Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 2 - Yāu̍ Mɛ̄lɛ̄ka̍a̍

Ā sīīŋgu̍u̍ Dēēve̍ māsā bɛ̍ndōo̍ lē lɛ̄ŋndē Chu̍dāle̍ŋ

¹ O̍ ko̍ŋ kɔ̍ɔ̍lī, mi̍ Dēēve̍ nyu̍nā Mɛ̄lɛ̄ka̍ Ya̍a̍wɛ̄ɛ̍ dīōm āā, “Bāā I̍ kɔ̍ o̍ chi̍o̍o̍ ō pīlɛ̍ Chu̍dā mī kɔ̍ cha᷅l lo̍ŋ?” Mi̍ Mɛ̄lɛ̄ka̍ Ya̍a̍wɛ̄ɛ̄ chɛ᷅l āā, “E̍ī, kɔ̍.” Mi̍ Dēēve̍ lo᷅ o̍ ko̍ŋ mbo̍ nyūnā ndu̍ āā, “Chi̍e̍e̍ kūɛ̍ɛ̍nɛ̍ ya̍ I̍ kɔ̍ yɛ̍?” Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Kɔ̍ mā kɔ̍ cha᷅l Hi̍būlɔ̄ŋ”

² O̍ ko̍ŋ, mi̍ Dēēve̍ chu̍ā lāāndāā ndūāā ŋi̍ɔ̍ɔ̍ŋnda̍, nda̍ yɔ̍nūŋ ni̍ māā Āhīno̍wām chūā wāā Chɛ̍si̍lūɛ̄ɛ̄, a̍ Ābi̍kēē, la̍nɔ̍ Na̍bāl o̍ mɛ̍i̍yo̍, wānā wa̍ā Ka̍mɛ̄l,

³ ndu̍yɛ̍, a̍ pūa̍a̍ ndūa̍a̍, a̍ yu̍ŋgu̍la̍ ndāla̍ŋ kpo̍u̍ ma̍ kūā Hi̍būlɔ̄ŋ chi̍e̍e̍ ma̍ kɔ̍ cha᷅l lo̍ŋ.

⁴ O̍ ko̍ŋ kɔ̍ɔ̍lī, mi̍ wāŋnda̍ Chu̍dā a̍ ma̍lnu᷄ŋ ma̍ kūā Hi̍būlɔ̄ŋ, nāa̍ Dēēve̍ o̍ wa̍ wa̍. Ma̍ kɔ̍ ta̍la̍ ndu̍ chūɛ̄īya̍ŋ o̍ lēbōl le̍ mbō sīmnu᷄ŋ ma̍sāa̍ le̍ būŋgɛ̄ī Chu̍dāve̍ kpo̍u̍. Te̍le̍ŋ ti̍ŋ hīōūwɔ̄ɔ̍, mi̍ Dēēve̍ tu̍ɛ̍ī māā wāŋnda̍ Cha̍bɛ̍sī Ki̍i̍li̍a̍dī nda̍ kɔ̍ chu̍ā dīāllu᷄ŋ Sɔ̍ɔ̄ wo̍ŋ ni̍ ma̍ kɔ̍ chɔ᷅ mu̍ŋ.

⁵ O̍ ko̍ŋ, mi̍ Dēēve̍ yɔ̄ŋ ki̍i̍la̍a̍ ndūa̍a̍ nāa̍ pūa̍a̍ Cha̍bɛ̍sī Ki̍i̍li̍a̍dī chūā a̍ yōōŋgōo̍, mbo̍ dīmūl nda̍ āā, “Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ nya̍ sa̍lā fɔ̍, fo̍ndōle̍, le̍ mɛ̄ɛ̍ nya̍ hīōū lāchī a̍ māsānɔ̍ nyāa̍ Sɔ̍ɔ̄ dīīkɔ᷄ŋndo̍, mi̍ lā kɔ̍ chu̍ā dīāllūŋ ndɔ̄ɔ̍ŋ mi̍ lā hu᷄ŋ chɔ᷅ mu̍ŋ yɛ̍.

⁶ Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ wa̍ wa̍nā kɛ̍ndɛ̄ nāa̍ nya̍ chūā, ndu̍yɛ̍ mbō lo̍ o̍ lēdīōm a̍ nya̍ fɔ̍. Ndu̍yɛ̍ le̍ nyɛ̄ nya̍ tōsa̍ ho̍ō wo̍, I̍ cho̍ nya̍ kɛ̄ndɛ̄ī ke̍ŋ mīŋgūl.

⁷ Le̍la̍ŋ lā sīmu̍l kɔ᷅lta̍ŋ ndu̍yɛ̍ mī lā wa̍ wānāā dīāllūŋ kālā. Māsānɔ̍ nyāa̍ Sɔ̍ɔ̄ o̍ vi᷅, ya̍ wāŋnda̍ Chu̍dā a̍ si̍i̍ŋgu̍u̍ ni᷅ŋ māsāa̍ nda̍ chōo̍ kpo̍u̍ ni̍.”

Ā sīīŋgu̍u̍ Īsībo̍si̍ɛ̍tī māsāa̍ le̍ I̍sɔ̄lūɛ̄ī

⁸ Bōōndi̍i̍ Sɔ̍ɔ̄ wa̍ yōōmū ve̍, A̍bi̍nā, po̍ Nɛ̍ɛ̄ wo̍, ndu̍ wa̍ so̍vɛ̄i̍ya̍a̍ Sɔ̍ɔ̄ wa̍ bōlle̍ŋ ni̍. Kɛ̍ mi̍ ndu̍ hi̍a̍lu᷄ŋ Fīli̍i̍tīāŋnda̍ o̍ chɔ̄ūwo̍ mbo̍ nyāānu᷄ŋ. Mbo̍ chūā Īsībo̍si̍ɛ̍tī, po̍ Sɔ̍ɔ̄ wo̍ ma̍ tāŋnu᷄ŋ Chɔ̍ɔ̍dāŋ le̍e̍lōo̍, ma̍ kɔ̍ cha᷅l Ma̍ha̍nēm chi̍e̍e̍.

⁹ O̍ ko̍ŋ kɔ̍ɔ̍lī, mi̍ A̍bi̍nā ko̍ŋ ō sīīŋgūū Īsībo̍si̍ɛ̍tī māsāa̍ le̍ būŋga᷄ŋ mu᷅ŋ, mu̍ŋ yɔ̍nūŋ ni̍ māā Ki̍i̍li̍a̍dī, a̍ A̍sīɛ̄ɛ̄, a̍ Chɛ̍si̍lūɛ̄ɛ̄, a̍ E̍fi̍lūēm, a̍ Bɛ̍ŋnja̍mīŋ.

¹⁰ Īsībo̍si̍ɛ̍tī o̍ wa̍ wɔ̄sīla̍ŋ be̍le̍-hi̍ɔ̍ɔ̍lu̍ (40) ma̍ sīīŋgūū ndu̍ Māsāa̍ I̍sɔ̄lūɛ̄ī. Ndu̍yɛ̍ mbo̍ tōsā māsāle̍ŋ I̍sɔ̄lūɛ̄ī le̍ wɔ̄sīla̍ŋ lā tīɔ̍ɔ̍ŋ. Kɛ̍ būŋgɛ̄ī Chu̍dāve̍ ndi̍ ki̍nɛ̍i̍, mi̍ nda̍ hīāūnu᷄ŋ Dēēve̍ kɔ̄ɔ̄lī.

¹¹ Ndu̍yɛ̍ Hi̍būlɔ̄ŋ chi̍e̍e̍ Dēēve̍ wa̍ īchāli̍ ni̍. Ō tōsa̍ māsāle̍ŋ Chu̍dā le̍ wɔ̄sīla̍ŋ lā ŋɔ᷄mmɛ̍ū a̍ pāŋgo̍ŋ ŋ̄ ŋɔ᷄mpu᷅m.

Sɔ̍ŋgɔ̍ yɔ̍nu̍ŋ wa᷅ŋnda̍ I̍sɔ̄lūɛ̄ī tɛ̍ɛ̄ŋ a̍ wāŋnda̍ o̍ būŋgɛ̄ī Chu̍dāve̍ ni᷄ŋ ndo̍

¹² Ō wa̍ a̍ te̍le̍ŋ pi᷅lɛ̍, mi̍ A̍bi̍nā po̍ Nɛ̍ɛ̄ wo̍, o̍ wa̍ so̍vɛ̄i̍ya̍a̍ Sɔ̍ɔ̄ wa̍ bōlle̍ŋ ndo̍ ō chu̍ā so̍vɛ̄i̍ya̍a̍ Īsībo̍si̍ɛ̍tī wa̍, ndu̍ yɔ̍nūŋ māā po̍ Sɔ̍ɔ̄ wo̍ ni̍, ma̍ cha᷄ŋ nāa̍ nda̍ wa̍ īchāli̍ Ma̍ha̍nēm nda̍ ma̍ kūā Ki̍bīɔ̄ŋ.

¹³ O̍ ko̍ŋ kɔ̍ɔ̍lī, mi̍ Cho̍wa̍bī, po̍ Sɛ̄lu̍i̍yā wo̍ ndu̍ chu̍ā vɛ̄lɛ̄ so̍vɛ̄i̍ya̍a̍ Dēēvi̍a̍a̍ ma̍ bɔ̄ɔ̄ŋi̍āŋ Ki̍bīɔ̄ŋ o̍ mɛ̄ŋmā ībūŋga᷄ŋ īkɛ̄i̍. Ma̍ chāl o̍ mɛ̄ŋmā ībūŋgā mā māŋ vēlāa̍ vēllē, mɛ̄ɛ̍ ha̍ā cha᷄l ba̍ā mi̍ ha̍ā chāl ba̍ā.

¹⁴ Mi̍ A̍bi̍nā lo᷅ o̍ ko̍ŋ mbo̍ dīmūl Cho̍wa̍bī āā, “Nūm hɛ̍li̍ pu̍a̍a̍ nu̍m nda̍ ā ti᷄ŋ mī ya̍ I̍ hɛ̍li̍ vɛ̄lɛ̄ a̍ ni̍a̍a̍ ā ti᷄ŋ mā chɛ᷄ŋ mā sɔ̄ŋga̍, mī ŋ̄ chē wānāā nda̍ chō yōmɔ̄ɔ̄ wa̍.” Mi̍ Cho̍wa̍bī di̍mī āā, “Bālā tīɔ̍ɔ̍ŋ I̍ chɛ̍l, ā chɔ̍ŋ ā sɔ̄ŋga̍.”

¹⁵ O̍ ko̍ŋ, mi̍ ku̍ndā o̍ ku̍ndā hɛ̄lī pūa̍a̍ nda̍ tɛ̄ɛ̄ŋ. Mi̍ ku̍nda̍ Īsībo̍si̍ɛ̍tī wo̍ hɛ̄lī pūa̍a̍ ŋ̄wāŋ tɔ̍ a̍ ā ŋīɔ̍ɔ̍ŋ, fūlāa̍ o̍ yu̍ŋgu̍ Bɛ̍ŋnja̍mīŋ chōo̍. Mi̍ ku̍nda̍ Dēēvi̍o̍o̍ nda̍ hɛ̄lī vɛ̄lɛ̄ pūa̍a̍ tɔ̍ a̍ ā ŋīɔ̍ɔ̍ŋ. Mi̍ ku̍ndālā sālā tīɔ̍ɔ̍ŋnda̍ŋ ndāŋ lā sa̍āŋ sɔ̍ŋgɔ̄ɔ̍ vēllāa̍ vēllē.

¹⁶ Kɛ̍ nda̍ kpo̍u̍, mi̍ wānā o̍ wānā sa̍ā chāa̍ŋ ndɔ̍ nda̍ wa̍ sɔ̍ŋgɔ̄ɔ̍ wo̍ yīīŋnde̍ o̍ lēbōl vēllāa̍ o̍ vēllē, mbo̍ chūkū ndu̍ a̍ mūɛ̍i̍, ma̍ dīūwa᷅ŋ. Nyɛ̄ ko̍ŋ to̍sa̍ ni̍ ma̍ kē fo̍ndāŋ kōŋ dīōla̍ŋ āā, Hɛ̄līkāā-Ha̍su̍lūīm.

¹⁷ O̍ ko̍ŋ kɔ̍ɔ̍lī, mi̍ sɔ̍ŋgɔ̄ɔ̍ kīōlū nda̍ ni̍ko̍ tɛ̄ɛ̄ŋ pāa̍le̍ le̍ŋ lo̍ŋ mbo̍ tūūlū tūūlo̍o̍ pīla̍. Kɛ̍ mi̍ ku̍nda̍ Dēēvi̍o̍o̍ yām A̍bi̍nā nda̍ pūa̍a̍ I̍sɔ̄lūɛ̍i̍ya̍a̍ tu̍a̍a̍ wa̍ lo̍ŋ nda̍.

¹⁸ Ndu̍yɛ̍ Cho̍wa̍bī kāla̍ ndɔ̍ wa̍ Sɛ̄lu̍i̍yā ni̍. Sɛ̄lu̍i̍yā ko̍ŋ ndu̍ ko̍ni̍ ndu̍ o̍o̍ ve̍lū Ābi̍sīāā, nda̍ A̍sa̍hɛ̄l ni̍. Ndu̍yɛ̍ pūa̍a̍ ndūa̍a̍ ha̍ā, nda̍ ya̍a̍ kpo̍u̍ ā wa̍ o̍ sɔ̍ŋgɔ̄ɔ̍ ho̍ō ni᷄ŋ. A̍sa̍hɛ̄l yɛ̍ nyāānɔ᷄ŋndo̍ pi̍la̍ ndu̍ ndu̍ o̍o̍ nya̍a̍nūŋ ni̍ māā kīa̍l.

¹⁹ O̍ ko̍ŋ, mi̍ A̍sa̍hɛ̄l ti̍sā A̍bi̍nā tōūwɔ̄ɔ̍. Mɛ̄ɛ̍ o̍ wa̍ ndu̍ tōūwɔ̄ɔ̍, ndu̍ su̍e̍e̍ hɔ̄lte̍ŋ lē wa̍ ndu̍ kɔ̄ɔ̄lī ni̍, ō ve̍ to̍fā bā o̍ bā le̍.

²⁰ O̍ ko̍ŋ, mi̍ A̍bi̍nā mu̍li᷄ŋ mbo̍ dīmūl ndu̍ āā, “A̍sa̍hɛ̄l, nu᷄m cho̍ ya̍ kīlta̍ŋ kɔ̄ɔ̄lī ni̍?” Mi̍ A̍sa̍hɛ̄l chɛ᷅l āā, “E̍ī, ya̍ ni̍.”

²¹ Mi̍ A̍bi̍nā di̍mūl ndu̍ āā, “Fa̍ŋa̍ŋ ya̍ kɔ̄ɔ̄lī. Tē so̍vɛ̄i̍nɔ̍ chēle̍ŋ ni̍ ā tōl ndu̍ kɔ̄ɔ̄lī, tē a̍ bīī ndu̍ pɛ̍ a̍ pu̍u̍ nyɛ̄m ndɔ̄ɔ̍ŋ chɔ̄ūwo̍ŋ.” Kɛ̍ A̍sa̍hɛ̄l chɛ̍l mbō fāŋa̍ŋ ndu̍ kɔ̄ɔ̄lī le̍.

²² Mɛ̄ɛ̍ nda̍ kūɛ̄ vɛ̄lɛ̄ kpɛ̍ɛ̍, mi̍ A̍bi̍nā mu̍li᷄ŋ mbo̍ dīmūl ndu̍ āā, “A̍sa̍hɛ̄l, fa̍ŋa̍ŋ ya̍ kɔ̄ɔ̄lī, I̍ ye̍e̍ma̍ mī di̍ī nu̍m te̍. Kāni̍ fo̍ndōle̍, I̍ ye̍e̍ma̍ mī si̍mu̍l Cho̍wa̍bī bɛ̍ nūm te̍.”

²³ Kɛ̍ A̍sa̍hɛ̄l chɛ̍l mbō fāŋa̍ŋ ndu̍ kɔ̄ɔ̄lī le̍. O̍ ko̍ŋ, mi̍ A̍bi̍nā mu̍lī ba̍l tu᷅mndo̍ mbo̍ vīā ndu̍ a̍ ndu̍, mi̍ ba̍llo̍ kɔ̍ fu̍lā ndu̍ o̍ kɔ̄ɔ̄, mbo̍ dēl mbo̍ wū. Mɛ̄ɛ̍ pūa̍a̍ Dēēvi̍a̍a̍ fūūlu̍u̍ nāa̍ A̍sa̍hɛ̄l o̍ wa̍ īhīni̍ o̍ vi̍lɛ̍i̍yo̍ wa̍, nda̍ kpo̍u̍ ma̍ sīm lo̍ŋ.

²⁴ Kɛ̍ mi̍ Cho̍wa̍bī nda̍ Ābi̍sīāā a̍ hi̍a̍ū lāchī a̍ A̍bi̍na̍ kīlta̍ŋ kɔ̄ɔ̄lī. Ā lo̍ ndu̍ tōūwɔ̄ɔ̍ ha̍a̍a̍ ma̍ fūūlūū a̍ ndu̍ o̍ Pēmbīī A̍māāve̍, kūmbū Ki̍a̍ā wo̍, le̍ kɔ̄la̍ŋ o̍ nɛ̄i̍ ku̍ɛ̄ o̍ po̍llo̍ Ki̍bīɔ̄ŋ ndo̍. Fūūlūū ndāa̍ lo̍ŋ, pāa̍le̍ŋ lē wa̍ ni᷅ŋ le̍ dēlɔ̄ɔ̍.

²⁵ O̍ ko̍ŋ kɔ̍ɔ̍lī, mi̍ pūa̍a̍ ku̍ndāa̍ Īsībo̍si̍ɛ̍tī wa̍, a̍ fu̍la̍ o̍ yu̍ŋgu̍ Bɛ̍ŋnja̍mīŋ ndo̍ chōo̍ wa̍ ā chūūŋgi̍āŋ vɛ̍lɛ̄ A̍bi̍nā kɔ̄ɔ̄lī, ma̍ kɔ̍ di̍i̍ŋ Pēmbēi̍ chōo̍.

²⁶ Mi̍ A̍bi̍nā ve̍e̍lū Cho̍wa̍bī chōo̍ cho̍o̍, mbo̍ dīmūl ndu̍ āā, “Cho̍wa̍bī, bāā dīūwa᷅ŋndo̍ ko̍ni̍ na̍a̍ ŋ̄ lō ni̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍? A̍ si̍nā nu̍a̍ā māā tē ŋ̄ lo̍ dīūwa᷅ŋndo̍ ho̍ō pɛ̍, mɛ̄ɛ̄lu̍la̍ŋ kpɔ̍ŋ, ī chō lēwɔ̄ū a̍ na̍a̍ le̍? A̍ si̍nā nu̍a̍ā māā na̍a̍ nya̍ā wānāā pi᷄lla̍ le̍ na̍a̍ ŋ̄ chō le̍? A̍ di̍mūl ni᷅ŋ pūa̍a̍ nu̍m nda̍ mā fāŋa̍ŋ na̍a̍ kɔ̄ɔ̄lī le̍?”

²⁷ Mi̍ Cho̍wa̍bī lō o̍ ko̍ŋ mbo̍ dīmūl ndu̍ āā, “A̍bi̍nā, I̍ me̍na̍ŋ o̍ Mɛ̄lɛ̄ka̍ cho̍ yōōmū wo̍ po̍, tē nūm o̍o̍ su̍u̍ le̍, pūa̍a̍ nīa̍a̍ ā wa̍ lō nya̍ tōūwɔ̄ɔ̍ ha̍a̍a̍ mī pāa̍le̍ŋ lē sɛ̄ sīɔ̄dīi̍”

²⁸ O̍ ko̍ŋ, mi̍ Cho̍wa̍bī hɔ᷅ŋ bu̍lu̍ chɔ̄ūwo̍ le̍ pūa̍a̍ ndūa̍a̍ dīmūllo̍ māā chɔ̄ūwo̍ chūū. Ndu̍yɛ̍ mɛ̄ɛ̍ nda̍ tūēī ndɔ̍ɔ̍ bu̍lu̍ ko̍ŋ, ma̍ fāŋa᷄ŋ I̍sɔ̄lūɛ̍i̍ya̍ kɔ̄ɔ̄lī, mi̍ chɔ̄ūwo̍ mɛ̄ɛ̄lū.

²⁹ O̍ ko̍ŋ kɔ̍ɔ̍lī, mi̍ A̍bi̍nā nda̍ pūa̍a̍ ndūa̍a̍ ā mālnu᷄ŋ ma̍ bīī mīīŋgōo̍. Ma̍ lō kɔ̄la̍ŋ īchɔ̄l kōŋ o̍ lɛ̄ŋndē dɛ̍ŋgbɛ̍le̍ ho̍lnu̍ŋ Chɔ̍ɔ̍dāŋ nda̍ŋ nde̍ŋ ni᷄ŋ ha̍a̍a̍ mi̍ pāa̍le̍ŋ lē sīā. Ma̍ kɔ̍ ta᷅ŋ Pīo̍o̍ Chɔ̍ɔ̍dāŋ, ma̍ yāāŋgāā vɛ̄lɛ̄ kɔ̄la̍ŋ īdīi̍ kōŋ kpe̍e̍ ma̍lāŋ nda̍ fūūlūū Ma̍ha̍nēm nāa̍ nda̍ chɛ᷄ŋ nda̍.

³⁰ Cho̍wa̍bī bɛ̍ɛ̍ nda̍ pūa̍a̍ ndūa̍a̍ ma̍ kūānu᷄ŋ. Mi̍ Cho̍wa̍bī chūūŋgīāā pūa̍a̍ Dēēvi̍a̍a̍, ā o̍ ku̍ɛ̄ o̍ sɔ̍ŋgɔ̄ɔ̍ wa̍ kpo̍u̍ na̍a̍ pi᷅lɛ̍. O̍ ko̍ŋ, mbo̍ sāālu᷄ŋ māā ō fūla̍ o̍ A̍sa̍hɛ̄l kɔ̍ɔ̍lī, pūa̍a̍ ŋ̄wāŋ tɔ̍ a̍ wānāā ŋɔ̄ma̍hīɔ̍ɔ̍lu̍ nda̍ lo̍ o̍ chɔ̄ūwo̍ ni̍.

³¹ Kɛ̍ mi̍ pūa̍a̍ Dēēvi̍a̍a̍ nda̍ dīī pūa̍a̍ A̍bi̍nā wa̍, a̍ fu̍la̍ o̍ yu̍ŋgu̍ Bɛ̍ŋnja̍mīŋ ndo̍ chōo̍ wa̍, kɛ̄mɔ̄ɔ̍ lē yāa̍ a̍ ŋ̄wāŋ be̍le̍ ŋɔ᷄mpu᷅m (360).

³² O̍ ko̍ŋ kɔ̍ɔ̍lī, mi̍ Cho̍wa̍bī nda̍ pūa̍a̍ ndūa̍a̍ ā chūā dīāllu᷄ŋ A̍sa̍hɛ̄l wo̍ŋ, ma̍ kɔ̍ chɔ᷅ mu̍ŋ o̍ sɛ̄i̍ nda̍ yu̍ŋgo̍o̍ ni᷄ŋ Bɛ̍ti̍lɛ̍hɛ̄m. Mi̍ Cho̍wa̍bī nda̍ pūa̍a̍ ndūa̍a̍ ā mālnu᷄ŋ ma̍ bīī mīīŋ̄gōo̍. Ma̍ lɔ̄ɔ̄lū īchɔ̄l kōŋ kɔ̄la̍ŋ pi̍i̍ pi̍i̍, a̍ pāa̍le̍ si̍a̍āle̍ŋ ki̍nɛ̍i̍ nda̍ fūūlu̍u̍ Hi̍būlɔ̄ŋ ni̍.