍ ye̍e̍ma̍ ni̍ mī ndu̍ o̍o̍ wa̍ nya̍ chōo̍ ma̍sāa̍.

¹⁸ Le̍la̍ŋ te̍le̍ŋndo̍ fu̍u̍lu̍u̍ ni᷅ŋ ho̍ō ni̍ le̍ mī lā tōsa̍ nyɛ̄ nya̍ yīya̍ŋndo̍. Lā lōōnu̍ŋ ndɔ̍ būŋgɛ̄ī Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l ndu̍ ve̍. Mi̍ Mɛ̄lɛ̄ka̍ dīmī āā, ‘O̍ sa̍bū bu̍ɛ̍ī nūu̍ Dēēvi̍o̍o̍ ni᷄ŋ ya̍ I̍ cho̍ wānāā nīa̍a̍ I̍sɔ̄lūɛ̍i̍ chīīndīāā Fīli̍i̍tīāŋnda̍ o̍ bā, ndu̍yɛ̍ a̍ ya̍a̍mɔ̍ɔ̍wa̍a̍ ndāa̍ kpo̍u̍ o̍ bā ni̍.’ ”

¹⁹ O̍ ko̍ŋ kɔ̍ɔ̍lī, mi̍ A̍bi̍nā su̍ūki̍āŋ vɛ̍lɛ̄ a̍ wānāa̍ fu̍la̍ o̍ yu̍ŋgu̍ Bɛ̍ŋnja̍mīŋndo̍ chōo̍ wa̍. Mɛ̄ɛ̍ o̍ chi̍i̍ sūūki̍āŋ le̍nde̍ a̍ nda̍ kpo̍u̍, mbo̍ mālnu᷄ŋ mbo̍ kūā Hi̍būlɔ̄ŋ chi̍e̍e̍ nāa̍ Dēēve̍ chu̍a̍, le̍ mbō kɔ̍ do̍o̍nu᷄ŋ ndu̍ ko̍na̍, nyɛ̄ a̍ nyɛ̄ wāŋnda̍ I̍sɔ̄lūɛ̄ī a̍ wāŋnda̍ o̍ yu̍ŋgu̍ Bɛ̍ŋnja̍mīŋndo̍ chōo̍ ā kɛ̄ɛ̄si̍a̍a̍ le̍ tōsāa̍.

²⁰ Mɛ̄ɛ̍ o̍ wa̍ kɔ̄la̍ŋ, mbo̍ kūā a̍ pūa̍a̍ ŋ̄wāŋ bi̍di̍i̍ŋ kɔ̄ɔ̄lī. Ndu̍yɛ̍ mɛ̄ɛ̍ nda̍ fūūlu̍u̍, mi̍ Dēēve̍ bi̍ī nda̍ nyɛ̄ kɛ̄ndɛ̍ī, mbo̍ vēēlū bɔ̍ŋa᷅ŋ dīāā nyɛ̄ dīa̍a̍ le̍ nda̍.

²¹ O̍ ko̍ŋ kɔ̍ɔ̍lī, mi̍ A̍bi̍nā di̍mūl Dēēve̍ āā, “Fāllo̍, I̍ ku̍ā wɔ̍ ni̍ko̍ sa̍kpō mī kɔ̍ hu᷅ŋ a̍ I̍sɔ̄lūɛ̍i̍ya̍ kpo̍u̍ na̍nu᷄ŋ, mā hu᷄ŋ yi̍ī kpe̍ma̍a̍ a̍ nūm. Nu᷄m cho̍ wā māsāa̍ lɛ̄ŋnde̍ŋ nde᷅ŋ kpo̍u̍ ni̍, lɛ̄ŋndē ŋ̄ yēēma̍ le᷅ŋ nde̍ŋ.” O̍ ko̍ŋ, mi̍ Dēēve̍ ma᷅l ndu̍ mbo̍ mīīŋgū le̍nde̍ yɛ̍lɛ̍kɛ̍lɛ̍ɛ̍, ō yɔ᷄ŋ ndu̍ nyɛ̄ o̍ nyɛ̄ le̍.

A̍ mɛ̄ɛ̍ Cho̍wa̍bī di̍ī A̍bi̍nā yɛ̍ o̍kɔ̄ɔ̄

²² Mɛ̄ɛ̍ te̍le̍ŋ ti̍ŋ hīo̍u̍, mi̍ Cho̍wa̍bī nda̍ so̍vɛ̄i̍ya̍a̍ Dēēvi̍a̍a̍ ā fūlā o̍ chūūwo̍ ma̍ hūŋ. Ndu̍yɛ̍ ma̍ hūŋ a̍ nyɛ̄m nda̍ kɔ̍ pu̍ŋgā ya̍a̍mɔ̍ɔ̍wa̍a̍ ndāa̍ o̍ bā wo̍ŋ ta̍u̍ ta̍u̍. Kɛ̍ ā kōma̍l lɛ̍ A̍bi̍nā Hi̍būlɔ̄ŋ chi̍e̍e̍ le̍, Dēēve̍ ndu̍ o̍o̍ ma̍l ndu̍ ni᷅ŋ mbo̍ kūānu᷄ŋ, nyɛ̄ ō nyɛ̄ ō yɔ̍ŋ ndu̍ le̍.

²³ Mɛ̄ɛ̍ Cho̍wa̍bī nda̍ so̍vɛ̄i̍ya̍a̍ o̍ ku̍ɛ̄ kɔ̄ɔ̄lī wa̍ ā fūūlu̍u̍ chi̍e̍e̍, mi̍ Cho̍wa̍bī tu̍ɛ̍ī, māā A̍bi̍nā, po̍ Nɛ̍ɛ̄ wo̍, ndu̍ o̍o̍ hi᷅ŋ nāa̍ Māsāa̍ Dēēve̍ chu̍a̍, kɛ̍ māā Māsāa̍ Dēēve̍ yɔ̍ŋ ndu̍ nyɛ̄ o̍ nyɛ̄ le̍, mbo̍ māl ndu̍ mbo̍ mīīŋgu᷄ŋ yɛ̍lɛ̍kɛ̍lɛ̍ɛ̍.

²⁴ O̍ ko̍ŋ, mi̍ Cho̍wa̍bī ma̍lnu᷄ŋ mbo̍ kōmāl Māsāa̍ Dēēve̍. Mbo̍ kɔ̍ di̍mūl ndu̍ āā, “Fāllo̍, ō yɛ̄ɛ̍nɛ̍ ŋ̄ tōsa̍ yɛ̄ ho̍ō? Vɛ᷅ mi̍ A̍bi̍nā hu᷅ŋ na̍nu᷄ŋ nāa̍ nūm chu̍a̍, ma̍ māl ndu̍ mbo̍ mīīŋgu᷄ŋ yɛ̍lɛ̍kɛ̍lɛ̍ɛ̍, a̍ yɔ̍ŋ ndu̍ nyɛ̄ o̍ nyɛ̄ le̍?

²⁵ Nūm pi̍la̍ si̍nā wāna̍ A̍bi̍nā o̍ cho̍ wo̍. A̍ si̍nā nu̍a̍ā māā hūīyo̍ ko̍ni̍ le̍ A̍bi̍nā o̍ hi᷅ŋ nu̍m te̍? Si̍na̍ pɛ̍ŋgu̍ māā mɛ̄ɛ̄nda᷄ŋndo̍ o̍ hi᷅ŋ nu̍a̍ā ni̍, le̍ mbō sīna̍ mɛ̄ɛ̍ kpɛ̍ kpāāya̍ nāa̍ ō chō yɛ̄, ndu̍yɛ̍ mbō sīna̍ vɛ̄lɛ̄ nyɛ̄ ŋ̄ chō chōo̍ wo̍.”

²⁶ Mi̍ Cho̍wa̍bī mu̍li᷄ŋ mbo̍ kūānu᷄ŋ. Mɛ̄ɛ̍ o̍ fa̍ŋa̍ŋ dɔ̍ɔ̍ Dēēve̍ o̍ hɔ̄l, mbo̍ vīām pūa̍a̍ le̍ mā kɔ̍ hu᷅ŋ a̍ A̍bi̍nā. A̍bi̍nā wa̍ŋnu̍ŋ ni᷅ŋ o̍ so̍o̍ŋ māmɛ̄ŋndo̍ Sɛ̍lūā pɔ̍ mi̍ pūa̍a̍ Cho̍wa̍bī ve᷅m nda̍ kūā ma̍ kɔ̍ bi̍ī ndu̍ ma̍ hūŋ a̍ ndu̍. Kɛ̍ Dēēve̍ si̍na̍ a̍ ndi̍ o̍kɔ̄ɔ̄ le̍.

²⁷ Mɛ̄ɛ̍ nda̍ mīīŋgu̍ a̍ ndu̍ Hi̍būlɔ̄ŋ, mi̍ Cho̍wa̍bī ve̍e̍lū ndu̍ o̍ lu̍mūi̍la̍ wa̍ o̍ dīō sāāsa̍ chi̍o̍o̍ sōndōo̍ vēllāa̍ vēllē la̍ŋ ō pīlɛ̍ ni᷄ŋ sɔ̍ɔ̍ sɔ̍ɔ̍, mbo̍ tōsā mɛ̄ɛ̍ wānā wa᷅ wa̍nā i̍sɔ̍ɔ̍ di̍mūl. O̍ ko̍ŋ kɔ̍ɔ̍lī mbo̍ chūkū A̍bi̍nā dēmbōo̍ a̍ mūɛ̍i̍ mi̍ A̍bi̍nā de᷅l mbo̍ wū, fo̍ndōle̍ le̍ mɛ̄ɛ̍ A̍bi̍nā o̍ di̍ī A̍sa̍hɛ̄l pɔ̄mbɔ̄ɔ̍ ndu̍ Cho̍wa̍bī yɛ̍.

²⁸ Mɛ̄ɛ̍ te̍le̍ŋ ti̍ŋ hīōū mi̍ Dēēve̍ tūɛ̄ī a̍ pīɔ̍m A̍bi̍nā wo̍ o̍kɔ̄ɔ̍, mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ si̍nā māā ya̍ ni̍, a̍ māsāle̍ nīle̍ŋ kpo̍u̍, māā fɛ̍ɛ̍ŋ a̍ fɛ̍ɛ̍ŋ tɔ̍ɔ̍ya̍ŋ o̍ tɔ̍ɔ̍ya̍ŋ o̍ cho̍ na̍a̍ chōo̍ le̍ pīɔ̍m A̍bi̍nā, po̍ Nɛ̍ɛ̄ wo̍ le̍.

²⁹ Cho̍wa̍bī nda̍ yu̍ŋgu̍ ndɔ̄ɔ̍, nda̍ tɔ̍ɔ̍ya̍ŋ pīɔ̍m A̍bi̍nā wo̍ ō chō chōo̍ ni̍. Ndu̍yɛ̍ mbɔ̄ māā Mɛ̄lɛ̄ka̍ tūsi̍ nda̍ nyɛ̄ pālāa̍ bɛ̄ndōo̍ chōo̍ fɔ̍. Mbɔ̄ māā fɛ̍ɛ̍ŋ a̍ fɛ̍ɛ̍ŋ chīīyo̍ o̍ lɛ̄mbɔ̄ɔ̍ ni᷄ŋ chu̍ū o̍ yu̍ŋgu̍ ndāa̍ chōo̍ le̍ fɔ̍. Mbɔ̄ māā nāā wɔ̄ɔ̍ŋ bɛ̄ndu̍ wa᷅ wa᷅ŋnda̍ lēkɔ̄ɔ̍ wo̍ ō wa̍ o̍ yu̍ŋgu̍ ndāa̍ chōo̍ fɔ̍. Mbɔ̄ māā fɛ̍ɛ̍ŋ a̍ fɛ̍ɛ̍ŋ nāmtāa̍ chu̍ū nda̍ tɛ̄ɛ̄ŋ te̍ fɔ̍. Tē ā kūɛ̄ o̍ chɔ̄ū o̍ chɔ̄ū pɛ̍, ā lo̍ o̍ chɔ̄ū kōŋ ni᷄ŋ fɔ̍. Fo̍fo̍la̍ bɛ̍ndōo̍ de̍l o̍ yu̍ŋgu̍ ko̍ŋ chōo̍ fɔ̍.”

³⁰ Mɛ̄ɛ̍ nu̍a̍ā Cho̍wa̍bī nda̍ Ābi̍sīāā pɔ̍mbɔ̄ ndɔ̄ a̍ mi̍ŋgūl A̍bi̍nā māa̍ ni̍, ndu̍ bɛ̍ɛ̍ ma̍ dīī ndu̍, kāni̍ fo̍ndōle̍ le̍ mɛ̄ɛ̍ o̍ di̍ī A̍sa̍hɛ̄l pɔ̍mbɔ̄ nda̍ o̍ chɔ̄ūwo̍ Ki̍bīɔ̄ŋ yɛ̍.

Ā nda̍ chɔ̍ A̍bi̍nā yɛ̍ o̍kɔ̄ɔ̄

³¹ Mi̍ Dēēve̍ lō o̍ ko̍ŋ mbo̍ dīmūl Cho̍wa̍bī a̍ pūa̍a̍ wa̍ Cho̍wa̍bī kɔ̄ɔ̄lī wa̍ kpo̍u̍ āā, “Wānā o̍ wānā lā sɛ̄ɛ̄si̍a̍ŋ nyɛ᷅la̍ŋ lēkɔ̄ɔ̍, o̍ ko̍ŋ kɔ̍ɔ̍lī, mī wānā o̍ wānā wo̍u̍nu̍ŋ nyɛ᷅lā lābɛ̍kīla̍ŋ mī lā wa̍ kɔ̄la̍ŋ a̍ cha᷄ŋ īmɔ̍nɔ̍ɔ̍ A̍bi̍nā lāchī.” O̍ ko̍ŋ kɔ̍ɔ̍lī mɛ̄ɛ̍ nda̍ wa̍ kɔ̄la̍ŋ a̍ A̍bi̍nā le̍ ndu̍ kɔ̄la̍ŋ chɔ̄ɔ̍, mi̍ Dēēve̍ pi̍la̍ si᷅m wānāa̍ wa̍ kɔ̄la̍ŋ a̍ sa̍ŋga̍a̍ wa̍ kɔ̄ɔ̄lī.

³² Ma̍ chɔ̄ A̍bi̍nā Hi̍būlɔ̄ŋ chi̍e̍e̍. Mɛ̄ɛ̍ nda̍ chīi̍ ndu̍ chɔ̄ kpo̍u̍, mi̍ Dēēve̍ o̍ ko̍ŋūl kpe̍le̍ŋ o̍ sɛ̄īyo̍ chōo̍. Wānā o̍ wāna̍ wa̍ lo̍ŋ, nda̍ kpo̍u̍ ma̍ chāŋ.

³³ Mi̍ Māsāa̍ Dēēve̍ lō o̍ ko̍ŋ, mbo̍ sōlī chōndi̍i̍ bīīsi̍e̍i̍ he̍ī le̍ A̍bi̍nā, mbo̍ dīmī āā, “Ōo̍ A̍bi̍nā, vɛ᷅ ma̍ sɔ̄lā pīɔ̍mndo̍ māā dīɔ̄m?

³⁴ A̍ tɛ̍ɛ̍mbu̍u̍ yɛ̍ īsɔ̄ɔ̍ mā yīi̍ nu̍m lābā le̍. Ā dōu̍ yɛ̍ nu̍m ŋ̍yɔ̄lɔ̍ o̍ ŋ̄pēlū le̍ nu̍m lākɔ̄ dīyɔ̄ɔ̄ le̍. Ma̍ sɔ̄lā pīɔ̍mndo̍ mɛ̄ɛ̍ wānāā dɛ̍nɛ̍ wɔ̍ɔ̍ŋnda̍ ā dēl nu̍a̍ā wāŋndo̍ chōo̍ mā dīī ndu̍ yɛ̍.” Mɛ̄ɛ̍ Dēēve̍ dīmi̍ dīōmnda̍ŋ nda᷅ŋ, mi̍ wānā o̍ wānā ka̍ndū vɛ̄lɛ̄ cha᷄ŋndo̍.

³⁵ Nda̍ kpo̍u̍ ma̍ kūā nāa̍ Dēēve̍ chu̍a̍, ma̍ kɔ̍ nyɔ̍ɔ̍lū ndu̍ le̍ mbō dē nyɛ̄ dīa̍a̍, kɛ̍ mi̍ Dēēve̍ kɛ̍ɛ̄. Mi̍ Dēēve̍ me̍na̍ŋ po̍, mbo̍ dīmī āā, “Pāa̍le̍ŋ lē dēl le̍nde̍, tē I̍ wo̍u̍nu̍ŋ nyɛ᷅ o̍ nyɛ̄ dīāā o̍ sōndō pɛ̍, Mɛ̄lɛ̄ka̍ tūsi̍ ya̍ nyɛ̄ pālāā bɛ̄ndōo̍ chōo̍.”

³⁶ Mɛ̄ɛ̍ wānā o̍ wānā che᷅ nyɛ̄ Dēēve̍ to̍sa̍ wo̍, ma̍ nāŋ kɔ̄l. Nyɛ̄ o̍ nyɛ̄ Māsāa̍ Dēēve̍ to̍sa̍ o̍ dɛ̍nɛ̍la̍ A̍bi̍nā la̍ŋ chōo̍ mi̍ nyɔ̄ɔ̍ hɛ̄na᷄ŋ wa᷅ŋnda̍ ta̍u̍.

³⁷ Wānā o̍ wāna̍ wa̍ Dēēve̍ kɔ̄ɔ̄lī, o̍ ko̍ŋ kɔ̍ɔ̍lī, a̍ I̍sɔ̄lūɛ̍i̍ya̍a̍ tu̍a̍a̍ kpo̍u̍, ma̍ sīnā pāa̍le̍ le̍ŋ māā Dēēve̍ bāla̍ ndɔ̄la̍ ve̍ o̍ pīɔ̍m A̍bi̍nā wo̍ ni᷄ŋ te̍.

³⁸ Mi̍ Māsāa̍ Dēēve̍ lō o̍ ko̍ŋ mbo̍ dīmūl pūa̍a̍ ndūa̍a̍ āā, “Lā si̍nā nu̍a̍ā māā māsa̍ tɔ̍ɔ̍ bɛ̍ndōo̍ pīla̍ le̍ o̍ vi᷅ wūo̍o̍ ho̍ō wa̍a̍li̍o̍ō I̍sɔ̄lūɛ̄ī le̍?

³⁹ Mi̍ chē bɛ̍ɛ̍ mi̍ Mɛ̄lɛ̄ka̍ hɛ̄lī ya̍ le̍ mī wa̍ māsāa̍ I̍sɔ̄lūɛ̄ī, kɛ̍ dīāllo̍ŋ vī ya̍ pāa̍le̍ hāūle᷅ŋ pɛ̍. Pūa̍a̍ Sɛ̄lu̍i̍yā wa̍ ha̍ā ā hīōū ya̍. Kɛ̍ ndu̍yɛ̍ ma̍ tōsā he̍ī, nu̍a̍ā Mɛ̄lɛ̄ka̍ Ya̍a̍wɛ̄ɛ̄ o̍ tu̍sī nda̍ nyɛ̄ pālāā bɛ̄ndōo̍ chōo̍ fɔ̍.”